Our Health

Archive for the ‘Our Health’ Category

ఉద్యమ కారులూ, మీ ఆరోగ్యం జాగ్రత్త !

In మన ఆరోగ్యం., మానసికం, Our Health, Our minds on ఆగస్ట్ 27, 2013 at 9:09 సా.

ఉద్యమ కారులూ, మీ ఆరోగ్యం జాగ్రత్త ! 

 
అన్యాయాలూ, అవినీతుల  ‘సంతానమే’ ఉద్యమం ! 
ప్రతి ఉద్యమానికీ ‘తాతలే’, స్వార్ధం నిండిన నేతలు ! 
‘తాత’ మాట మీకు బంగారు బాటా ? ! 
‘తాతలు’ కోట్లకు పడ గెత్తి తే ,
మీరు, నిండా మునగడమా ? ! 
మీ మనుగడ ఆగడమా ???
నడుస్తారు మీరు, అనేక  మైళ్ళ దూరం !
వేస్తారు, మానవ హారాలు 
మానుతారు, నిద్రాహారాలు ! 
పట్టించుకోరు, మీ  రోగాలు ! 
మీ మందులు మానేస్తారు  !
మీ బీపీ పెరిగినా ,
మీ షుగరు తగ్గినా,
మీరు మాత్రం హుషారు ! 
గుండె ఆగి, కుప్ప కూలినా 
ఉద్యమం ఆపరు మీరు !
మీ తల్లి, తండ్రి ,
మీ కొడుకూ, కూతురూ !
మీ తోబుట్టువులూ ! 
అందరికీ మీరు కావాలి
వారందరికీ మీరొక్కరే ! 
ప్రతి జీవితం విలువైనది,
మీ జీవితం కూడా  !
తాత లెవరూ చావలేదు !  
తాతల  ‘సంతానం’ చావదు ! 
ఉద్యమం  పొందు లో, తాతలు  సుఖం ! 
లేదు, వారి నిఘంటువులో, 
‘త్యాగం ‘ !  
మరి మీకెందుకు ???
మీ స్వేదం, రక్తం ,
మీ జీవితాలూ , ఉదాత్తం !
చేయకండి, నేతలకు ధారాదత్తం ! 
‘తాతల’ ననుసరించండి !
‘సమిధల’వ్వకండి !
మీ ఆరోగ్యం జాగ్రత్త ! 
 
 
 
 
 

13. రక్షిత కారు చోదకం ( సేఫ్ కార్ డ్రైవింగ్ ). మోటార్ వే లో ఎట్లా డ్రైవ్ చేయాలి ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 26, 2013 at 1:12 సా.

13. రక్షిత కారు చోదకం ( సేఫ్ కార్ డ్రైవింగ్ ). మోటార్ వే లో ఎట్లా డ్రైవ్ చేయాలి ?

రక్షిత కారు చోదకం గురించి కొన్ని ముఖ్యమైన విషయాలు క్రితం టపాలలో తెలుసుకున్నాం కదా ! ఇప్పుడు మోటార్ వే లలోనూ , డ్యూ ఎల్ క్యారేజ్ వే లలో ఎట్లా డ్రైవ్ చేయాలో గమనించుదాము !
మోటార్ వే : మోటార్ వే సహజం గా ఒక టౌన్ నుంచి ఇంకో టౌన్ కు కానీ ఒక సిటీ నుంచి ఇంకో సిటీ కి కానీ ఉండే రోడ్డు. మోటార్ వే ల మీద వేగం సామాన్యం గా గంట కు 60 నుంచి 70  మైళ్ళ వేగం తో వాహనాలు ప్రయాణిస్తూ ఉంటాయి !  గమనించ వలసినది , గంటకు అరవై మైళ్ళు అంటే 96 కిలో మీటర్లని , అట్లాగే గంటకు 70 మైళ్ళు అంటే 112 కిలో మీటర్లని. ఇంకో రకం గా చెప్పుకోవాలంటే , గంటకు అత్యధిక వేగం ఎట్టి పరిస్తితులల్లోనూ 112 కిలో మీటర్లు లేక 70 మైళ్ళ కు మించ కూడదు. 
మరి ప్రతి కారులోనూ స్పీడో మీటర్ లో 120 – 130 మైళ్ళు కూడా కనిపిస్తుంటాయి కదా ఆ వేగం తో ప్రయాణించ కూడదా ? 
కారు వేగం పెరుగుతున్న కొద్దీ , కారును నియంత్రించే సమయం , ఇంకా కారు ఆగే దూరం కూడా పెరుగుతుంది. అంటే పది మైళ్ళ వేగం తో ప్రయాణిస్తున్న కారు ను సడన్ గా బ్రేక్ వేస్తే ,ఖచ్చితం గా బ్రేక్ వేసిన చోటే ఆగుతుంది కారు. అదే వేగం ఎక్కువ గా ఉన్నపుడు అంటే నలభై కానీ యాభై మైళ్ళ వేగం లో బ్రేక్ చేస్తే , కారు , బ్రేక్ చేసిన చోటే ఆగదు. కాస్త ముందుకు వెళ్లి ఆగుతుంది. ఇట్లా వేగం పెరుగుతున్న కొద్దీ , బ్రేక్ వేసిన చోట కాకుండా ఇంకా ముందుకు , ఇంకా ముందుకు పోయి కారు ఆగుతుంది ! అంటే కారు అత్యధిక స్పీడు లో వెళుతున్నపుడు , ఏదైనా ప్రమాదాన్ని నివారించాలని బ్రేక్ వేసినా కూడా , కారు ఆగే దూరం ఎక్కువ అవడం వల్ల , ఎదురుగా ఉన్న దానికి ( అది వాహనం కానీయండి, లేదా డివైడర్ కానీయండి ) తప్పకుండా గుద్దు కుంటుంది ! ఇక్కడ డ్రైవింగ్ చేసే వారు అప్ర మత్తత తో ఉన్నా కూడా, కారు అత్యధిక వేగం తో పోతూ ఉండడం వల్ల , వారి కంట్రోలు లో ఉండదు ! అందుకే , కారు ను వేగం పరిమితి దాటి డ్రైవ్ చేయడం ప్రమాదకరం. 
స్లిప్ రోడ్ నుంచి మోటార్ వే లో ఎట్లా కలవాలి ?
స్లిప్ రోడ్ మీద ప్రయాణం చేస్తున్నపుడు , కారు వేగం తక్కువ గా ఉంటుంది. అంటే అత్యధిక వేగం , యాభై నుంచి అరవై మైళ్ళు ఉంటుంది. కానీ మోటార్ వే లో కలిసే సమయం లో వేగాన్ని ఇంకా తగ్గించ వలసి ఉంటుంది కదా ! అదే సమయం లో MSM / PSL సూత్రాన్ని పాటించాలి. ముఖ్యం గా గుర్తు ఉంచుకోవలసినది , మోటార్ వే లో అంతకు ముందే ప్రయాణం చేస్తున్న వాహనాలకు ప్రయారిటీ ఇవ్వాలి అంటే , మన కుడి వైపు న ఉన్న మిర్రర్ లోనుంచి చూస్తే , వెనుక నుంచి మోటార్ వే లో వాహనాలు కనుక వస్తూ ఉంటే , వాటి ముందు స్లిప్ రోడ్ ను వదిలి మోటార్ వే లో కలవడం అత్యంత ప్రమాదకరం ! ఎందుకంటే , అట్లా కలిసే సమయం లో మన కారు వేగం తక్కువ గా ఉండి , వెనుక నుంచి వచ్చే వాహనాల వేగం అధికం గా ఉంటుంది, దానితో ప్రమాదాలకు రిస్కు ఎక్కువ అవుతుంది ! వెనుక వాహనాలు వెళ్ళాకనే , మోటార్ వే  మీదకు ఎక్కాలి ! అంతే కాకుండా ఒక సారి స్లిప్ రోడ్ వదిలాక మోటార్ వే మీద అక్కడ స్పీడ్ తో అంటే 70 మైళ్ళ వేగానికి గేర్ లు మార్చుతూ , యాక్సిలరేట్ చేయాలి కారును . 
మోటార్ వే నుంచి స్లిప్ రోడ్ లోకి ఎట్లా మారాలి ?
మోటార్ వే లో వేగం అధికం గా ఉంటుంది కదా , దానిని వదిలి స్లిప్ రోడ్ లోకి ప్రవేశించే సమయం లో ముందు గానే ఇండికేటర్ తో సూచించాలి స్లిప్ రోడ్ లో ప్రవేశించ బోతున్నట్టు ! అప్పుడు వెనుక ఉన్న వాహనాలు లేన్ మార్చుకోవడమో , లేదా వేగం తగ్గించు కోవడమో చేస్తాయి ! ప్రమాద నివారణ కోసం. 
ఒక సారి స్లిప్ రోడ్ లో ప్రవేశించిన తరువాత , వేగాన్ని తగ్గించు కుంటూ పోవాలి ! 
లేన్ డిసిప్లిన్ అంటే ఏమిటి ? :
మోటార్ వే మీద ఒక డైరెక్షన్ లో మూడు లేన్ లు కనుక ఉంటే , మనం ఎప్పుడూ ఎడమ లేన్ లోనే కారు నడపాలి !  జంక్షన్ లు సమీపిస్తున్నప్పుడు , ఎక్కువ అప్ర మత్తత తో ముందూ , ప్రక్క లా వెళ్ళే వాహనాలను గమనిస్తూ ఉండాలి ! కనీసం రెండు మూడు కార్ల దూరం ముందరి కారు నుంచి మన కారు కు ఉండడం క్షేమ దాయకం ! మోటార్ వే లో మన కారును రివర్స్ చేయడం కానీ , సెంట్రల్ రిజర్వేషన్ ను దాటే ప్రయత్నం కానీ ఎప్పుడూ చేయ కూడదు , మనం వెళ్ళే డైరెక్షన్ సరి అయినది కాక పోయినా కూడా , ( వచ్చే రౌండ్ ఎబౌట్ , అంటే కూడలి దగ్గర దాకా డ్రైవ్ చేసి , మన దిశ మార్చు కోవాలి ). 
వచ్చే టపాలో ఇంకొన్ని సంగతులు !  
 

12. రక్షిత కారు చోదకం ( సేఫ్ కార్ డ్రైవింగ్ ). క్రాసింగ్ లూ , జంక్షన్ లలో కారు ఎట్లా నడపాలి ? :

In ప్ర.జ.లు., మన ఆరోగ్యం., మానసికం, Our Health, Our minds on ఆగస్ట్ 23, 2013 at 11:50 ఉద.

12. రక్షిత కారు చోదకం ( సేఫ్ కార్ డ్రైవింగ్ ). క్రాసింగ్ లూ  , జంక్షన్ లలో కారు ఎట్లా నడపాలి ? : 

జంక్షన్ లు పలు రకాలు గా ఉంటాయి. T జంక్షన్ : T జంక్షన్ దగ్గర ఒక చిన్న రోడ్డు మెయిన్ రోడ్డు లో కలుస్తుంది. Y జంక్షన్: Y జంక్షన్ లో కూడా ఒక చిన్న రోడ్డు మెయిన్ రోడ్డు లో కల్సుస్తుంది కానీ నిటారు గా కాకుండా ఈ చిన్నరోడ్డు ఏ ట వాలు గా మెయిన్ రోడ్డు లో కలుస్తుంది ( T జంక్షన్ అందుకే T అక్షరం తోనూ Y జంక్షన్ ను Y అక్షరం తోనూ పోల్చేది అందుకే ! )క్రాస్ రోడ్డు లు ప్లస్ + ఆకారం లో ఉంటాయి లేదా X ఆకారం లో ఉంటాయి. రౌండ్ ఎబౌట్ లు పేరుకు తగ్గట్టు వృత్తాకారం లో ఉంటాయి ! ఇవి కాక కొన్ని జంక్షన్ లు జిగ్ జాగ్ గా కూడా ఉంటాయి అంటే గజి బిజి గా ! ఇక్కడ మెయిన్ రోడ్డు లో కలిసే చిన్న రోడ్డు లు ఖచ్చితం గా కాక ఒక్కో కోణం లో కలుస్తాయి. 
జంక్షన్ ల దగ్గర పాటించవలసిన నియమం ఏమిటి ?
క్రితం టపాల లో తెలుసుకున్నట్టు , MSM / PSL  సూత్రాన్ని పాటించాలి తప్పనిసరిగా ( సురక్షిత ప్రయాణం కావాలనుకునే వారు )
M అంటే మిర్రర్ లో ప్రక్క నుంచీ , వెనుక నుంచీ వచ్చే వాహనాలను గమనించడం 
S అంటే సిగ్నల్ ఇవ్వడం 
M ఈ రెండో M   అంటే మెనూవర్ చేయడం ఈ మెనూవర్ చేయడానికి PSL ను గుర్తు ఉంచుకోవాలి 
P అంటే పొజిషన్ 
S స్పీడ్ అంటే వేగాన్ని కంట్రోలు చేసుకోవడం 
L అంటే లుకింగ్ అంటే అన్ని వైపులా చూసి సురక్షితం గా ఉంటేనే , ముందుకు పోవాలి !
1. ఎడమ ప్రక్కకు కారును తిప్పడం ఎట్లా ?:
పైన చెప్పిన MSM /PSL సూత్రాన్నే పాటించాలి ఇక్కడ కూడా కానీ కారును ఫుట్ పాత్ కెర్బ్ కు కనీసం మూడడుగులు దూరం లో పొజిషన్ చేసుకోవాలి ! కానీ భారత దేశం లో ఈ మూడడుగుల చోటు ఇవ్వగానే, ఆరు ఆటో లు ఆ సందులో దూరుతాయి కదా ! కానీ ఆటోలకూ , సైకిలిస్ట్ లకూ ఖచ్చితమైన సిగ్నల్ ఇవ్వాలి , వారికి ఏ రకమైన 
కన్ఫ్యూజన్ కలగకుండా ! అదే సమయం లో తిరగ వలసిన సైడ్ రోడ్డు నుంచి మీ ఎదురు గా వస్తున్న వాహనాలను కూడా గమనించాలి !
2. కుడి ప్రక్కకు కారును తిప్పడం ఎట్లా ?:
పైన చెప్పిన MSM /PSL సూత్రాన్నే పాటించాలి ఇక్కడ కూడా కానీ కారు పొజిషన్ ను రోడ్డుకు వీలైనంత సెంటర్ కు తీసుకు వెళ్ళాలి. అదే సమయం లో మీ సందు లోకి తిప్పే వాహనాలకు సరిపడినంత చోటు ఇవ్వాలి మీరు. అంటే రోడ్డంతా ఆక్రమించుకో కూడదు !
మీకు కుడి వైపునుంచి రోడ్డు మీద వస్తున్న ( అంటే మెయిన్ రోడ్డు మీద ) వాహనాలనన్నిటినీ జాగ్రత్తగా గమనించాలి ! అంతే కాకుండా , ఆ యా వాహనాలను ఓవర్ టేక్ చెస్తూ కూడా కొన్ని వాహనాలు కానీ , మోటార్ సైకిలిస్ట్ లు కానీ , పాద చారులు కానీ ప్రయాత్నాలు చేయ వచ్చు ! వారిని కూడా అప్రమత్తత తో గమనించాలి, కుడి ప్రక్క కు కారు మళ్ళించే ముందు ! జంక్షన్ లో ట్రాఫిక్ సిగ్నల్ గ్రీన్ గా మారగానే ఎదురు గా వచ్చే వాహనాలకు ముందుగా రోడ్డు ను ఇవ్వాలి అంటే ఎదురుగా వచ్చే వాహనాలనే పోనివ్వాలి , ఆ తరువాతే మీ కారును ప్రక్కకు తిప్పాలి ! ప్రత్యేకించి కుడి ప్రక్కకు కనుక మీ కారును తిప్పుతున్నట్టయితే ! జీబ్రా క్రాసింగ్ ల దగ్గర తప్పనిసరిగా కారు వేగాన్ని తక్కువ చేసి పోనియ్యడమే కాకుండా , పాద చారులు రోడ్డు దాటు తున్నపుడు తప్పని సరిగా కారును ఆపాలి ! పాద చారులకు ఎప్పుడూ ప్రయారిటీ ఇవ్వాలి ! 
వచ్చే టపాలో ఇంకొన్ని సంగతులు ! 
 
 
 

11. రక్షిత కారు చోదకం. ( సేఫ్ కార్ డ్రైవింగ్ ). బెండ్ ( రోడ్డు వంకర ) వద్ద ఎట్లా డ్రైవ్ చేయాలి ?

In ప్ర.జ.లు., మానసికం, Our Health, Our minds on ఆగస్ట్ 22, 2013 at 9:52 ఉద.

11. రక్షిత కారు చోదకం. ( సేఫ్ కార్ డ్రైవింగ్ ). బెండ్ ( రోడ్డు వంకర ) వద్ద ఎట్లా డ్రైవ్ చేయాలి ?  bend in road sign

మనం డ్రైవ్ చేసే ప్రతి చోటా , మనకు అనుకూలం గా రోడ్డు నేరు గా , ఏ వంపులూ లేకుండా ఉండదు కదా ! అనేక రోడ్లు , అనేక మలుపులు తిరుగుతూ ఉంటాయి ! అట్లాంటి పరిస్థితులలో , మనం ప్రత్యేకమైన జాగ్రత్త వహించాలి ! మనం తిరగబోయే మలుపు ఎంత వంకర గా ఉందో ,అందుకు ఏ స్పీడ్ తో కారు ను నడపాలో , ఖచ్చితం గా అవగాహన ఏర్పడి ఉండాలి , కారులో ఈ మలుపులు తిప్పే సమయం లో ! మలుపు ఎంత వంకర గా  ఉందో , ఈ క్రింది విషయాలు గమనిస్తే తెలుసుకోవచ్చు :
1. ముఖ్యం గా మన కళ్ళ తో ఎదురుగా ఉన్న రోడ్డు వంకర ను పరిశీలించడం.
2. ఆ బెండ్ దగ్గర రోడ్డు సైన్స్ ఏమైనా ఉంటే ,వాటిని గమనించాలి !
3. లిమిట్ పాయింట్ ఎనాలిసిస్ తో మన దృష్టి తో గరిష్టం గా అంటే అత్యధికం గా ఎంత దూరం గమనించ గలమో , అంత దూరం చూసుకుంటూ , ఆ దోవ సురక్షితం గా ఉందని నిర్ధారించుకున్నాకే , డ్రైవింగ్ కంటిన్యూ చేయాలి ! ఈ లిమిట్ పాయింట్ ఎనాలిసిస్ వంకర రోడ్ల మీద ప్రయాణం చేసే సమయం లో అతి ముఖ్యమైన పధ్ధతి . ఈ లిమిట్ పాయింట్ ఎనాలిసిస్ వివరాలు ఈ క్రింది వీడియో ( యూ ట్యూబ్ ) చూసి గమనించండి , సురక్షిత డ్రైవింగ్ కోసం !
గమనించ వలసిన మిగతా విషయాలు :
కేవలం పైన ఉన్నవే కాక , అనేక ఇతర విషయాలను కూడా , కారును వంకర రోడ్డు మీద నడిపే సమయం లో గుర్తు ఉంచుకోవాలి 
1. ఆ సమయం లో వెదర్ అంటే వాతావరణ పరిస్థితులు 
2. విజిబిలిటీ: ఆ సమయం లో వెలుతురు ఎంత ఉందో , ఎందుకంటే , చీకటి పడుతున్న కొద్దీ , మనం గమనించే ఏరియా తగ్గుతుంది కదా !
3. ప్రయాణం చేస్తున్న రోడ్డు తడిసి జారి పోతున్నట్టు ఉందో లేదో కూడా , ఎందుకంటే , కొద్ది గా వానకు తడిసినా , రోడ్డు మీద కారు టైర్లకు పట్టు తక్కువ అవుతుంది అంటే గ్రిప్. 
4. ప్రయాణం చేస్తున్న రోడ్డు కు బ్యాంకింగ్ ఉందో లేదో , ఉంటే  ఎంత ఉందో అంచనా వేయడం ! రోడ్డుకూ బ్యాంకింగ్ కూ సంబంధం ఏమిటి అనుకుంటున్నారు కదూ , బ్యాంకింగ్ అనేది ఇంకో భౌతిక శాస్త్ర నిబంధన. వంకర రోడ్లన్నీ బ్యాంకింగ్ చేయబడి ఉంటాయి ప్రమాద నివారణ కోసం !
5. మనం నడుపుతున్న కారు సాంకేతికం గా సరిగా నిర్మితం అయి ఉందో లేదో కూడా మనకు ముందే తెలిసి వుండాలి !
6. ఆ ప్రదేశం లో ఇతర రోడ్డు వాడుక దారులు ఉంటారనే విషయం కూడా ఎప్పుడూ గుర్తు ఉంచుకోవాలి ! 
మరి బెండ్స్ లో అంటే రోడ్డు వంకర ల లో ముఖ్యం గా ఏమి చేయాలి ?
పై విషయాలు కేవలం గమనించడమే కాకుండా , కారును సమర్ధ వంతం గా ఆ మలుపులను నెగోషి ఎట్  చేయ గలగాలి . అందుకు ముఖ్యం గా B A G S అనే పదం గుర్తు ఉంచుకోవాలి !
B అంటే బ్రేక్స్ : బెండ్ సమీపిస్తున్నప్పుడు , ఫుట్ బ్రేక్ మీద పాదం ఉంచి , వేగాన్ని సరిగా నియంత్రించుకోవాలి !
A అంటే యాక్సిలరేషన్ :యాక్సిలరేటర్ మీద పాదం జాగ్రత్తగా పెడుతూ , యాక్సిలరేటర్ ను తదనుగుణం గా ఉపయోగించాలి !
G అంటే గేర్స్ ను కూడా వేగానికి అనుగుణం గా మార్చు కుంటూ ఉండాలి !
S అంటే స్టీరింగ్ : మలుపు తిప్పే సమయం లో మన లేన్ లోనే ఉంటూ , ఎదురు లేన్ లోకి ఎంత మాత్రమూ వెళ్ళ కుండా , స్టీరింగ్ వీల్ ను సమర్ధ వంతం గా తిప్పడం కూడా అలవాటు చేసుకోవాలి ! 
( పైన ఉన్న కార్టూన్ , అమెరికా లో కారు నడపడం మీద గీసినది ! గమనించండి , కారు కుడి వైపు డ్రైవ్ చేయబడుతుంది ! అమెరికా లో అదే లీగల్ ! అంటే, అక్కడ అన్ని వాహనాలూ కుడి వైపు నుంచే డ్రైవ్ చేయాలి !  భారత దేశం లో,మర్చి పోయి కూడా ఎన్నడూ కుడి వైపు డ్రైవ్ చేయకూడదు. ప్రత్యేకించి , రోడ్డు అంతా ఖాళీ గా ఉన్నట్టు అనిపించినా కూడా ! ఎందుకంటే, క్షణాలలోనే , ప్రత్యక్షం అవుతుంది స్పీడు గా వస్తున్న ఏ వాహనం అయినా , ఎదుటి నుంచి !  )
వచ్చే టపాలో ఇంకొన్ని సంగతులు ! 

9.రక్షిత కారు చోదకం ( సేఫ్ కార్ డ్రైవింగ్ ). స్టీ రింగూ , మనూవరింగూ !

In ప్ర.జ.లు., మన ఆరోగ్యం., Our Health on ఆగస్ట్ 20, 2013 at 9:26 ఉద.

9.రక్షిత కారు చోదకం ( సేఫ్ కార్ డ్రైవింగ్ ). స్టీ రింగూ , మనూవరింగూ ! 

( పార్టీ లో మితిమీరి తాగి ,  డ్రైవింగ్ కూడా చేస్తే ,జరిగే పర్యవసానాలకు , ప్రత్యామ్నాయ ఏర్పాట్లు ఎట్లా ఉంటాయో తెలిపే కార్టూన్ !  కాక పొతే అవన్నీ అమెరికా లో ! భారత దేశం లో మొదటి రెండిటినీ ( కనీసం ప్రమాదం జరిగిన కొన్ని గంటల వరకూ ! ) మినహాయించు కోవచ్చు కదా !  ) 

స్టీ రింగూ , మనూవరింగూ ! 
స్టీరింగ్ : కారు స్టీరింగ్ అంటే చిన్న పిల్లల దగ్గర నుంచి , పెద్దవారి వరకూ అందరికీ భలే సరదా కదా ! అనేక గుండ్రని చక్రాలను , కారు స్టీరింగ్ గా ఊహించుకుంటూ , ఎన్ని ఆటలు ఆడు కోలేదు మనమంతా , బాల్యం లో ! ఒక వాహనం లో ప్రయాణం చేస్తున్నట్టు ఊహించుకుని స్టీరింగ్ చేస్తూ ఉంటే , ఎక్కడకూ వెళ్ళక పోయినా కూడా అదొక విచిత్రమైన అనుభూతి ! ప్రస్తుతం అనేక కంప్యూటర్ సాఫ్ట్ వేర్ లు అందుబాటు లో కూడా ఉన్నాయి కదా డ్రైవింగ్ మీద ( స్టీరింగ్ వీల్ ను కూడా అమ్ముతున్నారు )
మరి అసలు స్టీరింగ్ విషయానికొస్తే , సమర్ధ వంతం గా స్టీరింగ్ చేయడం ఒక కళ ! నేర్పు ! అందుకే ప్రతి పార్టీ కీ ఒక స్టీరింగ్ కమిటీ ఏడిసింది కదా ! ప్రజలను అనేక రకాలు గా మభ్యపెడుతున్నా కూడా సమర్దవంతం గా ఆ కార్యం నిర్వహించడానికి ! కానీ నిజజీవితం లో కారు స్టీరింగ్ సరిగా చేయకుండా , మభ్య పెట్టడం అంత తేలిక కాదు, పైగా ప్రమాదం కూడా ! స్టీరింగ్ ను పట్టుకోవడం కూడా శాస్త్రీయం గా చేయాలి ! అంటే సామాన్యం గా ఎడమ చేతిని పది సంఖ్య ఉన్న స్థానం లోనూ , కుడి చేతిని రెండు లేదా మూడు అంకె ఉన్న స్థానం లోనూ ఉంచి అవసరమైనంత పట్టు తో పట్టుకోవాలి స్టీరింగ్ ను ! ఈ పదీ , పదకొండూ , రెండూ , మూడూ ఎక్కడ నుంచి వచ్చాయను కుంటున్నారు కదూ ! స్టీరింగు చక్రాన్ని కనుక ఒక గోడ గడియారం లా ఊహించు కుంటే ! స్టీరింగ్ మీద అతి గా మన బరువు అంతా వేయకూడదు ! అట్లా చేసినా , లేదా అతి తేలిక గా పట్టు వదిలినా కూడా , కారు కంట్రోలు తప్పి పోయే ప్రమాదం ఉంది ! ఒక మోస్తరు గా తాగిన మైకం లో కూడా ( మైకం అనిపించక పోయినా కూడా ) స్టీరింగ్ లో సమతూకం తప్పి పోయి ప్రమాదాలకు కారణం అయే రిస్కు ఉంటుంది ! ( ఎందుకంటే ఆల్కహాలు తో ‘తడిసి ‘ ఉండే మెదడు , మిగతా సమయం లో లాగా ఆలోచించ లేదు కనుక ! ). 
మనూవరింగ్ : ఈ మనూవరింగ్ కారు నడపడం లో ఒక ముఖ్యమైన నేర్పు ! మనూవరింగ్ అంటే , స్టీరింగు నూ , యాక్సిలరేటర్ నూ , ఇండికేటర్ నూ , ( అవసరమయితే బ్రేక్ నూ ) హేతు బద్ధం గా ఉపయోగించి కారును ముందు కో లేదా ప్రక్కకో నడపడం ! ఒక సారి కారు కదిలి రోడ్డు మీద ‘ పడ్డప్పుడు ‘ ఏ రకమైన మనూవరింగ్ చేయాలన్నా కూడా కొన్ని నిబంధనలను తప్పని సరిగా పాటించాలి ! నిబంధనలు అంటే రూల్స్ ఎవడికి పట్టింది ? అని అశ్రద్ధ చేయడం , ఎట్టి పరిస్థితులలోనూ సమర్ధనీయం కాదు ! అప్రమత్తత కోల్పోయి , ఆశ్రద్ధతో కారు నడపడం , ప్రమాదాలను కొని తెచ్చుకోవడమే కదా ! 
మరి మనూవరింగ్ ఎట్లా చేయాలి ? 
దీనికి ప్రతి కారు డ్రైవరూ గుర్తు ఉంచుకోవలసిన ఆంగ్ల అక్షరాలు కొన్ని ఉన్నాయి ! అవి : O  S M P S L. ( ఓ ఎస్సెమ్ పీ ఎస్సెల్ , ఓ ఎస్సెమ్ , పీ ఎస్సెల్ అని చాలా సార్లు పునశ్చరణం చేయడం కూడా మంచిదే ! ) 
O అంటే అబ్సర్వే షన్ 
S అంటే , సిగ్నల్ ఇవ్వడం ,
M అంటే మనూవరింగ్ 
ఈ మనూవరింగ్ ను మూడు దశలు గా చేయాలి 
P అంటే మన కారును సరి అయిన పొజిషన్ లోకి తెచ్చుకోవాలి !
S ఈ రెండో ఎస్ అంటే కారు వేగాన్ని అంచనా వేసి , అవసరమవుతే , ఆ వేగాన్ని అడ్జస్ట్ చేసుకోవాలి !
L  అంటే , మనం నడుపుతున్న కారు చుట్టూ పరిశీలించి చూడడం , ప్రమాదం ఏదీ లేదని నిర్ధారించుకోవడం ! అంటే , ఇతర రోడ్డు వాడే వారూ , పాద చారులూ వారి భద్రతా , మన భద్రతా కూడా ! 
మనం కొనుక్కునే కార్లలో సెన్సర్ లు అమర్చ బడి ఉన్నా కూడా మన ‘ మనో సెన్సర్  ‘ ను ఎప్పుడూ అప్రమత్తం గా ఉంచి సురక్షితం గా కారు స్టీరింగ్ చేయడం అలవాటు చేసుకోవాలి ! 
గుర్తు ఉంచుకోవలసినది : మనం మనూవర్ చేస్తున్నప్పుడు ఎప్పుడూ , బ్రేక్ ను కానీ , యాక్సిలరేటర్ ను కానీ, స్టీరింగ్ వీల్ ను కానీ , సడెన్ గా అప్లై చేయకూడదు , ప్రత్యేకించి మనూవర్ చేసే సమయం లో ! దానివల్ల  మనం చేయవలసిన మనూవర్ సరి గా అవ్వక పోవడమే కాకుండా , ఇతర వాహన చోదకుల కు అవరోధం అవ వచ్చు !
ప్రతి కారు డ్రైవరూ తప్పని సరిగా నేర్చుకోవలసిన మనూవర్ లు అయిదు ఉన్నాయి :
1. కారు వెళుతున్నప్పుడు ఎడమ వైపు రోడ్డు మీదకు తిప్పడం. 
2. కారు వెళుతున్నప్పుడు కుడి వైపు రోడ్డు మీదకు తిప్పడం. 
3. U టర్న్ కు కారును తిప్పడం 
4. రోడ్డు మీద కారు నడిపుతున్నప్పుడు తిప్ప వలసిన అవసరం ఏర్పడితే , తిప్పడం 
5. రివర్స్ పార్కింగ్ చేయ గలగడం.  
ఈ పై పరిస్థితులు అన్నీ కూడా సమర్ధ వంతం గా , ఆత్మ విశ్వాసం తో మనూవర్ చేయ గలగాలి , కారు నడిపే ప్రతి వారూ ! చాలా మంది , ప్రత్యేకించి , భారత దేశం లో , కారున్న వారు ఏదో ఒక లా మ్యానేజ్ చేయ గలిగితే పరవా లేదనుకుంటారు ! కానీ ఇట్లా ప్రతి చోటా అనుకోవడం , మ్యానేజ్ చేయ గలగడం జరగదు ! అప్పుడే ప్రమాద రిస్కు ఎక్కువ అవుతుంది ! అందు వల్లనే ,అంత ప్రాముఖ్యం లేనివి గా అనిపించినా కూడా , పైన తెలిపిన మనూవర్స్  నేర్చుకుని ఉండడం సర్వదా క్షేమదాయకం ! 
వచ్చే టపాలో ఇంకొన్ని సంగతులు ! 

9. రక్షిత కారు చోదకం ( సేఫ్ కార్ డ్రైవింగ్ ).

In ప్ర.జ.లు., మన ఆరోగ్యం., Our Health, Our minds on ఆగస్ట్ 18, 2013 at 10:59 సా.

9. రక్షిత కారు చోదకం ( సేఫ్ కార్ డ్రైవింగ్ ).

కారు వేగం పెంచడం ఎట్లా ?:
కారు వేగం పెంచడం ఎట్లాగో యాక్సిలరేటర్ మీద కాలు పెట్ట గలిగే ప్రతి వారూ చెప్పగలరు ! అందుకే , ప్రతి కుర్రకారూ , తమకు తామే ఎంతో సమర్ధవంతమైనా , ప్రతిభావంతమైన డ్రైవర్ లు అని అనుకుంటూ ఉంటారు ! అది చాలా పొర పాటు ! ఎందుకంటే, కారు వెళుతూ ఉన్నపుడు ,కేవలం కొంత బరువుతో ఉన్న బ్యాగ్ ను యాక్సిలరేటర్  మీద పడేసినా కూడా కారు పోగలదు ! కానీ సమర్ధవంతమైన డ్రైవింగ్ అంటే వీలైనంత క్రిందకు , కాలితో యాక్సిలరేటర్ ను నొక్కి వేగం పెంచడం కాదు !  కారు వేగం పెంచడం అనేక మీటలను సమర్ధ వంతం గా నియంత్రించడం ! మొదటి గేర్ లో ఉన్న కారు వేగాన్ని ఒక స్పీడుకు కనుక స్మూత్ గా యాక్సిలరేట్  చేశాక , రెండవ గేర్ లోకి స్మూత్ గా మార్చాలి , రెండవ గేర్ లో ఒక నియమితమైన స్పీడ్ కు కారు వేగం చేరుకున్నపుడు , యాక్సిలరేటర్ ను క్రిందకు క్రమేణా నొక్కి రెండవ గేర్ లో అత్యధిక వేగానికి కారు చేరుకునే లా చేయాలి , అదే విధం గా మూడవ గేర్ కు మార్చి , మళ్ళీ యాక్సిలరేటర్ ను క్రమేణా నొక్కి ఉంచుతూ , మూడవ గేర్ లో కూడా అత్యధిక వేగానికి కారు చేరుకునేట్టు చూడాలి ! నాలగవ , అయిదవ గేర్ కు కూడా అదే పధ్ధతి ని అనుసరించాలి ! 
రెండవ గేర్ లోనే అత్యధికం గా యాక్సిలరేట్ చేస్తే పోయేదేంటి ?:
ప్రతి గేర్ కూ ఒక నియమిత వేగం ఉంటుంది ! ఆ నియమిత వేగానికే ఇంజన్ ట్యూన్ అవుతుంది , ఆ గేర్ లో ! తక్కువ గేర్ లో ఎక్కువ వేగం గా కారు వెళ్లాలని , ఎక్కువ గా అదిమి పట్టి , యాక్సిలరేట్ చేయడం , ఒక గుర్రం కనుక అత్యధిక వేగం తో పరిగెత్తుతూ ఉంటే , దానిని ఇంకా తోలు పటకాతో ( ఆంగ్లం లో విప్ అంటారు కదా ) చావ బాదుతూ ఉండడం తో పోల్చ వచ్చు ! ఇట్లా చేయడం వల్ల , ఇంజన్ మీద అత్యధిక వత్తిడి పడి , త్వరగా పాడయే రిస్కు ఎక్కువ అవుతుంది ! ఎంత ఎక్కువగానూ , తీవ్రం గానూ యాక్సిలరేటర్ పెడల్ ను నొక్కి పట్టి ఉంచితే , అంత ఎక్కువ ఇంధనం ఖర్చు కూడా అవుతుంది !  
గేరు మార్చడం ఎట్లా ? : ప్రతి కారుకూ కనీసం అయిదు నుంచి ఆరు గేర్లు అమర్చ బడి ఉంటాయి. ప్రతి గేరు లోనూ యాక్సిలరేటర్ పెడల్ ను అనుసంధానం చేసి నొక్కుతూ ఉండాలి ! తక్కువ గేర్ లో ఎక్కువ గానూ , ఎక్కువ అంటే నాలుగో లేక ఐదో గేర్ లో తక్కువ గానూ  యాక్సిలరేట్ చేయడం ఇంజన్ ఆరోగ్యాన్ని పాడు చేస్తుంది ! 
ఇంకో ముఖ్య విషయం : ఐదో లేక ఆరో గేర్ లో కారు వేగం గా పోతూ , సడన్ గా వేగం తగ్గించ వలసిన అవసరం వస్తే , వెంటనే గేరు మార్చి తక్కువ గేరు లోకి కారును తే కూడదు ! ఇట్లా చేస్తే ఇంజన్ త్వరగా పాడవుతుంది. మొదట గా చేయవలసినది , బ్రేక్ మీద కాలు ఉంచి క్రమేణా కారు వేగాన్ని తగ్గించి , అప్పుడు , కారు గేర్ ను కూడా మార్చాలి ! కొన్ని సమయాలలో , రెండవ గేర్ నుంచి నాలుగవ గేర్ లోకి స్మూత్ గా కారు వేగాన్ని మార్చవచ్చు , దానితో సమానం గా యాక్సిలరేట్ చేస్తూ ఉంటే ! 
కారు ఎత్తు కు వెళుతున్నప్పుడు గేర్ లు ఎట్లా మార్చాలి ? 
ఇక్కడ కూడా భౌతిక శాస్త్రం ఉపయోగ పడుతుంది మనకు !  మనం మెట్లు ఎక్కుతున్నప్పుడు ఎట్లాగైతే ఎక్కువ శ్రమ పడతామో , కారు ఇంజన్ కూడా అంతే ! అందువల్ల కారు ఇంజన్ శ్రమ తగ్గించడానికి , కారును రెండవ లేదా మూడవ గేర్ లో నడపడం ఉపయోగ కరం ! తక్కువ గేర్ లలో ఇంజన్ ఎక్కువ శక్తి తో పనిచేస్తుంది కనుక ! 
మరి కారు దిగువ కు వస్తున్నపుడు కూడా తక్కువ గేర్ లో ఎందుకు ప్రయాణించాలి ? : 
ఎందుకంటే , గ్రావిటీ వల్ల కారు వేగం పెరుగుతుంది సహజం గానే ! అప్పుడు కనుక నాలుగు , అయిదు , లేదా ఆరో గేర్ వేసి కారు ను నడుపుతూ ఉంటే , సహజమైన వేగం తో పాటుగా , కారు ఇంజన్ వేగం కలిసి , చాలా ఎక్కువ వేగం తో కారు క్రిందకు పోతూ ఉంటుంది ! ఆ సమయం లో కారు ను కంట్రోలు చేయడం కష్టం ! అప్పుడు సహజం గానే ప్రమాదాల రిస్కు ఎక్కువ అవుతుంది . అందువల్ల తక్కువ గేర్లే , ఉపయోగించాలి దిగువ కు వచ్చే సమయం లో కూడా ! ఎత్తు లో అంటే ఎగువ ( అప్ హిల్ ) లో కారు పార్క్ చేయ వలసిన అవసరం ఏర్పడినప్పుడు ఒక సురక్షిత మైన పధ్ధతి , కారును మొదటి గేర్ లో మార్చి ( హ్యాండ్ బ్రేక్ తో సహా ) పార్క్ చేయడం. ఇట్లా చేస్తే , ఒక వేళ , హ్యాండ్ బ్రేక్ పనిచేయక పోయినా కూడా , కారు మొదటి గేర్ లో ఉండడం వల్ల క్రిందకు జారదు ! 
వచ్చే టపాలో ఇంకొన్ని సంగతులు ! 

8.రక్షిత కారు చోదకం ( సేఫ్ కార్ డ్రైవింగ్ ).కారు ఆపడమూ , పార్క్ చేయడమూ ఎట్లా ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 17, 2013 at 11:43 ఉద.

8.రక్షిత కారు చోదకం ( సేఫ్ కార్ డ్రైవింగ్ ).కారు ఆపడమూ , పార్క్ చేయడమూ ఎట్లా ? :

ఒక వేగం లో కారును నడుపుతూ , ఆపవలసిన సమయం లో ఆపడం కూడా ఒక నేర్పే ! చాలా మంది యువకులు కొత్త కారు చాలా వేగం గా నడుపుతూ , సడన్ గా రోడ్ల మీద బ్రేక్ చేస్తూ ఉండడం సాధారణమే !  ఇట్లా ఒక్క సారిగా కారును సడన్ గా ఆపడం, కారు ఆరోగ్యానికి మంచిది కాదు ! కారు టైర్లు త్వరగా అరిగి పోతాయి , ఇంధనం కూడా ఎక్కువ ఖర్చు అవుతుంది. గమనించ వలసినది , ఎక్కువ వేగం గా కారు నడుపుతూ ఉంటే , ఆ కారును ఆపడానికి కూడా ఎక్కువ సమయం పడుతుంది.  రోడ్డు మీద తేమ ఉంటే , లేదా , రోడ్డు ఐసీ గా ఉంటే కూడా కారు ఆపడం ఆలస్యం అవుతుంది. రోడ్డు తేమ గా ఉన్నా , ఐసీ గా ఉన్నా కూడా కారు టైర్లకు పట్టు దొరకదు అంటే కారు టైర్లు గ్రిప్ కోల్పోతాయి ! అందువలననే , సాధారణ వేగం కన్నా తక్కువ వేగం తో ప్రయాణం చేయాలి , బాగా వాన కురుస్తున్నపుడు !కారును  ఆపే దూరం రెండు రకాలు గా ఉంటుంది. ఒకటి : మనం కారు ను ఆపుదామని మనసులో ఎప్పడు ఆలోచిస్తామో అది. అంటే , థింకింగ్ డిస్టెన్స్ ! రెండవది బ్రేకింగ్ డిస్టెన్స్ ! అంటే , ప్రాక్టికల్ గా బ్రేక్ ను ఎప్పుడు అప్లై చేస్తామో ఆ దూరం ! ఈ క్రింద సూచించిన ఆట లో మీరు మీ కారును ఆపే దూరాన్ని అంచనా వేసుకోవచ్చు , వివిధ వాతావరణ సమయాలలో ! చాలా ఉపయోగ కరం గా ఉంటుంది, మీ సురక్షిత డ్రైవింగ్ కు ! ప్రయత్నించండి ! 
బ్రేక్ వేయాలి అని యాంటి సిపేట్ చేస్తూ, జాగ్రత్త గా బ్రేక్ వేయడం అలవాటు చేసుకుంటే , కారు కుదుపులు లేకుండా ఆగడమే కాకుండా , కారు టైర్లు కూడా ఎక్కువ కాలం మన్నుతాయి ! టైర్ల తో పాటు బ్రేక్ ప్యాడ్స్ కూడా , ఎన్ని ఎక్కువ సార్లు బ్రేక్ వేస్తే , అంత త్వరగా బ్రేక్ ప్యాడ్స్ పాడవుతాయి ! అట్లా గని అసలు బ్రేక్ వేయకుండా ఎప్పుడూ నడిపించలేము కదా , కారును ,కానీ బ్రేక్ వేసే ప్రతి సారీ అతి జాగ్రత్తగా నిదానం గా వేస్తూ ఉంటే , బ్రేక్ ప్యాడ్ లు తరచూ మార్చ నవసరం ఉండదు ! ఈ బ్రేక్ ప్యాడ్స్ మార్పించాలంటే , చాలా ఖర్చు తో కూడిన పని !  నాసి రకం కంపెనీ వి వేయిస్తే , అవి త్వరగా పాడవ డమే కాకుండా, ప్రమాదాలకు కూడా కారణం అవుతాయి !  ఆ కారు కంపెనీ స్పేర్స్ లోనే కీలకమైన స్పేర్స్ మార్పించడం ఉత్తమం !
యాంటి సిపేట్ చేయడం అంటే , ట్రాఫిక్ లైట్ లు అంబర్ కలర్ లోకి మారడం చూడగానే , లేదా పాదచారులు రోడ్డు క్రాస్ చేస్తూ ఉండడం గమనించినా , కూడా బ్రేక్ అవసరం ఉంటుందని ఊహించడం ! ( చాలా సమయాలలో, భారత దేశం లో అనేక రోడ్ల కూడలు లలో జీబ్రా క్రాసు మీద పాద చారులు దాటుతూ ఉన్నా కూడా ఏమాత్రం పట్టింపు లేకుండా , కారు ఆపకుండా నడుపుతూ ఉంటారు ! పాదచారులకూ , సైకిల్ నడిపే వారికీ , అత్యంత ప్రాధాన్యత ఇవ్వాలి , కారు నడిపే వారు ! చాలా సమయాలలో పాదచారులదీ , సైకిలిస్ట్ లదీ తప్పు ఉన్నా కూడా !, ఎందుకంటే , పంతాలకు , పట్టింపు లకూ పొతే , ప్రమాదాలలో ఎక్కువ గా గాయ పడేది వారే కదా , కారులో కూర్చున్న వారు కాదు కదా !
పార్క్ చేయడము : 
పార్క్ చేసే ముందు , ఆ ప్రాంతం సురక్షితమో కాదో గమనించాలి ! : వెనుక నుంచీ , ప్రక్క నుంచీ వేగం గా వాహనాలు వెళుతూ ఉంటే , సరి అయిన ఇండికేటర్ ఉపయోగించి , వారికి తెలియచేయాలి , మీరు పార్క్ చేయబోతూ ఉన్నట్టు ! రివర్స్ పార్కింగ్ చేసే సమయాలలో కూడా మీరు పార్క్ చేస్తున్న ప్రదేశం సురక్షితం గా ఉందో లేదో నిర్ధారించు కోవాలి ముందే ! అవసరం అవుతే , కారు దిగి చూడడానికీ వెనుకాడ కూడదు !  ఇట్లా గమనించకుండా రివర్స్ పార్కింగ్ చేసిన ఫలితం గా , అనేక ప్రమాదాలు సంభవించి , చిన్న పిల్లలూ , పెంపుడు జంతువులూ మరణిస్తూ ఉంటారు ! పార్క్ చేశాక , అన్ని లైట్లూ ఆపి ఉన్నాయో లేదో నిర్ధారించుకోవాలి ! కారులో కొద్ది సమయం కోసమైనా , చిన్న పిల్లలను వదిలి వెళ్ళ కూడదు ! అమెరికా , ఇంగ్లండు లాంటి దేశాలలోనే , ఎండా కాలం లో ఇట్లా కారు లో వదిలి వేయబడ్డ పిల్లలూ ,కుక్కలూ , కారు వేడెక్కి , మరణించిన సందర్భాలు అనేకం ! 
వచ్చే టపాలో ఇంకొన్ని సంగతులు ! 

7. రక్షిత కారు చోదకం ( సేఫ్ కార్ డ్రైవింగ్ ).MSM

In ప్ర.జ.లు., మన ఆరోగ్యం., Our Health on ఆగస్ట్ 16, 2013 at 9:35 ఉద.

7. రక్షిత కారు చోదకం ( సేఫ్ కార్ డ్రైవింగ్ ).

 కారు ను స్టార్ట్ చేయడం :

కారు స్టార్ట్ చేయ బోయే ముందు , వార్నింగ్ లైట్లూ , ఇండికేటర్ లూ ఏమేం తెలియ చేస్తాయో ఆ అవగాహన కలిగి ఉండడం ముఖ్యం. కారు స్టార్ట్ చేయగానే కానీ , లేదా కారు సగం దూరం ప్రయాణం చేసినపుడు కానీ ఆ వార్నింగ్ సైన్స్ కనుక కనిపిస్తే , తగిన జాగ్రత్తలు తీసుకోవడానికి ! ఆ పరిస్థితులలో మాన్యువల్ తీసి చూడడం కన్నా , ముందే ఆ సంగతులు తెలుసుకుని ఉండడం ఉత్తమం !
స్మూత్ గా రోడ్డెక్కడం :  కారును ఒకసారి స్టార్ట్ చేసి  రోడ్డు ఎక్కించే ముందు , కారు చుట్టూ పరిసరాలను గమనించాలి : ఒక కిటుకు M S M  అంటే ఎమ్మెస్సెమ్  ఈ మూడు అక్షరాలనూ కారు ను నడిపే ముందు ఎప్పుడూ గుర్తు ఉంచుకోవాలి. వీటిలో మొదటి M అంటే మిర్రర్ , అంటే కారు పక్కన ఉన్న అద్దం , దీనిలోనుంచి కారు వెనుక గా నూ ,పక్కగానూ , వచ్చే వాహనాలూ , మనుషులూ  కనబడతారు కదా ! తరువాతి అక్షరం S అంటే సిగ్నల్ ఇవ్వడం. ఈ సిగ్నల్ ఇవ్వడం ఇతర దేశాలలో చేతి తో ఎప్పుడూ చేయడం కూడదు ! కేవలం కారు కు అమర్చి ఉన్న ఇండికేటర్ లైట్ లతోనే తెలపాలి ! కుడివైపు కనుక కారును తిప్పి నడుపుతే , కుడి లైట్ ను వేయాలి !
ఇటీవల బొంబాయి లో కారు డ్రైవింగ్ నేర్పేవారి ప్రోగ్రాం ఒకటి వచ్చింది బీ బీ సీ  లో ! అందులో కుడి వైపు కు లేదా ఎడమ వైపు కూ కారు తిప్పే ముందు , కేవలం డ్రైవర్ కుడి చేతి తోనే ఇండికేట్ చేయాలని , అదే కరెక్ట్ పధ్ధతి అని చెప్పడం చూశాను ! హైదరాబాదు లోనూ , ఇతర పట్టణాలలోనూ ఇదే పధ్ధతి ఉందేమో నాకు తెలియదు ! ఏమైనప్పటికీ , ఇండికేటర్ లైట్లు ఉపయోగించడం , మంచి అలవాటు ! ఇక మూడోఅక్షరం M అంటే , మెనూవర్ అంటే కారును కదిలించడం. ఈ M S M  ను కారు నడిపే అన్ని వేళల లోనూ గుర్తు ఉంచుకోవడం రక్షిత కారు చోదకానికి , అంటే సేఫ్ కార్ డ్రైవింగ్ కు ఎంతగానో సహకరిస్తుంది ! కారు స్టార్ట్ చేసే ముందు ముఖ్యం గా కారు ఏ గేరు లో ఉందో ఖచ్చితం గా తెలుసుకోవాలి ! ఆపి ఉన్న కారు ను ఎప్పుడూ న్యూట్రల్ గేర్ లో ఉంచి, హాండ్ బ్రేక్ వేసి ఉంచాలి. మర్చి పోయి కానీ మరి ఏ ఇతర కారణాల వల్ల కానీ , కారు ఒకటో గేర్ లో ( పార్క్ చేసి ఉన్నపుడే కనుక ) ఉంటే , కారును స్టార్ట్ చేసే ముందే గమనించాలి , తప్పని సరిగా !( గేర్ నాబ్ ను కదిలించి , గేర్ న్యూట్రల్ లో ఉందో లేదా , మొదటి గేర్ లో ఉందో తెలుసుకోవచ్చు ) ఇట్లా కారు స్టార్ట్ చేసే ముందే తెలుసుకోక కారు ను స్టార్ట్ చేస్తే , అంటే ఇగ్నిషన్ లో కీ పెట్టి స్టార్ట్ చేయగానే , కారు ఒక్క ఉదుపున ముందుకు వెళుతుంది , మొదటి గేర్ లో ఉంటే కనుక ! స్థలా భావ రీత్యా , కారు ను ఒక చిన్న ప్రదేశం లో పార్క్ చేసి ఉంచినప్పుడు , కారు ఒక్క ఉదుపున ముందుకు వెళ్లి , ముందు గా ఉన్న గోడకు క్రాష్ అయ్యే ప్రమాదం ఉంది ! 
డ్రై స్టీరింగ్ అంటే ఏమిటి ? : కారు ఇంజన్ స్టార్ట్ అవక ముందే కారు స్టీరింగ్ ను తిప్పి , కారు దిశను మార్చే ప్రయత్నాలు చేయడాన్ని డ్రై స్టీరింగ్ అంటారు. ఇట్లా చేయడం మంచిది కాదు. కారు చక్రాలు , అంటే టైర్లు త్వరగా అరిగి పోతాయి , రాపిడి కి !
( ఈ టపా రాస్తున్న సమయం లోనే తెలుగు దేశం ఉపాధ్యక్షుడు ఒక కారు ప్రమాదం లో మరణించినట్టు వార్త !  కారణాలు  డ్రైవర్ మాటలలోనే 1. కారు నూట నలభై మైళ్ళ వేగం తో పోతుందని ! ( మోటార్ వే మీద కూడా అత్యధిక వేగం కేవలం డెబ్బై మైళ్లే ! ఇంగ్లండు లో ! ) 2. ప్రమాద సమయం లో వాన వస్తుందని 3. మరణించిన వ్యక్తి అంత వరకూ , సీట్ బెల్ట్ పెట్టుకుని , తీసి వేయడం జరిగిందని ! డ్రైవర్ , తాను సీట్ బెల్ట్ పెట్టుకోమని అబ్యర్ధించి నా కూడా , ఆయన పెట్టుకోలేదని , తాను బ్రతికింది కేవలం సీట్ బెల్ట్ పెట్టుకోవడం వల్ల నేననీ తెలిపాడు !  ) మితి మీరిన వేగం లో కారును కంట్రోలు చేయడం చాలా కష్టం ! దానికి వాన తోడవుతే , రోడ్డు సర్రున జారుతుంది ! మరి ఈ పరిస్థితులలో సీట్ బెల్ట్ ధరించక పోవడం !??
వచ్చే టపాలో ఇంకొన్ని సంగతులు ! 
 

6. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

In ప్ర.జ.లు., మన ఆరోగ్యం., Our Health, Our minds on ఆగస్ట్ 15, 2013 at 2:05 సా.

6. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

మిగతా జాగ్రత్తలు : 
విండ్ స్క్రీన్ ఇంకా విండోస్ : విండ్ స్క్రీన్ ఎప్పుడూ , మసక బారకుండా , స్పష్టం గా ఉండాలి ! దానిమీద ఏ రకమైన స్టికర్ లూ అంటించ కుండా జాగ్రత్త వహించాలి ! అంటించిన స్టికర్ లు చూపును కొన్ని కోణాలకే పరిమితం చేసి , అత్యవసర సమయాల లో రోడ్డు మీద వాహనాలను గమనించ కుండా చేసి , ప్రమాదాల రిస్కు ఎక్కువ చేస్తాయి !విండ్ స్క్రీన్ మీద తరచూ చిన్న చిన్న రాళ్ళు పడి , విండ్ స్క్రీన్ మీద చిన్న చిన్న పగుళ్ళ కు కారణమవుతాయి ! ఈ పగుళ్ళు కూడా చూపు కు అంతరాయం కలిగిస్తాయి ! పెద్ద పగుళ్ళను వెంటనే సీల్ చేయడం కానీ , లేదా విండ్ స్క్రీన్ మార్చడం కానీ చేయాలి !విండోస్ కూడా సరిగా పని చేస్తున్నాయో లేదో చెక్ చేసుకోవాలి. 
ఎలెక్ట్రి కల్ పరికరాలు చెక్ చేయడం : 
కారు లో వివిధ లైట్లూ , విండ్ స్క్రీన్ వాషర్ లూ , హారన్ లూ , ఇట్లాంటి అనేకం విద్యుత్తు బ్యాటరీ ద్వారానే పని చేస్తాయి కదా ! వాటిని పరీక్ష చేసుకోవడం కూడా ఉత్తమం ! ప్రత్యేకించి దూర ప్రయాణాలు చేస్తూ ఉంటే ! అట్లాగే కారు బ్రేక్ నూ , స్టీరింగ్ వీల్ నూ కూడా పరీక్ష చేసుకోవాలి బయలు దేరే ముందే ! 
చాలా మంది ఇంధన టాంకు ను ఒక మాదిరి గానే నింపి , ప్రయాణాలకు ఏర్పాటు చేసుకుంటూ ఉంటారు ! కానీ వెళ్ళే చోటు వెదకడం కానీ , లేదా ట్రాఫిక్ ఎక్కువ గా ఉండి  తరచూ గేర్లు మార్చి కారును నడపడం వల్ల కానీ ఎక్కువ ఇంధనం ఖర్చు అయి రోడ్డు మీద ఇంధనం లేక పోవడం వల్ల , కారు ఆగి పోవచ్చు ! అందువల్ల ఎప్పుడూ అనుకున్న దానికంటే ఎక్కువ ఇంధనం టాంకు లో నింపు కోవడం మంచి అలవాటు ! 
పాసెంజెర్ ల జాగ్రత్త : 
కారు నడిపే డ్రైవర్ దే , కారు లో కూర్చున్న మిగతా వారందరి బాధ్యతా కూడా ! ఈ మిగతా పాసెంజర్ లు చిన్న పిల్లలు కావచ్చు , ముదుసలులు కావచ్చు , లేదా గర్భిణీ స్త్రీలో , అనారోగ్యం తో ఉన్న వారో కూడా కావచ్చు ! అట్లాంటి వారందరి జాగ్రత్త కూడా , ప్రయాణం ముందే ఏర్పాటు చేసుకోవాలి , కారు నడిపే వారే ! ప్రత్యేకించి సీట్ బెల్ట్ లు పెట్టుకున్నారో లేదో గమనించడం , వారి బరువు కు తగ్గట్టుగా కారు టైర్ల లో గాలి నింపడం జరిగిందో లేదో అని చూసుకోవడమూ , ఇంకా వారికి కావలసిన ఆహార పానీయాల విషయాలు కూడా ముందే ఏర్పాటు చేసుకోవాలి ! వాతావరణం బాగో లేక పోయినా , లేదా విపరీతమైన ట్రాఫిక్ రద్దీ ఏర్పడిన సమయాలలో ,కారు ను వదిలి , రెస్టారెంట్ లో తినడం , తాగడం సంభవం కాదు కదా ! 
వచ్చే టపాలో ఇంకొన్ని సంగతులు ! 

5. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

In ప్ర.జ.లు., మన ఆరోగ్యం., Our Health on ఆగస్ట్ 14, 2013 at 8:12 సా.

 5. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

 
కారు ప్రయాణం మొదలు పెట్టే ముందు ,  ఒకసారి ఈ క్రింది విషయాలు గమనించడం మంచిది. కేవలం కారు తక్కువ ఖర్చుతో , ఎక్కువ దూరం నడప గలగడమే కాకుండా , సురక్షితం గా కూడా నడప గలం , ఈ ముందు జాగ్రత్తలు తీసుకుంటే !
1. ఇంజన్ ఆయిల్ చెక్ చేసుకోవడం : ఇంజన్ ఆయిల్ ప్రతి ఇంజన్ కూ అతి ముఖ్యం. ఇంజన్ ఆయిల్ ఇంజన్ ను సరిగా లూబ్రికేట్ చేస్తుంది. మనం సాధారణం గా చూస్తూ ఉంటాము, ఏదైనా నట్టు బోల్టు లో తిరగడం ఎంత కష్టమవుతుందో , ఆ బోల్టు కూ , ఆ నట్టు కూ  మధ్య  సరిఅయిన లూబ్రికేటింగ్ గ్రీజ్ లేక పొతే ! అదే రకం గా ఇంజన్ ఆయిల్ లేని ఇంజన్ లో ఎక్కువ ఘర్షణ ఏర్పడి , ఇంజన్ త్వరగా పాడవడమే కాకుండా , డబ్బు కూడా ఎక్కువ ఖర్చు చేయడం జరుగుతుంది , ఇంధనం మీద ! అంటే , సరిగా ఇంజన్ ఆయిల్ లేని ఇంజన్ తక్కువ మైలేజ్ కూడా ఇస్తుంది ! ముఖ్యం గా గమనించ వలసినది , ఇంజన్ ఆయిల్ ఆ కారు ఇంజన్ ను బట్టి ఒక్కో రకమైనది ఉంటుంది ! కారు స్వంత దారే , ఈ ప్రత్యేకమైన ఇంజన్ ఆయిల్ ఏమిటో తెలుసుకొని , ఎప్పుడూ గుర్తు ఉంచుకోవాలి ! ఎందుకంటే , ఒక దాని బదులు ఇంకో ఇంజన్ ఆయిల్ కనుక వాడితే , ఇంజన్ చెడి  పోయే రిస్కు ఉంటుంది ! గ్యారేజీ వాడి మీద పూర్తి భారం వేసినా , సరి  అయిన ఇంజన్ ఆయిల్ పోస్తాడనే నమ్మకం లేదు , కారు ఓనర్ కే తెలియ  నపుడు ! 
2. ఇంజన్ కూలెంట్ చెక్ చేయడం : ఇంజన్ ఎంత ఎక్కువ సమయం నడిస్తే , అంత వేడెక్కుతూ ఉంటుంది కదా ! మరి ఇంజన్ నుచల్ల బరిచే కూలెంట్ కూడా రెగ్యులర్ గా పోస్తూ  ఉండాలి ! ఆ ప్రత్యేక రసాయన మిశ్రమము, ఇంజన్ ఎక్కువ గా వేడెక్క కుండా చేస్తుంది ! మ్యాన్యువల్ ను చదివి ఇంజన్ కూలెంట్ ను ఎక్కడ పోయాలో తెలుసు కోవడం కూడా మంచిదే ! 
3. టైరు వత్తిడి : కారు నాలుగు టైర్లూ ‘ మంచి ఆరోగ్యం ‘ తో ఉండేట్టు చూసుకోవాలి ! ఈ విషయం సైకిల్ టైరు ఉదాహరణ తో బాగా అర్ధం చేసుకోవచ్చు ! సైకిల్ కు ఉన్న టైరు లో వత్తిడి తగ్గితే , మనం ఎక్కువ శ్రమ పడి తొక్కడం మన అనుభవం లోనిదే కదా ! అట్లాగే సైకిల్ టైరు , పాత బడితే కానీ , లేదా ఒకటి రెండు పంచర్లు అవుతే కానీ ,పంచర్ అయిన చోట , ఒక ప్యాచ్ వేసి, టైరు లో మళ్ళీ గాలి నింపి , సైకిల్ నడిపేట్టు చేస్తాడు , రోడ్డు ప్రక్కన రిపేర్ చేసే వాడు ! అంత వరకూ బాగానే ఉంది ! కానీ పంచర్ ప్యాచ్ ఒక బుడిపె లాగా ఉబ్బి ఉండడం గమనించారా !మరి ఇప్పుడు , కారు టైరు ను కనుక సైకిల్ టైరు తో పోల్చుకుంటే , కారు టైరు లో పీడనం అంటే ప్రెషర్ తగ్గితే , ఎక్కువ పెట్రోలు తాగుతుంది ఆ కారు ! అంతే కాకుండా టైరు అతి త్వరగా  అరిగి పోతుంది ! అట్లా అరిగి, అరిగి , పంచర్ అవుతుంది ! సైకిల్ నడిపినపుడు పంచర్ అవుతే ప్రమాద తీవ్రత తక్కువ గా ఉంటుంది ,ఎందుకంటే , సైకిల్ ను ఒక మాదిరి వేగం తోనే నడుపుతాము కనుక ! అదే కారవుతే , యాభై, అరవై మైళ్ళ వేగం తో నడుపుతున్నపుడు పంచర్ అవుతే !? అప్పుడు జరిగే ప్రమాదం తీవ్రత  ఊహించు కోండి ! అందువల్ల కారు టైరు ఆరోగ్యం కేవలం టైరు లో వత్తిడి చెక్ చేసుకోవడమే కాకుండా , ఆ టైరు ఎంత అరిగి పోయిందో కూడా తరచూ గమనిస్తూ ఉండాలి ! కారు టైరు ఎంత అరిగి పోయి ఉంటే , రోడ్డు మీద ఆ కారు పట్టు ( అంటే గ్రిప్ ) అంత తక్కువ గా ఉంటుంది ! ప్రత్యేకించి , రోడ్డు నానినపుడు , కనుక బ్రేక్ చేస్తే , కారు ఆగక పోగా , ఇతర వాహనాలకు కానీ , లేదా ,గోడలకూ , చెట్ల కూ గుద్దుకుని , ప్రమాదం జరిగే రిస్కు ఎక్కువ అవుతుంది !
ఒక ముఖ్య విషయం : కారు టైరు ఎంత అరిగి పోయిందో , ఆ కారు ప్రయాణించిన దూరం తో నే అంచనా వేయకూడదు ! ఎందుకంటే తరచుగా బ్రేకు లు వేయడం వల్ల రోడ్డు మీద  రాపిడి ఎక్కువ అయి, టైర్లు అరిగి పోవడానికి ఎక్కువ అవకాశం ఉంది ! 
వచ్చే టపాలో ఇంకొన్ని సంగతులు !