Our Health

Archive for the ‘Our Health’ Category

ప్ర.జ.లు. 2 . పక్ష వాతం నివారణ మానవ సాధ్యమేనా ? అంతా దైవాదీనమా ?.

In ప్ర.జ.లు., Our Health, Our minds on సెప్టెంబర్ 18, 2012 at 7:38 సా.

ప్ర.జ.లు. 2 . పక్ష వాతం నివారణ మానవ సాధ్యమేనా ? అంతా దైవాదీనమా ?.

ప్రశ్న : క్రితం టపాలో పక్ష వాతం సూచనలు తెలుసుకున్నాము కదా ! మరి  పక్ష వాతం నివారణ కు మానవ ప్రయత్నం ఏమైనా  అవసరమా? లేక అంతా దైవాధీనమా ?! 
జవాబు: ఇది చాలా ముఖ్యమైన ప్రశ్న.  పక్ష వాతానికి కారణాలు చాలా ఉన్నాయి. ఈ కారణాలు మనం తెలుసుకుంటే , వాటిని నివారించు కోవడానికి అవకాశం ఉంటుంది. పూర్వ కాలం లో లాగా కాక , ఆధునిక వైద్య శాస్త్రం  లో జరుగుతున్న అనేక పరిశోధనలూ, పరిశీలనల వల్ల పక్ష వాతానికి కారణాలు వెలుగులోకి వచ్చాయి.  
ప్రశ్న:  పక్ష వాతం గురించి కేవలం వయసు మీరిన వారు తెలుసుకుంటే సరిపోతుందా ? యువత కు ఎందుకు ఈ వెతలు ? :
జవాబు : అనేక కారణాల వల్ల పక్ష వాతం , వయసు మీరిన వారితో పాటు వయసులో ఉన్న వారి కి కూడా వస్తూ ఉందని , భారత దేశం లో వివిధ పట్టణాలలో చేసిన పరిశీలనల వల్ల తెలిసింది. అంతే కాక , పక్ష వాతం రాకుండా ముందు జాగ్రత్తలు ఏళ్ల తరబడి తీసుకుంటూ ఉంటేనే , ఒక్క సారి గా , ఆకస్మికం గా వచ్చే పక్ష వాతం రాకుండా ఉండడానికి అవకాశం హెచ్చుతుంది. ఇంకో విధం గా చెప్పుకోవాలంటే , బాల్యం లో , యవ్వనం లో యువత తీసుకునే ఆరోగ్య పరమైన జాగ్రత్తలూ , అలవాట్లూ ,  భవిష్యత్తులో వారికి వయసు మీరుతూ ఉన్నప్పుడు , వారిని ప్రభావితం చేస్తాయి, పాజిటివ్ గా కానీ , నెగెటివ్ గా కానీ , అంటే , వారి ఆరోగ్యాన్ని  పెంపొందించేవి గా కానీ , లేదా వారి ఆరోగ్యానికి హాని చేసేవి గా కానీ !  అందువల్ల , వయసు మీరిన వారితో పాటుగా , వయసు లో ఉన్న వారు కూడా అతి జాగ్రత్త గా   గ్రహించ వలసిన విషయాలు ఉన్నాయి ,  వారి ఆరోగ్యం కోసం ! 
పక్ష వాతానికి కొన్ని రిస్కు ఫ్యాక్టర్ లు ఉన్నాయి.  ఆ రిస్కు ఫ్యాక్టర్ లు ఉన్న వారిలో పక్ష వాతం రావడానికి అవకాశాలు ఎక్కువ అవుతూ ఉంటాయి. అంటే వారికి , ఆ రిస్కు ఫ్యాక్టర్ లు లేని వారితో పోలిస్తే , పక్ష వాతం వచ్చే అవకాశాలు ఉంటాయి , అంతే కానీ , వారికి తప్పనిసరిగా వస్తుందని అర్ధం చేసుకో కూడదు. 
 
ఆ రిస్కు ఫ్యాక్టర్ లు ఏమిటో చూద్దాము ఇప్పుడు .
1. వయసు  65  ఏళ్ళు  దాటిన వారిలో .
2. కుటుంబం లో , తల్లి దండ్రులు , తాత , సహోదరులు వీరిలో ఎవరికి పక్ష వాతం వచ్చి ఉన్నా , మిగతా కుటుంబ సభ్యులలో ఆ అవకాశం ఉంటుంది. 
3. ఆసియా వాసులలోనూ , ఆఫ్రికా , కరీబియన్ వాసులలోనూ పక్ష వాతం వచ్చే అవకాశాలు మెండు. దీనికి కారణం , వారికి ఉండే రక్త పీడనం , ఇంకా మధు మేహం లాంటి జబ్బుల వల్లనే అని భావించ పడుతుంది. 
4. అంతకు ముందే , గుండె పోటు కానీ ,  TIA  కానీ వచ్చిన వారికీ , ఇంకా అంతకు ముందు కొద్ది తీవ్రత తో పక్ష వాతం వస్తే కానీ , వారికి మళ్ళీ పక్ష వాతం వచ్చే అవకాశం హెచ్చుతుంది. 
పైన ఉదాహరించిన కారణాలను మార్చ లేము కదా అందువల్ల   మిగతా కారణాలను మనం వివరం గా తెలుసుకుంటే , వాటిని మార్చుకోవడానికి అవకాశాలు ఎక్కువ. తద్వారా పక్ష వాతాన్ని చాలా వరకూ నివారించు కోవచ్చు. 
 
వచ్చే టపాలో పక్ష వాతం లో రకాలు , వాటి గురించీ తెలుసుకుందాము ! 
 

పక్ష వాతం లేదా స్ట్రోకు ( stroke ) సూచనలు.

In ప్ర.జ.లు., Our Health, Our minds on సెప్టెంబర్ 17, 2012 at 7:58 సా.

పక్ష వాతం లేదా స్ట్రోకు ( stroke ) సూచనలు.


F.A.S.T.
ప్రశ్న : పక్ష వాతాన్ని ఎట్లా గుర్తు పట్ట వచ్చు ?
జవాబు : పక్ష వాతం, దీనినే స్ట్రోకు stroke అని కూడా అంటారు. ఆధునిక జీవన శైలి వల్లా , ఆహారపు అలవాట్ల వల్లా , పక్ష వాతం చాలా ఎక్కువ గా మానవులను బాధిస్తూ ఉంది. దీనిని ఎంత త్వర గా కనుక్కుంటే , అంత త్వరగా వైద్య సహాయం అందించి , శాశ్వతం గా పక్ష వాతం వల్ల దేహం లో వచ్చే మార్పులను నివారించడమే కాకుండా , వాటి తీవ్రతను కూడా తక్కువ చేయ వచ్చు. పక్ష వాతం వచ్చిన మొదటి గంట లో , దానిని గుర్తు పట్టి , వైద్య సహాయం అందిస్తే , మరణాలను కూడా నివారించ వచ్చు.
ప్రశ్న : ప్ర ప్రధమం గా కనిపించే సూచనలు ఏమిటి ?
జవాబు :
1. అకస్మాత్తు గా దేహం లో ఒక సగ భాగం కానీ , చేయి , కాలు , కానీ ,ముఖం కానీ మొద్దు బారటం
2. అకస్మాత్తు గా తిక మక పడడం ( confusion ) మాట తడ బడడం , లేదా మాట రాక పోవడం , లేదా ఎదుటి వారు మాట్లాడుతున్నది అర్ధం చేసుకోలేక పోవడం.
3. ఆకస్మికం గా ఒక కంటి లో కానీ రెండు కళ్ళ లో కానీ చూపు పోవడం లేదా చూపు చాలా మందగించడం.
4. ఆకస్మికం గా కళ్ళు తిరగడం , సరిగా నడవలేక పోవడం, లేదా నడిచే సమయం లో బ్యాలెన్స్ కోల్పోయి , పడ బోవడం లేదా పడడం.
5. ఆకస్మికం గా, అకారణం గా తీవ్రం గా తలనొప్పి రావడం.
పైన చెప్పిన మార్పులు , చాలా పరిశీలన చేస్తే కానీ సామాన్య జనానీకానికి అవగాహన ఉండదు.
తరువాత వచ్చే మార్పులు ఈ క్రింది విధం గా ఉంటాయి.
బ్రిటిష్ నేషనల్ హెల్త్ సర్విస్ వారు ఒక వీడియో ప్రకటన తయారు చేశారు. దాని ప్రకారం
ఫాస్ట్ అనే పదం గుర్తు ఉంచుకోండి. ఫాస్ట్ అంటే తెలుగు లో వేగం అని అర్ధం కదా ! దీని వివరాలు చూద్దాము. ఇది చదివిన తరువాత మీరు పైన ఉన్న వీడియో కూడా చూడండి.
సూచనలు సరిగా అర్ధం అవడం కోసం.
F.A.S.T.
F అంటే FACE. :అకస్మాత్తు గా ముఖం ఒక ప్రక్కకు లాగి నట్టు అవడం.
A అంటే ARMS. : ఒకటి కానీ రెండూ కానీ చేతులు శక్తి హీనం అయి పోవడం లేదా బలహీన పడి లేవ నెత్త లేక పోవడం.
S అంటే SPEECH.: మాట తడబడడం లేదా పూర్తి గా మాట పడి పోవడం, లేదా అర్ధం కాకుండా మాట్లాడడం.
T అంటే TIME . పైన ఉన్న లక్షణాలు ఎవరిలోనైనా గమనిస్తే వెంటనే కాల యాపన చేయకుండా , ఎమర్జెన్సీ వార్డు కు తీసుకు వెళ్ళాలి, తగిన చికిత్స కోసం.
వచ్చే టపాలో ఇంకొన్ని ప్ర.జ.లు.

హగ్గులూ , హ్యాండ్ షేకులూ ! .1. అమ్మ ఆలింగనం.

In మానసికం, Our Health, Our minds on సెప్టెంబర్ 10, 2012 at 7:21 సా.

హగ్గులూ , హ్యాండ్ షేకులూ ! .1. అమ్మ ఆలింగనం.

మన బాల్యం నుంచీ మనకు  ఏ చిన్న గాయం తగిలినా , ఏ మాత్రం ఆలోచించ కుండా  అమ్మ దగ్గరికి  పరిగెత్తే వాళ్లము కదా ! మనం ఆ విధం గా అమ్మ కమ్మని మాటలూ , దీవెనలూ , ఆప్యాయత, ప్రేమ తో కూడిన ఆలింగానాలూ , మనం పెరిగి పెద్దయాక కూడా ,అంతే ప్రభావం తో మన జీవితాలలోని వత్తిడులూ, కష్టాలూ , నిరాశా నిస్ప్రుహలూ , భయాలూ, ఆందోళన లూ  , ఆ ప్రేమా , వాత్సల్యాలతో అమ్మ ఇచ్చే ఆలింగనం లో వెన్న పూస లా కరిగి పోతాయి.  ఏళ్ళు గడిచే కొద్దీ ,  మనంతట మనం ,  మన జీవితాలలో ఒడు దుడుకులను , స్వతంత్రం గా అధిగమించి , ఆత్మ విశ్వాసం తో ముందుకు సాగి పోతున్నా కూడా  ,  మనం సాగించే జీవన యానం లో , సదా మన శ్రేయస్సు కోరే , ఆ కమ్మని అమ్మ ఒడి కోసం , అప్పుడప్పుడూ పరితపిస్తూ ఉంటాము.  ఆ ఆలింగనం లో మన బాధలు అన్నీ కరిగించుకోవాలని అనుకుంటూ ఉంటాము కూడా ! 
జన్మ నిచ్చే తల్లి ఆలింగనం, శిశువులకు , సంతానానికీ  ఎంతో స్వాంతన చేకూరుస్తుంది.  ఇటీవల శాస్త్రజ్ఞులు , దేశ భాషల తేడాలు ఏవీ లేకుండా ,  మాత్రు మూర్తులు తమ పిల్లలకు ఇచ్చే ఆలింగనం ఎంతో ఆరోగ్య కరమైనదీ , లాభ దాయకమైనదీ అని తేల్చారు. ఇందులో పెద్దగా చెప్పుకోవలసినది ఏమీ లేదు ఎందుకంటే , ఈ విషయం అందరికీ తెలిసినదే కదా ! కానీ  శాస్త్రజ్ఞులు కించిత్తు ముందుకు పోయి , శాస్త్రీయం గా  తల్లి ఆలింగనం వల్ల  లాభాలు పరిశీలించారు. తీవ్రమైన మానసిక వత్తిడి ఉన్నపుడు, జీవితం దుర్భరమైనట్టు అనిపించినప్పుడూ , తల్లి  ఇచ్చే ఆలింగనం , వత్తిడి ని తగ్గించి , తద్వారా రక్త పీడనాన్ని కూడా తగ్గించి , మనసుకు ఎంతో ప్రశాంతత ను కలిగిస్తుందని తెలిసింది. హృదయ పూర్వకం గా తల్లి ఇచ్చే ఆలింగనం , సంతానంలో హృదయ సంబంధ మైన వ్యాధులు కూడా తగ్గిస్తుందని తెలిసింది. శాస్త్రీయ పరిశోధనలలో  హగ్గు చేసుకునే వారిలో  సిస్టోలిక్ ఇంకా డయా స్టోలిక్ రక్త పీడనాలు రెండూ , హగ్గు చేసుకొని వారి లో కంటే తక్కువ గా ఉంటాయని నిర్ధారించ బడింది ( ఈ పరిశోధన నార్త్ కరోలినా విశ్వ విద్యాలయం వారు చేశారు ) .  ఆ విధం గా సంతానం  దీర్ఘాయుషు తో జీవించడానికి సహాయ పడుతుంది కూడా !  కేవలం హగ్గు ఒక  యాంత్రిక మైన ఆలింగనం కాకుండా ,  ఆప్యాయతా, అనుభూతుల సమ్మేళనం అయినప్పుడు దాని ప్రభావం ఎక్కువ గా ఉంటుంది. 
అందుకే ఒక కవి చక్కని పాట : అమ్మ అన్నది, ఒక కమ్మని మాట , అది ఎన్నెన్నో తెలియనీ మమతల మూటా ! అని.
 
వచ్చే టపాలో ఇంకొన్ని సంగతులు ! 

హగ్గులూ , హ్యాండ్ షేకులూ !

In ప్ర.జ.లు., మానసికం, Our Health, Our minds on సెప్టెంబర్ 9, 2012 at 6:08 సా.

హగ్గులూ , హ్యాండ్ షేకులూ !

 

మానవులనందరినీ ,  జన్మ నిచ్చిన తల్లి ప్ర ప్రధమం గా తన హృదయానికి హత్తుకుని ముద్దాడుతుంది. అక్కడి తో మొదలవుతుంది, ఈ ఆలింగనాల , లేదా హగ్గుల  హడావిడి. అసూయా ద్వేషాలకు తావు లేకుండా ,  హృదయ పూర్వకం గా ఇచ్చే హగ్గు , మనసుకు ఎంతో ప్రశాంతతనూ , ఆనందాన్నీ , ఇస్తుంది. అంతే కాక  నేను నీ ఆప్తుడిని , లేదా ఆప్తురాలిని ,  నీ శ్రేయస్సు కోరే  వారము ‘ అని కూడా తెలియ చేస్తుంది ఆ హగ్గు. తల్లి దండ్రుల తో ఆలింగనం , ఆప్యాయతనూ , ఆపేక్షనూ తెలియ చేస్తూ ఉంటుంది.  స్నేహితులతో చేసే ఆలింగనం లేదా హగ్గు , స్నేహ పూర్వకం గా , రి అషురింగ్ గా ఉంటుంది. ప్రేమికుల మధ్య ఆలింగనం  ప్రేమ, ప్రణయ భావనలను ప్రతి బింబిస్తూ ఉంటుంది.  రాజ కీయ నాయకుల హగ్గు ‘ రాజకీయం ‘ గా ఉంటుంది. మరి మనం ఈ హగ్గుల, హ్యాండ్ షేకుల కధా కమామీషు తెలుసుకుందాం వచ్చే టపా నుంచి ! 

జీవన శైలి లో మార్పుల తో 50 % క్యాన్సర్ లు నివారించ వచ్చు

In ప్ర.జ.లు., Our Health on సెప్టెంబర్ 8, 2012 at 8:05 సా.

జీవన శైలి లో మార్పుల తో 50 % క్యాన్సర్ లు  నివారించ వచ్చు ! 

ప్రశ్న: మనం వివిధ క్యాన్సర్ ల గురించి ఎప్పుడూ తెలుసుకుంటూ ఉంటాము. మరి  వాటి నివారణకు మనం చేయ వలసినది ఏమైనా ఉందా ? లేక  అంతా దైవాధీనమా ? 
జవాబు: ఇది చాలా మంచి ప్రశ్న .  సాధారణం గా మనం వివిధ క్యాన్సర్ ల గురించి వింటూ ఉంటాము. తెలిసిన వారికి ఆ క్యాన్సర్ వచ్చింది , లేదా వీరికి ఈ క్యాన్సర్ వచ్చింది. ‘ అయ్యో పాపం, ఆరోగ్యం గా తిరిగే వాడు లేదా చాలా ఆరోగ్యం గా ఉండేది ఆమె ‘ అని కూడా మనం  అనుకుంటూ, కలత చెందుతూ ఉంటాము , బాధ పడుతూ ఉంటాము. 
ఇటీవల ప్రపంచ క్యాన్సర్ కాంగ్రెస్ అంటే ప్రపంచ క్యాన్సర్  మీటింగ్ ఒకటి జరిగింది, కెనడా లో ( క్యుబెక్ అని ఒక పట్టణం లో ).  ప్రపంచం లోని వివిధ దేశాలలో ఉన్న క్యాన్సర్ స్పెషలిస్టులు  ఈ మీటింగ్ లో తమ తమ పరిశోధనా ఫలితాలను తెలిపారు. వాటి  సంగ్రహమే ఈ టపా.వాషింగ్టన్ విశ్వ విద్యాలయానికి చెందిన గ్రహం కోల్దిజ్ అనే శాస్త్రజ్ఞుడు తన పరిశోధనా  ఫలితాలను  ‘ ప్రపంచం లో వివిధ దేశాలలో  క్యాన్సర్ నివారణ చర్యలను విస్తృతం గా అమలు పరిస్తే , వచ్చే పదిహేను , ఇరవై సంవత్సరాలలో ,  అనేక  రకాల క్యాన్సర్ లను చాలా వరకూ నివారించ వచ్చు ‘ అని ఘంటా పధం గా చెప్పాడు.  ప్రస్తుతం అమెరికా లోని  యుటా  రాష్ట్రం లో స్మోకింగ్ చేస్తున్న వారు కేవలం పదకొండు శాతమే !  అంటే స్మోకింగ్ చేసే వారు, అనేక చర్యల ఫలితం గా చాలా తక్కువ అయ్యారు.  గ్రహం అంచనా ప్రకారం , స్మోకింగ్ నివారణ చర్యలను వివిధ దేశాలలో, ఇదే విధం గా ,  ఖచ్చితం గా అమలు చేస్తే , స్మోకింగ్ వల్ల వచ్చే క్యాన్సర్ లను మూడు వంతులు నివారించ వచ్చు అని పేర్కొన్నాడు.  
అదే విధం గా ఊబకాయం అంటే ఒబీసిటీ ప్రస్తుతం కనీసం ఇరవై శాతం క్యాన్సర్ లకు కారణం. వివిధ దేశాలలో ప్రజలు , ఊబకాయం లేకుండా , నివారణ చర్యలు తీసుకుంటే , ఒక ఇరవై ఏళ్ళ లో ఒబీసిటీ వల్ల కలిగే వివిధ క్యాన్సర్ లను యాభయి శాతం వరకూ నివారించ వచ్చు. మనకందరికీ తెలిసిందే కదా , ఒబీసిటీ నివారణ కేవలం మనం తీసుకునే రెండు చర్యల వల్ల  సఫలం అవుతుంది. ఒకటి  డయట్. రెండు ఎక్సర్సైజ్. 
అట్లాగే   బాల్యం లో , తప్పని సరిగా టీకాలు వేయించుకోవడం వల్ల  కూడా క్యాన్సర్ లను వంద శాతం నివారించు కోవచ్చు. ప్రత్యేకించి  హ్యూమన్ పాపిలోమా వైరస్ , హెపటైటిస్  బీ ఇంకా సి  వైరస్ లు కలిగించే క్యానర్ లకు టీకాలు అందుబాటు లో ఉన్నాయి. ఇది మన వైద్య శాస్త్ర విజ్ఞానం  చేసిన  విశేషమైన పురోగతి.  ఈ టీకాలను సరి అయిన సమయం లో చేయించు కుంటే  ఈ వైరస్ లు కలిగించే అనేక క్యాన్సర్ లను వంద శాతం నివారించు కోవచ్చు.టమాక్సిఫెన్ అనే మందు కూడా  కొన్ని రకాల రొమ్ము లేదా స్తన క్యాన్సర్ లను కనీసం యాభయి శాతం నివారిస్తుంది అని అనేక పరిశోధనల వల్ల విశదమైంది. అదే విధం గా మనం సామాన్యం గా జ్వరం వచ్చినప్పుడు వేసుకునే యాస్పిరిన్ టాబ్లెట్ కూడా  పెద్ద ప్రేగు లేదా కోలన్ క్యాన్సర్ ను కనీసం నలభై శాతం నివారిస్తుంది.
తెలిసింది కదా , మానవులలో వచ్చే అన్ని క్యాన్సర్ లూ దైవాధీనం కాదు , మానవాధీనం కూడా అని !  నివారణ మీ చేతులలో నే ఉంది కదా ! కాల యాపన ఎందుకు ఆచరణకు? ! 
( రొమ్ము క్యాన్సర్ , సెర్వికల్ క్యాన్సర్ , లంగ్ క్యాన్సర్ నివారణ చర్యల గురించి , విపులం గా క్రితం టపాలలో తెలియ చేయడం జరిగింది. వీలు చేసుకుని  బాగు ఆర్కివ్స్ లో చూడండి మీ ‘ బాగు ‘ కోసం ! ) 
వచ్చే టపాలో ఇంకొన్ని సంగతులు ! 

ప్ర.జ.లు.2. ఎఫైర్ లూ , ఇన్ ఫిడిలిటీ లూ !

In ప్ర.జ.లు., మానసికం, Our Health, Our minds on ఆగస్ట్ 21, 2012 at 10:27 సా.

 ప్ర.జ.లు.2. ఎఫైర్ లూ , ఇన్ ఫిడిలిటీ లూ ! 

అఫైర్ కానీ ఇన్ ఫిడిలిటీ కానీ , భౌతికం గా అంటే శారీరికం గా సంబంధం కావచ్చు, లేదా ఎమోషనల్ గా సంబంధం కావచ్చు. అంతే కాక , కేవలం ఎమోషనల్ , ఇంకా శారీరికం గానే కాక ఈ సంబంధాలు , ఇరువురి మధ్యా ఉన్న నమ్మకాన్ని కూడా వమ్ము చేస్తాయి. అప్పుడు  ఆ సంబంధాలు మోస పూరితం కూడా అవుతాయి.  ఒక దేశం లో బహిరందం గా ఒకరి తో  సంబంధం కలిగి ఉన్న ఒక వ్యక్తి , అఫైర్ ఇంకో వ్యక్తి తో కలిగి ఉండవచ్చు.భావావేశ పూరితమైన అఫైర్స్ లేక సంభంధాలు  కూడా శారీరికం గా ఇంకొకరికి కలిగించేంత బాధ కలిగించ గలవు.మానవ  పరిణామం జరుగుతున్న కొద్దీ , ప్రపంచం లో వివిధ దేశాలలో ఈ అఫైర్ లూ , ఇన్ ఫిడిలిటీ , ఆ యా దేశ నాగరికతా సంస్కృతుల బట్టి మారుతూ ఉంటాయి.
ప్రశ్న:  ఈ ఎఫైర్ లూ ఇన్ ఫిడిలిటీ లూ మన సమాజం లో ఎంత సామాన్యం ? : 
జవాబు: కొందరు  పరిశోధకుల అభిప్రాయం ప్రకారం , ఈ రోజుల్లో ,  సంబంధం కలిగి ఉన్న ఇద్దరిలో ఒకరు, శారీరికం గా కానీ , మానసికం గా అంటే ఎమోషనల్ గా కానీ ఇంకొకరితో సంబంధం కలిగి ఉండడానికి, కనీసం 50- 50  చాన్స్ ఉంటుంది . అమెరికాలో వివాహం చేసుకున్న వారిలో 30 నుంచి 60  శాతం మంది, తమ జీవిత కాలం లో ఎప్పుడో ఒకప్పుడు  ఎఫైర్స్ కలిగి ఉంటారని ఒక అంచనా !  ఇంకో అంచనా ప్రకారం , విడాకులు తీసుకున్న వారిలో, కనీసం తొంభై శాతం మంది , ఎఫైర్స్ అంటే వివాహేతర సంభంధాలు కలిగి ఉన్నారని తెలిసింది. అంతే కాక , ఇరవై ఏడు శాతం మంది ( అమెరికాలో ) వివాహం చేసుకుని ఆనందం గా ఉన్నామని చెప్పిన వారు వివాహేతర సంబంధాలు కలిగి ఉన్నారు !
ఇటీవల యాభై మూడు దేశాలలో విశ్వ విద్యాలయాలలో చదువుతున్న పదహారు వేల మంది విద్యార్ధులలో జరిపిన ఒక పరిశీలన లో 20 శాతం మంది దీర్ఘ కాలిక సంబంధాలు ఏర్పరుచుకున్న వారు, అప్పటి కే ఇంకోరితో కూడా సంభంధాలు కలిగి ఉన్నారు. ఇంకా పరిశీలనలలో తెలిసిన నిజం. నలభై శాతం మంది అవివాహితులూ , ఇరవయి శాతం మంది దాకా వివాహితులూ కూడా , కనీసం ఒకటైనా కామ పరమైన సంబంధం కలిగి ఉన్న వారే !  స్త్రీల కన్నా , పురుషులు అధికం గా ఈ ఇతర సంబంధాలు కలిగి ఉంటారు.
2003 లో ఇంగ్లండు లో ఉన్న ఒక యాభయి మంది లాయర్లను ఒక ప్రశ్న అడిగారు ఒక పరిశీలనలో. అతి సామాన్యం అయిన కారణం ఏమిటి మీ దగ్గరకు విడాకుల కోసం వచ్చే వారికి ‘ అని  అడిగినప్పుడు , యాభై అయిదు శాతం విడాకులు పురుషులు ఇతర సంబంధాలు కలిగి ఉండడం వల్ల నో , లేక నలభయి  అయిదు  శాతం  విడాకులలో స్త్రీలు ఇతర సంబంధాలు కలిగి ఉండడం వల్ల నో విడాకులు సంభవిస్తున్నాయి అని తెలిసింది.  ఈ విధమైన వివాహేతర  సంబంధాలు ఏర్పడడానికి ప్రధాన కారణం , వారు వారి భాగస్వాములతో తక్కువ సమయం గడపడం వలెనే అనీ , ఇంకా విద్యార్ధులు , వారి వివాహం అయ్యే లో గా వీలైనంత మంది తో శారీరిక సంభంధం కలిగి ఉండాలనుకునే కామ వాంఛ తో పాటు గా యునివర్సిటీ విద్యాలయాలలో వారికి కలుగుతున్న అవకాశాలు కూడా అని పరిశీలనలలో తెలిసింది.అంతే కాక వయసు మీద పడుతున్న వారి లో కూడా ఈ వివాహేతర సంబంధాలు ఎక్కువ అవుతున్నాయి అని తెలిసింది.
ప్రశ్న : మరి ఈ ఎఫైర్స్ , ఇన్ ఫిడిలిటీ లు కలిగి ఉండడం లో పురుషులు స్త్రీల కంటే ఎందుకు ముందున్నారు ?:
జవాబు: వచ్చే టపాలో  తెలుసుకుందాము ! 

ప్ర.జ.లు. 21. అబార్షన్ – యువత కర్తవ్యం.

In ప్ర.జ.లు., Our Health on ఆగస్ట్ 19, 2012 at 9:08 సా.

ప్ర.జ.లు. 21. అబార్షన్ – యువత కర్తవ్యం.  

Thank you parents, I had a great escape ! 

ప్రశ్న: అబార్షన్ గురించి టపాలలో, వివరం గా తెలుసుకోవడం జరిగింది కదా ! మరి యువత అబార్షన్ గురించి ఎందుకు తెలుసుకోవాలి ? : 
జవాబు : ప్రపంచ ఆరోగ్య సంస్థ ( WHO or world health organisation ) అంచనా ప్రకారం , ప్రపంచం మొత్తం మీదా  ప్రతి సంవత్సరం  నలభయి రెండు మిలియన్ల  అబార్షన్ లు జరుగుతున్నాయి. అంటే నాలుగు కోట్ల ఇరవై లక్షలు. అందులో  ఇరవై మిలియన్ల అబార్షన్ లు అరక్షితమైనవి అంటే అన్ సేఫ్ ( 20 million unsafe abortions per year worldwide ) అంటే అరక్షితమైన వాతావరణం లో చేయడమూ , ఇంకా  నిపుణులు కాని వారి చేత చేయ  బడ డమూ జరిగి , పర్యవసానం గా  షుమారు నలభయి ఏడు వేల మంది అమ్మాయిలూ , స్త్రీలూ ప్రాణాలు కోల్పోతున్నారు ప్రతి ఏటా !  గమనించ వలసిన విషయం ఏమిటంటే , ఈ అరక్షితమైన అబార్షన్ లలో ఎక్కువ శాతం , అంటే భారత దేశం లాంటి  అభివృద్ధి చెందుతున్న దేశాలలో నే జరుగుతున్నాయి.  అందువల్లనే ఈ అభివృద్ధి చెందుతున్న దేశాలలోనే  స్త్రీలు , బాలికలూ ఎక్కువగా అంటే తొంభై ఎనిమిది శాతం, ప్రాణాలు కోల్పోతున్నారు ( అంటే  నలభయి ఏడు వేల మందిలో షుమారు నలభయి అయిదు వేల మంది వరకూ ప్రాణాలు కోల్పోయేది ఈ అభివృద్ధి చెందుతూన్న దేశాలలోనే ) అన్సేఫ్  అంటే అరక్షిత మైన అబార్షన్ లు  అంటే  నిపుణులు కాని వారిచే , కనీస ఆరోగ్య సూత్రాలు , శుభ్రతా పాటించని వాతావరణం లో చేయబడే అబార్షన్ లు. 
భారత దేశం లో పరిస్థితి:  2011 వ సంవత్సరం లో భారత దేశం మొత్తం లో పదకొండు మిలియన్ల అబార్షన్ లు జరిగాయి ఒక అంచనా ప్రకారం. కనీసం ఇరవై వేల మంది తల్లులు మరణించారు ఈ ఒక్క సంవత్సరం లోనే ! ఈ మొత్తం మరణాలూ  ఇల్లీగల్ అంటే చట్ట బద్ధం కాని అబార్షన్ ల వల్లే జరిగాయి. భారత దేశ పార్లమెంటు 1971 లో మొదటి సారిగా అబార్షన్ ల మీద ఒక చట్టం చేసి బిల్లు పాసు చేసింది. అప్పటి నుంచీ అబార్షన్ చట్టానికి కొన్ని సవరణలు కూడా జరిగాయి. కానీ  చట్ట బద్ధం గా లేని అబార్షన్ లూ , ఇంకా ఎక్కువ గా జరుగుతున్నాయి. తల్లుల మరణాలు కూడా సంభవిస్తున్నాయి. లింగ నిర్ధారణ జరిగాక అబార్షన్ లు జరగడం కూడా విచ్చల విడి గా  మన భారత దేశం లో జరుగుతుంది. ఇది చాలా దురదృష్టకర పరిణామం. 
ఈ అబార్షన్ ల విషయం లో యువత తెలుసుకోవలసినది, చాలా ముఖ్యమైన విషయాలు కొన్ని ఉన్నాయి.
1. ప్రతి జీవితమూ, అత్యంత విలువైనది. అంటే ఆ జీవితం , అంగుళాల పరిమాణం లో గర్భం లో  ఉన్నా ,  అడుగుల పరిమాణం లో భూమి మీద ఉన్నా ! 
2.   శారీరిక సంబంధాలు ఏర్పరుచుకుంటే , సెక్స్ విషయాలలో అప్రమత్తత వహించి ,  ఆచి తూచి అడుగులు వేయండి.
3.   సురక్షితమైన సెక్స్ ఎల్లప్పుడూ శ్రేయస్కరం.
4. గర్భ నిరోధం, అంటే కాంట్రా సెప్షన్ గురించి మీకు పూర్తి అవగాహన ఉండాలి. 
5.. అబార్షన్ కనుక అనివార్యం అవుతే , కనీసం పన్నెండు వారాల కన్నా తక్కువ గర్భం ఉన్నప్పుడే చేయించుకుంటే  ఎక్కువ సురక్షితం. ముఖ్యం గా గర్భవతులకు ! 
6.. అనుభవజ్ఞులైన , నిపుణులైన స్పెషలిస్టు డాక్టరు నే సంప్రదించడం చేయాలి , ఎందుకంటే , భారత దేశం లో, ప్రతి ఏటా జరిగే ఇరవయి వేల మరణాలూ , అర్హతలూ  అంటే క్వాలిఫికేషన్స్ , ఇంకా నిపుణత అంటే స్కిల్స్ లేని వారి చేత అబార్షన్ చేయించుకోవడం వలననే ! 
7.  యువత  అనాలోచిత, విచక్షణా రహిత చర్యలకు , గర్భం లో ఉన్న దేవుడి సమానులైన అమాయక శిశువులు , భారీగా , వారి ప్రాణాలు త్యాగం చేసి , మూల్యం చెల్లించ నవసరం లేదు కదా ! , 
వచ్చే టపాలో ఇంకొన్ని ప్ర.జ.లు. 
 

ప్ర.జ.లు. 20. అబార్షన్ వల్ల కాంప్లికేషన్స్ ఉంటాయా ?

In ప్ర.జ.లు., Our Health on ఆగస్ట్ 18, 2012 at 6:58 సా.

ప్ర.జ.లు. 20. అబార్షన్ వల్ల కాంప్లికేషన్స్ ఉంటాయా ? 

ప్రశ్న: అబార్షన్  చేయించుకోవడం వల్ల కాంప్లికేషన్స్ ఏవైనా ఉంటాయా? 
జవాబు:  ఇది ముఖ్యమైన ప్రశ్న.సాధారణం గా అబార్షన్ వల్ల ఏ విధమైన కాంప్లికేషన్స్ ఉండవు. కానీ అన్ని పద్ధతుల మాదిరి గానే , అబార్షన్ లో కూడా , నిపుణత లోపిస్తే , లేదా  ఉపయోగించ వలసిన పరికరాలు శుభ్రం గా లేక పొతే కూడా కాంప్లికేషన్స్ వచ్చే అవకాశం ఎక్కువ అవుతుంది.ఈ కాంప్లికేషన్స్ ను రెండు విధాలు గా మనం తెలుసుకోవచ్చు. ఒకటి కేవలం మందులతోనే చేసే అబార్షన్. దీనినే మెడికల్ టెర్మినేషన్ అఫ్ ప్రెగ్నెన్సీ అంటారు. రెండవ రకం లో మందులతో పాటు గా కొన్ని ప్రత్యెక మైన పరికరాలు కూడా వాడి అబార్షన్ చేయడం జరుగుతుంది. దేనినే సర్జికల్ టెర్మినేషన్ అఫ్ ప్రెగ్నెన్సీ అని అంటారు.
మెడికల్ టెర్మినేషన్ అఫ్ ప్రెగ్నెన్సీ లో ఏ ఏ కాంప్లికేషన్స్ రావచ్చు? 
1. గర్భానికి, ఫీటస్ కూ సంబంధించిన కణజాలం గర్భాశయం లో నే ఉండి పోవడం: అప్పుడప్పుడూ , గర్భాశయం లో కొంత గర్భానికి చెందిన కణజాలం , అంటే ప్లాసేంటా, ఇంకా మావి పొర , లేదా కొన్ని శిశువు భాగాలు  ఉండి పోవచ్చు. గమనించ వలసినది ఏమిటంటే, మనం శిశువు అని మాట్లాడు కుంటూ ఉన్నప్పటికీ ,  వారాల వయసులో ఉన్న శిశువు పరిమాణం అంటే సైజు చిన్న గా ఉంటుంది. 
2. మెడికల్ టెర్మినేషన్ ఫెయిల్ అవడం: కొన్ని సమయాలలో మందుల తో చేసే అబార్షన్ ఫెయిల్ అవవచ్చు అంటే శిశువు గర్భం లోనే ఉండి పోవచ్చు. 
3. రక్తం గడ్డలు గా గర్భాశయం లోపలే ఉండి పోవడం: సామాన్యం గా  ప్లాసేంటా  లో ఎక్కువ రక్త నాళాలు ఉండి ప్లాసేంటా , రక్త నాళాల తో నిండిన సంచీలా అంటే బ్యాగ్ లా ఉంటుంది. అబార్షన్ జరిగినప్పుడు ఈ రక్త నాళాలు తెగి , రక్త స్రావం అవుతుంది. కొన్ని సమయాలలో రక్త స్రావం అధికం గా అవుతుంది కానీ, నిదానం గా అవుతూ ఉంటే , గడ్డలు , గడ్డలు గా  గర్భాశయం లో నే ఉండి పోతుంది. ఈ రక్త పు గడ్డలనే  బ్లడ్ క్లాట్స్ లేదా క్లాట్స్ అంటారు. అబార్షన్ అయిన కొన్ని రోజుల తరువాత కనుక క్లాట్స్ గమనించి నట్టయితే , వెంటనే స్పెషలిస్టు ను సంప్రదించాలి.
4. ఇన్ఫెక్షన్ : గర్భాశయం లో ఇన్ఫెక్షన్, పరికరాలు ఉపయోగించినప్పుడు కలుగుతుంది. చాలా సమయాలలో ఈ ఇన్ఫెక్షన్ ప్రమాద కరం కాదు. స్త్రీలలో అంతకు ముందే కనుక ( వారికి తెలియకుండా ) ఏదైనా ఇన్ఫెక్షన్ గర్భాశయం లో కానీ , వజైనా లో కానీ ఉంటే అప్పుడు ఆ ఇన్ఫెక్షన్ గర్భాశయం లో ప్రవేశించడానికి రిస్కు ఎక్కువ అవుతుంది. 
5. రక్త స్రావం లేదా హెమరేజ్ :  కొన్ని సమయాలలో గర్భాశయం నుంచి రక్త స్రావం, సహజం గా ఆగి పోకుండా , కంటిన్యూ అవుతుంది. ఇట్లా కంటిన్యూ అవడానికి ప్రత్యేకమైన కారణం అంటూ ఉండదు. కానీ  వీలైనంత త్వరగా రక్త స్రావాన్ని అంటే బ్లీడింగ్ ను ఆపడం చాలా ముఖ్యం. 
ప్రశ్న:సర్జికల్ అబార్షన్ లో ఏ ఏ కాంప్లికేషన్స్ రావచ్చు? : 
జవాబు:గమనించ వలసినది ఏమిటంటే , మొదటి తొమ్మిది నుంచి పన్నెండు  వారాలలో జరిపే అబార్షన్ లో కాంప్లికేషన్స్ తక్కువ గా ఉంది రెండవ పది పన్నెండు వారాలలో కాంప్లికేషన్స్ వచ్చే అవకాశం కనీసం యాభై శాతం వరకూ పెరుగుతుంది. అంతే కాక , మెడికల్ టెర్మినేషన్ లో కన్నా , ఇన్ఫెక్షన్ వచ్చే రిస్కు , సర్జికల్  టెర్మినేషన్ లో ఎక్కువ గా ఉంటుంది. ఎందు కంటే వివిధ పరికరాలు ఉపయోగించడం జరుగుతుంది కాబట్టి. ఇన్ఫెక్షన్ కనుక చాలా కాలం ఉంటే దానిని పెల్విక్  ఇన్ఫ్ల  మేటరీ డిసీజ్ అంటారు . ( Pelvic inflammatory disease ).  ఇట్లా కనుక జరిగితే , స్త్రీకి దీర్ఘ కాలిక  నొప్పి , బాధ , బలహీనత , లాంటి సమస్యల తో పాటు  మళ్ళీ సంతానం కలిగే అవకాశాలు కూడా తగ్గ వచ్చు. అబార్షన్ లు తరచూ చేయించుకునే స్త్రీలకు ఈ విధమైన సమస్యలు వస్తాయి.అరుదు గా సర్జికల్ పరికరాలు నిపుణత తో ఉపయోగించక పొతే , సర్విక్స్  కు గాయం అవడమూ , లేదా గర్భాశయం లో రంధ్రం పడడమూ , గర్భాశయం కు ఆనుకుని ఉన్న మూత్రాశయం  సమస్యలు కూడా వచ్చే అవకాశాలు హెచ్చుతాయి.పైన చెప్పినవి కాక ,   మెడికల్ అబార్షన్ లో వచ్చే కాంప్లికేషన్స్  అన్నీ కూడా సర్జికల్ అబార్షన్ జరిపినప్పుడు కూడా రావచ్చు.
వచ్చే టపాలో ఇంకొన్ని సంగతులు తెలుసుకుందాము ! 

ప్ర.జ.లు.19. సక్షన్ తో అబార్షన్, సర్జికల్ అబార్షన్ అంటే ఏమిటి ? :

In ప్ర.జ.లు., Our Health on ఆగస్ట్ 17, 2012 at 6:29 సా.

ప్ర.జ.లు.19. సక్షన్ తో అబార్షన్, సర్జికల్ అబార్షన్ అంటే ఏమిటి ? :  

ప్రశ్న:  క్రితం టపాలో గర్భం దాల్చిన తొమ్మిది వారాలలోపు గర్భం మందుల తో ఎట్లా  తీయించు కొవచ్చో తెలుసుకున్నాము కదా ! మరి మిగతా పద్ధతులు ఏమిటి ? : 
జవాబు:  క్రితం టపాలో చెప్పినట్టుగానే , గర్భ విచ్చిత్తి చేసే విధానం , స్త్రీ, ఎన్ని వారాల గర్భం తో ఉన్నది అనే విషయం మీద ఆధార పడి ఉంటుంది.
7 to 15 weeks of pregnancy :   7  నుంచి 15 వారాల మధ్య ఉన్న గర్భం తీయ వలసిన అవసరం ఏర్పడినప్పుడు   అమలు చేస్తారు. ఈ పద్ధతిని  వాక్యుం యాస్పిరేషన్ లేదా సక్షన్ టెర్మినేషన్  అని అంటారు. పైన ఉన్న చిత్రం లో వివరాలు చూడండి. శులభం గా అర్ధం చేసుకోవడం కోసం  స్త్రీ గర్భాశయం  భాగాలు నిలువు గా కోసి నట్టు ( అంటే మామిడి పండు ను నిలువుగా కోసినట్టు ) చిత్రం లో చూప బడింది. ఈ పధ్ధతి లో ముందుగా , అబార్షన్ చేయవలసిన స్త్రీకి , గర్భాశయం ద్వారం వద్ద అంటే సర్విక్స్ వద్ద మత్తు ఇస్తారు నొప్పి తెలియకుండా ఉండడానికి. కొన్ని పరిస్థితులలో  జెనరల్ అనేస్తీసియా కూడా ఇస్తారు. సర్విక్స్ మామూలు గా మూసుకుని ఉంటుంది. అందువల్ల, ఆ ప్రదేశం లో మొదట ఒక టాబ్లెట్ ఉంచడం కానీ లేదా నోటిలో వేసుకునే టాబ్లెట్ తో కానీ సర్విక్స్ ను వెడల్పు చేయడం జరుగుతుంది. ఆ తరువాత ఒక సన్నని ప్లాస్టిక్ ట్యూబ్ సర్విక్స్ ద్వారా గర్భాశయం లో ప్రవేశ పెట్టి అక్కడ అటుక్కున్నట్టు గా ఉన్న ఎంబ్రియో ను కానీ , లేదా శిశువు ను కానీ  మెషీన్ ద్వారా పీల్చడం లేదా ‘ సక్ ‘ చేయడం జరుగుతుంది. ఆ పని అయిపోయిన తరువాత , స్త్రీని ఇంటికి పంపడం జరుగుతుంది. కానీ , స్త్రీకి , బ్లీడింగ్ కనీసం రెండు వారాల వరకూ కూడా ఉండ వచ్చు. చాలా మందిలో కేవలం రెండు మూడు రోజులకంటే బ్లీడింగ్ ఉండదు. కొందరిలో మూడు నాలుగు రోజులు ఉండవచ్చు. కొద్ది గా కండరాల నొప్పులు కూడా ఉండవచ్చు కొన్ని రోజుల వరకూ.
up to 13 weeks of pregnancy: పదమూడు  వారాల వరకూ మెడికల్ గా అబార్షన్ చేసే పధ్ధతి ఇంకోటి ఉంది. ఈ పధ్ధతి లో కూడా మేఫిప్రిస్టన్  ముందుగా ఇవ్వడం జరుగుతుంది. ప్రోస్టా గ్లాండిన్ మందు మాత్రం ఒక సారి మాత్రమె కాక , రెండు సార్లు ఇవ్వడం అవసరం ఉండ వచ్చు. అంతే కాక, కొన్ని సమయాలలో , ఒక చిన్న ఆపరేషన్ చేసి కూడా శిశువు భాగాలనూ , ప్లాసేంటా నూ బయటకు తీయడం జరుగుతుంది. 
up to 15 weeks of pregnancy : పదిహేను వారాల గర్భం లో సర్జికల్  డైల టేషన్  అండ్ ఎవాక్యు ఎషన్ అని ఇంకో పధ్ధతి అమలు చేస్తారు.పైన ఉన్న చిత్రం లో వివరాలు చూడండి. శులభం గా అర్ధం చేసుకోవడం కోసం  స్త్రీ గర్భాశయం  భాగాలు నిలువు గా కోసి నట్టు ( అంటే మామిడి పండు ను నిలువుగా కోసినట్టు ) చిత్రం లో చూప బడింది. ఈ పధ్ధతి లో  స్త్రీకి శరీరం మొత్తానికీ అనస్తీసియా ఇచ్చి ,  సర్విక్స్ ను కొద్దిగా  వెడల్పు చేసి , ఇంకో పరికరాన్ని గర్భాశయం లో ప్రవేశ పెట్టి , శిశువు భాగాలను , ప్లాసేంటా నూ బయటకు తీసి వేయడం జరుగుతుంది. ఈ పని అంతా పది, ఇరవై నిమిషాలలో పూర్తి అవుతుంది.  ఈ పధ్ధతి తరువాత కూడా స్త్రీకి రెండు వారాల వరకూ ఒక మాదిరి గా బ్లీడింగ్ కలగ వచ్చు వజైనా ద్వారా.
20-24 weeks of pregnancy :పైన ఉన్న చిత్రం లో వివరాలు చూడండి. శులభం గా అర్ధం చేసుకోవడం కోసం  స్త్రీ గర్భాశయం  భాగాలు నిలువు గా కోసి నట్టు ( అంటే మామిడి పండు ను నిలువుగా కోసినట్టు ) చిత్రం లో చూప బడింది.  లేట్ అబార్షన్ సాధారణం గా ఇరవై నుంచి ఇరవై నాలుగు వారాల మధ్య గర్భం ఉన్నప్పుడు, ఇంక వద్దు అనుకుంటే చేసే పధ్ధతి: ఈ పధ్ధతి లో గర్భం తో ఉన్న స్త్రీ హాస్పిటల్ లో ఉండడం మంచిది.  ఈ లేట్ అబార్షన్ కూడా రెండు పద్ధతులు గా ఉండ వచ్చు.మొదటి పధ్ధతి లో రెండు దశలు గా ఉంటుంది .   ముందుగా  మందుల సహాయం తో  గర్భం లో ఉన్న శిశువు గుండె ను ఆపి వేయడం ( అవును నిజమే ! ) , ఇంకా సర్విక్స్ ను అంటే గర్భ ద్వారాన్ని  వెడల్పు చేయడం జరుగుతుంది.ఇక రెండవ దశలో , గర్భాశయం లో ఉన్న ( మృత ) శిశువు ను కూడా ఉన్న ప్లాసేంటా , ఇంకా మావి పొరలను బయటకు తీసి వేయడం జరుగుతుంది. ఈ మొదటి పధ్ధతి లో జెనరల్ అనస్తీసియా అవసరం ఉంటుంది. 
రెండవ పధ్ధతి లో ,  కేవలం  మందులు మాత్రమె  రెండు దశలలోనూ  ఇచ్చి అబార్షన్ పూర్తి చేస్తారు. కేవలం కొన్ని పరిస్థితులలో మాత్రమె , పరికరాల సహాయం తో గర్భాశయం లో ఉన్న శిశువును , మిగతా గర్భ భాగాలనూ బయటకు తీసి వేయడం జరుగుతుంది. ఏ పధ్ధతి లో నైనా స్పెషలిస్టు డాక్టరు చేయవలసిన ముఖ్యమైన పని , గర్భాశయాన్ని ఖాళీ గా , అంటే గర్భాశయం లోపల శిశువు కానీ , శిశువుకు సంబంధించిన భాగాలు కానీ , ఏమాత్రం లేకుండా బయటకు తీసివేయడం. ఇట్లా చేయక పొతే , కాంప్లికేషన్స్ వచ్చే ప్రమాదం ఉంటుంది. 
ప్రశ్న : మరి ఈ అబార్షన్ పద్ధతులు చూస్తుంటే , అబార్షన్ చాలా శులువు అని అనిపిస్తుంది. ఇట్లా అబార్షన్ చేయించుకుంటే కాంప్లికేషన్స్ ఏమీ ఉండవా ? : 
జవాబు : వచ్చే టపాలో అబార్షన్ చేయించు కోవడం వల్ల కలిగే కాంప్లికేషన్స్ గురించి తెలుసుకుందాము ! 

ప్ర.జ.లు. 18. అబార్షన్ పద్ధతులు ఏమిటి ? :

In ప్ర.జ.లు., Our Health on ఆగస్ట్ 16, 2012 at 7:33 సా.

ప్ర.జ.లు. 18. అబార్షన్  పద్ధతులు ఏమిటి ? : 

ప్రశ్న:  అబార్షన్ గురించి యువత తెలుసుకోవాలని చెపుతూ, గత టపాలలో   మిస్ క్యారేజ్  గురించి రాయడం ఎందుకు జరిగింది ? 
జవాబు:  అబార్షన్ అంటే గర్భ విచ్చిత్తి. అంటే వైద్య విధానాల ద్వారా, గర్భం లో ఉన్న ఎంబ్రియో ను కానీ , శిశువు ను కానీ తీసి వేయడం.మిస్ క్యారేజ్ అంటే సహజం గా, దురదృష్ట వశాత్తు, కొందరు స్త్రీలలో జరిగే  చర్య. ఇందులో కూడా ఎంబ్రియో కానీ శిశువు కానీ గర్భం నుంచి ఎవరి ప్రమేయమూ లేకుండానే , బయటకు వస్తుంది.  ఈ విషయం వివరం గా యువత తెలుసుకుంటే , వారికి  ఎంబ్రియో అయినా, శిశువు అయినా , జీవితం విలువ బాగా అర్ధం అవడానికి ,మిస్ క్యారేజ్ గురించి ముందుగా తెలియ చేయడం జరిగింది. మనం ఎప్పుడూ గుర్తుంచు కోవలసిన విషయం ఇంకోటి కూడా ఉంది.  ఈ భూమి మీద జన్మించిన మానవులందరూ , అత్యంత తోలి దశలో  , అంటే గర్భం లో ఉన్నప్పుడు , అత్యంత సూక్ష్మం గా  ఉండి, క్రమేణా పెరిగి , తొమ్మిది నెలలూ గర్భం లో ఉండి బయటకు వచ్చి ఇంకా పెరిగిన వాళ్ళమే కదా ! అంటే , పురుషుడి నుంచి స్త్రీలో ప్రవేశించిన అనేక మిలియన్ ల  స్పెర్ము లు అంటే వీర్య కణాలలో ఒకటి మాత్రమె , స్త్రీ గర్భాశయం కు ఆనుకుని ఉన్న అండాశయం నుంచి విడుదల అయిన అండం తో కలిసినప్పుడే , నూతన జీవానికి ఆవిష్కారం జరుగుతుంది.  ( పైన ఉన్న వీడియో చూడండి, ఎంత  అద్భుతం గా ఉందొ ఈ  జీవావిష్కారం ). ఇప్పుడు అబార్షన్ పద్ధతులు ఏమిటో కూడా తెలుసుకుందాము. 
నెల తప్పి గర్భవతి అని తెలిసిన తరువాత , ఆ గర్భం కనుక స్త్రీ వద్దనుకుంటే, వెంటనే స్పెషలిస్టు డాక్టర్ వద్దకు వెళ్ళడం జరుగుతుంది.ఇక్కడ ఇంగ్లండు లో సాధారణం గా జరిగే పధ్ధతి వివరించడం జరుగుతుంది. దేశాలను బట్టి కొద్ది గా తేడాలూ, మార్పులూ ఉండవచ్చు. 1.మొదటి సారి అంటే, మొదటి అపాయింట్ మెంట్ లో డాక్టర్ స్త్రీ వద్ద నుంచి  అబార్షన్ చేయించు కోవడానికి ఏర్పడిన కారణాలు, ఆ స్త్రీ యొక్క పూర్తి వివరాలు తెలుసుకోవడం జరుగుతుంది.2. అవసరమైన రక్త పరీక్షలు కూడా చేయించు కోవాలి అప్పుడు. సెక్స్ పరం గా ఏర్పడిన ఇన్ఫెక్షన్లు ఉన్నాయో లేదో కూడా పరీక్ష చేయించుకోవాలి అప్పుడే ( అంటే ఎస్ టీ డీ లు , లేదా STD ) 3. అల్ట్రా సౌండ్ పరీక్ష , 4. సర్వికల్ స్క్రీనింగ్ పరీక్ష ( దీని గురించి చాలా వివరం గా క్రితం టపాలలో తెలియ చేయడం జరిగింది స్త్రీల కోసం, చూడండి ) ఇంకా 5. వజైనల్ ఎగ్జామి నేషన్ కూడా చేయడం జరుగుతుంది.  అంతకు ముందు ఎప్పుడూ స్త్రీ , వజైనల్ ఎగ్జామినేషన్ చేయించుకోక పొతే , సహజం గానే ఆందోళన గా ఉంటుంది. ఈ విషయం డాక్టర్  కు తెలియ చేస్తే, తగు జాగ్రత్తలు తీసుకోవడం చేస్తారు.  తరువాత డాక్టరు అబార్షన్ కు ఉన్న వివిధ పద్ధతులను గురించి కూడా స్త్రీకి వివరించడం జరుగుతుంది. 
ఇక పద్ధతుల విషయం : ముఖ్యం గా మూడు పద్ధతులు ఉంటాయి. ఈ మూడు పద్ధతులూ స్త్రీ గర్భం తో ఎన్ని వారాల నుంచి ఉన్నది అనే విషయం పైన ఆధార పడుతుంది. 
1. మొదటి దశలో గర్భ విచ్చిత్తి లేదా అబార్షన్: ఈ పధ్ధతి తొమ్మిది వారాల గర్భం వరకూ చేస్తారు. ఈ పధ్ధతి లో కేవలం మందులు మాత్రమె వాడడం జరుగుతుంది.  అంటే మొదట గా ఒక మందు మెఫి ప్రిస్టన్ ( mefepristone ). ఈ మందు గర్భం దాల్చడానికి అవసరమయే హార్మోనును  పని చేయకుండా బ్లాక్ చేస్తుంది. అపుడు గర్భాశయం లో ఎంబ్రియో మిస్ క్యారేజ్ మాదిరి గా బయటకు వస్తుంది. అప్పుడు కొద్ది గా గర్భాశయ ప్రాంతం లో నొప్పి , కొద్ది గా బ్లీడింగ్ ఉండ వచ్చు. బ్లీడింగ్ కనుక ఎక్కువ గా ఉంటే , వెంటనే డాక్టరును సంప్రదించాలి. మెఫి ప్రిస్టన్ తీసుకున్న నలభై ఎనిమిది గంటల తరువాత అంటే  రెండు రోజుల తరువాత ఇంకో మందు ఇవ్వబడుతుంది. దీనిని ప్రోస్టా గ్లాండిన్ ( prostaglandin ) అంటారు. ఈ మందు తీసుకున్న నాలుగు నుంచి ఆరు గంటల తరువాత , గర్భాశయం  సంకోచం చెంది గర్భాశయం లోపలి గోడలకు ఉన్న మెంబ్రేన్  ( ఈ పలుచటి పొర , ఎంబ్రియో కూ లేదా శిశువు కు  ‘ మెత్తటి పడక ‘ లాగా పని చేస్తుంది , గర్భం  కొనసాగితే ) ఊడి పోయి, బయటకు వస్తుంది. ఈ సమయం లో కొంత నొప్పి కూడా కలగ వచ్చు గర్భాశయ కండరాల సంకోచాల వల్ల. అప్పుడు అవసరం అవుతే , నొప్పి నివారణ కు మందులు వేసుకోవచ్చు. ( పైన  ఉదాహరించిన రెండు మందులూ నోటి లో వేసుకునే మందులు ) 
మిగతా పద్ధతులు వచ్చే టపాలో తెలుసుకుందాము !