Our Health

Archive for నవంబర్ 11th, 2013|Daily archive page

చదువుకోడం ఎట్లా ? 3.

In ప్ర.జ.లు., మన ఆరోగ్యం., మానసికం, Our Health, Our minds on నవంబర్ 11, 2013 at 9:46 సా.

చదువుకోడం ఎట్లా ? 3. 

( పైన ఉన్న చిత్రం లో , తల క్రిందులు గా ఫుట్ బాల్ ను కిక్ చేస్తున్నది , ప్రఖ్యాత బ్రెజిలియన్ ఆట గాడు , పెలె ! తను సృష్టించిన ఈ ‘ బైసికిల్ కిక్ ‘ తో అనేక గోల్స్ చేశాడు !  ఈ కిక్ ప్రత్యేకకత ఏమిటంటే, గాలి లో ఎగురుతున్న బాల్ ను అలవోక గా , ఒక్క ఎగురు ఎగిరి , కాళ్ళ తోనే తన్ని , గోల్ సాధించడమే కాకుండా ,  ఆ కిక్ చేసిన తరువాత , ఏ మాత్రమూ గాయ పడకుండా , గాలి లో నే ఒక పల్టీ కొట్టి మళ్ళీ గ్రౌండ్ మీద కాళ్ళు ఆనించ గలడం  ! ఆ పని కేవలం పెలె  మాత్రమే చేయ గలిగాడు ! అందుకే పెలె ను ఫుట్ బాల్ మాంత్రికుడు అని కూడా పిలుస్తారు ! తన టీం తో ఫుట్ బాల్ ప్రపంచ కప్ కూడా సాధించాడు !  మీకు ఉత్సాహం ఉంటే , ఈ బైసికిల్ కిక్ , పెలె ఎట్లా చేశాడో , యూ ట్యూబ్ లో చూడండి ! )
స్థానం :  చదివే స్థానం , ప్రశాంతం గానూ , శబ్ద కాలుష్యం లేకుండా ఉంటే, చదువు మీద మనసు లగ్నం చేసి , పాఠాలను  గ్రహించడానికి తక్కువ సమయం పడుతుంది !  ప్రచార సాధనాలకు దూరం గా ఉంటే  ఉత్తమం ! అంటే రేడియో , టీవీ , టెలి ఫోను , మ్యూజిక్ సిస్టం , వీటికి ! మరీ పిన్ డ్రాప్ సైలెన్స్  అవసరం లేదు !    కావలసినది , ఇంద్రియాలకు , అంటే,  చూసే కళ్ళకూ , వినే చెవులకూ , కూడా ఇతరత్రా  ప్రేరణ లు అంటే స్టిమ్యులస్  లు ( బహు వచనం లో స్టిమ్యులై అని అంటారు, ఖచ్చితం గా చెప్పుకోవాలంటే ! ) లేకుండా ఉంటే , ( చదువు మీద ) ఏకాగ్రత హెచ్చుతుంది ! ఏకాగ్రత తో, తక్కువ సమయం లోనే, ఎక్కువ విషయాలు గ్రహించ వచ్చు !  కాస్త పెరుగుతున్న కొద్దీ , మీ మీ ప్రత్యేకత లతో , అంటే మీకు ఎక్కడ కూర్చుని చదువుకుంటే , బాగా అనుకూలం గా ఉంటుందో , మీరే నిర్ణయించుకుని , ఆ ఏర్పాట్లు చూసుకోవచ్చు ! 
అన్ని సౌకర్యాలూ ఉన్నవారు :  ప్రత్యేకమైన గది లోనో , లేక ప్రశాంతం గా ఉండే ఇంకో గది లోనో , కూర్చుని చదువు కోవచ్చు !  కుటుంబం లో జరుగుతున్న రోజు వారీ సంఘటనలకు , ‘ దూరం ‘ గా !  
సౌకర్యాలు తక్కువ ఉన్న వారు :  వీరు కూడా , తగిన ప్రశాంత వాతావరణం చూసుకోవడం మంచిది !  సామాన్యం గా , ఇంట్లో అయితే ,  నిశ్శబ్ద వాతావరణం లోనో , లేదా  స్కూల్ / కాలేజీ లైబ్రరీ లోనో ఒక స్థానం చూసుకుని , చదువు కొనసాగించడం మంచిది !   కాస్త పెరిగిన విద్యార్దులైతే , ఇంటికి దగ్గరలో ఉన్న , రద్దీగా లేనీ కాఫీ హోటల్ లో ఒక మూల కూర్చుని కానీ , ఇంటి దగ్గర లో ఉన్న పబ్లిక్ పార్క్ లో కానీ , చదువు కోవచ్చు ! చాలా సమయాలలో , సౌకర్యాలు  తక్కువ గా ఉంటే , ఏకాగ్రత ఎక్కువ గా ఉండ వచ్చు , వారి  దిశా నిర్దేశనం  సరిగా వారికి అర్ధం అయి ఉంటే !  కాదేదీ చదువు కనర్హం , ఔనౌను  చదువు  అమూల్యం !  కుటుంబానికంతా ,  ఒక్క గదే ఉంటే , చదువు కు ప్రాముఖ్యం , ఇస్తూ , తల్లి దండ్రులు , తగ్గు స్వరం లో మాట్లాడడమూ , వాదోప వాదాలను ( అవి అవసరం అనుకునే సందర్భాలలో ! )  ‘ వాయిదా  ‘ వేసుకోవడమూ చేయాలి , వారి భవిష్యత్తు కోసమూ , వారి పిల్లల భవిష్యత్తు కోసమూ !   
సమయం :   మిగతా పనులు ఏవి చేసినా సమయం సందర్భం చూసుకుని , చేసినట్టే , చదువు కు కూడా, ఒక నియమిత మైన సమయం  నిర్ణయించుకుని , క్రమ పధ్ధతి లో చదువుతూ ఉంటే ,  ఎక్కువ నేర్చుకో గలుగుతాము ! వారం లో ఏడు రోజులూ , లేదా అయిదు రోజులూ ,  రోజుకు మూడు గంటలో , ఆరు గంటలో , చదువు కు కేటాయించడం మంచిది ! ఈ సమయం , స్కూలు , కాలేజీ లో చదివే సమయం కాకుండా !  అక్కడ చదివే పాఠాల వివరాలు నోట్ చేసుకున్నట్టు గానే , ఇంటి దగ్గర చదువుకునే పాఠాలను కూడా ఒక క్రమ పధ్ధతి లో నోట్ చేసుకోవడం అలవాటు చేసుకుంటే , ఉపయోగ కరం గా ఉంటుంది !  ఏక బిగిన మూడు నాలుగు గంటలు చదవడం చేయకుండా , ఒక గంటకో , ముప్పావు గంటకో , ఒక చిన్న బ్రేక్ , అంటే విరామం తీసుకుంటే , అది లాభ దాయకం !  ఒకటి :  మనం దృష్టి పెట్టి  తదేకం గా పుస్తకాలను చూస్తున్నా  కూడా , ప్రతి పది , పదిహేను నిమిషాలకొక సారి , ఒక  ( కంటి కి ) ఆహ్లాద కరమైన ఆకు పచ్చని పచ్చిక బయలు ప్రదేశాన్ని కానీ , లేదా నీలి రంగులో ఉన్న ఆకాశాన్ని కానీ చూస్తూ ఉండడం అలవాటు చేసుకుంటే , చూపు దెబ్బ తిని , కళ్ళద్దాలు రాకుండా , నివారించు కోవచ్చు !  అట్లాగే , విరామం లో , మీకు నచ్చిన చిరు తిళ్ళు  ( నియమితం గా ) తినడం వలన, ఎప్పటికప్పుడు , శక్తి కలిగి ఉండి , ఎక్కువ విషయాలను , సరిగా ఆకళింపు చేసుకోవడం జరుగుతుంది ! 
చాలా సమయాలలో కడుపు మాడుతూ ఉన్నా కూడా , కృత నిశ్చయం తో చదివే వారు కూడా అనూహ్యం గా, ఎక్కువ విషయాలు ఆకళింపు చేసుకో గలుగుతారు ! 
తరువాతి టపాలో ఇంకొన్ని సంగతులు ! 

చదువుకోవడం ఎట్లా ?2.

In ప్ర.జ.లు., మన ఆరోగ్యం., మానసికం, Our Health, Our minds on నవంబర్ 11, 2013 at 6:54 ఉద.

చదువుకోవడం ఎట్లా ?2. 

సమయం, స్థానం, చూసుకుని, దీక్ష తో  చదువుకో ! 
నీ జీవిత గమ్యాన్ని , సమయానికే చేరుకో ! 
 
దిశా నిర్దేశనం :
 
చదువు లక్ష్యం, చిన్న తనం నుంచే , విద్యార్ధులకు తెలియ చేయాలి ! ముఖ్యం గా వారి తల్లి దండ్రులు !   చదువు విజ్ఞానం కోసం అనే భావన  బాగా నాటుకోవాలి , వారి పసి మనసులలో !  సామాన్యం గా తల్లిదండ్రులు వారి మనసులో , తమ సంతానం బాగా చదివి , డాక్టరో ఇంజనీరో కావాలని, లేదా కంప్యూటర్  ఇంజనీరో కావాలని , ముఖ్యం గా బాగా సంపాదించి ,వృద్ధి చెందాలనీ , తమకు పేరు తీసుకు రావాలనీ ఆశిస్తారు ! కలలు కంటారు ! కానీ , చిన్నారి మనసుల మీద, వారి ఆశల , ఆశయాల ముద్రలు , బలవంతం గా వేయకూడదు !  ఇది చాలా సున్నితమైన విషయం ! అంటే  ‘ చిన్న తనం నుంచే ‘ నీవు డాక్టర్ వి కావాలి , ఇంజనీర్ వి కావాలి ! అని పిల్లల మీద వారి ఆశయాలను ,బలవంతం గా రుద్దడం చేయకూడదు !  కేవలం ఆ చిన్నారుల దృష్టి అంతా , వారు నేర్చుకోవడం మీదనే లగ్నమై ఉండేట్టు చూడాలి ! అంటే , కేవలం విజ్ఞాన సముపార్జన !  ఆ చిన్నారులు , ఒక ఆహ్లాద కర వాతావరణం లో , ప్రపంచాన్ని తెలుసు కుంటూ ఉంటారు !   వారికి బడులూ , తరగతులూ , ఇతర విద్యార్ధులూ , పుస్తకాలూ , యూనిఫామ్ ,  లంచ్ బాక్స్ ,  ఇతర రాత పరికరాలూ , ఇదంతా , కొత్తగానూ , ఆందోళన కలిగించేది గానూ కూడా ఉంటుంది ! ప్రత్యేకించి , ఇళ్ళలో సహజం గానే గారాబం గా పెరుగుతున్న బాల బాలికలకు !  తడబడుతూ తప్పటడుగులు వేస్తున్న ఆ చిన్నారులకు చేయూత నిచ్చి నడపాలి !  అంతే కానీ , నడకే సరిగా రాని వారికి, గమ్యం గురించి , ఆ వయసులో చెప్పడం ఎంత వరకూ సమంజసం ?
చదువు లక్ష్యం , ఆ వయసు లో కేవలం , ఒక క్రమ శిక్షణ తో చదువుకోవడానికీ , కొత్త విషయాలు తెలుసుకోవడానికీ , మాత్రమే అనే అభిప్రాయం కలిగించాలి ! వారి సునిశితమైన పరిశీలనా శక్తి కూడా  పెంచే విధం గా చదువు చెప్పడమూ , తదనుగుణం గా , బడిలోనూ , ఇంటి దగ్గరా కూడా ప్రోత్సాహం ఇవ్వడమూ జరగాలి !  ప్రత్యేకించి చిన్న తరగతులలో ఉన్న బాల బాలికలకు , వారు ఇంటికి వచ్చాక , తప్పని సరిగా , వారికి ( వారు నిద్ర కు ఉపక్రమించక ముందే ! )  వారి తల్లి దండ్రులు , కొంత సమయాన్ని కేటాయించి ,  ఆ రోజు బడి లో జరిగిన సంగతులన్నీ కూడా ఓపిక గా , విని , తెలుసుకోవడం చేయాలి , వారి సంగతంతా , టీచర్లే చూసుకుంటారు ‘ అనే ‘ భ్రమ ‘ లో ఉండక ! 
దీని వల్ల ,  ఏదో సాధించాలనే , వత్తిడి , ఉండక ,  కేవలం , కొత్త పాఠాలూ , పద్ధతులూ , తెలుసుకోవడమే చేస్తారు , అదీ త్వర త్వరగా !  ఈ లక్షణాలే, వారి దిశా నిర్దేశం చేస్తాయి, వారి భవిష్యత్తు లో కూడా ! చదువు లక్ష్యం కేవలం డాక్టర్ అవడమూ , ఇంజనీర్ అవడమూ మాత్రమే కాకూడదు !  ప్రపంచమంతా కూడా కేవలం , డాక్టర్ లతోనూ , ఇంజనీర్ల తోనూ మాత్రమే నడవట్లేదు కదా ! 
 
స్కూల్ లో సరిగా అడ్జస్ట్ అవలేక పోతున్న పిల్లల ప్రవర్తన ఎట్లా ఉంటుంది ?  :  నోట్లో  వేళ్ళు ఎప్పుడూ పెట్టుకోవడమో , తరచూ క్లాసు లో మూత్ర విసర్జన , లేదా మల విసర్జన బట్టలలోనే చేయడమో , తరచూ కడుపు నొప్పి అనో , లేదా లంచ్ లో సరిగా తినక పోవడమూ , లాంటి ప్రవర్తన కనబరుస్తూ ఉంటారు. ఆ సందర్భాలలో , ఎక్కువ గా దండించ డమూ , విపరీతం గా కోపపడ డమూ చేయకూడదు ! ప్రత్యేకించి తల్లి దండ్రులు , అప్రమత్తత తో  ,  జరుగుతున్న విషయాలు గ్రహించాలి ! 
 
వచ్చే టపాలో ఇంకొన్ని సంగతులు ! 
%d bloggers like this: