మనం క్రితం టపాలో చూశాం కదా పటం సహాయం తో కూడా, ప్రాధమిక అధిక రక్త పీడనానికి ఏడు రిస్క్ ఫాక్టర్స్ ఉన్నాయని.

మరి అతి కష్టం మీద మిగతా రిస్కు ఫాక్టర్లను మన జీవితాలనుంచి తొలగించితే ఒరిగేదేమిటి? అని చాలా మంది అనుకోవచ్చు.

ఇప్పుడు ఈ మిగతా అయిదు రిస్కు ఫాక్టర్లూ  ఏ విధంగా అధిక రక్త పీడనానికి కారణ భూత మవుతుందో చూద్దాము.

మనకు ( అంటే పదకొండు ఏళ్ళ వయసు పై బడ్డ వారికి ) సామాన్యం గా రోజుకు ఆరు గ్రాముల ఉప్పు సరి పోతుంది.  అంటే daily six grammes of salt.

ఉప్పుకు నీటిని చేర్చుకునే గుణం ఉంది. ఉదాహరణకు, మనం తినే ఉప్పు ఆహారం లో నుంచి మన రక్తం లో ప్రవేశించిన దనుకోండి. అప్పుడు ఆ పరిస్థితి వల్ల మన దేహం లో మిగతా భాగాలలో ఉండే నీరు రక్తం లోకి పీల్చ బడుతుంది. దాని వల్ల సామాన్యం గా అయిదు లీటర్ల వరకు ఉండే రక్తం పరిమాణం పెరిగి అయిదున్నర లేక ఆరు లీటర్ల కు అయిందనుకోండి.  అందు వల్ల రక్తాన్ని పంపు చేయవలసిన గుండె  ఎక్కువ గా పని చేయ వలసి ఉంటుంది.  అందు వల్ల రక్త పీడనం కాస్తా అధిక రక్త పీడనం గా మారుతుంది.

సాధారణం గా మన ఆహారం లో ఉన్న అధిక ఉప్పు మూత్ర పిండాల ద్వారా బయటకు విసర్జన కూడా జరుగుతుంది. కానీ మనం తినే ఉప్పు పరిమాణం పెరిగే కొద్దీ , కొంత మూత్రం ద్వారా విసర్జించ బడినా , మిగతా ఉప్పు ( అంటే ఎక్కువ గా ఉన్న ఉప్పు ) రక్త పరిమాణాన్ని పెంచి ముప్పు కలిగిస్తుంది.

ఉప్పు లేని కూడు చప్పిడి కూడు అని సామెత. కానీ మనలో చాలా మంది ఆ సామెత ను అడ్డం పెట్టుకుని, లేక సాకు గా పెట్టుకుని ఎక్కువ ఉప్పు ఆహారం లో వేసుకుని తింటూ ఉంటారు. కానీ  పరిశీలిస్తే ఆ సామెత లో తప్పు లేదు. ఎందు కంటే ఆ సామెత ఉప్పు లేని కూడు చప్పిడి కూడు అని చెప్ప బడిందే కానీ ‘ అధిక ఉప్పు లేని కూడు చప్పిడి కూడు ‘ అని లేదు.

మిగతా వివరాలు వచ్చే టపాలో చూద్దాము !