విటమిన్ A – అనావృష్టి ( లోపం ). 5.

క్రితం టపాలో మనం విటమిన్ A ఉన్న వివిధ జంతువుల కాలేయాలు ( అంటే కోడి , మేక , బాతు, లేదా చేపల కాలేయాలు ) వాటితో చేసిన వంటకాలు ,అతిగా తినడం వల్ల , మన దేహం లో విటమిన్ A ఎక్కువ గా నిలువ అయి , దాని వల్ల కలిగే దుష్పరిణామాలు ఎట్లా ఉంటాయో కూడా తెలుసుకున్నాం కదా ! కాక పొతే ఇట్లా అతి విటమిన్ A అంటే హైపర్ విటమినోసిస్ అనే పరిస్థితి సామాన్యం గా జరగదు, ఈ విటమిన్ లోపం తో పోలిస్తే ! అంటే ఈ A విటమిన్ లోపం వల్ల బాధ పడే వాళ్ళే ఎక్కువ గా ఉంటారు.
ఇప్పుడు విటమిన్ A లోపం గురించి తెలుసుకుందాం !

( source : World Health Organisation )
ప్రపంచం లో విటమిన్ A లోపం , చాలా ప్రబలం గా ఉంది. ముఖ్యం గా అభివృద్ధి చెందుతున్న దేశాలలో. ప్రతి ఏటా , ఒక అంచనా ప్రకారం ఆరు లక్షల మంది కి పైగా పిల్లలు ( అయిదేళ్ళ లోపు వయసు వారు ) మరణిస్తున్నారు , ఇంకా మూడున్నర లక్షల మంది కి పైగా చిన్నారులు అంధులు అవుతున్నారు , కేవలం విటమిన్ A లోపం తోనే ! వారి కళ్ళ తో ఈ అందమైన ప్రపంచాన్ని చూడ లేక పోతున్నారు ! కేవలం సంవత్సరం లో రెండు మార్లు అంటే ఆరు నెలలకు ఒకసారి విటమిన్ A గుళిక ను అంటే కాప్స్యుల్ ను చిన్న పిల్లలకు ఇవ్వడం ద్వారా , వారి అంధత్వం నివారించవచ్చు. వారి మరణాలను కూడా నివారించ వచ్చు.
చికిత్స :
విటమిన్ A లోపం నివారణ చేస్తే , అంధత్వం తో పాటుగా , చిన్న పిల్లల మరణాలను కూడా తగ్గించ వచ్చని తెలిసింది అనేక పరిశీలనల వల్ల . చికిత్స ముఖ్యం గా మూడు రకాలు గా ఉంటుంది.
ఒకటి: విటమిన్ A గుళికలను అంటే క్యాప్సుల్స్ ను మూడు నాలుగు నెలలకు ఒకసారి చిన్న పిల్లలకు వేస్తె వారి లో ఈ విటమిన్ లోపం మాయ మవుతుంది. అంటే వారి చూపు చక్కగా ఉంటుంది, రేచీకట్లు మానిపోతాయి. వారికి ప్రపంచం అంతా మళ్ళీ అందం గా కనిపిస్తుంది ! ఈ రకమైన చికిత్స పిల్లలకు ఆ వయసు లో వచ్చే అతి సార వ్యాధులను కూడా తగ్గిస్తుంది. అంతే కాక , వారికి మీజుల్స్ ( measles ) అనే వైరస్ వల్ల వచ్చే జబ్బు కూడా చాలా తక్కువ గా వస్తుందని తెలిసింది.
రెండు: విటమిన్ A లోపం విస్తృతం గా ఉన్న దేశాలలో , అక్కడి ప్రజలు తినే ఆహారం లో అంటే , ఉదాహరణకు , వెన్న , వంట నూనెలు , చపాతీలకు ఉపయోగించే గోధుమ పిండిలోనూ , ఈ విటమిన్ A ను కలిపి , ఆ యా పదార్ధాలను ప్రజలు తినడం ద్వారా కూడా ఈ విటమిన్ లోపం నివారిస్తున్నారు.
మూడు : ఆహారపు అలవాట్లలో మార్పులు తెచ్చి : గమనించ వలసిన విషయం ఏమిటంటే , మనకు అవసరమయే విటమిన్ A , సహజ సిద్ధమైన ఆకు కూరలలోనూ, దుంప కూరలలోనూ , ముఖ్యం గా క్యారట్, చిలగడ దుంప లలో కావలసినంత లభ్యం అవుతుంది.
మనం కానీ , ఎవరైనా కానీ చేయవలసిందల్లా , వారి ఆహారపు అలవాట్లు మార్పు చేసుకుని , ఈ సహజ సిద్ధమైన వాటిని తరచూ వారి వారి ఆహారం లో తింటూ , అంధత్వాన్ని నివారించడమే కాకుండా , ఆరోగ్యం గా కూడా ఉండ వచ్చు !

ఆల్కహాలు అతి గా సేవించే వారికీ విటమిన్ A లోపానికీ సంబంధం ఉందా ?:

కొన్ని సంక్లిష్టమైన జీవ రసాయన చర్యలలో ( అతి గా, చాలా కాలం గా సేవించే ) మద్యం ” ప్రముఖ పాత్ర ” వహించి అనేక B విటమిన్ల తో పాటుగా ( వీటి గురించి ముందు తెలుసుకుందాం ) A విటమిన్ లోపానికి కూడా కారణ ‘భూతం” అవుతుంది !

మరి చిన్న పిల్లలలో అంధత్వ నివారణకు మనం ఏమైనా చేయ గలమా ?:

ఉత్సాహం ఉన్న వారు వారి వారి దేశాలలో జరుగుతున్న అంధత్వ నివారణ సేవా కార్యక్రమాలలో తమ వంతు ఎంతో కొంత చేయ వచ్చు ! 

హెలెన్ కెల్లర్ అనే అమెరికన్ స్త్రీ , ( చిన్నతనం లో ఒక వైరస్ వ్యాధి సోకి , తన చూపు , వినికిడీ కోల్పోయినా ) , పట్టుదలతో చదువుకుని , తన పేరున ఒక సేవా సంస్థ ను షుమారు వందేళ్ళ క్రితమే స్థాపించి , తన సేవా కార్యక్రమాల ద్వారా , ప్రపంచం లోని అనేక లక్షల మందికి చూపు ప్రసాదించింది ! మీలో ఎవరికైనా కొంత డొనేట్ చేయాలనే ఉద్దేశం ఉంటే హెలెన్ కెల్లర్ ఇంటర్నేషనల్ డాట్ ఆర్గ్ ( http://www.hki.org ) చూడండి !

( The leading cause of childhood blindness is vitamin A deficiency. Every year, it is estimated that 670,000 children will die of vitamin A deficiency, and 350,000 children will go blind. Vitamin A supplementation is considered to be the most cost effective, high-priority public health treatment in the world, costing just $1.00 per child per year.Twice-yearly treatments of vitamin A can prevent blindness in children and save their lives; last year, HKI delivered over 85 million vitamin A capsules to children. )

వచ్చే టపాలో ఇంకొన్ని సంగతులు !

విటమిన్లూ , ( ఖ ) నిజాలూ.3.

విటమిన్ A : విటమిన్ A మన శరీరానికి అవసరమయే అతి ముఖ్య విటమిన్. ” సర్వేంద్రియానాం నయనం ప్రధానం ” అంటారు. అట్లాంటి కంటిలో ఇంకో అతి ముఖ్య మైన భాగం రెటినా . ఈ రెటినా సరిగా పనిచేయక పొతే , మనం చూస్తున్నవి సరిగా కనిపించవు. రెటినా లో మనం కళ్ళు తెరిచి చూసే కాంతి ని గ్రహించే శక్తి కేవలం మనం క్రమం గా మన ఆహారం లో తీసుకునే విటమిన్ A వల్లనే వస్తుంది !
విటమిన్ A లోపం తో మన చర్మం లో ఉండే ఎపితీలియల్ కణాలూ , ఇంకా ఇతర కణాల పెరుగుదలకు ఒక గ్రోత్ హార్మోన్ లా పనిచేసి , వాటి ని ఆరోగ్యం గా అంటే చర్మాన్ని , ఆరోగ్యం గా ఉంచుతుంది. అంతే కాక మన కణాలలో జరిగే అనేక జన్యు పరమైన చర్యలకు కూడా విటమిన్ A అతి ముఖ్యమైనది.
మరి మనకు రోజూ ఎంత అవసరం ఈ విటమిన్ A ?
పిల్లల నుంచి పెద్ద వారి వరకూ రోజుకు కావలసిన విటమిన్ A కేవలం ఆరు వందలనుంచి , మూడు వేల మైక్రో గ్రాములు మాత్రమె .గుర్తు ఉంచుకోండి ,మైక్రోగ్రామ్ అంటే మిల్లీ గ్రాము లో వెయ్యో వంతు , లేదా గ్రాములో లక్షో వంతు మాత్రమె ! కానీ ఈ కాస్త కూడా మన శరీరానికి రోజూ లభ్యం కాక పొతే పరిణామాలు ( పైన చెప్పిన విధం గా ) తీవ్రం గా ఉంటాయి !
మరి ఈ విటమిన్ పుష్కలం గా వేటిలో ఉంటుంది ? :

శాక హారులైతే : పాలకూర , బచ్చలి కూర, చుక్క కూర , తోట కూర , లాంటి ఆకు కూరల్లో నూ , కారట్ , బ్రాకోలీ , చిలగడ దుంప లలోనూ , పచ్చి బటానీ లోనూ ,కొంత వరకూ గేదె పాలల్లోనూ ఉంటుంది !
మాంస హారులైతే : కోడి, మేక , చేప , ఈ జంతువుల కాలేయం అంటే లివర్ లో ఎక్కువ శాతం విటమిన్ A ఉంటుంది. కోడి గుడ్డు లో కొంత శాతం ఉంటుంది.
మంచి వెన్న లో నూ జున్నులో కూడా సరిపడినంత విటమిన్ A లభిస్తుంది !

మరి ఈ ఆకు కూరలనూ , కూర గాయలనూ ఎట్లా తింటే , వాటిలోనుంచి , మన శరీరానికి , వీలైనంత విటమిన్ A అందుతుంది ?

సామాన్యం గా విటమిన్ A కొవ్వులో కరుగుతుంది అంటే నూనె పదార్ధాలలో , అందువల్ల కొద్దిగా నూనెలో కానీ, వెన్న , లేదా నెయ్యి తో తాలింపు వేస్తూ ఉంటారు ,మన తల్లులూ , అమ్మమ్మలూ ( భార్యలు కూడా ఇట్లా చేయక పొతే , ఇక ముందు నుంచీ చేయడం మంచిది ! ) ఇట్లా చేయడం వల్ల కేవలం ఆ ఆకు కూరలు, కూర గాయాలతో చేసిన వంటలు , రుచి గా ఉండడమే కాకుండా , వాటిలో ఉన్న విటమిన్లు ముఖ్యం గా నూనె లో కరిగే విటమిన్ A ఎక్కువ శాతం శరీరానికి లభ్యం అవుతుంది ! చూశారా , తల్లులు సదా తమ సంతానం యొక్క ఆరోగ్యం కోరుకునే ఎంత దూర దృష్టి కలవారో !

విటమిన్లూ , ( ఖ ) నిజాలూ.2 .

జవాబు : క్రితం టపాలో ప్రశ్న వివరం గా చదివారు కదా ! కానీ ఆశ్చర్యమేమిటంటే , వందల మంది ఈ టపాను చూసినా ఒక్కరు కూడా తమ సమాధానం పోస్ట్ చేయలేదు ! కారణాలు తెలియదు !
ఈ టపాను కేవలం ఇంట రాక్టివ్ గా చేసి వీలైనంత ఎక్కువ మంది కి ఉపయోగ కరం గా ఉండాలనే ఉద్దేశం తోనే ఈ ప్రశ్న ను అడగడం జరిగింది.
పరవాలేదు , ఇక సమాధానం చూడండి :
లత చిన్నప్పటినుంచీ ఆహారం విషయం లో తన ఇష్టా ఇష్టాలతో , కొన్ని ప్రత్యేకమైన ఆహారాలే తిన్నది. లత తల్లి దండ్రులు కూడా , ఆమె ఇష్టా ఇష్టాలకే తల ఒగ్గి , కనీసం ఎదో కొంత తింటుందని , సంతృప్తి చెందారు ! ఒక్క గానొక్క కూతురు లత మీద వారికి ఉన్న ప్రేమ , లత ఆహారం విషయం లో, తల్లిదండ్రులు గా వారి బాధ్యతను విస్మరింప చేసింది !
గమనించ వలసినదేమిటంటే , లత సహజ పోషకాలున్న ఆకు కూరలు , కూరగాయలు తినడం దాదాపు మానేసింది ! కేవలం బంగాళా దుంపల్లో , చక్కగా పెరుగుతున్న లతకు కావలసిన పోషకాలన్నీ లభ్యం అవడం లేదు !
ముఖ్యం గా రక్త వృద్ధి కి కావలసిన ఇనుము , అంటే ఐరన్ , లత శరీరానికి అందట్లేదు ! ఇక విటమిన్లు కూడా శరీరం లో తగిన పరిమాణం లో లేవు ! ముఖ్యమైన విటమిన్ A లోపం కూడా క్రమేణా లోపిస్తూ ఉంది లత శరీరం లో !
శాకాహారి అయిన లతకు ఆహారం లో విటమిన్లూ , ఇనుమూ పుష్కలం గా ఉండే ఆకు కూరలు , కూరగాయలు కూడా తినక పోవడం తో వాటి లోపం లక్షణాలు, కాలక్రమాన కనిపించాయి లతలో ! దానితో కొంతవరకూ లాభం ఉండే కోడి గుడ్డు కూడా తినలేక పోయే సరికి , లత ఇంకా బలహీన మైంది !
గమనించ వలసిన ఇంకో ముఖ్య విషయం ఏమిటంటే , రజస్వల అయినప్పటి నుంచీ , స్త్రీలలో ఋతు స్రావం జరిగి , రక్త హీనత అంటే రక్తం లో హీమోగ్లోబిన్ తక్కువ అయి , రక్తం పలుచ బడుతుంది ! రక్తం పలచ బడితే ( అంటే రక్తం లో ఉండే హీమోగ్లోబిన్ అనే పదార్ధం ఇనుము లోపం వల్ల అవసరమైనంత తయారవదు ) , మన శరీరం లో వివిధ భాగాలకు , ముఖ్యం గా మెదడుకు , ప్రాణ వాయువు అంద వలసినంత అందక , విపరీతమైన అలసటా , ఏకాగ్రత కోల్పోవడం కూడా జరుగుతుంది ! కళ్ళు తిరిగినట్టు అనిపించడం , చాలా సేపు నిలబడ లేక పోవడం కూడా జరుగుతుంది ! రక్త హీనత వల్ల కూడా మన చర్మం పాలిపోయి తెలుపు రంగుకు వస్తుంది. కానీ ఈ తెలుపు ఆరోగ్య కరమైన తెలుపు కాదు ! మన ఆహారం లో ఇనుము అంటే ఐరన్ లోపించడం వల్ల  హీమోగ్లోబిన్ మనకు సరిపడినంత తయారు అవదు.  ఆ కారణం గా మనలో కనిపించే లక్షణాలు అనీమియా ( anaemia ) లేదా రక్త హీనత వ్యాధి  లక్షణాలే ! 
ఇక విటమిన్ A లోపం వల్ల చర్మం లో కణాలు సరిగా పెరగక , పగుళ్ళు రావడం , గరుకు గా అనిపించడం కూడా జరుగుతుంది ! ఈ పరిస్తితులలో ముఖం మీద పూసుకునే క్రీములూ , ఫేస్ లూ చేసే లాభం శూన్యం ! ఎందుకంటే అవి కేవలం, పగుళ్ళను కనపడకుండా కవర్ చేస్తాయి కానీ , కారణాన్ని పరిష్కారం చేయవు ! ముఖ్యం గా రాత్రి సమయాలలో చూపు మందగించడం ( దీనినే ” రే చీకట్లు ” అంటారు ) సున్నితమైన కంటి పొరల మీద చిన్న చిన్న పొక్కులు గా రావడం కూడా జరుగుతుంది ! ఇంకా అశ్రద్ధ చేస్తే దృష్టి లోపం వచ్చే ప్రమాదం కూడా ఉంది ! 

వచ్చే టపాలో చికిత్సా వివరాలు తెలుసు కుందాం !

విటమిన్లూ , ( ఖ ) నిజాలూ.1.

ప్రశ్న: లత పందొమ్మిది ఏళ్ల వయసున్న అమ్మాయి. ఒక్క గానొక్క కూతురవడం తో , గారాల పట్టి లా , పెరిగింది. చామన ఛాయ తో ,చాక్లెట్ లా ఉండేది ! చిన్నప్పటినుంచీ , తనకంటూ ఒక ప్రత్యేకమైన ఇష్టా ఇష్టాలు ఉండేవి , మిగతా తన వయసు పిల్లల లాగానే ! ఒక్కతే కూతురవడం చేత లత కు ఇంకా ఎక్కువ గా ఉండేవి ఈ ఇష్టా ఇష్టాలు !
చిన్నప్పటినుంచీ , క్రమం గా ఇంటి తిండి ఎక్కువ రుచించ కుండా పోయింది. అమ్మ ఎంత కమ్మగా వండినా , ఎక్కువ గా తినేది కాదు. ప్రత్యేకించి , ఆకు కూరలు , కూరగాయల తో చేసిన వంటకాలు అసలు తినేది కాదు ! ఎప్పుడు తిన్నా , పెరుగన్నం , కొద్ది గా బంగాళా దుంపల కూర తినేది ! తల్లి కనీసం అవైనా తింటుందని ప్రేమ తో చాలా తరచుగా , బంగాళా దుంపల తో వివిధ వంటకాలు చేసి పెడుతూ ఉండేది లతకు ! స్వతహా గా కుటుంబమంతా శాక హారులు కూడా ! కొంత కాలం , కోడి గుడ్డు అలవాటు చేద్దామనుకుని ప్రయత్నించారు ఇంట్లో ! కోడి గుడ్డు అలవాటు సంగతి అటుంచి , వాంతులూ వికారాలతో లత పరిస్థితి అధ్వాన్నం గా తయారయింది ! ఇంట్లో తిండి సరిగా తినడం లేదని , నాన్న గారు హోటల్ కు తీసుకు వెళ్లి , పల హారాలు తినిపించేవారు ! అట్లాగైనా కాస్త బలం గా ఉంటుందని ! క్రమేణా కాస్త బరువు పెరిగి చూడడానికి , నిజం గానే లతలా చక్కగా ఉండేది లత !
పద్నాలుగేళ్ళ వయసు లో లత , రజస్వల , అదే ” పెద్ద మనిషి ” అయింది. చక్కగా పొడుగు పెరుగుతూంది పేరు కు తగ్గట్టు లతలా సుకుమారం గా అనేక అందాలు సంతరించుకుంటుంది లత ! వక్షోజాలు పెరుగుతూ , లతలో సహజం గా ఆడ పిల్లలకు ఉండే సిగ్గు ఇంకాస్త ఎక్కువ చేశాయి ! రెప రెపలాడే ఓణీ కూడా లత అందాలను తన చాటున దాచుకోడానికి చేసే ప్రయత్నాలు తరచుగా విఫల మయ్యేవి ! కూడా లత పరువాన్ని దాచడానికి చేసే ప్రయత్నాలలో పరికిణీలు కూడా ఒడి పొయేవి ! ఎందుకంటే , పరికిణీ లలో లత బాపు బొమ్మ లా ఇంకా అందం గా కనిపించేది ! తన సహజమైన చాక్లెట్ రంగు క్రమేణా మారి పోయి , లత తెల్ల బడడం మొదలైంది ! తల్లి దండ్రులిద్దరూ చామన ఛాయ తో ఉన్నా , లత రంగు చూసి ఆనంద పడేవారు , పెద్దమనిషి అయింది కదా , అట్లాంటి మార్పులు సహజమే నేమో అనుకున్నారు. లత చదువులో కూడా బాగా రాణించేది ! బాగా కష్టపడి చదివేది కూడా ! , అవసరమైతే రాత్రులూ , పగలూ కూడా ! క్రమేణా లతకు అలసట ఎక్కువయింది ! చీటికీ మాటికీ కళ్ళు తిరగడం , బస్ స్టాప్ లో ఎక్కువ సేపు నిలబడ లేక పోవడం , పడిపోతానేమో నన్న భయం తో వెంటనే కూర్చోవడం కూడా చేస్తుంది ! ఇదివరకటి లా ఎక్కువ సమయం చదవ లేక పోతుంది, ఏకాగ్రత ఉండట్లేదు ఇది వరకు లా ! రాత్రులలో చూపు కూడా కొద్దిగా మందగిస్తూ ఉంది !
తన లేత చర్మం కాస్తా చీటికీ మాటికీ చిన్న చిన్న పగుళ్ళు వచ్చి మంటలు పుడుతున్నాయి అప్పుడప్పుడూ ! వెంటనే తల్లి దండ్రులు , పెళ్లి వయసు లో ఉన్న అమ్మాయి , చర్మ సౌందర్యం బాగో లేక పొతే , ఇంకేమన్నా ఉందా అని కంగారు పడుతూ , అత్యవసరం గా మార్కెట్ లో ఉన్న ఓ డజను క్రీములూ, ఫేస్ ప్యాక్   లూ
కొని వాడించారు లత చేత ! ఏమాత్రం ఇంప్రూవ్ మెంటు లేక పోగా , లత మానసికం గా పోవడం మొదలు పెట్టింది , తల్లి దండ్రుల పరిస్థితి సరే సరి !

లత లో వచ్చిన ఈ మార్పులకు కారణం, లేదా కారణాలు ఏమిటి ? మీరు లతకూ , ఆమె తల్లి తండ్రులకూ ఏమి సలహా ఇస్తారు ? ప్రత్యేకించి ఏ జాగ్రత్తలు సూచిస్తారు ?

వచ్చే టపాలో వివరాలు తెలుసుకుందాం !

విటమిన్లూ ( ఖ ) నిజాలూ ! :

విటమిన్లు, ఖనిజాలూ, మన దేహం లో ఉండవలసిన అతి ముఖ్యమైన పదార్ధాలు ! అవి మనం రోజూ తినే ఆహారం ద్వారా మన శరీరం లో ప్రవేశిస్తాయి. అన్నం, పప్పు, కూరలు ,లాగా మనకు కనిపించే పరిమాణం లో కాక చాలా సూక్ష్మ పరిమాణం లో మన శరీరానికి అందాలి విటమిన్లూ , ఖనిజాలూ ! అంటే మిల్లీ గ్రాములూ , మైక్రో గ్రాముల పరిమాణం లో ఇవి మనకు కావాలి ! కానీ ఈ సూక్ష్మ పరిమాణం లో కూడా మనకు రోజూ అంద వలసిన విటమిన్లూ , ఖనిజాలూ మనకు ఏ కారణం చేతనైనా అందక పొతే , వాటి పరిణామాలు విపరీతం గా ఉంటాయి ! అంతేకాదు , మన ప్రాణాలకే ముప్పు కావచ్చు , ఈ విటమిన్లూ , ఖనిజాలూ మన దేహం లో ఉండ వలసిన పరిమాణం కన్నా తక్కువ గా ఉంటే !
మనం కొంత కాలం ఆహారం లేక పోయినా , బలహీన పడతాము కానీ పరిస్థితులు చాలా రోజుల వరకూ విషమించవు , కానీ విటమిన్లూ ఖనిజాలూ – వీటి లోపం తీవ్రం గా ఉంటే , చాలా తక్కువ సమయం లోనే తీవ్ర పరిణామాలను మన దేహం ఎదుర్కోవలసి వస్తుంది !
ఇంకో ముఖ్య విషయం : విటమిన్లూ , ఖనిజాలూ కేవలం వయసు మీరిన వారికే కాక , అన్ని వయసుల వారి ఆరోగ్యానికీ అత్యవసరం ! అందు వల్ల అందరూ ఈ విటమిన్లూ , ( ఖ ) నిజాలూ తెలుసుకోవలసిన అవసరం ఎంతైనా ఉంది !

వచ్చే టపా నుంచి ఈ విషయాలు తెలుసుకుందాం ! మన ఆరోగ్యం కోసం ! మన బాగు కోసం !

కలలూ – వాటి అంతరార్ధాలూ. 8.

పక్షులు కలలో కనిపిస్తే: ఈ రకమైన కలలు అనేక విధాలు గా అర్ధం చెపుతాయి. సామాన్యం గా ఒక పక్షుల గుంపు కనక కలలో కనిపిస్తే , అది మీరు కోరుకునే స్వేచ్చ , స్వాతంత్ర్యానికి ప్రతీక ! మీకు ( కలలో ) కనిపించే పక్షులు కనుక తెలుపు రంగులో ఉంటే అది మీ ప్రేమ, దయా గుణాలను సూచిస్తుంది. పక్షులు నల్ల రంగులో ఉంటే మీరు మంచి వార్తలను , చెడు వార్తలను కూడా త్వరలో విన బోతున్నారని సంకేతం ! ఎర్ర రంకులో కనుక ఆ పక్షులు వుంటే అది మీ హృదయాన్ని తెలుపుతుంది , మీ హృదయం విశాలమైనదని కూడా తెలుపుతుంది. నీలం రంగు పక్షులను కలలో చూస్తే , అది మీ భవిష్యత్తు దిశా నిర్దేశనం చేస్తున్నట్టు ! పసుపు పచ్చని పక్షులు కలలో వస్తే , అది ఆనందాన్నే కాకుండా , కొంత పిరికి తనాన్ని కూడా తెలుపుతుంది , సందర్భాన్ని బట్టి ! పక్షుల గుడ్లు కనుక కలలో కనిపిస్తే మీకు త్వరలో ధన యోగం ఉందని అర్ధం. అంటే మీకు ధనం చేకూరుతుంది త్వరలో !
పడక గది : పడక గది మీకు కలలో కనిపిస్తే , అది మీలో ఉన్న , నిగూఢ మైన , రహస్యమైన వ్యక్తిత్వాన్ని సూచిస్తుంది. అంతే కాక అది మీ లో ఉన్న సృజనాత్మక శక్తి ని కూడా తెలుపుతుంది. పడక గది లో ఇంకో వ్యక్తి తో కనుక ప్రణయం , రతి క్రియలో పాల్గొన్నట్టు కల వస్తే , మీకు ఆ వ్యక్తి తో ఉన్న గాఢ సంబంధాన్ని సూచిస్తుంది. మీ సృజనాత్మక శక్తి ని కూడా ప్రతి బింబిస్తుంది. అదే మీరు మీ పడక మీద నిద్ర సరిగా పోక , పీడ కలలు వస్తూ ఉంటే , మీ ఇరువురి మధ్య , ఉన్న కలతలను , సమస్యలను సూచిస్తుంది.

పడవ : మీ కలలో మీరు పడవ మీద ప్రయాణం చేస్తున్నట్టు అనిపిస్తే , మీ హృదయాంత రాళాల ను , మీరు తరచి చూసుకుంటున్నారని అర్ధం ! అంటే మీ మనసు మూలల్లో ఉన్న అనేక అనుభూతుల పరంపరను మీరు జాగ్రత్తగా విశ్లేషణ చేయడానికి పూనుకుంటున్నట్టు ! మీరు ఆ పడవ తో పాటుగా నీటి లోతుల్లోకి పోతూ ఉంటే , మీ ఎమోషన్స్ ను సరిగా విశ్లేషించు తున్నట్టు , అదే మీరు , అలల తాకిడి కి తట్టుకుని , ఆ పడవలో తీరాలకు పోతూ ఉంటే , మీ లో ఉన్న వివిధ అనుభూతులను, భావోద్రేకాలనూ, అధిగమించి , తీరాన్ని చేరుకున్తున్నట్టు సూచన ! అదే పడవ ఆటు పోట్లకు తట్టుకో లేక ముక్కలయినట్టు కల వస్తే , మీరు, మీ ప్రణయ సంబంధాలలో , తొందర పడుతున్నారనడానికి సూచన. అప్పుడు , మీరు , ఆచి , తూచి, అడుగులు వేయాలి , నిర్ణయాలు తొందర పడకుండా, తీసుకోవాలి !

వచ్చే టపాలో ఇంకొన్ని సంగతులు !

కలలూ – అంతరార్ధాలూ.7.

ఉచ్చారణ :
కలలో మీకు వివిధ యాక్సెంట్ లతో అంటే వేరు వేరు ఉచ్చారణ లతో మాట్లాడుతున్న వారు కనిపించడం జరిగితే , అది మీకు అర్ధం కాక పోతూ ఉంటె , మీరు మీ భావాన్ని, మీ అనుభూతులనూ , సరిగా ఇతరులకు , తెలియ చేయ లేక పోతున్నట్టు అనుకోవచ్చు. అంతే కాక , మీరు మీ జీవితం లో ఎదుర్కునే అనేక పరిస్థితులలో , మీరు ఖచ్చితమైన నిర్ణయాలు తీసుకోలేక , తడ బడుతున్నారనుకోవచ్చు.
ప్రమాదం జరిగినట్టు కల వస్తే : ఈ విధం గా కల రావడం సామాన్యం గా జరుగుతూ ఉంటుంది. ఈ కల ముఖ్యమైనది కూడానూ ! అందువల్ల మీకు వీలైనంత గా ఈ కల గురించి నోట్ చేసుకోవాలి ! ఏ ప్రమాదమైనా జరిగినట్టు కల కనుక వస్తే , అది , మీలో పేరుకు పోయిన లేదా నిగూ ఢ మై ఉన్న అనేక మానసిక సంఘర్షణలు , ఉద్రిక్త హావ భావాలూ , కోపోద్రేకాలకూ సంకేతం ! అంటే ఈ రకమైన ఎమోషన్స్ ఎదో విధం గా బయట పడడానికి ప్రయత్నిస్తూ ఉంటాయి. అందువల్ల మీరు ఈ అపరిష్కృతం గా ఉన్న ఎమోషన్స్ మీద మీ దృష్టి కేంద్రీకరించి , వాటి పరిష్కార మార్గాలు వెతకాలి ! వివిధ వాహనాలలో ప్రయాణం , ప్రమాదానికి లోనవుతే , వివిధ అర్ధాలు ఉంటాయి.
విమానాలు: చాలా మంది కి విమానాలు కలలో వస్తూ ఉంటాయి. ఈ కలల అర్ధాలు పరిశీలిద్దాము.
విమానాశ్రయం : మీరు కేవలం విమానాశ్రయం కలలో చూస్తే మీ జీవితం లో ఒక ముఖ్యమైన ఘట్టం జరగ పోతున్నట్టు , అంటే ఒక ముఖ్యమైన టర్నింగ్ పాయింట్ అన్న మాట. మీరు ఆ పరిస్థితి లో ఏ నిర్ణయం సమంజసమైనదో తెలియక సందిగ్ధం లో ఉంటారు. అంతేకాక విమానాశ్రయం మీకు ఒక హాలిడే ఆవశ్యకతను కూడా సూచిస్తుంది.
విమానం లో ఎగురుతూ ఉంటే : విమానాన్ని మీరే నడిపిస్తూ ఎగురుతూ ఉంటే , మీ జీవిత గమనం లో మీరు పూర్తి కంట్రోలు తో అంటే నియంత్రణ తో ముందుకు సాగి పోతున్నట్టు. అదే ఇంకెవరైనా విమానాన్ని నడుపుతూ , మీరు కేవలం వారితో ప్రయాణం చేస్తూ ఉంటె , మీ జీవితాన్ని ఇంకెవరో నియంత్రించు తున్నట్టు , అందులో మీ ప్రమేయం తక్కువ గా ఉన్నట్టు అనుకోవాలి.
మీ ఎదురుగా విమానం ఎగురుతూ ఉంటే : మీరు నుంచుని చూస్తూ ఉన్నప్పుడు, మీ ఎదురుగా విమానం గాలిలో ఎగురుతున్నట్టు కల వస్తే, మీరు మీ ఆశయాలనూ, గమ్యాలనూ సరిగా, ఉన్నతం గా నిర్దేశించు కున్నారనీ , ఆ గమ్యాలు మీరు అందుకో గలవేననీ కూడా అనుకోవచ్చు.కానీ మీ ఎదురుగా విమానం కూలి పోయినట్టు కల వస్తే, మీ పధకాలు సఫలీకృతం కాలేక పోతాయి అని సూచిస్తుంది. అప్పుడు మీ పధకాలను రివ్యూ అంటే పునశ్చరణం చేసుకుని, లోపాలను సరి దిద్దుకోవాలి !
మీరు విమానం, అంటే  ఫ్లయిట్  మిస్ అయినట్టు కల వస్తే : ఈ కల మీ లో ఉన్న ప్రయత్న లోపాన్ని తెలియ చేస్తుంది. అంటే మీరు తీసుకో బోయే కీలకమైన నిర్ణయాలలో , ఎదో లోపం ఉందని . అప్పుడు మీరు మీ నిర్ణయాలనూ , లక్ష్యాలనూ మళ్ళీ పరీక్షించుకుని , తదనుగుణం గా మార్పులు చేసుకోవాలి విజయ పధం వైపు దూసుకు పోయే విధం గా !

వచ్చే టపాలో ఇంకొన్ని కలలూ , వాటి అంతరార్ధాలూ !

కలలూ , అంతరార్ధాలూ . 6.

1. వదిలి వేయడం  :
నిద్రలో మిమ్మల్ని మీ తల్లి దండ్రులు గానీ , స్నేహితులు గానీ , లేదా భార్య , లేదా ప్రియురాలు , లేదా ప్రియుడు ఏ ప్రదేశం లో నైనా వదిలి వెళ్లి పోతున్నట్టు మీకు కల వస్తే , అది మీలోని అభద్రతా భావాన్ని తెలియ చేస్తుంది.
మీకు సహకారమూ , సహాయమూ అవసరమని కూడా సూచన ఇస్తుంది. ఈ సహాయ సహకారాలు మీరు చేస్తున్న లేదా చేయబోయే కార్యాల లో కావచ్చు , లేదా మీ జీవిత గమనం లో కావచ్చు. లేదా నిజ జీవితం లో మీరు నిజం గా మీరు కోల్పోయిన అత్యంత విలువైన వ్యక్తులను  స్పురణ కు తెస్తూ వచ్చే కల కావచ్చు ! ఇట్లా కల రావడం మీ లో ఆత్మ విశ్వాసాన్ని పెంపొందించు కోవలసిన అవసరాన్ని తెలియ చేసే సూచన కావచ్చు !
ఇట్లాంటి కల కనుక మీకు తరచూ వస్తూంటే , మీ బాల్యం నుంచీ మనసు మూలల్లో దాగున్న అభద్రతా భావాన్ని సూచిస్తున్నట్టు భావించ వచ్చు ! ఆ సందర్భం లో మీరు ఆ కారణాలను విశ్లేషించుకుని , సరి చేసుకుంటే , అట్లా కలలు రావడం తగ్గుతుంది. అదే, మీ అంతట మీరు ఎవరి ప్రమేయమూ లేకుండా మీరు ఉన్న చోటిని కానీ , చేస్తున్న పనిని కానీ అసంపూర్ణం గా వదిలి వేసి వెళ్లి పోతున్నట్టు కల కనుక వస్తే , అది మీ బాధ్యతా రాహిత్యాన్ని చెపుతుంది ! అంటే మీరు చేస్తున్న పనిని శ్రద్ధ తో చేయకుండా ” ఆ పనిని దాటవేయ డానికి ప్రయత్నిస్తున్నట్టు కూడా అనుకోవచ్చు. మీరు మీ జీవితం లో ముఖ్య మైన నిర్ణయాలు తీసుకోవడం లో మీరు సందిగ్ధం లో పడతారని కూడా ఇట్లాంటి కలలు తెలియ చేస్తాయి. అప్పుడు మీరు తక్షణ కర్తవ్యం గా ఆ పనిని బాధ్యతా యుతం గా చేయడానికి పూనుకోవాలి ! 

2. ఎత్తుకు పోవడం , అమాంతం గా తీసుకు పోవడం :
మీకు కలలో మిమ్మల్ని అమాంతం గా , అంటే ఒక్క సారిగా , లేదా బలవంతం గా మీరు ఉన్న చోటి నుంచి కానీ , మీరు నిద్రలో ఉన్నప్పుడు తట్టి లేపి కానీ, మీకు తెలియని చోటికి కనుక తీసుకు వెళుతున్నట్టు కల వస్తే , వెంటనే మీకు మెలకువ కూడా వచ్చి చాలా ఆందోళన పడడం కూడా జరుగుతుంది. ఈ రకమైన కల సామాన్యం గా మీకు బాగా సన్నిహితం గా ఉన్న వ్యక్తులు , మీ ఇష్టా ఇష్టాలతో ప్రమేయం లేకుండా , మీ జీవితాన్ని నియంత్రించు తున్నట్టు , లేదా తమ గుప్పెట లో పెట్టుకోవాలని చూస్తున్నట్టు అనుకోవచ్చు. ఆ పరిస్థితులలో మీరు , మీ జీవిత నావ చుక్కాని ని మీరే తీసుకుని అలలు , ఆటు పొట్ల దిశ గా కాకుండా , ఆనంద తీరాల వైపు మరల్చు కోవాలి ! అంటే , ఇతరుల ” మాయ ” మాటలకు తల ఊపకుండా , మీ సహజ వ్యక్తిత్వాన్ని బలోపేతం చేసుకోవాలి. ఒకరు ఇంకొకరిని బలవంతం గా తీసుకు పోతుంటే , మీరు కేవలం మూడో వ్యక్తిగా ఆ ప్రదేశం లో ఏమీ చేయకుండా నుంచున్నట్టు కనుక కల వస్తే , అది మీ జీవితం లో మీరు తీసుకునే నిర్ణయాల లో మీ నిస్సహాయ స్థితిని సూచిస్తుంది.

వచ్చే టపాలో ఇంకొన్ని కలల అర్థాలు తెలుసుకుందాం !

కలలు  మనకు చెప్పేదేమిటి ? 5. 

ఒక్క ముక్కలో చెప్పాలంటే , ఇప్పటి వరకూ , మన జీవితాలలో మనం కనే కలల ప్రాముఖ్యత ఇదీ అని ఖచ్చితం గా మనకు, అంటే శాస్త్రజ్ఞులకు కూడా తెలియదు. కాక పొతే సైకాలజిస్టులు ( మానసిక శాస్త్రజ్ఞులు ) ఈ కలల విశ్లేషణను ,  జీవిత మార్గ నిర్దేశనం చేయడానికీ ,వాళ్ళు తమ దోవలు అవసరమైతే మార్చుకుని , ఆనంద మార్గాలలో పయనించడానికి కూడా ఉపయోగిస్తారు ! అంటే ఈ రోజు మనం కనే కలలు , సరి అయిన విశ్లేషణ చేసుకుంటే , రేపు మన భవిష్య నిర్దేశన చేయ గలవు ! ఒక విధం గా కలలను , మన ప్రవర్తన , వ్యక్తిత్వం , మనలో నిక్షిప్తమై , నిశ్శబ్దం గా ఉన్న మన అనుభూతులూ , సూచనలు గా చెప్పుకోవచ్చు. ఈ కలల నిజా నిజాల మీద మనలో అనేక మంది కి అనేక స్వతంత్ర అభిప్రాయాలు సహజం గానే ఉంటాయి. కానీ వీటన్నిటినీ తాత్కాలికం గా పక్కన పెట్టి , మనం కనే ఈ కలల విశ్లేషణ చేసుకుని , వాటి పరిణామాలను పరిశీలించుకుని అవలోకనం చేసుకోవడం , ఆసక్తి దాయకం గానూ , సరదాగానూ ఉంటుంది.
మనం, కలలను ఎట్లా గుర్తుంచు కోవచ్చు ?

1. డ్రీమ్ డైరీ మొదలు పెట్టడం: ఈ పధ్ధతి చాలా మంది చేస్తూ ఉంటారు. ఒక వేళ చేయకపోతే , ఇది ఒక మంచి సూచన ! డైరీ లో ప్రతి రోజూ , లేదా కల వచ్చినప్పుడల్లా , ఆ కల వివరాలు ఒక నోట్ బుక్ లో రోజు వారీ గా రాసుకుంటే ఉపయోగ కరం గా ఉంటుంది. ఇట్లా తమ కలలను జాగ్రత్త గా పుస్తకాలలో రాసుకునే వారిలో వారి జ్ఞాపక శక్తి ఎక్కువ అవడమే కాకుండా , వారికి ప్రీకాగ్నిషన్ అంటే వారి భవిష్యత్తులో వారికి జరాగాబోయే సంఘటనల మీద కూడా సూచనాశక్తి అధికం అవుతుందని తెలిసింది.
2. కలం, కాగితం: కంప్యుటర్ కన్నా కలం తో కాగితం మీద కలలను రాసుకోవడం మంచి పధ్ధతి. మనకు వచ్చే కలలను తొంభై శాతం వరకూ మనం మరచి పోతూ ఉంటాం ! అందు వల్ల కలం కాగితం బెడ్ ప్రక్కనే పెట్టుకుంటే , వెంటనే రాసుకోవడానికి వీలు గా ఉంటుంది.
3.ఏమి రాయాలి ? ఇందులో ప్రత్యేకం గా చెప్పడానికి ఏమీ లేదు. ఎందుకంటే , కలలో కనిపించిన ప్రతి దృశ్యాన్నీ వివరం గా రాసుకోవడమే ముఖ్యం. అంటే కల జరిగిన ప్రదేశాన్నీ , ఉన్న మనుషులనూ , లేదా జంతువులనూ , కనిపించిన రంగులనూ , ఏమైనా సింబల్స్ అంటే గుర్తులు కనిపిస్తే వాటిని కూడా రాసుకోవడం మంచిది. ఆ కలను ఎంత సంపూర్ణం గా రాసుకుంటే అంత మంచిది.
4.ఎక్కువ నిద్ర , ఎక్కువ కలలు : సాధారణం గా కలలను గుర్తు తెచ్చుకోలేక పోవడానికి ఒక ముఖ్య కారణం , నిద్ర సరి అయిన సమయానికి పోకుండా , ఎక్కువ సమయం మేలుకుని ఉండడమూ , లేదా త్వరగా నిద్ర లేవడం కూడా ! మనకు రోజు కావలసిన నిద్ర అంటే రమారమి 7 నుంచి 8 గంటలు నిద్ర పోయినప్పుడు మనకు వచ్చే కలలను గుర్తుకు తెచ్చుకోవడానికి అవకాశం ఎక్కువ గా ఉంటుంది.
5.నిద్ర లేచినప్పుడు : అంటే కలలు వచ్చినప్పుడు వెంటనే బెడ్ మీద నుంచి లేచి, ఆ కలలను నోట్ చేసుకోవడం అన్న మాట. మొదటిలో కష్టం గా అనిపించినా , ఈ పధ్ధతి అలవాటు అవుతే , కల రాగానే అప్రయత్నం గా పూర్తిగా మెలకువ వచ్చి , ఆ కలను చాలా వరకు గుర్తు కు తెచ్చుకో గలుగుతారు.
6.రి వైండ్ చేయడం : ఒక వేళ ఇట్లా వెంటనే గుర్తుకు తెచ్చుకోవడం కష్టమవుటే , మనం వీడియో టేపు ను కానీ సీడీ ని కానీ రీ వైండ్ చేసినట్టు చేసుకుని మొదటి నుంచీ గుర్తుకు తెచ్చుకోవడానికి ప్రయత్నించాలి. ఈ పద్ధతిలో కల పదిలం గా గుర్తుకు వచ్చే అవకాశాలు హెచ్చుతాయి.
7.స్లో డౌన్ అండ్ రిలాక్స్ : మనలో చాలా మందికి , మెలకువ రాగానే , బెడ్ మీద నుంచి లేచి పరిగెత్తడమే పని. తయారై బ్రేక్ ఫాస్ట్ చేసి , కాలేజీ కో , ఆఫీసు కో వెళ్ళే తొందర ! కానీ కలలను గుర్తుకు తెచ్చుకోవాలంటే ఈ పధ్ధతి పనికి రాదు. మెలకువ రాగానే , మిగతా విషయాలు ఏవీ వెంటనే ఆలోచించ కుండా , కేవలం మీకు వచ్చిన కల మీదనే మీ దృష్టి అంతా కేంద్రీకరించండి ! అప్పుడు మీకు వచ్చిన కల చాలా వరకూ మీ కు గుర్తు కు వస్తుంది.

అంతర్జాలం లో ఈ కలల గురించి బోలెడన్ని సైట్లు ఇప్పటికే ఉన్నాయి , కానీ అవన్న్నీ ఆంగ్లం లో నే ఉన్నాయి. ఉదాహరణకు కొన్ని కలల విశ్లేషణలను మీ ముందు ఉంచ దలచాను , మన తెలుగులో ! మీకు నచ్చితే , మీ కలలు కూడా తెలియ చేయండి , చూద్దాం విశ్లేషణ ఎట్లా చేయ వచ్చో ! వచ్చే టపా నుంచి మనకు వచ్చే సామాన్య మైన కలల అంతరార్ధాలు తెలుసుకుందాం !