Our Health

Archive for మార్చి, 2013|Monthly archive page

పని సూత్రాలు . 37.మీ మాట జాగ్రత్త !

In మానసికం, Our minds on మార్చి 31, 2013 at 11:45 ఉద.

పని సూత్రాలు . 37.మీ మాట జాగ్రత్త ! 

 

క్రితం టపాలలో , మీరు మీ ఉద్యోగాలలో , ఓపిక గా వినడం వల్ల  ప్రయోజనాలు, అదే విధం గా , ఇతరులను తిట్టడం లేదా విమర్శించడం లో ఉన్న నష్టాల గురించీ వివరం గా తెలుసుకున్నారు కదా ! ఇప్పుడు  మరి మనం  చేసే ఉద్యోగాలలో ఏమి మాట్లాడాలో కూడా తెలుసుకుందాం ! చాలా మంది, వారి చదువులు పూర్తి అయి ఉద్యోగాలలో చేరాక , ఉద్యోగ వాతావరణం లో ఎట్లా మాట్లాడాలో తెలియక, వారి కాలేజీల లో ప్రవర్తించినట్టే , ఉద్యోగం చేసే చోట కూడా ప్రవర్తిస్తూ ఉంటారు ! అది కొంత వరకూ వారి వయసు వల్ల  కూడా అవవచ్చు ! కానీ ఉద్యోగం లో,  మన ప్రవర్తన , మన ఇమేజ్ ను ప్రతిబింబించే విధం గా ఉండాలి !  అదీ , మన ఉద్యోగం లో చేరినప్పటి నుంచీ కూడా ఉండాలి ! ఆ ఇమేజ్  ” మనం ఎప్పుడూ , తెలివిగా , విశ్వాస పాత్రులు గా , పరిణితి చెందిన వారిగా , అంటే మెచూర్ గా , కూల్ గా ” కనిపించాలి ! ( కూల్ గా ఉండడం అంటే ఏమిటో మనం క్రితం టపాలలో తెలుసుకున్నాం  కదా ! ) అంటే , సహజం గా మనలో ఉండే ఆ లక్షణాలు, బయటకు కూడా అవే లక్షణాలు గా కనిపిస్తూ ఉండాలి ! కానీ ,ఆకతాయి పనులు కాలేజీ లో చేసినట్టు, ఉద్యోగం లో కూడా చేస్తూ , పై అధికారుల దృష్టి లో కేవలం బాధ్యతలు మరిచి , సరదా గా ఉద్యోగం చేస్తున్న వారిలా  ‘కనపడకూడదు ‘ ! మనం కాలేజీ లలో , కొంత ఆకతాయి గా , చిలిపి గా , సరదా గా  కాలం గడిపి ఉంటాము !  చదువును అశ్రద్ధ చేయకుండానే !  కానీ చేసే ఉద్యోగాలలోనూ , కార్పోరేట్ సంస్థ లలోనూ , మన ప్రవర్తనను నిరంతరం , ఏదో రకం గా గమనిస్తూ ఉంటారు ! పై అధికారులు కానీ , లేదా బాసులు కానీ ! వారికి కావలసినది  మనం చేసే పని ! ఆ పని ద్వారా లాభాలు ! అంతే  ! అదే వాతావరణం లో మనకు కావలసినది , మన జీతం ( తాత్కాలిక లక్ష్యం ) తో పాటుగా మన  దీర్ఘకాలిక లక్ష్యాలు కూడా ! 
 
మరి  మీరు మీ నాలుకను ఎట్లా నియంత్రించు కోవాలి ?:
1. అన్ పీసీ ( un  pc  )  వ్యాఖ్యానాలు : మీరు  మీ ఉద్యోగం లో ఎప్పుడూ ” అన్ పీసీ ” కామెంట్స్ చేయకూడదు ( pc  అంటే పర్సనల్ కంప్యూటర్  అనే అర్ధం తీసుకో కూడదు ఇక్కడ ! ఇక్కడ pc  అంటే పొలిటికల్లీ కరెక్ట్ అని అర్ధం ) ఉదాహరణకు,  మీరు చేసే ఉద్యోగాలలో , కులం గురించి కానీ రిజర్వేషన్ ల గురించి కానీ మీరు ఏవిధమైన వ్యాఖ్యానాలూ ఎప్పుడూ చేయ కూడదు ! మీరు ఆ విషయాలలో ఏ విధం గా  ( అ )న్యాయం పొందుతున్నా కూడా ! 
2. ఒక వర్గానికే చెందిన వారిని కించ పరిచే విధం గా విమర్శలూ , వ్యాఖ్యానాలూ చేయకూడదు !
3. లింగ పరం గా కామెంట్స్ కూడా చేయకూడదు ! కేవలం స్త్రీ పురుషుల లింగ పరం గానే కాకుండా ,  స్వలింగ పరుల గురించి కూడా ఏ రకమైన వ్యాఖ్యానాలూ చేయ కూడదు ! 
4. మీ పై అధికారిని, ఇతర ఉద్యోగుల ముందు ” విపరీతం గా కాకా పట్టే ” పనులు చేయకూడదు ! 
5. ఎట్టి  పరిస్థితులలోనూ , మీరు మీ టెంపర్ కోల్పో కూడదు , అంటే మీ సహనాన్ని కోల్పోకూడదు ! 
6. ఏ రకమైన పరుష పదజాలమూ ఎవరి మీదా ఉపయోగించ కూడదు ! అంటే తిట్లు ! ఎవరినీ తిట్ట కూడదు ! 
7. ఇతర వ్యక్తుల మీద మీకున్న నిజమైన అభిప్రాయాన్ని కూడా  తెలుప కూడదు ! 
8. ఇతర సహచరులతో , ఉద్యోగం లో ఉన్నప్పుడు బాతా ఖానీలు , హస్కులూ వేస్తూ ఉండ కూడదు !
మీరు మీ ఉద్యోగం లో మితం గా మాట్లాడే అలవాటు చేసుకోవాలి ! ( కేవలం మీరు కాల్ సెంటర్ లో ఉద్యోగం చేస్తుంటే తప్ప ! ) మాట్లాడే ముందు ప్రతి సారీ ,మీరు మాట్లాడేది ఏమిటో  ఆలోచించి మరీ మాట్లాడాలి ! మీ మాట క్లుప్తం గా , స్పష్టం గా , ఖచ్చితం గా , అర్ధ వంతం గా ఉండాలి ! మీ మాటను   ” నాన్చుతూ  ” మాట్లాడ కూడదు !  అట్లా అలవాటు చేసుకుంటే , మీరు నోరు జారే పరిస్థితి ఉండదు !  మీకు తెలుసు కదా , కాలు జారితే మీరు సరి చేసుకోవచ్చు , కానీ ఒక సారి నోరు జారితే , ఆ మాటను వెనక్కి తీసుకోవడం కష్టం , ఈ లోగా జరగ వలసిన నష్టం జరుగిపోతుంది ! మనం తరచూ చూస్తూనే ఉంటున్నాం కదా ! నోరు జారిన బడా ” నాయకులూ , అధికారులూ , ” ఎంత త్వరగా వారి పదవులు కోల్పోతున్నారో ! మీరు మితం గా , లౌక్యం గా మాట్లాడడం అలవాటు చేసుకుంటే , మీ సహచరులకే కాకుండా , మీ పై అధికారులకు కూడా విశ్వాస పాత్రులవుతారు !  అప్పుడు మీకు ప్రమోషన్లు, అంటే పదోన్నతులు ఖాయం ! 
వచ్చే టపాలో ఇంకో పని సూత్రం ! 
 

పని సూత్రాలు. 36. వినదగు, ఎవ్వరు చెప్పిన !

In మానసికం, Our minds on మార్చి 30, 2013 at 11:52 ఉద.

పని సూత్రాలు. 36. వినదగు ఎవ్వరు చెప్పిన !

మీ ఉద్యోగం లో మీకు ఎవరు ఏమి చెప్పినా ముందు గా మీరు చేయవలసినది వినడం !  మీరు వారు చెప్పే విషయాలను ఓపిక గా వినాలి ! మనం సామాన్యం గా ఇంట్లో  మన పెద్ద వాళ్ళు తరచూ చెబుతూ ఉంటారు , ”  నేను చెప్పేది వింటున్నావా లేక చెవులప్పగించి చూస్తున్నావా ? ! ” అని అంటూ , ” అక్షింతలు ” వేస్తూ ఉండడం సామాన్యమే  కదా !   ! మన తెలుగులో ఈ వినడాన్ని కేవలం ఒక పదం తోనే, అంటే ” వినడం ” గానే  సంభో దిస్తాము కానీ , ఆంగ్లం లో రెండు పదాలు ఉన్నాయి ఈ వినికిడి జ్ఞానానికి ! హియరింగ్ ( hearing ) , అంటే కేవలం చెవులతో వినడం మాత్రమే ! కానీ  లిజనింగ్ ( listening  ) అంటే మాత్రం,  శ్రద్ధ గా ఆలకించడం !  అంటే, మనము చెవులతో వినక పొతే , ఇతరులు చెప్పే విషయాలు శ్రద్ధ గా ఆలకించ లేము !  ఈ విషయం కేవలం మాటలకే కాకుండా , మనం వినే శబ్దాలకు కూడా వర్తిస్తుంది ! అంటే వివిధ శబ్దాలు కూడా , మొదట గా మనం వినక పొతే , వాటిని శ్రద్ధ గా ఆలకించ  లేము ! కానీ మనం  చెవులతో విన్నా కూడా , చాలా సమయాలలో శ్రద్ధ గా ఆలకించం ! ప్రత్యేకించి ఇంటి ఇల్లాలు చెప్పే విషయాలు ! కానీ ఉద్యోగం లో అట్లా చేస్తే , ఉద్యోగం పోయే ప్రమాదం ఉంది కదా ! కేవలం ఉద్యోగానికి ఎసరే  కాకుండా, ఇతరులు చెప్పేది విని , ఆలకించడం   జీవితం లో ” పైకి ” పోదామనుకుని ఉత్సాహ పడే ప్రతి వారికీ ఉండవలసిన ముఖ్య లక్షణం !  
మరి ఆఫీసులో ఈ వినడం ఎట్లా చేయాలి ?: 
1. మీరు వింటున్నప్పుడు  ఓహో ! ఆహా, ఊహూ అంటూ మధ్య మధ్య  చెప్పే వారికి తెలియ చేస్తూ ఉండాలి , కేవలం కళ్ళూ , చెవులూ అప్పగించడమే కాకుండా ! 
2. మీ దేహ భాష కూడా అంటే బాడీ లాంగ్వేజ్ కూడా సరిగా ఉండాలి ! అంటే ఇతరులు చెప్పే మాటలు వింటున్నప్పుడు, తరచూ గోడ గడియారం ముళ్ళ వైపో , మీ వాచీ వైపో చూసుకుంటూ ఉండడం , ఇంకా  ఆవులించడం , లేదా  మీ బట్టలు సవరించు కుంటూ ఉండడం లాంటి పనుల లో ” నిమగ్నమవ ” కూడదు ! 
3. కొన్ని సమయాలలో ఇతరులు చెప్పే మాటల్లో ముఖ్యమైన పాయింట్స్ మీరు మళ్ళీ వారిని అడిగి నిశ్చయం చేసుకోవడం కూడా చేస్తూ ఉండాలి. ఉదా:  అంటే ఫలానా తారీఖున అనో , ఫలానా చోట అనో మీరు అడగడం చేస్తే , మీరు ఆ విషయం గుర్తుంచుకోడానికి కూడా ఉపయోగ పడుతుంది ! 
4. కొన్ని సార్లు , మీరు చెప్పే వారిని , వారు చెప్పిన మాటను మళ్ళీ చెప్పమని కూడా అడగవచ్చు ! మీకు ఆ విషయం స్పష్ట పడని సందర్భాలలో !
5. కొన్ని సార్లు , మీకు అర్ధం కాని విషయాలను  చెప్పే వారికి ప్రశ్నలు వేసి కూడా తెలుసుకోవచ్చు ! 
6. ఇంకో మంచి అలవాటు, మీరు ఒక నోట్ బుక్ లో సంగ్రహం గా చెప్పే వారి మాటలు మీకు గుర్తు ఉండే రీతి లో రాసుకోవచ్చు కూడా ! ఎందుకంటే , మీరు చాలా బిజీ అయే సమయాలలో కూడా , తరువాత  ఆ సంభాషణ వివరాలు మీకు అందుబాటు లో ఉంటాయి !
( ఆఫీసులలోనే కాకుండా , సరిగా విని ఆలకించడం విద్యార్ధులకు కూడా చాలా ఉపయోగ కరం !  చాలా మంది విద్యార్ధులు కేవలం వారి టీచర్లూ, లెక్చరర్ లూ చెప్పే పాఠాలు శ్రద్ధ గా విని  వారి భవిష్యత్తు లోనూ , వారి జీవితాలలో నూ  ఎంతో  ముందుకు పోయిన వారూ, పోతున్న వారూ అసంఖ్యాకం ! ) 
 
మీరు పైన చెప్పినవి ఎందుకు ఆచరించాలి ?:
మీరు సరిగా ఇతరులు చెప్పేది వినడం , ప్రత్యేకించి మీ ఉద్యోగం లో , మీకు అనేక విధాలు గా లాభ దాయకం.
1. మీకు ఆ చెప్పే విషయం మీద మంచి అవగాహనా , పట్టూ ఏర్పడతాయి !
2. తద్వారా, మీ కర్తవ్యం , అంటే మీరు చేయవలసినది మీకు స్పష్టమవుతుంది !
3. మీ చుట్టూ జరుగుతున్న సంఘటనలు మీకు తెలుస్తాయి !
4. మీరు, ఇతరులు చెప్పేది , సహనం , సానుభూతి తో ఆలకిస్తారనే అభిప్రాయం , మీ కొలీగ్స్ కు ఏర్పడుతుంది !
5. మీరు  చురుకైన,  స్పురద్రూపి గా మీ సహచరులలో పేరు పొందుతారు ,  ఒక సోంబేరి గా , డల్ హెడ్ లా కాక !
6. మీరు చేసే పని , లేదా ఉద్యోగం లో మీరు చాలా శ్రద్ధ వహించి, ఇతరులు చెప్పేది కూడా సీరియస్ గా తీసుకుంటారని మిగతా వారు గమనిస్తారు !
 
వినడం ఒక నేర్పు. సాధనతోనే అది వస్తుంది. ఇతరులు చెప్పేది వినడం అలవాటు చేసుకోవడానికి , ఇంకో సులభమైన పధ్ధతి  మీరు  ఇతరులకు ఏదైనా చెబుతున్నపుడు , ఆ ఇతరులనుంచి ఏ రకమైన ప్రవర్తన  ఆశిస్తారో, అది ముందే ఊహించుకోవడం ! అప్పుడు సరిగా వినడం యొక్క ప్రాముఖ్యత తెలుసుకోగలం !  అందుకే , వినదగు ఎవ్వరు చెప్పిన ……. ( మరి ఇప్పుడు వీరిలో ,  ఇల్లాలిని తప్పకుండా చేర్చు కోవాలి మరి !! )
 
వచ్చే టపాలో ఇంకో పని సూత్రం ! 

 

పని సూత్రాలు. 35. పని లో దూషణ పనికి రాదు !

In మానసికం, Our minds on మార్చి 29, 2013 at 9:47 సా.

పని సూత్రాలు. 35. పని లో దూషణ పనికి రాదు ! 

 
ఉద్యోగ సూత్రాలలో ఇంకో ముఖ్యమైన సూత్రం. పనిలో దూషణ పనికి రాదు ! 
మీరు రోజూ చేసే పనిలో , అనేకమైన సమస్యలు ఉండవచ్చు ! అనేక వత్తిడులు ఉండవచ్చు , మీ సహచరులు లీవ్ మీద వెళ్ళ వచ్చు !  మీరు ఒక్కరే ఎక్కువ పని తో సతమతమవుతూ ఉండవచ్చు !  ఈ పరిస్థితులన్నీ సహజం గానే మీ సహనాన్ని పరీక్షిస్తూ ఉంటాయి ! మీకు చీకాకు కలిగిస్తూ ఉంటాయి ! 
మీరు ఇట్లాంటి పరిస్థితులలో చేయకూడనిది ఉంది , అది మీరు  మీ చుట్టూ ఉన్న వారినీ , లేదా మీలో మీరూ కూడా తిట్టుకోకూడదు ! ప్రత్యేకించి మీరు పని లో అంటే మీ ఉద్యోగం లో ఉన్నపుడు ! ఉదాహరణ:   చిదానంద్ ఉద్యోగం చేస్తున్నాడు ఒక ఆఫీసు లో !  పేరు మాత్రమే  ఆనందాన్ని తెలుపుతుంది కానీ అతడికి ఎప్పుడూ ముక్కు మీద కోపం ! ఆఫీసులో ప్రతి వారి మీదా విసుక్కుంటాడు తరచూ !   ఆఫీసుకు ఏకారణం చేతనైనా రాని వారిగురించి మిగతా కొలీగ్స్ తో ” జ్వరమనీ, కాలు నొప్పనీ ఆఫీసు మానేస్తారు, రోడ్డు మీద జులాయి వెధవల్లా తిరుగుతూ ఉంటారు , ” అనీ ”  ఉద్యోగం సరిగా చేయడం చేత కాదు అనీ  కు విమర్శలు చేస్తూ వారిని హేళన చేస్తూ ఉంటాడు !  ఇతర కొలీగ్స్ అది విని మొహాలు చూసుకుంటూ ఉంటారు !  చిదానంద్ కు దూరం గా ఉంటారు ! ఇక్కడ చిదానందుల వారు చేసే పొరపాటు  ఏమిటంటే , తన చీకాకు లనూ , తన పని వత్తిడినీ , ఆగ్రహాన్నీ , ఇతరులమీద  ఆపాదించడమే కాకుండా , ఇతరులను తిట్టడం , హేళన చేయడం చేస్తున్నాడు !   ఈ చర్య ఏ  రకం గానూ ఆయన కు ఉపయోగ పడదు ! 
రోజూ చేసే ఉద్యోగం లో  మీరు ఈ క్రింది విధం గా చేస్తారా?:
1. మీరు చేసే పనిలో ఏ  పొర పాటైనా సంభవిస్తే , మీరు తిడతారా ?
2. ఫోనులో ఎవరినైనా తిడతారా ?
3. మీ పై అధికారి ముందు కానీ మీ బాస్ ముందు కానీ  మీ నోట్లో నుంచి తిట్లు వస్తాయా ?
4. మీరు బిజినెస్ చేస్తూ ఉన్నా , లేదా ఏ బిజినెస్ లోనైనా ఉద్యోగం చేస్తున్నా, మీ కస్టమర్ ల ముందు తిట్టడం జరిగిందా ?
5. మీరు  కొన్ని తిట్లే తిడుతూ , బూతులను తిట్టకుండా నియంత్రించు కోగలుగు తునారా?
6. లేక మీరు తిట్టినప్పుడు నానా బూతులూ తిడుతుంటారా? 
పై వాటిలో కొన్నిటికి కానీ , అన్నిటికీ కానీ మీ సమాధానం ఔనని ఉంటే,  మీరు  మీ బంగారు భవిష్యత్తు మార్గం లో మందు పాత్రలను మీ చేతులతోనే స్వయం గా అమర్చుకోవడం  అవుతుంది ! ఎందుకంటే దూషణ , లేదా తిట్లు తిట్టడం  అనేక విధాలు గా మీకు చేటు !  మీ అమూల్యమైన పని సూత్రాలకు విరుద్ధం ! 
మరి  క్రోధాన్నీ , చీకాకునూ , ఏ విధం గా బయటకు  తిట్ల రూపం లో  డ్రెయిన్ చేయాలి ? :
మీరు ఏకాంతం గా ఉన్నప్పుడు , మీరు మీ కారులో ఒక్కరే డ్రైవ్ చేస్తూ ఉన్నప్పుడు , లేదా ఇంట్లో మీరు ఏకాంతం గా ఉన్నపుడు మాత్రమే చేయాలి ( అదీ మీకు చేయాలని అనిపిస్తేనే , కానీ పని కట్టుకుని చేయనవసరం లేదు కదా ! ) 
తరచూ తిట్టే వారూ , బూతులు తిట్టే వారు వ్యాధి గ్రస్తులా ?:
సామాన్యం గా తరచూ తిట్టే వారు  కేవలం చీకాకు వల్ల, తమకు ప్రతికూల పరిస్థితులు ఎదురైనపుడు తట్టుకోలేకనో , లేదా తీవ్రమైన వత్తిడి వల్లనో తిడుతూ ఉంటారు ! వారికి ఎవరినైనా తిడితే ” మనశ్శాంతి ” ఏర్పడుతుంది ! కానీ అరుదుగా ‘ టూరెట్  సిండ్రోం ‘ అనే వ్యాధి ఉన్న వారు, విపరీతం గా బూతులు తిడుతూ ఉంటారు , వారికి వారి నోటి ” దురద ” బూతులు తిడితే కానీ తీరదు ! మీ బాస్ ఎవరైనా బూతులు అదే పనిగా తిడుతూ ఉంటే ,  వారిని  టూరెట్  వ్యాధి గ్రస్తులని అనుమానించాల్సిందే ! 
 
వచ్చే టపా లో ఇంకో పని సూత్రం ! 

 

పని సూత్రాలు 34. నచ్చితే, తెలియ చేయండి !

In మానసికం, Our minds on మార్చి 27, 2013 at 2:15 సా.

పని సూత్రాలు 34. నచ్చితే తెలియ చేయండి ! 

( చిత్రం లో ఉన్న ఫెమినా పాండ్స్ మిసిండియా  ( 2013 ) పోటీలో ” స్ట న్నర్ అప్ ” ( ఔను, అచ్చు పొరపాటు ఏమీ లేదు ” స్ట న్నర్  అప్ ” ! )   గా వచ్చిన మన తెలుగు వనిత ”  శోభిత ” అందాన్ని , మనం మెచ్చుకోకుండా ఉండ లేము కదా !  )

మనం సామాన్యం గా రోజూ చేసే ఉద్యోగం లో కానీ , పని చేసే చోట కానీ , వివిధ మనస్తత్వాల మనుషులను కలుసుకుంటూ ఉంటాం ! వివిధ మనస్తత్వాల మనుషులు ,వివిధ ఉద్యోగాలలో పని చేయడం చూస్తూ ఉంటాం ! వారి పని తీరు చూస్తూ ఉంటాం ! వారి వేష భాష లను గమనిస్తూ ఉంటాం !  కొన్ని సందర్భాలలో , మనకు వారిని చూసి నేర్చుకోవలసినది కూడా చాలా ఉందనిపిస్తుంది ! ఎందుకంటే మనం అన్నీ తెలిసిన ” రోదసీ మానవులం ” కాదు కదా ! మానసిక శాస్త్రం లో కూడా ఇట్లా ఇతరులను చూసి నేర్చు కోవడాన్ని సోషల్ లెర్నింగ్ అని అంటారు ( ఈ రకమైన లెర్నింగ్ ను మొదట ప్రతిపాదించినది ,  బండూరా అనే మనస్తత్వ శాస్త్ర వేత్త ) కొంత మంది పని తీరు మనకు నచ్చదు , కొంత మంది వేష భాషలు మనకు నచ్చవు. కొంతమంది  పనితీరు నచ్చుతుంది , వారి వేష భాషలు కూడా మనకు ఎంతో నచ్చుతాయి !  ఇట్లా మీకు నచ్చిన విషయాలను , ప్రత్యేకించి మీరు చేసే ఉద్యోగం లో , మీ ఇతర కొలీగ్స్ తో కానీ , లేదా మీ క్రింద పని చేసే వారితో కానీ ,తెలియ చేయడం , మీ మానవ సంబంధాలను వృద్ధి చేస్తుంది !   వారి బట్టలు బాగుంటే ” మీ చీర నాకు నచ్చింది అనో లేదా ” మీ సల్వార్ కమీజ్ నాకు నచ్చింది ” అనో,  లేదా మీ  టీ షర్ట్  చాలా బావుంది అనో మీరు వారిని ప్రశంసించ వచ్చు ! అట్లాగే  ” మీ హెయిర్ స్టైల్ నాకు నచ్చింది కొత్త గా ఉంది ! అని కానీ , మీ బ్యాంగిల్స్ బావున్నాయి అని కానీ  మీరు స్త్రీ లను ప్రశంసించ  వచ్చు !  అట్లాగే పురుషులను కూడా మీ షర్టు బావుందని కానీ మీ వాచ్ నాకు నచ్చింది అని కానీ మీ హెయిర్ స్టైల్  కొత్త గా ఉంది అని కానీ ప్రశంసించ వచ్చు ! 
అదే విధం గా  చేసే ఉద్యోగం గురించి కూడా ” ఆ కస్టమర్ తో నువ్వు డీల్ చేసిన విధానం నాకు నచ్చింది ! అనో లేదా ”  ఆ మీటింగ్ లో మీరు చెప్పిన పాయింట్స్ నాకు నచ్చాయి ” అని కానీ , ” మీ ప్రెజెంటేషన్ చాలా బాగుంది  ”అని కానీ మీ అభినందన లను తెలియ చేయ వచ్చు ! మీ ప్రశంసలు సహజం గా , హృదయ పూర్వకం గా ఉండాలి !  ఇట్లా  మీరు ఇతర ఉద్యోగులను ప్రశంసిస్తే , మానవ సహజమైన  కృతజ్ఞతా భావం వారిలో మీ మీద వారికి ఏర్పడుతుంది. మనం , సహజం గా , ఇతరుల మెప్పు కోసం కూడా తహ తహ లాడుతూ ఉంటాం  !  ప్రతి మనిషి లోనూ ఏదో కొంత ప్రత్యేకతా , ఏదో కొంత నిపుణతా , కనీసం గానైనా ఉంటుంది ! ఇట్లా మీరు ఆ ప్రత్యేకతలను , గమనించి , వారిని ప్రశంసిస్తే , మీరు వారిలో పాజిటివ్ వైబ్స్,  అంటే ఆశావాద దృక్పధాన్ని ఇనుమడింప చేసిన వారవుతారు !  అంతే కాక మీరు పని చేసే చోట మీ మానవ సంబంధాలు కూడా మెరుగు పడతాయి ! 
మీ ప్రశంసలు సహజం గా ఉండాలనే విషయం మర్చి పోకూడదు ! అంటే మీరు యాంత్రికం గా ” వారిని పొగడాలనే ” ఉద్దేశం తో ప్రశంసించ కూడదు ! ఇతరుల లో మంచి  గమనించడమే కాకుండా , వారి మంచి తనాన్నీ , వారి మంచి పని తనాన్నీ , వారిలో ఉన్న మంచి టేస్ట్ నూ  మీరు గమనించి , వారికి  తెలియచేస్తే , మీ సహ్రుదయమే కాకుండా మీ హృదయం ఎంత విశాల మైనదో కూడా తెలుస్తుంది !  మంచి టీం వర్క్ కు ఇది ఎంతో  ముఖ్యమైన పని సూత్రం ! 
 
వచ్చే టపాలో ఇంకో పని సూత్రం ! 
 

పని సూత్రాలు. 33. ప్లీజ్ , థ్యాంక్ యూ లతో, మీ పనులు సులువు చేసుకోండి !

In మానసికం, Our minds on మార్చి 26, 2013 at 7:53 సా.

పని సూత్రాలు. 33. ప్లీజ్ , థ్యాంక్ యూ  లతో, మీ పనులు సులువు చేసుకోండి ! 

మనం సర్వ సాధారణం గా ఇతరుల సహాయం రోజులో ఎప్పుడో ఒక సమయం లో తీసుకుంటూ ఉంటాము. మనం చేసే ఉద్యోగం లో కానీ , పని చేసే చోట కానీ ,ఇతరుల తో కొన్ని కొన్ని పనులు చేయమని అడగడమూ , చేయించు కోవడమూ , లేదా వారికి చేసి పెట్టడమూ , జరుగుతుంది రోజూ ! 
కానీ మీరు  ఇతరులతో పని చేయించుకునే ప్రతి సారీ , ” ప్లీజ్ ” అనడం కానీ , ” దయ చేసి ” అనడం కానీ అలవాటు చేసుకోండి !  అదే విధం గా మీరు అడిగిన పనిని చేసిన వారికి మీ కృతఙ్ఞతలు చెప్పడం మరచి పోకండి ! మానవులు సహజం గా  స్వేఛ్చా పిపాసులు ! వారు వారి పనులను , ఎవరో నిర్బంధించి చేయించుకుంటే ఇష్ట పడరు . వారు అయిష్టం గా  ఆ పనులు చేసినా , వారికి మనసులో ఒక అనీజీ అభిప్రాయం మీ మీద ఏర్పడుతుంది. ప్రత్యేకించి, మీరు చెప్పిన పనిని చేశాక , మీరు వారికి ఏ రకమైన కృతజ్ఞతలూ తెలుపక పొతే , ఇంకా నెగెటివ్ అభిప్రాయం ఏర్పడుతుంది !  ”పని చేయించుకుంటాడు కానీ  కనీస మర్యాద కూడా తెలియదు ” అని కామెంట్స్ చేస్తూ ఉంటారు. భారత దేశం లోనైతే , మీరు చేసిన ప్రతి పనికీ  ” ఎంతో  కొంత ” మీ పని చేసిన వారికి ” ముడుపు ” గానో , ” దక్షిణ ” గానో , లేదా ” పర్సెంటేజ్ ” రూపం లోనో సమర్పించుకుంటూ ఉండ వలసిందే  కదా ! 
కానీ మీరు ఉద్యోగం చేసే చోట మీ కొలీగ్స్ తోనో , మీ క్రింద పని చేస్తున్న వారితోనో , పని చేయించుకోవాల్సి వచ్చినపుడు ” అట్లాంటి ముడుపులు ” సమర్పించు కోక పోయినా కూడా , మీరు కనీస మానవ విలువలను ఎప్పుడూ పాటిస్తూ ఉండాలి ! మీరు చేయమని అడిగే ప్రతి పనికీ , ” దయ చేసి”  అని కానీ ” ప్లీజ్ ” అని కానీ అడిగితే మీకు కావలసిన పని త్వరగా జరుగుతుంది. పాశ్చాత్య దేశాలలో  ఈ పట్టింపులు చాలా ఉంటాయి ! అక్కడ ఎవరితోనైనా , ఎపనినైనా మనం చేయించుకుంటే , ఆ పని చేసినందుకు బోలెడంత ” ఫీజు ” మనం వారికి చేల్లిస్తున్నా కూడా , ప్లీజ్ అని పని పూర్తి  అయ్యాక  ” థ్యాంక్  యూ ” అని చెప్పడం సర్వ సాధారణం !  
భారత దేశం లో ఇంకో అలవాటు కూడా  మనకు కనిపిస్తూ ఉంటుంది !  మీరు ఇతరులను ఎవరినైనా వారు మీ పని చేసినందుకు  ప్రశంసిస్తే వారు వెంటనే ”ఆహా హా అదేంటండీ , భలే వారే మీరు , దాన్లో ఏముందండీ ” పరవాలేదండీ ” అంటూ మెలికలు తిరిగి పోతూ ఉంటారు ఒక అయిదు నిమిషాలు ! 
అట్లా కాకుండా ప్రశంసలను  స్వీకరించి ” థ్యాంక్ యూ ” అనడం సవ్యమైనది గా ఉంటుంది ! మీరు ఎవరినైనా  దయచేసి ఈ పని చేసి పెట్టండి అనడాన్ని  ఇంగ్లీషు పదం ప్లీజ్ ఉపయోగించినపుడు కూడా  ప్లీజ్ ఈపని చేసి పెట్టండి ” అని మాత్రమే అనండి , కానీ , ఆ ప్లీజ్ ను చాంతాడంత చేసి   pleeeeeeeeeeeeeeeeeeease   అని సాగ తీయకండి ! మీరు ప్లీజ్ అన్నపుడు కానీ , కృతఙ్ఞతలు చెబుతున్నపుడు కానీ మనస్పూర్తి గా  ఆ పదాలు వాడండి ! ఈ ప్లీజ్ లూ  థ్యాంక్ యూ లూ చాలా చిన్న పదాలూ , చాలా సాధారణ పదాలూ అయినా కూడా , ఆ పదాలతో మీరు మీ  మానవ సంబంధాలలో మ్యాజిక్ చేయవచ్చు ! ఇతరులతో మీ సంబంధాలను చెప్పుకో దగినంత గా పెంపొందించు కోవచ్చు ! 
ప్రయత్నం చేయండి , ప్లీజ్ ! , థ్యాంక్ యూ !
 
వచ్చే టపాలో ఇంకో పని సూత్రం ! 

 

పని సూత్రాలు. 32. సదా, మందహాసం తో, పాజిటివ్ గా ఉండండి !

In మానసికం, Our minds on మార్చి 25, 2013 at 6:57 సా.

పని సూత్రాలు. 32. సదా, మందహాసం తో పాజిటివ్ గా ఉండండి !

 
పని సూత్రాలలో ఇంకో ముఖ్య సూత్రం,  మనం పని చేసే చోట ఎప్పుడూ చిరునవ్వుతో , ఆశావాద దృక్పధం తో పని చేయడం ! మీరు చేసే పని కష్టమైనదే కావచ్చు ! మీకు ఆ పని చేయడం లో తీవ్రమైన వత్తిడి కూడా కలుగుతూ ఉండ వచ్చు ! మీరు చీకాకు పడుతూ , మీ పరిస్థితినీ , ఇతరులనూ , లేదా  మీ పరిస్థితికి కారణమయిన వారినీ తిట్టుకుంటూ , మీరు పని చేస్తూ ఉంటే , ఆ పని సరిగా జరగదు ! పైగా మీకు కాల యాపన అవుతుంది అనవసరం గా ! ప్రతి రొజూ , ఉదయమే ఆఫీసుకు కానీ , మీరు పనిచేసే చోట గానీ , మీరు మంద హాసం చేస్తూ పని లో ప్రవేశించితే , మీకు ఆ రోజంతా సజావు గా సాగుతుంది ! మిమ్మల్ని చూసిన ప్రతి వారు  ఆమె ” చాలా నిదానస్తురాలు ! చాలా రిలాక్స్ అవుతూ , ఎపనినైనా ఆత్మ విశ్వాసం తో సులభం గా చేస్తుంది ! ” అనే ముద్ర వేయించుకుంటారు ! మీకు నిత్య జీవితం లో , ప్రత్యేకించి మీరు చేస్తున్న ఉద్యోగం లో కానీ , మీరు పని చేసే చోట కానీ , మీ చిరునవ్వును కానీ , మీ మందహాసాన్ని కానీ  దాచేసే అనేక పరిస్థితులు  మీరు ఎదుర్కో వచ్చు !  మీరు ఉద్యోగం చేస్తున్న కంపెనీ కి లాభాలు రాక పోవచ్చు !  బయట వాతావరణం చాలా ప్రతి కూలం గా ఉండవచ్చు ! విపరీతం గా వర్షాలు పడుతూ ఉండడం కానీ , లేదా విపరీతమైన ఎండలు కాస్తూ ఉండడం , లేదా ఎముకలు కోరికే చలి కానీ ఉండ వచ్చు ! అవన్నీ ,మీ శక్తి వంతమైన చిరు నవ్వును దాచ లేవు ! మీ మనసు పొరలలో మీ మందహాసాన్ని కప్పలేవు ! అందుకే , మీ చిరునవ్వు చిందిస్తూ ఉండండి సదా !  
కానీ క్లిష్ట  పరిస్థితులలో కూడా చిరునవ్వు తో ఉండడం ఎట్లా ?: 
ఇది ఒక కళ ! మీరు మొదట గా మీకు చిరునవ్వు రాక పోయినా కూడా, కేవలం ఒక పని గా యాంత్రికం గా చిరునవ్వు నవ్వడం చేయండి ! అంటే మీ ముఖం పుష్పం లా వికసించడం ! మీరు ఆ పని రొటీన్ గా చేయడం మొదలెడితే , కొంత కాలానికి మీరు సహజం గా నే నవ్వ గలిగే స్థితి కి చేరుకుంటారు ! ఎందుకంటే, మొదటిలో యాంత్రికం గా నవ్వ గలుగుతున్న మీరు , ఆ చిరునవ్వుల ఫలితాన్నీ , ఆ ఆశా వాద దృక్పధం లో ఉండే శక్తి నీ ఆస్వాదించడం మొదలు పెడతారు ! దానితో , మీరు మీదైన ఒక యాటి ట్యూ డ్  ఎర్పరుచుకుంటారు ! నవ్వుతూ , ఆశావాద దృక్పధం తో మీ రోజు గడుపుతూ ఉండడం వల్ల , మీలో అనేకమైన శరీరానికి లాభ కరమైన హార్మోనులు ఉత్పత్తి అవుతాయి ! మనసార మీ ఉద్యోగం లో నవ్వుతూ పని చేయడం వల్ల  మీ  మానవ సంబంధాలు మెరుగు పడడమే కాకుండా , బలోపేతం కూడా అవుతాయి ! మీ ఇతర కొలీగ్స్ మీతో పని చేయాలని ఉత్సాహం చూపుతూ ఉంటారు !  
మీరు మీ పనిని తిట్టుకుంటూ , మీ పరిస్థితిని తిట్టుకుంటూ , చీకాకు పడుతూ , ఎప్పుడూ కంప్లెయిన్ చేస్తూ ఉంటే  ఆ సమయం మీరు మీ జీవితం లో కోల్పోతున్నట్టే ! కానీ మీరు  ఆశావాదులు గా , మీ ( పని ) రోజును మందహాసాలతో   ఎదురు చూస్తూ , మీ పని మీరు చేసుకుంటూ పోతుంటే  , మీ జీవితం లో ఆ సమయం ఎంతో విలువైనది గా అనిపిస్తుంది ! 
 
వచ్చే టపాలో ఇంకో పని సూత్రం ! 

 

పని సూత్రాలు. 31. పని లో గొణగడం కూడదు !

In మానసికం, Our minds on మార్చి 24, 2013 at 10:19 ఉద.

పని సూత్రాలు. 31. పని లో  గొణగడం కూడదు !

 
ఉదాహరణ :  ఓ కష్ట జీవి ,  తన పనిని చాలా సీరియస్ గా తీసుకుంటాడు.  ఉదయమే బయల్దేరి సరిగా తొమ్మిది గంటలకల్లా  ఎట్టి  పరిస్థితులలోనూ  ఆఫీసుకు చేరుకుంటాడు ! తన టేబుల్ మీద అప్పటికే , ఒక అడుగు ఎత్తు పేరుకున్న ఫైళ్ళు  స్వాగతం పలుకుతాయి ! వాటిని చదివి , యాక్షన్ రాసే సమయం లోనే , తన సూపర్వైజర్  మూడు సార్లు ఇంకో మూడు విషయాల మీద తన క్యాబిన్ లోకి పిలిపించు కున్నాడు !  కష్ట జీవి భుజాలు ఆ పని భారానికి క్రుంగి పోయినాయి ! చీకాకు పడి  పోతున్నాడు ! తనలో తను గొణుగు  కుంటున్నాడు , తన టేబుల్ దగ్గరకు వచ్చిన ప్రతి వారితో ” చూశారా మాస్టారూ ఈ ఫైళ్ళు ?  ఇవి చాలవు అన్నట్టు సూపర్వైజర్  పిలుపులు ! రోజూ సాయింత్రం ఇంటికి వెళ్ళే సరికి ఏడు గంటలవుతుంది , మళ్ళీ ఉదయం ఏడింటికల్లా బస్ స్టాపుకు పరుగు ! గాడిద చాకిరీ లా ఉంది నాది  ! అని చెప్పుకుంటున్నాడు ! ఆ  మాటలు వింటున్న వారు ” ఆ సుత్తి భరించలేం , నా పని కొద్ది గా చేయమని టేబుల్ దగ్గరకు వెళితే , తన సుత్తి చెప్పుకుంటాడు అందరికీ ! నోరు మూసుకుని నా పని చేయక ! అని మిగతావారితో అంటారు ! 
చాలా ఆఫీసులల్లో  ఇట్లా కొందరికే ఎక్కువ పని ఉండడం , వారే ఎక్కువ పని చేస్తూ ఉండడం , వారు తమ పని ఎక్కువ గా ఉండి  గొణుక్కుంటూ ఉండడం మనకు కనిపిస్తూ ఉంటాయి !  అదే క్యాడర్ లో ఉన్న వారు ఇంకొందరు , వారు అసలు ఆఫీసు లో పని చేయడానికి వస్తున్నారా ? అని ఆశ్చర్య పోయే తీరు లో పూల రంగడు లా తమల పాకులు నములుతూ , ఎర్రటి పెదిమలతో ,  ఆఫీసును ఒక శృంగార మందిరం లా భావిస్తూ , ఇతర  స్త్రీ ఉద్యోగులను తమ ఓర చూపుల బాణాల తో ,సాయింత్రం వరకూ చాలా ఇబ్బంది పెట్టేస్తుంటారు !  కొందరు ఓనమాలు సరి గా రాని వారుకూడా , తమకన్నా ఎక్కువ గా చదువుకున్న వారు , ఉద్యోగం లో తమకన్నా సీనియర్ గా ఉన్నా , పదోన్నతులు పొంది , మిగతా వారిమీద పెత్తనం చలాయిస్తూ ఉంటారు ! మీ ఉద్యోగం లో మీ పని ఎక్కువ గా ఉంటుంది !  అప్పుడు  ఆ పరిస్థితి అన్యాయం !  మీరు మాత్రమే ఎక్కువ పని చేస్తూ ఉంటారు !  మీ పని వత్తిడి గురించి ఆ సమయం లో గొణగడం ఎట్టి పరిస్థితులలోనూ శ్రేయస్కరం కాదు మీకు ! ఎందుకంటే ,
1. గొణగడం మిమ్మల్ని చాలా చులకన చేస్తుంది !
2. మీ సమయాన్ని వృధా చేస్తుంది 
3. మీ గొణుగుడు ,  మిమ్మల్ని మీ ఆఫీసులో ఉన్న మిగతా గొణుగుడు రాయుళ్ళ దగ్గరికి చేరుస్తుంది. 
4. మీరు ” అసలు చేయవలసిన పని చేయకుండా ” ఎప్పుడూ  ” గొణుగుతూ ఉంటారు ” అనే ముద్ర వేస్తుంది.  
5. మీలో చీకాకు , క్రోధమూ కలిగించి , మీ మానసిక ఆరోగ్యాన్ని అస్తవ్యస్తం చేస్తుంది. 
6. నిరంతరం గొణుగుడు అలవాటు చేసుకోవడం వల్ల , మీలో పని యందు ఉండే ఉత్సాహం కోల్పోయేట్టు చేస్తుంది. 
 
గొణగడం మానేయాలంటే ఏంచేయాలి ?
 
మీరు ప్రతి సారీ , ఏ సమస్య ను కష్టం గా అనుకుంటారో , ఆ సమస్యకు పరిష్కార మార్గాలు ఆలోచించండి , గొణిగే  ముందే !  కేవలం గొణుగుతూ ఉంటే , సమస్యలు పరిష్కారం కావు కదా ! ఒక వేళ  మీకు చక్కని పరిష్కారాలు తోచకపోతే కూడా , ఎవరైనా మీకు నమ్మకస్తుల తో ఆ సమస్య ను చర్చించి వారి సలహా తీసుకోండి !నిశ్శబ్దం గా చేయవలసింది చేయండి ! మీ తాత్కాలిక, దీర్ఘ కాలిక లక్ష్యాలు విస్మరించకండి ! గొణుగుడు మీ అమూల్యమైన సమయాన్ని వృధా చేయడమే కాకుండా మంచి ఫలితాలు కూడా ఎప్పుడూ ఇవ్వదు ! 
వచ్చే టపాలో ఇకో పని సూత్రం ! 

పని సూత్రాలు. 30. ఉద్యోగం లో ఊక దంపుడు సంభాషణ !

In మానసికం, Our minds on మార్చి 23, 2013 at 11:24 ఉద.

పని సూత్రాలు. 30. ఉద్యోగం లో ఊక దంపుడు సంభాషణ ! 

 
మనం ఇంతవరకూ చాలా పని సూత్రాల గురించి తెలుసుకున్నాం కదా వివరం గా ! వీటన్నిటినీ , ప్రత్యేకం గా చదువు ముగించుకుని , ఉద్యోగాన్వేషణ మొదలు పెడుతున్న , లేదా కొత్తగా ఏ  ఉద్యోగం లోనైనా చేరిన , నవ యువతీ యువకుల కోసం  ఉద్దేశించి రాయడం జరుగుతూ ఉంది !  అంతే కాకుండా , ప్రస్తుతం ఉద్యోగాలు చేస్తున్న అనేక లక్షల మంది ఉద్యోగస్తుల కు కూడా వారి వారి పని నిపుణత ను , పని తీరునూ , ఇంకా ఇతర ఉద్యోగులతో , లేదా వారి పై అధికారులతో వారి సంబంధాలను పెంపొందించుకోవడం లో కూడా ఈ టపాలు ఉపయోగ పడతాయి ! వరుసగా వీటిని టపాలలో పోస్టు చేయడం ఎందుకంటే , ఉద్యోగం లో పాటించవలసిన సూత్రాలు అన్నీ కూడా ఒకే చోట లభ్యమవుతాయి కావాలనుకునే ( తెలుగు ) వారికి ! 
ఇప్పుడు మీరు చేసే ఉద్యోగాలలో ఊక దంపుడు సంభాషణల గురించి తెలుసుకుందాం ! 
ప్రతి మానవుడికీ , ఇతర మానవులతో సంబంధాలు , ప్రత్యేకించి కనీసం సంభాషణా పరమైన సంబంధాలు పెట్టుకుందాం అనుకోవడం  సహజమే ! మానవ సంబంధాలకు సంభాషణ  అతి ముఖ్యమైన వారధి !  మీరు చేసే ఉద్యోగం లో కూడా ఇతర ఉద్యోగులతోనూ , పై అధికారులతోనూ , మీరు నిరంతరం  కనెక్ట్ అయి ఉండడం మీ ఉద్యోగాన్ని మీరు శ్రద్ధ గా చేస్తున్నట్టు తెలియచేయడమే కాకుండా ,  టీమ్ స్పిరిట్ కూడా ఉన్నతం గా ఉండడానికి తోడ్పడుతుంది ! కానీ మీరు మీ ఉద్యోగం లో,  అనవసర ప్రసంగాలు , అంటే ఇతరులతో ఓక దంపుడు సంభాషణలు చేయకూడదు !
 ఉదాహరణ : మీరు  మీ ఆఫీసులో మీ కొలీగ్స్  అందరితోనూ స్నేహ పూర్వకం గా ఉంటున్నారు.  మీ పురుష కొలీగ్ మీతో ” నీకు తెలుసా ? మాధవి  కీ మన బాస్ కూ ఎంత చనువో ?   నేను మన T A  బిల్స్ సైన్ చేయించుకోడానికి  బాస్ ఆఫీసు లోకి వెళ్లాను  అప్పుడు మాధవి  చీర కొంగు సవరిస్తున్నాడు మన బాస్ !  నేను లిఫ్ట్ లో కూడా గమనించాను, ఏమాత్రం సంకోచం లేకుండా  మాధవి చేతి లో చేయి వేసి  గుస గుస లాడుతున్నాడు  బాస్ !  మాధవి జాతకం మారిపోయింది ! టైపిస్టు గా చేరిన మాధవి  పర్సనల్ సెక్రెటరీ అయి కూర్చుంది  ఆరు నెలలలోనే , ఇక మన నెత్తి మీద కూడా కూర్చుంటుంది !” అని చెబుతున్నాడు ! మీరు వింటున్నారు, అంత వరకూ పరవాలేదు ! ఎందుకంటే , మీ కొలీగ్ మీరు ” తన అంతరంగిక మిత్రులు , లేదా కొలీగ్  ” అనుకుని మీకు ఆ విషయాలు చెబుతున్నాడు !  మీకు ఆ విషయాలతో ఏమాత్రమూ సంబంధం లేదు ! అంతే కాక , మాధవి తో మీకు ఏవిధమైన సంబంధమూ లేదు ! మీ బాస్ తో మీకు అంతకన్నా సంబంధం లేదు , కేవలం మీ బాస్ గా తప్ప ! ఇట్లా ఇతర కొలీగ్స్గురించిన  ఊకదంపుడు సంభాషణ  మీరు చేసే ఉద్యోగానికి ఏ విధం గానూ ఉపయోగ పడదు ! పైగా మీరు నోరు జారి  ఏ వ్యాఖ్యానమైనా చేయడానికైనా ,మీరు  అక్కడ లేరుకదా !  మీరు ఆ సమయం లో చేయవలసినది నిశ్శబ్దం గా మీ కొలీగ్ చెప్పినది వినడం మాత్రమే !  ఎందుకంటే , మీ కొలీగ్ దృష్టిలో మీరు , ” ఇతరులకు ఏమీ చేర వేయరు ” అంటే మీతో  అన్న విషయాలను ఇతరులకు చెప్పరు ”  అతనికి మీపైన ఉన్న ఈ  అభిప్రాయాన్ని మీరు వమ్ము చేయకూడదు ! అంటే  మీకు అతనితో ఉన్న స్నేహానికి ఏమాత్రమూ భంగం కలిగించ కూడదు ! కానీ అదే సమయం లో మీరు ఏ రకమైన వ్యాఖ్యానాలూ చేయకూడదు ! 
మనం చూస్తూ ఉంటాము సామాన్యం గా , కొన్ని సమయాలలో మనం చెప్పే  విషయాలు తీవ్రం గా ఉన్నప్పుడూ , ప్రత్యేకించి ఇంకొకరి గురించి  నలుగురికి చెబుతున్నప్పుడు , మనం చెప్పే విషయం ఎంత సీరియస్ విషయమైనా , ఇతరుల తప్పు స్పష్టం గా కనబడుతున్నా కూడా , వినే వారిలో కొందరు ఏ విధమైన హావ భావాలూ ప్రదర్శించ కుండా , కేవలం మనం చెప్పేది విని , తప్పుకుంటారు !  మీరు కేవలం వినే వారిగానే ఉంటే  మీ కొలీగ్స్ దృష్టిలో ” వారిలో ఒకరిగా ” అనుకుంటారు మిమ్మల్ని ! సారాంశం:  మీ ఉద్యోగం లో మీరు  ఊకదంపుడు సంభాషణలు చేయకండి !  మీ కొలీగ్స్ చేస్తుంటే కూడా మీరు కేవలం, మీ చెవులకే పని చెప్పండి, నోటికి విరామం ఇవ్వండి !  ముఖ్యం గా,  మీరు ఆ ఊకదంపుడు సంభాషణ గురించి ఇతరులకు ఏమాత్రం తెలియ చేయకండి ! మీ తాత్కాలిక , ఇంకా శాశ్వత లక్ష్యాల మార్గం లో, ఊకదంపుడు సంభాషణలు కలుపు మొక్కలు !
 
వచ్చే టపాలో ఇంకో పని సూత్రం ! 

పని సూత్రాలు . 29. అవకాశాలు, బంతులు !

In మానసికం, Our minds on మార్చి 22, 2013 at 10:53 సా.

పని సూత్రాలు . 29. అవకాశాలు, బంతులు ! 

 
 ( పై చిత్రం లో చిరునవ్వులు , మెలీనా రమిరెజ్  అనే కొలంబియన్  కోమలి వి !  ) 
ఉద్యోగాలలో అవకాశాలు అరుదు గా వస్తుంటాయి ! అంటే మీరు చేస్తున్న ఉద్యోగం  నుంచి పై ఉద్యోగానికీ లేదా ఇంకో సెక్షన్ లో ప్రమోషన్ కో  తరచు గా రావు కదా అవకాశాలు !  మీకు  ఉండ వలసిన దీర్ఘ కాలిక , ఇంకా తాత్కాలిక లక్ష్యాల గురించి మనం తెలుసుకున్నాం కదా వివరం గా క్రితం టపాలలో !  ఈ లక్ష్య మార్గాల మధ్య లో మనకు అకస్మాత్తుగా దర్శన  మయే  మంచి దారులే అవకాశాలు ! అంటే ఈ అవకాశాల రహదారిలో ప్రయాణం వేగం గా ఉండడమే కాకుండా సునాయాసం గా కూడా ఉంటుంది ! కాక పొతే ,  ఈ అవకాశాలు  మనవైపు విసిరి వేయబడే రబ్బరు బంతులు ! ఈ బంతులు లిప్త కాలం లో మన వైపు విసిరి వేయ బడతాయి కనుక వాటిని మనం అతి చాక చక్యం గా పట్టుకోవాలి !  ఆ క్షణాలలో , మనకు ఎక్కువ తాత్సారం చేయడానికీ , మీన మేషాలు లెక్క పెడుతూ , తీసుకో బోయే నిర్ణయం బాగోగులు ఆలోచించ డానికి  సమయం కూడా వృధా చేయ లేనంత తక్కువ సమయం ఉంటుంది. ఆ స్వల్ప సమయం లోనే మన వైపు వచ్చిన   ఆ అవకాశాన్ని గట్టి గా పట్టుకోవాలి !  లేదా అవకాశాలు  మన చేయి జారి పోతాయి ! 
అవకాశం ఎదురైనప్పుడు మీ కర్తవ్యం :
1. మీరు నేర్పుగా ఆ అవకాశాన్ని గుర్తించ గలగాలి 
2. ఆ అవకాశాన్ని ఒడుపు గా పట్టుకోవాలి , అంటే వినియోగించుకోవాలి, మీ ప్రయోజనాల కోసం ! 
3. కూల్ గా, ఆత్మ విశ్వాసం తో  ఉండాలి ! 
 
అవకాశం వచ్చినపుడు మీరు ఏమి చేయ కూడదు ? :
 
1. వచ్చిన అవకాశాన్ని ,  ఆ క్షణాల లో తీసుకోకుండా జార విడుచు కోవడం 
2. విపరీతం గా కంగారు కూ , ఆందోళన కూ  లోనవడం !
3. వచ్చిన అవకాశాన్ని ఆత్మ స్థైర్యం కోల్పోయి తీసుకోవడం , ఇట్లా చేయడం వల్ల  ఆ అవకాశాన్ని చేతిలో తీసుకున్నాక కూడా , సరిగా పట్టుకో లేక జార విడుచుకోవడం ! 
 
పైన చెప్పిన పరిస్థితులను ఒక క్రికెట్ మాచ్ లో  బౌండరీ దగ్గర గా ఉన్న ఫీల్డర్ కొన్ని సమయాలలో చేసే ఫీల్డింగ్ లా పోల్చ వచ్చు !  ఆ ఫీల్డర్ బౌండరీ దగ్గర ఎక్కువ శ్రమ పడకుండా , ప్రేక్షకుల తో పరాచకాలు ఆడుతూ , వారికి తన ఆటో గ్రాఫులు ఇస్తూ , ఒక హీరో లా పోజులు పెడుతూ ఉంటాడు సామాన్యం గా ! అతని దగ్గరికి క్రికెట్ బాల్  అప్రయత్నం గానే వస్తుంది ! అప్పుడు  ఆ ఫీల్డర్  తన నైపుణ్యం తో పట్టుకోక పొతే , ఆ బాల్  జారిపోతుంది. ఒక వేళ ఆ ఆటగాడు ఏమరు పాటున  ఉంటే, అంటే పూర్తి సంసిద్ధత గా ఉండక పొతే , చేతులలోకి వచ్చిన బాల్  కూడా జారిపోయి క్రింద పడి పోతుంది , అపుడు ప్రేక్షకుల తిట్లు భరించాల్సి ఉంటుంది ! వచ్చిన అవకాశాలు సరిగా మ్యానేజ్ చేయక పొతే కూడా అట్లాంటి పరిస్థితి ఏర్పడుతుంది ! కాక పొతే ఇక్కడ ప్రేక్షకులకు బదులు మన మనసే మనలను వెక్కిరిస్తూ ఉంటుంది ! అవకాశాలను సద్వినియోగం ఎట్లా చేసుకోవాలో తెలుసుకోవడం ఒక కళ ! నేర్చుకుంటే అబ్బే నైపుణ్యం ! మీరు మీ జీవితాలలో గతం లో వచ్చిన అవకాశాలను ఏ విధం గా కోల్పోయారో , కారణాలు ఏమిటో , ఆత్మావలోకనం చేసుకోండి ! ఆ పరిస్థితులు మళ్ళీ ఎదురవుతే , మీరు ప్రస్తుతం  ఏమి చేస్తారో కూడా ఊహించు కొండి !  మీ బంగారు భవితకు సోపానాల వంటి అవకాశాలను కౌగిలించుకోండి , మీ ప్రేయసి లా ! తృప్తీ , ఆనందం కూడా అదే విధం గా ఆస్వాదించండి ! 
వచ్చే టపాలో ఇంకో పని సూత్రం ! 

పని సూత్రాలు. 28. అవాంతరాలను, అవకాశాలు గా భావించండి !

In మానసికం, Our minds on మార్చి 21, 2013 at 10:51 సా.

పని సూత్రాలు. 28.  అవాంతరాలను,  అవకాశాలు గా భావించండి !  

 ( చిత్రం ,   మిస్ కొసావో   సుందరిది !  ) 
మీరు అనునిత్యం మీ ఉద్యోగం లో అనేక రకాలయిన ఆపదలు ఎదుర్కొంటూ ఉంటారు !  అవి అనేక విధాలుగా ఉండ వచ్చు ! మీ ఆఫీసులో , మీరంటే గిట్టని వారు , మీ ఉద్యోగానికి ఎసరు పెట్ట వచ్చు !  మీ ఆఫీసులో సాంకేతికం గా వచ్చే మార్పులు మీకు కొత్త గా , క్లిష్టం గా ఉండ వచ్చు ! ఉద్యోగం ఊడి పోయే ప్రమాదం పొంచి ఉండ వచ్చు ! ఆఫీసులో నో లేదా మీరు పని చేస్తున్న స్థానం లోనో , కొత్త రూల్సూ , కొత్త పద్ధతులు ప్రవేశ పెట్ట వచ్చు ! అవి మీకు అనుకూలం గా ఉండక పోవచ్చు ! లేదా మీ మేనేజరో , లేదా మీ బాసో మిమ్మల్ని  ఇబ్బందుల పాలు చేయడానికి ప్రయత్నం చేస్తూ ఉండ వచ్చు !  ఇవన్నీ ఒక రకం గా మీకు ప్రతి కూల  పరిస్థితులే కదా ! మరి ఇట్లా ఆకస్మికం గా వచ్చి మీ మీద పడే అవాంతరాలను అన్ని సమయాలలో మనం ఎదుర్కొని  పోరాడుతున్నా కూడా మనకు అన్ని సమయాలలోనూ విజయం వరించదు కదా ! ఎప్పుడో ఒక సమయం లో  ఆ అవాంతరాలు మన ఉద్యోగ జీవితాన్ని , తద్వారా మన జీవితాలనూ చిన్నా భిన్నం చేయ వచ్చు ! మనం పరాజయం పొందవచ్చు !  
ఈ అవాంతరాలు  మొదట గా అంత  సీరియస్ గా మనకు అనిపించక పోవచ్చు !  కానీ వాటిని అశ్రద్ధ చేస్తున్న కొద్దీ , ఆ అవాంతరాలు , మీకు వాస్తవం గా సమస్యలు అయి , మీరు ఒక విషవలయం లో చిక్కుకు పోయినట్టు ఫీల్ అవవచ్చు ! ఇక్కడ చేయవలసినది , మీరు అవాంతరాలను కానీ , లేదా ప్రతి కూల  పరిస్థితి ని కానీ ఆది లోనే అంటే అది మొగ్గ గా ఉన్నపుడే గమనించి , తగిన జాగ్రత్తలు తీసుకోవడం !  మీ పావులను జాగ్రత్తగా కదిలించ గలగడం ,  ఆ అవాంతరాన్ని తుంచి వేయడమో లేదా , పరిస్థితి విషమం గా ఉంటే , దూరం గా వెళ్లి పోవడమో చేయాలి !  
ఉదాహరణ:  నవీన్ ఒక పట్ట భద్రుడు. రెండేళ్ళు ఉద్యోగ ప్రయత్నం చేసిన తరువాత ఒక ఉద్యోగం లో చేరాడు ! అది ప్రైవేట్ కంపెనీ ! మొదట్లో ఆ కంపెనీకి చాలా లాభాలు వచ్చాయి. దానితో నవీన్ ఉద్యోగం కూడా లాభ సాటి అయింది బోనస్ లూ  ఓవర్ టైం  లతో ! ఉన్నట్టు ఉండి , ఆ కంపెనీకి  ఆర్ధిక మాంద్యం వల్ల , ఆర్డర్లు రావడం తగ్గి ,  ఉద్యోగం నుంచి తీసి వేయవలసిన పరిస్థితి వచ్చింది ! నవీన్ కు ఈ విషయం గ్రహించ డానికి  ఎంతో సమయం పట్టలేదు ! కానీ తాను , ఆ కంపెనీ లో గడించిన అనుభవం తో  ఇంకో ఉద్యోగం కోసం  తన ప్రయత్నాలు , తనను ఉద్యోగం నుంచి తీసి వేయక ముందు నుంచే చేస్తూ , సరిగా తన బాసు ఇంటికి వెళ్ళ మని చెప్పే సమయానికి , తనే రాజీనామా ఉత్తరం ఇచ్చి ఆ ఉద్యోగానికి ‘ ఉద్వాసన ” చెప్పాడు ! ఆ పరిస్థితి లో నవీన్ తనకు ఎదురైన ప్రతి కూల  పరిస్థితిని ప్రశాంత చిత్తం తో , ఆప్రమత్తత తో  ఎదుర్కొని , ఆ పరిస్థితిని కేవలం ఒక అవాంతరం అని మాత్రమే  అనుకోకుండా  తన జీవితం లో , తనకు వచ్చిన  ఇంకో  అవకాశం గా భావించాడు !  జీవితాన్ని జీవించడానికి కేవలం తెలివి తేటలే కాకుండా , జీవితం మీద మనకు ఉండే యాటి ట్యూ డ్  కూడా మనం  ప్రయాణం చేయవలసిన దిశనే కాకుండా మన గమ్యాన్ని కూడా  నిర్దేశిస్తుందని నవీన్ గట్టిగా నమ్ముతాడు ! తన  పాజిటివ్ దృక్పధం ఎప్పుడూ కోల్పోడు అందుకే నవీన్ ముందుకు పోగలిగాడు !  ముందుకు పోతాడు కూడా !  
ప్రతికూల పరిస్థితులను , పాజిటివ్ దృక్పధం తో వాటిని , మన జీవిత దిశా నిర్దేశనం చేయగల అవకాశాలు గా , చాలెంజ్ లు గా తీసుకుని , వాటిని మనకు అనుగుణం గా మలుచుకోవడం ఒక స్కిల్ ! ఆ స్కిల్ ఒక్క సారిగా మనకు రాదు , అది నిరంతర సాధన ద్వారా అందరికీ సాధ్య మవుతుంది ! అది బ్రహ్మ విద్య కాదు ! కేవలం మానవులకు సాధ్య మయే నైపుణ్యమే ! 
వచ్చే టపాలో ఇంకో పని సూత్రం ! 
 
 
%d bloggers like this: