ఆకర్షణ, ప్రేమ, కామ వాంఛ – శాస్త్రీయ విశ్లేషణ. 12.
క్రితం టపాలో చూసినట్లు, మానవులు తమ జీవిత కాలం లో ఒకరికన్నా ఎక్కువ మంది తో అనుబంధాలను ఎర్పరుచుకుంటారు. అది ఒకే సమయం లోనే కాక పోవచ్చు.
వేరే జీవ జాతుల లో చూసినట్లయితే ఈ అనుబంధాలు ఏర్పరుచుకునే గుణం, వాటిలో కూడా నిక్షిప్తమై ఉంటుంది.
ఒక పరిశీలనలో తొమ్మిది వేల జాతుల పక్షులలో తొంభై శాతం కన్నా ఎక్కువ పక్షి జాతులు వాటి సంగమ దశలో ఇంకో పక్షి తో అనుబంధం కలిగి ఉంటాయి. అంటే బ్రీడింగ్ సీజన్ లో.
కానీ ఆశ్చర్యకరం ఏమిటంటే ఈ పక్షి జాతులలో యాభయి శాతం కన్నా ఎక్కువ పక్షులు బ్రీడింగ్ సీజన్ లో కలిసిన పక్షులతో జీవితాంతమూ కలిసి ఉండవు. బ్రీడింగ్ సీజన్ అయిపోయి గుడ్లు పొదగటం పూర్తి అయాక వాటి దోవలో అవి పోతాయి. అలాగే క్షీరదాల లో అంటే స్తన్య జంతువులలో అంటే పిల్లలకు తమ పాలు ఇచ్చి పెంచే జంతువులు కూడా పిల్లలు పుట్టిన తరువాత , వేరు పడతాయి.
మానవులలో కూడా పుట్టిన వారికి ( అబ్బాయి అయినా అమ్మాయి అయినా ) నాలుగు సంవత్సరాలు వచ్చే సరికి అయ్యే విడి పోయే వారి సంఖ్య ఎక్కువ గా ఉంటుంది. మానవులలో సరాసరి కాలం అంటే ఒక సారి తల్లి అయి మళ్ళీ తల్లి అవటానికి మధ్య కాలం కూడా నాలుగు సంవత్సరాలే !!
ఒకసారి పుట్టిన వారు నడవగలిగి వారి బంధువుల నీడలో పెరగ గలిగే బలం తెచ్చుకుంటే, వారి తల్లి తండ్రులు, వేరే అటాచ్మెంట్లు లేక ‘ pair bonding ‘ ఏర్పరుచుకునే వారు అనాది కాలం లో , మళ్ళీ బలవంతమైన , శక్తివంతమైన సంతానం ఉత్పత్తి చేయటం కోసం. ప్రత్యుత్పత్తి జీవ లక్షణం కదా !!
పరిణామ రీత్యా చూస్తే మానవులలో ప్రస్తుతం ప్రబలుతున్న ఎక్కువ మంది తో కామ సంబంధమైన అనుబంధం , మానవ పరిణామం లో మొదటి దశలలో జరిగిన బ్రీడింగ్ సీజన్ లో మానవుల నడవడిక ను తలపించే పరిణామం యొక్క జీర్ణావస్థ అంటే ‘ రేమ్నెంట్ ‘ అని అనుకోవచ్చు.
మానవులలో ఒకే సంబంధం లో ఎక్కువ కాలం ఉంటే కలిగే అసంతృప్తి కి మానవ దేహం లో జరిగే మార్పులు కూడా ప్రోద్బలం కావచ్చు.
అవి రెండు రకాల కన్నా ఎక్కువ గా ఉండవచ్చు. ఒకటి అటాచ్మెంట్ జరిగేందుకు అవసరమయే జీవ రసాయనాలు, ఎక్కువ అయి అవి జీవ నాడీ కణ గ్రాహకాలను అంటే న్యూరో రిసెప్టార్స్ ను ఎక్కువ గా క్రియా శీలం చేయవచ్చు. లేక తక్కువ జీవ రసాయనాలు ఉత్పత్తి అయి అవి నాడీ కణ గ్రాహకాలను అంటే మెదడు లో ఉండే న్యూరో రిసెప్టార్స్ ను తక్కువగా క్రియా శీలం చేయటం వల్ల మానవులు ఇంకో అట్టాచ్మెంట్ లేక ‘ pair bonding ‘ కోసం తపిస్తూ తనతో ఉంటున్న వారిని వదిలేయవచ్చు.
తరువాతి టపాలో ఇంకొన్ని విషయాలు చూద్దాము.