స్ఫూర్తి పధం లో , ప్రయాణం కొన సాగించడం ఎట్లా?

మనం చాలా సమయాలలో సోమరి తనాన్ని వదిలేసి , స్ఫూర్తినీ , ఉత్తేజాన్నీ పొందాలని, మన జీవితాలలో ఎక్కువ నిర్మాణాత్మకంగా పురోగామించాలనీ అనుకుంటూ ఉంటాము.  మనకు కావలసిన స్ఫూర్తిని కూడా పొందుతాము. వచ్చిన చిక్కల్లా ఏమిటంటే మనం తెచ్చుకున్న స్పూర్తి ఒక చేప లాగా మన ” చేతులలోనుంచి ” జారిపోవడానికి ప్రయత్నిస్తూ ఉంటుంది, తరచూ జారి పోతూ కూడా ఉంటుంది. మరి ఒక సారి పొందిన స్ఫూర్తిని , మన ” చేతులలోనుంచి ” జారి పోకుండా ఉండాలంటే ఏమి చేయాలో చూద్దాం !

అంతర్వలయం ఏర్పరుచుకోవడం అంటే ఇన్నర్ సర్కిల్ ఏర్పరుచుకోవడం : మానవుడు సంఘ జీవి. తాను చేసే ప్రతి పనికీ తానే సంపూర్ణ బాధ్యత వహించినా , ఏదో ఒక సమయం లో ఇతరుల సహాయ సహకారాలు తీసుకోవడం చేయవచ్చు. ఈ ఇతరులు ఎవరైనా కావచ్చు. వారు మీ బాగు ( హితం ) కోరే వారై ఉండాలి. వారితో మీరు అంతరంగికం గా మీ వ్యక్తిగత విషయాలు కానీ మీ చదువు లేదా ఉద్యోగ విషయాలు కానీ ఏ ఇబ్బందీ , మొహమాటమూ లేకుండా మాట్లాడి అవసరమైతే, వారి సహాయం తీసుకునేట్టు ఉండాలి. మనం చాలా సమయాలలో మనం ఇతరుల సలహా కానీ , సహాయం కానీ తీసుకోవడానికి సుముఖం గా ఉండము ! కారణాలు ఏవైనప్పటికీ , ఇది ఆరోగ్యకరమైన పరిస్థితి కాదు. మనం తీసుకునే ప్రతి సలహానూ మనం ఆచరించ నవసరం లేదు. కానీ ఇతరుల అభిప్రాయాలను కూడా తీసుకుంటే , మనం తీసుకునే నిర్ణయాల యుక్తా యుక్త విచక్షణ మనకు అలవరుతుంది. ఈ సలహాలో, సహాయమో తీసుకునే ఇన్నర్ సర్కిల్ లేదా అంతర్వలయం లో మన బాగు కోరే వారు విశ్వాస పాత్రులైన వారూ , పాజిటివ్ గా ఆలోచించే వారూ , ఇంకా వారు పురోగమిస్తూ , మన పురోగమనాన్ని కూడా కాంక్షించే వారై ఉండాలి ! ఈ విషయం లో మనం నెగెటివ్ గా ఆలోచించ నవసరం లేదు ! పైన చెప్పిన లక్షణాలున్న వారు కూడా మన సమాజం లో, మన చుట్టూ ఉంటారు ! కాకపొతే మనం కాస్త ఓపిక గా వెదకాలి ! ఇంకో ముఖ్య విషయం. మీరు మర్చిపోకూడనిది ఏమిటంటే , మీ చుట్టూ ఉండే వారు కూడా మీ సలహా , సహాయాల కోసం వెదుకుతూ ఉండవచ్చు కదా !

స్వేదం లేక పొతే విజయం లేదు : అంటే మనం తీసుకున్న నిర్ణయాల తో , చేరబోయే లక్ష్యాల కోసం తాపత్రయ పడుతూ , శ్రమ పడుతూ , చెమటను చిందించక పొతే విజయం సాధించ లేము. ప్రపంచం లో అనేక రంగాలలో విజయ వంతమైన వారు చెప్పేది ఒకటే ! 99% కృషీ , 1 % మాత్రమే అదృష్టం ! మన జీవితాల మీద మనకు ఒక పట్టు ఉండి , మనం అనుకున్నది సాధించడానికి , మన మాటలు , చేతల రూపంలోకి మారితేనే ఫలితం ఉంటుంది కదా ! లేక పొతే అవి కేవలం నీటి మాటలు అవుతాయి !
ఫ్లో ( flow state ) : ఈ ఫ్లో సైకాలజీ గురించి వివరం గా కొన్ని టపాలు పోస్ట్ చేయడం జరిగింది బాగు లో ! మన కార్యాచరణ లో ఈ ఫ్లో ప్రాముఖ్యత అంతా ఇంతా కాదు ! ( వివరాల కోసం పాత టపాలు చూడండి ! )

పట్టు పట్టరాదు, పట్టి  విడువ రాదు !: ఒక విషయం మీద దృష్టి కేంద్రీకరించి , వివరం గా ఆలోచించి , ఒక నిర్ణయం తీసుకున్నాక , ఆ లక్ష్య సాధన కోసం , నిరంతరం శ్రమిస్తూ ఉండాలి ! ఎన్ని అవాంతరాలు ఎదురైనా ! మానవులకే కదా అవాంతరాలు ఉండేది ! రాళ్ళూ రప్పలకు ఉండవుకదా ! అందువల్ల చివరి వరకూ పట్టుదలతో శ్రమించి లక్ష్యం చేరుకుంటే , ఆ ఆనందం, అనుభూతీ , మాటలలో వివరించ తరం కాదు ! 

అట్లా ఎన్నో లక్ష్యాలను చేరుకొని , మీ జీవితాలలో , ఎన్నో సంతృప్తి కరమైన అనుభూతులు చెందుతూ, ఆనందపు అంచులు చేరుకుంటారని ఆశిస్తున్నా !
వచ్చే టపాలో ఇంకొన్ని సంగతులు !

….  స్ఫూర్తి  రాజ బాట లోకి ఎట్లా వెళ్ళ గలం ?: 

6. సమయం తీసుకోండి : మీరు నిర్ణయించుకున్న లక్ష్యం లేదా పనిని కొన్ని భాగాలు గా విభాజించుకోండి. మానవ మస్తిష్కం అంటే మెదడు మనం చేసే పనులు చిన్న చిన్నవి గా ఉన్నప్పుడు వత్తిడి తక్కువ గా ఉండి మనం ఆ పనిని ఉత్సాహం తో చేయగలగ డానికి మోటివేట్ చేస్తాయి.అందువల్ల మన లక్ష్యం మొత్తం మీద పెద్దదైనా , చిన్న చిన్న భాగాలు గా విభజించి ఒక నిర్ణీత సమయం ప్రాతిపదిక గా కనుక పూర్తి చేయగలుగుతూ ఉంటే , మనం మన లక్ష్యాన్ని ఉల్లాసం గా సకాలం లో చేరుకో గలుగుతాము ! అంతే కాక , చేసే పనులు చాలా రకాలు గా ఉంటే , మనకు వీలైనప్పుడు ఒక్కో పని కూడా పూర్తి చేస్తూ ఉండ వచ్చు . అంటే మనం ఒకే పనిని పూర్తి అయే వరకూ చేయ నవసరం లేదు. ఇట్లా చేయడం వల్ల ఒకే పని చేస్తున్నప్పుడు కలిగే విసుగును మనం నివారించు కోవచ్చు ! కాస్త చేసే పనులలో వెరైటీ కనుక ఉంటే !
7. ఆత్మావలోకనం : జీవితం లో ఒక వయసు వచ్చిన తరువాత అంటే టీనేజ్ దాటినప్పుడు , కొంత పరిణితి వస్తుంది ఆలోచనలలో, చేతలలో ! ముఖ్యం గా మనం చేసే పనులకు మనమే బాధ్యత వహించడం కూడా జరుగుతుంది. అంటే మనం మనం చేసే పనులు పొర పాటు కనుక అవుతే దానికి ఇతరులను నిందించ లేము ! అందువల్ల తరచూ ఆత్మావలోకనం చేసుకుంటూ ఉండాలి మనలో మనమే ! మన జీవితం లో మనం తీసుకో బోయే నిర్నయాలకూ, చేరుకోవాలనుకునే లక్ష్యాలకూ , మనమే ప్రేరణ కావాలి ! ” నేను ఈ పని చేయగలను ” ” నేను బ్రేక్ తీసుకునేది ( అంటే విరామం ) తీసుకునేది నేను చేస్తున్న ఈ పని పూర్తి చేసిన తరువాత మాత్రమె ” అని మనకి మనమే ఒక క్రమ శిక్షణ అలవరచు కోవాలి. దీనినే వర్క్ ఎథిక్స్ అంటారు !
8. విరామం ఖచ్చితం గా పాటించండి : క్రమ శిక్షణ మనం చేయబోయే పని ఎప్పుడు చేయాలి , ఏమి చేయాలి , అసలు చేయాలా వద్దా అనే విషయాలు చేస్తున్న వారికి తెలిసినట్టు ఇతరులకు తెలియవు. అంటే మీకు తెలిసినట్టు ఇతరులకు తెలియవు. అందువల్ల మీరు చేస్తున్న పని నుంచి తీసుకునే విరామం కూడా ఖచ్చితం గా పాటించాలి, అంటే ఎక్కువ సేపు విరామం తీసుకున్నా , మీరు చేస్తున్న పని ని మాత్రం అశ్రద్ధ చేయక , మీరనుకున్న సమయానికి చేయగలిగేట్టు ఉండాలి !
9. మిమ్మల్ని అభినందించుకోండి : మీరు పూర్తి చేసిన పనులకూ , లేదా పని పూర్తి చేసి లక్ష్యం చేరుకున్నప్పుడూ మిమ్మల్ని మీరు తప్పకుండా అభినందించు కోవడం మరచి పోకండి ! చేర వలసిన గమ్యం చాలా దూరం లో ఉన్నా మైలు రాళ్ళు దాటుతున్నప్పుడు మిమ్మల్నిమీరు అభినందించు కుంటూ ఉంటే , అది మీకు సేద తీర్చడమే కాకుండా , లక్ష్యాన్ని ఉత్సాహం తో చేరుకోడానికి ప్రేరణ కూడా అవుతుంది !
10. సెలెబ్రేట్ చేసుకోండి : అంతే కాకుండా , తాత్కాలిక లక్ష్యాలను చేరుకున్నప్పుడు ( ఆ మాటకొస్తే పూర్తి చేసిన ప్రతి పనికీ ) మీకు నచ్చిన విధం గా సెలెబ్రేట్ చేసుకోండి ! అంటే మిత్రులతో ఒక సినిమా కు వెళ్లడమో , ఒక మంచి భోజనం చేయడమో ఇలాంటివి ! ఇట్లా సెలెబ్రేట్ చేసుకుంటూ ఉంటే మన మెదడు కూడా మన లక్ష్యాలను చేరుకోడానికి మనకు తెలియకుండానే ఉత్సాహం , ప్రేరణ వస్తూ ఉంటాయి !

వచ్చే టపాలో ఇంకొన్ని సంగతులు ! 

2013 లో, సోమరి తనం సందు లోంచి స్ఫూర్తి రాజ బాట లోకి ఎట్లా వెళ్ళ గలం ?:

కొత్త సంవత్సరం మొదటి రోజు ! గత సంవత్సరం లో మన విజయాలను జ్ఞాపకం చేసుకుంటూ పురోగమించ వలసిన సమయం ! అట్లాగే మన అపజయాలనూ మననం చేసుకుంటూ , అవి పునరావృతం కాకుండా జాగ్రత్త పడే సమయం కూడా ! ఎవరికి ఏ విధమైన సమస్యలు ఉన్నా , మానవులనందరినీ బాధించే ప్రధాన సమస్య , సోమరితనం ! అదే లెజీనెస్స్ లేదా ఇండో లెన్స్ ! మరి ఈ సోమరి తనాన్ని వదిలించు కునే మార్గాలు తెలుసుకుని, 2013 లో విజయ పధం లో ప్రయాణానికి సన్నద్ధుల మవుదామా !

1.మిమ్మల్ని వెనక్కి లాగుతున్నది ఏంటో కనుక్కోండి : ప్రతి సారీ మీ స్ఫూర్తి ని కబళించ డానికి సోమరి రక్కసి ప్రయత్నిస్తున్నప్పుడల్లా , మీరు ఆలోచించు కొండి , మీరు ఆ పని లో ఉన్న సాధక బాధకాలు. అంటే ప్రత్యేకించి ఏ విషయం మీకు సమస్య గానూ , అవరోధం గానో , ఉందో ! ఇక్కడ మీరు గుర్తు పెట్టుకోవలసిన పదం ఒక్కటే ! ” పట్టుదల”
ఒక ఉదాహరణ: థామస్ ఆల్వా ఎడిసన్ అనే అమెరికన్ శాస్త్రజ్ఞుడు అనేక వందల శాస్త్రీయ ఆవిష్కారాలు చేశాడు. మనం ఇంట్లో ప్రతి రోజూ వాడే విద్యుత్ బల్బ్ వాటిలో ఒకటి మాత్రమే ! ఈ ఆవిష్కారాలన్నీ ఆయన అనేక వేల సార్లు విఫలం చెందినా ” పట్టుదల ” తో చివరికి సాధించినవే ! ఆయన ” కష్టపడి పని చేయడాన్ని మించిన మంత్రం లేదు విజయానికి ” అని అన్నాడు ! మీరు చేయవలసింది , పట్టుదల వీడకుండా మీరు అనుకున్న పని సాధించడం !
2. సాధించ గలిగిన లక్ష్యాలను పెట్టుకోండి :
జీవితం లో ప్రతి సమయం లో ఒక్కో ప్రత్యేకమైన లక్ష్యం ఏర్పరుచుకోవడం ఎందుకంటే , మనం ఆ లక్ష్యం వైపు ఉత్సాహం తో పరుగెత్తుతూ ఉంటాం ! ఆ లక్ష్యం చేరుకోవడానికి శ్రమిస్తూ ఉంటాం ! ఆ లక్ష్యాలు మనం చేరుకో గలవి గానే ఉండాలి. అంతే కాక అవి మన శక్తి సామర్ధ్యాల ను పరీక్షించేవి గానూ ఉండాలి ! మనం ఇట్లా లక్ష్యాలను రెండు రకాలు గా ఏర్పరుచు కోవచ్చు ! తాత్కాలిక లక్ష్యాలు, దీర్ఘ కాలిక లక్ష్యాలు ! ఉదా: మనం చదువుతున్న చదువు చక్కగా చదివి జ్ఞానాన్ని సంపాదించుకుని పరీక్షల్లో సఫలం అవడం ! ఇక దీర్ఘ కాల లక్ష్యం , ఒక మంచి ఉద్యోగం సంపాదించి, ఒక మంచి జీవిత భాగస్వామి తో జత కట్టడం , ఒక ” ఇంటి ” వారవడం ! ఒక ఇల్లు, కారూ కొనుక్కోవడం ! లాంటివి. ఇంకో బిల్ గేట్స్ , జుకర్బర్గ్ , లేదా రతన్ టాటా లేదా నారాయణ మూర్తి అవుదామనుకోవడం లో కూడా తప్పు లేదు ! అట్లాగే ( నీతి, నిజాయితీ ఉన్న ) ” నేత” కావాలనే లక్ష్యం ఏర్పరుచుకున్నా తప్పు లేదు కదా !
కొందరు మానసిక శాస్త్ర వేత్తలు ఈ లక్ష్య నిర్దేశనం కోసం మీరు ఒక డైరీ లాంటిది ఏర్పాటు చేసుకుని , రోజూ అది పరిశీలిస్తూ కూడా ఉంటే , అది మనకు బాగా ఉపయోగ పడుతుందంటారు ! అట్లాగే మన లక్ష్యాలను పదాలతో రాసుకోవడం గానీ , లేదా చిత్రాలతో గీసుకోవడం కూడా చేసుకోవచ్చంటారు ! ( గుర్తుంచు కొండి, మనం చిత్ర కారులం కానవసరం లేదు దీనికి ! కేవలం మన భావి జీవిత చిత్రకారులం కావాలి. మన జీవిత గీత లను అందం గా గీసుకో గలిగేది మనమే కదా ! )
3. తరచూ లక్ష్యావలోకనం చేసుకోండి : ఇల్లలక గానే పండగ కాదు కదా ! మనం ఏర్పరుచుకునే ప్రతి లక్ష్యమూ, మన ప్రమేయం లేకుండా మనం ఎట్లా సాధించ గలం ? అందువల్ల తరచూ మనం లక్ష్యం దిశగా పోతున్నప్పుడు , అందుకోసం మనం రోజూ చేస్తున్నది సరిపోతుందా  లేదా , వస్తున్న అవరోధాలను సరిగా అధిగమించ గలుగు తున్నామా , లేకపోతే  అందుకు మన పధకాలను మార్చుకో వలసిన అవసరం ఉందా , ఉంటే , ఏవిదం గా మార్చుకోగలం అని తరచూ ” లక్ష్యావలోకనం ” చేసుకుంటూ ఉండాలి !  
4. మీకు మీరే ” నేను ఈ పని చేయగలను ” అని ధైర్యం చెప్పుకోండి : సోమరి తనానికి విరుగుడు కర్తవ్యం ! అంటే క్రియా శీలురం అవడమే కదా !  చిన్న తనం లో సోమరి గా కనుక ఉన్నట్టయితే ,  పెరిగే సమయం లో కూడా అట్లాగే పెరగ నవసరం లేదు కదా ! ఒక విధం గా చెప్పాలంటే , మీకు ఇక సోమరి గా కాక స్ఫూర్తి దాయకం గా ఎందుకు ఉండాలో కూడా బాగా తెలిసేది అప్పుడే !
5. నాంది ( అంటే మొదలెట్టడం ) : జీవితం అంటే అనేక సమస్యల , అనేక అనుభూతుల , అనేక అందాల సమ్మేళనం. కేవలం సమస్యల నే పదే పదే వల్లె వేస్తూ , ఏదో ఒక సాకు చెబుతూ , కర్తవ్యాన్ని దాటవేస్తూ ఉంటే మన లక్ష్యం నిర్లక్ష్యం చేసిన వారమవుతాము ! అపుడు నష్ట పోయేదీ మనమే కదా ! అందువల్ల మన సమస్యలను సమర్ధ వంతం గా ఎదుర్కొని , మన లక్ష్యాలను చేరుకోవడానికి సంనద్దులం కావాలి. అందుకు మనం శారీరకం గానూ ఫిట్ గా ఉండాలి. అందుకు సరి అయిన సమయం లో సరిపడినంత ఆరోగ్య కరమైన ఆహారం తినాలి, అట్లాగే  అవసరమైనంత వ్యాయామం కూడా చేస్తూ ఉండాలి !
మిగతా సంగతులు వచ్చే టపాలో !

B12 లోపానికీ అనీమియా ( రక్త హీనత ) కీ సంబంధం ఉందా?

క్రితం టపాలో మనం తెలుసుకున్నాం కదా కడుపులో మంట కు మనం వాడే మందులు దీర్ఘకాలం గా వాడడం జరిగితే , అది B 12 విటమిన్ లోపానికి కారణభూతం ఎట్లా అవుతుందో !
ఇప్పుడు అదే విటమిన్ B 12 విటమిన్ లోపం రక్త హీనత లేదా అనీమియా కు ఎట్లా కారణ భూతం అవుతుందో తెలుసుకుందాం !
రక్త హీనత అంటే రక్తం పలచ బడడం ! అంటే మనకు సామాన్యం గా ఉండే రమారమి అయిదు లీటర్ల రక్తం అట్లాగే ఉంటుంది అంటే పరిమాణం అంతే ఉంటుంది కానీ, చిక్కగా ఉండక , పలచ బడుతుంది. అంటే రక్తం లో ఉండే ఎర్ర రక్త కణాల సంఖ్య తగ్గుతుంది దానితో రక్తం ఎరుపు చిక్కటి ఎరుపు కాక, పాలి పోయిన , పలచని ఎరుపు గా అవుతుంది. రక్తం రంగుతో మనకు సంబంధం ఏమిటి ఎర్రగానే ఉంటుంది కదా , చిక్కగా ఉన్నా , పలుచగా ఉన్నా అని మీరు అనుకోవచ్చు. కానీ పలుచగా ఉన్నప్పుడు , రక్తం లో ఉండే ఎర్ర కణాలు , అవే ఎర్ర రక్త కణాలు ( R B C లేదా రెడ్ బ్లడ్ సెల్స్ అంటారు ) మన దేహం లో ప్రతి కణానికీ ప్రాణ వాయువు సరిపడినంత సరఫరా చేయలేవు. దానితో రక్త హీనత ఉన్న వారు , ఉసూరు మంటూ , బలహీనం గా ఉంటారు , ఏ పనీ చురుకు గా చేయలేరు. కొద్ది సేపటిలోనే అలసట వస్తుంది. ఆయాసం వస్తుంది, అట్లాగే ఎక్కువ సమయం పని చేయడం కానీ , మెట్లు ఎక్కడం గానీ , నడవడం కానీ చేసినప్పుడు !
ఈ కధంతా ఎందుకంటే , రక్త కణాల తయారీ కీ ఇనుము ( ఖనిజం ) తో పాటుగా B 12 విటమిన్ ఇంకా ఫోలిక్ యాసిడ్ విటమిన్ మనకు తప్పని సరిగా కావాలి , వీటి లో ఏవి లోపించినా , మనకు రక్త హీనత లేదా అనీమియా కలుగుతుంది. ఇప్పుడు తెలిసింది కదా B 12 లోపానికీ , రక్త హీనత కూ సంబంధం ఎట్లా ఉందో ! 

( పైన ఉన్న చిత్రం లో మీకు ఎడమ వైపు ఉన్నది మామూలు రక్త కణాలు ( మైక్రోస్కోప్ లో ఇట్లా కనిపిస్తాయి ) కుడి వైపున B 12 లోపం ఉన్నప్పుడు పెద్దగా  పలుచ గా కనిపిస్తాయి.) 

కడుపులో మంటకు వేసుకునే మందుల తో పాటుగా ఈ క్రింద చెప్పిన మిగతా మందులు కూడా మన జీర్ణ కోశం లో నుంచి B 12 విటమిన్, మన రక్తం లో కలవకుండా నివారించి , తద్వారా , B 12 విటమిన్ లోపమూ , రక్త హీనతా కలిగిస్తాయి !
1. మద్యం లేదా ఆల్కహాలు : ఎక్కువ మోతాదు లో మద్యం మన జీర్ణ కోశం లో ఎక్కువ సమయం కనక ఉంటే , ఆ పరిస్థితి , ఆహారం ద్వారా మనం తినే B 12 విటమిన్ ను కడుపు లో నుంచి రక్తం లోకి ప్రవేశించడం చాలా వరకు తగ్గి పోయి , B 12 విటమిన్ లోపం కలుగుతుంది.
2. నికోటిన్ : ఈ నికోటిన్ ఏ రూపం లో ఉన్నా అంటే పొగాకు రూపం లో గానీ , పాన్ సుపారీ లరూపం లో ( అంటే జర్దా గా ) కానీ ఉండ వచ్చు. చేసే ” ఘన కార్యం ” మాత్రం ఒకటే ! శరీరాన్ని అనారోగ్యం పాలు చేయడం !
3. మెట్ ఫార్మిన్ : ఈ టాబ్లెట్ ను మధుమేహం ఉన్న వారు చాలా క్రమం గా తీసుకుంటూ ఉంటారు. ఈ టాబ్లెట్ కూడా B 12 లోపం కలిగిస్తుంది.
4. కొన్ని రకాల యాంటీ బయాటిక్స్ కూడా ఈ B 12 విటమిన్ లోపం కలిగిస్తాయి.

వచ్చే టపాలో ఇంకొన్ని సంగతులు !

కడుపు మంటకు వాడే మందులు B12 విటమిన్ లోపానికి కారణమా ?: 

కడుపు మంటకు వాడే మందులు B12 విటమిన్ లోపానికి కారణమా ?

B 12  విటమిన్ కూడా ఇంకో B విటమిన్ల కుటుంబానికి చెందిన విటమినే ! దీనిని కోబాలమిన్ అని కూడా అంటారు.

ఈ విటమిన్ లేక పొతే ఏమవుతుంది ?:
మిగతా B విటమిన్ల మాదిరి గానే ఈ కోబాలమిన్ లేదా B 12 విటమిన్ కూడా మన శరీరం లో ప్రతి కణం జీవ క్రియల లోనూ అతి ముఖ్యమైనది. ముఖ్యం గా మన రక్తం నిర్మాణానికీ , మన మెదడు , ఇంకా మిగతా నాడీ మండలం నిర్మాణానికీ , ఇంకా సరిగా పని చేయడానికీ కూడా ఈ కోబాలమిన్ విటమిన్ అతి ముఖ్యమైనది.
ఈ విటమిన్ ఏ ఆహార పదార్ధాలలో ఎక్కువ గా ఉంటుంది ? :
కానీ మిగతా B విటమిన్ల లాగా కాక ఈ విటమిన్ కాయ గూరలలోనూ , శిలీంధ్రాల లోనూ ( అంటే పుట్ట గొడుగుల లోనూ ) ఉండదు. మిగతా జంతువులూ ఈ విటమిన్ ను స్వతహాగా తయారు చేసుకో లేవు. మరి ఈ విటమిన్ ఎట్లా మనకు లభ్యం అవుతుంది? అని ప్రశ్నించు కుంటే , సమాధానం : బ్యాక్టీరియా లు అని చెప్పుకోవాలి. ఈ విటమిన్ తయారు చేసుకోవడానికి అవసరమైన ఎంజైమ్ కేవలం బ్యాక్టీరియా లలోనే ఉంది.
పాలు, జున్ను , కోడి గ్రుడ్డు , కోడి లేదా మేక కాలేయము ( లివర్ ) వీటిలో B 12 విటమిన్ సమృద్ధి గా ఉంటుంది.
మరి కడుపు మంటకు వాడే మందులు B 12 విటమిన్ లోపం ఎట్లా కలిగిస్తాయి ? :
సామాన్యం గా నవీన మానవ ఆహారపు అలవాట్లు ఎట్లా ఉంటున్నాయంటే, నూనె లు ఎక్కువగా ఉన్న ఆహార పదార్ధాలు , అంటే ఫ్రైడ్ ఫుడ్స్ , లేదా బాగా మసాలాలు దట్టించిన కూరలూ , బిర్యానీ లూ చాలా అందుబాటులో ఉంటున్నాయి. మీ సెల్ ఫోను లోంచి ఒక్క కాల్ చేస్తే సరి ! ఇంట్లోకి ” రెక్కలు కట్టుకున్నట్టు ” వాలుతాయి ఆహారం ప్యాకెట్ లు , నిముషాలలో ! వీటితో బాటుగా , ఇంట్లో ఉన్న ఆవకాయలో , మాగాయలో , లేదా మన ఆంధ్రా గోంగూరలో కలుపు కొని మనం అసలే స్పైసీ గా ఉన్న ఫుడ్ ను ఇంకా స్పైసీ గా చేసి తింటాము. వీటికి తోడు , ” మందు ” కూడా ఒక మోతాదు లో కలిస్తే ! ఇక ఊహించుకోండి ఏంజరుగుతుందో ! మొదట నోట్లో పడగానే ఎవరి రుచుల ఇష్టాల బట్టి వారికి చాలా రుచికరం గా , ఆనంద కరం గా ఉంటుంది , తింటున్నంత సేపూ , ఇక రెండవ దశలో అంటే మనం తిన్న ఆహారం అంతా మన జీర్ణాశయం లోకి పోగానే , మన జీర్ణ రసం కూడా కలుస్తుంది. మన జీర్ణ రసం ముఖ్యం గా హైడ్రో క్లోరిక్ యాసిడ్. మనం చదివే ఉంటాము చిన్నప్పుడు, దానిని తెలుగులో ఉదజ హరిత ఆమ్లము అని అంటారు. ఈ ఆమ్లం కూడా ఆహారం తో ( అప్పటికే స్పైసీ గా ఉన్న ఆహారం లో ) కలిసి జీర్ణాశయం గోడల లో ఉన్న అతి సున్నితమైన కణాల భరతం పడతాయి ! దానితో ఆ కణాలు తట్టుకోలేక , పోట్టంతా పుండు లా తయారవుతుంది. వెంటనే డాక్టర్ దగ్గరికి పరుగు , ఆ వెంటనే మందుల షాపు కు ! అట్లా మొదలవుతుంది కడుపు మంట కు వాడే మందుల ఇనాగురేషన్  అంటే నాంది ! ఈ మందులు వెంటనే అత్యవసర చర్య గా కడుపులో సహజం గా వస్తున్న హైడ్రో క్లోరిక్ యాసిడ్ ను తగ్గించేస్తాయి ! ఇట్లా చేయడం తో కడుపు లో కి ( మనం తింటున్న వివిధ ఆహార పదార్ధాల లో ఉన్న ) B 12 విటమిన్ ” జీర్ణం అవక ” అంటే కడుపు గోడల నుంచి, మన రక్తం లో కలవక , మనకు B 12 లేదా కోబాలమిన్ లోపం వస్తుంది !
మిగతా కారణాలు వచ్చే టపాలో తెలుసుకుందాం !

ఫోలిక్ యాసిడ్ కేవలం గర్భ వతులకే ముఖ్యమా?

క్రితం టపాలో చూశాము కదా గర్భ వతులకు ఫోలిక్ యాసిడ్ విటమిన్లు ఎంత ముఖ్యమో !
మరి మిగతా వాళ్లకు ఈ విటమిన్ అవసరం ఉండదా? :
ఇటీవలి పరిశోధనల ద్వారా ఫోలిక్ యాసిడ్ , అదే B 9 విటమిన్ అన్ని వయసుల వాళ్ళకూ అతి ముఖ్యమైన విటమిన్ అని తెలిసింది.
వీర్య వృద్ధి : మగ వారిలో వీర్య కణాలను ఎక్కువ శక్తి వంతం గా చేయడం లో ఫోలిక్ యాసిడ్ ఉపయోగ పడ వచ్చునని శాస్త్రజ్ఞులు భావిస్తున్నారు. రోజూ 700 మైక్రో గ్రాముల ఫోలిక్ యాసిడ్ బిళ్ళలను తీసుకుంటే , వీర్య వృద్ధి ఫలితాలు గణ నీయం గా ఉంటాయని తెలిసింది. గుర్తుంచు కొండి , 700 మైక్రో గ్రాములు మాత్రమె ( మైక్రో గ్రాము అంటే గ్రాములో వెయ్యో వంతు మాత్రమె )
పక్షవాతం నివారణ : ఫోలిక్ యాసిడ్ విటమిన్ కొంత వరకూ , పక్షవాతం నివారణలో మనకు తోడ్పడుతుందని తెలిసింది.

క్యాన్సర్ నివారణ: పురుషులలో వచ్చే ప్రోస్టేట్ క్యాన్సర్ , ఇంకా పెద్ద ప్రేగు క్యాన్సర్ ల నివారణ లో కూడా ఫోలిక్ యాసిడ్ ఉపయోగ పడుతుందని కొన్ని పరిశోధన ఫలితాలు నిరూపించాయి.

ఇటీవలి పరిశోధనలో ఫోలిక్ యాసిడ్ డిప్రెషన్ , ఊబ కాయం నివారణలో ఇంకా మన శరీరం నిరోధక శక్తి ని బలోపేతం చేయడం లో కూడా ఎంతో ఉపయోగ పడుతుందని తెలిసింది.

మరి మనకు ఇంతగా ఉపయోగ పడే ఈ ఫోలిక్ యాసిడ్ మనం తినే ఏ ఏ ఆహార పదార్ధాలలో ఉంటుందో చెప్పా గలరా ?! ప్రయత్నించండి !
వచ్చే టపాలో ఇంకొన్ని విషయాలు !

( పైన ఉన్న చిత్రం ఇటీవలే ప్రపంచ సుందరి కిరీటం గెలుచు కున్న ఒలీవియా కల్పో అనే సుందరిది ! )

గర్భవతులలో ఫోలిక్ యాసిడ్ విటమిన్ ( B 9 ) లోపం ఉంటే ఏమవుతుంది ?:

ఫోలిక్ యాసిడ్ విటమిన్ కూడా B కాంప్లెక్స్ ” కుటుంబానికి ” చెందిన విటమినే . దీనిని B9 విటమిన్ అనికూడా అంటారు.మన దేహం లో ఫోలిక్ యాసిడ్ ఏ ఏ పనులు చేస్తుందో తెలుసుకుందాం !
1. DNA నిర్మాణానికి: మన దేహం లో ప్రతి కణం లోనూ జన్యు పదార్ధం ఉంటుంది. దీనినే డీ ఎన్ ఏ అని అంటారు. ఈ జన్యు పదార్ధం ప్రతి కణం నిర్మించినప్పుడు అందులో నిక్షిప్తమై ఉంటుంది. ఈ జన్యు పదార్ధం నిర్మాణం లో అనేక మైన జీవ రసాయన చర్యలు జరిగుతున్నప్పుడు , వివిధ దశలలో ఫోలిక్ యాసిడ్ విటమిన్ అవసరం అనివార్య మవుతుంది.
2. DNA రిపేరు కు : అట్లాగే DNA కొంత పాత బడుతున్నప్పుడు , దానిని కొన్ని జీవ రసాయన చర్యల ద్వారా పునరుజ్జీవింప చేయడం కూడా ఫోలిక్ యాసిడ్ చేస్తుంది.
3. కణ విభజనకు : మన దేహం లో ప్రతి కణమూ కొత్త కణాలను ” కణ విభజన ” అనే చర్య ద్వారా ఉత్పత్తి చేస్తుంది. ఈ పని కి కూడా ఫోలిక్ యాసిడ్ అనివార్యం.
4. వివిధ కణాల పెరుగుదలకు:  కణాలు ఒక సారి ఏర్పడిన తరువాత వాటి పెరుగుదలకు కూడా ఫోలిక్ యాసిడ్ అవసరం తప్పనిసరి.

గర్భ వతులలో మరి ఈ ఫోలిక్ యాసిడ్ ఎందుకు ఎక్కువ గా అవసరం అవుతుంది?:
వీరిలో గమనించ వలసినది ఏమిటంటే , తమకే కాకుండా తమ గర్భం లో పెరుగుతున్న పిండానికీ , వివిధ దశలలో పిండం నుంచి మారిన శిశువు కు కూడా ఈ ఫోలిక్ యాసిడ్ అవసరం అనివార్యం. అందువల్ల వీరు మామూలు గా అవసరానికంటే ఎక్కువ గా ఫోలిక్ యాసిడ్ తీసుకోవాలి !
గర్భ వతులలో ఫోలిక్ యాసిడ్ తగినంత తీసుకోక పొతే ఆ లోపం ఏవిదం గా కనిపిస్తుంది ? :
ఫోలిక్ యాసిడ్ లోపం తీవ్రం గా ఉంటే వారికి సంతానం కలగడం కూడా ఆలస్యం అవుతుందని పరిశోధనల వల్ల తెలిసింది. దీనికి కారణం ఫోలిక్ యాసిడ్ లోపించి నప్పుడు స్త్రీలలో అండం సరిగా పెరగదు. ఇక గర్భం ధరించిన వారిలో రక్త హీనత కలుగుతుంది. ( మాక్రో సైటిక్ అనీమియా ) అంటే రక్తము పలచ పడుతుంది. అంటే చిక్క గా ఉండదు ! మరి ఈ చిక్క గా ఉండడం ఏమిటి , పలుచ గా ఉండడం ఏమిటి , చిక్కటి కాఫీ , నీళ్ళ కాఫీ లాగా ? అని మీరు సందేహ పడవచ్చు. నీళ్ళ కాఫీ తాగొచ్చేమో కానీ , మన రక్తం పలుచ బడితే అనారోగ్యం ఖాయం ! ఎందుకో చూడండి: రక్తం లో తగినన్ని ఎర్ర రక్త కణాలు ఉంటే నే రక్తం చిక్కగా ఉంటుంది. ఈ ఎర్ర రక్త కణాలు మన దేహం లో ప్రతి భాగానికీ , ఇంకా ఖచ్చితం గా చెప్పుకోవాలంటే ప్రతి కణానికీ ప్రాణ వాయువును సరఫరా చేస్తాయి, మన జీవితాంతం. మనలో, ముఖ్యం గా గర్భ వతులలో రక్తం ఏ కారణం చేతనైనా పలుచ బడినప్పుడు , వారికి తగినంత ప్రాణ వాయువు అందక , అలసట , బలహీనం , ఆయాసం , మొదలైన లక్షణాలు కలుగుతాయి. అంతే కాక వారి కాళ్ళు తిమ్మిరులు కలగడం , మొద్దు బారినట్టు అవడం కూడా అవుతుంటుంది. శిశువు పెరుగుదల సరిగా ఉండక పోవడం కూడా జరుగుతుంది.ఇక నెలలు నిండిన కొద్దీ , గర్భాశయం లో మావి ( ప్లాసేంటా అంటారు ) సరిగా అమరక పోవడం లేదా త్వరగా శిశువు నుంచి విడిపోవడం కూడా జరగ వచ్చు.
ముఖ్యం గా గర్భం లో పెరిగే పిండం లోనూ , పెరిగే శిశువు లోనూ ఫోలిక్ యాసిడ్ లోపం ఎట్లా కనిపిస్తుంది ?:
అవయవ లోపాలతో పుట్టడం , ముఖ్యం గా న్యూ రల్ ట్యూబ్ డిఫెక్త్స్ అంటే నాడీ వ్యవస్థ లో లోపాల తో పుట్టడం జరుగుతుంది.( Neural tube defects ( న్యూరల్  ట్యూబ్  డిఫెక్ట్ లు ) ( పైన ఉన్న చిత్రం చూడండి ):  గర్భం లో ఒక సారి  స్త్రీ నుంచి విడుదలైన అండం  పురుషుడి  వీర్యం లోని వీర్య కణం తో కలిసినపుడు  పిండం ఏర్పడుతుందని మనకందరికీ తెలుసు కదా ! పిండం  అభివృద్ధి చెందుతున్న తొలి  దశలలో  ( అంటే ముఖ్యం గా మొదటి మూడు నాలుగు నెలల గర్భం లో ) భవిష్యత్తులో  శిశువులో  రూపం దాల్చనున్న వివిధ అవయవాలు  పిండం మీద మొగ్గల లాగా ఏర్పడతాయి. అట్లా ఏర్పడేదే  న్యూరల్  ట్యూబ్  అంటే  నాడీ  గొట్టం అన  వచ్చు నేమో ! ఈ నాడీ  గొట్టమే  భవిష్యత్తులో  ఒక చివర  మన మెదడు గానూ ఇంకో చివర మన వెన్ను పూసా ( స్పైనల్ కార్డ్ )  ఇంకా మిగతా నాడులు  నిర్మాణం అవుతాయి.  మనం తెలుసుకున్నాం కదా , ఫోలిక్ యాసిడ్ ముఖ్యం గా కణాలు విభజన చెంది, కొత్త కణాలు ఏర్పడే దశ లో  అత్యవసరం అని !  అందు వల్ల  ఈ దశలో కనుక ఫోలిక్ యాసిడ్ లోపం ఉంటె ( అంటే గర్భం దాల్చిన తోలి దశలలో , అంటే మొదటి మూడు నాలుగు నెలల గర్భం లో ) నాడీ  మండల లోపాలు , ఇంకా మిగతా అవయవ లోపాలు కలుగుతాయి. ఇప్పుడు తెలుసుకున్నాం కదా ఫోలిక్ యాసిడ్ విటమిన్ ప్రాముఖ్యత !  ) 

గుండె కవాటాలలో అవక తవకలు కలగడం కూడా జరుగుతుంది.

వచ్చే టపాలో ఇంకొన్ని సంగతులు !

Vitamin B3 లేదా నియాసిన్ :

నియాసిన్ విటమిన్ కూడా B విటమిన్ లకు చెందిన విటమినే ! దీనిని B 3 విటమిన్ అని కూడా అంటారు.

నియాసిన్ లేకపోతే మనకు అనారోగ్యమా?:
నియాసిన్ కూడా మిగతా విటమిన్లలాగానే మన శరీరం లో లోపిస్తే , అనేక లక్షణాలు కనిపిస్తాయి. ఈ లక్షణాలు అన్నీ , నియాసిన్ విటమిన్ లోపం ఎక్కువ అవుతున్న కొద్దీ , మనలో కనిపించడం మొదలవుతుంది. గమనించ వలసినదేమిటంటే , ఏ విటమిన్ లోపించినా , ఆ లోప లక్షణాలు వెంటనే కనిపించవు మనకు. దీనికి కారణం ఏమిటంటే , మన దేహం లో లివర్ ( కాలేయం ) , కిడ్నీస్ ( మూత్ర పిండాలు ) వీటిలో మనం పూర్వం తిన్న ఆహారం లో ఎక్కువ గా ఉన్న విటమిన్లు నిలువ అవుతాయి. మన ఆహారం లో తరువాత ఈ విటమిన్లు లోపించినప్పుడు , లివర్ , కిడ్నీస్ లో ఉన్న విటమిన్లు మనకు ఉపయోగ పడతాయి. కానీ కొన్ని రోజుల తర్వువాత , ఈ నిలువ ఉన్న విటమిన్లు కూడా అయి పోయి , మనలో ఆ యా విటమిన్ల లోపం కనిపిస్తుంది , వివిధ ( వ్యాధి ) లక్షణాలు గా !
మరి మన శరీరం లో ఉన్నప్పుడు నియాసిన్ ఏ ఏ పనులు చేస్తుంది? :
NAD + NADH , NADP + NADPH అనే జీవ రసాయనాలు మన దేహం లో నిర్మాణం అవడానికి నియాసిన్ కావాలి. ఈ నిర్మాణాలు , మన శరీరం లో అనేక కణాలలో అను నిత్యం , అనేక జీవ రసాయన క్రియలను నిర్వర్తించుతూ ఉంటాయి. నియాసిన్ లోపం కనుక ఉంటే , ఈ అతి ముఖ్యమైన జీవ రసాయన క్రియలు కుంటు పడడమూ , లేదా ఆగిపోవడమూ జరిగి , మనలో వ్యాధి లక్షణాలు గా కనిపిస్తుంది.జన్యు పదార్ధం అంటే డీ ఎన్ ఏ లో అవసరమయిన రిపేరు అంటే జన్యు నిర్మాణం లో జరిగే అవక తవకలు సరిచేయడం లో కూడా ఈ నియాసిన్ ప్రముఖ పాత్ర వహిస్తుంది. హార్మోనుల తయారీ: నియాసిన్ మన దేహం లో మూత్రపిండాల మీద ఉండే ఎడ్రినల్ గ్రంధులలో మనకు అవసరమైన స్టీరాయిడ్ హార్మోనులను తయారు చేయడానికి , చాలా ముఖ్యం.

మరి ఈ నియాసిన్ లోప లక్షాలు ఏమిటి ?: మనలో నియాసిన్ లోపం ఎక్కువ గా ఉంటే పెల్లాగ్రా అనే వ్యాధి లక్షణాలు కనిపిస్తాయి.
పెలాగ్రా లో ముఖ్యం గా విరేచనాలు తరచుగా అవుతుండ డమూ , చర్మం పగుళ్ళు వచ్చి దురదలు పెట్టడమూ , చర్మం మొద్దు బారడమూ ,మంచి రంగులో మెరిసి పోయేట్టు ఉన్న చర్మం కాస్తా కాంతి విహీనమూ, ముదురు రంగులోకి మారడమూ , మతి మరుపు ఎక్కువ గా అయి డిమెంషియా అనే మతి మరుపు వ్యాధి రావడమూ , ఇంకా అశ్రద్ధ చేస్తే , మరణం కూడా సంభవించడం కూడా జరుగుతుంది.
నియాసిన్ ఏ ఆహార పదార్ధాలలో ఎక్కువ గా ఉంటుంది?:  ( పైన ఉన్న చిత్రం చూడండి  )
శాక హారులు నియాసిన్ పుష్కలం గా ఉన్న బ్రాకోలీ ( కాలీ ఫ్లవర్ లా గానే ఉంటుంది కానీ ఆకుపచ్చ రంగులో ఉంటుంది ) , కారట్ , ఆకు పచ్చని ఆకు కూరలు , చిలగడ దుంపలు , ఆస్పరాగస్ , టమాటాలు , ఖర్జూరాలు , పప్పు ధాన్యాలు , పుట్ట గొడుగులు తినవచ్చు.
మాంసాహారులు: చికెన్ , చేపలు , మొదలైన మాంస పదార్ధాలలో నియాసిన్ పొందవచ్చు . కోడి గ్రుడ్డు కూడా నియాసిన్ ఉన్న ఆహార పదార్దమే ! మిగతా విటమిన్లలాగానే నియాసిన్ కూడా మనకు చాలా స్వల్ప పరిమాణం లో నే రోజూ అవసరం ఉంటుంది ! అంటే 14 నుంచి 16 మిల్లీ గ్రాములు మాత్రమె మనకు రోజూ అవసరం ! నియాసిన్ ఎక్కువ గా తింటే కూడా ఆరోగ్యానికి మంచిది కాదు ! అంటే ” అతి విటమిన్ అనారోగ్య లక్షణం ” !

వచ్చే టపాలో ఇంకో విటమిన్ గురించి !