Our Health

Posts Tagged ‘Our Health’


పొగాకు కు ఋణం – ప్రాణం పణం. 12. స్మోకింగ్ ఆపిన తరువాత జాగ్రత్తలు :

In Our Health on ఫిబ్రవరి 21, 2012 at 11:24 ఉద.
పొగాకు కు ఋణం – ప్రాణం పణం. 12.  స్మోకింగ్ ఆపిన తరువాత జాగ్రత్తలు :
మనం లక్ష్య నిర్దేశనం లో ‘ SMART ‘ లోని  ‘ R ‘ మరియూ ‘ T ‘ గురించి కొంత  తెలుసుకుని, స్మోకింగ్ ఆపాక తీసుకోవలసిన జాగ్రత్తలు కూడా చూద్దాము.
‘ R ‘  అంటే రియలిస్టిక్  లేక  యదార్ధం గా లక్ష్యం ఉండాలి.  అంటే బాగా ఎక్కువ గా రోజూ  ‘ 40 ‘ నుంచి ‘ 60 ‘ సిగరెట్టులు  పీల్చే వాళ్ళు ఒక్క సారిగా మానేద్దామని నిర్ణయించు కోవడం ఒక సాహసమే.అట్లాంటి పరిస్థితులలో , ఒక నిర్ణీత కాలం లో ఖచ్చితంగా తగ్గించుకుంటూ వచ్చి , పూర్తిగా మానేయటానికి నిశ్చయించుకుంటే మంచిది. మీరు ఇక్కడ కూడా మరచి పోకూడనిది, మీకు  ఏదీ అసంభవం కాదని,
ఇక ‘ T ‘ అంటే  ఒక స్పష్టమైన సమయం మీకు మీరే నిర్దేశించుకోవడం, మీ లక్ష్యాన్ని చేరుకోవడానికి.
ఇప్పుడు మీరు స్మోకింగ్ మానేశారనుకుని ఈక్రింద సూచించిన జాగ్రత్తలు గమనించి ఆచరిస్తారనుకుంటాను.
పొగాకు  మానేసిన తరువాతి రెండు మూడు రోజులు,  మీరు వీలైనంత ఎక్కువ సమయం, పొగాకు తాగకూడని , అంటే పొగాకు పీల్చటం నిషేధించిన బహిరంగ ప్రదేశాలలో గడపడం మంచిది. అంటే అవి గ్రంధాలయాలే కావచ్చు, ఆలయాలే కావచ్చు, సూపర్ మార్కెట్లే కావచ్చు.
మీకు ఇష్టమైన ఏ ప్రదేశం అయినా కావచ్చు. ఇక్కడ మీరు చేస్తున్నది, ఇంతకు ముందు పొగాకు పీల్చే వాతావరణం నుంచి బయట పడటం.
మీరు శీతల పానీయాలు, నీరు , తగినంత తాగుతూ ఉండి   మీ దేహం లో తగినంత నీరు ఎప్పుడు ఉండేట్లు జాగ్రత్త తీసుకోవాలి. టీలు , కాఫీలు ఎంత తగ్గిస్తే అంత మంచిది కారణం : పొగాకు మానేసిన మొదటి రోజుల్లో మీకు ఆందోళన అధికంగా ఉండి , స్వేదం అంటే చెమట ఎక్కువ పట్టవచ్చు , మీరు ఉండే వాతావరణం ఉష్ణ ప్రదేశం అయినా , లేక వేసవి లో పొగ తాగటం మానేసినా , త్వరగా ‘ dehydrate ‘ అయ్యే అవకాశం ఉంది.
మీ ఆహారాన్ని రెండు మూడు సార్లు ఎక్కువగా తినే బదులు నాలుకు ఐదు సార్లు తక్కువ ఆహారం రుచికరమైనది తినడం చేస్తూ ఉండండి.
మీకు బాగా అలవాటైన సిగరెట్టు మీ కోన వేళ్ళ మధ్య , మీ పెదవుల మధ్య లేకపోయినందుకు మీకు ఏదో వెలితి గా అనిపిస్తూంటుంది.  ఈ ఫీలింగ్స్ ను అధిగమించడానికి మీరు మీ చేతులలో ఏ పెన్నో , పెంసిలో  మీకు ఇష్టమైన దేవుడి లాకెట్ , ఉంచుకుంటే మంచిది.
అలాగే నోట్లో ఒక లవంగమో, యాలకులో , సిన్నామన్ చెక్క అంటే దాల్చిన చెక్క , పెట్టుకుంటే బాగా ఉపయోగంగా ఉంటుంది,  మీరు సిగరెట్టు ను కోల్పోయామనే  అనుభూతి అదృశ్యం అవడానికి.
ప్రలోభాలకు లొంగి పోకండి. అంటే , ‘ పొగ తాగే ప్రదేశాలను ఒకసారి చూసి వద్దాము , చాలా బోరు గా ఉంది , అనుకోవడమో, లేక నా ఆప్త మిత్రులను కలుసుకోవాలనుంది, వారు స్మోకింగ్ చేస్తున్నా సరే ‘ అనుకోని , మళ్ళీ ఆ వాతావరణంలోకి వెళ్లి , మీ నిర్ణయాన్ని మార్చుకోకండి.
అలాగే మీ అభిమాన నటుడు  అలవోకగా సిగరెట్టు పీలుస్తూ , అత్యంత విలాసవంతమైన కారు నడుపుతూ, ఇరవై మందిని ఒక్క సారే తన్నేస్తూ ఉంటే, చలించి పోయి మీరు అలా అనుకరిద్దామనుకోకండి. అవన్నీ కేవలం పబ్లిసిటీ స్టంట్లు. ఎందుకంటే  సిగరెట్టు కు లింగ భేదం, భాష భేదం, వయో భేదం,  పేద – గొప్ప భేదం , ఇవన్నీ ఉండవు కదా !! అది చేసే హాని దాన్ని వెలిగించి పీలుస్తున్నంత సేపు నిరాటంకంగా చేసుకుంటూ పోతుంది ఎవరైనా సరే  !!!. ప్రకటనల ప్రలోభానికి మీ జీవితాన్ని పణం గా పెట్టకండి.  మీ జీవితం విలువ ప్రకటన దారులకు ఏమి తెలుసు ?!!.
ప్రతి రోజూ మీ కృత నిశ్చయాన్ని మననం చేసుకోండి. సిగరెట్టు పీలుద్దామని అనిపించినప్పుడల్లా, మానెయ్యడం గురించి మీరు ఎంతగా అలోచించి, మీ జీవితం లో ఈ నిర్ణయం ఎంత ప్రదానమైనదో, ఆ నిర్ణయం ఎన్ని లాభాలకు మూలమో  గుర్తు తెచ్చుకోండి.
( సిగరెట్టు తాగని ) తోబుట్టువులతోను, బంధువులతోనూ సమయం గడపటానికి ప్రయత్నించండి.
మీరు ముఖ్యంగా గుర్తుంచుకోవలసినది,  పొగ తాగటం మానేస్తే వచ్చే సైడ్ ఎఫెక్ట్ లు ఎక్కువ రోజులు ఉండవు అని.
మిమ్మల్ని మీరు అభినందిన్చుకోండి , రోజూ మీరు మీ నిర్ణయానికి కట్టు బడి ఉంటూ. వ్యాయామం క్రమంగా చేస్తూ ఆరోగ్యాన్ని అనుభవించడం మొదలు పెట్టండి. క్రితం వరకూ ఒక  ఫర్లాంగు కూడా ఆయాసం లేకుండా నడవలేని వారు , క్రమం గా ఎక్కువ ఎక్కువ దూరాలు నడవ గలుగుతారు ఏ ఆయాసం లేకుండా !!
రిలాక్స్ అవుతూ ఉండండి రోజూ, అంటే మానసికంగా నూ , భౌతికంగానూ , ఇందుకు మీరు మీకు ఇష్టమైన ఏ పద్ధతులు అనుసరించినా పరవాలేదు, లక్ష్యం రిలాక్స్ అవటం!!!
వచ్చే టపా లో మరికొన్ని వివరాలు చదవండి !!


పొగాకు కు ఋణం – ప్రాణం పణం. 11. ‘ SMART’ వివరణ:

In Our Health on ఫిబ్రవరి 20, 2012 at 9:22 సా.
పొగాకు కు ఋణం – ప్రాణం పణం. 11.  ‘ SMART’ వివరణ:
మనం క్రితం టపా లో  ‘ SMART ‘ లో మొదటి అక్షరం అయిన  ‘ స్పష్టత ‘ అంటే ఏమిటో చూసాము.
ఇప్పుడు ‘ M ‘ అంటే కొలవ తగిన లక్ష్యాలు  పొగాకు మానటం లో ఏమి ఉంటాయో చూద్దాము.
ఇవి పలు రకాలు గా ఉండ వచ్చు పొగాకు మానే వారి ఆలోచనలను బట్టి.
ఈ లక్ష్యం  ఎంత కాలం లో మీరు అధిగమించుదామని అనుకుంటున్నారు,  సంపూర్ణంగా  మానేద్దామని అనుకుంటున్నారా లేక పాక్షికంగా నా ? , పాక్షికమైతే  ఎన్ని సిగరెట్టులు తగ్గిద్దామని అనుకుంటున్నారు ?
ఈ విధంగా మీ లక్ష్యాన్ని  కొలవవచ్చు.
క్రితం టపాలలో తెలిపినట్లు, పొగ తాగటం మానేద్దామనే మీ లక్ష్యం ఎంత తక్కువ కాలం లో ఎంత సంపూర్ణంగా  అధిగమిస్తే అంత మంచిది కదా మీకు.
సాధారణంగా ఈ సమయాలు,  సంపూర్నాలూ, పాక్షికాలూ , ఇవన్నీ , సందిగ్ధావస్థ లో ఉన్న వారికి వర్తిస్తూంది.
సావధానం గా ఆలోచించి ధైర్యంగా పొగాకు మానేసే నిర్ణయం తీసుకున్న వారెవరూ నిరాశ చెందరు సరి కదా ,  మంచి ఫలితాలను త్వరగా అనుభవిస్తారు.
ఇక  ‘ A ‘ అంటే  సాధించ తగ్గ లక్ష్యం.  పొగాకు మానేయటం అనేది సంపూర్ణంగా సాధించ తగ్గ లక్ష్యమే కదా.  ఇక్కడ మానవ శక్తి మననం చేసుకోవాలి.
ఏది సాధించలేదు మానవులు ?!! ప్రతి మానవుడి లో నిద్రాణమైన శక్తులు ఉంటాయి. వాటిని వెలికి తీయటం లో కృత క్రుత్యుడైతే  ఎంతో సాధించ గలుగుతాడు.
అనుకున్నది  సాధిస్తారు. ‘ అనుకున్నది ‘ అంటే ఒక స్పష్టమైన లక్ష్యం. పొగాకు మానటం అనే లక్ష్యం కొద్ది గా కష్టం కావచ్చు కానీ అసాధ్యం మటుకు ఎంత మాత్రం కాదు. ఇది ఎవరికైనా వర్తిస్తూంది.
‘ ఒకసారి అలవాటైతే మానటం సాధ్య పడదు’ అనే వాక్యం కేవలం ఒక అపోహ మాత్రమే !!!
వచ్చే టపాలో మిగతా వివరాలు చూద్దాము !


పొగాకు కు ఋణం – ప్రాణం పణం . 10 . లక్ష్య నిర్దేశనం ( ‘ GOAL SETTING ‘ ) ఎట్లా చేసుకోవాలి ?

In Our Health on ఫిబ్రవరి 19, 2012 at 12:30 సా.

పొగాకు కు ఋణం – ప్రాణం పణం . 10 . లక్ష్య నిర్దేశనం (  ‘ GOAL SETTING ‘  ) ఎట్లా చేసుకోవాలి  ?

క్రితం టపాలో చూసినట్లు ,  మీ జీవితం ఎంత విలువైనదో గ్రహించాక,  మీరు  పొగాకు మానాలనే ఖచ్చితమైన నిర్ణయాన్ని తీసుకుంటే , 
ఇక మీ లక్ష్య నిర్దేశనం వైపు  అంటే గోల్ సెట్టింగ్  పై కేంద్రీకరించాలి మీరు.
ఏ లక్ష్యం అయినా  మీరు ‘ స్మార్ట్ ‘ గా  సాధించాలి. అంటే  మీరు ‘ SMART ‘ అనే ఆంగ్ల పదం గుర్తు పెట్టుకోండి.
పైన చిత్రం లో చూపినట్లు ,  ‘ S ‘ అంటే ‘ Specific ‘ అంటే ‘  స్పష్టమైన’ , ‘ M ‘ అంటే ‘ Measurable ‘ అంటే  కొలవ తగినవి గా, ‘ A’ అంటే  ‘ ‘ ‘ Achievable or Attainable ‘  అంటే మీరు సాధించ గలిగినవిగా ,  ‘ R ‘ అంటే ‘ Realistic ‘ అంటే  ‘ యదార్ధం’ గా , మరియూ   ‘ T ‘ అంటే ‘ Time bound ‘ అంటే  నిర్ణీత కాల వ్యవధి లో మీ లక్ష్యం సాధించడం.
పొగాకు మానేయడం లో మీరు మీ లక్ష్య నిర్దేశనం, స్మార్ట్ ( SMART )గా ఎలా చెయ్యాలో వివరిస్తాను.
1. Specific ( స్పష్టత ) : అంటే మీరు పొగాకు గురించి మీరు తీసుకునే నిర్ణయం స్పష్టం గా ఉండాలి.  అంటే మీరు  ‘ నాకు పొగాకు తాగితే కలిగే నష్టాలు తెలుసు కానీ చాలా మంది పొగ తాగు తున్నారు కదా , చూద్దాము ఏమవుతుందో,  లేక కొన్ని రోజులు మానేసి చూస్తాను, లేక ‘ మానేసి ఉండలేనేమో  అని  అనుకుంటూ  ఊగిస లాడకూడదు. ఇలా చేయడం మీ లక్ష్య నిర్దేశనం లో స్పష్టత లోపించడం వల్లనే !!
ఇట్లా స్పష్టత లోపించటం,  గమ్యం తెలియకుండా ప్రయాణం చేస్తూన్న విధం గా ఉంటుంది.
మీకు మునుపటి టపాలు అన్నీ పొగాకు విషయం లో మీకు మంచి అవగాహన ఏర్పడి,  తద్వారా మీ లక్ష్య నిర్దేశనం లో స్పష్టత ఏర్పడటం కోసమే కదా !!!
మిగతా వివరాలు తరువాతి టపాలో చూడండి !




పొగాకు కు ఋణం – ప్రాణం పణం. 9. స్మోకింగ్ మానే పధకం ఎట్లా వేసుకోవాలి ?

In Our Health on ఫిబ్రవరి 18, 2012 at 6:36 సా.

పొగాకు కు ఋణం – ప్రాణం పణం. 9. స్మోకింగ్ మానే పధకం ఎట్లా వేసుకోవాలి ? 

మీరు మిమ్మల్ని ప్రేమించండి : ‘ love yourselves’ :
సాధారణం గా  యువత లో  ఆత్మవిశ్వాసం ఎక్కువ గా ఉంటుంది.  కానీ  అనేక కారణాల వల్ల,  బాల్యం లో నూ, యవ్వనం లోనూ, ఎక్కడో  మనసులో ఆత్మ న్యూనతా భావాలు (  పైకి కనిపించక పోయినా ) ఉండ వచ్చు. ఈ ఆత్మన్యూనత  వ్యక్తిత్వ వికాసానికి అవరోధం కావచ్చు. ఈ  రకమైన ‘ బలహీనత ‘ లను కప్పిపుచ్చు కోవడానికి  ఏదో ఒక దురలవాటు చేసుకుంటాము.  ఆ సమయం లో, ఆ వయసులో మనం కారణాలు అన్వేషించే స్థితి లో ఉండము.  ఫలితం గా బయటికి చక్కగా బట్టలు వేసుకుని, ఆకర్షణీయంగా కనిపిస్తూ ఉన్నా   ‘ అంతరంగ మధనం ‘ అశ్రద్ధ’  చేస్తూ ఉంటాము మనము,  తరచూ.
ముందు గా చేయవలసినది: మీ జీవితం ఎంత విలువైనదో గ్రహించడం. విషాదకర గత స్మృతులు ఏవైనా ఉన్నా , ముందుకు సాగాలనే కృత నిశ్చయం తో  మీ ఆరోగ్యానికి  అత్యంత ప్రాధాన్యత ఇవ్వాలి. మీ జీవితం ఎంత విలువైనదో మీకు స్పష్టంగా తెలియాలి.  వేల మైళ్ళ దూరం లో ఉండి, దశాబ్దాల తరబడి  పొగాకు దుష్ప్రబావాల పరిశోధనలలో తేలిన నిజాలను తొక్కి పట్టి , రోజూ కోట్ల కొద్దీ నికర లాభాలను ఆర్జిస్తూన్న  పొగాకు కంపనీలకు  మీ జీవితం విలువ ఎందుకు తెలియాలి , మీకే తెలియనప్పుడు ??? !!! లేక మీ దగ్గరలో ఉన్న కిళ్ళీ కొట్టు వాడికి ఎందుకు మీ జీవితం విలువ ??? !!!
పొగాకు పీల్చి  ఆయు క్షీణం అవుతున్నప్పుడు ఒక్క రోజు కూడా వారు మన జీవితాన్ని పోడిగించ లేరు  కదా వాళ్ళు !!! ???
మీరు ఈ విశాల ప్రపంచం లో  ఒకే ఒక్కరు. రెండో ‘ మీరు ‘ ఉండరు. మీకు ఒకటే జీవితం !!.  మీరు స్మోకింగ్ చేస్తూ ఉంటే , మీ గతం ఆనంద దాయకం కాక పోగా , పొగాకు దుష్ప్రభావాల వల్ల భవిష్యత్తు మాత్రం ఖచ్చితంగా  కష్టాల కడలి అవుతుంది మీకు !!.   ఇది   పరిశోధనల వల్ల తేలిన యదార్ధం  !!!
మీరు కొంత సమయం కేటాయించి , సావధానంగా  ఒక కాగితం మీద పొగాకు ( సిగరెట్టు ) తాగటం వల్ల  మీకు కలిగే నష్టాలు ఏమిటి?  మానేస్తే లాభాలు ఏమిటి అని  నోటు చేసుకోండి, సవివరంగా.
ఇలా చేయటానికి ఒక వారం పట్టినా నిరుత్సాహ పడవద్దు. మీకు ఖచ్చితమైన అవగాహన ఏర్పడాలి  స్మోకింగ్ వల్ల లాభ నష్టాల గురించి. ( అవసరమైతే  ‘  బాగు డాట్ నెట్ ‘  ను పలు సార్లు చూడండి , ‘ browse ‘ చేయండి. ఎందుకంటే దాని లక్ష్యం అదే కదా !! )
వర్తమానం లో,  అంటే ఇప్పుడు మీరు ఒక వారం పది రోజులలో   స్మోకింగ్ మానెయ్యాలని    తీసుకున్న నిర్ణయానికి , మీ కృత నిశ్చయం కూడా తోడు అవుతే , కనీసం పది పదిహేనేళ్ళ ఎక్కువ  ఆయుష్షు  ను ప్రసాదించు కున్నట్లే కదా మీ అమూల్యమైన జీవితానికి  !!
అందువల్ల త్వరగా నిర్ణయం తీసుకోలేక పోతున్నామని నిరుత్సాహ పడవద్దు. నిర్ణయాన్ని తీసుకున్నాక మార్చుకోవద్దు !!!
వచ్చే టపా లో లక్ష్య నిర్దేశనం గురించి చదవండి !!!


పొగాకుకు ఋణం – ప్రాణం పణం. 8. స్మోకింగ్ ఎట్లా మానాలి ?

In Our Health on ఫిబ్రవరి 17, 2012 at 8:00 సా.
పొగాకుకు  ఋణం – ప్రాణం పణం. 8. స్మోకింగ్  ఎట్లా మానాలి ?
గత  ఏడు  ( 7 ) టపాలలో పొగాకు వల్ల కలిగే హాని వివరం గా  పొందు పరచడం జరిగింది.
ఈ  టపా ల తో  ఇప్పటి వరకూ పొగ తాగని వారు , ఇక ముందు కూడా తాగక పొతే వారి ఆరోగ్యానికి ఎంత మంచిదో తెలిసింది కదా !!
ఇక పొగాకు తాగే వారు, ఆ అలవాటు మానుదామనుకుంటే  ఈ క్రింది విషయాలు శ్రద్ధ తో  చదవటం మంచిది.
పొగ తాగటం మానుదామనుకుని తీసుకునే నిర్ణయానికి  ప్రధానం గా కావలసినది  మీ  ‘ కృత  నిశ్చయం ‘ 
( అంటే ‘ determination ‘ ).
కృత నిశ్చయం ఉన్న వారు ఎవరైనా పొగాకు విజయ వంతంగా మానగలరు. అది అసంభవం కాదు.
ఇంతకు ముందు చేసిన ప్రయత్నాలు ఫలించక పోయినా బాధ పడనవసరం లేదు. నిరుత్సాహ పడనవసరం లేదు.
పొగాకు తాగటం మానిన వెంటనే కలిగే లక్షణాలు ముందే మీరు తెలుసుకుంటే తగు విధంగా మీరు మానసికంగా  సన్నద్దులవ గలరు మీరు.
పొగాకు మానిన వెంటనే మీలో ఈ మార్పులు  గమనించండి:
1. పొగాకు వెంటనే పీల్చాలనే తీవ్రమైన కోరిక ( దీనినే ‘ intense craving ‘ అంటారు ) కలుగుతుంది.
2. ఆందోళనా, అసహనమూ, మానసిక వత్తిడి ( అంటే టెన్షన్  ) కలగటం.
3. సుఖ నిద్ర కోల్పో వడమూ,  చెడ్డ  కలలు  రావడము,       ఏ పని మీదా ఏకాగ్రత కోల్పోవడమూ.
4. ఆకలి ఎక్కువ అవడము, బరువు పెరగడమూ.
5. చీటికి మాటికీ చికాకు పడడము,  క్రుంగి పోవడమూ కూడా జరుగ వచ్చు ( అంటే డిప్రెషన్ ).
పైన చెప్పిన లక్షణాలు అన్నీ  మానేసిన వారందరిలోనూ కనపడక పోవచ్చును. ఈ లక్షణాల తీవ్రత, ఎన్ని సిగరెట్టులు, ఎంతకాలం నుంచి పీలుస్తున్నారనే విషయాల పైన ఆధార పడి ఉంటుంది.
ఉదాహరణకు  ఒక ఐదు సంవత్సరాలనుంచి  రోజూ ఒక పది సిగరెట్టులు పీల్చే వారు,  పది సంవత్సరాల నుంచి ఇరవై సిగరెట్టు లు పీల్చే వారికన్నా తక్కువ తీవ్రత తో ఈ లక్షణాలు అనుభవిస్తారు.
కానీ మీద ‘  పిడుగులు పడ్డా మీ నిర్ణయం మార్చు కోకూడదనే ‘    కృత నిశ్చయం   తో ఉంటే మీరు  తప్పక సఫలురవుతారు  మీ ఈ ప్రయత్నం లో !!! విజయీభవ !!!
వచ్చే టపాలో మరి కొన్ని  ‘ చిట్కా లు ‘  చదవండి.


పొగాకు కు ఋణం – ప్రాణం పణం . 7. సెకండ్ హ్యాండ్ స్మోక్ ‘ SHS ‘ గురించి అందరూ ఎందుకు తెలుసుకోవాలి?

In Our Health on ఫిబ్రవరి 16, 2012 at 7:44 సా.
పొగాకు కు ఋణం – ప్రాణం పణం  . 7. సెకండ్ హ్యాండ్ స్మోక్ ‘ SHS ‘  గురించి అందరూ  ఎందుకు తెలుసుకోవాలి?
సెకండ్ హ్యాండ్ స్మోక్  ( SHS ) రెండు రకాలు:
మొదటి రకం: మన చుట్టూ ఉన్నవారెవరైనా పొగాకు పీలుస్తున్నప్పుడు  ఆ పొగను  మనం కూడా పీల్చడం. ( అంటే మనము సిగరెట్టు వెలిగించ కుండా ) ( దీనిని ‘  side stream smoke ‘ అంటారు ).ఇట్లాంటి పొగ ఎక్కువ ప్రమాదకరమైనది. ఎందుకంటే ఈ పొగ నేరు గా సిగరెట్టు నుంచి వస్తూంది కదా, మనం వెలిగించక పోయినా !!.
రెండో రకం: మన చుట్టూ పొగాకు పీల్చేవారు పీలుస్తూ ఒదిలేసిన పొగను మనం పీల్చడం ( దీనిని  ‘ main stream smoke ‘ అంటారు ).
ఈ రెండు రకాల పొగాకు పొగ కూ,   పొగాకు ‘ తాగని వారు ‘ ఎంత ఎక్కువ కాలం  ఎక్స్పోజ్  ‘ expose ‘ అవుతే అంత  ఆ పొగ చేసే హాని మనలో !!. అంటే మనం ప్యాస్సివ్ స్మోకర్స్ ‘ passive smokers ‘ లేక అనియంత్రిత స్మోకర్స్  లేక ‘ involuntary smokers ‘ అవుతాము అన్న మాట !!
కొన్ని పరిశోధనల వల్ల  చిన్న పిల్లలలో వచ్చే కొన్ని రకాల రక్త క్యాన్సర్ ల కూ ,  వారు పీల్చే సెకండ్ హ్యాండ్ స్మోక్ కూ సంబంధం ఉందని తేలింది. అట్లాగే స్త్రీలలో వచ్చే స్థన క్యాన్సర్ కూ ( అంటే ‘ breast cancer  ‘ కు ) ఈ సెకండ్ హ్యాండ్ స్మోక్ కూ సంబంధం ఉందని తెలిసింది.
ఇవి కాక పొగాకు పీల్చేవారిలో వచ్చే క్యాన్సర్లు అన్నీ కూడా వారి పక్క న ఉండి పైన చెప్పిన రెండు రకాల పొగలనూ పీల్చే వారిలో వస్తాయని ఖచ్చితంగా పరిశోధనల వల్ల తేలింది.
అభివృద్ధి చెందిన దేశమైన అమెరికా లో కేవలం పొగాకు ‘ తాగే ‘ వారి చుట్టూ ఉన్న ‘ 46,00 ‘ మంది అంటే అక్షరాలా  నలభై ఆరు వేల మంది   ‘   ఈ సెకండ్ హ్యాండ్ స్మోక్ ‘  వల్ల  ప్రాణాలు కోల్పోతున్నారు,
ప్రతి సంవత్సరమూ !!. అందులో  ‘ 3,400 ‘ మంది అంటే మూడు వేల నాలుగు వందల మంది  ఊపిరి తిత్తుల క్యాన్సర్ వల్ల ప్రాణాలు కోల్పోతున్నారు కేవలం పొగ పీల్చే వారి చుట్టూ ఉన్న పాపానికి !!!
చిన్న పిల్లలో న్యుమోనియాలూ ,  ఆస్థ్మా జబ్బులు కూడా ఎక్కువ గా వస్తూండ డానికి కూడా  ‘ పెద్దలు ‘ బాధ్యతా రహితంగా  ఇంట్లో చిన్న పిల్లల చుట్టూ పొగ తాగిన ఫలితమే అని ఖచ్చితం గా పరిశోధనలు రుజువు చేశాయి.  బహిరంగ ప్రదేశాలలో , సొంత ఇళ్ళలో , బస్సులలో , రైళ్ళలో, మనం ఈ సెకండ్ హ్యాండ్ స్మోక్ కు ఎంత ఎక్కువ గా  పొగ పీలిస్తే అంత మూల్యం చెల్లించాల్సి ఉంటుంది మనం మన తప్పు ఏమీ లేక పోయినా !!
అంటే ఒక విధంగా ఈ సెకండ్ హ్యాండ్ స్మోక్ పూర్తిగా మానవ కారణమైన అంటు వ్యాధి  అన వచ్చు!!!.
.


పొగాకు కు ఋణం – ప్రాణం పణం ( మీలో మార్పు తెచ్చే కొన్ని వీడియోలు )

In Our Health on ఫిబ్రవరి 12, 2012 at 9:41 సా.

మీకోసం కొన్ని యు ట్యూబ్  లో ఉన్న వీడియోలు  ఇక్కడ జత చెస్తూన్నాను. ఇవి తెలుగు లో లేవు. కానీ శులభం గా అర్ధం  ఆయె విధం గా చాలా శక్తి వంతంగా ఉన్నాయి.చూడండి.

దయ చేసి మీ అభిప్రాయాలు తెలుపండి.


పొగాకు కు ఋణం – ప్రాణం పణం. 6. పొగాకు పీలిస్తే కాన్సర్ ఎట్లా వస్తూంది ?

In Our Health on ఫిబ్రవరి 12, 2012 at 3:06 సా.

పొగాకు పీలిస్తే కాన్సర్ ఎట్లా వస్తూంది?

null

( మానవ దేహం లో ఉండే ప్రతి కణం లోనూ ఉండే జన్యువు ‘ DNA ‘ యొక్క చిత్ర పటం ఇది. పొగాకు పీల్చడం వల్ల ఈ ‘ DNA ‘ నిర్మాణం లో మార్పులు జరిగి కాన్సర్ కారకమైన కణ జాలం ఎక్కువ గా పుడుతుంది, సహజ మైన ఆరోగ్యమైన కణజాలం కాకుండా. పొగాకు పొగ లో ఉండే అనేక విషతుల్యమైన పదార్థాలు ఈ మార్పులు తెస్తాయనే విషయం నిర్వివాదాంశం. )
చాలా మందికి పొగ పీలిస్తే కాన్సర్ వస్తుంది అని మాత్రమే తెలుసు. కానీ ఆ కాన్సర్ ఎన్ని విధాలుగా దేహం లో వస్తూందో తెలియదు. ముఖ్యం గా పొగాకు పీలిస్తే ఎట్లా వస్తూందో తెలియదు.
‘ రోజూ ఇరవై ముప్పై సిగరెట్లో, బీడీలో పీల్చి పారేస్తే సరిపోతుంది, ఎవరు పట్టించుకుంటారు ఇవన్నీ’ అని అనుకుంటారు. అపోహ పడతారు.
కానీ ఎందువల్ల పొగాకు పీలిస్తే కాన్సర్ వస్తూందో తెలుసుకుంటే మంచిది. కారణాలు తెలుసుకోవడం వారిలో పొగాకు తాగటం మానే ప్రయత్నానికి పునాది అవుతుంది.
ఇప్పటివరకూ మనకు పరిశోధనల ద్వారా పొగాకు పీల్చడం , పెదవుల పై కాన్సర్, నోటిలో కాన్సర్, గొంతు లో కాన్సర్, శ్వాస కోశం లో లేక ఊపిరితిత్తులలో కాన్సర్ ( దీనినే ‘ lung cancer ‘ అని అంటారు.) , అన్న వాహిక కాన్సర్ , లేక ‘ oesophageal cancer ‘ , కడుపు లో కాన్సర్, మూత్రాశయ కాన్సర్, మూత్ర పిండాల లో కాన్సర్, పాంక్రియాస్ కాన్సర్, లివర్ కాన్సర్ లకు ప్రత్యక్షం గా కారణ భూతమవుతుందని ఖచ్చితంగా తెలిసింది. స్త్రీ లలో పైన తెలిపిన వాటితో పాటు సెర్వికల్ కాన్సర్ ( అంటే గర్భాశయ ద్వారం లో వచ్చే కాన్సర్ ) కూడా పొగ పీల్చడం వల్ల వస్తుంది.

కాన్సర్ కారణాలు ప్రధానం గా జన్యు లోపం వల్ల వచ్చేవీ , మన స్వయంకృతం వల్ల వచ్చేవీ. కొన్ని రకాల కాన్సర్లు జన్యులోపం తో ఉండే వారిలో అలవాట్లలో మార్పులూ తేడాలూ ఉండటం వల్ల వచ్చే మార్పులు కూడా కలిసి అగ్నికి ఆజ్యం తోడైనట్లు కాన్సర్ కారకాలవుతాయి.
జన్యు లోపం అంటే ఏమిటి: మన దేహం లో ప్రతి జీవ రసాయన క్రియా ఒక క్రమ పధ్ధతి లో మన జీవితాంతమూ జరగటానికి మన జన్యువులే కారణం. ఈ జీవ రసాయన చర్యలు రోజూ వందలూ వేలల్లో నిరంతరాయంగా జరుగుతుంటాయి మన దేహంలో మనం నిద్ర పోయినా మెలకువతో ఉన్నా !
వీటన్నిటికీ సంబంధించిన కార్యక్రమాలూ అంటే ‘ programmes ‘ అంటే ఏ సమయం లో ఏ చర్య జరగాలనే కార్యక్రమ వివరాలు అన్నీ మన దేహం లో ఉన్న ప్రతి కణంలో ఉన్న జన్యువులలోనూ నిక్షిప్తమై ఉన్నాయి. అంటే అవి సహజం గా మానవులలో ఉండే అతి సూక్ష్మమైన మైక్రో చిప్స్ ‘ smallest micro chips in the universe ‘ అన్న మాట.
ఈ జన్యువులు ఉండే కణాలు మన దేహం లో పెదవులు, నోరు, స్వర పేటిక, గొంతు, శ్వాస కోశం, అన్న వాహిక, ఉదర కోశం అంటే ‘ stomach ‘ , మూత్రాశయం, కాలేయము, పాంక్రియాస్ , మూత్ర పిండాలు, ఈ భాగాలు అన్నిటిలోనూ , కొత్త కణాలు నిరంతరాయం గా నిర్మాణం అవుతూ ఉండటానికి అంటే కొత్త కణాలు ఒక క్రమ పధ్ధతి లో పుడుతూ ఉండటానికి తగిన విధంగా ప్రోగ్రాం అయి ఉంటాయి.
మనం ముందు భాగాలలో చూసినట్లు , పొగ పీల్చే వారి దేహం లోకి పొగ తో పాటు ప్రవేశించిన రమారమి నాలుగు వేల రసాయన పదార్థాలు, విష తుల్యమైన వాయువులూ, కాన్సర్ కారకం గా మారి అతి సున్నితమైన, అతి సూక్ష్మమైన ఈ జన్యు నిర్మాణాలను పదే పదే ముట్టడి చేస్తాయి. అంటే ‘ attack on the genetic structure of cells by the toxins present in the tobacco smoke ‘. ఈ ముట్టడి పొగ పీలుస్తున్నంత సేపూ జరుగుతూ ఉంటుంది.
పొగాకు పొగ లో ఉండే ఈ విష పదార్ధాల ముట్టడి వల్ల జన్యువుల కార్యక్రమాలలో సమూల మైన మార్పులు వస్తాయి. అప్పుడు అంత వరకూ ఒక క్రమ పధ్ధతి లో జరిగిన కొత్త కణాల పుట్టుక అంతా అవకతవకలతో ఒక క్రమ పధ్ధతి కోల్పోయి జరుగుతూ ఉంటుంది. ఈ అక్రమం గా పుడుతూన్న కణాలే కాన్సర్ లేక ‘ tumour ‘ కారక కణాలు.
జన్మతహా జన్యులోపాలతో పుట్టినవారు ఈ ‘ పొగాకు పొగ ముట్టడి ‘ కి ఇంకా త్వరగా ఫలితం అనుభవిస్తారు. ఈ జన్యు లోపాలు అన్నీ మనకు తెలియక పోవచ్చు. తెలియవు కూడా. ఎందుకంటే మనం కేవలం బయటకు కనిపించే అవయవ లోపలే జన్యు లోపాలు అనుకుంటాము కానీ దేహం లో మనకు తెలియనివీ, బయటకు కనపడనివీ చాలా జన్యు లోపాలు ఉండవచ్చు.
ఈ విధంగా పొగ పీల్చే వారు, జీవితాలను ఒక లాటరీ ‘ lottery ‘ లాగా వారి ప్రాణాలను ‘ పణం ‘ గా పెడుతూంటారు. అందు వల్లనే పొగాకు పీల్చేవారందరూ బాధితులు కారు. కానీ ఎక్కువ మంది అవుతారు.
ఇక్కడ ఒక ఉదాహరణ : బ్రిటిష్ ప్రధాని విన్స్టన్ చర్చిల్ , టొబాకో పైపు ద్వారా పీల్చే వాడు. అతను ‘ 89 ‘ సంవత్సరాలు బ్రతికాడు. అతనూ , అతని పైపూ ఒక ట్రేడు మార్కు అయ్యాయి చాలా మంది పొగ తాగే వారికి. పొగ తాగే వారు, పలు మార్లు, పొగ తాగని వారిని ఎద్దేవా , లేక హేళన చేసే వారు చర్చిల్ బ్రతకలేదా పైపు పీలుస్తూ ‘ 89 ‘ ఏళ్ళు’ అని
కానీ ఇటీవల తెలిసిన నిజం , చర్చిల్ ఎప్పుడూ పైపును నోట్లో ఉంచుకునేవాడు కానీ పీల్చేవాడు కాదని !!!. అలా స్టైలు కోసం సిగరెట్టూ, పైపూ నోట్లో పెట్టుకునే వారు ఈకాలం లో లక్ష కు ఒకరున్నా గొప్ప !!!
ఇంకో విషయం. ప్రతి సిగరెట్టు లో రమారమి ఒక మిల్లీ గ్రాము నికోటిన్ ఉంటుంది. ఒక మిల్లీ గ్రాము అంటే ఒక గ్రాము లో వెయ్యో వంతు. కానీ కేవలం ‘ 60 ‘ అంటే అరవై మిల్లీ గ్రాముల స్వచ్చ మైన ‘ pure nicotine ‘ నికోటిన్ కనక శరీరం మీద పడితే ( అంటే చర్మము మీద పడితే చాలు ) అది మృత్యువు కు కారణం అవుతుంది అని ప్రయోగాల వల్ల తెలిసింది.
ఇక్కడ ఒక మిల్లీగ్రాము నికోటిన్ తో పాటు మనం గుర్తు ఉంచుకోవలసినది మిగతా వందలూ, వేల విష విష పూరితమూ , హానికరమూ అయిన పదార్ధాలు అన్నీ కలిసి కలిగించే మార్పులూ , అనర్దాలూ !!!


వచ్చే టపాలో పొగాకు మానడం ఎట్లాగో చదవండి. ( ఈ బ్లాగు లో ఉన్న యు  ట్యూబ్  లో నుంచి జతచేసిన వీడియోలు  మరవకుండా చూడండి !!! )


పొగాకు కు ఋణం – ప్రాణం పణం – 5 . శ్వాస కోశం లో పొగాకు తెచ్చే మార్పులు:

In Our Health on ఫిబ్రవరి 11, 2012 at 7:09 సా.
పొగాకు కు ఋణం – ప్రాణం పణం –  5 .
శ్వాస కోశం లో పొగాకు తెచ్చే మార్పులు:
 
మనం సహజంగా పీల్చే గాలి లో ఆక్సిజెన్  మన శ్వాస కోశం లో ప్రవేశించి  అందులో ఉన్న అతి సున్నితమైన ప్రత్యేకమయిన కణాల ద్వారా మన రక్తంలో కి ప్రవేశిస్తూంది ( ఈ కణాలను అల్వియోలై  ‘ alveoli ‘ అని పిలుస్తారు )  .
ఆక్సిజెన్ లేక పొతే మనం బతకలేమని మనకందరికీ తెలుసు కదా !.  ఈ భూగోళం  మీద  గాలిలో ఆక్సిజెన్ ఉండబట్టే మనం మన గలుగుతున్నాము.  చంద్ర మండల యాత్ర చేసిన వ్యోమగాములందరూ  ఆక్సిజెన్ ను భూమి మీద నుంచి తీసుకు వెళ్ళారు ఎందుకంటే చంద్ర మండలం మీద ఆక్సిజెన్ లేదు కాబట్టి.
అలాంటి ఎంతో విలువైన, సహజ సిద్ధమైన  ఆక్సిజెన్  ఉన్న గాలిని వదులుకుని  కార్బన్  మోనాక్సైడ్  ఇంకా అనేక విష వాయువులను వెళ్లగక్కే సిగరెట్టు పొగ కు బానిస అయి దానిని పీలుస్తూ , అనేక శ్వాస కోశ  సంబంధమైన జబ్బులను ఆహ్వానిస్తున్నారు మానవులు,  తమ జీవితాల లోకి !!
ఈ ప్రాణాధారమైన ఆక్సిజెన్ పొగాకు పీలుస్తూ వుంటే చాలా తగ్గుతూ ఉంటుంది మన రక్తంలో. అతి సున్నితమైన మన మెదడు లో ఆక్సిజెన్ శాతం  సమ పాళ్ళలో ఉంటే మన మెదడు చక్కగా, చురుకు గా పని చేస్తుంది.
ఇక శ్వాస కోశం లో ఉండే కణాలకు  అతిసన్నని పోగుల లాంటి  అమరికలు  పొగాకు చాలా కాలం పీల్చడం వల్ల పనిచేయడం మానేస్తాయి.  వీటినే సీలియా ‘ celia ‘  అంటారు.  ఈ సీలియా  అనే పోగులు  మన శ్వాస కోశం లో ఉండే అతి సూక్ష్మమైన  ‘ కుంచె లు ‘ అంటే
‘ brushes’  శ్వాస కోశం లో ఉండే అతి సూక్ష్మమైన ఈ కుంచె లు  కల్మషమైన ద్రవ పదార్ధాలను  బయటికి ( గొంతు ద్వారా ) పంపడంలో ప్రధాన పాత్ర వహిస్తాయి. ఈ సీలియా అనబడే కుంచెల లాంటి నిర్మాణాలు అతి సూక్ష్మమైనవీ , అతి సున్నితమైనవీ అవటం వల్ల పొగాకు లో ఉండే అనేక విష వాయువులూ, హానికర రసాయన పదార్ధాల తాకిడి కి తట్టుకోలేక పని చేయడం మానేస్తాయి. దీనితో కల్మషం అంతా బయటికి వెళ్ళడం లో జాప్యం జరుగుతుంది.  ఎక్కువ సమయం   శ్వాస కోశం లోనే ఈ కల్మషం ఉండి పోవడం వల్ల, శ్వాస సంబంధ మైన జబ్బులకు
నిలయమవుతాయి  శ్వాస కోశాలు. ఇవి ఆస్థ్మా , ఉబ్బసం,  నుమోనియా , ఉపిరి తిత్తులలో నీరు చేరడం, మొదలైన రూపాలలో బయట పడవచ్చు.
శ్వాస కోశాలు సరిగా పనిచేయడం ఎప్పుడు మానేస్తాయో , అప్పుడు ఆ ప్రభావం గుండె మీద కూడా పడుతుంది.
ఇక గొంతు లో నుంచి పొగ పోవడం వల్ల గొంతు కాన్సర్ కూ,   స్వర పేటిక  కాన్సర్ కూ , అతి సున్నితమైన శ్వాస కోశ కణ జాలం మీద  ఈ  రసాయన పదార్ధాలూ, విష వాయువులూ దీర్ఘ కాల ప్రాతిపదిక మీద చూపే మార్పులు శ్వాస కోశ కాన్సర్ కూ దారి తీస్తున్నాయి.
వచ్చే టపాలో  పొగాకు పీల్చడం ఎన్ని రకాల కాన్సర్ లకు కారణం అవుతుందో  చదవండి.
 


పొగాకు కు ఋణం – ప్రాణం పణం – 4. ( మన రక్త నాళాల లో పొగాకు తెచ్చే మార్పులు ).

In Our Health on ఫిబ్రవరి 9, 2012 at 9:14 ఉద.

పొగాకు కు ఋణం – ప్రాణం పణం – 4. ( మన రక్త నాళాల లో పొగాకు తెచ్చే మార్పులు ).
పొగాకు లేక సిగరెట్టు పీల్చడం వల్ల రక్తము లో నూ రక్తనాళాల లోనూ మార్పులు వస్తాయి.
రక్తము లో వచ్చే మార్పులు:
పొగాకు చాలా కాలం పీల్చడం వల్ల రక్తము లో ఉండే ప్లేట్ లెట్స్ అనే కణాలు సరిగా పని చేయక అవి గుంపులు గా ఏర్పడతాయి. సాధారణంగా ఈ ప్లేట్ లెట్స్ అనే రక్త కణాలు మన కు ఎక్కడైనా ఏదైనా దెబ్బ తగిలితే ఆ ప్రాంతానికి ఎక్కువ సంఖ్య లో చేరుకొని మనకు ఎక్కువ రక్తస్రావం అవకుండా రక్తాన్ని గడ్డ కట్టించే క్రియ లో ప్రధాన పాత్ర వహిస్తాయి. ఈ ముఖ్యమైన క్రియ ను రక్త ఘనీకరణం లేక ‘ blood clotting ‘ అంటారు.
ఈ ప్లేట్ లెట్స్ గుంపులు గా ఏర్పడుతూ వుండటం వల్ల అతి సన్నని రక్త నాళాలు పూడుకు పోయే ప్రమాదం ఏర్పడుతుంది. ఈ అతి సన్నని రక్తనాళాలు ప్రధానం గా మన గుండెకు సరఫరా చేసే రక్త నాళాలు మరియూ మన మెదడుకు రక్తం సరఫరా చేసే రక్తనాళాలు.
ఇక్కడ గమనించవలసినది ప్లేట్ లెట్స్ గుంపులు లేక సమూహాలుగా ఏర్పడటం మనకు ఏ దెబ్బా తగలక పోయినా జరుగుతుంది , పొగాకు పీల్చడం వల్ల.
రక్త నాళాలలో పొగాకు తెచ్చే మార్పులు:
పొగాకు చేసే ఇంకో హాని రక్తనాళాలను కుంచించుకు పోయేట్టు, మరియూ రక్తనాళాల గోడలను మందంగా చేయటం. ఈ విధంగా జరగటం వల్ల రక్తనాళాల వ్యాసం అంటే ‘ diameter ‘ తగ్గిపోయి రక్త పీడనం ఎక్కువ అవుతుంది. అంటే ‘ high blood pressure’ అన్న మాట.
ఇలా రక్త పీడనం ఎక్కువ అవటం వల్ల మెదడు లో ఉండే అతి సున్నితమైన రక్త నాళాలు ఈ ఎక్కువైనా రక్త పీడనానికి తట్టుకోలేక చిట్లి పోతుంటాయి.
దీనినే మనం పక్షవాతం లేక ‘ brain stroke ‘ అంటాము.
రక్త నాళాల లోనూ, రక్త ప్రసరణ లోనూ , రక్త కణాల లోనూ పొగాకు తెచ్చే ఈ మార్పులు ‘ గుండె పోటు ‘ అంటే ‘ heart attack ‘ కు కారణం అవుతాయి.
ఎక్కువగా పొగ తాగే వారికి ఈ ప్రమాదం పొంచి ఉంటూంది ఎప్పుడూ.
ఇదే కారణం వల్ల కొందరికి మూత్ర పిండాలు పాడైపోవడమూ, కొందరికి కంటిలోని రక్తనాళాలు దెబ్బ తిని , చూపు మందగించడం కూడా జరుగుతుంది.
కొందరిలో చేతి వేళ్ళ చివరలు, కాలి వేళ్ళ చివరలూ రక్తనాళాల్లో వచ్చే ఈ మార్పుల వల్ల రక్త సరఫరా బాగా తగ్గి పోయి, చచ్చు పడి పోతాయి.

పొగాకు మనలో తెచ్చే ఇంకొన్ని మార్పులు వచ్చే టపా లో చదవండి.