Our Health

Archive for జూలై, 2012|Monthly archive page

‘ పిచ్చి ‘ సంగతులు, తెలుసుకుంటే మంచిదే !. 7.

In మానసికం, Our minds on జూలై 14, 2012 at 10:30 ఉద.

‘ పిచ్చి ‘ సంగతులు, తెలుసుకుంటే మంచిదే !. 7.

పైన ఉన్న కార్టూను , మందుల కంపెనీలవారి వ్యాపార పోకడలను ఎండ గట్టుతూ చూపుతున్న కార్టూన్. ( మన జీవితాలలో , సమస్యలు ఉండడం సహజమే కదా, కానీ కార్టూను లో ఆ సమస్యలను ఒక బై పోలార్ డిసార్డర్ గా ( తప్పు గా ) నిర్ధారించి దానికి , మందులు తీసుకోవడమే ఉత్తమం అంటూ సలహా ఇస్తున్న డాక్టర్ ను చూడ వచ్చు ! ) అందు వల్ల నే మనం ,   వ్యాధి నిర్ధారణ అత్యంత జాగరూకత తో చేయించుకోవాలి.  అంటే నిపుణులైన వైద్యుల సలహా తీసుకోవాలి. 

పిచ్చి కుదిరేది ఎట్లా ? : 
ఒక సామెత మనం తరచుగా వింటూ ఉంటాము. ‘ పెళ్లయింది , పిచ్చి కుదిరింది ‘  అని. అట్లా పెళ్లి జరిగినతరువాత, పిచ్చి కుదిరిన సంఘటనలు మీ ఎరుక లో ఉంటే తెలియ చేయండి. నా అనుభవం లో ,పెళ్లి అయిన తరువాత, పిచ్చి కుదరడం మాట అటుంచి , పిచ్చెక్కడం చాలా మంది లో చూశాను. ! క్రితం టపాలలో చూసినట్టు, ఈ రకమైన పిచ్చి , పలు రకాలు గా ఉండడం కూడా గమనించాను.  ఇక పిచ్చి కుదరడానికి శాస్త్రీయం గా మందుల తో చికిత్స గురించి తెలుసుకుందాము ! ఈ మందులు కొన్ని రకాలు గా ఉంటాయి. 
1. mood stabilizers. వీటిని మన మూడ్ ను స్థిత పరిచే మందులు గా చెప్పుకోవచ్చు:
లిథియం : లిథియం ఒక ఖనిజం అంటే మినరల్. ఈ ఖనిజం యొక్క ఔషధ గుణాలూ , దానిని పిచ్చి చికిత్స లో చాలా కాలం నుంచీ ఉపయోగిస్తూ ఉన్నారు. పాశ్చాత్య దేశాలలో కొన్ని క్షార సరస్సులలోని నీరు తాగమని సలహా ఇచ్చే వారు. మీకు తెలిసే ఉంటుంది కదా ఆమ్లాలు పుల్ల గా ఉంటాయనీ క్షారాలు ఉప్ప గా ఉంటాయనీ. క్షార సరస్సులలో నీరు తాగిన వారికి పిచ్చి కుదిరేది. కానీ ఇటీవల పరిశోధనల వల్ల, ఆ క్షార సరస్సులలో ఉన్న నీటి లో ఖనిజాలు , ప్రత్యేకించి లిథియం అనే ఖనిజం ఉందని కనుక్కునారు. జాన్ కేడ్ అనే ఆస్త్రేలియన్  మొట్టమొదటి సారి శాస్త్రీయం గా లిథియం యొక్క ఔషధ గుణాలను, పిచ్చి కి చికిత్సలో లిథియం యొక్క ఉపయోగాలూ వివరించాడు తన పరిశోధనా పత్రం లో.( 1949 ). గత యాభై ఏళ్ల గా లిథియం ను మానియా లేదా పిచ్చి చికిత్సకూ , నివారణకూ , ప్రపంచం అంతా ఉపయోగిస్తున్నారు. లిథియం ఒక మోతాదు లో తీసుకుంటే పిచ్చి పోవడమే కాకుండా , నివారణ కు కూడా ఒక మంచి ఔషధం గా పనిచేస్తుంది. కాక పొతే  ఈ లిథియం తీసుకుంటున్న వారు కొన్ని జాగ్రత్తలు తీసుకోవాలి.  వారు కిడ్నీ అంటే మూత్ర పిండాలు , ఇంకా థైరాయిడ్ పరీక్షలు ప్రతి ఆరు నెలలకు ఒక సారి చేయించు కుంటూ ఉండాలి. అంతే కాక  వారి రక్తం లో లిథియం ఏ పాళ్ళ లో ఉందో కూడా క్రమం గా పరీక్ష చేయించు కుంటూ ఉండాలి. దీనిని లిథియం లెవెల్స్ టెస్ట్ అంటారు.
2. anti psychotics:  వీటిని మన ఆలోచనలను సవ్యం చేసే మందులు గా చెప్పుకోవచ్చు.  కొట యపిన్ , రిస్పరిడోన్, ఒలాంజాపిన్ అనే మూడు ప్రధానమైన యాంటీ సైకాటిక్ మందులు పిచ్చి చికిత్స లో వాడ బడుతున్నాయి.
3. anti epileptics: వీటిని మూర్చ నివారణ మందులు అని తెలుగులో అంటారు.  వాల్ప్రోఎట్ , కార్బమజపిన్ అనే మందులు ప్రధానం గా మూర్చల నివారణకు వాడుతారు. కానీ ఈ మందులు పిచ్చి నివారణకు కూడా బాగా ఉపయోగ పడతాయి. ఈ విషయం అనేక పరిశోధనల వల్ల తెలిసింది. అందువల్ల ఈ మందులను కూడా విరివి గా పిచ్చి నివారణలో కూడా వైద్యులు రికమెండ్ చేస్తారు. 
4.anti depressants: ఈ మందులను యాంటీ దిప్రేస్సేంట్ లు అంటారు. ఈ మందులు ప్రధానం గా వెన్లా ఫాక్సిన్ , ఫ్లూఆక్సిటిన్ వంటి డిప్రెషన్ కు చికిత్స గా ఉపయోగించే మందులు. కానీ పిచ్చి లో కూడా ఈ మందులు ఎందుకు ఉపయోగిస్తారంటే, పిచ్చి తగ్గగానే వారు డిప్రెషన్ కు లోనవటానికి అవకాశాలు ఎక్కువ. ఆ సమయం లో వారు డిప్రెషన్ తో బాధ పడకుండా యాంటీ దిప్రేస్సంట్ లు వేసుకుంటూ ఉండాలి.  మనకు తెలుసు కదా డిప్రెషన్లో  మానసిక స్థితి క్రుంగి పోయే విధం గా ఉంటుందని. ఈ మూడ్ పైకి పోయి పిచ్చి రూపం లో ఉండడం , అట్లాగే క్రుంగి పోయి , డిప్రెషన్ రూపం లో ఉండడం వల్లే  ఈ వ్యాధిని రెండు భిన్న ధ్రువాల వ్యాధి అంటే బై పోలార్ డిసార్డర్  అంటారు శాస్త్రీయం గా ! 
వచ్చే టపాలో ఇంకొన్ని సంగతులు ! 
 

‘ పిచ్చి’ సంగతులు, తెలుసుకోవడం మంచిదే !.6.

In మానసికం, Our minds on జూలై 13, 2012 at 11:36 ఉద.

పిచ్చి సంగతులు తెలుసుకోవడం మంచిదే !.6.

మెదడులో ఏ మార్పులు పిచ్చి కి కారణమవుతాయి?: 
ఈ కారణాలను మనం అయిదు రకాలు గా తెలుసుకోవచ్చు.
1. ( మెదడు లో ) నిర్మాణాత్మక తేడాలు, మార్పులు: 
పక్ష వాతం అంటే స్ట్రోక్ వచ్చిన వారిలోనూ, ప్రమాద వశాత్తూ తలకు గట్టి దెబ్బ తగిలి తద్వారా మెదడు లో కొంత భాగం దెబ్బ తిన్న వారిలోనూ , ఇంకా మెదడు లో కంతులు అంటే ట్యూమర్లు   ఉన్న వారిలోనూ పిచ్చి లక్షణాలు ఉండడం జరుగుతుంది. దీని వల్ల వైద్యులకు, మెదడు లో నిర్మాణాత్మక మార్పులు వస్తే, ఆ మార్పులు పిచ్చి కి దారి తీస్తాయి అని తెలిసింది.
2. ( మెదడు ) పని చేయడం లో తేడాలు , మార్పులు: మెదడు రక్త సరఫరా లో జరిగే మార్పులను విశదం గా అధ్యయనం చేసి ( అంటే ప్రత్యేకమయిన స్క్యాన్ ల ద్వారా , వీటిని ఫంక్షనల్ మాగ్నెటిక్ రిసోనేన్స్  fMRA  స్క్యాన్ అంటారు ) పిచ్చి వచ్చిన వారి మెదడు లో ఒక భాగం లో ( దీనిని DLPFC అంటారు ) రక్త సరఫరా లోపం ఉందని గమనించడం జరిగింది.
3. ( మెదడు లోని ) జీవ రాసాయనాలలో తేడాలు , మార్పులు: నార్ ఎపినెఫ్రిన్ , డోపమిన్, గ్లుటామేట్, ఇంకా జీ ప్రోటీన్లు అనే జీవ రసాయనాలూ , సి ఆర్ ఎఫ్ ( CRF ) అనే హార్మోను లో మార్పులు కూడా పిచ్చి ఉన్న వారి మెదడు లో గమనించడం జరిగింది.మిగతా జీవ రసాయనాల వివరాలు పైన ఉన్న పటం లో చూడ వచ్చు. ఈ చిత్రం లో ఆకు పచ్చ గానూ , పర్పుల్ రంగులోనూ రెండు బుడిపెలు గమనించారా ? అవి బాగా స్థూలం గా చూప పడిన , యదార్ధానికి అతి సూక్ష్మం గా ఉండే నాడీ తంత్రుల చివరలు లేదా మొనలు. ఆ ప్రదేశం లో జీవ పటం లో వివరించినట్టు గా, వివిధ జీవ రసాయనాలు , వివిధ సంజ్ఞలను , లేదా సిగ్నల్స్ ను ఒక నాడీ తంత్రి చివర నుంచి, ఇంకో తంత్రి చివరకు సరఫరా చేస్తాయి. ఇట్లా సిగ్నల్స్ ప్రయాణం చేయడం లో లోపం అంటే అవి ఎక్కువగా , అతి వేగం గా ప్రయాణం చేసినా , లేదా తక్కువ గా, అతి నెమ్మది గా ప్రయాణం చేసినా , ఆ ప్రభావం మన ఆలోచనల మీద ఉంటుంది. చిత్రం గా ఉంది కదూ సృష్టి రహస్యం ! 
4. ( మెదడు లో ) సిగ్నల్ ట్రాన్స్ డక్ షన్  లో మార్పులు: 
మన దేహం లో ప్రతి కణమూ , అత్యంత సున్నితం గా ఉంటుంది. అంతే కాక , ప్రతి కణమూ, కొన్ని ప్రత్యేకమైన జీవ రసాయనాలను, హార్మోనులను మాత్రమే తనలోకి , అంటే కణం లోపలికి అనుమతిస్తుంది. మన దేహం లో ప్రతి చర్యా , హార్మోనులూ, జీవ రసాయనాలూ , ఒక చోటినుంచి అంటే ఒక కణం నుంచి , ఇంకో కణానికి పంపటం వలననే జరుగుతాయి. అట్లాగే మన మెదళ్ళలో కూడా , ప్రతి  సంజ్ఞా , ప్రతి ఆలోచనా , ఒక కణం నుంచి, ఇంకో కణానికి ప్రయాణం చేస్తే నే మన ఆలోచనలు క్రియా రూపం దాల్చుతాయి. ఈ ఆలోచనలు క్రియా రూపం దాల్చడానికి సిగ్నల్ ట్రాన్స్ డక్ షన్  అనే జీవ క్రియ చాలా ముఖ్యమైనది. క్రింద ఉన్న చిత్రం చూడండి.
 పిచ్చి ఉన్న వారిలో ఈ సిగ్నల్ ట్రాన్స్ డక్ షన్ లో మార్పులు వస్తాయి.
పై కారణాలు తెలుసుకోవడం ఎందుకంటే , చికిత్స జరిగే సమయం లో , మనకు  మందులు ఎందుకు వాడడం జరుగుతుందో అర్ధం కావడానికి.   ఉదాహరణకు , మూడవ కారణాన్ని సరి చేయడానికి కొన్ని మందులు పనికి వస్తాయి. అట్లాగే నాల్గవ కారణమైన సిగ్నల్ ట్రాన్స్ డక్ షన్ ను సరి చేయడానికి కొన్ని మందులు ఉపయోగ పడతాయి.
వచ్చే టపాలో ఇంకొన్ని సంగతులు ! 

పిచ్చి సంగతులు , తెలుసుకోవడం మంచిదే !.5.

In మానసికం, Our minds on జూలై 12, 2012 at 5:25 సా.

పిచ్చి సంగతులు , తెలుసుకోవడం మంచిదే !.5.

క్రితం టపాలో మరి పిచ్చి వస్తే, ఎట్లా కనుక్కోవచ్చో , దాని గురించి కొంత తెలుసుకున్నాము కదా !  పిచ్చి, మానవ మస్తిష్కం విపరీతమైన వేగం తో ఆలోచనలు వచ్చినప్పుడు , ఆ వేగం తో వస్తూన్న ఆలోచనల ప్రభావం , మన ప్రవర్తన లో కూడా కనిపించి , ప్రవర్తన అస్తవ్యస్త మవటం వల్ల  వస్తుంది. మస్తిష్కం లో ఆలోచనలు సామాన్యం గా ఉంటే ఆ స్థితి ని నార్మల్ మూడ్ లేదా యూ తైమిక్ మూడ్ అంటాము. అదే అత్యంత వేగానికి విరుద్దం గా , ఆలోచనలు కనుక అత్యంత నిదానం గా వస్తూ ఉంటే, మనం స్లో అవుతాము. డిప్రెషన్ వచ్చినప్పుడు అట్లా జరుగుతుంది. ఈ క్రింది పటం గమనించి నట్టయితే మనకు విశదమవుతుంది ఈ మూడ్ స్థితులు. ఆంగ్లం లో ఉన్నాయి పదాలు కానీ శులభం గా అర్ధమవుతాయి , అందరికీ ! 
 
ఇప్పుడు మనం మానియా కూ , హైపో మానియా కూ తేడాలు చూద్దాము. హైపో అంటే  తక్కువ , లేదా క్రింద అని అర్థం. మనం సాధారణం గా చూస్తూ ఉంటాము , అనుకుంటూ కూడా ఉంటాము ఎవరైనా , విపరీతం గానూ , ఎక్కువ హడావిడి గానూ ప్రవర్తిస్తూ , అటూ ఇటూ తిరుగుతూ ఉంటే , వీడెవడో యమ హైపర్ ‘ అని. హైపర్ అంటే ఎక్కువ లేదా ఎగువ అని అర్థం. మనం సామాన్యం గా అనుకునే హైపర్  స్థితి  శాస్త్ర రీత్యా  హైపో మానియా గా చెప్పుకోవచ్చు.  అంటే హైపో మానియా లక్షణాలు, వంద శాతం పిచ్చి లక్షణాలు గా కాక , ఏ యాభై , అరవై శాతమో ఉంటాయి. అంటే ఈ హైపో మానియా లక్షణాలు, ఉన్న వారు , సమాజం లో చాలా మంది ఉంటారు. బహుశా , నిజం గా పిచ్చి ఉన్న వారికంటే ఎక్కువ శాతం ఉంటారు. వారిలోని పిచ్చి లక్షణాలు, ఆందోళన పడ వలసిన లక్షణాలైనా,  మరీ విపరీతం గా , వెంటనే ఆస్పత్రి లో చేర్పించ వలసినంత అత్యవసరం గా ఉండవు. వీరిలో అంటే హైపో మానియా ఉన్న వారిలో రిస్కు టేకింగ్ బిహావియర్ రవంత తక్కువ గా ఉంటుంది , మానియా ఉన్న వారిలో ఉండే దానికంటే ! 
 
ఈ క్రింద పటం చూడండి , మీకు  శులభం గా అర్ధమవుతాయి , ఈ తేడాలు ! 
ఇక్కడ మొదట ఉన్నది  డిగ్ ఫాస్ట్ అనే పదం అంటే ఆంగ్లంలో ఉన్న అక్షరాలు DIGFAST  ఈ అక్షరాలతో ప్రారంభ మయే  ఆంగ్ల పదాలు, మానియా లో అంటే వంద శాతం పిచ్చి లో ఉండే లక్షణాలు. ( మానియా ను బై పోలార్ వన్ అని శాస్త్రీయం గా అంటారు )దాని క్రింద ఉన్న పటం లో ఉన్నవి , హైపో మానియా లక్షణాలు ( దీనినే బై పోలార్ టూ అని శాస్త్రీయం గా అంటారు , ఎపిసోడ్ అంటే ఒక సారి వచ్చిన వ్యాధిని సింగిల్ ఎపిసోడ్ అంటారు. )
వచ్చే టపాలో ఇంకొన్ని సంగతులు తెలుసుకుందాము ! 

‘ పిచ్చి’ సంగతులు, తెలుసుకోవడం మంచిదే ! . 4.

In మానసికం, Our minds on జూలై 10, 2012 at 9:49 సా.

‘ పిచ్చి’  సంగతులు, తెలుసుకోవడం మంచిదే ! . 4.

మునుపటి టపాలో పిచ్చి లక్షణాలు ఎట్లా ఉంటాయో తెలుసుకున్నాము కదా ! ఇప్పుడు పిచ్చి అంటే మానియా వచ్చినప్పుడు దానిని ఎట్లా కనుక్కోవచ్చో తెలుసుకుందాము. ఇంతకు ముందు వివరించినట్టు , పిచ్చి ఉన్నప్పుడు , వారు వారి జీవితాలను రిస్కు లో పెట్టడమే కాకుండా , ఇతరులు జీవితాలకు కూడా ముప్పు తేగలరు. అందు వల్ల, మనకు పిచ్చి లేక పోయినా, పిచ్చి సంగతులు తెలుసుకుంటే , తగిన సమయం లో ఆ లక్షణాలు ఎవరిలో నైనా కనిపెట్టి , సరి అయిన వైద్య సహాయం తీసుకునేట్టు చూడ వచ్చు.
ఎట్లా కనుక్కోవచ్చు ? : 
ఇది  5 విధాలు గా ఉండవచ్చు.
1. వ్యాధి నిర్ణయం చేయడం. 2.వ్యాధి తీవ్రత ను నిర్ణయించడం. 3. వ్యాధి ఆ సమయం లో కనిపించడానికి గల కారణాలు వెతకడం. 4. వ్యాధి లక్షణాలు కనిపించిన వారికి ఏ సహాయం అందుతుందో అంచనా వేయడం. 5. ఇతరుల మీద వారి ( వ్యాధి లక్షణాల ) ప్రభావం. 
1. పిచ్చి మానసిక వ్యాధి: అందువల్ల  ఈ వ్యాధి లక్షణాలు  కనిపించిన వెంటనే,  వైద్య సహాయం పొందాలి.  పిచ్చి లక్షణాలు వచ్చిన వారు ఎట్లాగూ , తాము పిచ్చి గా ఉన్నట్టూ , ప్రవర్తిస్తున్నట్టూ , ఎప్పుడూ ఒప్పుకోరు. అందువల్ల వారి మానసిక లక్షణాలు , ప్రవర్తనా, వారి చుట్టూ ఉండే వారు గమనించాలి. ఈ చుట్టూ ఉన్న వారు , తల్లి దండ్రులు , తోబుట్టువులు, స్నేహితులు , బంధువులు, లేదా వారు చదువుకునే కాలేజీ లో సహా విద్యార్ధులు , లేదా పనిచేసే ఆఫీసులలో, ఫాక్టరీ లలో సహ ఉద్యోగులు – ఇట్లా ఎవరైనా కావచ్చు. అందువల్లనే ఇతరుల ప్రాముఖ్యం ఇంత గా ఉంటుంది. వారే  సరిఅయిన  వివరాలు ఇవ్వ గలరు.
అతిగా వాగటం , అతిగా ఖర్చు పెట్టడం, గొప్పలు చెప్పుకోవడం, ప్రగల్భాలు పలకడం – ఈ లక్షణాలు అన్నీ మనం సామాన్యం గా మామూలు మనుషులలో కూడా చూస్తాము కదా ! మరి వీరికీ పిచ్చి ఉన్న వారికీ తేడా ఏమిటి ? అని ఆలోచిస్తే  ఈ లక్షణాలు వీరిలో ఆకస్మికం గా వస్తాయి. అంటే అప్పటి వరకూ మామూలు గా ఉన్న వారు, ఈ లక్షణాలతో ప్రవర్తిస్తారు. వారి ప్రవర్తన పూర్తిగా అసహజం గా ఉంటుంది వారు తెలిసిన వారికి. ‘ ఇదేంటిరా వీడు సడన్ గా ఇలా ప్రవర్తిస్తున్నాడు ? ‘ అనుకుని ఆశ్చర్య పోయేట్టు గా ఉంటుంది వీరి ప్రవర్తన ! కనీసం ఒక వారం రోజులు , ఆ పిచ్చి లక్షణాలు చూపిస్తూ ఉంటే అప్రమత్తత వహించాలి. 
అంతే కాక కొన్ని సమయాలలో , ప్రత్యేకించి విద్యార్ధులు, విద్యార్ధినులు  మాదక ద్రవ్యాలు తెలిసో , తెలియకో తీసుకుంటే కూడా వారిలో  పిచ్చి లక్షణాలను పోలిన ప్రవర్తన కనిపించ వచ్చు.
2.వ్యాధి తీవ్రత కనుక్కోవడం : ఇందుకు , వ్యాధి లక్షణాలు ఉన్న వ్యక్తి తో పాటు , వారికి అతి దగ్గర సంబంధం ఉన్నవారు ఇచ్చే వివరాలు కూడా వ్యాధి తీవ్రతను నిర్ణయించడానికి ఏంటో ఉపయోగ పడుతుంది.  ఈ సమయం లో  వ్యాధి లక్షణాలు ఉన్న వారి జీవితాలలో వచ్చిన తీవ్రమైన వత్తిడి కలిగించే ఏ సంఘటనలు అయినా ఉన్నాయేమో కూలంక షం గా పరిశీలించాలి. అట్లాగే , వారు నిద్ర లేమి తో బాధ పడుతున్నారేమో కూడా కనుక్కోవాలి. అదే విధం గా  వారు ఇటీవల దుబారా గా ఖర్చు పెడుతున్నారో లేదో , లేదా కామ పరంగా విశృంఖలత చూపుతున్నారో కూడా కనుక్కోవడం ఉత్తమం.
3.ఆ వ్యాధి లక్షణాలు ఆ సమయం లో వారిలో కనిపించడానికి ఏమైనా ప్రత్యెక పరిస్థితులు ఉన్నాయేమో కూడా పరిశీలించాలి. మనసును తీవ్రం గా గాయ పరిచే , లేదా కలత చెందించే ఏ సంఘటన అయినా కేవలం డిప్రెషన్ గానే కాక , మానియా లేక పిచ్చి రూపం లో కూడా కనిపించ వచ్చు. ఈ కారాణాలు మనం తెలుసుకోగలిగితే , చికిత్స జరిపే సమయం లో ఈ కారణాల మీద కేంద్రీకరించవచ్చు.
4. ముఖ్యం గా వ్యాధి లక్షణాలు కనిపించిన వారి కి అందుతున్న సహాయం , సంపూర్ణం గా పరిశీలించాలి. మానసిక వ్యాధి అంటే, ‘ మన ‘ భారత దేశం లో ఇంకా ‘ చేత బడి ‘ జరిగిందనో , దయ్యం పట్టిందనో , వివిధ రూపాలలో వారిని తీవ్రం గా , మానసికం గానూ , భౌతికం గానూ , హింసించడం సర్వ సాధారణం. అందు వల్ల ఈ వ్యాధి ‘ లేదా  ‘ పిచ్చి ‘ లక్షణాలు ఉన్న వారి చుట్టూ ఉన్న వారి అవగాహన ఏమిటి ? వారి  సహాయ సహకారాలు ఏమైనా రోగి కి అందుతాయా లేదా అని నిర్ణయించాలి ముందే ! 
5. ఆ వ్యాధి  ఉన్న వారి తల్లిదండ్రులు , తోబుట్టువులు , లేదా స్నేహితులు , ప్రియులు , సహచరులు వీరు ఏ విధం గా ఆ వ్యాధి వల్ల ప్రభావితం అవుతున్నారో కూడా వివరం గా తెలుసుకుని, వారికి తగు సలహా ఇవ్వాలి. 
వచ్చే టపాలో ఇంకొన్ని సంగతులు తెలుసుకుందాము ! 
 
 

‘ పిచ్చి’ సంగతులు, తెలుసుకోవడం మంచిదే ! .3.

In మానసికం, Our minds on జూలై 9, 2012 at 7:51 సా.

 ‘ పిచ్చి ‘ సంగతులు, తెలుసుకోవడం మంచిదే ! .3.

క్రితం టపాలో మనం ప్రపంచ ఆరోగ్య సంస్థ నిర్వచనం లో కొన్ని , మానియా లేదా పిచ్చి లక్షణాలు ఏ విధం గా ఉంటాయో తెలుసుకున్నాము కదా ! ఇప్పుడు ఇంకొన్ని లక్షణాల గురించి తెలుసుకుందాము.
పిచ్చి ఉన్నప్పుడు మాట అంటే స్పీచ్  లో కూడా మార్పులు గమనించ వచ్చు. సామాన్యం గా ఒక వేగం తో మాట్లాడే వారు , అకస్మాత్తుగా మాట్లాడే వేగం పెంచడం కనిపిస్తుంది. అంటే ‘ గడ గడ గడా ‘ మాట్లాడుతూ నే ఉంటారు పిచ్చిలో. అంటే ఒక మాట పూర్తి అవక ముందే ఇంకో మాట మొదలుపెడతారు.ఇట్లా చేస్తూ మాటల వేగం పెంచుతారు. అంతే కాక,  వీరు మాట్లాడే విషయాలు కూడా ఒకదానికి ఒకటి పొంతన లేకుండా ఉంటాయి. ముందు చెప్పుకున్నట్టు , ఆలోచనలు పగ్గాలు లేకుండా పరిగెత్తుతాయి అందు వల్ల , ఆలోచనలను ప్రతిబింబించే మాటలు కూడా , పగ్గాలు లేకుండా , పరి పరి విధాల పరిగెత్తుతాయి.
ఉదాహరణకు :’  చంద్రమండలం వెళ్లి రాగలను నేను , ఏమనుకుంటున్నారో , మన్మోహన్ సింగు తో  మాట్లాడాను నేను , స్కూటర్ మీద వెళతాను ,  చాలా పుస్తకాలు రాశాను నేను కవిత్వం మీద , దయ్యాలు కనిపిస్తే వాటిని వెళ్లి పొమ్మని చెప్పాను. నా బొటన వేలు నొప్పి గా ఉంది. లాటరీ లో ఇరవై లక్షలు గెలిచాను. మీరు వాక్సినేషన్ చేయించుకోండి. గ్రహాంతర వాసి నన్ను రమ్మన్నాడు, మార్సు మీదకు’ ఇట్లా ఉంటుంది వారు మాట్లాడడం ! కొన్ని సమయాలలో మనం క్రితం ఎప్పుడూ వినని భాష లేదా మాటలు కూడా మాట్లాడుతారు పిచ్చిలో , అంటే నిజం గా పిచ్చిగా మాట్లాడతారు. ఇంతే కాకుండా , పిచ్చి బాగా ఉన్నప్పుడు , వీరు వీరికి వచ్చే క్రోధం అంటే కోపం నియంత్రించుకొలేరు. అంటే కంట్రోలు చేసుకోలేరు. వారి సమీపం లో ఉన్న వస్తువుల మీద కానీ , మనుషుల మీద కానీ ఆ కోపాన్ని చూపిస్తారు , ఏదో ఒక రూపం లో !  అవి తిట్ల రూపం లో ఉండవచ్చు , లేదా ‘ బాదుడు ‘ రూపం లో ఉండవచ్చు !  అట్లాగే వీరికి ఆకలి అయితే కూడా ,విపరీతం గా ఆవురావురు మని సామాన్యం గా తినే దానికంటే రెండు మూడు రెట్లు ఎక్కువ తింటూ ఉంటారు.  ఇంకా కామ వాంచలు కూడా వీరిలో సాధారణం గా ఉండే దానికన్నా ఎక్కువ గా ఉంటుంది. దీనితో వీరు విపరీతమైన , కామ పరమైన విశృంఖలత కూడా చూపుతూ ఉంటారు. సమస్యలలో చిక్కుకుంటారు కూడా ! ఇక వారి అపోహలు లేదా  డి ల్యుజన్ ( delusions ) లు కూడా మిగతా వారికి విచిత్రం గా ఉంటాయి.
ఉదాహరణకు : వారు దైవాంశ సంభూతులమని , వారికి రోజూ నో , లేదా వారు కోరుకున్నప్పుడో , దైవం కనిపించి మాట్లాడి, తమకు సలహాలు ఇవ్వడం చేస్తారని చెపుతూ ఉంటారు. అట్లాగే వారు తరచూ , కైలాసానికి వెళ్లి , అక్కడ ఉన్న వారితో కొంత కాలం గడిపి వస్తూ ఉంటామని కూడా చెపుతుంటారు. ఈ విధంగా ప్రగల్భాలు పలకటాన్ని గ్రాండి యోస్  డి ల్యుషన్స్ అంటారు . కొన్ని  సమయాలలో  వీరు మనుషులను కానీ జంతువులను కానీ చూస్తూ వారి సంభాషణలు కూడా వింటూ ఉంటారు, వారు సమీపం లో లేక పోయినా కూడా. ఈ పరిస్థితిని హాల్లూసి నేషన్స్ అంటారు. ( hallucinations ). వీరు ఏదైనా వాహనం నడిపించే సమయం లో కూడా విపరీతమైన ఆత్మ విశ్వాసం తో నడిపి తమ ప్రాణాల  మీదకూ , ఇతరుల ప్రాణాల మీదకూ , అలవోకగా తెచ్చుకుంటారు.వీరికి డబ్బు కానీ , క్రెడిట్ కార్డ్ లు కానీ అందుబాటు లో ఉంటే ‘ అంతే సంగతులు !  విపరీతం గా ఖర్చు చేస్తారు, ఏమాత్రం సంకోచించ కుండా !
ఇక్కడ గమనించవలసినది ఏమిటంటే ,వారి మటుకు వారికి , వారు చేసే ప్రతి పనీ ఎంతో సమంజసం గా సరి అయినది గా వారికి ఎప్పుడూ అనిపిస్తూ ఉంటుంది. అంటే వారు యుక్తా యుక్త విచక్షణా జ్ఞానాన్ని కోల్పోతారు. ముఖ్యం గా పిచ్చి లక్షణాలు పూర్తి గా ఉండి , పిచ్చి గా ప్రవర్తిస్తూ ఉన్న వారు , తమకు ఏ విధమైన  మానసిక వ్యాదీ లేదని , వారు సంపూర్ణం గా ఆరోగ్య వంతులు గా ఉన్నామనీ , అనుకుంటారు. 
మరి ఈ పిచ్చి లక్షణాలు ఇంకే సందర్భం లో నైనా రావచ్చా ? :  కొన్ని రకాలైన మాదక ద్రవ్యాలు  అంటే ‘  యాంఫీ టమిన్ లు , లేదా ఇతర స్టిమ్యు లెంట్ మందులు తీసుకున్న వారు కూడా , ఈ పిచ్చి లక్షణాలు చూపించ వచ్చు.  ప్రత్యేకించి నైట్ క్లబ్బు లలో ఈ రకమైన మందులు ,  రహస్యం గా అమ్ముతూ ఉంటారు. 
వచ్చే టపాలో ఇంకొన్ని సంగతులు ! 

‘పిచ్చి’ సంగతులు, తెలుసుకోవడం మంచిదే ! 2.

In మానసికం, Our minds on జూలై 8, 2012 at 12:34 సా.

‘పిచ్చి’ సంగతులు, తెలుసుకోవడం  మంచిదే !  2.

శాస్త్రీయం గా మరి ‘ పిచ్చి ‘ ని ఏమంటారు ?: 
పిచ్చిని  మానియా అంటారు. ఈ మానియా , డిప్రెషన్ కు ఖచ్చితం గా వ్యతిరేకమైన లక్షణాలు కలిగి ఉంటుంది. మనం డిప్రెషన్ గురించి ‘ బాగు ‘ మొదటి టపాలలో చాలా వివరం గా తెలుసుకోవడం జరిగింది కదా ! డిప్రెషన్ లో ఉండే మానసిక , ఇంకా ప్రవర్తనా లక్షణాలు  ఏ విధం గా ఉంటాయో, వాటికి వ్యతిరేకం గా మానియా లో లక్షణాలు ఉంటాయి. అంతే కాక ,  మానియా ఉండే వారిలో కొన్ని పరిస్థితులలో డిప్రెషన్ కూడా రావచ్చు. అంటే మానియా ఉన్న వారిని శాస్త్రీయం గా బై పోలార్ డిసార్డర్ ఉన్న వారు అంటారు.అంటే రెండు భిన్న ధ్రువాలు గా ఉంటుంది వీరి మానసిక స్థితి. అంటే , డిప్రెషన్ అంటే మానసికం గా క్రుంగి పోవడమూ , లేదా మానసికం గా ఎంతో  తీవ్ర స్థితి అంటే ఉచ్చ స్థితిలో ఉండడమూ ! మానవులు సాధారణంగా , అన్ని ఎమోషన్ లూ  సమ పాళ్ళలో అనుభవించుతూ, తమ నిత్య జీవితాన్నీ , తమ చుట్టూ ఉండే సమాజం లో సంతృప్తికరం గా సత్సంబంధాలు కలిగి ఉండి, ఒక సమతుల్యమైన ప్రవర్తన కలిగి ఉంటే, దానికి కారణం వారిలో , వారి ఆలోచనలూ , మూడ్లూ  అంటే mood , సమ తుల్యం గా ఉండడమే ! 
పిచ్చి లేదా మానియా మీద ప్రపంచ ఆరోగ్య సంస్థ  నిర్వచనం ఏమిటంటే : మనలో సహజం గా ఉండవలసిన మూడ్ కంటే ఎంతో ఎక్కువ గా ఉండడం దీనినే ఏలే టెడ్ మూడ్ అంటారు ఆంగ్లం లో. తెలుగులో  మనం సామాన్యం గా అంటూ ఉంటాము ‘ వాడి పరిస్థితి ,పట్ట పగ్గాలు లేకుండా ఉంది ‘లేదా ‘ పట్ట శక్యం కాకుండా ఉంది ‘  అని. ఈ ప్రయోగం మన తెలుగులో చక్కగా చేశారు. అంటే మన ఆలోచనలు , ప్రవర్తనా , ఏవిధం గా ఒక అశ్వం లేదా గుర్రం  పగ్గాలు అంటే రీన్స్  లేకపోతే యధేచ్చ గా అంటే  తన ఇష్టం వచ్చిన దిశలో ఎట్లా పరిగెత్తుతుందో , ఆ పరిస్థితి లో ఉంటామన్న మాట ! ఇక్కడ ఆలోచనలు ఒక విధమైన పరుగు లో ఉంటాయి. అంటే అనేక మైన ఆలోచనలు, విపరీతమైన వేగం తో మన మనసులో లేదా మస్తిష్కం లో మెదలడం. అంతే కాక , ఆ ఆలోచనలకు ఏ విధమైన నియంత్రణా , అంటే కంట్రోలు లేక పోవడం ! ఇక ఇట్లాంటి మూడ్ తో పాటు , హైపర్ యాక్టివిటీ అంటే మామూలు కంటే ఎక్కువ గా యాక్టివ్ గా ఉండడం. అంటే  తాము, అన్ని పనులూ , ఏమాత్రం అలసట లేకుండా చేసుకుంటూ పోవడం. ఉదాహరణకు , ఆఫీసు లో సాయింత్రం దాకా పని చేసి వచ్చి, మళ్ళీ రాత్రంతా ఇల్లు సర్దడమో, లేదా టీవీ చూస్తూ ఉండడమో , లేదా కంప్యూటర్  లో బ్రౌజ్ చేస్తూ ఉండడమో చేయడం. ఇట్లా పగలూ రాత్రీ పని ఏక బిగిని చేస్తున్నా, అలసట అనుభూతి లేక పోవడం. సహజం గా మనం భౌతికం గా అలసిపోతూ ఉంటాము ఇట్లా పగలూ రాత్రీ పని చేస్తూ ఉంటే ! కానీ మానియా ఉన్న వారు ఈ అనుభూతి చెందరు. అంతే కాక వారు వారికి నిద్ర తక్కువ గా పోయినా , ఏ మాత్రం లెక్క చేయక , పైగా ఇతరులతో ‘ గొప్పలు ‘ కూడా చెపుతూ ఉంటారు, తాము రాత్రులు నిద్ర లేక పోయినా , ఎంతో సమర్ధ వంతం గా పని చేయ గలరని ! వారి మూడ్ లో వచ్చే మార్పుల వల్ల, వారు ప్రగల్భాలు పలుకుతున్నట్టు కూడా గమనించ లేరు ! దీనినే గ్రాండి యొసిటీ అంటారు. పిచ్చి కి ప్రపంచ ఆరోగ్య సంస్థ ఇంకా కొన్ని లక్షణాలు కూడా ఉంటాయని తెలిపింది.  వీరి లో నిద్ర పోవాలని అనిపించదు ఇంతకు ముందు వివరించినట్టు గా ! అంతే కాక , వారికి ఎక్కడ లేని ఆత్మ విశ్వాసము వచ్చేస్తుంది ఈ పిచ్చి ఉన్న సమయం లో ! అంటే సాధారణ సమయాలలో స్తబ్దుగానో , లేదా అతి నెమ్మది గా ఉండే వారు , అకస్మాత్తు గా విపరీతమైన ఆత్మ విశ్వాసం ఎవరో వారిలో ఇంజెక్షన్ ద్వారా ఇచ్చినట్టు ప్రవర్తించు తారు. అంతే కాక వీరిలో ఏకాగ్రత తీవ్రం గా లోపిస్తుంది. అంటే, వారు చేస్తున్న పనులన్నీ పూర్తి ఏకాగ్రత తో చేయ లేక పోవడం , లేదా చాలా శులభం గా వారు కేంద్రీకరించిన ఏకాగ్రతను కోల్పోవడమూ జరుగుతుంది.  ఉదాహరణకు : ఇంట్లో ,ఒక పని చేస్తున్నప్పుడు , ఫోను రింగవుతూ ఉంటే వెంటనే, ఆ పని మానేసి , ఫోను ఆన్సర్ చేయడం సహజమే కదా ! కానీ వీరు ఫోను లో మాట్లాడుతూ, అవతల వారికి వేచి ఉండమని చెప్పి ఈ లోగా , రేడియో లో పాట వినిపిస్తూ ఉంటే , ఆ పాటకు వారి స్వరం కలిపి పాడుతూ , మమైకం చెంది , నృత్యం కూడా చేయడం మొదలెట్టు తారు. వారు చేస్తున్న పని మాట ఇక  దేవుడికే ఎరుక ! 

మిగతా విషయాలు వచ్చే టపాలో ! 


‘ పిచ్చి’ సంగతులు, తెలుసుకోవడం మంచిదే !.1.

In మానసికం, Our minds on జూలై 8, 2012 at 9:41 ఉద.

‘ పిచ్చి’ సంగతులు, తెలుసుకోవడం  మంచిదే ! 1.

పిచ్చి – మనం సాధారణం గా వాడే పదం. దీనినే ఆంగ్లం లో మానియా అంటారు. మనం నిత్య జీవితం లో అనేక మంది ని చూస్తూ ఉంటాము.’ ఆవిడ గారి కేదో పిచ్చి లా ఉంది ‘ , లేదా ‘  ఆయన కేదో పిచ్చి అనుకుంటా !’, ‘ వీడికేదో  పిచ్చి ముదిరినట్టుంది ‘  అని. పిచ్చి చాలా రకాలు గా ఉంటుంది. మనం ఏ దుకాణానికైనా  వెళ్ళినప్పుడు  మనకు కావలసిన వస్తువు ధర విని అది ఎక్కువ గా ఉంటే ‘ నేనేమైనా పిచ్చివాడిననుకున్నావా ? ‘ అని అచ్చ తెలుగులోనో లేదా ‘ ముజే పాగల్ సంజా క్యా ? ‘  అని హిందీ లోనో అడుగుతాము షాపు వాడిని ! 
అందుకే  స్వర్గీయ డాక్టర్ భానుమతి గారు కూడా ‘ పిచ్చి పిచ్చి , పిచ్చి , రక రకాల పిచ్చి , ఏ పిచ్చీ లేని వారికి , అది అచ్చ మైన పిచ్చి ‘ అని ఒక చిత్రం లో పాడారు !  ప్రేమ పిచ్చి లో పడ్డ వారు కూడా వారు ప్రేమ లో విఫలం అవుతున్నా , లేదా అయితే కానీ , పిచ్చి గా ప్రవర్తిస్తారు. అంటే ఇక్కడ ప్రేమ లో పడితే ఒక రకం గానూ , ప్రేమ విఫలం అయితే ఇంకో రకం గానూ ఉంటుందన్న మాట పిచ్చి ! నాగేశ్వర రావు గారు ఇంకో చిత్రం లో పాడిన పాట లో ‘ ఏమనుకున్నావు ?, నన్నేమనుకున్నావూ ? , పిచ్చి వాడిననుకున్నావా ? ప్రేమ బిచ్చ గాడిననుకున్నావా ? ‘అని నిలదీసి తన ప్రేయసిని అడగటం  మీకు గుర్తుండే వుంటుంది. 
కొందరు బట్టలు విపరీతం గా కొంటూ ఉంటారు. ఇల్లంతా నిండి పోతున్నా మానరు. పాశ్చాత్య దేశాలలో అయితే దీనికి ఏకం గా రిటైల్ తిరపీ అని పేరు కూడా పెట్టారు. అంటే, మనసు బాగో లేనప్పుడు , షాపుల్లో పడి , కనిపించిన వస్తువులను, అవసరం ఉన్నా లేకపోయినా కొనేయడం ! ఇక్కడ కొనేయడం పిచ్చి గా ఉంటుంది. ఇంకొందరికి సినిమాలో  శ్రేయ అందాలో , లేదా ఇలియానా (  ఏంటో షామియానా , ఇగువానా లా ఉంది పేరు ! ) అందాలో చూస్తున్నప్పుడు ఉండే( ఉండే అనడం కన్నా వచ్చే అంటే సమంజసం గా ఉంటుందేమో ! ) పిచ్చి ఒకలా ఉంటుంది. ఇంకో రకం పిచ్చి లో సినిమా లో అభిమాన  హీరో , ఓ పది మంది విలన్లను ఎడా పెడా కొట్టి , పది సెకన్లలో మట్టి కరిపిస్తే ‘ పిచ్చి గా కొట్టేశాడు ‘ అంటారు.  ఇంకో రకం ,  ! ఇంకొందరికి కనపడ్డ వారికల్లా ‘ సుత్తి వేలు ‘ లా ‘ సుత్తి కొట్టే పిచ్చి ! ఇంకొందరికి , ప్రపంచం లో ఏమి జరుగుతున్నా ‘ మూతి కి సీలు వేసినట్టు ‘ మౌనం వహించడం ఒక రకమైన పిచ్చి ! ఇంకొందరికి తాగి తందానాలాడడం పిచ్చి ! కొందరు బాసులకు,  ఆఫీసులో అందరి మీదా చిందులు వేయడం పిచ్చి ! 
మరి ఇంత తేలిక గా , తరచూ  ఉపయోగించే  ‘ పిచ్చి ‘ పదం,  శాస్త్రీయం గా ఏమిటి ? మన మెదడు లో ఏమి జరిగితే ‘ పిచ్చి ‘ గా పరిణమిస్తుంది ? ఈ ‘ పిచ్చి ‘ పరిణామాలేంటి ? మరి  చాటు మాటు గా కనిపించే ‘ పిచ్చి ‘ ని గుర్తించడం ఎట్లా ? ఇంకా  ‘ పిచ్చి ‘ చికిత్స , పిచ్చి నివారణ ఎట్లా చేయవచ్చు ? ఈ విషయాలన్నీ వివరం గా తెలుసుకుందాము వచ్చే టపా నుంచి  ‘ పిచ్చి ‘ గా ! ( కంగారు పడకండి , నేను ‘ పిచ్చిగా ‘ రాయను లెండి , ఒక వేళ అట్లా  అనిపిస్తే ,  నాకు తెలియ చేయండి ! ) 

అసాంఘిక వ్యక్తిత్వం. 11.

In మానసికం, Our minds on జూలై 6, 2012 at 10:29 సా.

అసాంఘిక వ్యక్తిత్వం. 11.

( పైన ఉన్న రెండు స్కాన్ చిత్రాలలో మొదటిది నార్మల్ మెదడు. రెండవది అసాంఘిక వ్యక్తిత్వం ఉన్న వారిది. దానిలో కేవం సెప్టం పెల్లూసిడం అనే ఒక మార్పు శాస్త్రజ్ఞులు గమనించారు. ) 
అసాంఘిక వ్యక్తిత్వం లేదా యాంటీ సోషల్ పర్సనాలిటీ డిసార్డర్,  మానసిక రుగ్మతలు ఉన్న వారిలో మూడు నుంచి ముప్పై శాతం వరకూ కనిపిస్తుంది. మనం ఈ వ్యక్తిత్వం ఉన్న వారిని భారత దేశం లో సాధారణం గా ప్రతి చోటా చూస్తూ ఉంటాము. అంటే మనం ఎక్కడైనా క్యూ లలో నుంచుని ఉన్నప్పుడు , బస్ స్టాప్ లో నూ , సినిమా థియేటర్ వద్ద, రైల్వే స్టేషన్ వద్ద , ఇట్లా ఏ ప్రదేశం లోనైనా కనిపిస్తారు , ఈ వ్యక్తిత్వం ఉన్న వారు . ‘ పదండి ముందుకు , పదండి  ముందుకు , పోదాం , పోదాం పై పై కి ‘ అని అన్న శ్రీ శ్రీ వాక్యాన్ని ఎట్టి పరిస్థితి లో నైనా ఆచారించాలనే కంకణం కట్టుకుంటారు వీరు. వీరు వెనక ఎక్కడో ఉన్నా, ముందు ఒక వంద మంది ఉన్నా లెక్క చేయకుండా , అతి లాఘవం గా గంటల తరబడి క్యూ లలో వేచి ఉన్న వారిని ఏమాత్రం లెక్క చేయకుండా ,  ముందుకు దూసుకు పోయి, క్యూ లో తమ స్థానాన్ని పదిలం చేసుకుంటూ , అభ్యంతర పెట్టిన వారిని డేగ కన్ను తో చూస్తూ , తమ పని జరుపు కుంటారు. ఈ  నీటి ఎద్దడి సందర్భం గా , నీళ్ళ ట్యాంకు సరఫరా చేస్తున్న సమయం లో కూడా , ఈ అసాంఘిక  వ్యక్తులు , ( ఇక్కడ లింగ భేదం లేక పోవడం స్పష్టం గా కనిపిస్తుంది ! ) వారి బిందెల తోనూ , బకెట్ల తోనూ చేసే ఘర్షణ,  చూడలేక , పడలేక  వాటర్ ట్యాంకు లోనుంచి ఏక ధారగా గంగా భవానీ,  కన్నీరై , నేలమీద వృధాగా జాలువారుతుండడం  కూడా మనకు సామాన్యం గా దర్శనీయమే ! ఈ సందర్భాలలో సామ, దాన , భేద , దండోపాయాలను , మానవులు, అంటే వివిధ వ్యక్తిత్వాలు ఉన్న మానవులు ఎట్లా ఉపయోగిస్తారో కూడా మనకు తెలియనిది కాదు. ఇక సిటీ బస్సులలో ,  రైళ్ళలో ప్రయాణం చేసే సమయం లో కూడా , ఈ రకమైన వ్యక్తులు పుష్కలం గా తారస పడుతుంటారు మనకు. ఇక బందులు, రాస్తా రోకో లు జరిగినప్పుడు వీరు చేసే ‘ తాండవం ‘ అంతా ఇంతా కాదు , ప్రతి దుకాణానికీ ఒక్కొక్కరూ తమకన్నా కాస్త పొడవాటి దుడ్డు కర్రలతో  వెళ్లి , నానా హంగామా చేసి , షట్టర్లు మూయించి వేస్తారు వీరు. రాస్తా రోకో లు జరిపినప్పుడు కూడా , అనేక మంది అమాయక ప్రజలు విపరీతం గా, నానా రకాలు గా అవస్థలు పడుతుంటే , ఈ వ్యక్తిత్వం కలవారు , కాలర్లు ఎగరేసుకుని , మనకు స్వాతంత్రం సముపార్జించినంత విజయ గర్వం తో తిరుగుతూ కనిపిస్తారు. ఇక ఈ అసాంఘిక వ్యక్తిత్వం ఉన్న వారి లక్షణాలు ఇక్కడ నామ మాత్రం గానే మీకు వివరించడం జరుగుతుంది, ఎందుకంటే మీకు ఈ వ్యక్తిత్వం ఉన్న వారు తరచూ తటస్థ పడుతూ ఉంటారు కదా ! 
1.వీరు ఇతరుల చట్ట బద్ధమైన హక్కులు ఏమాత్రం గుర్తించడం కానీ , గౌరవించడం కానీ చేయరు. అంతే కాక, పదే పదే , తమను , అరెస్టు చేయదగిన తప్పిదాలు చేస్తూ ఉంటారు.
2. సమాజం లో సామాన్యం గా అమలు చేస్తున్న కట్టుబాట్లను కాల రాస్తూ ఉంటారు. 
3.వారి స్వంత లాభాలకూ , స్వార్ధానికీ , వారి పేరును మార్చుకోవడానికీ , అబద్ధాలు చెప్పడానికీ, మోసాలు చేయడానికి  కూడా వెనుకాడరు. 
4.ఇతరుల భద్రత మీద కూడా వీరికి ఏమాత్రం పట్టదు. తాగి కార్లు , బస్సులు నడిపే వారు ఈ కోవకు చెందుతారు.  
5. తరచూ చీకాకు పడుతూ , విసుగు చెందడం, పట్టరాని కోపం క్షణాలలో రావడం కూడా వీరి లక్షణాలు.
6.ఒక స్థిరమైన బాధ్యతా రహిత జీవితాలు గడుపుతూ ఉంటారు వీరు. అంటే తీసుకున్న అప్పులు ఎగ కొట్టడం , అమాయకులకు టోపీ పెట్టడం , ఉద్యోగం సరిగా చేయక పోవడం లాంటివి.
7. ఇంకో ముఖ్యమైన లక్షణం ఏమిటంటే , ఈ అసాంఘిక వ్యక్తిత్వం ఉన్న వారు చేసే నీచమైన , కుటిలమైన పనులు, అన్నీ తెలిసి కూడా చేస్తూ ఉంటారు అంటే, అజ్ఞానం తో కాదు. అంతే కాక వీరికి వీరు చేసే పనుల గురించి కానీ , పరిణామాల గురించి కానీ , ఏమాత్రం చీకూ , చింతా , అపరాధ భావనా ఉండవు. దీనినే రిమోర్స్ లేకపోవడం అంటారు.
ఈ అసాంఘిక వ్యక్తిత్వం ఉన్న వారి  ‘ ఆధునిక  మహా ప్రస్థానం ‘  చదవండి: 
 
కూలీ కూడు,
సిపాయి గూడు, 
గనిలో ఇనుము,  
జనం ధనము, 
రైతు  పొలం,
‘మందు’ బలం 
నోటుకు ఓటు,
పదవుల  ‘ మాటు ‘ 
బ్యాంకుల స్క్యాము ,
సాగని స్కీము,
ఎంతో  ద్రోహం !,
అయినా తీరని  దాహం !
కాదేదీ  స్వాహా కనర్హం!
ఔనౌను మోసమనర్ఘం ! 
 
 
 
వచ్చే టపాలో ఇంకొన్ని సంగతులు ! 
 
 
 

బార్డర్ లైన్ వ్యక్తిత్వం. 10.

In మానసికం, Our minds on జూలై 5, 2012 at 8:24 సా.

బార్డర్ లైన్ వ్యక్తిత్వం. 10.

బార్డర్ లైన్ వ్యక్తిత్వం పాశ్చాత్య దేశాలలో రెండు శాతం ఉంది. అంటే ప్రతి వంద మంది లోనూ , ఇద్దరు ఈ రకమైన వ్యక్తిత్వం కలిగి ఉంటారు. దీనిని గురించి మనం తెలుసుకునే ముందు ఈ వ్యక్తిత్వం ఎందుకు అలవడుతుందో తెలుసుకుంటే, దాని అవసరం కూడా మనకు  బోధ పడుతుంది. 
బార్డర్ లైన్ వ్యక్తిత్వానికి మూల కారణాలు ఏమిటి ?: మిగతా మానసిక వ్యాధుల లాగానే , ఈ వ్యక్తిత్వానికి కారణాలు కూడా , ఇత మిద్ధం గా చెప్పలేని , క్లిష్టమైన కారణాలు ఉన్నాయి. ముఖ్యం గా బాల్యం లో అనుభవమయే  క్లిష్ట పరిస్థితులు,  అంటే దురానుభావాలు , బాల్యం లో ఉన్న చిన్నారులను తీవ్రం గా కలత చెందించే సంఘటనలు ,తల్లి తండ్రులు తమ పిల్లలను సరిగా చూసుకోక పోవడమూ , వారి పెంపకం లో తీవ్రమైన అశ్రద్ధ చేయడమూ, లేక బాల్యం లో  వారు , ఎవరి చేతనైనా , మానసికం గా కానీ , భౌతికం గా కానీ , లేదా కామ పరం గా కానీ హింసించ బడడం. ఈ కారణాలన్నీ ,వారు పెరిగి పెద్దయిన తరువాత , బార్డర్ లైన్ వ్యక్తిత్వం ఏర్పడడానికి దోహదాలు.  కొంత వరకూ , వారి జన్యువుల అంటే జీన్స్ లో లోపాలు ఉన్నా, లేదా , పరిసరాల ప్రభావం వల్ల , లేదా మెదడు లో సహజం గా ఉండే జీవ రసాయనాల సమతుల్యం లోపించడం వల్ల కూడా ఈ రకమైన వ్యక్తిత్వం ఏర్పడడానికి ఆస్కారం ఉంది. 
 ఈ వ్యక్తిత్వం భారత దేశం లో వారు, ముఖ్యం గా తల్లి దండ్రులు ఎందుకు తెలుసుకోవాలి ?: 
పాశ్చాత్య నాగరికత , మన దేశ నాగరికతా పునాదులను కదిలిస్తూ ఉంది. వేగం గా జరుగుతున్న ప్రపంచీకరణ కూడా ఇందుకు కారణం. యుక్తా యుక్త విచక్షణ లేకుండా , మన భౌతిక అవసరాలతో పాటు , మన ఆలోచనలను కూడా దిగుమతి చేసుకుంటున్నాము. ఓపెన్ మైండ్ దృక్పధం మంచిదే కానీ , దురలవాట్ల కూ , చెడు ఆచార వ్యవహారాలకు కూడా ఓపెన్ మైండ్ ఉండడం సమంజసం కాదు. కానీ ఇదే ప్రస్తుతం జరుగుతుంది, భారత దేశం లో! దీని పరిణామాలు మన సాంఘిక కట్టు బాట్ల మీద, కుటుంబ వ్యవస్థ మీదా పడుతున్న్నాయి. పర్యవసానం గా పిల్లలు, అశ్రద్ధ చేయ పడడమూ , గృహ హింస , లేదా అబ్యూజ్ కు గురి అవడమూ తరచూ జరుగుతున్నాయి. ఈ టపా రాస్తున్న సమయం లోనే ఎన్డీ టీవీ లో ఒక వార్త ! మన ఆంద్ర ప్రదేశం లో ఒక తల్లిదండ్రుల జంట తమ కూతురు ( ఒక బాలిక ) ను పది వేల రూపాయలకు అమ్మితే ఆ బాలికను కొన్న వారు , ఆ అమ్మాయిని చిత్ర హింస కు గురి చేసి , ఆ తరువాత ఆమెను కాల్చి వేసి, ప్రాణం తీశారని. మనం అప్పుడప్పుడూ వింటున్న, లేదా చూస్తున్న వార్తలు కేవలం ‘  టిప్ అఫ్ ది ఐస్ బర్గ్ ‘మాత్రమె !  పాఠం ఏమిటంటే , బార్డర్ లైన్ వ్యక్తిత్వం ఏర్పడడానికి అవసరమయే అన్ని పరిస్థితులూ మన భారత దేశం లో పుష్కలం గా ఉంటున్నాయి, అభివృద్ధి చెందుతూ ఉన్నాయి కూడా ! దానితో ఈ వ్యక్తిత్వం ఉన్న వారు కూడా రానున్న తరం లో ఎక్కువ అవుతారనడం లో  సందేహం లేదు. 
మరి ఈ వ్యక్తిత్వ లక్షణాలు ఎట్లా ఉంటాయి?:
1. వారికంటూ ఒక వ్యక్తిత్వం లేక పోవడం.2. తమ నిజ జీవితం లో కానీ , ఊహా జీవితం లో కానీ, ఎడబాటు ను, ఎట్టి పరిస్థితులలోనూ సహించ లేక పోవడం. 3.దీర్ఘ కాలం గా తమలో ఏదో అసంతృప్తి, వెలితి అనుభవిస్తూ ఉండడం. 4.ఎమోషనల్ గా అంటే భావావేశాలు ఒక సమతుల్యం లో లేక పోవడం దీనినే ఎమోషనల్ లెబిలిటీ అంటారు. 5. ఇంపల్సి విటీ అంటే  దుడుకు స్వభావం అంటే వెనకా ముందూ ఆలోచించ కుండా , ఏ క్షణం లో ఏ ఆలోచన మెదిలినా వెంటనే  ఆ పని చేయడం.( ఉదాహరణకు , దుర్వ్యసనాలకు ఏ మాత్రం విచక్షణ లేకుండా అలవాటు పడడం, లేక అలవాటు చేసుకోవడం , కామ పరం గా కూడా విశృంఖలం గా ప్రవర్తించి, ఒకరి కంటే ఎక్కువ మంది తో కామ పరం గా సంబంధాలు ఏర్పరుచు కోవడం ).  6. చీటికీ మాటికీ చీకాకు పడడం, కోపం తెచ్చుకోవడం. 7. ఇతరుల మీద సదభిప్రాయం లేక పోవడం , లేదా ఇతరులను విపరీతం గా అనుమానించడం, అంటే పారనాయిడ్ ఫీలింగ్స్ ఉండడం. 8. స్వీయ హింస, అంటే , నిద్ర టాబ్లెట్ లు మింగి కానీ , చేతులు కోసుకోవడం కానీ చేసుకొని , ప్రాణాల మీదకు తెచ్చుకోవడం , అంతే కాక ప్రాణాలు కూడా తీసుకునే ప్రయత్నాలు చేయడం. 
వచ్చే టపాలో ఇంకొన్ని సంగతులు తెలుసుకుందాము ! 

హిస్త్రియోనిక్ వ్యక్తిత్వం.9.

In మానసికం, Our minds on జూలై 4, 2012 at 10:19 ఉద.

హిస్త్రియోనిక్  వ్యక్తిత్వం.9.

Histrionic Personality Disorder ( HPD ): ఈ వ్యక్తిత్వం కల వారిని మన జీవితాలలో తరచుగా చూస్తుంటాము. వీరు కనీసం ప్రతి వంద మంది లో ముగ్గురు  ఉంటారు. వీరు సాధారణం గా సమాజం లో ఉన్నత మైన పదవులలో స్థానాలలో ఉంటారు. అంతే కాకుండా వీరు తమ తమ రంగాలలో విజయ వంతంగా తమ ప్రతిభా పాటవాలను చూపిస్తూ ఉంటారు. అంటే వారు అధిక సామర్ధ్యం కలిగి ఉంటారు.  వీరిలో ప్రధాన లక్షణం  అత్యధికం గా ఎమోషనల్ గా ఫీల్ అవడం అంటే వారి భావావేశాలను ఎక్కువగా పొందడం, అంతే కాక వాటిని నలుగురిలో ఏ విధమైన బిడియం లేకుండా చూపించడం. ఈ భావావేశాలు ఆనంద కరమైనవి, ఉద్రేక పూరితమైనవి, లేదా కామ పరమైనవి కూడా కావచ్చు. వీటన్నిటినీ ఈ వ్యక్తిత్వం కల వారు ఏ మాత్రం సంకోచం లేకుండా అందరిలో బహిర్గతం చేస్తుంటారు.ఈ రకమైన వ్యక్తిత్వం ఒక పురుషుడిలో ఉంటే , నలుగురు స్త్రీలలో ఉంటుంది. అంటే స్త్రీలలో నాలుగు రెట్లు, పురుషులకంటే అధికం గా ఈ వ్యక్తిత్వం ఉంటుంది. వీరు నిరంతరం ఇతరుల కళ్ళలో పడాలని తాపత్రయ పడుతూ ఉంటారు. అంటే ఇతరులు వారిని సదా పరిశీలిస్తూ వారి ప్రవర్తన, వేష భాషలలో ఉత్సాహం చూపాలని ఆశిస్తూ ఉంటారు. నిరంతరం ఏదో ఒక ప్రేరణకు అంటే స్టిమ్యులస్ కోసం వెదుకుతూ ఉంటారు. 
వీరు తమ వేషం అంటే వస్త్ర ధారణా , మేకప్ ఈ విషయాలలో మిగతా మిగతా సామాన్య స్త్రీల కంటే  ఆకర్షణీయం గా , కామ వాంఛ రేకెత్తించే రీతిలో చేసుకుంటారు. అంటే ప్రోవొకేటివ్ గా ! అంతే కాక వీరు ఇతర పురుషులతో రొమాంటిక్ అంతే సరస శృంగారాల కోసం  ఉవ్విళ్ళూరుతుంటారు. అందుకు తగ్గ ప్రయత్నాలు కూడా చేస్తూ ఉంటారు. వీరి ప్రవర్తన సాధారణం గా సహజం గా ఉండక , నాటకీయం గా ఉంటుంది. వీరు తమ లక్ష్యాలు నెరవేరడం కోసం, తమ శక్తి సామర్ధ్యాలను  కొన్ని సమయాలలో వక్రీకరించ డానికి  కూడా వెనుకాడరు,  అంటే మ్యానిప్యులేట్ చేస్తూ ఉంటారు. వీరు ఇతరులు తమ గురించి చేసే ఏ విమర్శనైనా, తీవ్రం గా పరిగణిస్తారు, ఆ విమర్శలు తమ భద్రత కు ముప్పు అవుతుందని దురభిప్రాయ పడుతూ ఉంటారు. తరచూ ఇతరుల పొగడ్తలూ , మంచి అభిప్రాయాలూ ఆశిస్తూ ఉంటారు. చీటికీ మాటికీ , విసుగు చెందుతూ ఉంటారు. ఎందుకంటే వారు నిరంతరం నవ్యత కోరుకుంటూ ఉంటారు. ఆ నవ్యత తాము అనుకున్న విధం గా పొందలేక పొతే , విసుగూ , ఫ్రస్ట్రేషన్ కు లోనవుతూ ఉంటారు. ఇలాంటి సమయాలలో వీరు ఏవో తమ శారీరిక సమస్యలు , అంటే తలనొప్పి అనో , కడుపులో మంట అనో చెప్పి , ఇతరుల అ టెన్షన్  కోసం ప్రయత్నిస్తూ ఉంటారు. వారు ఎప్పుడూ ఇతరుల అ టెన్షన్ కు కేంద్ర బిందువు అవాలని ఆశిస్తూ ఉంటారు. వారి సమస్యలను ఇతరులకు చెప్పే సమయం లో చాలా స్వల్ప విషయాలను కూడా ఎంతో తీవ్రమైనవి గా చేసి చెపుతారు. అంటే ‘ గోరంతలు , కొండంతలు చేయడం ‘. వీరు వీరి జీవితాలలో నవ్యత కోసం , కామ పరమైన అనుభవాల కోసం తరచూ, చాలా రిస్కు తీసుకుంటూ ఉంటారు. దీనితో వీరు క్లిష్ట పరిస్థితులలో ఇరుక్కుని , ఉద్యోగం లో సమస్యలు ఉత్పన్నం కావడం , లేదా ఉద్యోగం కోల్పోవడం జరుగుతూ ఉంటుంది. వీరు తరచూ డిప్రెషన్ కు కూడా లోనవుతూ ఉంటారు. 
వీరి లక్షణాలను శులభం గా గుర్తు పెట్టుకోవడానికి  ఈ పదం ఉపయోగ పడుతుంది. ‘ ప్రైజ్ మీ ‘  PRAISE ME ( P=Provocative, R=Relationships are considered intimate than they are, A=Attention seeking, I= Influenced easily, S= Speech wants to impress and lacks detail, E= Emotional  lability , M=Make up physical appearance is used to draw attention to self. and E= Exaggerated, theatrical emotions ).
వచ్చే టపాలో ఇంకొన్ని సంగతులు !