రుతుస్రావ సమయంలో నొప్పులు చాలా సాధారణం. ప్రత్యేకించి ఋతుక్రమం మొదలైన కొన్ని నెలలు , అందులో ప్రత్యేకించి యుక్త వయసులో ఉన్న యువతులలో ఈ రకమైన నొప్పులు కనీసం వంద మందికి ఇరవై అయిదు మందిలో కనబడతాయి.

ఈ స్థితి లో వచ్చే నొప్పి  క్రింద ఉదర భాగం లో అంటే కటి వలయ లేక పెల్విక్ ప్రాంతం లో మొదలవుతుంది.  ఇది పలు రకాలు గా స్త్రీలలో కనిపిస్తుంది.

సూదుల తో పొడిచినట్టు గానూ, మెలితిప్పినట్టు గానూ, మంట గానూ  ఈ నొప్పులను స్త్రీలు అనుభవించ వచ్చు. కొన్ని సమయాలలో ఈ నొప్పి పెల్విక్ లేక కటి వలయ ప్రాంతం నుంచి క్రింద తొడల వరకూ లేక వెనుక వీపు లేక నడుము భాగాలకు ప్రాకినట్టు ఉండవచ్చు. ( పైన ఉన్న పటం చూడండి ) ఇంకొన్ని సమయాలలో ఈ నొప్పులు తీవ్రం గా ఉండి, వికారమూ, కడుపు లో తిప్పినట్టు ఉండటమూ, వాంతులూ , కలిగించవచ్చు.

కొందరిలో ఈ డిస్ మెనో రియా ,  మామూలు సమయం లో జరుగుతున్న రక్త స్రావం కంటే ఎక్కువ రక్త స్రావం కలిగించ వచ్చు. అప్పుడు ఈ పరిస్థితిని  మెనో రేజియా అంటారు ( menorrhagia ).

పైన చెప్పిన లక్షణాలే కాక డిస్ మెనో రియా తో బాధ పడుతున్న వారిలో  తల నొప్పి, తల తిప్పినట్టు ఉండడం, ఏ పని మీదా మనసు లగ్నం చేయలేక పోవడం, విపరీతమైన అలసట గా ఉండటమూ ,  కొద్ది శబ్దాలైనా , వెలుతురు అంటే కాంతి వంతమైన ప్రదేశాలలోనూ , వీరు ఎక్కువగా స్పందించి , ఆ పరిస్థితులను తట్టుకో లేక పోవడమూ, కొన్ని సమయాలలో స్పృహ తప్పి కింద పడటమూ కూడా జరుగుతుంటాయి.

డిస్ మెనో రియా రెండు రకాలు. మొదటి రకాన్ని ప్రాధమిక లేక ప్రైమరీ డిస్ మెనో రియా అంటారు. రెండవ రకాన్ని ద్వితీయ లేక సెకండరీ డిస్ మేనోరియా అంటారు. ప్రాధమిక డిస్ మెనో రియా లో  గర్భాశయ కండరాల సంకోచాలు అంటే కాన్త్రాక్షన్  అవుతాయి. అప్పుడు ఆ ప్రదేశం లో ప్రోస్టా గ్లాండిన్ లు అనే జీవ రసాయన పదార్ధాలు విడుదల అవుతాయి. గర్భాశయ కండరాలు విపరీతం గా సంకోచించడం వల్ల ఆ ప్రదేశం లో ప్రాణ వాయువు అంటే ఆక్సిజెన్ కూడా తగ్గుతుంది. ఈ కారణాలన్నీ కలిసి ,కండరాల నొప్పులు గా పరిణ మించుతాయి. ఈ నొప్పులనే క్రామ్ప్స్ అని కూడా అంటారు.

వచ్చే టపాలో డిస్ మెనో రియా కు చేయ వలసిన పరీక్షలూ, చికిత్సా పద్ధతుల గురించి తెలుసుకుందాము !