Our Health

Archive for ఏప్రిల్, 2012|Monthly archive page

బీ పీ కంట్రోలు కాకపొతే ?.2.

In Our Health on ఏప్రిల్ 23, 2012 at 10:19 సా.

బీ పీ కంట్రోలు కాకపొతే ….

ఇంతకు ముందు టపాలో మనం సాధారణం గా  వత్తిడి లేక పీడనం గురించి తెలుసుకున్నాము. మనం గుండె ప్రధానం గా మన శరీర భాగాలన్నిటికీ రక్తాన్ని పంపు చేస్తుందని కూడా తెలుసుకున్నాము.
ఇలా రక్తాన్ని పదే పదే ఎందుకు పంపు చేయాలి గుండె ? అలాగే పదే పదే రక్తం మళ్ళీ గుండె లోకి ఎందుకు చేరుకోవాలి? ఎప్పుడైనా ఈ సందేహం మీకు వచ్చిందా?
ఎందుకంటే, మన దేహం లో ప్రతి భాగానికీ  ఆక్సిజెన్  అంటే ప్రాణ వాయువు కావాలి.  ఇంకా సూటి గా చెప్పాలంటే, నిరంతరం కావాలి.  మన దేహం లోని ప్రతి కణానికీ ప్రాణ వాయువు నిరంతరం అవసరం. 
మనం పీల్చే గాలి లోని ఆక్సిజెన్  మన ఊపిరి తిత్తుల ద్వారా , రక్తం లో కలుస్తుంది. ఆ రక్తం గుండెలోకి చేరుకొని, దేహం లో అన్ని భాగాలకూ పంపు చేయ బడుతుంది. అలాగే, మలినాలు మన శరీరం లోని అన్ని భాగాలనుంచీ మళ్ళీ రక్తం ద్వారా, ఊపిరి తిత్తులకు చేరుకొని, అక్కడ, మళ్ళీ శుభ్ర పరచ బడ్డ రక్తం మళ్ళీ గుండెకు చేరుకుంటుంది. అంటే గుండె నుంచి సరఫరా ఆయే రక్తంలో ఎక్కువ ఆక్సిజెన్ ఉంటుంది. గుండె కు తిరిగి వచ్చే రక్తం లో ఎక్కువ కార్బన్  డయాక్సైడ్  ఉంటుంది.
ఇప్పుడు  మానవులలో రక్త పీడనం  లేక బ్లడ్ ప్రెషర్  గురించి తెలుసుకుందాము.
 ఈ రక్త పీడనాన్ని పాదరసం లేక మెర్క్యురీ తో కొలుస్తారు కాబట్టి, ఇంకా విపులం గా చెప్పాలంటే,  బీ పీ ను చెక్ చేసే పరికరం సాధారణం గా  చారిత్రకం గా పాదరసం తో తయారు చేయ బడి ఉండేవి కాబట్టి, ఆ పాదరసం  మన  ఆర్టరీ లేక ధమని  లోని రక్త పీడనానికి స్పందించి ,  సన్నని గాజు నాళికలలో ఎంత పైకి వెళుతుందో, ఆ ఎత్తును మిల్లీ మీటర్లలో చెపుతారు.  అంటే చెప్పేటప్పుడు  ఉదాహరణ కు 120 బై 80 మిల్లీ మీటర్స్ అఫ్ మెర్క్యురీ అని చెపుతారు. దానినే  ఇలా సూచిస్తారు  : 120/ 80 mm of Hg ( Hg అంటే  పాదరసం యొక్క రసాయన నామం  పూర్తిగా hydrarginum లేక హైడ్రార్జినం  )  కానీ భారత దేశం లో చాలా మంది వైద్యులు కేవలం 120 / 80  అని  మాత్రమే  రాస్తుంటారు ఎక్కడ రాసినా !
సాధారణం గా బీ పీ ని అంటే బ్లడ్ ప్రెషర్ ను  సిస్టోలిక్ ఇంకా డయా స్టోలిక్ బీ పీ అని రెండు రకాలైన బీ పీ గా చెపుతుంటారు, దీనిని ఒక దాని మీద ఒకటి వేసి అంటే పైన ఉన్న పీడనం లేక వత్తిడి సిస్టోలిక్ పీడనం, క్రింద చూపించే వత్తిడి డయా స్టోలిక్  పీడనం. 
ఈ రెండు రకాలు గా ఎందుకు చేపుతారంటే  గుండె కొట్టుకుంటున్నప్పుడు, ( అంటే సంకోచం లేక కాంట్రా క్షన్ జరుగు తుండే సమయం లో )  అంటే పంపు చేస్తున్నప్పుడు, సరఫరా ఆయే రక్తం అన్ని భాగాలకూ చేరాలంటే ఎక్కువ పీడనం అవసరం. ఆ పీడనమే పైన చూపించ బడుతున్న పీడనం.  డయా స్టోలిక్ పీడనం సమయం లో గుండె వ్యాకోచించడం వల్ల రక్త నాళాలలో పీడనం లేక వత్తిడి తక్కువ గా ఉంటుంది అందు వల్ల క్రింద సూచించే పీడనం ఎప్పుడూ సిస్టోలిక్ లేక పైన చూపించిన పీడనానికన్నా  తక్కువ గా ఉంటుంది.
ఈ పైనా క్రిందా సూచించ బడే రెండు రక్త పీడనాలూ మనకు ముఖ్యమైనవే ! ఇప్పుడు   క్రింద పటం లో చూడండి.  అడల్ట్  అంటే వయోజనులలో  సామాన్యం గా ఉండ వలసిన రక్త పీడనం, ఎప్పుడు హై బీ పీ లేక హైపర్ టెన్షన్ గా పిలవ బడుతుందో ,( అంటే రక్త పీడనం లేక రక్త పోటు ).
ఇపుడు మనలో  రక్త పీడనం గురించి కొంత తెలుసు కున్నాము కదా ! వచ్చే టపా లో  మనలో రక్త పీడనం కంట్రోలు లో లేకుండా ఎక్కువ గా ఉంటే మానవులలో పరిణామాలు ఎలా ఉంటాయో చూద్దాము. 

బీ పీ కంట్రోలు కాక పొతే ఏం ?.1.

In Our Health on ఏప్రిల్ 22, 2012 at 3:23 సా.

బీ పీ  కంట్రోలు కాక పొతే ఏం ? :

బీ పీ గురించిన వివరాలు  తెలుసుకునే ముందు  రక్త పీడనం అంటే ఏంటో ప్రతి ఒక్కరూ కనీసం కొంత అయినా తెలుసుకోవాలి. 
మనకందరికీ  గుండె ఏమి చేస్తుందో తెలుసు కదా ! ( ఇక్కడ వీలైనన్ని తక్కువ సాంకేతిక పదాలు ఉపయోగించడానికి ప్రయత్నిస్తాను) , వీలైనంత ఎక్కువ మంది కి అర్ధం అవటం కోసం. గుండె మన శరీరం లోని ప్రతి భాగానికీ రక్తం సరఫరా చేస్తుంది, రక్త నాళాల ద్వారా. అలాగే మన దేహం లోని ప్రతి భాగం నుంచీ మళ్ళీ రక్తం తిరిగి  గుండె కు చేరుకుంటుంది కూడా !  ఇలా జరగటానికి ఒక నిర్ణీతమయిన పీడనం అవసరం.
పీడనం అంటే ఏమిటి ?:
పీడనం  అంటే వత్తిడి. ఉదాహరణ కు మనం నీటి పంపు కు  ఇంకో పైపు ను కనెక్ట్ చేశామనుకుంటే ,  ఒక పదో ఇరవైయ్యో అడుగుల దూరం లో ఉన్న  సన్న జాజి  పూల మొక్కకు, పంపు ను కనీసం మధ్య వరకు  తిప్పితే కానీ నీరు సరిగా అందదు కదా అలాగే, పూర్తిగా తిప్పితే ఆ వత్తిడికి కొన్ని పూలు రాలి పోతాయి కదా ! ఇక్కడ పంపు లో నీటి ధారను  ఒక కవాటం ద్వారా మనం క్రమీకరిస్తున్నామన్నమాట !
కానీ మనం ఇక్కడ ఇంకో విషయం కూడా గమనించాలి.  భారత దేశం లో ఎడా పెడా, ఏ నిబంధనలనూ పాటించ కుండా నీటి పంపులు కనెక్షన్లు ఇవ్వటం వల్ల , మనం ఉంటున్న ఏరియా లో  నీటి పంపు లోనుంచి సరఫరా రావడమే  తక్కువ పీడనం తో వస్తూంది. ఇది చాలా సాదారాణం కదా !
 ( అందుకే ప్రజలు ‘ స్థానికం గా పేరున్న ‘ వారి ఇళ్ళకు తరువాత  ఇళ్ళలో ఉండటానికి సందేహిస్తుంటారు.  ముందు ఇళ్ళ లో పరవాలేదనుకుంటాను !  ) మనం పీడనం విషయం మాట్లాడుతున్నాము కదా !  ఇక్కడ మనకు తెలుస్తున్నది , పీడనం, ఉనికి అంటే సోర్స్ నుంచీ , అలాగే చివరల్లో కూడా క్రమీకరించ బడుతుంది అని !
ఇప్పుడు అధిక పీడనం పరిణామాలు ఎలా ఉంటాయో ఒక పోలిక చూడండి. 
పైన ఉన్న రెండు పటాలు చూడండి. మొదటి పటం లో ఉన్న చక్కటి నమూనా. అది మీరు నిశితం గా పరిశీలించండి. ఆ నమూనా మార్బుల్ అంటే పాల రాయి మీద చెక్కినది.  అలాగే రెండో నమూనా చూడండి. అది మెటల్ ను చెక్కి అందం గా తయారు చేసిన అశ్వం !
ఈ రెండిటికీ  బీ పీ కంట్రోలు కూ సంబంధం ఏమిటి ?
పైన చూస్తున్న రెండు నమూనాలనూ కేవలం ఎక్కువ వత్తిడి తో పని చేసే నీటి ప్రవాహం తో కత్తిరించారంటే నమ్మ గలరా ? ఇది పూర్తిగా నిజం ! 
ఇలా విపరీతమైన వత్తిడి ఉన్న నీటి తో  గ్రానైట్ ను కానీ లోహాన్ని కానీ కత్తిరించే పరికరాన్ని’ వాటర్ జెట్ కట్టర్ ‘ అంటారు ! 
పై ఉదాహరణ ఇవ్వటం ఎక్కువ వత్తిడి యొక్క పరిణామాలు ఎలా ఉంటాయో మీకు వివరించేందుకే !
వచ్చే టపాలో ఇంకొన్ని విషయాలు చూద్దాము !

గుండె జబ్బుల గురించి అందరికీ ఎందుకు?

In Our Health on ఏప్రిల్ 22, 2012 at 9:38 ఉద.

గుండె జబ్బుల గురించి అందరికీ ఎందుకు? 

 
గుండె, లేక హృదయ సంబంధ మైన జబ్బులు, ప్రపంచం మొత్తం లో ఎక్కువ మందిని  బాధ పెడుతున్నాయి. పై పటం చూడండి.
ఈ గుండె జబ్బుల వల్ల, బాధ పడుతున్న వ్యక్తే కాక, వారి కుటుంబం కూడా కుంగి పోయి, అనేక విధాల నష్ట పోతుంటారు.
ప్రపంచమంతా, మానవులలో పెరుగుతున్న  ‘ చెడు ‘ జీవన శైలి ‘ పోకడలు, ఈ గుండె జబ్బులను ఇంకా, ఇంకా పెంచుతున్నాయి.
భారత దేశం లో కూడా, గుండె జబ్బుల వల్ల సంభవిస్తున్న మరణాలు, మిగతా అన్ని జబ్బులూ , కారణాల తో పోలిస్తే కూడా చాలా చాలా ఎక్కువ. 
మరి  అందరికీ ఈ గుండె జబ్బుల గురించి ఎంత వరకు తెలుసు?
చాలా మంది, గుండె జబ్బు తో బాధ పడుతున్న వారు, కేవలం ఉప్పు తగ్గించి ఆహారం తీసుకోవడమే చేస్తారు. మిగతా జాగ్రత్తలు అశ్రద్ధ చేస్తుంటారు.
అందుకు ప్రధాన కారణం, గుండె జబ్బుల మీద తగిన అవగాహన లేక పోవడమే !
అంతే కాక,  కుటుంబం లోని యువత ఇలాంటి విషయాల మీద పరిజ్ఞానం పెంచుకుంటే కూడా, వారి తలిదండ్రులకూ, బంధువులకూ, తగిన సలహా ఇచ్చి, సహాయం చేసిన వారవుతారు. 
అలాగే , వైద్య సలహా ఎప్పుడు తీసుకోవాలో కూడా తెలుసుకుంటే, అనవసరం గా సమయం వృధా, డబ్బు వృధా కాకుండా జాగ్రత్త పడవచ్చు, క్లినిక్స్ , హాస్పిటల్స్ , వైద్యుల చుట్టూ తిరగకుండా !
 అతి ముఖ్యం గా , గుండె జబ్బుల మీద సరియిన అవగాహన  ప్రతి ఒక్కరూ ఏర్పరుచుకుని, తగు జాగ్రత్తలు క్రమం గా పాటిస్తే,  వారు ఎక్కువ ఆరోగ్య వంతులు గా, దీర్ఘ కాలం, ఆనంద మయ జీవితం గడపచ్చు. ఎందువల్ల నంటే చాలా రకాలైన గుండె జబ్బులు మన జీవనశైలి తో ప్రభావితం అవుతున్నవే ! 
తరువాతి టపా నుంచి గుండె , గుండె సంబంధమైన జబ్బులను వివరం గా తెలుసుకుందాము.
ఈ బ్లాగు చదివే ప్రతి వారి  దగ్గర నుంచి  ప్రశ్నలూ , అభిప్రాయాలూ, తెలుగు లో కానీ, ఇంగ్లీషు లో కానీ ఆహ్వానింప బడుతున్నాయి.
మీరు కేవలం, ఈ సైట్ కు మీ హిట్స్ ద్వారానే కాక, మీ ప్రశ్నల ద్వారా,  మిగతా చదువరులకు కూడా ఎక్కువ సహాయం చేసిన వారవుతారు.

సర్వైకల్ క్యాన్సర్.9. అతి ముఖ్యమైన నివారణ చర్యలు.

In Our Health on ఏప్రిల్ 21, 2012 at 10:54 ఉద.
HPV/LSIL On Pap Smear ThinPrep liquid-based Pa...

HPV/LSIL On Pap Smear ThinPrep liquid-based Pap. Normal squamous cells on left; HPV-infected cells with mild dysplasia (LSIL) on right. See also File:Low-Grade SIL with HPV Effect.jpg - Another example of LSIL with HPV changes. File:High-Grade SIL.jpg - High-grade squamous intraepithelial lesion (HSIL). (Photo credit: Wikipedia)

సర్వైకల్ క్యాన్సర్.9. అతి ముఖ్యమైన నివారణ చర్యలు:

 సర్వైకల్ క్యాన్సర్ గురించి రాసిన అన్ని టపా ల సారాంశం,  పై పటం చెపుతుంది మీకు, ఒక్క వాక్యం లో !
మునుపటి టపాలో రెండు నివారణ చర్యల గురించి తెలుసుకున్నాము. ఇప్పుడు మిగతా రెండు అతి ముఖ్యమైన నివారణ చర్యలు ఏమిటో వివరం గా తెలుసుకుందాము.
3.సర్వైకల్  స్క్రీనింగ్  : స్మియర్ టెస్ట్ అంటే ప్యాప్ స్మియర్ టెస్ట్ ద్వారా  ఒక క్రమ పధ్ధతి లో  సర్విక్స్ కు చెందిన కణాలను పరీక్షించడం  ఇప్పటి వరకూ  అందుబాటు లో ఉన్న వాటి లో ఉత్తమమైన పధ్ధతి.
క్రితం టపాలలో వివరించినట్టు , HPV వైరస్ చాలా సాధారణమైన ఇన్ఫెక్షన్. కానీ  కేవలం కొద్ది మంది లో మాత్రమే  ఈ ఇన్ఫెక్షన్, సర్వైకల్ కణాలను క్యాన్సర్ కణాలుగా మార్చి, సర్వైకల్ క్యాన్సర్ కు కారణ మవుతుంది. ఆ కొద్ది మంది, రతి క్రియా  జీవితం అంటే సెక్స్ పరంగా  యాక్టివ్ గా ఉంటున్న వారు ఎవరైనా కావచ్చు. అంటే  ఎవరిలో ఎప్పుడు  సర్వైకల్ కణాలు మార్పు చెందుతాయో  ప్యాప్ స్మియర్ టెస్ట్ చేయకుండా కనుక్కోవడం అసాధ్యం.  అందువల్లనే ఈ ప్యాప్ స్మియర్ ప్రాముఖ్యత పొందింది.
స్మియర్ టెస్ట్ ఎప్పుడు చేయించు కోవాలి? : 
పాశ్చాత్య దేశాలలో, ఆ దేశాలకు చెందిన ప్రతి సిటిజెన్  కూ  ఆరోగ్య పరం గా ఏ పరీక్షలు ఏ సమయం లో చేయించుకోవాలో  ఆ దేశం యొక్క ప్రభుత్వ ఆరోగ్య సంస్థ నిర్ణయించి తదనుగుణం గా  వారికి సలహా ఇచ్చి పరీక్షలు చేయిస్తుంది వారి చేత.
భారత దేశం లో కూడా అలాంటి సంస్థ ఉంది  కానీ అది ఎలా పని చేస్తుందో  ఇప్పుడు అక్కడ ఉంటున్న వారికి తెలియాలి. ప్రత్యేకించి సర్వైకల్ క్యాన్సర్ నివారణ కు ఏ చర్యలు చేపడుతుందో,  ఈ టపా చదువుతున్న వారు ఎవరైనా తెలియ చేయవచ్చు, వారికి తెలిస్తే.
సరే ఇప్పుడు అసలు విషయం:  ఇంగ్నండు లో మాత్రం  25 నుంచి 49 ఏళ్ళ వయసు లో ఉన్న స్త్రీలకు ప్రతి మూడు సంవత్సరాలకు ఒకసారి, 50 నుంచి 64 ఏళ్ళ మధ్య వయసులో ఉన్న స్త్రీలకు  ప్రతి అయిదు సంవత్సరాలకు ఒకసారి  ఈ స్క్రీనింగ్  పరీక్ష కు పిలవడం  జరుగుతుంది.   ఒకసారి వారు ఈ పరిక్ష ను జరిపించుకొంటే, తరువాత పరీక్షలు ఎంత త్వరగా చేయించుకోవాలి అనే విషయం మొదటి పరీక్ష లో చూసిన సర్వైకల్ కణాల మార్పు  మీద ఆధార పడుతుంది.
4.HPV టీకా  లేక HPV వాక్సిన్ :  ఇప్పటి వరకూ రెండు మందుల కంపెనీలు  ఈ HPV టీకా ను తయారు చేస్తున్నాయి.  మనం మునుపటి టపాలో తెలుసుకున్నట్టు , HPV వైరస్ లు  వంద కు పైగా ఉన్నాయి. అందు లో ముఖ్యమైన 6,11,16,18 రకాలు ఎక్కువ సర్వైకల్ క్యాన్సర్ లకు కారణం. అందు వల్ల ఈ టీకాలు వేయించుకుంటే చాలా రోగ నిరోధక శక్తి పెరుగుతుంది. కానీ HPV టీకా,  సర్వైకల్ క్యాన్సర్ రాకుండా  సంపూర్ణ రక్షణ ఇవ్వదు.
HPV టీకా ఎప్పుడు తీసుకోవాలి? : ప్రతి యువతీ, ఈ టీకాను వారు రతి క్రియ లో  ప్ర ప్రధమం గా పాల్గొన బోయే సమయానికి ముందే  వేయించుకోవాలి. ఒకసారి రతి క్రియా జీవితం మొదలు పెడితే,  ఈ టీకా పూర్తి రక్షణ ఇవ్వదు.  అంటే అలాంటి సమయాలలో ఇన్ఫెక్షన్ కనుక సంభవిస్తే, HPV టీకా పని చేయదు.
ఇంగ్లండు లో ఈ టీకా ఎప్పుడు ఇస్తారు, ఎవరికి ఇస్తారు ? :  12 నుంచి 13 ఏళ్ళ వయసు మధ్య ఉన్న అమ్మాయిలకు , మూడు టీకాలు, ఆరు నెలల వ్యవధి లో ఇస్తారు.
HPV టీకా తీసుకుంటే  స్మియర్ టెస్ట్  అవసరం లేదా ? : 
ముందు చెప్పు కున్నట్టు, టీకా కేవలం నాలుగు రకాల వైరస్  లకు వ్యతిరేకం గానే రక్షణ ఇచ్చి , రోగ నిరోధక శక్తి ని ఎక్కువ చేస్తుంది. క్యాన్సర్ కలిగించే ముఖ్యమైన రకాలు ఈ నాలుగే అయినప్పటికీ , మిగతా రకాలు కూడా క్యాన్సర్ కలిగించ గలవు కాబట్టి , స్మియర్ టెస్ట్  క్రమం గా అంటే  ప్రతి మూడేళ్ళకో, అయిదేళ్లకో చేయించు కోవడం ఉత్తమం.
ఈ విషయాలలో అనుమానాలు ఉంటే గైనకాలజిస్ట్ ను సంప్రదించడం మంచిది.
 వచ్చే టపా ద్వారా మళ్ళీ కలుసుకుందాం !

సర్వైకల్ క్యాన్సర్.8. నివారణ చర్యలు ఏమిటి ?

In Our Health on ఏప్రిల్ 20, 2012 at 8:05 సా.

సర్వైకల్ క్యాన్సర్.8. నివారణ చర్యలు ఏమిటి ? :

సర్వైకల్ క్యాన్సర్ లక్షణాల గురించీ , ఎలా కనుక్కోవచ్చో  మనం ఇప్పటి వరకూ తెలుసుకున్నాము.
ఈ సర్వైకల్ క్యాన్సర్ మొదటి దశలలో తగిన పరీక్ష లు చేయించుకుని, కనుక్కోక పొతే, జరిగే పరిణామాలు,  అంటే కాంప్లికేషన్స్ , చాలా సీరియస్ గానూ,  అనుభ వించుతున్న స్త్రీకీ, ఆమె సంబందీకులకూ , చికిత్స చేసే వారికీ , చాలా బాధాకరం గా కూడా ఉంటాయి. అందు వల్ల వాటిని వివరం గా ప్రస్తావించడం లేదు ఇక్కడ.
కానీ అందరూ తెలుసుకోవలసిన  ముఖ్యమైన నివారణ చర్యల గురించి మనం ఇప్పుడు తెలుసుకుందాము:
సర్వైకల్ క్యాన్సర్ నివారణ చర్యలలో నాలుగు  ముఖ్యమైనవి అందులో మొదటి రెండు :
1. సురక్షిత రతి అంటే సేఫ్ సెక్స్ 
2. స్మోకింగ్ మానటం.
1.సేఫ్ సెక్స్  అంటే సురక్షిత  రతి :  HPV వైరస్  ఒకరినుంచి ఇంకొకరికి  అరక్షిత అంటే అన్ సేఫ్  రతిక్రియ వల్లనే  పాకుతుంది. అంటే స్ప్రెడ్  అవుతుంది.   అందువల్ల రతిక్రియ  లో పాల్గొనాలని అనుకునే యువతీ యువకులు, కామ లేక రతి ద్వారా కలిగే లేక పాకే ఇన్ఫెక్షన్ లు అన్నిటికీ ముందే పరీక్ష చేయించుకోవడం ఉత్తమం.  ఇది చాలా సున్నితమైన విషయం అయినప్పటికీ ,  ఇరువురికీ ఎంతో శ్రేయస్కరం.
అంతే కాకుండా,  ప్రతి రతి క్రియకు ముందూ పురుషుడు, స్త్రీ  గర్భ నిరోధ తొడుగులు అంతే కండోము, డయాఫ్రం  లాంటివి వాడటం కూడా ముఖ్యం.
ఈ తొడుగులు కేవలం గర్భ నిరోధమే కాకుండా,  వివిధ కామ పరమైన అంటు వ్యాధులు సోకకుండా రక్షణ ఇస్తాయి.  కానీ ముఖ్యం గా గుర్తుంచు కోవలసిన విషయం : ఈ తొడుగులు  సంపూర్ణ రక్షణ ఇవ్వవు.( వంద శాతం రక్షణ ఇవ్వవు. )
2. స్మోకింగ్ మానడం :  ఉదాహరణకు అమెరికా లో అమెరికన్ లంగ్  అసోసియేషన్  అంచనా ప్రకారం 2008 లో రమారమి   25 మిలియన్ ల పురుషులు స్మోకింగ్ చేస్తుంటే,   రమారమి 21 మిలియన్ ల స్త్రీలు స్మోకింగ్ చేస్తున్నారు.
ఇలా స్మోకింగ్ చేస్తున్న స్త్రీలలో ప్రతి సంవత్సరానికీ ,  173, 940 మంది  మరణిస్తున్నారు కూడా ! ఇది ఒక్క అమెరికాలోనే ! 
స్మోకింగ్ మాన్పించడానికి  పాశ్చాత్య దేశాలు తీసుకుంటున్న వివిధ చర్యల వల్ల  సిగరెట్ కంపెనీ వాళ్ళు , ‘ తాళం మార్చి ‘  అభివృద్ధి చెందుతున్న దేశాలకు  వారి  సిగరెట్ల  ( తో ప్రాణాలు తేసే ) వ్యాపారాన్ని విస్తరిస్తున్నారు. అందువల్ల మన భారత దేశం లో  స్త్రీలు కూడా ‘  ఈ పాశ్చాత్య వ్యామోహం ‘ లో పడి  సిగరెట్ స్మోకింగ్  అలవాటు చేసుకుంటున్నారు.
అయితే స్త్రీలు సిగరెట్ స్మోకింగ్ చేయడానికీ , వారికి సర్వైకల్ క్యాన్సర్ రావడానికీ సంబంధం ఏమిటి ?  ఈ బ్లాగరు  తలా, తోకా లేకుండా రాసి పారేస్తున్నాడు అని అనుకుంటారేమో ! అలాంటి వారు  ఈ వివరణ చదవండి:
ఇప్పటి వరకూ జరిగిన అనేకమైన పరిశీలనలు, పరిశోధనల వల్ల,  సిగరెట్ స్మోకింగ్ చేస్తున్న స్త్రీలలో సాధారణం గా వచ్చే HPV వైరస్ ఇన్ఫెక్షన్ కాస్తా , సర్విక్స్ కణాల డీ ఎన్యే ను ముట్టడి చేసి  దానిని క్యాన్సర్ కణాలు గా మార్చి వేస్తుంది అని ఖచ్చితం గా తెలుసుకున్నారు. ఈ విధమైన మార్పులు సిగరెట్ తాగని స్త్రీలలోనూ  జరుగుతున్నా,  స్మోకింగ్ చేస్తున్న వారిలో ఈ మార్పులు త్వరగా నూ, ఎక్కువ గాను జరుగుతున్నట్టు గుర్తించారు.  ఈ టపాల పరంపర లో మొదటి టపా ల లో  సిగరెట్ స్మోక్ లో ఉండే విష పదార్ధాలు మన దేహం లో కణాల డీ ఎన్యే ను ఎలా ముట్టడి చేసి వాటిని క్యాన్సర్ కణాలు గా మార్చుతాయో తెలుసుకున్నాము కదా !
వచ్చే టపాలో మిగతా  రెండు అత్యంత ముఖ్యమైన నివారణ చర్యల గురించి తెలుసుకుందాము !

సర్వైకల్ క్యాన్సర్.7. మిగతా లక్షణాలు.

In Our Health on ఏప్రిల్ 19, 2012 at 8:20 సా.

సర్వైకల్ క్యాన్సర్.7. మిగతా లక్షణాలు: 

 

మునుపటి టపా లో మనం తెలుసుకున్నది, సర్వైకల్ క్యాన్సర్ చాలా ప్రారంభ దశలో ఉన్నప్పుడు సర్విక్స్ లో కలిగే మార్పులూ,  ఆ మార్పుల వల్ల కనిపించే లక్షణాలు. 
ఇప్పుడు  మిగతా లక్షణాలు కూడా చూద్దాము.
1. రతి క్రియ తరువాత యోని భాగం లో  ఎక్కువ నొప్పి :  
రతి క్రియ జరిగిన తరువాత  యోని అంటే వజైనా లోపల కానీ, వజైనా చుట్టూ కానీ నొప్పి గా ఉండవచ్చు. ఇలా ఎందుకు జరుగుతుందంటే, HPV వైరస్ ఇన్ఫెక్షన్ సర్విక్స్ మీద ఉండటం వల్ల,  సర్విక్స్ చుట్టూ ఉన్న నాడీ కణజాలం ఎక్కువ సెన్సిటివ్ గా అయి,  వజైనా లోనూ, చుట్టూ పక్కలా నొప్పి గా ఉంటుంది. అంతే కాక ,  వజైనా లేక యోని , సర్విక్స్ నుంచి నొప్పి ని తెలియ చేసే నాడి ఒకటే ( ఇది S – 2, 3, 4. నాడి ) .
2. వజైనల్ డిశ్చార్జ్ :  అంటే వజైనా నుంచి  చెడు వాసనతో ద్రవాలు రావడం : 
సాధారణం గా వజైనా, సర్విక్స్ లో గ్రంధులు ఉంటాయి. ఈ గ్రంధులు స్రవించి, వజైనా నూ, సర్విక్స్ నూ తేమ గా ఉంచుతుంటాయి.
ఇలా గ్రంధులు స్రవించడం వల్ల, ఆ భాగాలు ఆరోగ్యం గా ఉండి, రతి క్రియకూ, అంటే పురుషాంగం యోనిలో సులభం గా నొప్పి లేకుండా  ప్రవేశించ డానికీ , అలాగే వీర్య కణాలు సులభంగానూ , సురక్షితం గా నూ గర్భాశయం లో కి ప్రవేశించాడానికీ, అనుకూలం గా ఉంటుంది.
ఆ భాగాలలో HPV ఇన్ఫెక్షన్ ఉన్నప్పుడు , ఆ మాటకొస్తే, ఏ రకమైన ఇన్ఫెక్షన్ అయినా ఉన్నప్పుడు, ఆ గ్రంధుల స్రావం తో పాటు ఇన్ఫెక్షన్, ఇతర కణాలూ కలిసి, చెడు వాసన తో కూడిన ద్రవం ఏర్పడుతుంది. దీనినే   ‘   అన్ ప్లెసెంట్ వజైనల్ డిశ్చార్జ్ ‘ అంటారు. 
ఈ రకమైన డిశ్చార్జ్  కు కారణం, చాలా రకాల ఇన్ఫెక్షన్ లు కావచ్చు.  కానీ ముఖ్యం గా గుర్తు ఉంచుకోవలసిన విషయం ఏమిటంటే, అన్ ప్లె సెంట్ వజైనల్ డిశ్చార్జ్  ఎప్పుడూ అసాధారణమైన లక్షణం.  అది సహజం కాదు. 
అలా జరిగినప్పుడు, వెంటనే గైనకాలజిస్ట్ సలహా తీసుకోవాలి. 
3. మూత్ర విసర్జన చేసే సమయం లో నొప్పి : 
సాధారణం గా మూత్ర విసర్జన చేసే సమయం లో నొప్పి,  యూరిన్ ఇన్ఫెక్షన్ వల్ల వస్తూంది.  కానీ కొన్ని సమయాలలో ఈ లక్షణానికి కారణం సర్వైకల్ క్యాన్సర్ కావచ్చు. 
 
మునుపటి టపాలో చెప్పిన మూడు లక్షణాలు, పైన చెప్పిన మూడు లక్షణాలు,  ఈ ఆరు లక్షణాలనూ మనం  నిశితం గా గమనించి నట్టయితే, మిగతా ఋతు క్రమం లక్షణాలనూ, లేక  జననేంద్రియ భాగం లో వచ్చే ఇన్ఫెక్షన్ లక్షణాలనూ పోలి ఉన్నాయి కదా ! 
ఒక విధం గా చెప్పాలంటే,  HPV వైరస్  ను   సర్విక్స్ ను చాలా కపటం గా , అంటే కన్నింగ్ గానూ ,  గుప్తం గానూ ముట్టడి చేస్తున్న అతి సూక్ష్మమైన, క్రూరమైన  దొంగలు గా పోల్చ వచ్చు.  ఈ వైరస్ దొంగలు, సర్విక్స్ ను ముట్టడి చేసి, కొన్ని లక్షణాలను,  పరిణామాలూ కలిగిస్తాయి.   ఈ లక్షణాలు సాధారణం గా స్త్రీలలో కలిగే  మిగతా లక్షణాలను పోలి ఉన్నాయి కదా !  ఈ ‘  దొంగ లక్షణాలను ‘  అన్ని వేళల్లో అంటే అన్ని సమయాలలో కనిపెట్టడం కష్టం కదా ! అలాగని  స్త్రీల విలువైన జీవితాలను, ఈ అతి సూక్ష్మమైన దొంగలు కలిసి దోస్తూ ఉంటే చూస్తూ ఊరుకోలేము కదా ! అందు వల్లనే  ప్యాప్ స్మియర్ టెస్ట్ ప్రాముఖ్యత.    ఈ పరిస్థితులలో  ప్యాప్ స్మియర్ టెస్ట్  ను  సర్విక్స్ మీద  HPV  వైరస్  చేసిన ముట్టడి ని పట్టుకునే  డిటెక్టివ్  గా పోల్చ వచ్చు. 
మనం  ఈ డిటెక్టివ్  ని కనక పెట్టక పొతే , అంటే ప్యాప్ స్మియర్ టెస్ట్ కనక చేయక పొతే,  ఈ సూక్ష్మమైన వైరస్ దొంగలు ఎంతో ఎక్కువ హాని చేస్తాయి, స్త్రీకీ,  ఆ కుటుంబానికీ !!  ఇప్పుడు  ప్యాప్ స్మియర్ ప్రాముఖ్యత స్పష్టం గా అందరికీ అర్ధ మయిందని అనుకుంటాను.
 
వచ్చే టపాలో ఇంకొన్ని విషయాలు తెలుసుకుందాము! 
 
 

సర్వైకల్ క్యాన్సర్.6. లక్షణాలు.

In Our Health on ఏప్రిల్ 18, 2012 at 11:59 సా.

సర్వైకల్ క్యాన్సర్.6. లక్షణాలు:

ఇప్పటి వరకు మనం కొంత వరకూ తెలుసుకున్నాము కదా సర్వైకల్ క్యాన్సర్ గురించి.
ఇప్పుడు సర్వైకల్ క్యాన్సర్ లక్షణాలు ఎట్లా ఉంటాయో తెలుసుకోవాలి. ఎందుకంటే ఈ లక్షణాలు కనిపించినప్పుడే తగు జాగ్రత్త తీసుకొని తగిన పరీక్షలు అంటే ప్యాప్ స్మియర్ టెస్ట్ వంటివి చేయించి క్యాన్సర్ అవునో కాదో తెలుసుకోవడానికి, అంతే కాకుండా, ఇంకా ముఖ్యంగా తొలి దశలోనే కనుక్కుంటే, ఎక్కువ ఉపయోగకరమైన అంటే,  జీవితాన్ని ఎక్కువ కాలం పొడిగించ గలిగే చికిత్స చేయ వచ్చు. 
ఇప్పుడు తొలిదశల లో సర్వైకల్ క్యాన్సర్ చూపే లక్షణాలు చూద్దాము:
ఇవి ముఖ్యం గా మూడు:
1. అసాధారణ  గర్భాశయ  రక్త స్రావం: 
అంటే సర్విక్స్ నుంచి వచ్చే రక్త స్రావం కూడా అనుకోవచ్చు. మనం మునుపటి టపాలలో చూశాము సర్విక్స్ కు ఆ పేరు గర్భాశయం లో మెడ భాగం లో ఉండటం వల్ల వచ్చిందని.
ఈ సర్విక్స్ మీద వ్రణం, లేక  పుండు లాంటిది ఏర్పడ్డప్పుడు కొంత రక్త స్రావం అవుతుంది. ప్రత్యేకించి ఆ పుండు లాంటి భాగానికి ఘర్షణ అంటే ఫ్రిక్షన్  కలుగుతే. సర్విక్స్ భాగం లో 
ఇలా ఫ్రిక్షన్  ప్రత్యేకించి రతిక్రియ లో జరగటానికి అవకాశం ఉంటుంది కదా ! అందు కనే  దీనిని రతి క్రియానంతర అంటే పోస్ట్ కాయిటల్ బ్లీడింగ్ అంటారు.
ఇలా రతిక్రియ తరువాత కొద్దిగా బ్లీడింగ్ అంటే రక్త స్రావం జరగటం, స్త్రీ లలో  వారి  సెక్స్ జీవితం మొదటి దశలలో అంటే వారు తొలి సారి రతిక్రియ లో పాల్గొన్నప్పుడు మొదటి కొన్ని సార్లు జరగ వచ్చు. అప్పుడు అది అసాధా రణం కాదు.అలా సహజం గా జరుగుతుంది. కానీ ఆ తరువాత నుంచి జరిగే రతి క్రియల్లో, ఇంకా స్పష్టంగా చెప్పాలంటే రతిక్రియ తరువాత కనుక రక్త స్రావం జరిగితే అది అసాధా రణ రక్త స్రావం అన బడుతుంది. ఇలా కనక జరిగితే  గైనకాలజిస్ట్ ను వెంటనే సంప్రదించి తగు సలహా తీసుకోవాలి.
2.ఋతు స్రావం కాని సమయాలలో రక్త స్రావం : 
సాధారణం గా ప్రతి స్త్రీ కీ , రజ స్వల అయినప్పటి నుంచి,  వారికి ఒక ప్రత్యేకమైన ఋతు క్రమం ఏర్పడుతుంది.  ఈ ఋతు క్రమం  21 నుంచి35 రోజుల కు ఒకసారి ఉంటుంది. 
ఈ ఋతు క్రమం లో  మూడు నుంచి ఏడు రోజులు ఋతు స్రావం జరుగుతుంది. మనం ఋతుక్రమం వివరాలు మునుపటి టపాలలో చూశాము కదా, ఋతుస్రావం సమయాన్ని మెన్సెస్ అంటారనీ, ఈ సమయం లో గర్భాశయం లైనింగ్ నుంచి రక్త స్రావం జరిగి , ఆ రక్తం తో పాటు  అండం ( అంటే వీర్య కణం తో కలవలేక పోయిన అండం ) కూడా బయటకు పంప బడుతుందనీ. ఇదంతా సహజ ఋతుస్రావం అనబడుతుంది.  ఇలా కాకుండా ఋతు స్రావం కాని సమయాలలో రక్త స్రావం అవుతే, వెంటనే గైనకాలజిస్ట్ ను కన్సల్ట్ చేయాలి.
3.ఋతు క్రమం ఆగి పోయాక జరిగే ‘ ఋతుస్రావం’ : 
సాధారణం గా ఋతుక్రమం 45 నుంచి 52 ఏళ్ళ మధ్య స్త్రీలలో ఋతుక్రమం ఆగి పోతుంది. దీనినే మెనో పాజ్  అంటారు. 
( లేక తెలుగులో ‘ ముట్లుడిగి పోవడం ‘  అంటారు.)  ఇలా జరిగే సమయం లో  కొంతవరకూ ఋతుక్రమం సక్రమం గా ఉండక పోవచ్చు. కానీ ఋతుక్రమం పూర్తిగా ఆగిపోయాక మళ్ళీ  ఋతు స్రావం లేక ‘ రక్త స్రావం ‘ జరిగితే దానిని ఏమాత్రం అశ్రద్ధ చేయకుండా గైనకాలజిస్ట్ కు చూపించి తగిన పరీక్షలు చేయించుకోవాలి.
వచ్చే టపాలో ఇంకొన్ని వివరాలు తెలుసుకుందాము !

సర్వైకల్ క్యాన్సర్. 5. స్మియర్ టెస్ట్ అంటే ఏమిటి ?

In Our Health on ఏప్రిల్ 17, 2012 at 10:03 సా.

సర్వైకల్ క్యాన్సర్. 5. స్మియర్ టెస్ట్ అంటే ఏమిటి ? 

మునుపటి టపాలో  చదివారు కదా   రమణి , గౌతమ్ ల పచ్చని కాపురాన్ని ,  వారి తప్పు ఏమీ లేకుండానే  HPV వైరస్ ఎలా విషాదం చేసిందో !
వైరస్ లకు దయా, దాక్షిణ్యాలు ఏవీ ఉండవు. అతి క్రూరమైనవి. విచక్షణా రహితంగా  ముట్టడి చేస్తాయి, మానవులని.
నిజ జీవితం లో  సర్వైకల్ క్యాన్సర్  ను అత్యంత తోలి దశలలో గుర్తించడానికి  ఒక ప్రత్యెక మైన పరీక్ష చేస్తారు. ఆ పరీక్షను   ప్యాప్ స్మియర్ టెస్ట్ లేక సింపుల్ గా స్మియర్ టెస్ట్ అంటారు.
ప్యాప్ స్మియర్ అని పేరు ఎందుకు వచ్చిందంటే,  జార్జ్  పాపనికలో  అనే గ్రీకు శాస్త్రజ్ఞుడు  మానవ  కణాలను, ఆ కణాలలోని మార్పులను స్పష్టం గా  గుర్తించడానికి అవసరమైన రసాయనాలను కనిపెట్టాడు. అందువలన.
ఈ ప్యాప్ స్మియర్ పధ్ధతి వలన, సర్వైకల్  ఎపితీలియల్ అంటే ఉపరితలం మీద ఉన్న కణాలలో మొట్టమొదటి గా జరిగే మార్పులు, స్పష్టం గా గుర్తించవచ్చు. ఇలా గుర్తించి నట్లయితే, చికిత్స కూడా  సులభం అవుతుంది. ఎందుకంటే, వివిధ చికిత్సా పద్ధతుల ద్వారా  ఆ  ( మార్పు చెందిన క్యాన్సర్ ) కణాలను నిర్మూలించ వచ్చు.
తోలి మార్పులు కొన్ని కణాల లోనే కదా, దాని గురించి ఎందుకు రాద్ధాంతం, దానిని ఎందుకు పట్టించుకోవాలి ? :
ఎందుకంటే క్యాన్సర్ కణాలు అత్యంత వేగం గా మల్తిప్లై  అవుతాయి. అంటే రెండు, నాలుగు, నాలుగు ఎనిమిది, ఎనిమిది పదహారు, పదహారు ముప్పై రెండు ………..ఇలా చాలా వేగంగా సంఖ్యా పెరిగి పెద్ద వ్రణం లేక రాచ పుండు లా తయారవుతుంది.
ఇంకో ముఖ్య విషయం : ఈ పెరిగిన కణాలు అక్కడే ఉండక రక్తం ద్వారా, లేక లింఫు గ్రంధుల ద్వారా శరీరం లో మిగతా భాగాలకూ పాకుతాయి. దానినే స్ప్రెడ్ అవటం అంటారు. 
ఈ కారణం వల్లనే ,  అత్యంత తొలిదశ లో ఉన్నప్పుడు కనుక్కొని, ఆ కణాల ను నిర్మూలించడం మంచి పధ్ధతి.
ప్యాప్ స్మియర్ ద్వారా చూసే కణాలను కొన్ని రకాలు గా విభ జించుతారు. CIN 1:  ఈ దశలో  సర్వైకల్ కణాలలో మార్పులు మొదటి దశలో ఉంటాయి. CIN2: ఈ దశలో కణాలలో మార్పులు మోడరేట్ గా ఉంటాయి అంటే మధ్యస్తం గా, CIN 3: ఈ దశలో కణాలు ఎక్కువ మార్పులతో క్యాన్సర్ కణాలుగా ప్రస్ఫుటం గా కనిపిస్తాయి.
వచ్చే టపాలో ఇంకొన్ని విషయాలు తెలుసుకుందాము !

సర్వైకల్ క్యాన్సర్. 4. CIN for no sin !

In Our Health on ఏప్రిల్ 16, 2012 at 9:50 సా.

సర్వైకల్ క్యాన్సర్. 4.  CIN for no sin ! 

సిన్ ఫర్ నో సిన్ : 
రమణి  చక్కటి ఇల్లాలు.  ముప్పై రెండు ఏళ్ళు  ఉన్నాయంటే ఎవరూ నమ్మరు. ఇద్దరు రత్నాల లాంటి పిల్లలు. క్రమ శిక్షణ తో పెరిగింది. కాలేజీ  జీవితం బాగా ఎంజాయ్ చేసినా, హాస్టల్ లో ఉన్నా, ఎప్పుడూ  ‘ తను  గీసుకున్న హద్దులు ‘ దాట లేదు. స్పష్టం గా చెప్పాలంటే  బాయ్ ఫ్రెండ్స్ తో  స్నేహం రుచులు మాత్రమే ఆస్వాదించింది. తన జీవిత పధకం ప్రకారం ఇరవై రెండేళ్లకు,  చదువు అయ్యాక పెళ్లి చేసుకుంది, గౌతమ్ ను.  గౌతమ్  ఆనందానికి  హద్దులు లేవు. ఎందుకంటే ‘  బ్రహ్మచర్యాన్ని అతి  పవిత్రం గా కాపాడు కుంటున్నాడని ‘   తన కాలేజీ లో క్లాస్   మేట్స్  చాలా మంది  రెచ్చ గొట్టే వారు గౌతమ్ ను.  అయినా సరే, ఎప్పుడూ అలాంటి మాటలు పట్టించుకునే వాడు కాదు . ప్రవరాఖ్యుడి లా  తన విద్యార్ధి జీవితం  గడిపాడు.  తన ‘ దీక్ష’ కు దైవం ఇచ్చిన ‘ ప్రసాదం’ గా భావించి, రమణిని ,  తన సహా చారిణి గా, ఒక ‘  అమూల్యమైన  సుగంధ సుమం’  లా చూసుకుంటాడు. వారిరువురి  ప్రేమా, దాంపత్య సుఖం కలగలిసి  ఇద్దరు రత్నాల వంటి పిల్లలకు  జన్మ నిచ్చాయి.
ఒక శుక్ర వారం నాడు  ఆఫీసు నుంచి ఫోన్ చేశాడు గౌతమ్, ఆ రోజు సాయంత్రం వంట ఏర్పాట్లు ఏవీ చేయద్దనీ, ముగ్గురూ రెడీ గా ఉంటే,  మంచి రెస్టారెంట్ లో భోజనం చేసి ఇంటికి రావచ్చనీ.
సాయంత్రం  రెస్టారెంట్ లో ఫామిలీ సెక్షన్ లో కూర్చుని గౌతమ్ అత్యంత రుచికరమైన డిషెస్  తింటూ వాటి సిసలైన టాపింగ్స్  గా   రమణి అందాలనూ,  తమ ఇద్దరి ప్రేమ ఫలాలనూ  ఊహించుకున్నాడు. చాలా ఆనందం గా ఉంది, ఆ చిన్న కుటుంబాని కంతటికీ.
ఇంటికి   రాగానే అలసిపోయారేమో పిల్లలిద్దరూ వెంటనే నిద్ర పోయారు. గౌతమ్ రమణి చేయి తీసుకున్నాడు అతి సున్నితంగా, రమణి కి కూడా నిద్ర వచ్చీ రాకుండా ఉంది.  బుగ్గలు ఎరుపెక్కాయి  సిగ్గుతో !  ‘  ఆ సిగ్గు చూస్తె  పెళ్ళైన కొత్తల్లో  ఉన్న రమణి గుర్తొస్తున్నది ‘ అన్నాడు గౌతమ్. అప్రయత్నంగానే రమణి మనసు పులకించింది. తన దేహం తన వశం లో లేదు. వాడి పోయిన పూవు లా గౌతమ్ భుజాల మీద వాలి పోయింది, మగత గా !  ఆ మగత కేవలం నిద్రలేకనే కాదని గౌతమ్ కూ తెలుసు.  ఆ రాత్రి ఇంకో సారి మారింది, గౌతమ్ కూ రమణి కీ,   రమణీయం గా !
ఉదయం ఎప్పుడూ లేనిది , గౌతమ్ ను నిద్ర లేపింది  ఐదింటికే ! విచారం గా కూర్చొని ఉంది బెడ్ మీద రమణి. తమ పదేళ్ళ దాంపత్య జీవితం లో  గౌతమ్   ఎప్పుడూ చూడ లేదు రమణిని అలా !  వెంటనే తన కు హత్తుకొని అడిగాడు  ఏమైందని.
రమణి  రూం లో కింద పడేసి ఉన్న తన నైటీ ని చూపించింది తన వేలితో. తెల్లటి నైటీ కి రక్తపు మరక !  కొన్ని క్షణాలు అలా చూస్తూనే ఉండి పోయాడు గౌతమ్.  పీరియడ్స్  మొదలయాయా ? అని అడిగాడు అచేతనంగా. తల ప్రక్కలకు ఊపుతూ, ‘ క్రితం శుక్రవారం  ఐదో రోజు ‘ .  ‘  ఇలా ఎప్పుడూ జరగ లేదు ‘  తగ్గు స్వరం తో అన్నది రమణి. ఖిన్నుడయాడు గౌతమ్.  పైకి  తన భావాలు కనబడ నీయలేదు.  ‘ ఇప్పుడెలా  ఉంది ? ‘ అన్నాడు.  ‘ మామూలు గానే ఉంది. నొప్పి  కూడా ఏమీ లేదు ‘ అన్నది రమణి.
‘ ఈ రోజే గైనకాలగిస్ట్ దగ్గరికి వెళ్దాము, భయ పడకు ‘ అన్నాడు కానీ  తను కూడా ఆందోళన పడుతూ ఉండడం వల్ల  ‘ భయ పడకు ‘ అన్న మాట ధైర్యం గా అన్నట్లు వినిపించలేదు రమణి కీ !
పిల్లల్నిద్దరినీ  బంధువుల ఇంట్లో  దింపి ,  దగ్గరలో ఉన్న కార్పోరేట్ హాస్పిటల్ లో గైనకాలజిస్ట్ కు చూపించాడు రమణిని.  అన్ని వివరాలూ కనుక్కొని  ‘  ప్యాప్ స్మియర్  టెస్ట్ చేయాలి ‘  అన్నది ఆవిడ.
రమణి, గౌతమ్ లు ఏది జరగ కూడదనుకున్నారో అదే జరిగింది.    గైనకాలజిస్ట్  ఇద్దరినీ  కన్సల్టింగ్ రూం లో కూర్చోబెట్టి  ఇలా చెప్పింది
‘  రమణీ నీకు సర్వైకల్ క్యాన్సర్ ఉంది.  ఇది  మీ అదృష్టం వల్ల చాలా తోలి దశలోనే తెలుసుకోవడం జరిగింది. నీకు జరిగిన రక్త స్రావాన్ని’  పోస్ట్ కాయిటల్ బ్లీడింగ్ ‘  అంటారు అంటే రతి క్రియ జరిగిన వెంటనే కలిగే బ్లీడింగ్. అది సాధారణం గా జరగదు కదా.   మీరు వెంటనే నా దగ్గరికి వచ్చి మంచి పని చేశారు.   ప్యాప్ స్మియర్ టెస్ట్ లో నీ సర్విక్స్ కణాలు కొన్ని క్యాన్సర్ కణాలు గా మారాయి. దీనినే CIN లేక ‘  సర్వైకల్ ఇంట్రా ఎపితీలియల్ నియోప్లాసియా ‘ అంటారు.  మిగతా పరీక్షలు చేసి ఒక సారి ఆ కణాలు స్ప్రెడ్ అవలేదని నిర్ధారించిన తరువాత, ఒక చిన్న ప్రొసీజర్ తో ఆ క్యాన్సర్ కణాలను  తీసి వేయడమో,  లేసర్ తో  కరిగించ డమో చేయ వచ్చు. ‘  ఈ క్యాన్సర్ రావడం లో మీ ఇద్దరి తప్పూ ఏమీ లేదు. ఇది HPV అనే వైరస్ వల్ల వస్తుంది’.  
అతి భారంగా హాస్పిటల్ బయటకు నడిచాడు గౌతమ్, వాడి పోయినట్టు  ఉన్న తన ‘ సుగంధ సుమం పరిమళాన్ని’ మునుపటి కన్నా ఎక్కువ ప్రియం  గా ‘ ఆఘ్హ్రా ణిన్చుతూ ‘ !  

సర్వైకల్ క్యాన్సర్.3.కారణాలు.

In Our Health on ఏప్రిల్ 15, 2012 at 11:12 ఉద.

 సర్వైకల్ క్యాన్సర్.3.కారణాలు.

 
మునుపటి టపాలో చూశాము కదా HPV వైరస్ , ప్రత్యేకించి  HPV 16, 18 రకాలకు చెందిన వైరస్  డీ ఎన్యే ఎట్లా  సర్విక్స్  కణాల  డీ ఎన్యే లోకి చొచ్చుకు పోయి ,  క్యాన్సర్ కణాలను పుట్టించి క్యాన్సర్ కు ఎట్లా కారణం అవుతుందో !
ఇప్పుడు  మిగతా కారణాలు,  లేక రిస్క్  ఫాక్టర్స్  చూద్దాము.
HPV వైరస్ ఇన్ఫెక్షన్ స్త్రీలలో సాధారణం అయినప్పటికీ , అందరిలోనూ  సర్వైకల్ క్యాన్సర్ రాకుండా కొందరిలోనే  రావటానికి , కొన్ని ప్రత్యేక పరిస్థితులు కూడా కారణం అవుతాయని శాస్త్రజ్ఞులు గుర్తించారు.
ఈ ప్రత్యేక పరిస్థితులు లేక రిస్క్ ఫ్యాక్టర్స్  ఇవి : 
 
1. సిగరెట్   స్మోకింగ్ :  స్మోకింగ్  చేస్తున్న యువతులు లేక స్త్రీలలో  సర్వైకల్  క్యాన్సర్  వచ్చే అవకాశం, స్మోకింగ్ చేయని వారితో పోలిస్తే , రెట్టింపు అవుతుంది. అంటే ఉదాహరణ కు స్మోకింగ్ చేయని  ఒక పది మంది లో  ముగ్గురికి సర్వైకల్ క్యాన్సర్ వస్తే,  స్మోకింగ్ చేస్తున్న  పదిమంది లో  ఆరుగురికి వస్తుందన్న మాట.  దీనికి కారణం ఏంటో మీకు ప్రత్యేకం గా చెప్పనవసరం లేదనుకుంటాను. ఎందుకంటే  స్మోకింగ్ వల్ల విడుదల అయిన  నాలుగు వేల  విష పదార్ధాలు,  సర్విక్స్  కణాలనీ, అంటే ఇంకా  ఖచ్చితం గా చెప్పాలంటే , కణాల డీ ఎన్యే నూ మార్చి వేస్తాయి.  ఇక్కడ జరుగుతున్నది : సర్వైకల్ కణాలు, ఆ కణాల డీ ఎన్యే రెండు విధాల  ముట్టడి  ఎదుర్కుంటున్నాయి. ఒకటి  HPV వైరస్, రెండు  స్మోకింగ్ వల్ల  రక్తం లో కి విడుదల అయిన  విష  పదార్ధాలు. 
2. గర్భ నియంత్ర ణ  పిల్స్  వాడే స్త్రీలు:  వీరు  అయిదు సంవత్సరాల కన్నా ఎక్కువ కాలం  కాంట్రా సేప్టివ్  పిల్స్  తీసుకుంటూ ఉంటే కూడా  సర్వైకల్  క్యాన్సర్ వచ్చే అవకాశం రెట్టింపు అవుతుందని తెలిసింది. 
సర్వైకల్  కణాలలో  పిల్స్  తీసుకోవడం వల్ల  కలిగే హార్మోనుల  మార్పు , ఆ  కణాల  రోగ నిరోధక శక్తి ని తగ్గిస్తాయని భావించ బడుతుంది.
3. సంతానం కలిగి ఉండటం :  పిల్లలు లేని వారితో పోలిస్తే , ఇద్దరు పిల్లలు ఉన్న స్త్రీలలో  సర్వైకల్ క్యాన్సర్ వచ్చే అవకాశం రెట్టింపు అవుతుంది. అలాగే ఎంత  ఎక్కువ మంది పిల్లలను స్త్రీ కలిగి ఉంటే ,  సర్వైకల్ క్యాన్సర్ వచ్చే అవకాశం అంత  ఎక్కువ  అవుతుంది అని  వివిధ  పరిశీలనలలో తెలిసింది.  దీనికి కారణం :  ఆ  యా స్త్రీలలో రోగ నిరోధక శక్తి తగ్గి వారికి HPV virus ఇన్ఫెక్షన్  సులభం గా  వచ్చేట్టు చేయటం జరుగుతుంది. 
4. reduced  immunity :  స్త్రీలలో ఏ కారణం వల్ల నైనా రోగ  నిరోధక శక్తి అంటే ఇమ్యునిటీ అంటారు , ఈ  ఇమ్యునిటీ  తగ్గితే కూడా , ఆ స్త్రీలలో  HPV వైరస్  ఇన్ఫెక్షన్  త్వర గా వస్తుంది.  ఇలా ఇమ్యునిటీ తగ్గటానికి కారణాలు:  HIV లేక  AIDS వైరస్ ఇన్ఫెక్షన్ , లేక  కొన్ని పరిస్థితులలో తీసుకునే ఇమ్యునో సప్రేసేంట్  మందులు.
5. ఎక్కువ మంది పురుషుల తో  రతి క్రియ  :  అంటే  స్త్రీలు  ఒకరి కన్నా ఎక్కువ మంది తో కామ పరమైన  సంబంధం పెట్టుకుంటే, అలాంటి స్త్రీలలో  HPV వైరస్  ఇన్ఫెక్షన్  త్వరగా వచ్చినట్టు  గుర్తించడం జరిగింది.  ఇలాంటి  జీవన శైలి ఉన్న స్త్రీలు కండోము వాడుతున్నప్పటికీ , ఆ కండోము వారికి  HPV వైరస్ సోకకుండా  సంపూర్ణ రక్షణ  ఇవ్వటం లేదని  కూడా ఖచ్చితం గా తెలిసింది. 
 
వచ్చే టపాలో  ఇంకొన్ని వివరాలు తెలుసుకుందాము ! 

%d bloggers like this: