Our Health

Archive for the ‘Our Health’ Category

సీక్రెట్ కెమెరా లను కనుక్కోవడం ఎట్లా ?! 

In Our Health on డిసెంబర్ 9, 2018 at 2:07 సా.

సీక్రెట్ కెమెరా లను కనుక్కోవడం ఎట్లా ?! 

Image result for secret hidden cameras

స్మోక్ డిటెక్టర్లు , పూల కుండీలు , పుస్తకాలూ, DVD  కేస్ లూ , ఎలెక్ట్రిక్ ఔట్లెట్ లూ , టెడ్డీ బేర్స్ , మనం ముఖం చూసుకునే నిలువెత్తు అద్దాలూ , ఇట్లా అనేక రకాలైన వస్తువులలో, మోసగాళ్లు  రహస్యం గా కెమెరాలు అమర్చ డం  జరుగుతుంది !
Image result for secret hidden cameras
ఒక స్క్రూ లో నూ , ఎయిర్ ఫ్రెషెనర్ లోనూ అమర్చిన రహస్య కెమెరా లను చూడవచ్చు పై చిత్రాలలో  ! 
ఈమధ్యే , ఒక అమెరికన్ యువతి , ఒక పెద్ద హోటల్ గ్రూప్ మీద ఆరువందల కోట్లకు దావా వేసింది ! ఆమె ఒక స్టార్ హోటల్ లో  నగ్నం గా ఉన్న వీడియో లను సీక్రెట్ గా చిత్రీకరించినందుకు !

ఈ రోజుల్లో , యువతులనూ , బాలికలనూ , సీక్రెట్ కెమెరాలు అమర్చి , వారి కదలికలనూ, బట్టలు వేసుకుంటున్న సమయం లోనూ , ఆడియో కానీ , వీడియో కానీ  రహస్యం గా రికార్డు చేయడం,తరచు గా వింటూ ఉన్నాం ! బాలికలూ , యువతులూ నివశించే వసతి గృహాల్లో కూడా ఇట్లాటి నేరాలు జరుగుతున్నాయి !

ముఖ్యం గా తలిదండ్రులు , ఈ విషయాలు తెలుసుకొని, తగు జాగ్రత్తలు తీసుకోవడం, వారి పిల్లలను హెచ్చరించడం ఉత్తమం !

ఈ రహస్య ( సీక్రెట్ ) కెమెరాలను కనుక్కొని , వాటి  నుంచి తప్పించుకోవాలంటే ఈ క్రింది పద్ధతులు ఉపయోగ పడతాయి !

1. మీరు ప్రవేశించిన గది ని , ఒకసారి నిశితం గా పరిశీలించండి ! మీరు ఒక్కరే , గది లో ఉంటే , ఆ గది లో లైట్లు ఆఫ్ చేయండి. గదిలో ఉన్న కర్టెన్లు కానీ , కిటికీలు కానీ మూసి వేయండి ( వెలుగు రాకుండా ).
అప్పుడు , గదిలో అన్ని కోణాల్లో పరిశీలించండి , ఎరుపు లైటు కానీ ఆకు పచ్చ లైటు కానీ , ఎక్కడ నుంచైనా మినుకు మినుకు మంటుందేమోఅని.
2. మీ తో ఉన్న మీ మొబైల్ ఫోన్  , అత్యంత విలువైనది , ఈ సీక్రెట్ కెమెరా లు కనుక్కోడానికి !
మీ మొబైల్ ఫోన్ , లేదా సెల్ ఫోన్ ను రెండు రకాలు గా ఉపయోగించ వచ్చు !
A . మీరు ప్రవేశించిన గది లో మూల మూలలా తిరుగుతూ , మీ స్నేహితులకు కానీ , కుటుంబ సభ్యుల కు కానీ ఫోన్ చేయండి ! అప్పుడు , మీరు ఉన్న గది లో కానక సీక్రెట్ కెమెరా ఉంటే , మీ ఫోన్ లో సిగ్నల్ సరిగా అందదు  ( సీక్రెట్ కెమెరా ఉంటే , దానితోనూ , మీ సెల్ ఫోన్ తోనూ కలిగే  signal interference వల్ల )!
B. మీదగ్గర ఆండ్రాయిడ్ ఫోన్ కానీ ఐఫోన్ కానీ ఉంటే , సీక్రెట్ కెమెరా లను డెటెక్ట్ చేసే యాప్ ను డౌన్ లోడ్ చేసుకోండి . కనీసం ఒక వంద వరకూ ఇట్లాటి యాప్ లు ఉన్నాయి ! వాటిలో ఎక్కువ రేటింగ్ ఉన్న యాప్ ను డౌన్ లోడ్ చేసుకుని , మీరు ప్రవేశించిన గది లో ఆన్ చేస్తే , అక్కడ సీక్రెట్ గా ఏర్పాటు చేసిన కెమెరా లను కనుక్కోవడం సులభం ! మీ ఫోన్ లో రెడ్ లైట్ ( ఎర్ర లైట్ ) ఫ్లాష్ అవుతుంది , కెమెరా ను కనుక్కున్నాక !
3.  professional hidden camera detector:  అధికారికం గా ఆమోదించ బడిన సీక్రెట్ కెమెరా డిటెక్టర్ లు మార్కెట్ లో అమ్ముతున్నారు . ఈ పరికరాన్ని కొని , మీరు ప్రవేశించిన గది లో ఆన్ చేస్తే , సీక్రెట్ కెమెరా లను వెంటనే పసి గడుతుంది !
4. మీరు ఉంటున్న గది లో మిర్రర్స్ అంటే  అద్దాలు కనుక ఏర్పాటు చేసి ఉంటే , ఆ అద్దాలు , బయటకు నార్మల్ గా మనం ముఖం చూసుకునే అద్దాల లానే కనబడతాయి కానీ , వాటి వెనుక కూడా సీక్రెట్ కెమెరాలు ఏర్పాటు చేసి ఉండ వచ్చు !
మరి మీరు చూస్తున్న అద్దం అసలైనదో , లేదా సీక్రెట్ కెమెరా ఏర్పాటు చేసిన అద్దమో  ఈవిధం గా తెలుసుకోవచ్చు :
ఆ అద్దం  మీద మీ వేలు గోరు తో ( 90 డిగ్రీలలో ) టచ్ చేస్తే , మీ గోరు కూ, అద్దానికి మధ్య gap  కనుక ఉంటే , అది అసలైన అద్దం !
మీ వేటి గోరు కనుక , అట్లా కాకుండా , వేటి గోరు ప్రతిబింబాన్ని, డైరెక్ట్ గా , gap  లేకుండా  టచ్ చేస్తూ ఉంటే , ఆ అద్దం అసలైనది కాదని గ్రహించాలి !
5. మీదగ్గర టార్చ్ లైట్ ఉంటే , దాన్ని ఆన్ చేసి , మీరు ప్రవేశించిన గది లో అన్ని వైపులా ఫ్లాష్ చేస్తే , మినుకు మినుకు మంటున్న సీక్రెట్ కెమెరాల లైట్లు కనిపిస్తాయి !
మీ మొబైల్ (సెల్ ) ఫోన్ లో ఉన్న ఫ్లాష్ లైట్ తో కూడా ఇదే విధం గా , సీక్రెట్ కెమెరా లను కనుక్కోవచ్చు !
గమనిక : అత్యంత శక్తి వంతమైన , అత్యంత విలువైన సీక్రెట్ కెమెరాలు , ఒక ప్రత్యేకమైన సిగ్నల్స్ ను పంపిస్తాయి , వాటిని కనుక్కోవడం చాలా కష్టం ! కానీ , సామాన్యం గా , సీక్రెట్ కెమెరాలను అమర్చే మోసగాళ్లంతా , చవక రకం కెమెరాలు ఏర్పాటు చేస్తారు ! అందువల్ల , పైన చెప్పిన పద్ధతుల్లో వాటిని కనుక్కోవడం సాధ్యమే !
వచ్చే టపాలో ఇంకొన్ని సంగతులు !

నీటి గండం నిజమేనా ?4. నీటిలో ‘కనబడని ‘ ప్రమాదాలు !

In Our Health on మే 27, 2018 at 10:18 ఉద.

నీటి గండం నిజమేనా ?3. 

Related image

నీటిలో ‘కనబడని ‘ ప్రమాదాలు !
నీరు నిండిన కొలను కానీ , తటాకం కానీ, క్వారీ లో నిలువ ఉన్న నీరు కానీ , లేదా సముద్రపు నీరు ( బీచ్ ) కానీ , పైనుంచి చూడడానికి ఆహ్లాదకరం గా , ఆకర్షణీయం గా  కనబడుతుంది  అందరికీ !
చాలా మందికి , ముఖ్యం గా చిన్నారులకు , బడి కి వెళ్లే వయసు పిల్లలకూ , ఆ నీటి లో దిగి ఆడుకోవాలని అనిపిస్తుంది ! అంతేకాకుండా , చాలా మందికి , ఈదడం రాకపోయినా , ఆ నీటిలో దిగి ఈదాలని  కూడా అనిపిస్తుంది !
కానీ , ఆ నీటిలో పొంచి ఉన్న ప్రమాదాలను ఊహించకుండా , ఆ నీటిలో దిగడం , కేవలం ఆత్మ హత్యా ప్రయత్నమే అవుతుంది ! ఎందుకంటే :
1. ఆ నీటిలో అనుక్షణం కలిగే బలమైన ప్రవాహాలు, అలలూ  మన అంచనాకు అందవు ! ఆ ప్రవాహాల ప్రభావం మనకు కనబడక పోవడమే కాకుండా , ఒక సారి నీటి లో దిగాక , అతి బరువైన మనుషులను కూడా , ఒడ్డున ఉన్న వారిని కూడా , లోతైన లోపలి నీటిలోకి  విపరీతమైన శక్తి తో లాగి వేయ గలవు !
2. అతి శీతలమైన నీరు , ఒక్కసారిగా దేహానికి తాకి , మనలను షాక్ కు గురి చేయగలవు. ఆ పరిస్థితి లో మానవులు , ఏ ప్రయత్నమూ చేయలేక ఆ నీటిలో మునిగి పోయే ప్రమాదం ఉంటుంది !
3. నీటి ఒడ్డు  లోతు లేనట్టు అనిపించినప్పటికీ , ఆ ఒడ్డులో సాధారణంగా పెరిగే నాచు, ఇంకా  అక్కడ ఉండే బురదా , కాలు దించగానే సర్రున జార్చి ,  లోతైన ప్రాంతానికి  అంటే పదీ  , ఇరవై అడుగుల లోతుకు మనలను క్షణాలలో ముంచే ప్రమాదం ఉంది !
4. నిలువ ఉన్న నీటిలో ఎవరు ఎప్పుడు ఏరకమైన చెత్త పోస్తారో మనకు తెలియదు ! అంటే  విరిగిపోయిన గాజు సీసాలు , పెంకులు , వంకరలు తిరిగిన ఇనుప కమ్మీలూ , చెట్ల కొమ్మలూ , ఇవన్నీ కూడా నీటి అడుగున పడి  ఉన్నా , మనకు కనబడక , నీటి ఉపరితలం మాత్రం ప్రశాంతం గా , ఆకర్షణీయం గా కనిపిస్తుంది ! అట్లాటి  నీటిలో పడగానే , కొమ్మల మధ్య , ఇనుప చువ్వల మధ్య ఇరుక్కు పోయి , లేదా నీటి అడుగున ఉన్న ముళ్ళు, గాజు ముక్కలూ గుచ్చుకు పోయి , ఎంతో  బాగా ఈద గలిగిన గజ ఈతగాళ్లు కూడా , ప్రాణాలు కోల్పోయిన సంఘటనలు కోకొల్లలు !
5. ఈరోజుల్లో యువత  గ్రూపులు గా  నీటి కొలను దగ్గరకు  విహార యాత్రలకని బయలు దేరి , నీటి దగ్గరకు చేరుకోగానే , తమ వద్ద ఉన్న మద్యం సీసాలను తాగి ఖాళీ చేసి మరీ నీటిలో దిగుతున్నారు ! ప్రాణాలు కోల్పోతున్నారు కూడా ! నీటిలో పడితే , మద్యం ప్రభావం లేనప్పుడే , మన మెదడు షాక్ కు గురి అయ్యి , సరిగా పని చేయదు ! ఇక  మద్యం మత్తులో ఏ  మాత్రం పని చేయ గలదు !?
6. అంతే కాకుండా , నీటి తటాకాలలోని నీరు అత్యంత కలుషితమైనది !  ఆ నీటి చుట్టూ తిరిగే మనుషులు అన్ని రకాల మల మూత్ర విసర్జనలూ చేసే ప్రమాదం ఉంటుంది ! ఆ ప్రాంతాలలో తిరిగే ఎలుకలు , పందికొక్కులూ కూడా ! వాటితో కలుషితమైన నీరు నోట్లో పడగానే ,  గ్యాస్ట్రో ఎంటి రైటిస్ , అతి విరేచనాల వ్యాధులే కాకుండా , ప్రమాదకరమైన (Weil’s disease  లాంటి)వ్యాధులు సోకే ప్రమాదం కూడా !
 ఇంకొన్నివచ్చే టపాలో సంగతులు !

నీటి గండం నిజమేనా ? 3

In Our Health on మే 20, 2018 at 10:54 ఉద.

నీటి గండం నిజమేనా ? 3.

Related image

మునుపటి టపాలో చిన్న వయసు పిల్లలు  నీటి వల్ల ఎట్లా ప్రమాదాలకు లోనవ గలరో తెలుసుకున్నాం కదా !

ఇప్పుడు కాస్త వయసు వచ్చిన పిల్లలు అప్రమత్తత గా లేకపొతే పొంచి ఉండే ప్రమాదాలు ఏంటో చూద్దాం !
5 నుంచి 15 ఏళ్ల వయసులో ఉన్న పిల్లలు , స్నేహితుల బృందాలను ఏర్పాటు చేసుకోవడం చేస్తుంటారు !
తమ ఆలోచనలతో సరిపోయే మిగతా పిల్లలతో జత కట్టడమే కాకుండా , వారితో  ఆడుకోవడం , వారి ముందు తమ ఆధిక్యం చూపించడం చేస్తూ ఉంటారు !
అంటే , వారు మిగతా వారికన్నా , ధైర్య శాలురనీ , లేదా మిగతా మిత్రులతో బిడియం లేకుండా  వివిధ ఆట పాటలలో పాల్గొనాలనీ , ఉత్సాహ పడుతూ ఉంటారు !
ఉదాహరణకు : మిగతా స్నేహితులు సైకిల్ తొక్కడం నేర్చుకుంటే , తమకు  పడి , దెబ్బలు తగిలినా కూడా , పట్టుదల గా సైకిల్ నేర్చు కుంటారు !
అదేవిధంగా ఈత కూడా ! దగ్గరలో ఏదైనా ఈత కొలను , నాలా , కుంటలు కానీ , నది గానీ ఉంటే , మిగతా వారితో రహస్యం గా , సాధారణం గా ఇంట్లో చెప్పకుండా , వెళ్లి  ఈదడానికి ప్రయత్నిస్తూ ఉంటారు !
కొన్ని సమయాలలో , బడి నుంచి ఇంటికి వచ్చే సమయం లో కానీ , బాగా ఆకతాయి లవుతే , బడి ఎగ్గొట్టి కానీ , ఇట్లాటి ‘రహస్య ‘ కార్యక్రమాలకు వెళుతుంటారు !
కేవలం మిత్రులతో ఉత్సాహ భరితమైన కార్యాలు చేయాలనే తపన మాత్రమే ఉంటుంది కానీ , ఆ వయసు పిల్లలలో , నీటి వల్ల పొంచి ఉండే ప్రమాదాల గురించి ఆలోచించే వివేచన , వారికి ఉండదు , ప్రత్యేకించి ఆ సమయాలలో ! 
ఒక వేళ , ఒక్కరికో , ఇద్దరికో ఆ వివేచన కలిగి వెనకడుగు వేసినా , మిగతా ఎక్కువ మంది మిత్రులందరి ప్రోద్బలం తో , కాదంటే వారి స్నేహానికి దూరమవుతామనే ఆందోళన వల్ల , వారిని అనుసరిస్తారు !  ప్రమాదాలను తెచ్చుకుంటారు !
వచ్చే టపాలో ఇంకొన్ని విషయాలు !

నీటి గండం నిజమేనా ?2. 

In Our Health on మే 10, 2018 at 6:33 సా.

నీటి గండం నిజమేనా ?2. 

 

Image result for indian kid in the water
నడక నేర్చిన తరువాత :
చిన్నారులు సహజం గా తమ చుట్టూ ఉన్న ప్రపంచాన్ని  శోధిస్తూ ఉంటారు ! వారికి తమ కాళ్ళ మీద నిలబడడం రాగానే , నడక కోసం ప్రయత్నాలు మొదలు పెడతారు . తడబడుతూ నడవడం రాగానే , తమ చుట్టూ ఉన్న ప్రతి వస్తువునూ నోట్లో పెట్టుకొని , వాటి రుచులు ఎట్లా ఉన్నాయో , అవి  తినే యోగ్యమైనవో కావో అనుకుంటూ పరీక్ష చేస్తూ ఉంటారు , రుచి కూడా చూస్తూ ఉంటారు !
అట్లాగే నీటితో  ఆదుకోవడం మొదలెడతారు !  గ్లాసులతోనూ , చెంబులతోనూ నీళ్లు తమ వంటి మీద పోసుకుంటారు ! తమ తల్లి దండ్రులు తమకు స్నానం చేయించే సమయం లో కలిగే ఆనందాన్ని పొందడానికి ప్రయత్నిస్తారు !
నీటి తొట్టెలలో దిగి ఆదుకోవడానికి ప్రయత్నిస్తారు ! అట్లాగే చిన్న చిన్న కొలనులు దగ్గరిలో ఉంటే , ఆ చోటుకు నడుచుకుంటూ పోతారు , కేవలం ఆదుకోవడం కోసం.
ఆ వయసులో వారికి  ఆపద లు , ప్రమాదాలూ అనే పదాలు వారి చిట్టి చిట్టి మెదడు లలో ఇంకా ఏర్పడవు !
అంటే రెండు నుంచి ఆరేళ్ళ వయసు వరకూ , చిన్నారులకు నీటితో  పొంచి వుండే ప్రమాదాల మీద అవగాహన ఏర్పడదు !
వారిని ఆ వయసులో నిత్యం కనిపెట్టి చూసుకుంటూ ఉండాలి , వారి తలిదండ్రులు ! ముఖ్యం గా వారి తల్లులు !
ఇంట్లో ఉండే బకెట్లూ , డ్రమ్ములలో కూడా ,నీరు కనపడగానే ,  ఆడుకోవడానికని దిగి చిన్నారులు ప్రాణాలు కోల్పోయిన సంఘటనలు ఎన్నెన్నో !
అందుకే వారిని కంటికి రెప్పలా చూసుకోవాలి , ఆ వయసులో ! 
వచ్చే టపాలో ఇంకొన్ని సంగతులు !

నీటి గండం నిజమేనా? 1. 

In Our Health on మే 6, 2018 at 1:02 సా.

నీటి గండం నిజమేనా? 1. 

Image result for dangers of water

మనం దాదాపు ప్రతి రోజూ , లేక కనీసం ప్రతి వారం , చూస్తూ ఉంటాం , లేదా చదువుతూ ఉంటాం , ఈ వార్తలు:
” క్వారీ లో పడి  నలుగురి పిల్లల దుర్మరణం “
“ఈతకు వెళ్లిన ముగ్గురి స్నేహితుల మరణం “
” విహార యాత్ర లో విషాదం , చెరువులో దిగిన విద్యార్థుల మరణం “
” నది లో దిగిన ఆరుగురు గల్లంతు ” !
ఇంకా అనేక రకాలు గా , విషాద కర  వార్తలు తరచూ మనకు  తెలుస్తూ ఉంటాయి !
ఇక  ఆ వార్తల విశ్లేషణ కూడా అనేక రకాలుగా చేస్తూ ఉంటాం మనం !
ఆ వార్తలు తెలుసుకుని బాధ పడినా కూడా ,
” వారికి ఆ రకం గా నీటి గండం ఉంది ”   అనుకునో , లేదా ” వారికి ఈ భూమి మీద నూకలు చెల్లాయి ” అనో అనుకోవడం చేస్తూ ఉంటాం కూడా !
ఇక నవమాసాలూ  మోసి కన్న తల్లి కీ , తల్లి తో పాటుగా, వారిని  అల్లారు ముద్దుగా పెంచి , ప్రేమ తో చూసుకునే తండ్రి  బాధ వర్ణనాతీతం !
మరి నీటి గండం నిజమేనా ? 
ఎంత మాత్రమూ నిజం కాదు ! 
అది పచ్చి అబద్ధం ! 
‘వారికి నీటి గండం ఉంది , అట్లా ప్రాణాలు పోయాయి ‘ అని అనుకోవడం , కేవలం బ్రతికి ఉన్న ఆ మృతుల బంధువుల ఆత్మ తృప్తి తో , ముందుకు  పోవడానికి మాత్రమే ఉపయోగ పడుతుంది ! కానీ యదార్ధం  అది కాదు !
మరి నీటి వల్ల కలిగే ప్రమాదాలేంటో తెలుసుకుందాం మనం !
మిగతా విషయాలు వచ్చే టపాలో !

బయటి తిండి, మన ఆరోగ్యానికి మంచిదేనా?2.

In మన ఆరోగ్యం., Our Health, Our minds on డిసెంబర్ 6, 2017 at 12:05 సా.
బయటి తిండి, మన ఆరోగ్యానికి  మంచిదేనా?2.
Image result for transfats
బయటి తిండి తో అనర్ధాలు వివరం గా తెలుసుకుందాం , ఎందుకంటే మన ఆరోగ్యం మీద శ్రద్ధ మనకు కాకపొతే , అమ్మేవాడికి ఉండదు కదా !
అమ్మే వాడికి , సొమ్ము మీదే శ్రద్ధ ఉంటుంది ! 
ఆహారం తయారు చేయడానికి ఉపయోగించే పదార్ధాలు : ఇవి నాసి రకం గానూ , తాజావి కాకుండానూ ఉంటాయి ! ఎందుకంటే , అవి చౌక కనుక !
వండే సమయం లో లోపించే శ్రద్ధ !:
తక్కువ నూనె తో వండే , ఇగురు కూరలూ , వంటలూ , ఆరోగ్యానికి మంచివి !  ఎక్కువ నూనె వేయడమే కాకుండా , బయటి తిండి లో ఆ నూనె కల్తీ ది గా ఉండడం  అతి సాధారణం గా జరుగుతుంది !
బాగా వేయించిన వంటకాలు ఆరోగ్యానికి మంచిది కాదు !
మనం ఎప్పుడైనా , బయటి తిండి  వండే  రెస్టారెంట్ వారు కానీ , తోపుడు బండి వారు కానీ ,    ఉపయోగించిన వంట నూనె ను  బయట పారబోయడం చూశామా ? ఎందుకు చూడ లేదంటే ,  వాళ్ళు , ఒక సారి ఉపయోగించిన నూనె ను , అనేక డజన్ల సార్లు ఉపయోగించి , ఆ నూనె బాండీ లోనే ‘ ఇగిరిపోయే ‘ దాకా వాడుతారు ! 
అట్లా పదే పదే , వేయించిన నూనె  రక్తనాళాలకు చాలా హానికరం !  అట్లాటి నూనె చాలా త్వరగా రక్తనాళాలు ‘ పూడుకు ‘ పోవడానికి కారణమవుతుంది ! 
నాసి రకమైన పదార్ధాలను వాడుతున్నప్పుడు , వాటి ( తక్కువ ) రుచి ని కప్పి పుచ్చడానికి , అనేక రకాల స్పైసెస్ వేస్తారు అంటే మసాలాలు !  ఆ మసాలా మజాలో పడి , మనం ఆ పదార్ధాలను ‘ ఆహా ‘ ‘ ఓహో ‘ అనుకుంటూ , లొట్టలు వేసుకుంటూ తింటాం !
తరచు గా ఇట్లా మసాలా లు దట్టించిన ఆహారం తినడం వల్ల , కడుపులో మంట  మొదలవుతుంది !  ఇంకా మసాలా లు ఉన్న ఆహారం తింటూ ఉంటే , ఆ మంట ను , మనకు తెలియకుండానే మనం ‘ పోషించుకుంటాం ‘ !
Image result for transfats
వచ్చే టపాలో ఇంకొన్ని సంగతులు !  

బయటి తిండి, మన ఆరోగ్యానికి  మంచిదేనా?1. 

In మన ఆరోగ్యం., Our Health, Our minds on డిసెంబర్ 2, 2017 at 10:26 సా.

బయటి తిండి, మన ఆరోగ్యానికి  మంచిదేనా?1. 

Related image

బయటి తిండి కి ఈ రోజుల్లో కలిగిస్తున్న ప్రచారం అంతా ఇంతా కాదు!
ఏ ప్రచార సాధనం చూసినా , ప్రకటనలు మారు మోగి పోతున్నాయి !
బయటి తిండికి , సులభం గా ఆకర్షింప బడడం  సహజమే !
కానీ , ఎంతమందికి తెలుసు ? ఆ బయటి తిండి లోగుట్టు ఏంటో !
కనీసం , తెలుసుకునే ప్రయత్నం కూడా చేయక , కేవలం ప్రకటనల్లో ఆకర్షణీయం గా కనబడగానే , డబ్బు ఖర్చు పెట్టి , తిందామనే ప్రయత్నంలో ఉంటారు , ప్రతి సారీ !
‘ఇంటిని చూసి ఇల్లాలిని చూడు ‘ అనే నానుడి , బయటి తిండికీ వర్తిస్తుంది !
కొన్ని ఇళ్లల్లో ప్రవేశించగానే , ఆ ఇళ్ల వాతావరణం , మనం అక్కడ ఏమైనా తినాలా , లేదా అనే విషయం నిర్ణయింప చేస్తుంది , మనచేత !
అట్లాగే , బయట మనం తినే తిండి ( food ) , మనం కేవలం ఒక హోటల్ లో నో రెస్టారెంట్ లోనో , లేదా బజారు లో  ఉండే బండి  లోనో , దాభా లల్లోనో  , వెళ్ళగానే కనబడే డాంబికాలకు  తబ్బిబ్బు అయి తింటామే కానీ , ఎప్పుడైనా అక్కడి వంట గదుల్లో కి ప్రవేశించామా ?
అది సరే , మనం ముందు , బయటి తిండి తినడం లో ఉండే  లాభాల గురించి  మాట్లాడుకుందాం !
బంధు మిత్రుల తోనో , స్నేహితులతోనో , సరదా గా కలిసి తినే సదుపాయం.
ఏమాత్రం కష్ట పడకుండా , కావాల్సినప్పుడు , ఇష్టమైన చోటికి వెళ్లి , తిని , ఇంటికి చేరుకోవడం !
ఇంట్లో , వంట చేసి తినడమూ , అంట్ల గిన్నెలు కడుక్కోవడమూ , వంటగది శుభ్రం చేసుకోవడమూ , లాంటి శ్రమలు తప్పడం !
స్నేహితులను కలుసుకోవడానికి ఒక ‘ అడ్డా ‘ గా వాడుకోవచ్చు , రెస్టారెంట్లను !
శుభ కార్యాలకు , ప్రత్యేకం గా పార్టీలు జరుపుకోవడానికి  అనుకూలం !
ఇక బయటి తిండి తో కలిగే అనర్ధాలు కూడా చూద్దాం !
బయటి తిండి ఖర్చు తో కూడిన పని !
బయట తిండి అమ్మే వాడు ఎప్పుడూ , అతి చౌకగా పదార్ధాలను కొని , అతి ప్రియం గా మనకు అమ్మి , మన నుంచి వీలైనంత వసూలు చేద్దామనే ఆలోచిస్తాడు !
మన ఆరోగ్యం సంగతి , వారి లిస్టు లో చిట్ట చివరన ఉన్నా మనం అదృష్ట వంతులమే ! ( our health and wellbeing is their last and lost concern ! )
వంట గది శుభ్రత గురించి తెలియదు! వంట చేసే వాడి ఆరోగ్యం మనకు తెలియదు ! వాడి చేతులు ఎంత శుభ్రం గా ఉన్నాయో లేదో మనకు తెలియదు !
వంటకు ఉపయోగించే పదార్ధాల నాణ్యత సంగతి మనకు అసలే తెలియదు !   ఎంత తాజా గా ఉన్నాయో తెలియదు !
ఏ నూనె లు వాడాడో కూడా తెలియదు !
రోడ్డు పక్కన బండి వాడి సంగతి సరే సరి ! అతి (అ )పవిత్రమైన ఒకే ఒక్క  బకెట్టు జలం తోనే  ఉదయం నుంచి రాత్రి వరకూ , ప్లేట్లూ , గ్లాసులూ అనేక వందల సార్లు కడగడం ! కాదు , వాడి దృష్టి లో ‘ శుభ్రం చేయడం ‘ !
వచ్చే టపాలో ఇంకొన్ని సంగతులు !  

ఇన్సులిన్ ఇంజెక్షన్ ను నిలువ చేసుకోవడం ఎట్లా ? 1.

In మన ఆరోగ్యం., Our Health on సెప్టెంబర్ 17, 2017 at 5:14 సా.

ఇన్సులిన్ ఇంజెక్షన్ ను నిలువ చేసుకోవడం ఎట్లా ? 1. 

Related image

చాలామంది మధుమేహం ఉన్న వారు , మందు బిళ్లలతో షుగర్ కంట్రోల్ కాకపొతే , ఇన్సులిన్ వాడుతూ ఉంటారు , డాక్టర్ సలహా మీద.
ఈ రోజుల్లో డాక్టర్లు విపరీతం గా బిజీ గా ఉంటూ , అతి తరచు గా  ఇన్సులిన్ ఇంజెక్షన్ ను ఎట్లా నిలువ చేసుకోవాలో వివరం గా రోగులకు వివరించరు . అందువల్ల వ్యాధి గ్రస్తులు , ఇన్సులిన్ ఇంజెక్షన్ లను ఎక్కడ పడితే అక్కడ నిలువ చేసుకొని ,క్రమం తప్పకుండా , సరి అయిన సమయానికే ఇంజక్షన్ తీసుకుంటూ ఉంటారు . కానీ షుగర్ కంట్రోల్ అవక , తాము చేస్తున్న పొరపాటు ఏంటో తెలుసుకోలేరు !
సరి అయిన ఉష్ణోగ్రత లో ఇన్సులిన్ ఇంజక్షన్ లను నిలువ చేయక పొతే , ఆ  ఇన్సులిన్  రసాయనం, పాలలో నిమ్మకాయ వేస్తే విరిగి పోయినట్లు విరిగి పోతుంది. అది విషం గా మారదు కానీ , విరిగి పోయిన ఇన్సులిన్ మందును ఇంజక్షన్ గా తీసుకుంటే , అది షుగర్ ను కంట్రోలు చేయదు !
అందువల్ల ఇన్సులిన్ ఇంజక్షన్ వాడే వారు ఈ క్రింది జాగ్రత్తలు తీసుకోవాలి  , తప్పని సరిగా :
1. ఇన్సులిన్ ను వేడి ప్రదేశాలలో నిలువ చేయకూడదు.:
ఆఫీసులకు కారులో వెళ్లే వారు , కారు లో వేడి ప్రదేశాలలో ఇన్సులిన్ ఇంజక్షన్ ను ఉంచ కూడదు ! ఒక అరగంటే కదా అనో , లేదా , ఒక గంటే కదా కారు ప్రయాణం అని అశ్రద్ధ చేయకూడదు !
2. ఇన్సులిన్ ను ఫ్రీజ్ చేయకూడదు. అంటే ఫ్రీజర్ లో ఇన్సులిన్ ను నిలువ చేయకూడదు.
అంటే, ఐస్ క్రీమ్ లు పెట్టే చోట ! అట్లా పొరపాటు న నిలువ చేస్తే , ఆ ఇన్సులిన్ ను ఇంక పారేయాల్సిందే ! ఎందుకంటే , ఇన్సులిన్ రసాయనం ఫ్రీజర్ లో ఉంచితే విరిగి పోతుంది , ఎందుకూ పనికి రాదు , అంటే షుగర్ ను కంట్రోల్ చేయదు .
ఓపెన్ఇ చేయని  ఇన్సు లిన్ ను ఫ్రిడ్జ్ లో తలుపు కు ఉన్న అర లో నిలువ చేయవచ్చు. అంటే రిఫ్రిజిరేటర్ లో . ఫ్రీజర్ లో కాదు.
3. సూర్య రశ్మి తగిలే చోట  ఇన్సులిన్ ను ఉంచ కూడదు. అట్లా చేస్తే ఇన్సులిన్ రసాయనం ‘ విరిగి పోతుంది’  ! 
4. ఇన్సులిన్  మందు ఓపెన్ చేసే ముందు expiry  date  ఒక  పుస్తకం లో నోట్ చేసుకోవాలి . ఒక సారి ఓపెన్ చేశాక , 28 రోజుల్లో దానిని వాడాలి , ఒకసారి సీల్ ఓపెన్  చేసిన ఇన్సులిన్  ను ఫ్రిడ్జ్ లో నిలువ చేయకూడదు  15- 25 సెంటిగ్రేడు టెంపరేచర్ ఉన్న గదులలో నే ఉంచాలి .
 28 రోజుల తరువాత మందు మిగిలితే , దానిని వాడ కూడదు ! మందు ఇంకా ఉంది కదా అనుకుని .
5. ప్రతి సారీ ఇంజెక్షన్ సూది లో ఎక్కించే ముందు ,  ఇన్సులిన్ మందు ను ప్రత్యేకం గా గమనించాలి , దాని రంగు లో కానీ , వాసన లో కానీ ఏమైనా మార్పులు వచ్చాయా లేదా అని ! తేడా ఉంటే  ఆ మందును వాడకూడదు.
అనుమానం ఉంటే డాక్టర్ ను సంప్రదించాలి. 
వచ్చే టపాలో ఇంకొన్ని సంగతులు .

మరి గంజాయి పీలిస్తే ప్రమాదాలేంటి ?2.

In ప్ర.జ.లు., మన ఆరోగ్యం., మానసికం, Our Health, Our minds on ఆగస్ట్ 19, 2017 at 9:09 ఉద.

మరి గంజాయి పీలిస్తే ప్రమాదాలేంటి?2.

Related image

1. గంజాయి పీల్చాక వాహనం నడిపితే  స్వర్గ ద్వారాలకు చేరువ అవడం ఖాయం :
గంజాయి పీల్చి డ్రైవింగ్ చేసే వారు,  విచక్షణ, సమయ స్ఫూర్తి  లోపించి , ప్రమాదాలకు లోనవడమే కాకుండా , ఇతర వాహన చోదకుల , పాద చారుల ప్రాణాలకు కూడా హాని కలిగిస్తారు ! ఈ విషయం
అనేక పరిశోధనల ఫలితం !
2. గంజాయి ఊపిరి తిత్తుల క్యాన్సర్ కు ( లంగ్ క్యాన్సర్ ) కు హేతువు :
బాగా పట్టు బిగించి గంజాయి దమ్ము లాగే వారి ఊపిరితిత్తులను , వారి జీవితాలనూ కూడా ఆ గంజాయి లాక్కెళుతుంది !
పొగాకు లో ఉన్న విషపదార్ధాల లాంటి విషాలే , గంజాయి లో కూడా ఉన్నాయని పరిశోధనల ద్వారా తెలిసింది !
3. గంజాయి స్కిజోఫ్రీనియా కి కారకం :
గంజాయి పీల్చే వారి మానసిక స్థితి క్రమేణా అధ్వాన్నం అవుతుంది !
వారు తరచూ ,  మనుషులు లేని చోట మనుషులను చూడడం , లేదా మనుషుల మాటలను లేదా ఇతర శబ్దాలను , ఎవరూ లేని చోట వినడం అంటే శూన్యం లో శబ్దాలను వినడం జరుగుతుంది !
అంటే వారు హాలూసినేషన్స్  అనే  విచిత్ర అనుభూతి చెందుతూ ఉంటారు !
ఈ హాలూసినేషన్స్ తరచూ వస్తూ ఉంటే , వారు క్రమేణా విపరీతమైన భయం చెందుతూ , ఇతర వ్యక్తులు కొందరు కానీ , లేక అందరూ కానీ , వారి కి ఎప్పుడూ హాని తలపెట్టే ఉద్దేశం లో ఉన్నారని భావిస్తూ ఉంటారు !  ఈ భ్రమ నే ‘ పారనోయియా ‘ అంటారు !
ఈ పారనోయియా తీవ్రం గా ఉన్న వారు , వారి పక్కన ఉన్న వారి మీద అకారణంగా దాడికి దిగడమూ , వారిని  కొట్టడం లేదా ఇతర రకాలు గా గాయ పరచడం కూడా చేస్తూ ఉంటారు !
4. గంజాయి వంధత్వానికి కారణం ( infertility ):
చాలా కాలం గంజాయి దమ్ము లాగే పురుషులలో శుక్ర కణాలు తగ్గి  అంటే స్పెర్మ్ కౌంట్ తగ్గి పోయి ,వారు  తండ్రులు కాలేక పోవడం , అట్లాగే స్త్రీలలో అండాలు  తగ్గి , వారు గర్భవతులు కాలేక పోవడం కూడా జరుగుతుంది !
5. గంజాయి పీలిస్తే , వికలాంగ శిశువుల జననం :
బాగా గంజాయి పీల్చే స్త్రీలు గర్భవతులవుతే , వారికి కలగ బోయే శిశువులు అవయవ లోపాలతో పుట్టే ప్రమాదాలు  ఎక్కువ అవుతాయి !
వచ్చే టపాలో ఇంకొన్ని సంగతులు !

గంజాయి దమ్ము  మంచిదేనా?1. 

In Our Health on ఆగస్ట్ 12, 2017 at 2:12 సా.
గంజాయి దమ్ము  మంచిదేనా?1. 
Image result for cannabis reaching brain
గంజాయి శాస్త్రీయ నామం  ‘  కన్నాబిస్ ‘   కన్నాబిస్  సటైవా  అనే మొక్క నుంచి తీసే రసాయన  పదార్ధం , గంజాయి అనబడుతుంది. దీనికి అనేక దేశాలలో అనేక రకాలైన పేర్లు ఉన్నాయి .
WEED ( వీడ్ ),  SKUNK ( స్కంక్  ) , SINSEMILLA ( సిన్సిమిల్లా  ), SENSI ( సెన్సి ), RESIN ( రెసిన్ ) , PUFF ( పఫ్ ), POT ( పాట్ ), MARIJUANA ( మరువానా ) , HERB ( హెర్బ్ ) , HASHISH ( హాషిష్ ) , HASH ( హాష్ ) , GRASS ( గ్రాస్ ) , GANJA ( గాంజా ) , DRAW ( డ్రా  ) , DOPE ( డోప్ ) , BUD (  బడ్ ) ,ఇంకా  BHANG ( భంగ్ ) అని అనేక రకాల పేర్లతో పిలుస్తారు.
గంజాయి ని సాధారణం గా   సిగరెట్ తాగినట్టు  దాని పొగను పీలుస్తారు  అంటే , గంజాయి కాలి , దాని పొగ  నేరు గా ఊపిరి తిత్తులలోకి పోయి , అక్కడనుంచి  రక్తం లో ప్రవేశించి , మెదడు ను చేరుకుంటుంది ! ( క్రింది చిత్రం చూడండి  ) 
Related image
గంజాయి ని బిస్కట్ లలో , చాక్లెట్లలో  , లేదా కేకు లలో కలిపి కూడా అమ్ముతారు. వాటిని తిన్నాక ,  వాటిలో ఉన్న గంజాయి  రక్తం లో కలిసి , మెదడును చేరుకుంటుంది !
Related image
( పైన కనిపించే చాకోలెట్ లో గంజాయి ఉంటుందని , అది ఆన్ లైన్ లో అమ్ముతారని , ఎంతమంది తల్లి దండ్రులకు తెలుసు ? ) 
ఏరకంగా అయినా , రక్తం లో ప్రవేశించిన గంజాయి , మెదడును చేరుకొని , మెదడు రసాయనాలను మార్చి , మానవులను  ‘ గంజాయి తాగిన మొహం ‘ వారి లా చేస్తుంది !
గంజాయి లో  ఉండే  ముఖ్యమైన రసాయనం పేరు THC  ( టీ  హెచ్ సీ  ) అంటే టెట్రా హైడ్రో కన్నాబినాల్ ( Tetra Hydro Cannabinol ).  ఈ రసాయన  ప్రభావం వల్లనే ,  అది తీసుకున్న వాళ్లలో , అనేకరకాలైమార్పులు సంభవిస్తాయి.
ఈ మార్పులు తెలుసుకోవడం , యువత తో పాటుగా , వారి తల్లి దండ్రులకు కూడా చాలా ముఖ్యం !
గంజాయి వాడుతున్న మొదటి రోజుల్లో  ‘ బాగా రిలాక్స్ అవుతున్న భావన ‘ కలుగుతుంది ! ఈ భావన, ముఖ్యం గా పగలూ రాత్రులూ ,  బాగా కష్ట పడుతూ , చదువుకునే విద్యార్థులకు ,  చేపలను పట్టడానికి నీటిలో వేసే ‘ ఎర ‘ లా పని చేస్తుంది !
కొందరు   చీటికీ మాటికీ , అంటే కారణం లేకపోయినా కూడా , నవ్వుతూ ఉంటారు , వారిలో వారు కానీ లేదా బయటకు గానీ !  సాధారణం గా ముభావం గా , మౌనం గా ఉండే వారు , అకస్మాత్తుగా , ఎక్కువ గా మాట్లాడుతూ ఉంటారు ! సహజం గా మనం  వినే  సంగీతం , విస్పష్టం గా , వినిపించడం , ఇంకా , అస్పష్టం గా కనిపించే రంగులు ఎక్కువ స్పష్టం గా కనిపించడం కూడా అనుభవం అవుతుంది వీరికి !
అంతే  కాకుండా , వీరికి , సమయం ‘ ఆగి పోయినట్టు గానూ , లేదా ,   గడియారం లో ముళ్ళు , చాలా నిదానం గా  కదులుతున్నట్టు గానూ  అనిపిస్తుంది ! ఎప్పుడూ సమయ పాలన తో పరిగెత్తే యువత కు , ఇది కూడా చాలా బాగున్నట్టు అనిపిస్తుంది !
కానీ గంజాయి ప్రభావం ఇంతటితో ఆగిపోదు !  అనేక రకాలుగా , ప్రమాద కరమైన ఇతర   లక్షణాలకు కూడా కారణం అవుతుంది , గంజాయి !
ఆకలి విపరీతం గా పెరుగుతుంది. 
బాగా నిద్ర మత్తుగా ఉండడం , సోమరి తనం గా తయారవడం , ప్రతి పనినీ వేగం గా చేయలేక పోయి, ‘ మన్ను తిన్న పాము ‘ లా  అతి నిదానం గా చేయడం !
జ్ఞాపకం చేసుకోవాలనుకున్న విషయాలు , త్వరగా జ్ఞాపకం చేసుకోలేక పోవడం ! అంటే అంతకు ముందు క్షణాలలో గుర్తుకు వచ్చే విషయాలు , గంజాయి తీసుకున్నాక ,  పది నిమిషాలు అయినా గుర్తుకు రాక పోవడం ! 
విపరీతమైన గాభరా చెందడం , ఆందోళన చెందడం ,  గుండె వేగం గా కొట్టుకుని ,చెమటలు పట్టడం ,  మాటి మాటికీ  తడబడం ,  అంటే confuse  అవడం కూడా ! 
క్రమేణా hallucinations  అనుభం అవడం జరుగుతుంది ! అంటే మనుషులు చుట్టూ లేక పోయినా కూడా వారి మాటలు వినిపించడం !  లేదా , మనుషులు గానీ , జంతువులు కానీ వారి చుట్టూ వాస్తవం గా లేక పోయినా కూడా , వారికి  ( గంజాయి తాగిన వారికి ) కనిపించడం ! 
వచ్చే టపాలో ఇంకొన్ని సంగతులు !
ప్రశ్నలకు ఆహ్వానం !
%d bloggers like this: