Our Health

Archive for మార్చి, 2013|Monthly archive page

పని సూత్రాలు. 27. మీ శక్తి మీ శక్తి యుక్తులను, మీ లక్ష్యం మీదే కేంద్రీకరించండి !

In మానసికం, Our minds on మార్చి 19, 2013 at 9:53 సా.

పని సూత్రాలు. 27. మీ శక్తి మీ శక్తి యుక్తులను, మీ లక్ష్యం మీదే  కేంద్రీకరించండి !  

  చిత్రం లో ఉన్నది ,   సృష్టి  శ్రేష్ఠ అనే నేపాలీ సుందరి !  ఇరవై ఒక్క సంవత్సరాల ఈ అందమైన నర్సును చూస్తుంటే ” ఎంత సుందరమైన సృష్టి ” అనిపిస్తుంది కదూ ! 
సామాన్యం గా చాలా మంది , తాము చేసే ఉద్యోగాలలో బండ చాకిరి చేస్తూ , నానా అవస్థలు పడుతూ ఉంటారు !  ఉదయం ఆఫీసుకు కానీ వారు ఉద్యోగం చోటికి గానీ బయల్దేరే ముందు నుంచీ , మళ్ళీ సాయింత్రం ఇంటికి చేరేదాకా , వారి ఉద్యోగం గురించే ఆలోచిస్తూ , ఆ ఉద్యోగం లో కష్ట పడుతూ ఉంటారు ! వారి ముఖం లో అంతకు ముందు ఉన్న కళా , కాంతీ కోరవడుతాయి !  వారి ఉద్యోగం లో ఉన్న సాధక బాధకాలు వారి జీవిత గమనాన్ని మార్చివేస్తాయి ! వారిని వత్తిడికి లోను చేయడమే కాకుండా , మానసికం గా క్రుంగ దీస్తాయి కూడా !  వారు పొందే ఫలితం శూన్యం అయినా కూడా , వారి జీవితాలు, వారి ఉద్యోగాలకు అంకితం చేస్తారు ! ఉద్యోగం గురించి ముందు గానే ఆలోచించడమూ , కొన్ని కష్ట సమయాలలో ఉద్యోగం లో ఉండే సమస్యల గురించి ఆఫీసు బయట ఆలోచించడమూ , పరిష్కార మార్గాలు కనుక్కోవడమూ , సామాన్యం గా అందరూ చేసే పనులే కానీ అదే పనిగా వారు చేసే  ఉద్యోగం గురించి తాపత్రయ పడడం  మీ ఆరోగ్యానికి మంచిది కాదు ! ఒక ఆంగ్ల సామెత ” డోంట్  వర్క్ హార్డ్ , బట్  వర్క్ స్మార్ట్ ” అని అంటే  ” బాగా కష్ట పడి  పని ( ఉద్యోగం ) చేయకండి , కానీ తెలివి గా పని చేయండి ! అని ! ఈ సామెత అందరికీ వర్తిస్తుంది ! 
మీరు నిరంతరం అయిన దానికీ , కానిదానికీ , విపరీతం గా శ్రమ పడితే , మీ అమూల్యమైన శక్తులు వృధా అవుతాయి !  మీరు బాగా కష్ట పడ్డ చోట , మీ కష్టానికి ఫలితం , మీ శ్రమ కు తగినంత గా ఉండక పోవచ్చు ! అట్లాగే మీరు ఎక్కువ శ్రమ పడాల్సిన చోట , మీరు చాలా అలసి పోవడం వలన మీ శ్రమ సరి పడినంత లేక పోవడం వల్ల , మీకు ఫలితమూ మీరు ఊహించినట్టు ఉండక పోవచ్చు ! 
అసలు విషయం ఏమిటంటే , మీరు మీ శక్తి యుక్తులు చాలా విలువైనవి, అమూల్యమైనవి కూడా !  . అందువల్ల వాటిని  , చాలా జాగ్రత్త గా ఉపయోగించాలి ! అంటే మీరు ఎక్కడ ఎక్కువ శ్రమ పడాలో , ఎక్కడ శ్రమ పడనవసరం లేదో తెలుసు కుంటూ ఉండాలి ! ఉదాహరణ: మీరు ఒక కోర్సు కనుక చదువుతూ ఉంటే ,  మీ సమయం లో చాలా భాగాన్ని , కేవలం ఒక బొమ్మ గీయడానికి వినియోగించి ( ఆ బొమ్మ గీసినందుకు మీకు పది మార్కులు గనుక వచ్చేట్టయితే ) మిగతా నలభై మార్కుల ప్రశ్నలను అశ్రద్ధ చేస్తే , దానికి మూల్యం చెల్లిస్తారు !  అట్లా కాకుండా , మీరు మీ సమయాన్ని యాభై మార్కులకూ కేంద్రీకరించి దానికి అనుగుణం గా మీ సమయాన్ని కూడా కేటాయిస్తే ఎక్కువ లాభం పొంద గలుగుతారు ! 
ఇంకో ఉదాహరణ : మీరు ఉద్యోగం గనక చేస్తూ ఉంటే ,  మీ బాసు ( అంటే మీ సూపర్వైజర్ కానీ మీ మేనేజర్ కానీ )  మీ పనిని పరిశీలించే అవకాశం ఉన్నప్పుడు అంటే మీ రిపోర్ట్ చూడడమో , లేదా మీ ప్రజెంటేషన్  సమయం లోనో లేదా , మీరు ఒక టాక్ ఇవ్వ వలసిన సమయం లోనో మీరు తక్కువ ప్రిపరేషన్ తో , పేలవం గా మీ ప్రతిభను చూపడం , మీకు అనేక విధాల నష్టం కలిగిస్తుంది !  అంతే కాకుండా , మీరు అట్లాంటి సమయాలలో మీరు పడే కష్టం , మీ శ్రమా , మిగతా సమయాలలో ఎవరూ చూడని సమయాలలోనూ , లేదా మీ జూనియర్ ల ముందూ , లేదా  మీ కు మీ పని యందు ఉన్న ఉత్సాహమూ , శ్రద్ధ వల్ల నైతే నేమి , చూపించుతూ ఉంటే , అది  వృధా గా పోతుంది.  అందు వల్ల  మీరు ముఖ్యం గా మీ శక్తి యుక్తులను ఈ క్రింది విధం గా కేంద్రీకరించుకోవాలి: 
 
1. మీరు ఉపయోగించే శక్తి యుక్తులు, మీరు చేసే పని కి  సరి అయిన వి గా ఉండాలి ! 
2. ఆ పని కోసం మీరు పడే శ్రమకు అర్ధం ఉండాలి ,
3. మీ శ్రమ ఫలితం మీకు ( అంటే మీ పురోగతి కి ) అనువు గా ఉండాలి 
4. మీరు పడే శ్రమ , మీకు లాభ దాయకం గానూ ఉండాలి ! 
5. మీరు చేసే పనిలో మీ శక్తి యుక్తులు అవసరమై ఉండాలి ! 
6. అంతే కాక , మీ శక్తి యుక్తులు , మీరు చేసే పనికి ఎంతో ముఖ్యమైనవి గా ఉండాలి ! 
 
వచ్చే టపాలో ఇంకో పని సూత్రం ! 

 

పని సూత్రాలు. 26. రోజు వారీ నిర్ణయాలు !

In మానసికం, Our minds on మార్చి 18, 2013 at 11:34 ఉద.

పని  సూత్రాలు. 26. రోజు వారీ నిర్ణయాలు ! 

(  పైన ఉన్న చిత్రం, పోయిన ఏడాది  మలేషియా సుందరి గా ఎన్నికైన మరియా సేలీనా ది !  పని సూత్రాలతో మీరు విసిగి పోకుండా ఈ చిత్రాన్ని చేర్చడం జరిగింది, బాగుంటే తెలపండి , ఇట్లాంటి సుందరుల ” చిత్రాలు ” మరికొన్ని చూద్దాం, ముందు ముందు  ! )
మనం ప్రతి రోజూ , మన ఉద్యోగానికి చాలా పాజిటివ్ దృక్పధం తోనే వెళతాము. ఉత్సాహం గా పని చేస్తాము. శ్రమ పడతాము ! కఠిన నిర్ణయాలు తీసుకోవలసిన అవసరం ఉంటుంది ! పూర్తి  ఏకాగ్రత తో  పని చేయాల్సిన అవసరం  కూడా ఉంటుంది ! కొన్ని సమయాలలో , మన ఓరిమి ని పరీక్ష చేస్తున్నట్టు గా సమస్యలు వచ్చి పడుతూ ఉంటాయి. అది పేపర్ వర్క్ పూర్తి చేయడం ఆవ వచ్చు ! లేదా  ఏదైనా క్లిష్ట పరిస్థితిని మ్యానేజ్ చేయవలసిన అవసరం రావచ్చు !  లేదా చాలా కష్టమైన వ్యక్తులు , మిమ్మల్ని జలగల్లా  పట్టి వేధిస్తూ ఉండ వచ్చు ! లేదా మీ తో ఏదైనా కాగితాలు, బిల్లులు , మీకు ఇష్టం లేక పోయినా, మీచేత  సంతకాలు  చేయించ డానికి ప్రయత్నిస్తూ ఉండ వచ్చు ! మరి ఈ సమస్యలను సమర్ధ వంతం గా ఎదుర్కోవడం ఎట్లా ? దానికి సమాధానమే  రోజు వారీ నిర్ణయాలు ! అంటే మీరు రేపు ఉద్యోగం లో చేయ బోయే పనులగురించి లేదా తీసుకో బోయే నిర్ణయాల గురించి , ముందుగానే   మీ మనసులో సమీక్ష చేసుకుని , తదనుగుణం గా సంసిద్ధ పడడం ! 
ఉదా: ” రేపు  మీ ఆఫీసుకు ఒక  ” జిడ్డు ” గాడు వస్తున్నాడు ఫలానా మీటింగుకు ! అంతకు ముందే మిమ్మల్ని బురిడీ కొట్టించి మీ చేత పది లక్షల కాంట్రాక్ట్ కు సంతకాలు పెట్టించాడు మీ చేత ! ఆతరువాత  పని చేయడానికి మాత్రం అనేక వంకలు పెట్టి మిమ్మల్ని నానా తిప్పలూ పెట్టాడు ! మీరు పోయినసారి ఆ కాంట్రాక్టు ను కుదుర్చు కున్నందుకే , పొరపాటు చేశానని అనుకుంటున్నారు !  అదే పనిగా మిమ్మల్ని మభ్య పెట్టి , మళ్ళీ మీతో కాంట్రాక్టు ను పొడిగించు కోడానికీ , మీతో ఇంకా డబ్బు పెట్టించ డానికీ  వస్తున్నాడు రేపు ! ”  వాడి ఉద్దేశం మీకు తెలుసు ముందే ! మీరు చేయవలసినది  ” రేపు  ఆ జిడ్డు గాడు  చేసే ఏ  ప్రయత్నానికీ నేను లొంగ కూడదు ! ఏదో మాయ మాటలూ , అభ్యర్ధనలూ చేసి  క్రితం లాగా నా చేత సంతకాలు పెట్టించుకునే పరిస్థితి తెచ్చుకోను ! ఏమైనా సరే ! ” అనే స్పష్టమైన ,ఖచ్చితమైన నిర్ణయం తీసుకోవాలి మీరు ! 
అట్లాగే , మీరు ఆఫీసు లో ఒక మీటింగ్ లో మాట్లాడాలి రేపు ! మీకు తెలుసు ఒక నక్క జిత్తుల నాగన్న , ఇంకో వక్ర బుద్ధీ మీ సహనాన్ని పరీక్షిస్తూ , యక్ష ప్రశ్నలు వేస్తూ , మీతో పొరపాటు చేయించాలని అనేక ప్రయత్నాలు చేస్తూ ఉంటారు !  కొన్ని సార్లు మీరు అసలు మాట్లాడ వలసిన విషయం దాటి, కంగారు పడడమూ , తత్తర పడడమూ కూడా జరిగాయి ! సామాన్యం గా మీరు చాలా ప్రతిభావంతులు !  మీ వృత్తిని మీరు సీరియస్ గా తీసుకోవడమే కాకుండా , మీటింగుల కోసమూ ,ప్రాజెక్ట్ ల కోసమూ శ్రమిస్తూ ఉంటారు ! అందుకే మీరు  రేపు మీటింగు లో  ఆ నాగన్న లూ , వక్ర బుద్దులూ  ఎట్టి పరిస్థితులలోనూ మీ మీద గెలవ కూడదు ! వారి జిత్తులు పారకూడదు , మీరు మీ సహనం ఏకాగ్రతా కోల్పోకూడదు ! అనే నిర్ణయాలు ముందే తీసుకోవాలి ! 
అందువల్లనే ఈ రోజు వారీ నిర్ణయాలు ముందే మీరు తీసుకుంటే , మీ పని సులభం అవుతుంది , దీనికోసం మీరు ఎక్కువ సమయం కేటాయించ వలసిన అవసరం లేదు ! కేవలం  కొన్ని నిమిషాల లోనైనా , లేదా ఒక గంట లోనైనా మీరు  మీ కర్తవ్యాన్ని నిర్దేశించు కోగలరు ! 
మీరు చేయవలసినదల్లా :
1. అక్కడ మీరు ఎదుర్కొ బోయే సమస్య ఏమిటి ?
2. ఆ సమస్యను మీరు సమర్ధ వంతం గా ఎట్లా పరిష్కరించాలి ?
3. అందుకు మీరు చేయవలసినది ఏమిటి ?
4. మళ్ళీ అట్లాంటి సమస్య  పునరావృతం కాకుండా, మీరు ఏ  జాగ్రత్తలు తీసుకోవాలి ?  అనే విషయాల మీద మీ ఏకాగ్రతను కేంద్రీకరించడమే ! 
 
వచ్చే టపాలో ఇంకో పని సూత్రం ! 

పని సూత్రాలు. 25. మీ పధకం ఏమిటి ?

In మానసికం, Our minds on మార్చి 17, 2013 at 10:00 ఉద.

పని సూత్రాలు. 25. మీ పధకం ఏమిటి ? 

 
పని సూత్రాలలో ఒక ముఖ్య సూత్రం  మీ గేమ్ ప్లాన్ అదే మీ పధకం !  అంటే మీరు అనుకున్న లక్ష్యాలు ఎట్లా చేరుకుందామని అనుకుంటున్నారు ? అందుకు మీరు వేసుకున్న పధకం ఏదైనా ఉందా ?  ఆ పధకం వివరాలు ఎప్పుడైనా ఆలోచించారా? కనీసం కొన్ని గంటలైనా , కొన్ని రోజులైనా మీరు సమయం తీసుకుని , ఆ విషయాలు వివరం గా   మీ మనసులో కానీ ,లేదా మీ మెదడులో కానీ సంభాషించారా ? కనీసం ఆ రకంగా మీరు ఆలోచించ వలసిన అవసరం ఉందని గ్రహించారా? అయితే మీ పధకం ఏమిటి ?
ఇక వివరాల లోకి వెళితే ,  జీవితం లో  మీ పధకం  ఏమిటి ?  మీ కర్తవ్యానికి మీరు సంసిద్ధులు గా ఉన్నారా?  మీరు జీవితాన్ని ఒక నాటకం గా భావిస్తే, మీరు మీ పాత్ర స్క్రిప్ట్ ను  తెలుసుకోకుండానే మీరు  నటించ లేరు కదా ?!!  ఆ స్క్రిప్టే మీ పధకం !  మీ పధకం మీకు స్పష్టం గా తెలిస్తే , మీరు మీ పాత్ర  సక్రమం గా పోషించ గలరు !  మీరు జీవితాన్ని ఒక ఆట గా అనుకుంటే కూడా , మీరు ఆ ఆట లో ఎప్పుడూ మీరు గెలవాలని అనుకుంటారు ! ఓడి పోవాలని ఎప్పుడూ అనుకోరు కదా ! కానీ చాలా మంది , ఓడిపోయే వారు కూడా ఉంటారు !  మీరు  జీవితం ఆటలో , ఆట ముందే మీ పధకాన్ని రచించి తదనుగుణం గా  ముందుకు పొతే , మీరు గెలవడానికి ఎక్కువ అవకాశాలు ఉంటాయి ! అందుకే మీరు  మీ పధకం రచించు కోవడం ఎంతో  ముఖ్యం !  
ఒక విధం గా చెప్పుకోవాలంటే, మీ జీవిత పధకం ” మీ వ్యక్తి గత  ప్రకటన ” !  అంటే మీకు మీరు మీ లక్ష్యాలను చేరుకోవడానికి  సన్నద్ద మయే , సైనికుని మానసిక సంసిద్ధత ! మీరు విజయం కోరుకుంటున్నారా ? లేదా అపజయం కోరుకుంటున్నారా ?  పరాజయం తొంగి చూస్తే , మీ లక్ష్యాలను కుదించుకుని , మీరు పలాయనం చిత్తగించుదామని అనుకుంటున్నారా ? లేక  పరాజయం ఎదురైనప్పుడు , కింద పడి  ” గాయాలయినా ” , దుమ్ము దులుపుకుని , మీ గాయాలకు కట్టు కట్టి ,  వెనుకాడ కుండా కర్తవ్యోన్ముఖులు అవుదామను కుంటున్నారా ? ” ఎట్టి పరిస్థితి లోనూ అపజయం పాలవకూడదు ” అనే కృత నిశ్చయం తో ఉన్నారా? ఈ విషయాలన్నీ మీరు  మీ సమయం తీసుకుని  తీరిక గా ఆలోచించి  ఒక పేపర్ మీద రాసుకోవడం ఉత్తమం ! మనం ఎవరమూ , ” నేను నా లక్ష్యాలు చేరుకోవడానికి  ఎవరినీ పట్టించుకోను , ఎంత మంది నా మూలం గా నష్ట పోయినా నాకు లెక్క లేదు !  నేను మోసం చేయ గలను , ఎందుకంటే , నేను నా లక్ష్యానికి దగ్గర అవుతాను ” అని  మన పధక రచన చేసుకోము కదా! ? కానీ మనం నిత్య జీవితం లో చూస్తున్నది అందుకు పూర్తి గా భిన్నం గా ఉంది !  నిత్యం అనేక  మోసాలు , క్రూర కృత్యాలు , హింస , జరుగు తున్నాయి ! ఆఫీసులలో , బ్యాంకులలో , దేశ ప్రాంత విభేదాలు లేకుండా , జనాలు ఇతరులను మోసం చేయడం , అలవాటు చేసుకుంటున్నారు ! కేవలం వారి లక్ష్యాలు ( వీలైనంత తక్కువ సమయం లో, వీలైనంత ఎక్కువ , అక్రమం గానైనా సరే ) , డబ్బు , ఆస్తులు , ” కీర్తి ” , ” ప్రతిష్ట ”  ” కూడ బెట్టడం ” ! 
అట్లాగే ఆఫీసులలో కూడా బాసులు , తమ క్రింది ఉద్యోగుల మీద పెత్తనం చెలాయిస్తూ ఉంటారు నిరంతరం ! తిడుతూ ఉంటారు ! కేవలం వారికి ఒక కొరడా ఒకటే తక్కువ అన్నట్టు ప్రవర్తిస్తూ ఉంటారు !  వారు వారి లక్ష్యాలు చేరుకోవడం లో మానవత్వపు విలువలు పూర్తి గా ” మంట గలుపుతారు ” మరి మీ పధక రచన  లో ఇట్లాంటి పద్ధతులు అవలంబించుదామని అనుకుంటున్నారా ?  ఆ రకం గా మీ లక్ష్యాలు చేరుకుంటే , మీరు ఆ ఫలాలు , ఏమాత్రం స్వీయ నింద ( గిల్టీ ) గా ఫీల్ అవకుండా అనుభవించ గలరా ? వీటన్నిటి సమాధానమే మీ పధకం !
మీ పధకం ఆదర్శ వంతమైనదీ , స్పూర్తి దాయకమైనదీ అయి ఉంటే , మీ విజయం కూడా ఎంతో విలువైనది గా మీకు కనిపిస్తుంది !  మీ పధకం ఉత్తమమైన ఆశయాలతో ఉంటే ,  మీరు దానిని పొందినపుడు కలిగే ప్రతిఫలం కూడా మీకు ఎంతో రుచి గా ఉంటుంది , దానిని మీరు తనివి తీరా ఆస్వాదించ గలుగుతారు ! ఇతరులకు కూడా దాని ప్రతి ఫలాలను ఆత్మీయత తో పంచుకో గలుగుతారు ! మీ పధకం స్వచ్ఛ మైనది గా ఉంటే , మీరు అడ్డ దోవలు వెతుక్కోకుండా , మీ లక్ష్యాలను , సరాసరి చేరుకో గలరు !  ఉన్నత మానవ విలువలతో , పరిపూర్ణ మానవులవుతారు !   అందుకే మీరు , మీకోసం , రచించుకునే , మీ జీవిత పధకం అతి ముఖ్యమైనది ! 
వచ్చే టపాలో ఇంకో పని సూత్రం ! 

 

పని సూత్రాలు. 24. మరి మీ తాత్కాలిక లక్ష్యాలు ఏమిటి ?:

In మానసికం, Our minds on మార్చి 16, 2013 at 9:36 ఉద.

పని సూత్రాలు. 24. మరి మీ తాత్కాలిక లక్ష్యాలు ఏమిటి ?:

 
క్రితం టపాలో మనం తెలుసుకున్నాం కదా ,జీవితం లో దీర్ఘ కాలిక లక్ష్యాలు పెట్టుకుంటే ఉండే ప్రయోజనాలు. మరి కేవలం వాటితోనే ముందుకు పోవడం కంటే ,వర్తమానం అంటే ప్రస్తుతం , మనం చేయ వలసిన కార్యక్రమాలు కూడా మనకు తెలిసి ఉంటే  ఎక్కువ ప్రయోజనం. అంటే తాత్కాలిక లక్ష్యాలు. ఈ దీర్ఘ కాలిక , తాత్కాలిక లక్ష్యాలను , మనం గమ్యం లేదా మన లక్ష్యాలను చేరుకోడానికి ఉపయోగ పడే  మార్గాలు లేదా రోడ్డులు ( roads ). మనం ప్రధాన రహదారి ను చేరుకోడానికి , చిన్న చిన్న సందులలో కూడా ప్రయాణం చేయవలసి ఉంటుంది కదా ! మరి ఎట్లాగూ ప్రధాన రహదారి , అదే మెయిన్ రోడ్డు లో ప్రయాణం చేయ బోతున్నామని , చిన్న, చిన్న సందులలో మన ప్రయాణాన్ని అశ్రద్ధ చేయ లేము కదా ! ఆ సందులలో కూడా మన ప్రయాణానికి అంతరాయాలు ఏర్పడుతూ ఉంటాయి. వాటిని దాటుకుంటూ పోతేనే , పెద్ద రోడ్డు ను చేరుకొనేది !  ఇంకో విధం గా చెప్పుకోవాలంటే , తాత్కాలిక లక్ష్యాలు అన్నీ కలిసే దీర్ఘ కాలిక లక్ష్యాలకు పునాది గా ఏర్పడతాయి. 
ఉదాహరణకు వచ్చే నెలలో మీ కార్యక్రమాలు ఏమిటి ? మీ ఉద్యోగం  గురించి మీరు చేయవలసినవి ఏమిటి ? మీ ప్రాజెక్ట్ లు ఏమిటి ? వాటి గురించి మీరు చేయవలసిన హోమ్ వర్క్ ఏమిటి ?  మీరు కలవ వలసిన వారు ఎవరు ? ఎప్పుడు వారితో మీట్ అవాలి ? మీ వర్క్ కాకుండా , మీ కుటుంబ కర్తవ్యాలు ఏమైనా ఉన్నాయా మీకు ? వాటిని ఏ విధం గా మీరు ( మీ ఉద్యోగం చేస్తూ )  నిర్వర్తించ గలరు ? మీ ఫ్రీ టైం  అంటే మీ విరామ సమయాన్ని మీరు ఏ విధం గా వినియోగించ దలచారు ? మీ స్నేహితులతో కానీ , మీ ప్రేయసి తో కానీ , లేదా ప్రియుని తో కానీ, లేదా మీ కుటుంబ సభ్యులతో కానీ , కలిసి వెళ్ళ వలసిన ప్రదేశాలు ఉన్నాయా ? ఇవన్నీ కూడా మీ తాత్కాలిక లక్ష్యాలు అవుతాయి. అట్లాగే మీరు ప్రస్తుత సంవత్సరం , లేదా వచ్చే రెండేళ్ళు , మూడేళ్ళు , లేదా నాలుగేళ్ళు కూడా తాత్కాలిక లక్ష్యాలు ఏర్పరుచుకోవచ్చు !  
మీరు ఈ ఈ లక్ష్యాలు ఏర్పరుచుకున్నప్పుడు, వాటిని చేరుకోవలసిన మార్గాలు కూడా నోట్ చేసుకోవడం మంచిది. అంటే మూడు నెలలో ఇంకో సిటీ వెళ్ళే యోచన ఉంటే , ఆ ప్రయాణానికి సంబంధించిన ఏర్పాట్లు , రైలు, లేదా విమాన టికెట్ బుకింగ్ , మీ వసతి ఏర్పాట్లు , మీ బట్టలు , ఇట్లాంటి విషయాలు కూడా ఒక రమారమి తేదీల వారీ గా కార్యక్రమం మీరు ముందే నోట్  చేసుకుంటే , మీ కార్య క్రమాలు సులువు అవుతాయి ! ముఖ్యం గా మీరు వీటి తో పాటుగా , ఒక వేళ , మీరు ముందు గా అనుకున్నట్టు , ఏ కారణం వల్ల నైనా జరగక పొతే ( ఉదా రైలు క్యాన్సిల్ అవడమో , లేదా వాతావరణం బాగోలేక పోవడమో, లేదా ఆరోగ్యం అనుకూలించక పోవడమో  జరిగితే ) ఆసమయం లో మీరు తీసుకోవలసిన చర్యల గురించి కూడా మీకు ఒక  యోచన లేదా ఐడియా ముందుగానే ఉంటే ,  అట్లాంటి సంఘటనలు నిజం గా జరిగినప్పుడు కంగారు పడకుండా , సరి అయిన నిర్ణయాలు తీసుకో గలరు ! 
 
వచ్చే టపాలో ఇంకో పని సూత్రం ! 

పని సూత్రాలు. 23. మీ దీర్ఘ కాలిక లక్ష్యాలు ఏమిటి ?:

In మానసికం, Our minds on మార్చి 13, 2013 at 7:48 సా.

పని సూత్రాలు. 23. మీ దీర్ఘ కాలిక లక్ష్యాలు ఏమిటి ?:

 
పని సూత్రాలలో ఇంత వరకూ మనం మన ఉద్యోగాలలో ముందుకు పోవాలంటే  మనకు ఉండాల్సిన లక్షణాలు ఏమిటో క్రితం టపాల లో తెలుసుకున్నాం కదా ! ఇప్పుడు మీ దీర్ఘ కాలిక లక్ష్యాలు ఏమిటో కూడా తెలుసుకోవాలి ! ఈ లక్ష్యాలు ఎవరో మీకు తెలియ చేయ నవసరం లేదు ! ఎందుకంటే అవి ప్రత్యేకించి మీ వే కదా ! అంటే , లక్ష్యాలు ప్రతి మానవుడికీ కొన్ని కొన్ని ప్రత్యేకమైనవి ఉంటాయి ! మీరు ఇతర వ్యక్తులతో కొంత వరకూ తెలుసు కోగలిగినా కూడా , చివరకు మీ జీవితం లో మీ దీర్ఘ కాలిక లక్ష్యాలు మీరే నిర్ణయించుకోవాలి ! ఎందుకంటే మీ జీవితం ఇంకొకరిది కాదు కదా ! మీరు మాత్రమే జీవించే జీవితం ! అది పూర్తి గా మీ సొంతం ! 
ప్రస్తుతం, మనం కేవలం మీరు ఒక ఉద్యోగం లో చేరిన తరువాత కానీ , చేర బోయే ముందు కానీ , మీ దీర్ఘ కాలిక లక్ష్యాలు అంటే కనీసం అయిదు పది సంవత్సరాల తరువాత కానీ లేదా ఆ తరువాత కానీ , మీరు మీ ( ఉద్యోగ ) జీవితం లో ఏమి అవుదామని మీ ఉద్దేశం లేదా మీ లక్ష్యం ఏమిటి ? అనే విషయం తెలుసు కుంటున్నాం ! అంటే మీరు  ఏ  ఏ చదువులు చదవాలి అనే విషయాలు కాదని గుర్తు ఉంచుకోండి ! ప్రతి ఉద్యోగం లో కనీసం నాలుగు దశలు ఉంటాయి.  ఒకటి జూనియర్ గా చేరాక , రెండో దశ మధ్య దశ లేదా మిడిల్ లెవల్  ఉద్యోగి గానూ లేదా మూడో దశ లో సీనియర్ గానూ ఆ దశ కూడా దాటిన తరువాత , ఎగ్జిక్యుటివ్ గానూ అంటే మీరు పని చేసే కంపెనీ లో చివరి లేదా అత్యున్నత దశ ! ను చేరుకోవడమనే  లక్ష్యం ! మీరు ఈ నాలుగు దశలలో అనుభవం గడిస్తే , అదే కంపెనీలోనే ఉండనవసరం కూడా లేదు కదా , మీరు సాహస  ప్రవ్రుత్తి కలవారు అయితే , మీరు పొందిన అనుభవం తో మీ స్వంత కంపెనీ కూడా పెట్టుకోవచ్చు ! అందుకే మీకు మీరు ప్రవేశించిన ఉద్యోగం లో మీ దీర్ఘ కాలిక లక్ష్యాలు ఏమిటో ముందే మీరు నిర్ణయించుకోవాలి ! 
భారత దేశం లాంటి దేశాలలో , నిత్యం అనేక పరిస్థితులు అనేక విధాలు గా మారుతూ ఉంటాయి ! రేపు ఎట్లా ఉంటుందో ఎవరికీ తెలియదు ! ఇంకా దీర్ఘ కాలిక లక్ష్యాలు మాట్లాడుకోవడం ఏమిటి ? అని వీటిని తేలిక గా తీసి పారేసే వారు అనేక మంది ఉన్నారు ! అది నిజమే ! కానీ గుర్తు ఉంచుకోండి ! పని సూత్రాలు కేవలం జీవితం లో ఉన్నత శిఖరాలు చేరుకోవాలనే కృత నిశ్చయం ఉన్న వారికే ! వారంతా గుర్తు ఉంచుకోవలసిన విషయం ఇంకోటి కూడా ఉంది !  అదే సమస్యల భారత దేశం లో అత్యున్నత విద్య చదివి , తాము ఎన్నుకున్న ప్రత్యేకమైన శాఖ లో లేదా ఫీల్డ్ లో అత్యున్నత స్థాయి కి చేరుకున్న ప్రతి వారూ  వారి వారి జీవిత మొదటి దశల లో దీర్ఘ కాలిక లక్ష్యాలు ఏర్పరుచుకుని వాటి కోసం ఒక క్రమ పధ్ధతి లో శ్రమ పడి , ఆ యా లక్ష్యాలను చేరుకున్న వారే ! 
ఇంకో ఉదాహరణ ! అమెరికా ప్రస్తుత అద్యక్షుడైన ఒబామా తాను స్కూల్ లో చదువు కునే సమయం లోనే , ఎవరైనా ” నీవు పెరిగి పెద్ద వాడివి అయ్యాక ఏమవుతావు ? అని అడిగితే , వారికి ఏమాత్రం తడుము కోకుండా ” నేను అమెరికా కు ప్రెసిడెంట్ నవుతా ! ” అని ఎంతో  ధైర్యం గా, ఆత్మ విశ్వాసం తో చెప్పే వాడుట ! ”అప్పుడు ఆ సమాధానం విని అందరూ నవ్వుకునే వారుట ! కానీ ఆ దీర్ఘ కాలిక లక్ష్యం తోనే,  ఒబామా రెండు సార్లు ( ఇప్పటి వరకూ ) అమెరికా దేశానికి అద్యక్షుడి గా ఎన్నిక అయ్యాడు ! దీర్ఘ కాలిక లక్ష్యాలు ఏర్పరుచు కోవడం లోని శక్తి అది ! 
 
వచ్చే టపాలో ఇంకో పని సూత్రం ! 

పని సూత్రాలు . 22. చక్కగా రాయండి !

In మానసికం, Our minds on మార్చి 12, 2013 at 9:39 సా.

పని సూత్రాలు . 22.  చక్కగా రాయండి ! 

పని సూత్రాలలో ఇంకో ముఖ్య సూత్రం , చక్కని దస్తూరీ !  అంటే చేతి వ్రాత !  మామూలు గా మనం   పని చేసే చోట చాలా ఫైళ్ళ మీదా , లేదా చాలా రికార్డు లలో నూ మన చేతి వ్రాత తో వివరాలు రాయడమూ , నిక్షిప్తం చేయడమూ చేస్తూ ఉంటాము ! చేతి వ్రాతను చాలా మంది అశ్రద్ధ చేస్తూ ఉంటారు !  దీనికి కారణాలు అనేకం ,  ఆంగ్ల భాష లో రాయ వలసి వచ్చినపుడు , అది మన భాష కాదు కదా అందువల్ల , మొదటి నుండీ అశ్రద్ధ చేయడం జరుగుతుంది , రాత ఎట్లా  ఏమౌతుంది కనుక అనే నిర్లిప్తత ఏర్పడుతుంది ఆది లోనే ! గురువులు చక్కగా నేర్పించక పోయినా కూడా చేతి రాత ను  అశ్రద్ధ చేయడం జరుగుతుంది ! తెలుగు వ్రాతను కూడా అనేక కారణాల వల్ల  అనేక మంది అశ్రద్ధ చేయడం జరుగుతుంది ! ఈ చేతి వ్రాత తో మీరు మీకోసం రాసుకునేట్టయితే , మీరు ఎట్లా రాసుకున్నా పరవాలేదు ! కానీ మీరు ఇతరుల కోసం కానీ  మీ అవసరాలకు కాకుండా కానీ వ్రాయ వలసి వచ్చినపుడు , ప్రత్యేకించి , మీరు చేసే ఉద్యోగం లో , మీ వ్రాత సులభం గా చదివినపుడు అర్ధమయే  లా ఉంటే , చాలా ఉత్తమం ! లేకపోతే  కేవలం మీ చేతి వ్రాత మీ రాతనే మార్చివేయగల ప్రమాదం ఉంది !  మీ ఉద్యోగం లో మీరు ఎక్కడైనా వ్రాసే సమయం లో గుర్తు ఉంచుకోవలసిన ముఖ్య విషయాలు ఇవి:
1. మీరు ఏమి రాస్తున్నారు ? 2. మీ చేతి వ్రాత ఎట్లా ఉంది? , అనే విషయాల మీదే పని లేదా ఉద్యోగం లో మీ పురోగతి అవకాశాలు ఆధార  పడి  ఉంటాయి . ఎందుకంటే ,మీరు ఏమి రాస్తున్నారు అనే విషయం మీద మీ ఆలోచనా ధోరణి ఏమిటి , సమస్యా పరిష్కారాలలో  మీ పాత్ర ఏమిటి అనేది నిర్ణయించ బడుతుంది ! అట్లాగే  మీ వ్రాత ఎట్లా కనిపిస్తుందో కూడా ముఖ్యమే ! 
మరి మీరు ఏ  జాగ్రత్తలు తీసుకోవాలి ?
1. అర్ధమయే చేతి వ్రాత :  మీరు ఎవరి దగ్గరికైనా వెళ్లి వారితో మీ మాత్రు భాష లో మాట్లాడండి. ఉదాహరణకు తెలుగు అనుకుంటే , మీ ఎదుటి వ్యక్తి కూడా తెలుగువాడై   ఉన్నా , ఆయన మాట్లాడేది తెలుగు భాష అయినా ,  వారు మాట్లాడేది ఏదీ మీకు అర్ధం కాలేదనుకోండి ! అప్పుడు మీ పరిస్థితి ఎట్లా ఉంటుందో , మీ చేతి వ్రాత కూడా ఇతరులకు అర్ధం కాక పొతే అట్లాంటి పరిస్థితి ఏర్పడుతుంది ! అందు వల్ల  మీ చేతి వ్రాత ఎప్పుడూ మీకు మాత్రమె కాక , ఎవరికోసం అయితే వ్రాస్తున్నారో వారికి అర్ధం కావాలి , లేక పొతే అది వ్రాత అనిపించుకోదు కదా ! 
2. శుభ్రమైన వ్రాత :  మీరు వ్రాసే రాత ఎక్కడ రాసినా , తప్పులు లేకుండా , కనీసం ఎక్కువ తప్పులు లేకుండా , కొట్టి  వేతలూ , అవీ లేకుండా శుభ్రం గా ఉంటే ,చదివే వారికి అనుకూలం గా ఉండడం మాత్రమె కాకుండా , మీ పని శుభ్రత కూడా వారికి కనిపిస్తుంది !  
3. మీ ప్రత్యేకమైన దస్తూరీ అయి ఉండాలి : అంటే మీ చేతి వ్రాత మీదైన శైలి తో స్టైలిష్ గా ఉండాలి ! 
4. పరిణితి చెంది ఉండాలి మీ చేతి వ్రాత ! అంటే మీ రాత చిన్న పిల్లల చేతి వ్రాత లా ఉండ కూడదు అట్లా ఉంటే, మీరు సరిగా రాయడం నేర్చుకోనట్టే కదా ! 
5. వ్రాత స్థిరత ఉండాలి : అంటే మీరు రాసే రాత పేజీ మొదటి లైను లో ఎట్లా ఉందో , ఆ పేజీ లో ఆఖరి లైను లో కూడా అట్లాగే ఉండాలి, మారి పోతూ ఉండకుండా ! చక్కగా వ్రాయడం నేర్చుకుంటే , మీరు టైపు చేసే సమయం లో కూడా అదే అలవాటు కొనసాగుతుంది ! 
ఒక సంఘటన : మరణ శిక్ష వేయబడిన ఒక ఖైదీ కి ఆఖరి నిమిషం లో క్షమా భిక్ష ప్రసాదించ బడింది. అప్పుడు మరణ శిక్ష అమలు చేసే పోలీసు కు ఒక టెలిగ్రాం వచ్చింది ,  ఆ టెలిగ్రామ్ లో  ” Hang him,not stop ” అని ఉంటే , ఆ మరణ శిక్ష అమలు చేయ బడింది. కానీ తరువాత తెలిసింది , ఆ టెలిగ్రాం తప్పుగా టైపు చేయబడిందని , అసలు టైపు చేయ వలసినది ”  Hang him not. stop ”  అని ! కానీ  ఆ తప్పు గమనించే లోగా ఒక ప్రాణం అనంత వాయువులలో కలిసిపోయింది !  
వచ్చే టపాలో ఇంకో పని సూత్రం ! 

పని సూత్రాలు. 21. మీ మాటే మంత్రమూ !

In మానసికం, Our Health, Our minds on మార్చి 10, 2013 at 1:16 సా.

పని సూత్రాలు. 21. మీ మాటే మంత్రమూ !

పని సూత్రాలలో ఇంకో ముఖ్య సూత్రం –  మీ సంభాషణ ! అవును ! చక్కటి భాష  ప్రతి మానవుడికీ , ఇతర మానవులతో సంబంధాలు  పెట్టుకో డానికీ , వాటిని చక్కగా కొనసాగించ  డానికీ కూడా  అతి ముఖ్యమైన సాధనం ! సాంకేతికం గా మానవులు ఎంత పురోగమిస్తూ ఉన్నా , అనేక రకాలైన గాడ్జెట్ లు ప్రతి రోజూ మార్కెట్ లోకి వస్తున్నా కూడా , వాటితో మాట్లాడడం మానవులే కదా చేయాల్సింది ! అంతే కాకుండా ,  వారు చేస్తున్న ఉద్యోగాలలో , లేదా ఏ  రకమైన వర్క్ ప్లేస్ లోనైనా ఇతర ఉద్యోగులతోనూ , లేదా వారి పై అధికారి తోనూ , లేదా వారి క్రింద పని చేస్తున్న వారితోనూ , సవ్యమైన సంబంధాలు కలిగి ఉండడానికి వారి సంభాషణ ఎంతో  ఉపయోగ పడుతుంది ! 
మనం చూస్తూ ఉంటాం ! చదువుకునే కాలేజీలలో కానీ స్కూళ్ళ లో కానీ , ప్రత్యేకించి భారత దేశ  విద్యాలయాల లో , వైవా లేదా  సబ్జెక్ట్ విషయాలు మీరు మాట్లాడుతూ సమాధానం చెప్పే విధానం – దీనికి చాలా తక్కువ ప్రాముఖ్యత ఇవ్వ బడుతుంది ! దానికి తగ్గట్టు గానే , చాలా మంది విద్యార్ధులు కూడా , చాలా నిశ్శబ్దం గా , వారికి గొంతు ఉందా లేదా అన్నంత అనుమానం కలిగించే లా ఎప్పుడూ వారి మాట వినపడక పోయినా కూడా , లిఖిత పరీక్షల లో చాలా బాగా పర్ఫాం చేసి మంచి మార్కులు తెచ్చుకుంటారు ! కానీ వారు వారి చదువులు పూర్తి చేసి ఉద్యోగ ప్రయత్నాలు మొదలు పెట్టినప్పుడు , వారి లోపాలు వారికి తెలుస్తాయి. వారి లోపాలు అనడం కన్నా , విద్యా విధానం లో లోపాలు అనవచ్చు నెమో ! ఎందుకంటే , నిత్య జీవితం లో ప్రతి మానవులూ , ఇతరుల తో సంబంధాలు కేవలం లిఖిత పూర్వకం గా ఎప్పుడూ కోన సాగించ లేరు కదా ! 
మరి చక్కగా మాట్లాడడం ఆంటే ఏంచేయాలి ?:
1. ఇతరుల తో మాట్లాడుతున్న సమయం లో మనం మంబ్లింగ్ , అంటే గొణగడం , లేదా గుస గుసలాడం చేయకూడదు ! ఎందుకంటే , ఇతరులకు మనం మాట్లాడేది ఏమిటో సరిగా వినబడదు , వినపడ్డా , దానిలో స్పష్టత లోపిస్తుంది. అంతే  కాక ముఖ్యంగా , గొణిగే  వారిని ఆత్మ విశ్వాసం తక్కువ గా ఉన్నవారిలా అనుకునే ప్రమాదం ఉంది ! 
2. అతి నిదానం గా అతి మృదువు  గా కూడా మాట్లాడ కూడదు ! ప్రత్యేకించి మీరు పని చేసే స్థానాల్లో ! మీ భాగ స్వామి తో కానీ , మీరు ప్రేమలో పడ్డప్పుడు కానీ అట్లా మాట్లాడడం మీరు ఏ  ప్రయత్నమూ చేయకుండా నే మీకు వస్తుంది, మీ హృదయం లో  ప్రేమ తరంగాలు ఎగిసి పడుతున్నప్పుడు , మీ మనసు తేలిక అవుతుంది , మీ మాట బరువు అవుతుంది , దానితో  అతి మృదువు గా మారి , వినే వారి చెవులకు ప్రేమ గంధం పూయ బడుతున్న భావన కలుగుతుంది ! మరి ఇంత ప్రత్యేకత ఉన్న మృదు భాష ను మీరు పని చేసే చోట ఉపయోగించడం ? కేవలం మీరు అక్కడ కూడా ఎవరితో నైనా ప్రేమాయణం సాగిస్తేనే  చేయాలి !!!
3. కలగా పులగం గా మాట్లాడకూడదు !:  అంటే మీరు పని చేసే ప్రదేశం ,ఒక సాఫ్ట్ వేర్ కంపెనీ అవుతే , అక్కడ సాఫ్ట్ వేర్ కు సంబంధించిన సాంకేతిక పదాలు వాటికి సంబంధించిన మాటలే మాట్లాడాలి కానీ , మీరు తెలుగు కవిత్వం లో మీ పాండిత్యం అక్కడ చూపించ కూడదు ! అది పూర్తి గా అసందర్భం అవుతుంది ! 
4. భాష  దేశ కాల పరిస్థితుల బట్టి , మన చుట్టూ ఉండే మనుషుల భాష ను బట్టీ కూడా మారుతూ ఉంటుంది ! ఒక్కో ప్రాంతం లో ఒక్కో యాస కూడా ఉంటుంది ! వీలైంత వరకూ మనం పని చేసే చోట , మన యాసలూ  అంటే యాక్సెంట్ లు అతి తక్కువ గా ఉపయోగిస్తూ మాట్లాడితే లాభ కారి గా ఉంటుంది ! 
5. ఇంగ్లీషు మన భాష కాదు !  ఒక ఉదాహరణ : ఆంధ్ర దేశం నుంచి కొంత కాలం క్రితం, ఒక తెలుగు డాక్టర్ ఇంగ్లండు వెళ్ళాడు. అక్కడ ఆయన గారు , తన కొలీగ్స్ ( తెల్ల వారు ) తో ఒక డిన్నర్ కు వెళ్ళాడు.  టేబుల్ దగ్గర ఆయన తన పక్కన ఉన్న ( తెల్ల ) వ్యక్తి తో  అతని పక్కన ఉన్న  నీటి జగ్గు అందివ్వమని  ” ప్లీజ్ పాస్ వాటర్ ” అన్నాడు. అప్పుడు ఆ ( తెల్ల ) వ్యక్తి  పగల బడి నవ్వాడు ట ! ఎందుకంటే  లోకల్ గా  ” పాస్ వాటర్ అంటే ” మూత్రం చేయమని కూడా అర్ధం వస్తుంది ! ( ఆ డాక్టర్ ప్లీజ్ పాస్ ది జగ్  అని ఉండాల్సింది ! ) అందువల్ల , భాష లో బాగా పట్టు ఉంటే తప్ప ఇతర భాషలలో మనం, ప్రత్యేకించి  ఉద్యోగాలలో ఏ  ప్రయోగాలూ చేయ కూడదు ! ( ఆ విషయం లో మనం ఎంతో మేలు ! ఎందుకంటే , భారత దేశం లో చాలా మందికి కనీసం మూడు భాషలు వస్తాయి ! కానీ పాశ్చాత్య దేశాలలో వారి మాత్రు భాష తప్ప ఇతర భాషలు తెలియవు ఉదాహరణకు  ఇంగ్లండు పొరుగు దేశం అయిన ఫ్రెంచి వారికి ఇంగ్లీషు రాదు ! అట్లాగే ఇంగ్లండు లో ఇంగ్లీషు మాట్లాడే వారికి ఫ్రెంచ్ భాష తెలియదు !  
మనం ఎట్లా మాట్లాడ కూడదో తెలుసుకున్నాం కదా మరి ఎట్లా మాట్లాడాలి ?:
మనం మాట్లాడే భాష స్పష్టం గా , ఇతరులకు అర్ధమయే రీతి లో , చిన్న చిన్న పదాలలో క్లుప్తం గా నూ , ఆహ్లాద కరం గానూ  ఉండాలి ! అప్పుడు మీ మాట ఇతరులకు మంత్రం లా పని చేసి , మీతో సత్సంబంధాలు ఏర్పరిచే వారధి అవుతుంది ! 
 
వచ్చే టపాలో ఇంకో పని సూత్రం ! 

 

పని సూత్రాలు. 20. ” కూల్ ” గా ఉండడం అంటే ఏమిటి ?

In ప్ర.జ.లు., మానసికం, Our minds on మార్చి 9, 2013 at 1:30 సా.

పని  సూత్రాలు. 20. ” కూల్ ” గా ఉండడం  అంటే ఏమిటి ? 

 
పని సూత్రాలలో ఇంకో ముఖ్య సూత్రం  ” టు బి  కూల్  ఎట్  ఆల్ టైమ్స్ !” . అంటే దీనిని తెలుగులో అనువాదం చేస్తే , ఎప్పుడూ చల్ల గా ఉండమని అర్ధం వస్తుంది ,కానీ అది నిజం కాదు. అందు వల్లనే  కూల్  అనే ఆంగ్ల పదాన్నే వాడడం జరిగింది ! నవీన  ప్రపంచం లో కూల్  గా ఉండడం అంటే , ప్రశాంత చిత్తం తో , ఆత్మ విశ్వాసం తో  ఆదుర్దా ఏమీ లేకుండా అనేక నిత్య జీవిత సందర్భాలలో ప్రవర్తించడం ప్రత్యేకించి ,స్కూల్ లోనూ, కాలేజీ లోనూ , లేదా పని చేసే చోటా కూడా !  ఈ ఈ సందర్భాలలో , లేదా స్థలాల లో , ఆందోళన పడకుండా  ఇతరులలో కలిసి పోతూ కూడా తమ పని తాము సక్రమం గా చేయ గలగడం ! అంతే కాక, తమ పరిస్థితుల మీద తాము నియంత్రణ కలిగి ఉండడం !
మరి కూల్ గా ఉండాలంటే, ఏ లక్షణాలు అలవాటు చేసుకోవాలి ?: 
1. మీ  పరిసరాలను సదా గమనించండి ! :
అంటే కేవలం మీ చుట్టూ ఉండే స్థలాలనూ , చెట్లనూ , చేమలనూ , కట్టడాలనూ , అంటే బిల్డింగు లనూ , ఫర్నిచర్ నూ అనుకుంటే అది పొరపాటు ! మానవ సంబంధాలు కేవలం వాటితో కాదు కదా ! ముఖ్యం గా మీరు మీ చుట్టూ ఉన్న మనుషుల ను పరిశీలిస్తూ ఉండాలి ! అంటే వారి దృష్టి లో మీ మీద వారి  అభిప్రాయం ఎట్లా ఉంటుందో గమనించడం !  ఈ విషయం లో మీకు ఉపయోగ పడే ” సాధనాలు ” మీ వేషం , మీ భాషా ఇంకా మీ ప్రవర్తనా !  అవే వారికి మీ మీద  ఒక మంచి అభిప్రాయం కలిగిస్తాయి !  ఈ విషయం లో ” వారితో నాకేం పని ? నా ఇష్టం వచ్చినట్టు నేను ఉంటాను ” అనుకునే వారు చాలా మంది ఉంటారు !  అది నిజమే ! కానీ పని సూత్రాలలో ముఖ్య సూత్రం మీ పురోగతి అంటే మీ ప్రోగ్రెస్ !  దానికోసం మీరు మీ వర్క్ ప్లేస్ లో ఇతరులతో చక్కటి సంబంధాలు కలిగి ఉండడం అతి ముఖ్యం ! కేవలం మీరు ఒక ప్రతిభావంతులైన శాస్త్రగ్నులైతే తప్ప ! ( మీ అంత  మీరు,  ఒక ప్రయోగ శాల లో ప్రయోగాలు చేస్తూ ఉండవచ్చు ! ) 
2. స్వతంత్రత అలవాటు చేసుకోండి ! :  కూల్  గా ఉండే వారు ఇతరులతో బాగా మెసల గలిగినా , వారు ఇతరుల మీద ఆధార పడకుండా , సాధ్యమైనంత వరకూ , వారి పనులు వారే స్వతంత్రం గా చేసుకుంటూ ఉంటారు ! 
3. మీ ప్రత్యేకత కోల్పోవద్దు ! : బురద లో పెరిగినా తామర పూవు అందం గా ఉంటుంది , తన ప్రత్యేకత ఎప్పుడూ కోల్పోదు ! అది ” బురద పూవు ” అనిపించుకోదు కదా !  కూల్ గా ఉండడం అంటే ఇతరులతో కలిసిపోవడం నిజమే ! కానీ ఈ ప్రయత్నం లో మీరు  మీ ప్రత్యేకతలను కోల్పోకూడదు ! అంటే మీ సహచరులు  సిగరెట్ తాగుతూ ఉంటే  మీరు స్మోకింగ్ అంత వరకూ చేయక పొతే , ఆ అలవాటు చేసుకో నవసరం లేదు !  అట్లాగే మీరు శాక హారులైతే , మీ చుట్టూ ఉన్న వారు మాంసం తింటూ ఉంటే , మీరు కూడా ఆ పని చేయ నవసరం లేదు ! అట్లా వారిని అనుకరించడం ” కూల్ ” గా ఉండడం అనిపించుకోదు ! అదే విధం గా మద్యానికి అలవాటు పడడం , ఇంకా ఇతర వ్యసనాలు కూడా !
4. మీ హృదయం విప్పండి ! : అంటే మీ హృదయాన్ని హనుమంతుడి లా చీల్చుకోమని అర్ధం చేసుకోకండి !  మీ సహచరుల దగ్గర మీరు  ఏ  అరమరికలు లేకుండా ,మీ వ్యక్తిగత విషయాలు  చెప్పుకోండి !  సమస్యలూ, కష్టాలూ లేని మానవులు లేరు కదా !  మీరు వాటిని మీ హృదయం లో ” తొక్కి పట్టి ఉంచితే ” అది మీ హృదయానికి మంచిది కాదు ! 
5. సమ దృష్టి కలిగి ఉండండి ! : మీరు ఇతర మానవులతో సంబంధాలు ఏర్పరుచుకునే సమయం లోనూ లేదా వారితో ఆ సంభంధాలు కొనసాగించే సమయం లోనూ ,వారి మీద సమ దృష్టి కలిగి ఉండండి ! అంటే వారు మీకన్నా ఎక్కువా కాదూ , తక్కువా కాదు !  వారు మీలానే మానవులు ! వారికి మీరు ఇచ్చే గౌరవం ఇస్తూ ఉన్నా ,వారిపైన సమ దృష్టి కలిగి ఉంటే , మీలో ఆత్మ న్యూనతా భావాలు కానీ , అహం భావం కానీ ఏర్పడవు ! ఆ గుణాలు,  మీ మానసిక ఆరోగ్యాన్ని  ప్రభావితం చేసే మలినాలు ! 
 
వచ్చే టపాలో ఇంకో పని సూత్రం ! 

పని సూత్రాలు. 19. ఆకర్షణీయం గా ఉండండి !

In మానసికం, Our minds on మార్చి 8, 2013 at 8:30 సా.

పని సూత్రాలు. 19. ఆకర్షణీయం  గా  ఉండండి ! 

 
పని సూత్రాలలో ఇంకో ముఖ్య సూత్రం ఎప్పుడూ మీరు ఆకర్ష ణీయం  గా కనబడడం !  మనం చూస్తూ ఉంటాం , ఆజాను భాహువులైన పురుషులు సమాజం లో ఎంతో  ముందుకు చక చకా పోతూ ఉంటారు , వారు ఆర్ధికం గా ఏ తరగతి కి చెందినప్పటికీ , అట్లాగే అందమైన , ఆకర్షణీయమైన యువతులు కూడా  పలు రంగాలలో వారు ఎంచుకున్న లక్ష్యాలను త్వరగా అధిగమిస్తూ ఉంటారు ! ఇక సహజం గా పుట్టుకతో , శారీరికం గా  దృ డం గా లేని పురుషులు , లేదా అంతగా అందం గా అనిపించని స్త్రీలూ  కూడా సమాజం లో ఎంతో  పురోగమిస్తూ ఉంటారు.గమనించ వలసిన విషయం ఏమిటంటే , మనం మన లక్ష్యాలను చేరుకోడానికి  పుట్టుకతో మనకు సంక్రమించిన శారీరిక లక్షణాలు కొంత వరకూ దోహద పడుతున్నా కూడా , మన మానసిక లక్షణాలు , తదనుగుణం గా ఇతరులతో ప్రత్యేకించి , మన చుట్టూ ఉన్న సమాజం లోనూ , ఇంకా మనం చేసే ఉద్యోగాలలో మన కొలీగ్స్ తోనూ ,మనం ప్రవర్తించే తీరు కూడా మన పురోగతి కి ఎంతాగానో తోడ్పడతాయి ! 
నిత్య జీవితం లో మనం ఇతరులకు  ఆకర్షణీయం  గా కనబడడానికి మనం ఏం  చేయాలి ?:
1.  శరీరాన్ని శుభ్రం గా ఉంచుకోవడం 
2.  ఎప్పుడూ తాజా బట్టలు వేసుకోవడం 
3.  ఆకర్షణీయమైన హేర్  స్టైల్ తో కనిపించడం 
4.  నిరంతరం చిరునవ్వుతో ఇతరులను పలకరించడం లేదా ఇతరులతో సంభాషించడం 
5. హృదయ పూర్వకం గా   అరమరికలు లేకుండా ఇతరులతో  మెసలడం 
6. ఇతరుల అవసరాలను కూడా సానుభూతి తో  పరిశీలన చేయడం 
7. ఈర్ష్యా ద్వేషాలు లేకుండా ఇతరులతో ప్రవర్తించడం ,
8. కేరింగ్ మనస్తత్వం తో ఉండడం . 
కేవలం  పైన చెప్పిన లక్షణాలే కాకుండా , మీరు నుంచునే లేదా కూర్చునే తీరు కూడా ఇతరులను మీ వైపు ఆకర్షింప చేస్తుంది ! మీ ఎత్తు బరువు ఎట్లా ఉన్నా కూడా , మీరు మీ సీటు లో ఒక మూలకు నక్కి నట్టు కూర్చుని  ఒక పక్కకు వాలిపోయి ఉంటే   మీరు ఇతరులతో సంభాషణకు విముఖం గా ఉన్నట్టు అభిప్రాయం కలిగిస్తారు !  అట్లా కాకుండా మీరు కూర్చున్న సీటు లో నిటారుగా మీ వీపు ఉంచి వాలిపోకుండా ఉంటే  మీరు ఎలర్ట్ గా ఉండి ,ఇతరులకు మీతో మాట్లాడాలనే ఉత్సాహం కలిగిస్తారు ! ఇతరులకు మీలో   మీ చిరునవ్వు , కపటం లేని , మీ స్వభావం , మీ శుభ్రతా ,  భేషజాలు ఏవీ  లేని మీ సంభాషణా , జీవితమంటే మీకున్న ఆశావాద దృక్పధం – ఈ లక్షణాలు  ఎక్కువ  ఆకర్షణీయం  గా కనబడతాయి ! 
 
వచ్చే టపాలో ఇంకో  పని సూత్రం ! 

పని సూత్రాలు. 18. ప్రతి రోజూ మీ ఇంటర్వ్యూ రోజు అనుకోండి !

In మానసికం, Our minds on మార్చి 7, 2013 at 11:20 సా.

పని సూత్రాలు. 18. ప్రతి రోజూ  మీ ఇంటర్వ్యూ  రోజు అనుకోండి ! 

 క్రితం టపాలో పని సూత్రాలలో వస్త్ర ధారణా , ఆభరణాలూ , పాద రక్షలూ మొదలైన విషయాలలో మీరు తీసుకో వలసిన జాగ్రత్తలూ, శ్రద్ధా  ఎట్లా ఉండాలో చూశాము కదా ! ఇప్పుడు ఇంకొన్ని వ్యక్తి గతమైన శ్రద్ధ ఏ  రకం గా మీ ఉద్యోగం లో మీ అభి వృద్ధి కి దోహద పడతాయో తెలుసుకుందాం ! 
1. మీరు ధరించే బట్టలు , ఎప్పుడూ ,  ఉతికి ఇస్త్రీ చేసినవీ , తాజాగా మడతలు లేకుండా ఉన్నవీ ధరించండి ! అంతే కాకుండా , గుండీలు అంటే బటన్స్ లేదా బొత్తాములు కొన్ని ఊడి పోయినవీ , లేదా కొన్ని చివర్లలో కుట్లు ఊడి పోయినవీ, లేదా చిన్న వైనా  మచ్చలు ఉన్న వస్త్రాలు ధరించి ఆఫీసుకు గానీ మీరు పని చేసే స్థానానికి గానీ వెళ్ళడం శ్రేయస్కరం కాదు ! 
2. రోజూ తాజాగా , స్నానం చేసి , డి  ఓడరెంట్  స్ప్రే చేసుకుని ఆఫీసు కు వెళితే  మీ శరీరం తో పాటుగా , మీ మనసు కూడా ఉల్లాసం గా ఉండి , మీరు బాగా పని చేయగలగడమే కాకుండా , మీ బాసు మెప్పు కూడా పొంద గలరు ! 
3. మీ కేశాలంకరణ కూడా తాజాగా చేసుకుని వెళ్ళడం మంచిది. ట్రిమ్ చేసిన హేర్ కట్ చేసిన తలలు కూడా  కార్పోరేట్ కల్చర్ కు అనుగుణం గా ఉంటాయి ! ఉష్ణ దేశాలలో , మీ తల మీద హేర్  ట్రిమ్ చేసి ఉంటే హాయి గా కూడా ఉంటుంది ! 
4. పురుషులు రోజూ షేవ్ చేసుకుని ఆఫీసు కు వెళితే వారు వారి బాసు మీద మంచి ఇంప్రెషన్ ఏర్పరచడమే కాకుండా , వారి సహచర యువతుల్లో ప్రేమ భావనలు, అవి లేక పొతే కనీసం స్నేహ భావనలైనా కలిగించ గలరు ! ఎందుకంటే చాలా మంది యువతులు, పురుషులు ఫ్రెష్ గా షేవ్ చేసుకుంటే నే ఇష్ట పడతారు ! 
5. చేతులు ఎప్పుడూ శుభ్రం గా ఉంచుకోవడం అలవాటు చేసుకోవాలి !  కారు డ్రైవ్ చేసీ, లేదా  బైక్ కానీ సైకిల్ కానీ నడిపి , మాసి పోయీ , నల్లని గ్రీజ్ మరకలు, మసీ అంటి ఉన్న చేతులతో ఆఫీసులో ఎవరికీ కనపడడం మంచిది కాదు !  మీ పని రీత్యా,  కొంత సమయం మీ చేతికి మలినాలు అంటినా కూడా ! ఎందుకంటే , అపరి శుభ్రం గా ఉన్న చేతులు ముఖ్యం గా అనారోగ్య కరం !  మానవుల కు వచ్చే అనేక రకాలైన ఇన్ఫెక్షన్ లు కేవలం చేతుల ద్వారానే వ్యాపిస్తాయి. మీ ఆఫీసు లో ఇతర ఉద్యోగులు కానీ  లేదా మీ కస్టమర్స్ కానీ మీతో హ్యాండ్ షేక్ లేదా కరచాలనం చేయడానికి ఇష్ట పడరు , మీ చేతులు మలినం గా ఉంటే ! ఇంకో ముఖ్య విషయం , ఆఫీసులలో కానీ , మీరు పని చేసే స్థానం లో కానీ , ప్రేమాయణాలు కనుక జరిపే వారి కి  మలినమైన చేతులు చాలా నష్ట దాయకం  ! 
6. చేతి వేళ్ళ గోళ్ళు , అమ్మాయిలకు అందం గానే ఉంటాయి , క్రమం గా మ్యానిక్యూర్ చేయించు కుంటూ ఉంటే , కానీ పెరిగి ఉన్న గోళ్ళు , లేదా గోళ్ళ క్రింద మలినాలతో నల్ల గా మారి ఉన్న గోళ్ళూ, పురుషులకు ఉంటే ఆ పురుషులు అపరిశుభ్రం గా ఉన్నట్టు కనిపిస్తారు !
7. చాలా మంది  ఆఫీసుకు వెళ్ళే తొందరలో ఫలహారం అంటే టిఫిన్ చేసీ , లేదా అన్నం తినీ , వెంటనే తమ వాహనాల మీద ఆఫీసులకు ప్రయాణం అవుతూ ఉంటారు ! దానితో , పళ్ళ మధ్య చేరిన ఆహార పదార్ధాలు ఇరుక్కుని, తరువాత కొన్ని గంటలకు, వారు ఇతరులతో మాట్లాడుతూ ఉన్నప్పుడు , దుర్వాసన వస్తూ ఉంటుంది ! అందువల్ల క్రమం గా బ్రష్ చేసుకోవడమూ ( ప్రత్యేకించి ఏమైనా ఆహారం తిన్న తరువాత ), లేదా ఆ అవకాశం లేని స్థలాల్లో  నోటిని తాజాగా ఉంచే చూయింగ్ గం ను నమలడమో  చేయాలి ! కానీ ఆఫీసులో కాదు ! 
8. ఆల్కహాలు , టీలు , కాఫీలు అలవాటు ఉన్న వారు కూడా వారి నోటి పరిశుభ్రత విషయం లో శ్రద్ధ తీసుకోవాలి ! ప్రత్యేకించి ఆల్కహాలు తాగే అలవాటు ఉన్న వారి దగ్గర రెండు రకాలు గా వాసన రావడానికి అవకాశం ఉంది ! ఒకటి  వారు క్రితం రాత్రి ఎక్కువ  మోతాదు లో తాగితే , వారు ఊపిరి వదులు తున్నప్పుడు , ఒక రకమైన ఆల్కహాలు వాసన వస్తుంటుంది ! వారి శరీరం ఎక్కువ గా చెమట పట్టి కూడా వాసన వస్తుంది ! అంతే కాక , వారి నోటిలో ఆల్కహాలు నోటి చర్మం లో కలిగించే మార్పుల వల్ల కూడా వాసన వస్తుంది !   పని సూత్రాలలో ముఖ్య సూత్రం: సిగరెట్లూ ,  మద్యమూ , మాదక ద్రవ్యాలూ ముట్టుకోక పోవడం ! ఎందుకంటే అవి  పని సూత్రాలు పాటించే వారి  దీర్ఘ కాలిక లక్ష్యాలను  ఒక్క సారి గా అగాధం లో పడవేస్తాయి !  ఎందుకంటే ఆ లక్షాలు వారు చేరుకునే లోగానే , వారి ప్రాణాలు కోల్పోయే ప్రమాదం ఉంది ! ఇంకో విధం గా చెప్పుకోవాలంటే , ఇట్లాంటి అలవాటు ఉన్న వారు పని సూత్రాలు పాటించినా , వాటి ప్రయోజనాలు అనుభవించకుండానే అనారోగ్య బారిన పడతారు ! వారికి పని సూత్రాలు  నిరుపయోగం ! 
 
వచ్చే టపాలో ఇంకో పని సూత్రం ! 

 

%d bloggers like this: