Our Health

Archive for the ‘ప్ర.జ.లు.’ Category

వెనక నొప్పి . 9. నివారణ మార్గాలేమిటి ?

In ప్ర.జ.లు., మన ఆరోగ్యం., Our Health on జూలై 21, 2014 at 2:31 సా.

వెనక నొప్పి . 9. నివారణ మార్గాలేమిటి ?

మునుపటి టపాలలో వెనక నొప్పి  కి కారణాలేమిటి , చికిత్సా పద్ధతులేంటి అనే విషయాలు తెలుసుకున్నాం కదా ! మరి వెనక నొప్పిని నివారించు కో గలమా ?
దీనికి సమాధానం,  చాలా వరకూ నివారించుకో గలమనే చెప్ప వచ్చు ! 
ఈ నివారణ మార్గాలు ముఖ్యం గా మూడు రకాలు 
1. మన శరీర పోస్చర్ లేదా  భంగిమ 
2. వ్యాయామం 
3. బరువులు ఎత్తే సమయం లో తీసుకోవలసిన జాగ్రత్తలు. 
 
1. మన శరీర పోస్చర్ లేదా భంగిమ : మనం నిల్చోడమూ , కూర్చోవడమూ , పడుకోవడమూ , లేదా డ్రైవింగ్ చేయడమూ , ఈ  వివిధ సందర్భాలలో మన భంగిమ ఎట్లా ఉంటుందనే దాని బట్టి  వెనక నొప్పి  రావడం , రాక పోవడం  ఆధార పడి ఉంటాయి. ఈ చర్యలన్నీ , అప్పుడప్పుడూ  అవక తవక గా చేస్తూన్నా , కొన్ని నెలలో లేదా కొన్ని సంవత్సరాలో చేస్తూ ఉంటే , తదనుగుణం గా వెన్ను పూస ఎముకలు , అవే వర్టిబ్రా , వాటి అమరిక , సహజ స్థానం నుంచి మారుతూ ఉంటాయి.  ఈ అమరిక కేవలం కొన్ని కోణాలలోమారినా ,  ఆ ఎముకల పక్కన ఉన్న  వెన్ను నాడి ని నొక్కి , నొప్పి కలిగించ గలవు ! అందుకే  , మన ప్రతి భంగిమ లోనూ జాగ్రత్త పాటిస్తూ ఉండాలి.
ఉదాహరణకు ,  కూర్చునే పద్ధతిలో , నిటారు గా సీటు మీద కూర్చో కుండా , కుర్చీలో పూర్తి గా వేలాడుతున్నట్టు , ఏళ్ల తరబడి  కూర్చుంటే , వెన్నుపూస ఎముకల అమరిక మారే రిస్కు ఉంది. అట్లాగే , చవక రకాల పరుపుల మీద పడుకుంటే , అవి అతి మెత్త గా ఉండి , వాటి  మధ్య బాగం ఒక లోయ లా మారి , వెన్ను నొప్పి కలుగుతుంది.
2. వ్యాయామం :  వ్యాయామం వల్ల , వెన్ను పూస చుట్టూ ఉండే కండరాలు దృఢ మైనవి గా ఉంటాయి. ఆ కండరాలు దృఢమైనవి గా ఉంటే , వెన్నుపూస ఎముకలు కేవలం  సహజ స్థానాల్లోనే కదులుతూ  ఉంటాయి. ఉదాహరణ కు , ఒక పది పుస్తకాలను ఒక దాని మీద ఒకటి పేర్చి ,  ఒక సంచీలో ఉంచి, పక్క నుంచి ఆ సంచీని తోస్తే , లోపల ఉండే పుస్తకాల వరుస పక్కకు జరుగుతుంది కదా ! అదే ఆ పది పుస్తకాలనూ , ఒక కార్టన్ లేదా చెక్క పెట్టె లో ఉంచి ఆ కార్టన్ ను కానీ , ఆ చెక్క పెట్టెను కానీ తోస్తే , ఆ పుస్తకాలు అదే వరస లో ఉంటాయి కదా !  వెన్ను పూస ఎముకల చుట్టూ ఉండే కండరాలు దృ ఢమ్ గా ఉంచుకోవడం అందుకే అవసరం ! అందుకే  రోజూ వ్యాయామం ! ( పైన ఉన్న చిత్రం లో చూడండి , వ్యాయామం వివరాలు.)  ఏ రకమైన వ్యాయామమైనా  నిపుణుల సలహా తో నే చేయడం శ్రేయస్కరం. సామాన్యం గా ఈ వ్యాయామాలు నొప్పి తీవ్రతను బట్టి  నిర్ణయించ   నిర్ణయించ బడతాయి. గమనించ వలసినది , రోజూ కొంత బరువును మోస్తూ , నిలబడి పని చేస్తూ , నడుస్తూ ఉండే వారికి అంత సులభం గా  వెనక నొప్పి రాదు. కేవలం , ఉద్యోగ రీత్యా , ఒకే స్థానం లో అంటే సీట్ లో కూర్చుని , ఏ రకమైన  వ్యాయామ అలవాట్లూ లేని వారికే వెనక నొప్పి రిస్కు ఎక్కువ అవుతుంది !
వచ్చే టపాలో ఇంకొన్ని సంగతులు ! 

 


వెనక నొప్పి . 8. సయాటికా కు శస్త్ర చికిత్స ఎట్లా చేస్తారు ?

In ప్ర.జ.లు., మన ఆరోగ్యం., Our Health on జూలై 18, 2014 at 7:52 సా.

వెనక నొప్పి . 8. సయాటికా కు శస్త్ర చికిత్స ఎట్లా చేస్తారు ? 

సయాటికా కు శస్త్ర చికిత్స,  అంటే సర్జరీ ఏ పరిస్థితులలో చేస్తారు ? 
1. వెనక నొప్పి తీవ్రత ఎక్కువ గా ఉండి , అనేక రకాల మందులతో కూడా నొప్పి తగ్గక పోతూ ఉంటే,
2. క్రమేణా వెనక నొప్పి తీవ్రత ఎక్కువ అవుతూ ఉంటే , అంటే  కొన్ని ఏళ్ల తరబడి ఉన్న నొప్పి అకస్మాత్తు గా తీవ్రం అవుతే ,
3. నొప్పి ఉన్న వారి ఉద్యోగాలు , కుటుంబ జీవనం,   నొప్పి వల్ల అతలాకుతలం అవుతూ ఉంటే, 
4. నొప్పి తీవ్రత ఎక్కువ అయి, మూత్ర విసర్జన లేదా మల విసర్జన లో సమస్యలు ఏర్పడితే ( ఈ పరిస్థితి  వెన్ను పూస ఎముక ( వర్టిబ్రా ) భాగం వెన్ను నాడిని నొక్కే ప్రదేశం బట్టి ఉంటుంది , అన్ని వెనక నొప్పులూ ఈ పరిస్థితి కలిగించవు )
వెన్ను నొప్పికి సర్జరీ ఎన్ని రకాలు గా ఉంటుంది ?
1. డి స్కె క్టమీ :  ఈ రకమైన శస్త్ర చికిత్స లో  సహజ స్థానం లో నుంచి బయటకి వచ్చి , పక్కన ఉన్న వెన్ను నాడిని నొక్కుతున్న డిస్కు భాగాన్ని జాగ్రత్త గా తొలగించడం జరుగుతుంది. ఇది సర్వ సాధారణం గా చేసే శస్త్ర చికిత్స.( పైన ఉన్న చిత్రం  గమనించండి  ).
2. సంధాన సర్జరీ లేదా ఫ్యూజన్ సర్జరీ : కొన్ని సమయాలలో వెన్నెముకే  అంటే వర్టిబ్రా  అమాంతం గా ఉన్న స్థానం నుంచి పక్కకు జరుగుతూ ఉండి , పక్కన ఉన్న నాడులకు వత్తిడి కలిగించి , లేదా ఆ నాడులను నొక్కుతూ , నొప్పి కలిగిస్తూ ఉంటే  ఆ వెన్ను పూస ఎముకను అంటే వర్టిబ్రాను పైనా క్రిందా ఉన్న వెన్ను పూస ఎముకలతో కలిపి స్థిరం గా ఉంచుతారు. అంటే ఉక్కు మొలలతో ( స్టీల్ రాడ్స్ తో ) వెన్ను పూస ఎముకలకు రంధ్రాలు చేసి పైనా క్రిందా ఉన్న వెన్ను పూస ఎముకల సహాయం తో మధ్యలో ( ఊగుతూ ఉన్న ) వెన్ను పూస ఎముకకు స్థిరత్వం కలిగిస్తారు. దానితో ఆ స్థిరం గా ఉన్న వర్టిబ్రా , నాడుల మీద వత్తిడి కలిగించడం ఆగిపోతుంది. ఆ కారణం గా నొప్పి కూడా నివారణ అవుతుంది. గమనించ వలసినది వెన్ను పూస ఎముకలన్నీ కూడా , అంటే వర్టిబ్రా అన్నీ కూడా కొంత మేర మన జీవితాంతం , అంటే మనం కదులుతూ , వంగుతూ, లేవగలుగుతూ ఉన్నంత కాలం , కదులుతూ ఉంటాయి , కానీ అప్పుడు నొప్పి కలగదు కదా ! కేవలం  సరి అయిన పధ్ధతి లో కదలక , అస్తవ్యస్తం గా కదిలితేనే , ప్రక్కన ఉండే వెన్ను నాడి నొక్క బడి , నొప్పి కలుగుతుంది. ( పైన ఉన్న చిత్రం  గమనించండి ).
3. లామి నెక్ట మీ: ఈ రకమైన సర్జరీ లో  వెన్ను పూస ఎముక(ల ) ఎముక భాగాన్ని తొలగించి , వాటి ప్రక్కన ఉన్న నాడి మీద ఆ వెన్ను పూస ఎముక (లు ) వత్తిడి కలిగించడం లేదా నొక్కడం నివారిస్తారు. దానితో నొప్పి కూడా నివారించ బడుతుంది. ( పైన ఉన్న చిత్రం  గమనించండి ).
వెన్నెముక సర్జరీ లలో ఉండే రిస్కులు ఏమిటి ?
ప్రతి శస్త్ర చికిత్స లో ఉండే రిస్కుల లాగానే , వెన్నెముక మీద చేసే సర్జరీ కూడా కొంత రిస్కు తో కూడుకున్నది. ఆ రిస్కులు ఏమిటి ? 
1. ఇన్ఫెక్షన్ :   వెన్నెముక ఆపరేషన్ చేసే భాగం లో ఇన్ఫెక్షన్ చేర వచ్చు . అంటే  బ్యాక్టీరియా లు అక్కడ చేర వచ్చు.  సర్వ సామాన్యం గా ఈ పరిస్థితి ,  చేసే  సిబ్బంది , లేదా మేనేజ్మెంట్ వాళ్ళు కక్కుర్తి పడి కానీ , లేదా  అజ్ఞానం వల్ల కానీ , లేదా బాధ్యతా రాహిత్యం వల్ల కానీ సరి అయిన శుభ్రత పాటించక పొతే కలుగుతుంది.
2. నాడులు దెబ్బ తినడం : కొన్ని సమయాలలో , సర్జన్ ఆపరేషన్ సరిగా చేయక పొతే , కొన్ని సున్నితమైన నాడులు తెగి పోయి , ఆ భాగం లో ఉన్న కండరాలు ‘ చచ్చు ‘ బడ వచ్చు
3. సరిగా ఆపరేషన్ చేయక పొతే , నొప్పి అట్లాగే ఉండ వచ్చు !  ఇంకో రకం గా చెప్పుకోవాలంటే , ఆపరేషన్ ఫెయిల్ అవడం !
వచ్చే టపాలో ఇంకొన్ని సంగతులు !


వెనక నొప్పి . 7. సయాటికా కు చికిత్స ఏమిటి ?

In ప్ర.జ.లు., మన ఆరోగ్యం., Our Health on జూలై 14, 2014 at 3:25 సా.

వెనక నొప్పి . 7. సయాటికా కు చికిత్స ఏమిటి ?

 

మునుపటి టపాలో, సయాటికా కు వాడే మందులతో ఏ  ఏ జాగ్రత్తలు తీసుకోవాలో తెలుసుకున్నాం కదా ! ప్రధానం గా చికిత్స  మూడు పద్ధతులలో ఉంటుంది. 1. మందులతో 2. వ్యాయామం తో 3. శస్త్ర చికిత్స తో .
మందులతో  వెనక నొప్పి ని తగ్గించు కోవడం ఎట్లాగో తెలుసుకున్నాం కదా  క్రిందటి టపాలో.  ఈ మందులు రోజూ తీసుకుంటున్నప్పుడు ,  సాత్విక ఆహారం తినడం అలవాటు చేసుకోవాలి . ఎందుకంటే నొప్పి నివారణకు వేసుకునే మందులు చాలా వరకూ  కడుపులో మంట పుట్టిస్తాయి . దానికి తోడుగా , కాఫీలూ , టీలూ , ఎక్కువగా తీసుకుంటూ ,  స్పైసీ ఫుడ్ అంటే మసాలాలూ , పచ్చళ్ళూ , ఎక్కువగా ఉన్న ఆహారం కూడా తింటూ ఉంటే ,  కడుపులో మంట రెండింతలవుతుంది.   అట్లా జరుగుతుదని డాక్టర్ తో చెబితే , కడుపులో సహజం గా ఉత్పత్తి అయే  ఆమ్లాలు తగ్గించడానికి ఇంకో ట్యా బ్లెట్  రాస్తాడు !   సాధారణం గా డాక్టర్ రాసే ప్రతి ట్యా బ్లెట్ కూ  ఏదో రకం గా ప్రతి ఫలం ముడుతుంది ! సాత్విక ఆహారం అందుకే  ఆ సమస్యలను నివారిస్తుంది , అలవాటు చేసుకునే వారిలో !  అట్లాగే , రోజూ కనీసం మూడు నుంచి నాలుగు లీటర్ల నీళ్ళు తాగడం కూడా మాన కూడదు , ఈ రకమైన మందులు తీసుకుంటున్నప్పుడు !  ప్రతి ఆరు నెలలకూ ఒక సారి , కిడ్నీ పరీక్షలు కూడా చేయించుకోవాలి ( కిడ్నీలు లేదా మూత్ర పిండాలు ఎట్లా ఉన్నాయో తెలుసుకోవడం కేవలం రక్త పరీక్ష తో  కూడా సంభవం ! )
2. వ్యాయామం తో వెనక నొప్పి తగ్గుతుందా ? 
వెనక నొప్పి ఉన్న వారు , వీలైనంత వరకూ , శారీరిక వ్యాయామం , క్రమం గా అంటే రెగ్యులర్ గా చేస్తూ ఉండడం ఎంతో  ఆరోగ్య కరం. నొప్పి  తగ్గిస్తూ , వెన్నుపూస చుట్టూ ఉన్న కండరాలు బలం గా ఉండడం కోసం అనేక రకాల వ్యాయామాలు ఉన్నాయి. వ్యాయామం చేయక పొతే , ఆ కండరాలు బలహీన పడి , నొప్పి ఎక్కువ అయే ప్రమాదం ఉంటుంది.
కంప్రెషన్ ప్యాక్స్ తో నొప్పి నివారణ :  ఇవి ప్రత్యేకం గా మందుల షాపులలో అమ్ముతూ ఉంటారు . వీటితో ఏ  సైడ్ ఎఫెక్ట్ లూ ఉండవు.  ఈ ప్యాక్ లలో ఐసు ముక్కలు కానీ లేదా వేడి నీళ్ళు కానీ పోసుకుని ‘ కాపడం ‘ లాగా నొప్పి ఉన్న చోట కొంత సేపు ఉంచడం చేస్తూ ఉంటే , నొప్పి కి ఉపశమనం ఉంటుంది !
దీర్ఘ కాలిక , వెనక నొప్పి కి చికిత్స ఏమిటి ? 
కొందరి లో వెనక నొప్పి , కొన్ని నెలలు గానూ , సంవత్సరాల గానూ  ఉండి , బాధ పెడుతూ ఉంటుంది. వారిలో  ముందుగా  తీసుకునే మందులలో మార్పులు చేసి , నొప్పి నివారణ కు ప్రయత్నం చేయాలి.  పారా సెట మాల్  ( క్రోసిన్ ) , కోడీన్ , ప్రీగాబాలిన్ , గాబా పెంటిన్ , లాంటి మందులు కొంత వరకూ ఉపశమనం కలిగిస్తాయి.
ఇంజెక్షన్ లతో ప్రయోజనం ఉంటుందా ? 
సామాన్యం గా నొప్పి తీవ్రం గా ఉంటే , ఆ నొప్పి కలిగిస్తున్న చోట , స్టీరాయిడ్ ఇంజెక్షన్ లు చేసి నొప్పి ని తగ్గించడం కూడా జరుగుతుంది. మునుపటి టపాలలో చెప్పుకున్నట్టు గా , నొప్పి ఉన్న చోట , కండరాలు వాచి , ఆ వాచి ఉన్న కండరాలు పక్కనే ఉన్న నాడిని నొక్కడం వల్ల నొప్పి ఎక్కువ అవడం జరుగుతుంది.
స్టీరాయిడ్ ఇంజెక్షన్ , ఆ రకమైన వాపును తగ్గిస్తుంది. దానితో ,  పక్కన ఉన్న నాడికి వత్తిడి తగ్గి , పర్యవసానం గా నొప్పి కూడా తగ్గుతుంది. కానీ ఈ రకమైన ఇంజెక్షన్ లు నిపుణి డి తో నే అంటే  ఎముకల స్పెషలిస్ట్ తోనే చేయించుకుంటే మంచిది.  ఎవరితో బడితే వారితో చేయించుకుంటే , ‘ కోతి పుండు బ్రహ్మ రాక్షసి అయినట్టు , తయారవుతుంది , వెనక నొప్పి ! అందుకని జాగ్రత్త అవసరం !
వచ్చే టపాలో ఇంకొన్ని సంగతులు !

 


వెనక నొప్పి .6. సయాటికా కు వేసుకునే మందులతో జాగ్రత్తలు.

In ప్ర.జ.లు., మన ఆరోగ్యం., Our Health on జూలై 8, 2014 at 7:39 సా.

వెనక నొప్పి .6.  సయాటికా కు వేసుకునే మందుల తో జాగ్రత్తలు. 

క్రితం టపాలలో సయాటికా అని దేనిని అంటారు , దాని లక్షణా లేంటి , దానిని ఎట్లా కనుక్కోవచ్చు అనే విషయాల గురించి చాలా వరకూ తెలుసుకున్నాం కదా ! మరి సయాటికా కు లభ్యమయే చికిత్సా పద్ధతుల గురించి తెలుసుకుందాం ! సయాటికా కు చికిత్స , ఆ సమస్య తీవ్రత ను బట్టి చేయించు కోవడం మంచిది. అంతే కాకుండా , సమస్య  తీరు ను బట్టి కూడా చేయించుకోవాలి ! 
సమస్య తీరు : సయాటికా అంటే వెనక నొప్పి లేదా వెన్ను నొప్పి అని తెలుసుకున్నాం కదా ! మరి సమస్య తీరు అంటే ఏమిటి ? :
కారణాలు ఏమైనా సయాటికా లేదా వెన్ను నొప్పి , చివరకు , వెన్ను పూస లో నుంచి బయటకు వచ్చే సయాటిక్ నాడి  మీద పడే వత్తిడి మూలం గానే నొప్పి కలుగుతుంది. అంటే ఆ నాడి నొక్క బడుతుంది. ఉదాహరణకు : కొన్ని ప్రమాదాలలో వీపు భాగం మీద బలం గా గాయం తగిలితే , ఆ భాగం లో ఉన్న కండరాలు ఇంకా సయాటిక్ నాడి చుట్టూ ఉన్న  దట్టమైన పొరలు వీటినే ఫేషియా అని అంటారు , ఈ పొరలు ‘ చినిగి ‘ పోవడం అంటే టే ర్  అవడం జరుగుతుంది అప్పుడు కూడా  సయాటికా లక్షణాలు కలగ వచ్చు. అట్లాగే  ఎక్కువ బరువులు అననుకూల మైన కోణాలలో ఎత్తితే కూడా , వెన్ను పూసల మధ్యలో ఉండే డిస్క్ భాగం బయటకు వచ్చి సయాటిక్ నాడిని గట్టిగా నొక్క వచ్చు ! ఆ సందర్భం లో కూడా నొప్పి కలుగుతుంది ! 
సమస్య తీవ్రత : క్రితం టపాలో చెప్పుకున్నట్టు గా  సయాటికా సమస్య కొద్ది గానే ఉంటే , అంటే మైల్డ్ గా నొప్పి కలగడం , కేవలం ఒక పొజిషన్ లోనే నొప్పి కలగడం లాంటి లక్షణాలు, ప్రత్యేకించి తొలి దశలో  ఉంటే , చికిత్స కేవలం సరిపడినంత విశ్రాంతి లేదా రెస్ట్ తీసుకోవడమే ! 
రెస్ట్ వల్ల ప్రయోజనం ఏమిటి ? 
చాలామంది సయాటికా బాధితులు ‘ ఏ డాక్టర్ దగ్గర కెళ్ళినా రెస్ట్ తీసుకోమని సలహా ఇస్తారు , రోజూ పని చేసుకునే వారికి రెస్ట్ ఎట్లా కుదురుతుంది ?’  అని సందేహాలు వెలిబుచ్చుతారు, నిరుత్సాహ పడతారు ! రెస్ట్ తీసుకోవడం అనేక విధాలు గా మంచిది . 1.  రోజంతా పని చేస్తుంటే , పని వత్తిడి ఉంటుంది. 2. దానితో పాటు గా  వీపు భాగం లో ఉండే కండరాలన్నీ బిగుతు గా అవుతాయి. అంటే టెన్స్ గా అవడం ! అట్లా కండరాలు టెన్స్ గా ఉండడం వల్ల కూడా సయాటికా నాడి మీద ఎక్కువ వత్తిడి పడుతుంది. దానితో నొప్పి ఎక్కువ అవుతుంది.
మరి భరించలేని నొప్పి అవుతే ట్యా బ్లెట్ లు తీసుకోవచ్చా ?
తప్పకుండా తీసుకోవచ్చు. కానీ ఏ   ట్యా బ్లెట్ లు పడితే అవి తీసుకోవడం మంచిది కాదు. 
కారణం ఏమిటి ? 
నొప్పి నివారణకు మార్కెట్ లో లభ్యం అవుతున్న  ట్యా బ్లెట్ లు అనేక రకాలు గా ఉంటాయి. ఏ  ట్యా బ్లెట్ కూడా వంద శాతం సురక్షితం కాదు. ఇంకో రకం గా చెప్పాలంటే , ప్రతి ట్యా బ్లెట్ కూడా కొన్ని కొన్ని సైడ్ ఎఫెక్ట్ లు కలిగి ఉంటుంది. కొన్ని  ట్యా బ్లెట్ లు , అప్పటికే కొన్ని రోగాల తో బాధ పడుతున్న వారు వేసుకోకూడదు ! 
ఉదాహరణ కు : ఆస్తమా ఉన్న వారికి వెన్ను నొప్పి వస్తే , వారు ఐబూ ప్రొఫెన్ అనే ట్యా బ్లెట్ తీసుకో కూడదు. ఏ కారణం చేతనైనా తీసుకుంటే , వారికి ఆస్తమా తీవ్రం అయే ప్రమాదం ఉంటుంది ! అట్లాగే , కొన్ని రకాల  ట్యా బ్లెట్ లు నొప్పిని తగ్గించినా  , మూత్ర పిండాలను దెబ్బ తీయగలవు ! ప్రత్యేకించి , నొప్పి తగ్గిస్తుంది కదా అని ఎడా పెడా , ఎన్ని పడితే అన్ని  తమ ఇష్టానుసారం ట్యా బ్లెట్ లు వేసుకుంటూ ఉంటే ! భారత దేశం లో  సాధారణం గా ఏ మందుల షాపు కు వెళ్ళినా , ఏ మందు కావాలన్నా , డాక్టరు సలహా ఉన్నా లేక పోయినా కూడా , మనకు కావలసినన్ని  ట్యా బ్లెట్ లు కొనుక్కోవచ్చు ! మందుల షాపులకు కావలసినది డబ్బు , మన ఆరోగ్యం ప్రధానం కాదు వారికి ! 
ఏ జబ్బులు ఉన్న వారు  నొప్పి నివారణ  ట్యా బ్లెట్ లు తీసుకునే సమయం లో జాగ్రత్త గా ఉండాలి ?
1. కడుపు లో అల్సర్ ఉన్న వారు : ఎందుకు ?  నొప్పి నివారణ మందుల్లో చాలా మందులు కడుపు లో మంట ఎక్కువ చేస్తాయి. కడుపు లో అల్సర్ ఉన్న వారు కనుక ఎక్కువ గా నొప్పి కి మందులు తీసుకుంటే , అల్సర్ పెద్దదయి , రక్త స్రావం అవుతుంది. ఇంకో రకం గా చెప్పుకోవాలంటే , కడుపు లో చిల్లు పడుతుంది. ప్రత్యేకించి  మద్యం ఎక్కువ గా , ఎక్కువ కాలం తాగే వారిలో ఇట్లా , కడుపులో అల్సర్ లు ఏర్పడే ప్రమాదం ఉంది. కారాలు బాగా ఎక్కువ గా ఉన్న పచ్చళ్ళు , ఊరగాయలు ఎక్కువ గా తినే వారిలో కూడా అల్సర్ లు వస్తాయి ! దక్షిణ భారతం లో ఇట్లా అల్సర్ లు ఉన్న వారు  ఎక్కువ అని కూడా పరిశీలనల వల్ల తెలిసింది.
2. పైన చెప్పుకున్నట్టు ఆస్తమా బాధితులు. 
3. గుండె జబ్బు ఉన్న వారు. 
4. కాలేయం అంటే లివర్ సరిగా పని చేయని వారు. నొప్పి నివారణ మందులు కాలేయాన్ని కూడా దెబ్బ తీయగలవు ! అందుకు. 
6. మూత్ర పిండాల జబ్బులు ఉన్న వారు. చాలా రకాల నొప్పి నివారణ మందులు మూత్ర పిండాల లో ఉండే అతి సూక్ష్మమైన జల్లెడలను పాడు చేస్తాయి అందుకు ! 
7. అధిక రక్త పీడనం అంటే హై బీపీ ఉన్న వారు. ఎందుకు? : అనేక రకాల నొప్పి నివారణ మందులు రక్త పీడనాన్ని అనేక రకాలు గా ఎక్కువ చేస్తాయి అందుకు !  
 ( పైన ఉన్న చిత్రం లో ప్రపంచ ఆరోగ్య సంస్థ  నొప్పి తీవ్రత ను బట్టి వాడే మందులు ఒక క్రమం లో సూచించడం జరిగింది.  నొప్పి తీవ్రత 10 కి ఎన్ని పాయింట్లో దాని ప్రకారం మైల్డ్ , మోడరేట్ , సివియర్ అంటే కొద్దిగా , మధ్యస్థం గా , ఎక్కువ గా ఉన్నప్పుడు , ఏ  ఏ  మందులు వాడవచ్చో చూపించడం జరిగింది ) . 
వచ్చే టపాలో ఇంకొన్ని సంగతులు ! 

 


వెనక నొప్పి . 5. సయాటికా ఎట్లా కనుక్కోవచ్చు ?

In ప్ర.జ.లు., మన ఆరోగ్యం., Our Health on జూలై 4, 2014 at 7:22 సా.

వెనక నొప్పి . 5. సయాటికా ఎట్లా కనుక్కోవచ్చు ? 

 

వెనక నొప్పి అనేక విధాలు గా కనబడుతూ ఉంటుంది , ఒక్కొక్కరిలో !  ఆ లక్షణాలు చాలా వరకూ మునుపటి టపాలలో తెలుసుకోవడం జరిగింది కదా ! 
కనీసం ఆరు వారాల లోపు గా ఆ  లక్షణాలు కనుక చాలా వరకు తగ్గి పొతే ,  ఆ వెన్ను నొప్పి ని గురించి ఆందోళన పడనవసరం లేదు !   అంటే ,  ప్రత్యేకమైన చికిత్సలు అవసరం ఉండదు , అట్లా తగ్గిపోయే నొప్పులకు. ఆరు వారాలు దాటాక కూడా , నొప్పి  పోకుండా , వివిధ రకాలు గా బాధ పెడుతూ ఉంటే , అందుకు కారణాలు కనుక్కోవడం ఉత్తమం ! నొప్పి కి కారణాలు కనుక్కోవడం వల్ల  ఏ చికిత్స ఎక్కువ ఉపయోగమో తెలుస్తుంది ! 
వెనుక నొప్పి కారణాలు కనుక్కొనే పరీక్ష ల లో మొట్టమొదటిది చాలా తేలిక , దీనికి డబ్బు ఖర్చు ఏమీ అవ్వదు ! ఇంట్లోనే  పరీక్షించుకో వచ్చు ! కానీ, పక్కన సహాయానికి ( అవసరం ఉంటే  )  కుటుంబ సభ్యులో, లేదా స్నేహితులో ఉంటే మేలు !
వివరాలు : ఎత్తు పల్లాలు లేని సమతలం గా ఉన్న బెడ్ మీద  వెల్లికిలా పడుకోవాలి ! నిద్ర పోకూడదు ! ఆ తరువాత ఒక కాలును వంచ కుండా , నిటారు గా పైకి ఎత్తాలి కనీసం నలభై అయిదు డిగ్రీలు అంటే , బెడ్ మీద ఉన్న స్థానం నుంచి , పై  చిత్రం లో చూపినట్టు. ఆ తరువాత మీ పక్కన ఉన్న వారు ఎత్తి ఉంచిన కాలు పాదాన్ని మీ వైపుకు వంచాలి ! గమనించ వలసింది , కేవలం పాదాన్ని మాత్రమే తలవైపు వంచాలి. కాలును అదే స్థానం లో అంటే చిత్రం లో చూపిన విధం గా నే నలభై అయిదు డిగ్రీల కోణం లో ఉంచాలి. ఈ విధం గా  ఇంకో కాలునూ పరీక్షించాలి. అప్పుడు వెన్ను నొప్పి కలగడం కానీ , అప్పటికే ఉన్న వెన్ను నొప్పి ఎక్కువ అవడం కానీ జరిగితే , వెన్ను నొప్పి సమస్య ఉన్నట్టు లెక్క ! 
మిగతా పరీక్షలు :
రక్త పరీక్షలు : వెన్ను నొప్పి వస్తే రక్త పరీక్షలు ఎందుకు ? 
వెన్ను నొప్పికి కారణమైన ఇన్ఫెక్షన్ , రక్త పరీక్ష లలో కనుక్కోవచ్చు !  CRP  అనే పరీక్ష ఇంకా తెల్ల కణాల పరీక్ష ఈ రెండు పరీక్షలలో CRP , ఇంకా తెల్ల కణాలూ ఉండవలసిన దానికన్నా ఎక్కువ గా ఉంటే , ఇన్ఫెక్షన్ ఉన్నట్టు. ప్రత్యేకించి ఆ ఇన్ఫెక్షన్ కొద్ది రోజులూ , లేదా వారాలూ  ఉంటే , ఈ పరీక్షలు అబ్నార్మల్ గా ఉంటాయి . 
అట్లా కాకుండా , ఇన్ఫెక్షన్ కనుక ఎక్కువ వారాలూ లేదా నెలలూ కనుక శరీరం లో ఉంటే , అప్పుడు ESR  అనే పరీక్ష అబ్నార్మల్ గా కనబడుతుంది రక్త పరీక్ష లో !  దీర్ఘ కాలిక ఇన్ఫెక్షన్ లు శరీరం లో ఉన్నా లేదా , క్యాన్సర్ ఉన్నా కూడా ESR  అనే పరీక్ష అబ్నార్మల్ గా ఉండ వచ్చు !
Xray పరీక్ష : వెన్నెముక Xray  తీయిస్తే , డిస్క్ బయటకు రావడం కానీ , లేదా వెన్ను పూస ఎముకలు , వర్టిబ్రా  అని అంటారు , అవి అరిగి పోయినా లేదా విరిగి పోయినా లేదా , బలం లేకుండా ఉన్నా కూడా తెలుసుకోవడానికి అవకాశం ఉంటుంది. అంతే కాకుండా ఎముకల మధ్యలో కానీ లేదా వాటి చుట్టూ కానీ చీము చేరినా కూడా ,తెలుసుకోవచ్చు.
MRI  స్కాన్: MRI  స్క్యాన్  వల్ల పైన చెప్పిన అంటే Xray  లో కనబడేవే , ఇంకా స్పష్టం గా కనబడతాయి ! MRI లో అయస్కాంత ప్రభావం తో శరీరం లోపలి భాగాలను పరిశీలించి వాటి ఫోటోలు తీయడం జరుగుతుంది. ( Xray  లో X కిరణాలను పంపి శరీరం లోపలి భాగాలను ఫోటో తీయడం జరుగుతుంది ).
మరి శరీరం లో ఇన్ఫెక్షన్ కానీ , క్యాన్సర్ కానీ ఉంటే , వెన్ను నొప్పి తో పాటుగా మిగతా లక్షణాలు ఎట్లా ఉంటాయి ?
మన శరీరం లో ఏదో మూల దాక్కుని ఉండే ఇన్ఫెక్షన్  ఇంకో రకం గా అంటే వెన్ను నొప్పి తోనో లేదా ఇంకో నొప్పితోనో, కనిపించ కుండా బాధ పెడుతూ ఉంటే  ఒక పట్టాన కనుక్కోవడం కష్టం ! ప్రత్యేకించి  వెన్ను నొప్పి కి క్యాన్సర్  కారణ మవుతే , ఇంకా బాధాకరం ! ఇట్లాంటి పరిస్థితులలో ,  ఆ నొప్పులతో పాటుగా మిగతా లక్షణాలను కూడా ఆ బాధ పడే వారు కానీ , లేదా వారికి ఆప్తులు , బంధువులు అయిన వారు కానీ , పరిశీలించి చూస్తే , గోచరిస్తాయి . అవి ఈ క్రింది విధం గా ఉండ వచ్చు :
1. సామాన్యం గా వయసు ఒక యాభై సంవత్సరాలు పైబడిన వారిలో 
2. ఇంతకు ముందు ఎప్పుడూ వెన్ను నొప్పి రాని వారిలో 
3. వంశ పారంపర్యం గా కుటుంబం లో( ఆ )  క్యాన్సర్ వచ్చి ఉంటే,
4. జ్వరం , వణుకూ , తరచు గా వస్తూ , బరువు తగ్గి పోతూ ఉంటే ,
5. పుట్టుకతో నే వెన్నెముక  పెరగడం లో అవక తవకలు ఉండి ఉంటే, 
6. సుఖ వ్యాధులు ఉన్న వారిలో ( అంటే ఎయిడ్స్ కూడా ) . 
 
పైన చెప్పిన లక్షణాలు , ఆందోళన పడడానికి కాదు , కేవలం ముందు జాగ్రత్త తో సరి అయిన చికిత్స అవసరం అవుతే చేయించు కోవడం కోసమే ! 
వచ్చే టపాలో ఇంకొన్ని సంగతులు ! 

 


వెనక నొప్పి . 4. సయాటికా.

In ప్ర.జ.లు., మన ఆరోగ్యం., Our Health on జూలై 1, 2014 at 9:17 సా.

వెనక నొప్పి . 4. సయాటికా. 

క్రితం టపా లో వెనక నొప్పి ఎట్లా వస్తుందో తెలుసుకున్నాం కదా , ఇప్పుడు సయాటికా లక్షణాలు చూద్దాం !
సయాటికా  అని దేనిని అంటారు ?
మన దేహం లో ప్రతి భాగానికీ విస్తరించి ఉన్న నాడీ మండలం లో ఉండే అన్ని నాడులూ తప్పనిసరిగా మెదడుతో అను సంధానమై  ఉంటాయి, అంటే మన శరీరం లో ఏ భాగమైనా కూడా స్పర్శ కానీ , నొప్పి కానీ , వత్తిడి కానీ ( అంటే టెన్షన్ కాదు ఇక్కడ ,  ఒక వేలు తో ఎక్కడైనా శరీరం మీద నొక్కితే ఏర్పడే అనుభవం ‘ వత్తిడి ‘ ) ఇట్లా ఎట్లాంటి స్పర్శ అయినా ఆ యా భాగాలలో ఉన్న నాడులు , మెదడుకు తెలియ చేయడం వల్లనే ‘ మనకు  తెలిసేది ‘ ! సయాటిక్ నాడి  కూడా  మెదడు తో అనుసంధానమై ఉన్న ఒక పొడవైన నాడి ! ఈ సయాటిక్ నాడి , నడుము దగ్గర నుంచి వెనుక భాగం లో రెండు కాళ్ళకూ రెండు నాడులు గా విస్తరించి ఉంటుంది. ఈ నాడి మార్గం లో ఎక్కడైనా, ఏ కారణం చేత నైనా వత్తిడి కలిగితే  , ఆ వత్తిడి తీవ్రత ను బట్టి నొప్పి కలుగుతుంది దీనినే సయాటికా అని అంటారు.
ఈ సయాటిక్ నాడి ఎంత వరకూ ఉంటుంది ? 
సయాటిక్ నాడి , మన శరీరం లో ఉండే నాడుల లోకల్లా అతి పొడవైన నాడి ! ఈ నాడి , కటివలయం అంటే పెల్విస్ నుంచి పిదురుల ( అంటే హిప్స్ ) గుండా పాదం వరకూ విస్తరించి ఉంటుంది !   అంటే, రెండు కాళ్ళ లోనూ రెండు సయాటిక్ నాడులు ఉంటాయి. 
సయాటిక్ నొప్పి ఎట్లా ఉంటుంది ?
మిగతా నొప్పులు సామాన్యం గా సమస్య ఉన్న చోటే నొప్పి కలిగిస్తాయి. కానీ సయాటికా నొప్పి  వత్తిడి ఉన్న చోట కాకుండా , ఆ నాడి విస్తరించి ఉన్న భాగం లో వస్తుంది ! సామాన్యం గా ఒకే పొజిషన్ లో ఎక్కువ సమయం నుంచుంటే కానీ, లేదా కదలకుండా ఒకే చోట ఎక్కువ సమయం కూర్చుంటే కానీ , లేదా , తుమ్మడం , దగ్గడం చేయడం ఎక్కువ సేపు బాగా నవ్వడం వల్ల , లేదా  ముందుకు వంగడం వల్ల కానీ నొప్పి ఎక్కువ గా ఉంటుంది ! కొన్ని సందర్భాలలో , నొప్పి లేకుండా , ఒక కాలు కానీ , పాదం కానీ చచ్చు బడి పోయినట్టు తిమ్మిరి గా ఉండడం, లేదా ఆ కాలు కు ఉన్న కండరాలు బలహీనం గా అనిపించడం కూడా జరుగుతుంది. వత్తిడి తీవ్రత ఎక్కువ గా ఉంటే , కొన్ని సందర్భాలలో  మల మూత్ర విసర్జన మన స్వాధీనం లో లేక పోవడం కూడా జరుగుతుంది ! అంటే మన కంట్రోలు లో లేక పోవడం ! 
మరి సయాటికా కు కారణాలు ఏమిటి ?
క్రితం టపాల లో చెప్పుకున్నట్టు గా , వెన్ను పూస ఎముకల మధ్య ఉండే డిస్క్ పదార్ధం బయటికి రావడం వల్ల కానీ , లేదా ఏదైనా ఇన్ఫెక్షన్  వెన్ను పూస లో చేరడం వల్ల కానీ ,అవ వచ్చు !  భారత దేశం లో వెన్నెముక లలో టీబీ  దానినే బోన్ టీబీ అని కూడా అంటారు , అట్లా టీబీ రావడం వల్ల  వెన్ను పూసను కరిగించి వేస్తుంది వచ్చిన ఇన్ఫెక్షన్ ! ఇంకా  క్యాన్సర్ వెన్నెముక కు పాకితే కూడా  సయాటికా లక్షణాలు కలగ వచ్చు! ప్రమాదాలు జరిగి , వెన్నెముక కు గట్టి దెబ్బ తగిలినా కూడా ఆ వెన్నెముక భాగం విరిగి పోయి సయాటిక్ నాడికి వత్తిడి కలిగి నొప్పీ , బాధా కలగ వచ్చు !  ఇక్కడ చెప్పుకున్న కారణాలలో ఇన్ఫెక్షన్ కానీ డిస్క్ కానీ ఏర్పడడం సామాన్య కారణాలు !  వెన్నెముక లో టీబీ కానీ క్యాన్సర్ కానీ రావడం అరుదు గానూ జరుగుతూ ఉంటుందనే విషయం గుర్తు ఉంచుకోవాలి ! 
వచ్చే టపాలో ఇంకొన్ని సంగతులు ! 


వెనక నొప్పి కి కారణాలు . 3. బ్యాకేక్.

In ప్ర.జ.లు., మన ఆరోగ్యం., Our Health on జూన్ 26, 2014 at 5:36 సా.

వెనక నొప్పి కి కారణాలు . 3. బ్యాకేక్. 

పైన ఉన్న చిత్రం గమనించండి ! 

క్రితం  టపాలలో , వెనక నొప్పి రకాలూ , ఆ నొప్పి ఎట్లా ఉంటుందో తెలుసుకున్నాం కదా !  ఇప్పుడు అసలు వెనక నొప్పి ఎట్లా వస్తుందో , ఎందుకు వస్తుందో చూద్దాం.

మన శరీర నిర్మాణం లో  ఎముకలూ , కండరాలూ , నాడీ మండలం అంటే  నాడులు ,  ఇంకా కార్టిలేజ్ , లిగమెంట్ లు  ఇట్లా  అనేక నిర్మాణాలు , మన కదలిక కు అనివార్యమైన శరీర భాగాలు. ఈ విషయం బాగా గుర్తు ఉంచుకుంటే , అసలు నొప్పి కి కారణం ఏమిటో తెలుసుకోవడం సులభం అవుతుంది. ఉదాహరణకు :  యుక్త వయసులో ,  ఎముకల నిర్మాణం అప్పుడే పూర్తి అయి ఉండడం వల్ల ,  అప్పుడు కలిగే నొప్పి సాధారణం గా కండరాలూ , లేదా లిగమెంట్ ల వల్ల ఏర్పడుతుంది ! అంటే అతిగా వ్యాయామం చేయడం వలన కానీ , లేదా లిగమెంట్ లను ఎక్కువ గా  లాగడం వల్ల కానీ ! లిగమెంట్ లు అంటే మన శరీరం లో ప్రతి కీలు అంటే జాయింట్ లోనూ ఇవి ఉండి  ఒక ఎముకకూ , ఇంకో ఎముకకూ మధ్య ఏర్పడే నిర్మాణాలు. లిగమెంట్ లు  మన శరీరం లో ఉండే అతి గట్టి భాగాలు. ఈ భాగాలు , ఎముకలు ఎక్కువ గా వంచడం వల్ల అంటే , ఏవైనా ఎక్కువ బరువులు మోసినప్పుడు కానీ , లేదా విపరీతం గా ఆటలు ఆడడం వల్ల కానీ ,  ‘ లాగ బడతాయి ‘ అంటే అతిగా స్ట్రెచ్ అవుతాయి . దానితో నొప్పి కలుగుతుంది. అట్లాగే కండరాలు కూడా ! 

ఇక కొన్ని రకాల నొప్పులు  నాడుల మీద వత్తిడి కలిగి వస్తాయి.  క్రితం టపాలలో , వర్టిబ్రా ల మధ్యనుంచి వచ్చే నాడులు గమనిస్తే , ఆ నాడుల కు ఆనుకునే డిస్క్ ఉంటుంది. ఆ డిస్క్ కనుక రెండు వర్టిబ్రా ల మధ్య సందులోంచి ఏమాత్రం బయటకు వచ్చినా కూడా , అది ఆ పక్కనే ఉన్న నాడిని నొక్కుతుంది. దానినే మనం డిస్క్ ఉంది అని సామాన్యం గా అనుకుంటూ ఉంటాం ! ఈ డిస్క్ బయటకు రావడం , మెడ భాగం లో ఉన్న వెన్ను పూస లో కానీ లేదా నడుము భాగం లో ఉన్న వెన్నుపూస లో కానీ జరగ వచ్చు ! ఎక్కడ జరిగిందీ అనేది , ఈ భాగం లో కదలికలు అవక తవక గా  , అతి గా చేశామూ అనే విషయం మీద ఆధార పడుతుంది ! కేవలం ఈ డిస్క్ , కొన్ని సమయాలలో బయటకు వచ్చి పక్కన ఉన్న నాడిని నొక్కి , నొప్పి కలిగించడమే కాకుండా , వయసు మీరాక ఈ డిస్క్ కూడా అరిగి పోవడం జరిగి , తద్వారా  వెన్ను పూస లు పక్కన ఉన్న నాడులను నొక్కడం వలన కూడా
నొప్పి కలగ వచ్చు !
 
పైన ఉన్న చిత్రం గమనించండి ! 
ఇక ఇంకో రకమైన నొప్పులు కూడా వస్తుంటాయి సామాన్యం గా మనకు. ఆ నొప్పులు , విపరీతమైన మసుల్ ఏక్స్  అంటే శరీరమంతా అలసట గానూ కండరాలన్నీ  నొప్పులు గానూ ఉండడం. దీనికి కారణం శరీరం లో ఇన్ఫెక్షన్ కలగడం ! అంటే శరీరం లో ఇన్ఫెక్షన్ ఉంటే , కండరాలలో ఎందుకు నొప్పులు కలుగుతాయి ? అని అనుకుంటే , ఇన్ఫెక్షన్ సామాన్యం గా రక్తం లో కలుస్తుంది అనే విషయం గుర్తు చేసుకోవాలి ! అంటే ఉదాహరణకు , మలేరియా కానీ , లేదా వైరల్ ఫీవర్ అంటే ‘ విష జ్వరం ‘  వచ్చినా , లేదా ఏవైనా దీర్ఘ వ్యాధి కలిగినా కూడా , ఇన్ఫెక్షన్ శరీరమంతా పాకుతుంది రక్తం శరీరమంతా ప్రవహిస్తుంది కాబట్టి !  అట్లా ఇన్ఫెక్షన్ కారణం గా వచ్చే నొప్పులు , ఇన్ఫెక్షన్ కు సరి అయిన యాంటీ బయాటిక్స్ కానీ లేదా మలేరియాకు మందులు కానీ  వేసుకుంటే ఠ పీ మని తగ్గిపోతాయి , శరీరంలో కండరాల నొప్పులు కూడా ! 
ఇక ఒక వయసు వచ్చాక , శరీరం లోని ఎముకలు అరిగి పోవడం వల్ల , నొప్పులు కలుగుతాయి ఉదాహరణకు ,  తుంటి జాయింటు అంటే హిప్ జాయింటు లేదా తుంటి కీలు , లేదా మోకాలు కీలు. వీటిలో నొప్పి కేవలం వయసు మీరితేనే కాకుండా , యుక్త వయసు లో కూడా , వారు అతిగా బరువు గా ఉంటే రావచ్చు ! అంటే ఊబకాయం లేదా ఒబీసిటీ ! ఇట్లాంటి నొప్పులు ఒక పట్టాన తగ్గవు ఎందుకంటే , అరిగిన కీళ్ళు  మళ్ళీ కొత్తగా మారవు కాబట్టి ! 
సారాంశం : వెనక నొప్పి కి అనేక కారణాలు ఉంటాయి ! అన్నిటికీ ఒకే మందు పని చేస్తుందని అనుకోవడం మంచిది కాదు , ప్రత్యేకించి , ఆ నొప్పి మన శరీరం లో ఏ భాగం వల్ల వస్తుందో కనుక్కోకుండా ! 
వచ్చే టపాలో ఇంకొన్ని సంగతులు ! 

 


వెనక నొప్పి రకాలు. బ్యాకేక్ . 2.

In ప్ర.జ.లు., మన ఆరోగ్యం., Our Health on జూన్ 21, 2014 at 12:40 సా.

వెనక నొప్పి రకాలు. బ్యాకేక్ . 2.  

తల వెనుక భాగం లో పైనుంచి భుజాల వరకూ ఉండే భాగంలో  వచ్చే నొప్పిని మెడ నొప్పి అంటారు.  ఈ భాగం లో వచ్చే నొప్పి అక్కడే పరిమితమై ఉండకుండా , పైకి పాక వచ్చు , అట్లాగే ( కిందకు ) చేతులకు పాక వచ్చు.  ( పై చిత్రం గమనించండి )
నొప్పి ఎట్లా ఉంటుంది ?
ఈ నొప్పి  వచ్చిన ప్రాతం లో స్టిఫ్ గా ఉండడం , అంటే కండరాలు బిగ బట్టి నట్టు టైట్ గా అనిపించడం , లేదా నొప్పి తిమ్మిరి గానూ , సూదులతో పోడిచినట్టు కూడా అనిపించ వచ్చు. ఈ నొప్పి వల్ల తల నొప్పి కూడా కలగ వచ్చు ! సాధారణం గా మన శరీరం లో ఉండే చాలా కండరాలు , కేవలం వాటిని ఉపయోగిస్తున్న సమయం లో మాత్రమే బిగుతు గా ఉండి , మిగతా సమయం లో రిలాక్స్ అవుతాయి. ఉదాహరణకు రెండు కిలోల బరువున్న సంచీని ఒక మైలు దూరం ఒక చేత్తో తీసుకు వెళితే , మనకు ఆ చేతి కండరాలు బిగుతు గా ఉన్న అనుభవం కలుగుతుంది కదా ! కానీ మనం ఉదయం లేచినప్పటి నుంచీ , పడుకునే సమయం వరకూ , మెడ లో  ఉన్న కండరాలు బిగుతు గా ఉండి , తలను నిటారు గా ఉంచుతాయి ! దానితో పాటుగా ,  సరి అయిన పొజిషన్ లో కూర్చోక పోవడమూ , లేదా మెడను మాత్రమే చాలా ముందు కు ఉంచి , ఎక్కువ సేపు పని చేస్తూ ఉండడమూ , లేదా కంప్యూటర్ ముందు తదేకం గా , విరామం లేకుండా గంటల తరబడి పని చేస్తూ ఉండడం వల్ల కూడా మెడ నొప్పి రావచ్చు. ఇక వాహన ప్రమాదాల సమయం లో కూడా మెడ నొప్పి కలగ వచ్చు. దీనిని విప్ ల్యాష్  ఇంజూరీ అంటారు !  ప్రమాద సమయాలలో శరీరం చాలా వేగం గా ముందుకూ , వెనుకకూ కదలడం వల్ల ఇట్లాంటి పరిస్థితి ఏర్పడుతుంది ! 
చాతీ లోని వెన్ను పూసల ద్వారా వచ్చే నొప్పి : ఈ నొప్పి సాధారణం గా వీపు మధ్య లో వస్తుంది. ఇట్లాంటి నొప్పి అరుదు గా వస్తుంది. ఎందుకంటే , ఈ ప్రదేశం లో ఉన్న వెన్ను పూస ఎముకలు , మెడ లో ఉన్న వెన్ను పూస ఎముకల తో పోలిస్తే , స్థిరం గా ఉంటాయి కనుక ! ఈ భాగం లో వచ్చే నొప్పికి సామాన్యం గా , సరి అయిన పొజిషన్ లో కూర్చోక పోవడం వల్ల కలుగుతుంది.  !  ( పై చిత్రం గమనించండి )
నడుము భాగం లో వెన్ను పూసల ద్వారా వచ్చే నొప్పి: దీనినే లోయర్ బ్యాకేక్ అని కూడా ఉంటారు. సాధారణం గా ఈ నొప్పి , ఛాతీ క్రింద నుంచి కాళ్ళు మొదలయే భాగం మధ్య లో వస్తుంది. ఈ నొప్పి  సామాన్యం గా  ఎక్కువ బరువులు ,  ఒక్క సారిగా ఎత్తడం వల్ల నూ , లేదా  ఒక్క సారిగా వంగడం వలనో , లేదా ఎక్కువ సమయం విరామం తీసుకో కుండా ఒకే పొజిషన్ లో కూర్చోడం వల్లనూ , డ్రైవింగ్ చేయడం వల్ల కూడా కలగ వచ్చు !  ( పై చిత్రం గమనించండి )
వచ్చే టపాలో ఇంకొన్ని సంగతులు !


వెనక నొప్పి కి కారణాలు ( బ్యాకేక్ ). 1.

In ప్ర.జ.లు., మన ఆరోగ్యం., Our Health on జూన్ 18, 2014 at 11:46 ఉద.

వెనక నొప్పి కి కారణాలు ( బ్యాకేక్ ). 1. 

( పైన ఉన్న చిత్రం లో, మానవులలో  వెన్నెముక ను కండరాలు లేకుండా చూపడం జరిగింది ) . 
సమస్య:  ప్రమోద్ ఓ  సాఫ్ ట్ వేర్ ఇంజనీర్. రజనీ తో ఒక అందమైన అపార్ట్ మెంట్ లో నివాసం. ఆఫీసు కు రోజూ రానూ పోనూ, తనకు ఇష్టమైన బజాజ్ పల్సార్ బైక్ మీద  నలభై మైళ్ళ ప్రయాణం. ఇంటి కి వచ్చాక, రజనీ ఒడి లో సేద తీర్చుకోవడం ! రోజంతా పడ్డ శ్రమ మర్చి పోవడం ! తరువాత రజనీ తో కిచెన్ లో వంట లో ప్రయోగాలు చేయడం , ఇద్దరూ కలిసి వండిన , వంటకాలు ఆస్వాదించడం , ఆ తరువాత , బెడ్ రూం లో ఇంకా కొత్త రుచులు ఆస్వాదించడం – ఇదీ ప్రమోద్ దిన చర్య !  కొంత కాలం అయ్యాక ప్రమోద్  కు వెన్ను నొప్పి మొదలైంది !  బాగా ఆరోగ్యం గా ఉండే ప్రమోద్ , తన వెన్ను నొప్పి తట్టుకోలేక పోతున్నాడు !  ఓ మాదిరి గా ఆఫీస్ లో పని చేయగలుగు తున్నా కూడా , ఇంటికి వచ్చాక , నొప్పి ఎక్కువ గా ఉంటుంది. బెడ్ రూం లో పడక మీద పూలు నలగడం లేదు ఈ మధ్య ! తనకు అనుకూలమైన పొజిషన్లో తిరిగి , ప్రమోద్ రజనీతో కేవలం నిద్ర మాత్రమే పోతున్నాడు !  రజనీ కి ప్రమోద్  మీద అనుమానం మొదలైంది !  ప్రమోద్ కు రజనీ తనను అనుమానిస్తుందని తెలిసింది ! ఈ సమస్యకు సమాధానం ఏమిటి ? 
మన దేహం  వెనక భాగాన వచ్చే నొప్పి కి అనేక కారణాలు ఉండ వచ్చు. ఆ నొప్పి అనేక రకాలు గానూ  ఉండ వచ్చు. మానవ పరిణామ రీత్యా చూస్తే , ఆది మానవులు మొదట గా నిటారు గా నిలబడ డమూ, నడవడమూ , పరిగెత్తడమూ చేయడం మొదలు పెట్టారు . అంటే,  నిటారు గా నిలబడడానికి వెన్నుపూస అంటే స్పైన్  ప్రాధాన్యం అంతా ఇంతా కాదు ! మనం ఇప్పుడు దేహానికి వెనుక భాగాన వచ్చే నొప్పి గురించి తెలుసుకుందాం ! 
అందుకు,  వెన్ను పూస ఎక్కడ నుంచి మొదలై ఎక్కడి వరకూ ఉంటుందో కూడా తెలుసుకోవాలి ! వెన్ను పూస మానవులలో, మెడ నుంచి మొదలై ,  కటి వలయం అంటే పెల్విస్ వరకూ ఉంటుంది ! సాధారణం గా మనం వెన్నెముక అని ఒకటే  ఎముక ఉంటుందని అనుకుంటాము  ( దీనినే స్పైన్  అని కూడా అంటాము ) కానీ , ఈ వెన్ను పూస లో ఎముకలు  మెడ భాగం లో ఏడు , ఛాతీ భాగం లో పన్నెండూ, నడుము భాగం లో అయిదూ  అంటాయి. అంటే మొత్తం ఇరవై నాలుగు ఉంటాయి. 
ఈ ఎముకలు, చేతులలోనూ కాళ్ళ లోనూ ఉండే ఎముకల లాగా పొడుగు గా ఉండక , గుండ్రం గా  ఉంటాయి , ఉదాహరణకు , అరటి కాయను కనుక  అడ్డంగా అయిదారు ముక్కలు గా  కొస్తే  వచ్చే ముక్కాల ఆకారం లో ఉంటాయి ! వీటిని వర్టిబ్రా  అని అంటారు ( వర్టిబ్రం  అంటే ఒక్క వెన్ను పూస ఎముక , వర్టిబ్రా  అంటే బహువచనం , అంటే , అనేక వెన్ను పూస ఎముకలు ) ఖచ్చితం గా చెప్పుకోవాలంటే ,  ఈ ఎముకలకు వెనుక భాగం లో  పైనా కిందా , రెండు వైపులా , కొక్కేల ఆకారాలు కూడా ఉంటాయి. అట్లాగే  ప్రతి వెన్ను పూసకూ , ఇంకో వెన్ను పూసకూ మధ్య,  డిస్క్ అనే భాగం ఉంటుంది ! 
మరి డిస్క్ ప్రాబ్లెమ్ ఎట్లా వస్తుంది ?
ప్రతి వెన్ను పూస ఎముక కూడా ఇంకో వెన్నుపూస ఎముక తో నేరు గా అమర్చ బడి ఉండదు. వాటి మధ్య డిస్క్  , లేదా  వర్టిబ్రల్ డిస్క్ అమర్చ బడి ఉంటుంది.
ఈ డిస్క్ ఉపయోగం ఏమిటి ? :
వర్టిబ్రల్  డిస్క్  ప్రధానం గా పైనా క్రిందా ఉన్న వెన్ను పూస ఎముకలను  త్వరగా అరిగి పోకుండా నివారిస్తుంది ! అంటే ఇక్కడ కేవలం  ఒక రోజో రెండు రోజులో కాకుండా , మానవులు జీవితాంతమూ ,  కదులుతూ ఉంటారు అనే విషయం మర్చి పోకూడదు !  డిస్క్ కనక లేకపోతే , వెన్ను పూస ఎముకలన్నీ అతి త్వరగా ‘ అరిగి ‘ పోతాయి 
డిస్క్ ప్రాబ్లం లో   వెన్ను పూసలు అరిగి పోవడం జరగదు కానీ , డిస్క్ ఉండ వలసిన చోట ఉండక , బయటకు వస్తుంది. ఈ బయటకు రావడం పది శాతం కానీ ఇరవై శాతం కానీ , లేదా ఇంకా ఎక్కువ గా కానీ ఉండవచ్చు !  స్థాన భ్రంశం చెందిన ఈ డిస్క్ వల్లనే  నొప్పి  కలగడం , కొన్ని ప్రత్యేక కదలికలు బాధ కలిగించడం  జరుగుతుంది !   
నాడులు ఎక్కడ ఉంటాయి ?  
నాడులు అంటే, మెదడు నుంచి  మన దేహం లో  అన్ని భాగాలకూ విస్తరించిన  తంత్రులు . వీటి ద్వారానే మనకు, స్పర్శా , నొప్పీ , తెలియడం జరుగుతుంది ! ఈ నాడులు  మొదట మెదడు నుంచి బయటకు వచ్చే సమయం లో  మందమైన తాళ్ళ లాగానూ , పోను పోను , చిన్న తంత్రుల లాగానూ , విస్తరించి ఉంటాయి ! ఈ నాడులను మరి జాగ్రత్తగా దేహం చూసుకోవడానికి  వెన్ను పూసలో ఉంగరం లాంటి ఒక నిర్మాణం ఉంటుంది , ప్రతి వర్టిబ్రా లోనూ , ఒక పది ఉంగరాలను ఒక దాని మీద ఒకటి ఉంచి తే ఒక గొట్టం లాంటి నిర్మాణం ఏర్పడుతుంది కదా ! ఆ గొట్టం లోనుంచి  మందమైన నాడులు వస్తాయి !మరి ఒకటే దృఢమైన ఎముకలతో నిర్మితమైన ఒక్క గొట్టం లాంటి నిర్మాణం ఉండ వచ్చు కదా !
ఇన్ని వెన్నుపూసలు ఎందుకు మానవులకు ? 
అంటే , అదే సృష్టి వైచిత్ర్యం !  గొట్టం లాగా ఒకటే నిర్మాణం ఉంటే , మానవులు కేవలం రోబోట్ల లాగా నే కదల గలుగుతారు అంటే వంగడమూ , పక్కకు తిరగడమూ  లాంటి కదలికలు చేయ లేరు కదా ! అట్లాంటి కదలికలకు అనుకూలం గానే , వెన్ను పూసలు ఒక గొట్టం లాగా కాకుండా , ఒక దాని మీద ఒకటి అమర్చ బడి ఉంటాయి ! 
అంతే కాదు ! మనం పైన చెప్పుకున్నట్టు గా , మెదడు నుంచి బయలు దేరిన నాడీ తంత్రులు ప్రతి రెండు వెన్నెముకల మధ్య నుండి , ఇరు ప్రక్కలా శాఖలు గా విస్తరిస్తాయి !  వాటికి అవసరమైన రక్త నాళాలు కూడా ! వెన్ను నొప్పి , మెడ లో కానీ , వీపు లో కానీ , నడుము లో కానీ రావచ్చు !  నడుము నొప్పి ని సామాన్యం గా సయాటికా అని అంటూ ఉంటాం కదా !
 వచ్చే టపాలో ఇంకొన్ని సంగతులు ! 


కీళ్ళ నొప్పులు . 1. చిన్న పిల్లల్లో వస్తే ?

In ప్ర.జ.లు., మన ఆరోగ్యం., Our Health on జూన్ 2, 2014 at 8:31 సా.

కీళ్ళ నొప్పులు . 1. చిన్న పిల్లల్లో  వస్తే ?

 

కీళ్ళ నొప్పులు, మానవులు అనుభవించే  సామాన్య లక్షణం. సాధారణం గా, కీళ్ళ నొప్పులు, ఒక వయసు దాటిన తరువాత  అనే నాల్గో దశకం లో కానీ, ఐదో దశకం లో కానీ మొదలవుతాయి ! కానీ  కొన్ని సందర్భాలలో కీళ్ళ నొప్పులు , చిన్న వయసు లోనే , బాల బాలికలకు అనుభవం  అవ వచ్చు !  పెద్ద వారికి వచ్చే కీళ్ళ నొప్పుల గురించి తెలుసుకునే ముందు , చిన్నారుల కు వచ్చే కీళ్ళ నొప్పుల గురించి తెలుసుకోవడం మంచిదీ , ముఖ్యమూ కూడా నూ ! 
మరి చిన్న పిల్లలలో కీళ్ళ నొప్పుల లక్షణాలు ఎట్లా ఉంటాయి ?
సామాన్యం గా మోకాళ్ళు కానీ , మోచేతులు కానీ నొప్పి కలగ వచ్చు ! నొప్పితో పాటుగా , ఆ కీళ్ళు వాయడం ,  లేదా ఎర్ర బడడం గమనించ  వచ్చు ! చర్మం తెలుపు రంగు కాక పొతే , ఈ ఎర్ర బడడం కనబడదు ! అప్పుడు ఇంకా ఎక్కువ జాగ్రత్త తో పరిశీలించాలి, వారి కీళ్ళను , ప్రత్యేకించి తల్లి దండ్రులు ! ఎందుకంటే , వారికి వారి సంతానం గురించి ఎక్కువ గా తెలుసు కనుక ! నొప్పి సామాన్యం గా ఆడుకునే సమయాలలో ఉండక పోవచ్చు ! ప్రత్యేకించి , ఆరంభ దశ లో !  పిల్లలు కనుక  ఆటల ధ్యాస లో పడితే , వారికి అంతగా నొప్పి అనిపించక పోవచ్చు , కానీ రాత్రి సమయాలలో పడుకుని ఉన్నపుడు వారికి నొప్పి కలగడమూ , లేదా ఉదయం లేచినప్పుడు నొప్పి గా ఉండడం జరగ వచ్చు ! అట్లాంటి నొప్పిని , ఏదో ఆటలో ఆ కీలు బెణికి ఉంటుందేమో అని అశ్రద్ధ చేస్తే , ఆ నొప్పి తగ్గక పోగా , పిల్లలు ఆ కీలు కదిలించడం కష్టం గా ఉండి , బాధ  పడుతూ ఉండడం జరుగుతుంది ! 
కొన్ని సందర్భాలలో , ఇట్లా కీళ్ళ నొప్పులతో పాటుగా , పిల్లలకు  చర్మం మీద కొద్దిగా మచ్చలు కూడా ఏర్పడ వచ్చు ! అంతే కాకుండా,  వారికి జ్వరం వచ్చి ఒళ్ళు వెచ్చ బడుతూ ఉండడం , జ్వరం తో పాటు , నీరసమూ , బలహీనతా , ఆటలలో ఉత్సాహం తగ్గి పోవడమూ , ఆకలి తగ్గిపోవడమూ కూడా తల్లి దండ్రులు గమనించ వచ్చు ! గొంతు వాపు , గొంతు నొప్పి ,  ప్రత్యేకించి , పానీయాలు తాగుతున్నప్పుడూ , ఆహారం తింటున్నప్పుడూ. కొన్ని సందర్భాలలో , కేవలం ఒకటో రెండో పెద్ద కీళ్ళ లో కాకుండా , చేతులూ కాళ్ళూ , వాటి కీళ్ళు అంటే జాయింట్ లు  చాలా  వాటిలో నొప్పులు కలగ వచ్చు ! 
చిన్న పిల్లల్లో కీళ్ళ నొప్పులు వస్తే  ఏమవుతుంది ? 
చిన్న పిల్లలో కీళ్ళ నొప్పి లక్షణాలను ఏమాత్రం అశ్రద్ధ చేయకూడదు ! కేవలం బెణుకు అయి ఉంటుందని  తీసి పారేయకుండా,  శ్రద్ధ తో , ఆ నొప్పి లక్షణాలను తల్లి దండ్రులు గమనించడమే కాకుండా , మిగతా లక్షణాలను కూడా ఓపికతో కనుక్కోవాలి ! చిన్న పిల్లలలో కీళ్ళ నొప్పులు  సామాన్యం గా ఇన్ఫెక్షన్  కు సంకేతం ! అంటే శరీరం లో ఇన్ఫెక్షన్ వ్యాపిస్తే , కీళ్ళ నొప్పులు లక్షణాలు గా కనిపించ వచ్చు !  ఒకటో రెండో కీళ్ళ లో ఆ ఇన్ఫెక్షన్ ఎక్కువ గా ఉండి , బాధ కలిగించ వచ్చు ! రుమాటిక్ ఫీవర్ అనే  జబ్బు లో కీళ్ళ వాపు లక్షణాలతో , జ్వరం కూడా ఉండి ,  ఆ లక్షణాలను అశ్రద్ధ చేస్తే ,  ఆ వచ్చిన ఇన్ఫెక్షన్ గుండె కు కూడా పాక వచ్చు ! అంటే స్ప్రెడ్ అవడం ! 
మరి ఏమి చేస్తే ఉత్తమం ? 
చిన్న పిల్లలలో ఇట్లా కనిపించే , కీళ్ళ వ్యాధి లక్షణాలను ఎంత మాత్రమూ అశ్రద్ధ చేయకూడదు ! వెంటనే పిల్లల డాక్టర్ లేదా పెడియా ట్రిస్ట్  కు చూపించాలి !  మూఢ నమ్మకాలకు చిన్న పిల్లలను  లక్ష్యం గా చేయ కూడదు !  ఇప్పటికీ కొన్ని ప్రాంతాలలో , చిన్న పిల్లలలో కీళ్ళు వాయడం గమనించిన తల్లి దండ్రులు  ఆ కీలు కు  నానా రకాలైన ఆకులు  కట్టు కట్టడం , పూజలు చేయించడం చేస్తూ ఉంటారు !  ఇది ఎంత మాత్రమూ తగదు ! ఎందుకంటే  లక్షణాలు కనిపించిన తరువాతి ఒకటి రెండు వారాలలో సరి అయిన చికిత్స జరపక పొతే , ఇన్ఫెక్షన్ మిగతా శరీరానికి పాకుతుంది అంటే గుండె కు కూడా ! 
చికిత్స ఏమిటి ? 
వ్యాధి నిర్ధారణ కు అవసరమయే పరీక్షలు జరిపాక , చికిత్స జరుగుతుంది ! నొప్పి నివారణ కు మందులతో పాటుగా ,  శక్తి వంతమైన యాంటీ బయాటిక్స్ అవసరం అవుతాయి !  ఇవన్నీ నిపుణు లైన వైద్యులతో  లక్షణాల తొలి దశ లోనే చేయించుకోవడం ఉత్తమం ! 
వచ్చే టపాలో ఇంకొన్ని సంగతులు !