Our Health

Archive for the ‘Our minds’ Category

10. రక్షిత కారు చోదకం ( సేఫ్ కార్ డ్రైవింగ్ ). రోడ్డు మీద మన కారు పొజిషన్ ఎట్లా ఉండాలి ?

In ప్ర.జ.లు., మన ఆరోగ్యం., మానసికం, Our minds on ఆగస్ట్ 21, 2013 at 9:50 సా.

10. రక్షిత కారు చోదకం ( సేఫ్ కార్ డ్రైవింగ్ ). రోడ్డు మీద మన కారు పొజిషన్ ఎట్లా ఉండాలి ?

‘ తప్పించుక తానొవ్వక , తిరుగు వాడు ధన్యుడు సుమతీ ‘ అని సుమతీ శతక కారుడు శతాబ్దాల క్రితమే అన్నాడు ! ఆ సూక్తి కారు డ్రైవింగ్ లోనూ పనికొస్తుంది ! 
ఒక సారి కారు లో కూర్చుని రోడ్డు మీద పడ్డాక , మళ్ళీ కారును ఇంటికి చేర్చే వరకూ , రోడ్డు మీద ప్రయాణం చేస్తూ కూడా , నిరంతరం , మన పొజిషన్ ను , అంచనా వేసుకుంటూ , అప్రమత్తత తో కారు డ్రైవింగ్ చేయాలి ! ఎందుకంటే , సురక్షిత కారు చోదకం , మన కారు ఒక్క దాని మీదే , ఆధార పడి ఉండదు కదా ! అనేక మైన అవాంతరాలు రోడ్డు మీద తారస పడవచ్చు మనకు !  ఈ క్రింది జాగ్రత్తలు సురక్షిత డ్రైవింగ్ కు ఎంతగానో ఉపయోగ పడతాయి :
1. ఫుట్ పాత్ కు దగ్గర గా డ్రైవింగ్ చేయకూడదు. పాద చారుల కదలికలు దృష్టి లో ఉంచుకోవాలి. 
2. పార్క్ చేసి ఉన్న కార్ల మధ్య నుంచి బయటకు త్వర త్వరగా రాకూడదు. 
3. ఎట్టి పరిస్థితులలోనూ , పేవ్ మెంట్, అంటే ఫుట్ పాత్ మీద డ్రైవ్ చేయకూడదు ! 
4. సైకిలిస్ట్ ల రూట్ లో  కారు నడప కూడదు. 
5. అదే విధం గా బస్సులు ఆగే చోటా కారు నడప కూడదు ! 
( విదేశాలలో , సైకిళ్ళూ , బస్సులూ , నడపదానికీ , ఆపడానికీ , ప్రత్యేకమైన లేన్ లు ఉంటాయి ! , భారత దేశం లో ఆ పరిస్థితి కనపడదు ! ) 
6. కానీ కొన్ని బారత పట్టణాలలో , కొన్ని చోట్ల , ప్రత్యేక మైన లేన్ లు గీయబడి ఉంటాయి. ఆ యా చోట్ల , లేన్ డిసిప్లిన్ తప్పని సరిగా పాటించాలి ! అందరి భద్రత కోసమూ ! 
ఎప్పుడు ఓవర్ టేక్ చేయాలి ?
ఈ విషయం కన్నా ఎప్పుడు ఓవర్ టేక్ చేయ కూడదో తప్పని సరిగా గుర్తు ఉంచుకోవాలి 
1. మన కు ఎదురుగా వ్యూ స్పష్టం గా లేనప్పుడు , అంటే స్పష్టం గా కనిపించనప్పుడు , ఓవర్ టేక్ చేయకూడదు ! 
2. ఇతర డ్రైవర్ లకు మనం కానీ మన కారు కానీ కనిపించట్లేదని పించినప్పుడు మనం ఓవర్ టేక్ చేయ కూడదు ! ఇతర డ్రైవర్లు అప్రమత్తం గానే డ్రైవ్ చేస్తారు లే అనే నిర్లక్ష్యా భావం తో డ్రైవ్ చేయడం , ప్రమాదాలను ఆహ్వానించడమే ! 
3. ఓవర్ టేక్ చేద్దామనుకునే ఏరియా కానీ , చోటు కానీ తక్కువ గా ఉన్నప్పుడు , ఓవర్ టేక్ చేయ కూడదు !
4. మన ఎదురుగా ఉన్న రోడ్డు న్యారో గా అవుతున్నపుడు , అంటే మనం ప్రయాణిస్తున్నప్పుడు విశాలం గా ఉండి , క్రమేణా సన్న బడుతున్నప్పుడు  ఓవర్ టేక్ చేయడం సురక్షితం కాదు !
5.ఇంకొద్ది దూరం లో కానీ ( లేదా ఇంకొన్ని క్షణాలలో కానీ ) జంక్షన్ ను కనుక చేరుకో బోతుంటే , ఓవర్ టేక్ చేయడం సురక్షితం కాదు ! ( అంటే జంక్షన్ లేదని ఖచ్చితం గా తెలిసి ఉంటేనే ఆ ప్రయత్నం చేయాలి )
6. మనం పల్లం అంటే దిగువ లో ప్రయాణం చేస్తూ , ఎదురు గా ఎత్తు గా ఉన్నప్పుడు ( దీనిని డెడ్ గ్రౌండ్ అంటారు ) ఓవర్ టేక్ చేయడం అత్యంత ప్రమాదకరం ! ఎందుకంటే ఎదురు గా రోడ్డు ఎత్తు గా ఉండడం వల్ల , మనకు వ్యతిరేక దిశ లో వచ్చే వాహనాల గురించి ఏ రకమైన అవగాహనా ఉండదు కనుక ! 
అంతే కాక , ఓవర్ టేక్ చేసే సమయం లో  ముందు ఉన్న వాహనానికీ , మన కారు కూ మధ్య సరిపడినంత దూరం ఉండాలి ! చాలా దగ్గరగా ఉండి , ఓవర్ టేక్ చేస్తూ ఉంటే , మన కారు ముందు ఉన్న వాహనానికి , మనం ఓవర్ టేక్ చేస్తూ ఉన్నట్టు తెలియదు ! దానితో , ఆ వాహన దారు కూడా అదే సమయం లో ఓవర్ టేక్ చేయడానికి ప్రయత్నిస్తే , ఏం జరుగుతుందో ఊహించుకోవచ్చు ! 
వచ్చే టపాలో ఇంకొన్ని జాగ్రత్తలు ! 

 

 

9. రక్షిత కారు చోదకం ( సేఫ్ కార్ డ్రైవింగ్ ).

In ప్ర.జ.లు., మన ఆరోగ్యం., Our Health, Our minds on ఆగస్ట్ 18, 2013 at 10:59 సా.

9. రక్షిత కారు చోదకం ( సేఫ్ కార్ డ్రైవింగ్ ).

కారు వేగం పెంచడం ఎట్లా ?:
కారు వేగం పెంచడం ఎట్లాగో యాక్సిలరేటర్ మీద కాలు పెట్ట గలిగే ప్రతి వారూ చెప్పగలరు ! అందుకే , ప్రతి కుర్రకారూ , తమకు తామే ఎంతో సమర్ధవంతమైనా , ప్రతిభావంతమైన డ్రైవర్ లు అని అనుకుంటూ ఉంటారు ! అది చాలా పొర పాటు ! ఎందుకంటే, కారు వెళుతూ ఉన్నపుడు ,కేవలం కొంత బరువుతో ఉన్న బ్యాగ్ ను యాక్సిలరేటర్  మీద పడేసినా కూడా కారు పోగలదు ! కానీ సమర్ధవంతమైన డ్రైవింగ్ అంటే వీలైనంత క్రిందకు , కాలితో యాక్సిలరేటర్ ను నొక్కి వేగం పెంచడం కాదు !  కారు వేగం పెంచడం అనేక మీటలను సమర్ధ వంతం గా నియంత్రించడం ! మొదటి గేర్ లో ఉన్న కారు వేగాన్ని ఒక స్పీడుకు కనుక స్మూత్ గా యాక్సిలరేట్  చేశాక , రెండవ గేర్ లోకి స్మూత్ గా మార్చాలి , రెండవ గేర్ లో ఒక నియమితమైన స్పీడ్ కు కారు వేగం చేరుకున్నపుడు , యాక్సిలరేటర్ ను క్రిందకు క్రమేణా నొక్కి రెండవ గేర్ లో అత్యధిక వేగానికి కారు చేరుకునే లా చేయాలి , అదే విధం గా మూడవ గేర్ కు మార్చి , మళ్ళీ యాక్సిలరేటర్ ను క్రమేణా నొక్కి ఉంచుతూ , మూడవ గేర్ లో కూడా అత్యధిక వేగానికి కారు చేరుకునేట్టు చూడాలి ! నాలగవ , అయిదవ గేర్ కు కూడా అదే పధ్ధతి ని అనుసరించాలి ! 
రెండవ గేర్ లోనే అత్యధికం గా యాక్సిలరేట్ చేస్తే పోయేదేంటి ?:
ప్రతి గేర్ కూ ఒక నియమిత వేగం ఉంటుంది ! ఆ నియమిత వేగానికే ఇంజన్ ట్యూన్ అవుతుంది , ఆ గేర్ లో ! తక్కువ గేర్ లో ఎక్కువ వేగం గా కారు వెళ్లాలని , ఎక్కువ గా అదిమి పట్టి , యాక్సిలరేట్ చేయడం , ఒక గుర్రం కనుక అత్యధిక వేగం తో పరిగెత్తుతూ ఉంటే , దానిని ఇంకా తోలు పటకాతో ( ఆంగ్లం లో విప్ అంటారు కదా ) చావ బాదుతూ ఉండడం తో పోల్చ వచ్చు ! ఇట్లా చేయడం వల్ల , ఇంజన్ మీద అత్యధిక వత్తిడి పడి , త్వరగా పాడయే రిస్కు ఎక్కువ అవుతుంది ! ఎంత ఎక్కువగానూ , తీవ్రం గానూ యాక్సిలరేటర్ పెడల్ ను నొక్కి పట్టి ఉంచితే , అంత ఎక్కువ ఇంధనం ఖర్చు కూడా అవుతుంది !  
గేరు మార్చడం ఎట్లా ? : ప్రతి కారుకూ కనీసం అయిదు నుంచి ఆరు గేర్లు అమర్చ బడి ఉంటాయి. ప్రతి గేరు లోనూ యాక్సిలరేటర్ పెడల్ ను అనుసంధానం చేసి నొక్కుతూ ఉండాలి ! తక్కువ గేర్ లో ఎక్కువ గానూ , ఎక్కువ అంటే నాలుగో లేక ఐదో గేర్ లో తక్కువ గానూ  యాక్సిలరేట్ చేయడం ఇంజన్ ఆరోగ్యాన్ని పాడు చేస్తుంది ! 
ఇంకో ముఖ్య విషయం : ఐదో లేక ఆరో గేర్ లో కారు వేగం గా పోతూ , సడన్ గా వేగం తగ్గించ వలసిన అవసరం వస్తే , వెంటనే గేరు మార్చి తక్కువ గేరు లోకి కారును తే కూడదు ! ఇట్లా చేస్తే ఇంజన్ త్వరగా పాడవుతుంది. మొదట గా చేయవలసినది , బ్రేక్ మీద కాలు ఉంచి క్రమేణా కారు వేగాన్ని తగ్గించి , అప్పుడు , కారు గేర్ ను కూడా మార్చాలి ! కొన్ని సమయాలలో , రెండవ గేర్ నుంచి నాలుగవ గేర్ లోకి స్మూత్ గా కారు వేగాన్ని మార్చవచ్చు , దానితో సమానం గా యాక్సిలరేట్ చేస్తూ ఉంటే ! 
కారు ఎత్తు కు వెళుతున్నప్పుడు గేర్ లు ఎట్లా మార్చాలి ? 
ఇక్కడ కూడా భౌతిక శాస్త్రం ఉపయోగ పడుతుంది మనకు !  మనం మెట్లు ఎక్కుతున్నప్పుడు ఎట్లాగైతే ఎక్కువ శ్రమ పడతామో , కారు ఇంజన్ కూడా అంతే ! అందువల్ల కారు ఇంజన్ శ్రమ తగ్గించడానికి , కారును రెండవ లేదా మూడవ గేర్ లో నడపడం ఉపయోగ కరం ! తక్కువ గేర్ లలో ఇంజన్ ఎక్కువ శక్తి తో పనిచేస్తుంది కనుక ! 
మరి కారు దిగువ కు వస్తున్నపుడు కూడా తక్కువ గేర్ లో ఎందుకు ప్రయాణించాలి ? : 
ఎందుకంటే , గ్రావిటీ వల్ల కారు వేగం పెరుగుతుంది సహజం గానే ! అప్పుడు కనుక నాలుగు , అయిదు , లేదా ఆరో గేర్ వేసి కారు ను నడుపుతూ ఉంటే , సహజమైన వేగం తో పాటుగా , కారు ఇంజన్ వేగం కలిసి , చాలా ఎక్కువ వేగం తో కారు క్రిందకు పోతూ ఉంటుంది ! ఆ సమయం లో కారు ను కంట్రోలు చేయడం కష్టం ! అప్పుడు సహజం గానే ప్రమాదాల రిస్కు ఎక్కువ అవుతుంది . అందువల్ల తక్కువ గేర్లే , ఉపయోగించాలి దిగువ కు వచ్చే సమయం లో కూడా ! ఎత్తు లో అంటే ఎగువ ( అప్ హిల్ ) లో కారు పార్క్ చేయ వలసిన అవసరం ఏర్పడినప్పుడు ఒక సురక్షిత మైన పధ్ధతి , కారును మొదటి గేర్ లో మార్చి ( హ్యాండ్ బ్రేక్ తో సహా ) పార్క్ చేయడం. ఇట్లా చేస్తే , ఒక వేళ , హ్యాండ్ బ్రేక్ పనిచేయక పోయినా కూడా , కారు మొదటి గేర్ లో ఉండడం వల్ల క్రిందకు జారదు ! 
వచ్చే టపాలో ఇంకొన్ని సంగతులు ! 

8.రక్షిత కారు చోదకం ( సేఫ్ కార్ డ్రైవింగ్ ).కారు ఆపడమూ , పార్క్ చేయడమూ ఎట్లా ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 17, 2013 at 11:43 ఉద.

8.రక్షిత కారు చోదకం ( సేఫ్ కార్ డ్రైవింగ్ ).కారు ఆపడమూ , పార్క్ చేయడమూ ఎట్లా ? :

ఒక వేగం లో కారును నడుపుతూ , ఆపవలసిన సమయం లో ఆపడం కూడా ఒక నేర్పే ! చాలా మంది యువకులు కొత్త కారు చాలా వేగం గా నడుపుతూ , సడన్ గా రోడ్ల మీద బ్రేక్ చేస్తూ ఉండడం సాధారణమే !  ఇట్లా ఒక్క సారిగా కారును సడన్ గా ఆపడం, కారు ఆరోగ్యానికి మంచిది కాదు ! కారు టైర్లు త్వరగా అరిగి పోతాయి , ఇంధనం కూడా ఎక్కువ ఖర్చు అవుతుంది. గమనించ వలసినది , ఎక్కువ వేగం గా కారు నడుపుతూ ఉంటే , ఆ కారును ఆపడానికి కూడా ఎక్కువ సమయం పడుతుంది.  రోడ్డు మీద తేమ ఉంటే , లేదా , రోడ్డు ఐసీ గా ఉంటే కూడా కారు ఆపడం ఆలస్యం అవుతుంది. రోడ్డు తేమ గా ఉన్నా , ఐసీ గా ఉన్నా కూడా కారు టైర్లకు పట్టు దొరకదు అంటే కారు టైర్లు గ్రిప్ కోల్పోతాయి ! అందువలననే , సాధారణ వేగం కన్నా తక్కువ వేగం తో ప్రయాణం చేయాలి , బాగా వాన కురుస్తున్నపుడు !కారును  ఆపే దూరం రెండు రకాలు గా ఉంటుంది. ఒకటి : మనం కారు ను ఆపుదామని మనసులో ఎప్పడు ఆలోచిస్తామో అది. అంటే , థింకింగ్ డిస్టెన్స్ ! రెండవది బ్రేకింగ్ డిస్టెన్స్ ! అంటే , ప్రాక్టికల్ గా బ్రేక్ ను ఎప్పుడు అప్లై చేస్తామో ఆ దూరం ! ఈ క్రింద సూచించిన ఆట లో మీరు మీ కారును ఆపే దూరాన్ని అంచనా వేసుకోవచ్చు , వివిధ వాతావరణ సమయాలలో ! చాలా ఉపయోగ కరం గా ఉంటుంది, మీ సురక్షిత డ్రైవింగ్ కు ! ప్రయత్నించండి ! 
బ్రేక్ వేయాలి అని యాంటి సిపేట్ చేస్తూ, జాగ్రత్త గా బ్రేక్ వేయడం అలవాటు చేసుకుంటే , కారు కుదుపులు లేకుండా ఆగడమే కాకుండా , కారు టైర్లు కూడా ఎక్కువ కాలం మన్నుతాయి ! టైర్ల తో పాటు బ్రేక్ ప్యాడ్స్ కూడా , ఎన్ని ఎక్కువ సార్లు బ్రేక్ వేస్తే , అంత త్వరగా బ్రేక్ ప్యాడ్స్ పాడవుతాయి ! అట్లా గని అసలు బ్రేక్ వేయకుండా ఎప్పుడూ నడిపించలేము కదా , కారును ,కానీ బ్రేక్ వేసే ప్రతి సారీ అతి జాగ్రత్తగా నిదానం గా వేస్తూ ఉంటే , బ్రేక్ ప్యాడ్ లు తరచూ మార్చ నవసరం ఉండదు ! ఈ బ్రేక్ ప్యాడ్స్ మార్పించాలంటే , చాలా ఖర్చు తో కూడిన పని !  నాసి రకం కంపెనీ వి వేయిస్తే , అవి త్వరగా పాడవ డమే కాకుండా, ప్రమాదాలకు కూడా కారణం అవుతాయి !  ఆ కారు కంపెనీ స్పేర్స్ లోనే కీలకమైన స్పేర్స్ మార్పించడం ఉత్తమం !
యాంటి సిపేట్ చేయడం అంటే , ట్రాఫిక్ లైట్ లు అంబర్ కలర్ లోకి మారడం చూడగానే , లేదా పాదచారులు రోడ్డు క్రాస్ చేస్తూ ఉండడం గమనించినా , కూడా బ్రేక్ అవసరం ఉంటుందని ఊహించడం ! ( చాలా సమయాలలో, భారత దేశం లో అనేక రోడ్ల కూడలు లలో జీబ్రా క్రాసు మీద పాద చారులు దాటుతూ ఉన్నా కూడా ఏమాత్రం పట్టింపు లేకుండా , కారు ఆపకుండా నడుపుతూ ఉంటారు ! పాదచారులకూ , సైకిల్ నడిపే వారికీ , అత్యంత ప్రాధాన్యత ఇవ్వాలి , కారు నడిపే వారు ! చాలా సమయాలలో పాదచారులదీ , సైకిలిస్ట్ లదీ తప్పు ఉన్నా కూడా !, ఎందుకంటే , పంతాలకు , పట్టింపు లకూ పొతే , ప్రమాదాలలో ఎక్కువ గా గాయ పడేది వారే కదా , కారులో కూర్చున్న వారు కాదు కదా !
పార్క్ చేయడము : 
పార్క్ చేసే ముందు , ఆ ప్రాంతం సురక్షితమో కాదో గమనించాలి ! : వెనుక నుంచీ , ప్రక్క నుంచీ వేగం గా వాహనాలు వెళుతూ ఉంటే , సరి అయిన ఇండికేటర్ ఉపయోగించి , వారికి తెలియచేయాలి , మీరు పార్క్ చేయబోతూ ఉన్నట్టు ! రివర్స్ పార్కింగ్ చేసే సమయాలలో కూడా మీరు పార్క్ చేస్తున్న ప్రదేశం సురక్షితం గా ఉందో లేదో నిర్ధారించు కోవాలి ముందే ! అవసరం అవుతే , కారు దిగి చూడడానికీ వెనుకాడ కూడదు !  ఇట్లా గమనించకుండా రివర్స్ పార్కింగ్ చేసిన ఫలితం గా , అనేక ప్రమాదాలు సంభవించి , చిన్న పిల్లలూ , పెంపుడు జంతువులూ మరణిస్తూ ఉంటారు ! పార్క్ చేశాక , అన్ని లైట్లూ ఆపి ఉన్నాయో లేదో నిర్ధారించుకోవాలి ! కారులో కొద్ది సమయం కోసమైనా , చిన్న పిల్లలను వదిలి వెళ్ళ కూడదు ! అమెరికా , ఇంగ్లండు లాంటి దేశాలలోనే , ఎండా కాలం లో ఇట్లా కారు లో వదిలి వేయబడ్డ పిల్లలూ ,కుక్కలూ , కారు వేడెక్కి , మరణించిన సందర్భాలు అనేకం ! 
వచ్చే టపాలో ఇంకొన్ని సంగతులు ! 

6. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

In ప్ర.జ.లు., మన ఆరోగ్యం., Our Health, Our minds on ఆగస్ట్ 15, 2013 at 2:05 సా.

6. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

మిగతా జాగ్రత్తలు : 
విండ్ స్క్రీన్ ఇంకా విండోస్ : విండ్ స్క్రీన్ ఎప్పుడూ , మసక బారకుండా , స్పష్టం గా ఉండాలి ! దానిమీద ఏ రకమైన స్టికర్ లూ అంటించ కుండా జాగ్రత్త వహించాలి ! అంటించిన స్టికర్ లు చూపును కొన్ని కోణాలకే పరిమితం చేసి , అత్యవసర సమయాల లో రోడ్డు మీద వాహనాలను గమనించ కుండా చేసి , ప్రమాదాల రిస్కు ఎక్కువ చేస్తాయి !విండ్ స్క్రీన్ మీద తరచూ చిన్న చిన్న రాళ్ళు పడి , విండ్ స్క్రీన్ మీద చిన్న చిన్న పగుళ్ళ కు కారణమవుతాయి ! ఈ పగుళ్ళు కూడా చూపు కు అంతరాయం కలిగిస్తాయి ! పెద్ద పగుళ్ళను వెంటనే సీల్ చేయడం కానీ , లేదా విండ్ స్క్రీన్ మార్చడం కానీ చేయాలి !విండోస్ కూడా సరిగా పని చేస్తున్నాయో లేదో చెక్ చేసుకోవాలి. 
ఎలెక్ట్రి కల్ పరికరాలు చెక్ చేయడం : 
కారు లో వివిధ లైట్లూ , విండ్ స్క్రీన్ వాషర్ లూ , హారన్ లూ , ఇట్లాంటి అనేకం విద్యుత్తు బ్యాటరీ ద్వారానే పని చేస్తాయి కదా ! వాటిని పరీక్ష చేసుకోవడం కూడా ఉత్తమం ! ప్రత్యేకించి దూర ప్రయాణాలు చేస్తూ ఉంటే ! అట్లాగే కారు బ్రేక్ నూ , స్టీరింగ్ వీల్ నూ కూడా పరీక్ష చేసుకోవాలి బయలు దేరే ముందే ! 
చాలా మంది ఇంధన టాంకు ను ఒక మాదిరి గానే నింపి , ప్రయాణాలకు ఏర్పాటు చేసుకుంటూ ఉంటారు ! కానీ వెళ్ళే చోటు వెదకడం కానీ , లేదా ట్రాఫిక్ ఎక్కువ గా ఉండి  తరచూ గేర్లు మార్చి కారును నడపడం వల్ల కానీ ఎక్కువ ఇంధనం ఖర్చు అయి రోడ్డు మీద ఇంధనం లేక పోవడం వల్ల , కారు ఆగి పోవచ్చు ! అందువల్ల ఎప్పుడూ అనుకున్న దానికంటే ఎక్కువ ఇంధనం టాంకు లో నింపు కోవడం మంచి అలవాటు ! 
పాసెంజెర్ ల జాగ్రత్త : 
కారు నడిపే డ్రైవర్ దే , కారు లో కూర్చున్న మిగతా వారందరి బాధ్యతా కూడా ! ఈ మిగతా పాసెంజర్ లు చిన్న పిల్లలు కావచ్చు , ముదుసలులు కావచ్చు , లేదా గర్భిణీ స్త్రీలో , అనారోగ్యం తో ఉన్న వారో కూడా కావచ్చు ! అట్లాంటి వారందరి జాగ్రత్త కూడా , ప్రయాణం ముందే ఏర్పాటు చేసుకోవాలి , కారు నడిపే వారే ! ప్రత్యేకించి సీట్ బెల్ట్ లు పెట్టుకున్నారో లేదో గమనించడం , వారి బరువు కు తగ్గట్టుగా కారు టైర్ల లో గాలి నింపడం జరిగిందో లేదో అని చూసుకోవడమూ , ఇంకా వారికి కావలసిన ఆహార పానీయాల విషయాలు కూడా ముందే ఏర్పాటు చేసుకోవాలి ! వాతావరణం బాగో లేక పోయినా , లేదా విపరీతమైన ట్రాఫిక్ రద్దీ ఏర్పడిన సమయాలలో ,కారు ను వదిలి , రెస్టారెంట్ లో తినడం , తాగడం సంభవం కాదు కదా ! 
వచ్చే టపాలో ఇంకొన్ని సంగతులు ! 

4. సేఫ్ కార్ డ్రైవింగ్ లో, న్యూటన్ మొదటి సూత్రం మనకెందుకు ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 13, 2013 at 11:08 ఉద.

4. సేఫ్ కార్ డ్రైవింగ్ లో, న్యూటన్ మొదటి సూత్రం మనకెందుకు ? 

 
సేఫ్ కార్ డ్రైవింగ్ అంతా కీలకమైన భౌతిక సూత్రాల మీదా , నడిపే వారి నిపుణత మీదా ఆధార పడి ఉంది అనడం లో అతిశయోక్తి లేదు ! మనమంతా చిన్న తనం లోనే చదివి ఉన్నాం కదా న్యూటన్ గురుత్వాకర్షణ శక్తి ని , చెట్టు మీద ఉన్న యాపిల్ పండు పడినప్పుడు పైకి ఎందుకు పోవట్లేదు , క్రిందే ఎందుకు పడుతుంది ? అని ఆలోచించి , కనుక్కున్నాడని ! అంతే కాక యాంత్రిక శాస్త్రం లో  ముఖ్యమైన మూల సూత్రాలను కూడా ఆవిష్కరించాడు న్యూటన్  ! అందులో మొదటి సూత్రం , ‘ ప్రతి వస్తువూ నిశ్చల స్థితి లో కానీ , ఒక స్థిరమైన వేగం తో ప్రయాణిస్తున్నప్పుడు కానీ , ఏ బాహ్య శక్తీ దాని గతి మార్చనంత వరకూ అదే స్థితిలో ఉంటుంది ” అని. మరి వాహనాలు నడిపే సమయం లో ,ఈ న్యూటన్ మొదటి సూత్రం ప్రాముఖ్యత ఏమిటి ? అని మనం ప్రశ్నించుకుంటే అసలు విషయం బోధ పడుతుంది ! ఉదాహరణ కు మనం కారులో గంటకు ముప్పై మైళ్ళ వేగం తో ప్రయాణిస్తున్నాం అంటే దాని అర్ధం కారు తో పాటు గా మన వేగం కూడా గంటకు ముప్పై మైళ్ళ నే గా ! మనం కారులో స్థిరం గా కూర్చున్నప్పటికీ ! ఎందుకంటే , మనం కారు వేగం తో కూడా ప్రయాణిస్తున్నాం కనక ! అంటే కారు ఒక వేగం లో పోతూ ఉన్నప్పుడు , మన వేగం కూడా కారు వేగం తో  సమానం గా ఉంటుంది. 
మరి ఈ వేగాలకూ , మన సేఫ్ టీ కీ సంబంధం ఏమిటి ? : వేగం గా వెళ్ళే కారు ను అకస్మాత్తు గా, ఏ కారణం చేతనైనా ఆపడం జరిగినా , లేదా ఎదుటి వాహనం ఏదైనా , ప్రయాణిస్తున్న కారు ను గుద్దినా , కూడా కారు అకస్మాత్తు గా ఆగుతుంది కదా ! అంటే కారు వేగం ఒక్క సారిగా మారిపోయి , ఆ కారు ఆగుతుంది ! కానీ కారు వేగం తో ప్రయాణం చేస్తున్న , కారులో ఉన్న వారి వేగం మారదు ! అంటే , కారును బ్రేకు వేసి ఆపడం జరిగినా , లేదా ఎదుటి కారు వచ్చి ఆ కారును గుద్ది అకస్మాత్తు గా ఆపినా కూడా, కారు మాత్రమే ఆగుతుంది కానీ, కారు లో అంతే వేగం తో ప్రయాణం చేస్తున్న వారి వేగం  మారదు ! అందు వల్ల నే , బారత దేశం లో మోటారు వాహన ప్రమాదాలు చాలా వాటి లో ఇట్లా అకస్మాత్తు గా కారు ఆగినప్పుడు ( ప్రమాదాలలో సర్వ సామాన్యం గా జరిగేది అదే కదా ! ) ఆ కారులో ప్రయాణం చేస్తున్న వారు కూడా అంతే వేగం తో వారు కూర్చున్న స్థానం నుంచి విసిరి వెయ బడతారు ! అప్పుడు ఎదురుగా ఉన్న విండ్ స్క్రీన్ గుండా బయటకు విసిరి వేయ బడతారు ! లేదా కారు లో వెనక సీట్లో కనక ప్రయాణం చేస్తూ ఉంటే , కారు లో కానీ , లేదా పక్క విండో నుంచి కానీ టాస్ చేయ బడతారు !  దానితో ప్రమాదం తీవ్రత ఎక్కువ గా ఉంటుంది ! 
మరి ఇతర దేశాలలో ఈ ప్రమాద తీవ్రత ఎందుకు తక్కువ గా ఉంటుంది ? 
ఇతర దేశాలలో ,ముఖ్యం గా యూ రప్ దేశాలన్నిటిలో కూడా , కారు లో ప్రయాణించే ప్రతి వారూ తప్పనిసరిగా సీట్ బెల్ట్ ధరించాలి ! పైన ఉదహరించిన ప్రమాదాలలో , సీట్ బెల్ట్ ప్రాముఖ్యత అంతా ఇంతా కాదు ! ఎందుకంటే , అతి వేగం గా పోతూ ఉన్న  కారు ఏ  కారణం చేతనైనా , అకస్మాత్తు గా ఆగినపుడు , కారు వేగం తో ప్రయాణం చేస్తున్న ప్రయాణికులను , అంతే వేగం తో కారు నుంచి విసిరి వేయ బడకుండా నివారించే బ్రేకు ల లా పనిచేసి, వారికి ప్రమాద తీవ్రత ను నివారించ డమూ , లేదా చాలా వరకూ తగ్గించడమూ చేస్తాయి , సీట్ బెల్ట్ లు ! అనేక ప్రమాదాల పరిశీలన చేసి , ఈ విషయం నిర్ధారింప బడింది. మరి భారత దేశం లో, కార్ల ను విపరీతమైన వ్యామోహం తో కొనుక్కుంటున్నారు జనాలు ! కానీ  కారు మీద ఉండే వ్యామోహం , వారి రక్షణ మీద ఉండట్లేదు !  యురోపియన్ వాసులదైనా , భారతీయులదైనా , ప్రాణం విలువ ఒకటే కదా ! మరి భారత దేశం లో ఇటు వాహన వాడక దార్లు కానీ , అటు ప్రభుత్వం వారు కానీ ఈ శాస్త్రీయ మైన యదార్ధాన్ని పట్టించుకోవట్లేదు ఎందుకు ? 
వచ్చే టపాలో ఇంకొన్ని సంగతులు !  

2. సేఫ్ కార్ డ్రైవింగ్. కారు కొనే ముందు ఆలోచించ వలసిన విషయాలు ….

In ప్ర.జ.లు., మన ఆరోగ్యం., Our Health, Our minds on ఆగస్ట్ 10, 2013 at 10:42 సా.

2. సేఫ్ కార్  డ్రైవింగ్. కారు కొనే ముందు ఆలోచించ వలసిన విషయాలు  …. 

రోజూ ప్రయాణం లో భాగం గా ,   A నుంచి B కి వెళ్ళే ముందు కొన్ని  నిమిషాలు ఈ క్రింది విషయాలు ఆలోచించాలి !
1. వెళ్ళే చోటు  చాలా దూరమా , లేక నడక , సైకిల్  మీద వెళ్ళ వచ్చా ? అనే విషయం. ఎందుకంటే , తక్కువ దూరాలకు , తరచూ కారులో ప్రయాణిస్తే , కారు ఎక్కువ మైలేజీ ఇవ్వక పోవడమే కాకుండా , ఇంజన్ కూడా త్వరగా పాతదవుతుంది ! తరచూ గేర్ లు మార్చుతూ యాక్సిలరేట్ చేస్తూ ఉండడం వల్ల ,  పొల్యూ షన్ , అంటే వాతావరణ కాలుష్యం కూడా ఎక్కువ అవుతుంది ! మనం ఉండే ఏరియా లో ఎక్కువ మంది కి ఈ అవగాహన ఉంటే , ఆ ఏరియా పొల్యూ షన్ తగ్గడానికి అవకాశం ఉంటుంది. గమనించ వలసినది , ఒక్క రోజు తో మన శరీరం కాలుష్యం చెంది అనారోగ్యం పాలవడం జరగదు. వాతావరణ కాలుష్యం , అనేక నెలలూ , సంవత్సరాల తరబడి జరుగుతూ   ఉంటే , దాని పరిణామాలు ,ఆరోగ్యం  మీద  పడతాయి !
 ఇతర ప్రత్యామ్నాయ ప్రయాణ ఏర్పాట్లు చేసుకోవచ్చా ? బస్సు లోకానీ , రైలు లో కానీ వెళ్ళ వచ్చా ? లేదా కారు లోనే వెళ్ళాలను కుంటే , కారును ఇంకొకరితో షేర్ చేసుకోవచ్చా ? ( విదేశాలలో , ఆర్ధిక మాంద్యం దృష్ట్యా , కారు స్వంత దారులు, నలుగురు,  ఒకే చోటినుంచి బయలు దేరుతూ ఉంటే , వారు వంతుల వారీ గా రోజు కొకరు డ్రైవ్ చేస్తారు , వారి కారులో మిగతా వారు కూర్చుంటారు ! ఇట్లా చేయడం స్నేహాన్ని పెంచడమే కాకుండా , అందరికీ డబ్బు కూడా ఆదా అవుతుంది ! ) 
2. వాతావరణం లో కేవలం విష వాయువుల తోనే కాకుండా , శబ్ద కాలుష్యం కూడా మానవులను చీకాకు పరుస్తుంది. ఈ శభ్ద కాలుష్యం ప్రత్యేకించి , భారత దేశం లో ఎక్కువ గా ఉంటుంది. విదేశాలలో , ఒక వెయ్యి కార్లు రోడ్డు మీద ఉంటే , ఒకటో రెండో కార్లు మాత్రమే హార్న్ మోగించడం వినబడుతుంది ! భారత దేశం లో రోడ్డు  ఇక పోల్చ నవసరం లేదనుకుంటా ! 
3. కారు కొందామనే నిర్ణయం తీసుకునే ముందు ,
a. కొత్త కారు కొనడమా , లేక సెకండ్ హాండ్ కారు పరవాలేదా ? అనే విషయం. ఉదాహరణకు , పాశ్చాత్య దేశాలలో ఒక లక్ష మైళ్ళు చేసిన కారు ఏదైనా , ఒక పది వేల రూపాయలకే కొనవచ్చు ! అంటే , కొత్త కారు విలువ సంవత్సరానికి కనీసం ఇరవై శాతం పడి పోతుంది ! సరిగా సర్విసింగ్ చేయించి ఒక్కరే నడిపిన కారు కూడా తక్కువ ధరకే కొన వచ్చు ! కానీ నాలుగు చేతులు మారిన కారు , ఎక్కువ రిపేర్ లతో , ఒక తెల్ల ఏనుగు అవవచ్చు , అత్యాశకు పోయి తక్కువ ధరలో కొంటే ! 
b . ఏ రకమైన ఇంధనం తో నడిచే కారు కొనాలని ? ఎందుకంటే,  డీజల్ తో నడిచే కార్లు ఎక్కువ మైలేజీ ఇస్తాయి , కానీ మీరు ఎక్కువ దూరం ప్రయాణం చేయవలసి వస్తేనే ! 
c. పాశ్చాత్య దేశాలలో నడుపుతున్న కారు , ప్రయాణం లో ఎక్కడైనా ఏ కారణం చేత నైనా చెడిపోతే , తగిన రిపేర్ లు చేయడానికి బీమా కంపెనీలు కుక్క గొడుగుల్లా ఉంటాయి. అట్లాంటి కంపెనీ లలో ఒకదానిలో బీమా తీసుకోవడం ఉత్తమం !
d . క్రమం గా కారు సర్విసింగ్ చేయించడానికి కూడా , కొంత డబ్బు చెల్లిస్తూ ఉండాలి. ప్రత్యేకించి, పాత బడుతున్న కార్లకు ఈ జాగ్రత్త ముఖ్యం. ( కొత్త కార్లకు సామాన్యం గా కనీసం అయిదేళ్ళ వరకూ వారంటీ ఉంటుంది ! ఆ వారంటీ ఉన్న కార్లను కొనుక్కోవడం ఇంకో ఆలోచన ! ) 
e . విదేశాలలో ప్రతి కారుకూ , పాత బడుతూ ఉంటే M O T పరీక్ష ఉంటుంది ( మినిస్ట్రీ ఆఫ్ ట్రాన్స్ పోర్ట్ ) పరీక్ష అని అంటారు. ఈ పరీక్ష ప్రతి కారు కూ  ప్రతి సంవత్సరమూ చేయించాలి  కంపల్సరీ గా ఎందుకంటే , ఈ పరీక్ష కారు ఆరోగ్యాన్ని తెలపడమే కాకుండా , అవసరమైన రిపేర్ లు చేయించ డానికి కూడా సూచనలు ఇస్తుంది !  ఈ పరీక్ష పాసవడం , ప్రతి కారు కూ కంపల్సరీ ! దానితో , కారు నడిపే వారే కాకుండా , రోడ్డు ను వాడే ఇతరులు కూడా సురక్షితం గా ఉంటారు ! 
f . పార్కింగ్ కు క్రమం గా చెల్లించ వలసిన డబ్బు ఎంత ఉంటుంది ? 
ఈ విషయాలన్నీ ఆలోచించుకుని , ఒక నిర్ణయం తీసుకోవాలి ! ముఖ్యం గా కారు కొనమనే ఆకర్షణీయమైన ప్రకటనలు చూసి మోస పోకూడదు ! ఎందుకంటే ప్రతి ప్రకటనలోనూ , కారు కేవలం ఆరు లేదా ఎనిమిది సెకండ్ల కాలం లో సున్నా నుంచి అరవై మైళ్ళ వేగం చేరుకోగలరనే చెబుతూ ఉంటారు ! కానీ బాధ్యతా రహితం గా కారు నడిపితే , కైలాసానికి కూడా అంతే వేగం గా చేరుకోగలమనే వాస్తవాన్ని మాత్రం చెప్పరు ! అంతే కాకుండా , తెప్పలు తెప్పలు గా కార్లను రోడ్ల మీద ప్రవేశ పెట్టడానికి , అనేక మైన ఆకర్షణీయమైన ప్రకటనలూ ,పధకాలూ పెడతారు కానీ , కారు నడిపే రోడ్ల గురించి ఆలోచించరు , కారు కంపెనీలు కానీ , ప్రభుత్వం వారు కానీ ! వారి ఉద్దేశం లో కారు కొనుక్కుంటే , గాలి లో ప్రయాణం చేయాలనేమో ! 
మీరు నివసిస్తున్న చోటినుంచి మీరు చేరుకోవలసిన గమ్యం లో రోడ్ల పరిస్థితి ఎట్లా ఉంది?  ఆ పరిస్థితి బాగు పడే అవకాశం కనీసం వచ్చే పదేళ్ళ లోనైనా ఉందా ? అనే విషయాలు ఆలోచించి , కారు కొనుక్కోవాలి ! ఇంకో ముఖ్య మైన విషయం ! కారు ఒక గ్యాలను కు నలభై మైళ్ళు ప్రయాణించ వచ్చనీ , లేదా యాభై మైళ్ళు ప్రయాణం చేయ వచ్చనీ,  అనేక ప్రలోభాలు పెడుతూ ఉంటారు ! కానీ అవన్నీ స్టాండర్డ్ , అంటే ప్రామాణికమైన పరిస్థితులలోనే , ప్రాక్టికల్ గా అతి రద్దీ గా , అతి అధ్వాన్నం గా ఉండే రోడ్ల మీద కాదు !  అధ్వాన్నం గా ఉన్న రోడ్ల మీద , అతి రద్దీ గా ఉన్న ట్రాఫిక్ లో కారు నడిపితే , చాలా తరచు గా గేర్లు మార్చడం చేత , వాడు చెప్పిన నలభై మైళ్ళూ , కారు నడుపుతే, ఒక గ్యాలన్ కు బదులు రెండు గ్యాలన్ ల ఇంధనం తప్పని సరిగా అయి , ఖర్చు కాస్తా తడిసి మోపెడవుతుంది ! ఇక ప్రత్యామ్నాయ ఇంధనాలకోసం ప్రయత్నాలు చేసి,  ఎల్ పీ జీ గ్యాస్ తో కారు నడిపే,  అతి తెలివి ప్రదర్శిస్తూ ఉంటారు కొందరు !  అట్లా చేయడం ,కారు నాణ్యతను దెబ్బ తీయడమే కాకుండా , పర్యావరణ కాలుష్యం తో పాటుగా ,ప్రమాదాల తీవ్రత ఎక్కువ కావడానికి కూడా అవకాశం చేజేతులా కలిగించుకోవడమే !
వచ్చే టపాలో ఇంకొన్ని సంగతులు ! 
 
 

1. రక్షిత కారు చోదకం ( సేఫ్ గా కారు నడపడం) ఎట్లా ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 10, 2013 at 10:50 ఉద.

1. రక్షిత కారు చోదకం ( సేఫ్ గా కారు నడపడం)  ఎట్లా ? 

కారు సేఫ్ గా నడపడానికి  ప్ర ప్రధమం గా కావలసినది ,( right attitude ) రైట్ యాటి ట్యూ డ్, అంటే సరి అయిన ప్రవృత్తి . మోటు గా , ఓపిక కోల్పోయి , బాధ్యతా రహితం గా కారు నడిపితే , నడిపే వారే కాక , ఆ కారులో ప్రయాణిస్తున్న వారితో పాటుగా , రోడ్డును ఉపయోగిస్తున్న ఇతర ప్రయాణికుల భద్రతా , పాద చారుల భద్రతా కూడా  అపాయం లో పడుతుంది. ఈ రైట్ యాటి ట్యూ డ్,   అనేక శారీరిక , మానసిక పరిస్థితుల మీద ఆధార పడి  ఉంటుంది. ముఖ్యం గా, సరిపడినంత నిద్ర లేకపోవడమూ , విపరీతం గా అలసి పోయి ఉండడమూ , లేదా మద్యం , ఇతర మాదక ద్రవ్యాలు తీసుకుని ఉండడమూ , లేదా తీవ్రమైన మనస్తాపం చెందుతూ ఉండడమూ , అంటే తీవ్రమైన మానసిక వత్తిడి తో ఉండడమూ – లేదా ఆహారం కానీ పానీయాలు కానీ చాలా సమయం వరకూ తీసుకోకుండా , డ్రైవ్ చేయడమూ – ఈ కారణాలన్నీ కూడా రైట్ యాటి ట్యూ డ్ ను తీవ్రం గా ప్రభావితం చేస్తాయి. ఈ పరిస్థితులలో , ఓపిక నశించి డ్రైవింగ్ పొరపాట్లు చేసే రిస్కు ఎక్కువ అవుతుంది ! 
నిద్ర లేక పోవడం , అప్రమత్తత ను తక్కువ చేస్తుంది, అట్లాగే మద్యం సేవించడం వల్ల కాన్ఫిడెన్స్ ఎక్కువ అవుతుంది కానీ ఆ కాన్ఫిడెన్స్ కేవలం ఫాల్స్ కాన్ఫిడెన్స్ మాత్రమే ! అంటే   ( తాగి ) డ్రైవింగ్ చేస్తున్న వారు , తాము వంద మైళ్ళ వేగం తో డ్రైవింగ్ చేస్తున్నా కూడా చాలా సురక్షితం గా డ్రైవ్ చేస్తున్నామనే ఆత్మ విశ్వాసం తో ఉంటారు, యాక్సిడెంట్ అయ్యే కొద్ది క్షణాల ముందు వరకూ కూడా ! అందుకని మద్యం తాగి కారు నడపడం నిషిద్ధం ! వారు టాక్సీ లో బార్ కు కానీ పబ్ కు కానీ వెళ్లి , ఇంటికి కూడా టాక్సీ లో వెళ్ళడమే ఉత్తమం , ఎందుకంటే , కనీసం , రోడ్డు మీద ఉన్న ఇతర ప్రయాణికులు సురక్షితం గా ఉంటారు , అట్లా చేస్తే ! ( ఈ సలహా తో , మద్యం తాగడాన్ని ప్రోత్స హిస్తున్నట్టు కాదు ! ) 
ఈ క్రింద ఉన్న లింక్ మీద క్లిక్ చేస్తే , భారత దేశం లో 2010 లో రోడ్డు ప్రమాదాల వివరాలు గమనించ వచ్చు ! అందులో కనీసం నలభై శాతం రోడ్డు ప్రమాదాలు మద్యం తాగి వాహనాలు నడపడం వల్ల సంభవించినవే ! 
 
 
వచ్చే టపాలో ఇంకొన్ని సంగతులు ! 

 

కేశవర్ధనం. హేర్ ట్రాన్స్ ప్లాంటేషన్ ఎట్లా చేస్తారు ?

In ప్ర.జ.లు., మన ఆరోగ్యం., మానసికం, Our Health, Our minds on ఆగస్ట్ 6, 2013 at 9:11 సా.

కేశవర్ధనం. హేర్ ట్రాన్స్ ప్లాంటేషన్ ఎట్లా చేస్తారు ? 

 
స్త్రీలలో కేశవర్ధనం గురించి మనం చాలా విషయాలు తెలుసుకున్నాం కదా , క్రితం టపాలలో ! మరి పురుషులలో హేర్ ట్రాన్స్ ప్లాంటేషన్ ఎట్లా చేస్తారో వివరం గా తెలుసుకుందాం ! దీనిని తెలుగులో జుట్టు మార్పిడి అనచ్చేమో ! ఎందుకంటే , ఈ పద్ధతిలో ముఖ్యం గా జుట్టు బాగా పెరుగుతున్న చోటినుంచి కొంత మేర జుట్టును తీసికొని ,జుట్టు ఊడిపోతూ ఉన్న ప్రదేశం లో అంటిస్తారు ! దీనినే హేర్  ట్రాన్స్ ప్లాంటేషన్ అని అంటారు ! 
ఈ క్రింది విధం గా  అసలు పధ్ధతి ఉంటుంది :  
1. పురుషులలో తల వెనుక భాగం లో పెరుగుతున్న జుట్టు చాలా కాలం వరకూ ఊడి పోకుండా పెరుగుతూ ఉంటుంది కదా !  అందువల్ల ఈ ప్రదేశం లోనుంచి కొంత మేర జుట్టును తొలగిస్తారు ! ఆ తొలగించడం కేవలం క్షవరం చేసి కాదు ! ఎందుకంటే, జుట్టు మొదలు మాతమే సజీవ కణం తో ఉంటుంది అంటే , వెంట్రుక మొదట్లోనే జీవం తో ఉన్న కణం ఉంటుంది దీనినే హేర్  ఫాలికిల్ అంటారు అది లేక పొతే వెంట్రుక పెరగదు ! అందువల్ల  అంటించ వలసిన జుట్టును చర్మం తో సహా తీస్తారు ! అంటే  ఆ తల భాగం లో నొప్పి తెలియకుండా మత్తు ఇస్తారు. దీనిని స్థానిక అనస్తీశియా అంటారు అంటే లోకల్ అనస్థీసియా అని. దీనివల్ల స్పర్శ జ్ఞానం తాత్కాలికం గా పోతుంది. దానితో నొప్పి తెలియదు. అప్పుడు సమాంతరం గా ఒక చిన్న స్కేలు మందాన తల వెనుక భాగం లో గాటు అంటే అది దీర్ఘ చతురస్రాకారం గా ఉంటుందన్న మాట ! అంత మేర చర్మాన్ని ( అంటే వెంట్రుకలతో సహా ) కట్ చేస్తారు పదునైన సర్జికల్ నైఫ్ తో ! ( ఇంకో పధ్ధతి లో చర్మాన్ని కట్ చేయకుండా కేవలం ఒక్కొక్క వెంట్రుకనూ , దాని మూలం తో సహా ‘ పెకిలిస్తారు’ జాగ్రత్త గా , ప్రత్యేకమైన పరికరం తో , దీని వివరణ పైన ఉన్న చిత్రం లో ఉంది గమనించండి ).
2. అట్లా తీసిన భాగం లో వచ్చిన గ్యాప్ ను కుట్టివేస్తారు రెండు చివరాలా కలిపి. ఈ గాయానికి అంటే , కత్తి  తో చేసిన గాయానికి పైనా , క్రిందా కూడా జుట్టు సహజం గానే పెరుగుతూ ఉంటుంది కనుక , ఆ గాయం మాన గానే , అక్కడ చేసిన గాటు ద్వారా ఏర్పడిన మచ్చ కనబడదు ఎందుకంటే ఆ మచ్చ పై భాగం లో పెరుగుతూ ఉన్న జుట్టు క్రిందకు పెరిగి మచ్చను కనబడకుండా చేస్తుంది ! 
3. ఇపుడు దీర్ఘ చతురస్రాకారం లో తీసిన చర్మం నుంచి వెంట్రుకలను అతి జాగ్రత్తగా వేరు చేస్తారు ! అతి జాగ్రత్తగా ఎందుకంటే , ఈ వెంట్రుకలను కేవలం పీకేయ్యకుండా , వారి మొదళ్ళు కూడా ఉండేట్టు ‘ పెకిలిస్తారు ‘ మనం పైన తెలుసుకున్నాం కదా , వెంట్రుకల మొదళ్ళ లోనే సజీవ కణం ఉండేది ! ఆ కణం కనుక ప్రాణం కోల్పోతే , వెంట్రుక పెరగదు ఇక ! అందుకని ! ఇట్లా వెయ్యి నుంచి  రెండు వేల వరకూ వెంట్రుకలను ఆ తల వెనుక నుంచి  కత్తిరించిన చర్మ భాగం నుంచి వేరు చేస్తారు ! ఇది చాలా సమయం తీసుకుంటుంది సహజం గానే ! 
4. ఇట్లా వేరు చేసిన వెంట్రుకలను తల పైభాగం లో అంటే కాస్త ముందు భాగం లో ( ఎక్కడైతే బట్ట తల గా ఉంటుందో ఆ ప్రదేశం లో ) అతికిస్తారు ఒక్కటొక్కటి గా !  ‘ అతికించడం ‘ అంటే కేవలం జిగురు తో అతికించడం అనుకునేరు ! కాదు !  ఒక్కో వెంట్రుకనూ , మొదళ్ళ తో సహా అత్యంత జాగ్రత్త గా పెకిలించి , కేవలం జిగురుతో అతికిస్తే ఏం ప్రయోజనం ? వెంట్రుక మొదళ్ళ లో ఉన్న సజీవ కణం నశిస్తుంది అట్లా చేస్తే ! అందువల్ల ఒక్కొక్క వెంట్రుకనూ , మళ్ళీ  ప్రత్యేక మైన శ్రద్ధ తో ఒక్కో చిన్న కత్తి గాటు పెట్టి ఆ గాటు లో , వెంట్రుక మొదలు ను అంటే ఫాలికిల్ ను ‘ పాతుతారు ‘ ఈ మొత్తం కూడా చాలా సమయమూ , శ్రమా తీసుకుంటుంది ! 
5. ఈ మొత్తం పధ్ధతి కనీసం ఆరు నుంచి ఎనిమిది గంటలు పట్ట వచ్చు ! 
6. రెండు మూడు వారాలలో తల వెనుక చేసిన గాయమూ , తల మీద చేసిన చిన్న చిన్న గాయాలూ ( లేదా గాట్లూ ) పూర్తి గా మానుతాయి ! 
7. కొందరు వైద్యులు, తల మీద ఈ సమయం లో రాసుకోడానికి మినాక్సిడిల్  కూడా వాడమని సలహా ఇస్తారు ! అంతే కాక యాంటీ బయాటిక్స్ కూడా అవసరం ఉండవచ్చు , ఈ సమయం లో ! పైన ఉన్న చిత్రం లో వివరణ అంతా కనిపిస్తుంది ! 
వచ్చే టపాలో ఇంకొన్ని సంగతులు ! 

స్త్రీలలో కేశవర్ధనం. 8. మినాక్సిడిల్ మంచిదేనా ?

In ప్ర.జ.లు., మన ఆరోగ్యం., మానసికం, Our Health, Our minds on ఆగస్ట్ 3, 2013 at 11:51 ఉద.

స్త్రీలలో కేశవర్ధనం. 8. మినాక్సిడిల్  మంచిదేనా ? 

 
స్త్రీలలో జుట్టు పలుచ బడడం నివారించడానికి మార్కెట్ లో అనేక మందులు లభ్యం అవుతున్నాయి కదా ? అందులో ఏవి మోసం, ఏవి నిజం ?  ఈ సంగతులు వ్యాపార ప్రయోజనాల దృష్ట్యా ఎవరూ చెప్పరు, కొనే వారికి ! ఎందుకంటే , వారికి కావలసినది కేవలం మీ డబ్బే కదా ! మరి మీరు జాగ్రత్త వహించి , ఆ మందులు నిజం గా పనిచేస్తాయో లేదో  తెలుసుకోవాలి. 
అమెరికాలో భారత దేశం లో లాగా కాక , మార్కెట్ లో అమ్మే ప్రతి మందునూ , పరీక్ష చేసి , ఆమందు నిజం గా నే ఉపయోగకరమో లేదో నిర్ణయించి దానిని మాత్రమే అప్రూవ్ చేస్తారు.  స్త్రీలలో జుట్టు పలుచ బడడానికి  అలోపీశియా ఏరి యేటా అనే జబ్బు ఒక ముఖ్య కారణం. ( దీనిని గురించి వివరం గా క్రిందటి టపాల లో తెలుసుకున్నాం కదా ! ) ఈ కండిషన్ లో తల మీద ఏ ఒక్క భాగం లోనో కాకుండా , తలంతా జుట్టు పలుచ బడుతుంది అంటే ఒత్తు గా ఉన్న జుట్టు పలుచ బడుతుంది. దీనికి వివిధ మందుల తో అవసరం లేని నివారణ చర్యలే కాకుండా , మందులతో కూడా చికిత్స చేయ వచ్చు ! 
అమెరికా వారు దీనికోసం అప్రూవ్ చేసిన మందు ఒకటంటే ఒకటే ! దానిపేరు మినాక్సిడిల్. దీని గురించి తెలుసుకుందాం ఇప్పడు . 
మినాక్సిడిల్  మొదట అధిక రక్త పీడనం , అంటే హై బీపీ ని తక్కువ చేయడానికి కనుక్కో బడ్డది. అధిక రక్త పీడనం తక్కువ చేయడం లో చికిత్స గా తీసుకుంటున్న వారిలో , కొత్త వెంట్రుకలు మొలవడం శాస్త్రజ్ఞులు గమనించారు ! దానితో తరువాత పరిశోధనలు కూడా చేసి , మినాక్సిడిల్ ను జుట్టు పెరగడం కోసం ఉపయోగించుకునే విధం గా ,మార్కెట్ లో ,హేర్ ఆయిల్ రూపం లో ప్రవేశ పెట్టారు. ఈ మినాక్సిడిల్ మార్కెట్ లో, రొగైన్ అనే పేరుతొ అమ్మ బడుతుంది. గుర్తుంచుకోవలసిన విషయం : ఈ మినాక్సిడిల్ రెండు శాతం మాత్రమే ఉండాలి, కొనే మందులలో.  కొన్ని బ్రాండ్ లలో అయిదు శాతం మినాక్సిడిల్  అమ్ముతారు. అయిదు శాతం మినాక్సిడిల్ ఉండే హేర్  టానిక్ లకు అమెరికా వారు లైసెన్స్ ఇవ్వలేదు. అందువల్ల కొనే సమయం లో కేవలం రెండు శాతం మినాక్సిడిల్ ఉన్న బ్రాండ్ లే కొనుక్కోవాలి , అయిదు శాతం మందు ఉంటే  ఎక్కువ జుట్టు వస్తుందేమో అని అత్యాశ కు పోకుండా ! ఎక్కువ శాతం అంటే రెండు శాతం కన్నా ఎక్కువ శాతం మినాక్సిడిల్  కనుక పూసుకుంటే , రక్త పీడనం తగ్గి లో బీపీ వచ్చి కళ్ళు తిరగడమూ , లేదా సొమ్మసిలి పడి పోవడమూ జరగ వచ్చు. ఎందుకంటే  మినాక్సిడిల్ , తల మీద పూసుకున్నపుడు , చర్మం ద్వారా శరీరం లోకి పీల్చబడి రక్త పీడనాన్ని తగ్గిస్తుంది ! 
మరి మినాక్సిడిల్ నిజంగానే స్త్రీలలో ఉపయోగ పడుతుందా ?: ఈ విషయం మీద నిర్ణయం తీసుకోవలసినది, ఆ మందు వాడుదామనుకునే వారే ! ఎందుకంటే   ఈ మినాక్సిడిల్  మీద చేసిన పరిశోధన ఈ క్రింది విధం గా ఉంది :
1. మినాక్సిడిల్ వాడిన వారి వయసు 18 నుంచి 45 సంవత్సరాల మధ్య ఉంది. 
2. వారికి మైల్డ్ నుంచి మోడరేట్ గా జుట్టు పలుచబడి ఉంది ( అంటే కొద్ది నుంచి ఒక మోస్తరు గా పలుచబడి ఉంది )
3. వారికి ఎనిమిది నెలలు మినాక్సిడిల్ ఇవ్వబడింది అంటే తల మీద రాసుకునే రెండు శాతం మందు గా . 
4. అట్లా వాడిన వారిలో 40 శాతం మందికి కొద్దిగానూ , 19 శాతం మందికి ఒక మాదిరి గానూ జుట్టు పెరిగినట్టు గమనించారు. అంటే వంద మంది వాడితే , రమారమి అరవై మందికి, ఎనిమిది నెలల తరువాత జుట్టు కొంత వరకూ పెరిగింది, మినాక్సిడిల్ తో ! 
5. అదే సమయం లో ఆ మందు అప్లై చేసుకోకుండా కేవలం తల నూనె పెట్టుకున్న వారికి కూడా 7 శాతం మంది లో ఒక మాదిరిగానూ , 33 శాతం మందికి కొద్ది గానూ జుట్టు పెరిగింది ! అంటే వంద మంది ఏ మందూ వాడక పోయినా కూడా నలభై  మందిలో జుట్టు కొంత వరకూ పెరిగినట్టు గమనించడం జరిగింది ! 
వచ్చే టపాలో ఇంకొన్ని సంగతులు ! 
 

స్త్రీలలో కేశవర్ధనం ఎట్లా ?7. ఏ గర్భ నిరోధక పిల్స్ తో జుట్టు పలుచబడదు ?

In ప్ర.జ.లు., మన ఆరోగ్యం., మానసికం, Our Health, Our minds on జూలై 30, 2013 at 9:55 సా.

స్త్రీలలో కేశవర్ధనం ఎట్లా ?7. ఏ గర్భ నిరోధక  పిల్స్  తో  జుట్టు పలుచబడదు ?

 
 
స్త్రీలలో కేశవర్ధనం లో భాగం గా క్రితం టపాలో టీలోజెన్ అనే ముఖ్య కారణం గురించి తెలుసుకున్నాం కదా ! మరి కాంట్రా సెప్ టివ్ పిల్స్  మాటేంటి ? కాంట్రా సెప్ టివ్ పిల్స్, వీటినే గర్భ నిరోధక పిల్స్ అని కూడా అంటారు కదా ! 
సామాన్యం గా ఈ రకమైన పిల్స్  ఎంతో క్షేమ దాయక మైనవి. చాలా మందిలో ఏవిధమైన సైడ్ ఎఫెక్ట్ లూ రావు. అంతే కాక చాలా సమర్ధ వంతం గా గర్భాన్ని నిరోధిస్తాయి ! కానీ కొన్ని రకాల గర్భ నిరోధక పిల్స్ , జుట్టు ఊడి పోవడానికి కారణం అవుతాయి. ప్రత్యేకించి యాన్ డ్రో జన్  అంటే పురుష హార్మోను కలిసి ఉన్న పిల్స్ స్త్రీలు ఎక్కువ కాలం వాడితే , అవి జుట్టు పలుచ బడడానికి  కారణ మవుతాయి . 
అమెరికాలో ఈ జుట్టు ఊడి పోవడం అనే సమస్య మీద విపరీతమైన అవేర్ నెస్ ఉంది , ప్రజలలోనూ , ప్రభుత్వం లోనూ ! అందుకనే అక్కడ హేర్ లాస్ అసోసియేషన్ అని ఒక సంఘం ఉంది ( A H L A ). ఆ సంఘం , నిపుణుల తో , మార్కెట్ లో లభ్యం అవుతున్న కాంట్రా సెప్ టివ్ పిల్స్ మీద నిపుణుల చేత విశ్లేషణ చేయించి ఈ క్రింది సూచనలు చేసింది :The American Hair Loss Association (ALHA) recognizes that for the most part oral contraceptives are a safe and effective form of birth control. It also recognizes that the Pill has been clinically proven to have other health benefits for some women who use them. However, the AHLA believes that it is imperative for all women — especially for those who have a history of hair loss in their family — to be aware of the potentially devastating effects birth control pills can have on normal hair growth.The AHLA recommends that all women interested in using oral contraceptives for the prevention of conception should only use low-androgen index birth control pills. Pills with the least androgenic activity include norgestimate (in Ortho-Cyclen, Ortho Tri-Cyclen), norethindrone (in Ovcon 35), desogestrel (in Mircette), or ethynodiol diacetate (in Demulen, Zovia). 
1. తప్పని సరి పరిస్థితులలో , బర్త్ కంట్రోలు కోసం పిల్స్ వాడుదామని నిర్ణయం తీసుకుంటే , స్త్రీలు వీలైనంత తక్కువ యాన్ డ్రో జెన్ ఉన్న పిల్స్ నే వాడాలి. అంటే వారు తీసుకునే పిల్స్ లో యాన్ డ్రో జెన్ అతి తక్కువ పాళ్ళ లో ఉండాలి ! 
2. నార్ జేస్టి మేట్ , నార్ ఎథిన్ డ్రో న్ , డిసో జెస్ ట్రె ల్  ఇంకా ఎథినొ డయోల్ డై ఎసిటేట్ . ఈ మందులలో అతి తక్కువ శాతం యాన్ డ్రో జెన్ ఉంటుంది. 
ఈ క్రింద సూచించిన ప్రో జెస్టిన్ ఉన్న మందులు తీసు కుంటే అవి ఎక్కువ జుట్టు ఊడి పోవడానికి రిస్కు ఎక్కువ చేస్తాయి 
1. ప్రో జెస్టిన్ ఇంప్లాంట్ లు ( వీటినే నార్ ప్లాంట్ అని కూడా పిలుస్తారు )
2. ప్రో జెస్టిన్  ఉన్న హార్మోను ఇంజెక్షన్ లు 
3. ప్రోజేస్టిన్ ఉన్న స్కిన్ ప్యాచ్ లూ 
4. లేదా ప్రో జెస్టిన్ ఉన్న వాజైనల్ రింగ్ లూ. 
 
పైన ఉదహరించిన పిల్స్ కనుక దీర్ఘ కాలం తీసుకుంటే , అవి సహజం గానే శరీరం లో హార్మోనులలో తీవ్రమైన మార్పులు కలిగించి , గర్భ నిరోధం కలిగించడమే కాకుండా , జుట్టు ఊడి పోవడానికీ , ముఖ్యం గా పలుచ బడ డానికి కారణమవుతాయి ! ప్రత్యేకించి వంశ పారంపర్యం గా జుట్టు ఊడి పోవడం సమస్య ఉన్న వారు ఈ విషయం లో అత్యంత శ్రద్ధ తీసుకోవాలి ! మీకు పిల్స్ తీసుకోవడం తప్పని సరి అనిపించినపుడు , పైన ఉన్న విషయాలు మీరు అవగాహన చేసుకోవడమే కాక , మీరు స్పెషలిస్ట్ దగ్గరకు వెళ్ళినపుడు , ఈ విషయాలు వారితో కూడా ముఖా ముఖీ గా చర్చించి , మీకు క్షేమ దాయకమైన పిల్స్ ను రాయించు కోవాలి ! ప్రత్యేకించి దీర్ఘ కాలం కనుక పిల్స్ వాడుదామని నిర్ణయం తీసుకుంటే ! 
వచ్చే టపా లో ఇంకొన్ని సంగతులు !