Our Health

Archive for the ‘మన ఆరోగ్యం.’ Category

9.రక్షిత కారు చోదకం ( సేఫ్ కార్ డ్రైవింగ్ ). స్టీ రింగూ , మనూవరింగూ !

In ప్ర.జ.లు., మన ఆరోగ్యం., Our Health on ఆగస్ట్ 20, 2013 at 9:26 ఉద.

9.రక్షిత కారు చోదకం ( సేఫ్ కార్ డ్రైవింగ్ ). స్టీ రింగూ , మనూవరింగూ ! 

( పార్టీ లో మితిమీరి తాగి ,  డ్రైవింగ్ కూడా చేస్తే ,జరిగే పర్యవసానాలకు , ప్రత్యామ్నాయ ఏర్పాట్లు ఎట్లా ఉంటాయో తెలిపే కార్టూన్ !  కాక పొతే అవన్నీ అమెరికా లో ! భారత దేశం లో మొదటి రెండిటినీ ( కనీసం ప్రమాదం జరిగిన కొన్ని గంటల వరకూ ! ) మినహాయించు కోవచ్చు కదా !  ) 

స్టీ రింగూ , మనూవరింగూ ! 
స్టీరింగ్ : కారు స్టీరింగ్ అంటే చిన్న పిల్లల దగ్గర నుంచి , పెద్దవారి వరకూ అందరికీ భలే సరదా కదా ! అనేక గుండ్రని చక్రాలను , కారు స్టీరింగ్ గా ఊహించుకుంటూ , ఎన్ని ఆటలు ఆడు కోలేదు మనమంతా , బాల్యం లో ! ఒక వాహనం లో ప్రయాణం చేస్తున్నట్టు ఊహించుకుని స్టీరింగ్ చేస్తూ ఉంటే , ఎక్కడకూ వెళ్ళక పోయినా కూడా అదొక విచిత్రమైన అనుభూతి ! ప్రస్తుతం అనేక కంప్యూటర్ సాఫ్ట్ వేర్ లు అందుబాటు లో కూడా ఉన్నాయి కదా డ్రైవింగ్ మీద ( స్టీరింగ్ వీల్ ను కూడా అమ్ముతున్నారు )
మరి అసలు స్టీరింగ్ విషయానికొస్తే , సమర్ధ వంతం గా స్టీరింగ్ చేయడం ఒక కళ ! నేర్పు ! అందుకే ప్రతి పార్టీ కీ ఒక స్టీరింగ్ కమిటీ ఏడిసింది కదా ! ప్రజలను అనేక రకాలు గా మభ్యపెడుతున్నా కూడా సమర్దవంతం గా ఆ కార్యం నిర్వహించడానికి ! కానీ నిజజీవితం లో కారు స్టీరింగ్ సరిగా చేయకుండా , మభ్య పెట్టడం అంత తేలిక కాదు, పైగా ప్రమాదం కూడా ! స్టీరింగ్ ను పట్టుకోవడం కూడా శాస్త్రీయం గా చేయాలి ! అంటే సామాన్యం గా ఎడమ చేతిని పది సంఖ్య ఉన్న స్థానం లోనూ , కుడి చేతిని రెండు లేదా మూడు అంకె ఉన్న స్థానం లోనూ ఉంచి అవసరమైనంత పట్టు తో పట్టుకోవాలి స్టీరింగ్ ను ! ఈ పదీ , పదకొండూ , రెండూ , మూడూ ఎక్కడ నుంచి వచ్చాయను కుంటున్నారు కదూ ! స్టీరింగు చక్రాన్ని కనుక ఒక గోడ గడియారం లా ఊహించు కుంటే ! స్టీరింగ్ మీద అతి గా మన బరువు అంతా వేయకూడదు ! అట్లా చేసినా , లేదా అతి తేలిక గా పట్టు వదిలినా కూడా , కారు కంట్రోలు తప్పి పోయే ప్రమాదం ఉంది ! ఒక మోస్తరు గా తాగిన మైకం లో కూడా ( మైకం అనిపించక పోయినా కూడా ) స్టీరింగ్ లో సమతూకం తప్పి పోయి ప్రమాదాలకు కారణం అయే రిస్కు ఉంటుంది ! ( ఎందుకంటే ఆల్కహాలు తో ‘తడిసి ‘ ఉండే మెదడు , మిగతా సమయం లో లాగా ఆలోచించ లేదు కనుక ! ). 
మనూవరింగ్ : ఈ మనూవరింగ్ కారు నడపడం లో ఒక ముఖ్యమైన నేర్పు ! మనూవరింగ్ అంటే , స్టీరింగు నూ , యాక్సిలరేటర్ నూ , ఇండికేటర్ నూ , ( అవసరమయితే బ్రేక్ నూ ) హేతు బద్ధం గా ఉపయోగించి కారును ముందు కో లేదా ప్రక్కకో నడపడం ! ఒక సారి కారు కదిలి రోడ్డు మీద ‘ పడ్డప్పుడు ‘ ఏ రకమైన మనూవరింగ్ చేయాలన్నా కూడా కొన్ని నిబంధనలను తప్పని సరిగా పాటించాలి ! నిబంధనలు అంటే రూల్స్ ఎవడికి పట్టింది ? అని అశ్రద్ధ చేయడం , ఎట్టి పరిస్థితులలోనూ సమర్ధనీయం కాదు ! అప్రమత్తత కోల్పోయి , ఆశ్రద్ధతో కారు నడపడం , ప్రమాదాలను కొని తెచ్చుకోవడమే కదా ! 
మరి మనూవరింగ్ ఎట్లా చేయాలి ? 
దీనికి ప్రతి కారు డ్రైవరూ గుర్తు ఉంచుకోవలసిన ఆంగ్ల అక్షరాలు కొన్ని ఉన్నాయి ! అవి : O  S M P S L. ( ఓ ఎస్సెమ్ పీ ఎస్సెల్ , ఓ ఎస్సెమ్ , పీ ఎస్సెల్ అని చాలా సార్లు పునశ్చరణం చేయడం కూడా మంచిదే ! ) 
O అంటే అబ్సర్వే షన్ 
S అంటే , సిగ్నల్ ఇవ్వడం ,
M అంటే మనూవరింగ్ 
ఈ మనూవరింగ్ ను మూడు దశలు గా చేయాలి 
P అంటే మన కారును సరి అయిన పొజిషన్ లోకి తెచ్చుకోవాలి !
S ఈ రెండో ఎస్ అంటే కారు వేగాన్ని అంచనా వేసి , అవసరమవుతే , ఆ వేగాన్ని అడ్జస్ట్ చేసుకోవాలి !
L  అంటే , మనం నడుపుతున్న కారు చుట్టూ పరిశీలించి చూడడం , ప్రమాదం ఏదీ లేదని నిర్ధారించుకోవడం ! అంటే , ఇతర రోడ్డు వాడే వారూ , పాద చారులూ వారి భద్రతా , మన భద్రతా కూడా ! 
మనం కొనుక్కునే కార్లలో సెన్సర్ లు అమర్చ బడి ఉన్నా కూడా మన ‘ మనో సెన్సర్  ‘ ను ఎప్పుడూ అప్రమత్తం గా ఉంచి సురక్షితం గా కారు స్టీరింగ్ చేయడం అలవాటు చేసుకోవాలి ! 
గుర్తు ఉంచుకోవలసినది : మనం మనూవర్ చేస్తున్నప్పుడు ఎప్పుడూ , బ్రేక్ ను కానీ , యాక్సిలరేటర్ ను కానీ, స్టీరింగ్ వీల్ ను కానీ , సడెన్ గా అప్లై చేయకూడదు , ప్రత్యేకించి మనూవర్ చేసే సమయం లో ! దానివల్ల  మనం చేయవలసిన మనూవర్ సరి గా అవ్వక పోవడమే కాకుండా , ఇతర వాహన చోదకుల కు అవరోధం అవ వచ్చు !
ప్రతి కారు డ్రైవరూ తప్పని సరిగా నేర్చుకోవలసిన మనూవర్ లు అయిదు ఉన్నాయి :
1. కారు వెళుతున్నప్పుడు ఎడమ వైపు రోడ్డు మీదకు తిప్పడం. 
2. కారు వెళుతున్నప్పుడు కుడి వైపు రోడ్డు మీదకు తిప్పడం. 
3. U టర్న్ కు కారును తిప్పడం 
4. రోడ్డు మీద కారు నడిపుతున్నప్పుడు తిప్ప వలసిన అవసరం ఏర్పడితే , తిప్పడం 
5. రివర్స్ పార్కింగ్ చేయ గలగడం.  
ఈ పై పరిస్థితులు అన్నీ కూడా సమర్ధ వంతం గా , ఆత్మ విశ్వాసం తో మనూవర్ చేయ గలగాలి , కారు నడిపే ప్రతి వారూ ! చాలా మంది , ప్రత్యేకించి , భారత దేశం లో , కారున్న వారు ఏదో ఒక లా మ్యానేజ్ చేయ గలిగితే పరవా లేదనుకుంటారు ! కానీ ఇట్లా ప్రతి చోటా అనుకోవడం , మ్యానేజ్ చేయ గలగడం జరగదు ! అప్పుడే ప్రమాద రిస్కు ఎక్కువ అవుతుంది ! అందు వల్లనే ,అంత ప్రాముఖ్యం లేనివి గా అనిపించినా కూడా , పైన తెలిపిన మనూవర్స్  నేర్చుకుని ఉండడం సర్వదా క్షేమదాయకం ! 
వచ్చే టపాలో ఇంకొన్ని సంగతులు ! 

9. రక్షిత కారు చోదకం ( సేఫ్ కార్ డ్రైవింగ్ ).

In ప్ర.జ.లు., మన ఆరోగ్యం., Our Health, Our minds on ఆగస్ట్ 18, 2013 at 10:59 సా.

9. రక్షిత కారు చోదకం ( సేఫ్ కార్ డ్రైవింగ్ ).

కారు వేగం పెంచడం ఎట్లా ?:
కారు వేగం పెంచడం ఎట్లాగో యాక్సిలరేటర్ మీద కాలు పెట్ట గలిగే ప్రతి వారూ చెప్పగలరు ! అందుకే , ప్రతి కుర్రకారూ , తమకు తామే ఎంతో సమర్ధవంతమైనా , ప్రతిభావంతమైన డ్రైవర్ లు అని అనుకుంటూ ఉంటారు ! అది చాలా పొర పాటు ! ఎందుకంటే, కారు వెళుతూ ఉన్నపుడు ,కేవలం కొంత బరువుతో ఉన్న బ్యాగ్ ను యాక్సిలరేటర్  మీద పడేసినా కూడా కారు పోగలదు ! కానీ సమర్ధవంతమైన డ్రైవింగ్ అంటే వీలైనంత క్రిందకు , కాలితో యాక్సిలరేటర్ ను నొక్కి వేగం పెంచడం కాదు !  కారు వేగం పెంచడం అనేక మీటలను సమర్ధ వంతం గా నియంత్రించడం ! మొదటి గేర్ లో ఉన్న కారు వేగాన్ని ఒక స్పీడుకు కనుక స్మూత్ గా యాక్సిలరేట్  చేశాక , రెండవ గేర్ లోకి స్మూత్ గా మార్చాలి , రెండవ గేర్ లో ఒక నియమితమైన స్పీడ్ కు కారు వేగం చేరుకున్నపుడు , యాక్సిలరేటర్ ను క్రిందకు క్రమేణా నొక్కి రెండవ గేర్ లో అత్యధిక వేగానికి కారు చేరుకునే లా చేయాలి , అదే విధం గా మూడవ గేర్ కు మార్చి , మళ్ళీ యాక్సిలరేటర్ ను క్రమేణా నొక్కి ఉంచుతూ , మూడవ గేర్ లో కూడా అత్యధిక వేగానికి కారు చేరుకునేట్టు చూడాలి ! నాలగవ , అయిదవ గేర్ కు కూడా అదే పధ్ధతి ని అనుసరించాలి ! 
రెండవ గేర్ లోనే అత్యధికం గా యాక్సిలరేట్ చేస్తే పోయేదేంటి ?:
ప్రతి గేర్ కూ ఒక నియమిత వేగం ఉంటుంది ! ఆ నియమిత వేగానికే ఇంజన్ ట్యూన్ అవుతుంది , ఆ గేర్ లో ! తక్కువ గేర్ లో ఎక్కువ వేగం గా కారు వెళ్లాలని , ఎక్కువ గా అదిమి పట్టి , యాక్సిలరేట్ చేయడం , ఒక గుర్రం కనుక అత్యధిక వేగం తో పరిగెత్తుతూ ఉంటే , దానిని ఇంకా తోలు పటకాతో ( ఆంగ్లం లో విప్ అంటారు కదా ) చావ బాదుతూ ఉండడం తో పోల్చ వచ్చు ! ఇట్లా చేయడం వల్ల , ఇంజన్ మీద అత్యధిక వత్తిడి పడి , త్వరగా పాడయే రిస్కు ఎక్కువ అవుతుంది ! ఎంత ఎక్కువగానూ , తీవ్రం గానూ యాక్సిలరేటర్ పెడల్ ను నొక్కి పట్టి ఉంచితే , అంత ఎక్కువ ఇంధనం ఖర్చు కూడా అవుతుంది !  
గేరు మార్చడం ఎట్లా ? : ప్రతి కారుకూ కనీసం అయిదు నుంచి ఆరు గేర్లు అమర్చ బడి ఉంటాయి. ప్రతి గేరు లోనూ యాక్సిలరేటర్ పెడల్ ను అనుసంధానం చేసి నొక్కుతూ ఉండాలి ! తక్కువ గేర్ లో ఎక్కువ గానూ , ఎక్కువ అంటే నాలుగో లేక ఐదో గేర్ లో తక్కువ గానూ  యాక్సిలరేట్ చేయడం ఇంజన్ ఆరోగ్యాన్ని పాడు చేస్తుంది ! 
ఇంకో ముఖ్య విషయం : ఐదో లేక ఆరో గేర్ లో కారు వేగం గా పోతూ , సడన్ గా వేగం తగ్గించ వలసిన అవసరం వస్తే , వెంటనే గేరు మార్చి తక్కువ గేరు లోకి కారును తే కూడదు ! ఇట్లా చేస్తే ఇంజన్ త్వరగా పాడవుతుంది. మొదట గా చేయవలసినది , బ్రేక్ మీద కాలు ఉంచి క్రమేణా కారు వేగాన్ని తగ్గించి , అప్పుడు , కారు గేర్ ను కూడా మార్చాలి ! కొన్ని సమయాలలో , రెండవ గేర్ నుంచి నాలుగవ గేర్ లోకి స్మూత్ గా కారు వేగాన్ని మార్చవచ్చు , దానితో సమానం గా యాక్సిలరేట్ చేస్తూ ఉంటే ! 
కారు ఎత్తు కు వెళుతున్నప్పుడు గేర్ లు ఎట్లా మార్చాలి ? 
ఇక్కడ కూడా భౌతిక శాస్త్రం ఉపయోగ పడుతుంది మనకు !  మనం మెట్లు ఎక్కుతున్నప్పుడు ఎట్లాగైతే ఎక్కువ శ్రమ పడతామో , కారు ఇంజన్ కూడా అంతే ! అందువల్ల కారు ఇంజన్ శ్రమ తగ్గించడానికి , కారును రెండవ లేదా మూడవ గేర్ లో నడపడం ఉపయోగ కరం ! తక్కువ గేర్ లలో ఇంజన్ ఎక్కువ శక్తి తో పనిచేస్తుంది కనుక ! 
మరి కారు దిగువ కు వస్తున్నపుడు కూడా తక్కువ గేర్ లో ఎందుకు ప్రయాణించాలి ? : 
ఎందుకంటే , గ్రావిటీ వల్ల కారు వేగం పెరుగుతుంది సహజం గానే ! అప్పుడు కనుక నాలుగు , అయిదు , లేదా ఆరో గేర్ వేసి కారు ను నడుపుతూ ఉంటే , సహజమైన వేగం తో పాటుగా , కారు ఇంజన్ వేగం కలిసి , చాలా ఎక్కువ వేగం తో కారు క్రిందకు పోతూ ఉంటుంది ! ఆ సమయం లో కారు ను కంట్రోలు చేయడం కష్టం ! అప్పుడు సహజం గానే ప్రమాదాల రిస్కు ఎక్కువ అవుతుంది . అందువల్ల తక్కువ గేర్లే , ఉపయోగించాలి దిగువ కు వచ్చే సమయం లో కూడా ! ఎత్తు లో అంటే ఎగువ ( అప్ హిల్ ) లో కారు పార్క్ చేయ వలసిన అవసరం ఏర్పడినప్పుడు ఒక సురక్షిత మైన పధ్ధతి , కారును మొదటి గేర్ లో మార్చి ( హ్యాండ్ బ్రేక్ తో సహా ) పార్క్ చేయడం. ఇట్లా చేస్తే , ఒక వేళ , హ్యాండ్ బ్రేక్ పనిచేయక పోయినా కూడా , కారు మొదటి గేర్ లో ఉండడం వల్ల క్రిందకు జారదు ! 
వచ్చే టపాలో ఇంకొన్ని సంగతులు ! 

8.రక్షిత కారు చోదకం ( సేఫ్ కార్ డ్రైవింగ్ ).కారు ఆపడమూ , పార్క్ చేయడమూ ఎట్లా ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 17, 2013 at 11:43 ఉద.

8.రక్షిత కారు చోదకం ( సేఫ్ కార్ డ్రైవింగ్ ).కారు ఆపడమూ , పార్క్ చేయడమూ ఎట్లా ? :

ఒక వేగం లో కారును నడుపుతూ , ఆపవలసిన సమయం లో ఆపడం కూడా ఒక నేర్పే ! చాలా మంది యువకులు కొత్త కారు చాలా వేగం గా నడుపుతూ , సడన్ గా రోడ్ల మీద బ్రేక్ చేస్తూ ఉండడం సాధారణమే !  ఇట్లా ఒక్క సారిగా కారును సడన్ గా ఆపడం, కారు ఆరోగ్యానికి మంచిది కాదు ! కారు టైర్లు త్వరగా అరిగి పోతాయి , ఇంధనం కూడా ఎక్కువ ఖర్చు అవుతుంది. గమనించ వలసినది , ఎక్కువ వేగం గా కారు నడుపుతూ ఉంటే , ఆ కారును ఆపడానికి కూడా ఎక్కువ సమయం పడుతుంది.  రోడ్డు మీద తేమ ఉంటే , లేదా , రోడ్డు ఐసీ గా ఉంటే కూడా కారు ఆపడం ఆలస్యం అవుతుంది. రోడ్డు తేమ గా ఉన్నా , ఐసీ గా ఉన్నా కూడా కారు టైర్లకు పట్టు దొరకదు అంటే కారు టైర్లు గ్రిప్ కోల్పోతాయి ! అందువలననే , సాధారణ వేగం కన్నా తక్కువ వేగం తో ప్రయాణం చేయాలి , బాగా వాన కురుస్తున్నపుడు !కారును  ఆపే దూరం రెండు రకాలు గా ఉంటుంది. ఒకటి : మనం కారు ను ఆపుదామని మనసులో ఎప్పడు ఆలోచిస్తామో అది. అంటే , థింకింగ్ డిస్టెన్స్ ! రెండవది బ్రేకింగ్ డిస్టెన్స్ ! అంటే , ప్రాక్టికల్ గా బ్రేక్ ను ఎప్పుడు అప్లై చేస్తామో ఆ దూరం ! ఈ క్రింద సూచించిన ఆట లో మీరు మీ కారును ఆపే దూరాన్ని అంచనా వేసుకోవచ్చు , వివిధ వాతావరణ సమయాలలో ! చాలా ఉపయోగ కరం గా ఉంటుంది, మీ సురక్షిత డ్రైవింగ్ కు ! ప్రయత్నించండి ! 
బ్రేక్ వేయాలి అని యాంటి సిపేట్ చేస్తూ, జాగ్రత్త గా బ్రేక్ వేయడం అలవాటు చేసుకుంటే , కారు కుదుపులు లేకుండా ఆగడమే కాకుండా , కారు టైర్లు కూడా ఎక్కువ కాలం మన్నుతాయి ! టైర్ల తో పాటు బ్రేక్ ప్యాడ్స్ కూడా , ఎన్ని ఎక్కువ సార్లు బ్రేక్ వేస్తే , అంత త్వరగా బ్రేక్ ప్యాడ్స్ పాడవుతాయి ! అట్లా గని అసలు బ్రేక్ వేయకుండా ఎప్పుడూ నడిపించలేము కదా , కారును ,కానీ బ్రేక్ వేసే ప్రతి సారీ అతి జాగ్రత్తగా నిదానం గా వేస్తూ ఉంటే , బ్రేక్ ప్యాడ్ లు తరచూ మార్చ నవసరం ఉండదు ! ఈ బ్రేక్ ప్యాడ్స్ మార్పించాలంటే , చాలా ఖర్చు తో కూడిన పని !  నాసి రకం కంపెనీ వి వేయిస్తే , అవి త్వరగా పాడవ డమే కాకుండా, ప్రమాదాలకు కూడా కారణం అవుతాయి !  ఆ కారు కంపెనీ స్పేర్స్ లోనే కీలకమైన స్పేర్స్ మార్పించడం ఉత్తమం !
యాంటి సిపేట్ చేయడం అంటే , ట్రాఫిక్ లైట్ లు అంబర్ కలర్ లోకి మారడం చూడగానే , లేదా పాదచారులు రోడ్డు క్రాస్ చేస్తూ ఉండడం గమనించినా , కూడా బ్రేక్ అవసరం ఉంటుందని ఊహించడం ! ( చాలా సమయాలలో, భారత దేశం లో అనేక రోడ్ల కూడలు లలో జీబ్రా క్రాసు మీద పాద చారులు దాటుతూ ఉన్నా కూడా ఏమాత్రం పట్టింపు లేకుండా , కారు ఆపకుండా నడుపుతూ ఉంటారు ! పాదచారులకూ , సైకిల్ నడిపే వారికీ , అత్యంత ప్రాధాన్యత ఇవ్వాలి , కారు నడిపే వారు ! చాలా సమయాలలో పాదచారులదీ , సైకిలిస్ట్ లదీ తప్పు ఉన్నా కూడా !, ఎందుకంటే , పంతాలకు , పట్టింపు లకూ పొతే , ప్రమాదాలలో ఎక్కువ గా గాయ పడేది వారే కదా , కారులో కూర్చున్న వారు కాదు కదా !
పార్క్ చేయడము : 
పార్క్ చేసే ముందు , ఆ ప్రాంతం సురక్షితమో కాదో గమనించాలి ! : వెనుక నుంచీ , ప్రక్క నుంచీ వేగం గా వాహనాలు వెళుతూ ఉంటే , సరి అయిన ఇండికేటర్ ఉపయోగించి , వారికి తెలియచేయాలి , మీరు పార్క్ చేయబోతూ ఉన్నట్టు ! రివర్స్ పార్కింగ్ చేసే సమయాలలో కూడా మీరు పార్క్ చేస్తున్న ప్రదేశం సురక్షితం గా ఉందో లేదో నిర్ధారించు కోవాలి ముందే ! అవసరం అవుతే , కారు దిగి చూడడానికీ వెనుకాడ కూడదు !  ఇట్లా గమనించకుండా రివర్స్ పార్కింగ్ చేసిన ఫలితం గా , అనేక ప్రమాదాలు సంభవించి , చిన్న పిల్లలూ , పెంపుడు జంతువులూ మరణిస్తూ ఉంటారు ! పార్క్ చేశాక , అన్ని లైట్లూ ఆపి ఉన్నాయో లేదో నిర్ధారించుకోవాలి ! కారులో కొద్ది సమయం కోసమైనా , చిన్న పిల్లలను వదిలి వెళ్ళ కూడదు ! అమెరికా , ఇంగ్లండు లాంటి దేశాలలోనే , ఎండా కాలం లో ఇట్లా కారు లో వదిలి వేయబడ్డ పిల్లలూ ,కుక్కలూ , కారు వేడెక్కి , మరణించిన సందర్భాలు అనేకం ! 
వచ్చే టపాలో ఇంకొన్ని సంగతులు ! 

7. రక్షిత కారు చోదకం ( సేఫ్ కార్ డ్రైవింగ్ ).MSM

In ప్ర.జ.లు., మన ఆరోగ్యం., Our Health on ఆగస్ట్ 16, 2013 at 9:35 ఉద.

7. రక్షిత కారు చోదకం ( సేఫ్ కార్ డ్రైవింగ్ ).

 కారు ను స్టార్ట్ చేయడం :

కారు స్టార్ట్ చేయ బోయే ముందు , వార్నింగ్ లైట్లూ , ఇండికేటర్ లూ ఏమేం తెలియ చేస్తాయో ఆ అవగాహన కలిగి ఉండడం ముఖ్యం. కారు స్టార్ట్ చేయగానే కానీ , లేదా కారు సగం దూరం ప్రయాణం చేసినపుడు కానీ ఆ వార్నింగ్ సైన్స్ కనుక కనిపిస్తే , తగిన జాగ్రత్తలు తీసుకోవడానికి ! ఆ పరిస్థితులలో మాన్యువల్ తీసి చూడడం కన్నా , ముందే ఆ సంగతులు తెలుసుకుని ఉండడం ఉత్తమం !
స్మూత్ గా రోడ్డెక్కడం :  కారును ఒకసారి స్టార్ట్ చేసి  రోడ్డు ఎక్కించే ముందు , కారు చుట్టూ పరిసరాలను గమనించాలి : ఒక కిటుకు M S M  అంటే ఎమ్మెస్సెమ్  ఈ మూడు అక్షరాలనూ కారు ను నడిపే ముందు ఎప్పుడూ గుర్తు ఉంచుకోవాలి. వీటిలో మొదటి M అంటే మిర్రర్ , అంటే కారు పక్కన ఉన్న అద్దం , దీనిలోనుంచి కారు వెనుక గా నూ ,పక్కగానూ , వచ్చే వాహనాలూ , మనుషులూ  కనబడతారు కదా ! తరువాతి అక్షరం S అంటే సిగ్నల్ ఇవ్వడం. ఈ సిగ్నల్ ఇవ్వడం ఇతర దేశాలలో చేతి తో ఎప్పుడూ చేయడం కూడదు ! కేవలం కారు కు అమర్చి ఉన్న ఇండికేటర్ లైట్ లతోనే తెలపాలి ! కుడివైపు కనుక కారును తిప్పి నడుపుతే , కుడి లైట్ ను వేయాలి !
ఇటీవల బొంబాయి లో కారు డ్రైవింగ్ నేర్పేవారి ప్రోగ్రాం ఒకటి వచ్చింది బీ బీ సీ  లో ! అందులో కుడి వైపు కు లేదా ఎడమ వైపు కూ కారు తిప్పే ముందు , కేవలం డ్రైవర్ కుడి చేతి తోనే ఇండికేట్ చేయాలని , అదే కరెక్ట్ పధ్ధతి అని చెప్పడం చూశాను ! హైదరాబాదు లోనూ , ఇతర పట్టణాలలోనూ ఇదే పధ్ధతి ఉందేమో నాకు తెలియదు ! ఏమైనప్పటికీ , ఇండికేటర్ లైట్లు ఉపయోగించడం , మంచి అలవాటు ! ఇక మూడోఅక్షరం M అంటే , మెనూవర్ అంటే కారును కదిలించడం. ఈ M S M  ను కారు నడిపే అన్ని వేళల లోనూ గుర్తు ఉంచుకోవడం రక్షిత కారు చోదకానికి , అంటే సేఫ్ కార్ డ్రైవింగ్ కు ఎంతగానో సహకరిస్తుంది ! కారు స్టార్ట్ చేసే ముందు ముఖ్యం గా కారు ఏ గేరు లో ఉందో ఖచ్చితం గా తెలుసుకోవాలి ! ఆపి ఉన్న కారు ను ఎప్పుడూ న్యూట్రల్ గేర్ లో ఉంచి, హాండ్ బ్రేక్ వేసి ఉంచాలి. మర్చి పోయి కానీ మరి ఏ ఇతర కారణాల వల్ల కానీ , కారు ఒకటో గేర్ లో ( పార్క్ చేసి ఉన్నపుడే కనుక ) ఉంటే , కారును స్టార్ట్ చేసే ముందే గమనించాలి , తప్పని సరిగా !( గేర్ నాబ్ ను కదిలించి , గేర్ న్యూట్రల్ లో ఉందో లేదా , మొదటి గేర్ లో ఉందో తెలుసుకోవచ్చు ) ఇట్లా కారు స్టార్ట్ చేసే ముందే తెలుసుకోక కారు ను స్టార్ట్ చేస్తే , అంటే ఇగ్నిషన్ లో కీ పెట్టి స్టార్ట్ చేయగానే , కారు ఒక్క ఉదుపున ముందుకు వెళుతుంది , మొదటి గేర్ లో ఉంటే కనుక ! స్థలా భావ రీత్యా , కారు ను ఒక చిన్న ప్రదేశం లో పార్క్ చేసి ఉంచినప్పుడు , కారు ఒక్క ఉదుపున ముందుకు వెళ్లి , ముందు గా ఉన్న గోడకు క్రాష్ అయ్యే ప్రమాదం ఉంది ! 
డ్రై స్టీరింగ్ అంటే ఏమిటి ? : కారు ఇంజన్ స్టార్ట్ అవక ముందే కారు స్టీరింగ్ ను తిప్పి , కారు దిశను మార్చే ప్రయత్నాలు చేయడాన్ని డ్రై స్టీరింగ్ అంటారు. ఇట్లా చేయడం మంచిది కాదు. కారు చక్రాలు , అంటే టైర్లు త్వరగా అరిగి పోతాయి , రాపిడి కి !
( ఈ టపా రాస్తున్న సమయం లోనే తెలుగు దేశం ఉపాధ్యక్షుడు ఒక కారు ప్రమాదం లో మరణించినట్టు వార్త !  కారణాలు  డ్రైవర్ మాటలలోనే 1. కారు నూట నలభై మైళ్ళ వేగం తో పోతుందని ! ( మోటార్ వే మీద కూడా అత్యధిక వేగం కేవలం డెబ్బై మైళ్లే ! ఇంగ్లండు లో ! ) 2. ప్రమాద సమయం లో వాన వస్తుందని 3. మరణించిన వ్యక్తి అంత వరకూ , సీట్ బెల్ట్ పెట్టుకుని , తీసి వేయడం జరిగిందని ! డ్రైవర్ , తాను సీట్ బెల్ట్ పెట్టుకోమని అబ్యర్ధించి నా కూడా , ఆయన పెట్టుకోలేదని , తాను బ్రతికింది కేవలం సీట్ బెల్ట్ పెట్టుకోవడం వల్ల నేననీ తెలిపాడు !  ) మితి మీరిన వేగం లో కారును కంట్రోలు చేయడం చాలా కష్టం ! దానికి వాన తోడవుతే , రోడ్డు సర్రున జారుతుంది ! మరి ఈ పరిస్థితులలో సీట్ బెల్ట్ ధరించక పోవడం !??
వచ్చే టపాలో ఇంకొన్ని సంగతులు ! 
 

6. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

In ప్ర.జ.లు., మన ఆరోగ్యం., Our Health, Our minds on ఆగస్ట్ 15, 2013 at 2:05 సా.

6. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

మిగతా జాగ్రత్తలు : 
విండ్ స్క్రీన్ ఇంకా విండోస్ : విండ్ స్క్రీన్ ఎప్పుడూ , మసక బారకుండా , స్పష్టం గా ఉండాలి ! దానిమీద ఏ రకమైన స్టికర్ లూ అంటించ కుండా జాగ్రత్త వహించాలి ! అంటించిన స్టికర్ లు చూపును కొన్ని కోణాలకే పరిమితం చేసి , అత్యవసర సమయాల లో రోడ్డు మీద వాహనాలను గమనించ కుండా చేసి , ప్రమాదాల రిస్కు ఎక్కువ చేస్తాయి !విండ్ స్క్రీన్ మీద తరచూ చిన్న చిన్న రాళ్ళు పడి , విండ్ స్క్రీన్ మీద చిన్న చిన్న పగుళ్ళ కు కారణమవుతాయి ! ఈ పగుళ్ళు కూడా చూపు కు అంతరాయం కలిగిస్తాయి ! పెద్ద పగుళ్ళను వెంటనే సీల్ చేయడం కానీ , లేదా విండ్ స్క్రీన్ మార్చడం కానీ చేయాలి !విండోస్ కూడా సరిగా పని చేస్తున్నాయో లేదో చెక్ చేసుకోవాలి. 
ఎలెక్ట్రి కల్ పరికరాలు చెక్ చేయడం : 
కారు లో వివిధ లైట్లూ , విండ్ స్క్రీన్ వాషర్ లూ , హారన్ లూ , ఇట్లాంటి అనేకం విద్యుత్తు బ్యాటరీ ద్వారానే పని చేస్తాయి కదా ! వాటిని పరీక్ష చేసుకోవడం కూడా ఉత్తమం ! ప్రత్యేకించి దూర ప్రయాణాలు చేస్తూ ఉంటే ! అట్లాగే కారు బ్రేక్ నూ , స్టీరింగ్ వీల్ నూ కూడా పరీక్ష చేసుకోవాలి బయలు దేరే ముందే ! 
చాలా మంది ఇంధన టాంకు ను ఒక మాదిరి గానే నింపి , ప్రయాణాలకు ఏర్పాటు చేసుకుంటూ ఉంటారు ! కానీ వెళ్ళే చోటు వెదకడం కానీ , లేదా ట్రాఫిక్ ఎక్కువ గా ఉండి  తరచూ గేర్లు మార్చి కారును నడపడం వల్ల కానీ ఎక్కువ ఇంధనం ఖర్చు అయి రోడ్డు మీద ఇంధనం లేక పోవడం వల్ల , కారు ఆగి పోవచ్చు ! అందువల్ల ఎప్పుడూ అనుకున్న దానికంటే ఎక్కువ ఇంధనం టాంకు లో నింపు కోవడం మంచి అలవాటు ! 
పాసెంజెర్ ల జాగ్రత్త : 
కారు నడిపే డ్రైవర్ దే , కారు లో కూర్చున్న మిగతా వారందరి బాధ్యతా కూడా ! ఈ మిగతా పాసెంజర్ లు చిన్న పిల్లలు కావచ్చు , ముదుసలులు కావచ్చు , లేదా గర్భిణీ స్త్రీలో , అనారోగ్యం తో ఉన్న వారో కూడా కావచ్చు ! అట్లాంటి వారందరి జాగ్రత్త కూడా , ప్రయాణం ముందే ఏర్పాటు చేసుకోవాలి , కారు నడిపే వారే ! ప్రత్యేకించి సీట్ బెల్ట్ లు పెట్టుకున్నారో లేదో గమనించడం , వారి బరువు కు తగ్గట్టుగా కారు టైర్ల లో గాలి నింపడం జరిగిందో లేదో అని చూసుకోవడమూ , ఇంకా వారికి కావలసిన ఆహార పానీయాల విషయాలు కూడా ముందే ఏర్పాటు చేసుకోవాలి ! వాతావరణం బాగో లేక పోయినా , లేదా విపరీతమైన ట్రాఫిక్ రద్దీ ఏర్పడిన సమయాలలో ,కారు ను వదిలి , రెస్టారెంట్ లో తినడం , తాగడం సంభవం కాదు కదా ! 
వచ్చే టపాలో ఇంకొన్ని సంగతులు ! 

5. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

In ప్ర.జ.లు., మన ఆరోగ్యం., Our Health on ఆగస్ట్ 14, 2013 at 8:12 సా.

 5. రక్షిత కారు చోదకం ( సేఫ్ కార్ డ్రైవింగ్ ). ప్రాధమిక మెయింటె నెన్స్ ఏమిటి ?:

 
కారు ప్రయాణం మొదలు పెట్టే ముందు ,  ఒకసారి ఈ క్రింది విషయాలు గమనించడం మంచిది. కేవలం కారు తక్కువ ఖర్చుతో , ఎక్కువ దూరం నడప గలగడమే కాకుండా , సురక్షితం గా కూడా నడప గలం , ఈ ముందు జాగ్రత్తలు తీసుకుంటే !
1. ఇంజన్ ఆయిల్ చెక్ చేసుకోవడం : ఇంజన్ ఆయిల్ ప్రతి ఇంజన్ కూ అతి ముఖ్యం. ఇంజన్ ఆయిల్ ఇంజన్ ను సరిగా లూబ్రికేట్ చేస్తుంది. మనం సాధారణం గా చూస్తూ ఉంటాము, ఏదైనా నట్టు బోల్టు లో తిరగడం ఎంత కష్టమవుతుందో , ఆ బోల్టు కూ , ఆ నట్టు కూ  మధ్య  సరిఅయిన లూబ్రికేటింగ్ గ్రీజ్ లేక పొతే ! అదే రకం గా ఇంజన్ ఆయిల్ లేని ఇంజన్ లో ఎక్కువ ఘర్షణ ఏర్పడి , ఇంజన్ త్వరగా పాడవడమే కాకుండా , డబ్బు కూడా ఎక్కువ ఖర్చు చేయడం జరుగుతుంది , ఇంధనం మీద ! అంటే , సరిగా ఇంజన్ ఆయిల్ లేని ఇంజన్ తక్కువ మైలేజ్ కూడా ఇస్తుంది ! ముఖ్యం గా గమనించ వలసినది , ఇంజన్ ఆయిల్ ఆ కారు ఇంజన్ ను బట్టి ఒక్కో రకమైనది ఉంటుంది ! కారు స్వంత దారే , ఈ ప్రత్యేకమైన ఇంజన్ ఆయిల్ ఏమిటో తెలుసుకొని , ఎప్పుడూ గుర్తు ఉంచుకోవాలి ! ఎందుకంటే , ఒక దాని బదులు ఇంకో ఇంజన్ ఆయిల్ కనుక వాడితే , ఇంజన్ చెడి  పోయే రిస్కు ఉంటుంది ! గ్యారేజీ వాడి మీద పూర్తి భారం వేసినా , సరి  అయిన ఇంజన్ ఆయిల్ పోస్తాడనే నమ్మకం లేదు , కారు ఓనర్ కే తెలియ  నపుడు ! 
2. ఇంజన్ కూలెంట్ చెక్ చేయడం : ఇంజన్ ఎంత ఎక్కువ సమయం నడిస్తే , అంత వేడెక్కుతూ ఉంటుంది కదా ! మరి ఇంజన్ నుచల్ల బరిచే కూలెంట్ కూడా రెగ్యులర్ గా పోస్తూ  ఉండాలి ! ఆ ప్రత్యేక రసాయన మిశ్రమము, ఇంజన్ ఎక్కువ గా వేడెక్క కుండా చేస్తుంది ! మ్యాన్యువల్ ను చదివి ఇంజన్ కూలెంట్ ను ఎక్కడ పోయాలో తెలుసు కోవడం కూడా మంచిదే ! 
3. టైరు వత్తిడి : కారు నాలుగు టైర్లూ ‘ మంచి ఆరోగ్యం ‘ తో ఉండేట్టు చూసుకోవాలి ! ఈ విషయం సైకిల్ టైరు ఉదాహరణ తో బాగా అర్ధం చేసుకోవచ్చు ! సైకిల్ కు ఉన్న టైరు లో వత్తిడి తగ్గితే , మనం ఎక్కువ శ్రమ పడి తొక్కడం మన అనుభవం లోనిదే కదా ! అట్లాగే సైకిల్ టైరు , పాత బడితే కానీ , లేదా ఒకటి రెండు పంచర్లు అవుతే కానీ ,పంచర్ అయిన చోట , ఒక ప్యాచ్ వేసి, టైరు లో మళ్ళీ గాలి నింపి , సైకిల్ నడిపేట్టు చేస్తాడు , రోడ్డు ప్రక్కన రిపేర్ చేసే వాడు ! అంత వరకూ బాగానే ఉంది ! కానీ పంచర్ ప్యాచ్ ఒక బుడిపె లాగా ఉబ్బి ఉండడం గమనించారా !మరి ఇప్పుడు , కారు టైరు ను కనుక సైకిల్ టైరు తో పోల్చుకుంటే , కారు టైరు లో పీడనం అంటే ప్రెషర్ తగ్గితే , ఎక్కువ పెట్రోలు తాగుతుంది ఆ కారు ! అంతే కాకుండా టైరు అతి త్వరగా  అరిగి పోతుంది ! అట్లా అరిగి, అరిగి , పంచర్ అవుతుంది ! సైకిల్ నడిపినపుడు పంచర్ అవుతే ప్రమాద తీవ్రత తక్కువ గా ఉంటుంది ,ఎందుకంటే , సైకిల్ ను ఒక మాదిరి వేగం తోనే నడుపుతాము కనుక ! అదే కారవుతే , యాభై, అరవై మైళ్ళ వేగం తో నడుపుతున్నపుడు పంచర్ అవుతే !? అప్పుడు జరిగే ప్రమాదం తీవ్రత  ఊహించు కోండి ! అందువల్ల కారు టైరు ఆరోగ్యం కేవలం టైరు లో వత్తిడి చెక్ చేసుకోవడమే కాకుండా , ఆ టైరు ఎంత అరిగి పోయిందో కూడా తరచూ గమనిస్తూ ఉండాలి ! కారు టైరు ఎంత అరిగి పోయి ఉంటే , రోడ్డు మీద ఆ కారు పట్టు ( అంటే గ్రిప్ ) అంత తక్కువ గా ఉంటుంది ! ప్రత్యేకించి , రోడ్డు నానినపుడు , కనుక బ్రేక్ చేస్తే , కారు ఆగక పోగా , ఇతర వాహనాలకు కానీ , లేదా ,గోడలకూ , చెట్ల కూ గుద్దుకుని , ప్రమాదం జరిగే రిస్కు ఎక్కువ అవుతుంది !
ఒక ముఖ్య విషయం : కారు టైరు ఎంత అరిగి పోయిందో , ఆ కారు ప్రయాణించిన దూరం తో నే అంచనా వేయకూడదు ! ఎందుకంటే తరచుగా బ్రేకు లు వేయడం వల్ల రోడ్డు మీద  రాపిడి ఎక్కువ అయి, టైర్లు అరిగి పోవడానికి ఎక్కువ అవకాశం ఉంది ! 
వచ్చే టపాలో ఇంకొన్ని సంగతులు ! 

4. సేఫ్ కార్ డ్రైవింగ్ లో, న్యూటన్ మొదటి సూత్రం మనకెందుకు ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 13, 2013 at 11:08 ఉద.

4. సేఫ్ కార్ డ్రైవింగ్ లో, న్యూటన్ మొదటి సూత్రం మనకెందుకు ? 

 
సేఫ్ కార్ డ్రైవింగ్ అంతా కీలకమైన భౌతిక సూత్రాల మీదా , నడిపే వారి నిపుణత మీదా ఆధార పడి ఉంది అనడం లో అతిశయోక్తి లేదు ! మనమంతా చిన్న తనం లోనే చదివి ఉన్నాం కదా న్యూటన్ గురుత్వాకర్షణ శక్తి ని , చెట్టు మీద ఉన్న యాపిల్ పండు పడినప్పుడు పైకి ఎందుకు పోవట్లేదు , క్రిందే ఎందుకు పడుతుంది ? అని ఆలోచించి , కనుక్కున్నాడని ! అంతే కాక యాంత్రిక శాస్త్రం లో  ముఖ్యమైన మూల సూత్రాలను కూడా ఆవిష్కరించాడు న్యూటన్  ! అందులో మొదటి సూత్రం , ‘ ప్రతి వస్తువూ నిశ్చల స్థితి లో కానీ , ఒక స్థిరమైన వేగం తో ప్రయాణిస్తున్నప్పుడు కానీ , ఏ బాహ్య శక్తీ దాని గతి మార్చనంత వరకూ అదే స్థితిలో ఉంటుంది ” అని. మరి వాహనాలు నడిపే సమయం లో ,ఈ న్యూటన్ మొదటి సూత్రం ప్రాముఖ్యత ఏమిటి ? అని మనం ప్రశ్నించుకుంటే అసలు విషయం బోధ పడుతుంది ! ఉదాహరణ కు మనం కారులో గంటకు ముప్పై మైళ్ళ వేగం తో ప్రయాణిస్తున్నాం అంటే దాని అర్ధం కారు తో పాటు గా మన వేగం కూడా గంటకు ముప్పై మైళ్ళ నే గా ! మనం కారులో స్థిరం గా కూర్చున్నప్పటికీ ! ఎందుకంటే , మనం కారు వేగం తో కూడా ప్రయాణిస్తున్నాం కనక ! అంటే కారు ఒక వేగం లో పోతూ ఉన్నప్పుడు , మన వేగం కూడా కారు వేగం తో  సమానం గా ఉంటుంది. 
మరి ఈ వేగాలకూ , మన సేఫ్ టీ కీ సంబంధం ఏమిటి ? : వేగం గా వెళ్ళే కారు ను అకస్మాత్తు గా, ఏ కారణం చేతనైనా ఆపడం జరిగినా , లేదా ఎదుటి వాహనం ఏదైనా , ప్రయాణిస్తున్న కారు ను గుద్దినా , కూడా కారు అకస్మాత్తు గా ఆగుతుంది కదా ! అంటే కారు వేగం ఒక్క సారిగా మారిపోయి , ఆ కారు ఆగుతుంది ! కానీ కారు వేగం తో ప్రయాణం చేస్తున్న , కారులో ఉన్న వారి వేగం మారదు ! అంటే , కారును బ్రేకు వేసి ఆపడం జరిగినా , లేదా ఎదుటి కారు వచ్చి ఆ కారును గుద్ది అకస్మాత్తు గా ఆపినా కూడా, కారు మాత్రమే ఆగుతుంది కానీ, కారు లో అంతే వేగం తో ప్రయాణం చేస్తున్న వారి వేగం  మారదు ! అందు వల్ల నే , బారత దేశం లో మోటారు వాహన ప్రమాదాలు చాలా వాటి లో ఇట్లా అకస్మాత్తు గా కారు ఆగినప్పుడు ( ప్రమాదాలలో సర్వ సామాన్యం గా జరిగేది అదే కదా ! ) ఆ కారులో ప్రయాణం చేస్తున్న వారు కూడా అంతే వేగం తో వారు కూర్చున్న స్థానం నుంచి విసిరి వెయ బడతారు ! అప్పుడు ఎదురుగా ఉన్న విండ్ స్క్రీన్ గుండా బయటకు విసిరి వేయ బడతారు ! లేదా కారు లో వెనక సీట్లో కనక ప్రయాణం చేస్తూ ఉంటే , కారు లో కానీ , లేదా పక్క విండో నుంచి కానీ టాస్ చేయ బడతారు !  దానితో ప్రమాదం తీవ్రత ఎక్కువ గా ఉంటుంది ! 
మరి ఇతర దేశాలలో ఈ ప్రమాద తీవ్రత ఎందుకు తక్కువ గా ఉంటుంది ? 
ఇతర దేశాలలో ,ముఖ్యం గా యూ రప్ దేశాలన్నిటిలో కూడా , కారు లో ప్రయాణించే ప్రతి వారూ తప్పనిసరిగా సీట్ బెల్ట్ ధరించాలి ! పైన ఉదహరించిన ప్రమాదాలలో , సీట్ బెల్ట్ ప్రాముఖ్యత అంతా ఇంతా కాదు ! ఎందుకంటే , అతి వేగం గా పోతూ ఉన్న  కారు ఏ  కారణం చేతనైనా , అకస్మాత్తు గా ఆగినపుడు , కారు వేగం తో ప్రయాణం చేస్తున్న ప్రయాణికులను , అంతే వేగం తో కారు నుంచి విసిరి వేయ బడకుండా నివారించే బ్రేకు ల లా పనిచేసి, వారికి ప్రమాద తీవ్రత ను నివారించ డమూ , లేదా చాలా వరకూ తగ్గించడమూ చేస్తాయి , సీట్ బెల్ట్ లు ! అనేక ప్రమాదాల పరిశీలన చేసి , ఈ విషయం నిర్ధారింప బడింది. మరి భారత దేశం లో, కార్ల ను విపరీతమైన వ్యామోహం తో కొనుక్కుంటున్నారు జనాలు ! కానీ  కారు మీద ఉండే వ్యామోహం , వారి రక్షణ మీద ఉండట్లేదు !  యురోపియన్ వాసులదైనా , భారతీయులదైనా , ప్రాణం విలువ ఒకటే కదా ! మరి భారత దేశం లో ఇటు వాహన వాడక దార్లు కానీ , అటు ప్రభుత్వం వారు కానీ ఈ శాస్త్రీయ మైన యదార్ధాన్ని పట్టించుకోవట్లేదు ఎందుకు ? 
వచ్చే టపాలో ఇంకొన్ని సంగతులు !  

3. సేఫ్ కార్ డ్రైవింగ్. ప్రత్యామ్నాయ ఇంధన కార్లు !

In ప్ర.జ.లు., మన ఆరోగ్యం., Our Health on ఆగస్ట్ 12, 2013 at 2:57 సా.

3. సేఫ్ కార్ డ్రైవింగ్. ప్రత్యామ్నాయ ఇంధన కార్లు ! 

పైన ఉన్న చిత్రం , పూర్తి గా విద్యుత్ శక్తి ( బ్యాటరీ చార్జింగ్ తో ) తో నడిచే చిన్న కారు , నిస్సాన్ లీఫ్ !

పెట్రోలు , డీజెల్ ధరలు పెరిగిపోతూ , సామాన్యుల జీతాలన్నీ , కారులో ఇంధనానికే పోతున్నాయి కదా ! అందుచేత ప్రపంచం  లో లో చాలా దేశాలలో , ప్రత్యామ్నాయ ఇంధనాలతో నడిపే కార్ల మీద పరిశోధనలు చేయడం , చేస్తూ ఉండడం జరుగుతుంది ! 
ఏ కారణం చేతనైనా పెట్రోలూ , డీజెల్ తో నడిచే కార్లు ఇష్టం లేని వారు , వారి ఆర్ధిక పరిస్థితి బట్టి ( కొంత కాలం ఆగి అయినా సరే ) ఈ ప్రత్యామ్నాయ కార్లను కొనుక్కోవచ్చు ! 
ఈ కోవ కు చెందిన కార్లు ముఖ్యం గా విద్యుత్ శక్తి తో నడుస్తాయి ! ఇప్పటికే మార్కెట్ లో కొంత బ్యాటరీ తోనూ , కొంత పెట్రోల్ తోనూ నడిచే హైబ్రిడ్ కార్లు అందుబాటు లో ఉన్నాయి కదా !  కానీ కొన్ని కార్లు పూర్తి గా విద్యుత్ శక్తి తో నడిచేవి కూడా మార్కెట్ లో ( ప్రత్యేకించి యూ రోపియన్ మార్కెట్ లలో ) ప్రవేశ పెట్టడం జరిగింది ! 
క్లుప్తం గా ఈ ప్రత్యామ్నాయ ఇంధన కార్ల గురించి తెలుసుకుందాం ! 
1. హైబ్రిడ్ కార్లు : ఈ కార్లు , రెండు రకాల ఇంధనాలనూ ఉపయోగించుకుంటాయి, అంటే బ్యాటరీ విద్యుత్తూ , పెట్రోలూ , లేదా డీజెల్  కలిపి వాడడం వలన కొన్ని కార్లలో ఇంధనం పొదుపు అవుతుంది ! 
2. ప్లగిన్ హైబ్రిడ్ కార్లు : ఈ కార్లలో బ్యాటరీని తరచూ చార్జ్ చేసుకోవడమే కాకుండా , దాని ఖర్చు తో పాటుగా పెట్రోలు కూడా పోయిస్తూ ఉండాలి ! ఇది అననుకూలం గా ఉండడం తో పాటుగా , ఖర్చు తో కూడిన పని ! ముందు ముందు చౌక అవుతాయేమో !
3. ఇథనాల్ కార్లు : ఈ రకమైన కార్లలో ఇథనాల్ పది నుంచి పదిహేను శాతం పెట్రోలు తో కలిపి ఉన్న ఇంధనాన్ని వాడతారు. అమెరికా లో ఇప్పటికే 80 లక్షల వాహనాలు ఈ ఇథనాల్ కలిసిన ఇంధనాన్ని ఉపయోగిస్తున్నాయి కానీ , మైలేజ్ ఎక్కువ ఇవ్వక పోవడమే కాకుండా , అన్ని పెట్రోల్ స్టేషన్ లలోనూ ఈ ఇంధనం లభ్యం అవక పోవడం ఇంకో లోపం ! 
4. కంప్రెస్డ్ నాచురల్ గ్యాస్ కార్లు : ఈ ఇంధనం కూడా , స్థానికం గా పుష్కలం గా లభ్యం అయే దేశాలలో  పొదుపు గా ఉంటుంది , వాడే వారికి !
5. డీజెల్ /బయో డీజెల్ కార్లు : వీటిలో , డీజెల్ తో పాటుగా , బయో డీజెల్ ను కలుపుతారు. ఇంజన్ చాలా శబ్దం చేస్తూ ఉంటుంది ! 
6. హైడ్రో జెన్ ఇంధన కార్లు : ఈ ఇంధనం కారులో వాడితే విష వాయువు లు ఏమీ రావు కేవలం నీటి ఆవిరి తప్పితే , కానీ ఈ ఇంధనం తయారు చేసే సమయం లో బొగ్గు పులుసు వాయువు ( అంటే కార్బన్ డయాక్సైడ్ వాయువు ) ఎక్కువ గా విడుదల అవుతుంది. అంతే కాకుండా ఈ హైడ్రోజెన్ ఇంధనం , రవాణా లోనూ , నిలువ చేయడం లోనూ సమస్యలు ఎదురవుతున్నాయి ప్రస్తుతం ! వాటిని పరిష్కారం చేసే పని లో ఉన్నారు శాస్త్రజ్ఞులు ! 
7. బ్యాటరీ ఎలెక్ట్రిక్ కార్లు : ఈ కార్లు , చాలా తక్కువ ఖర్చు తోనే ఎక్కువ దూరం ప్రయాణం చేయకలవు పెట్రోలు , డీజెల్  తో పోలుస్తే , కానీబ్యాటరీ చార్జ్ చేసుకోవడం చాలా సమయం పడుతుంది , వాటిని కూడా పరిష్కరించే దిశలో ముందంజ వేస్తున్నారు శాస్త్రజ్ఞులు ! 
8. పూర్తి గా బయో డీజెల్ కార్లు : మొక్క జొన్న నుంచీ , లేదా ఇంట్లో వంటకు వాడి పారబోసే నూనె లాంటి నూనెలు వాడి నడిపే కార్లు ! వీటిమీద కూడా పరిశోధనలు వేగం గా జరుగుతున్నాయి ! 
పైన ఉన్న వీడియో, హయుండాయ్ వారి పూర్తి హైడ్రో జెన్ బ్యాటరీ శక్తి తో నడిచే కారు ! i 35 !
వచ్చే టపాలో ఇంకొన్ని సంగతులు ! 
 

2. సేఫ్ కార్ డ్రైవింగ్. కారు కొనే ముందు ఆలోచించ వలసిన విషయాలు ….

In ప్ర.జ.లు., మన ఆరోగ్యం., Our Health, Our minds on ఆగస్ట్ 10, 2013 at 10:42 సా.

2. సేఫ్ కార్  డ్రైవింగ్. కారు కొనే ముందు ఆలోచించ వలసిన విషయాలు  …. 

రోజూ ప్రయాణం లో భాగం గా ,   A నుంచి B కి వెళ్ళే ముందు కొన్ని  నిమిషాలు ఈ క్రింది విషయాలు ఆలోచించాలి !
1. వెళ్ళే చోటు  చాలా దూరమా , లేక నడక , సైకిల్  మీద వెళ్ళ వచ్చా ? అనే విషయం. ఎందుకంటే , తక్కువ దూరాలకు , తరచూ కారులో ప్రయాణిస్తే , కారు ఎక్కువ మైలేజీ ఇవ్వక పోవడమే కాకుండా , ఇంజన్ కూడా త్వరగా పాతదవుతుంది ! తరచూ గేర్ లు మార్చుతూ యాక్సిలరేట్ చేస్తూ ఉండడం వల్ల ,  పొల్యూ షన్ , అంటే వాతావరణ కాలుష్యం కూడా ఎక్కువ అవుతుంది ! మనం ఉండే ఏరియా లో ఎక్కువ మంది కి ఈ అవగాహన ఉంటే , ఆ ఏరియా పొల్యూ షన్ తగ్గడానికి అవకాశం ఉంటుంది. గమనించ వలసినది , ఒక్క రోజు తో మన శరీరం కాలుష్యం చెంది అనారోగ్యం పాలవడం జరగదు. వాతావరణ కాలుష్యం , అనేక నెలలూ , సంవత్సరాల తరబడి జరుగుతూ   ఉంటే , దాని పరిణామాలు ,ఆరోగ్యం  మీద  పడతాయి !
 ఇతర ప్రత్యామ్నాయ ప్రయాణ ఏర్పాట్లు చేసుకోవచ్చా ? బస్సు లోకానీ , రైలు లో కానీ వెళ్ళ వచ్చా ? లేదా కారు లోనే వెళ్ళాలను కుంటే , కారును ఇంకొకరితో షేర్ చేసుకోవచ్చా ? ( విదేశాలలో , ఆర్ధిక మాంద్యం దృష్ట్యా , కారు స్వంత దారులు, నలుగురు,  ఒకే చోటినుంచి బయలు దేరుతూ ఉంటే , వారు వంతుల వారీ గా రోజు కొకరు డ్రైవ్ చేస్తారు , వారి కారులో మిగతా వారు కూర్చుంటారు ! ఇట్లా చేయడం స్నేహాన్ని పెంచడమే కాకుండా , అందరికీ డబ్బు కూడా ఆదా అవుతుంది ! ) 
2. వాతావరణం లో కేవలం విష వాయువుల తోనే కాకుండా , శబ్ద కాలుష్యం కూడా మానవులను చీకాకు పరుస్తుంది. ఈ శభ్ద కాలుష్యం ప్రత్యేకించి , భారత దేశం లో ఎక్కువ గా ఉంటుంది. విదేశాలలో , ఒక వెయ్యి కార్లు రోడ్డు మీద ఉంటే , ఒకటో రెండో కార్లు మాత్రమే హార్న్ మోగించడం వినబడుతుంది ! భారత దేశం లో రోడ్డు  ఇక పోల్చ నవసరం లేదనుకుంటా ! 
3. కారు కొందామనే నిర్ణయం తీసుకునే ముందు ,
a. కొత్త కారు కొనడమా , లేక సెకండ్ హాండ్ కారు పరవాలేదా ? అనే విషయం. ఉదాహరణకు , పాశ్చాత్య దేశాలలో ఒక లక్ష మైళ్ళు చేసిన కారు ఏదైనా , ఒక పది వేల రూపాయలకే కొనవచ్చు ! అంటే , కొత్త కారు విలువ సంవత్సరానికి కనీసం ఇరవై శాతం పడి పోతుంది ! సరిగా సర్విసింగ్ చేయించి ఒక్కరే నడిపిన కారు కూడా తక్కువ ధరకే కొన వచ్చు ! కానీ నాలుగు చేతులు మారిన కారు , ఎక్కువ రిపేర్ లతో , ఒక తెల్ల ఏనుగు అవవచ్చు , అత్యాశకు పోయి తక్కువ ధరలో కొంటే ! 
b . ఏ రకమైన ఇంధనం తో నడిచే కారు కొనాలని ? ఎందుకంటే,  డీజల్ తో నడిచే కార్లు ఎక్కువ మైలేజీ ఇస్తాయి , కానీ మీరు ఎక్కువ దూరం ప్రయాణం చేయవలసి వస్తేనే ! 
c. పాశ్చాత్య దేశాలలో నడుపుతున్న కారు , ప్రయాణం లో ఎక్కడైనా ఏ కారణం చేత నైనా చెడిపోతే , తగిన రిపేర్ లు చేయడానికి బీమా కంపెనీలు కుక్క గొడుగుల్లా ఉంటాయి. అట్లాంటి కంపెనీ లలో ఒకదానిలో బీమా తీసుకోవడం ఉత్తమం !
d . క్రమం గా కారు సర్విసింగ్ చేయించడానికి కూడా , కొంత డబ్బు చెల్లిస్తూ ఉండాలి. ప్రత్యేకించి, పాత బడుతున్న కార్లకు ఈ జాగ్రత్త ముఖ్యం. ( కొత్త కార్లకు సామాన్యం గా కనీసం అయిదేళ్ళ వరకూ వారంటీ ఉంటుంది ! ఆ వారంటీ ఉన్న కార్లను కొనుక్కోవడం ఇంకో ఆలోచన ! ) 
e . విదేశాలలో ప్రతి కారుకూ , పాత బడుతూ ఉంటే M O T పరీక్ష ఉంటుంది ( మినిస్ట్రీ ఆఫ్ ట్రాన్స్ పోర్ట్ ) పరీక్ష అని అంటారు. ఈ పరీక్ష ప్రతి కారు కూ  ప్రతి సంవత్సరమూ చేయించాలి  కంపల్సరీ గా ఎందుకంటే , ఈ పరీక్ష కారు ఆరోగ్యాన్ని తెలపడమే కాకుండా , అవసరమైన రిపేర్ లు చేయించ డానికి కూడా సూచనలు ఇస్తుంది !  ఈ పరీక్ష పాసవడం , ప్రతి కారు కూ కంపల్సరీ ! దానితో , కారు నడిపే వారే కాకుండా , రోడ్డు ను వాడే ఇతరులు కూడా సురక్షితం గా ఉంటారు ! 
f . పార్కింగ్ కు క్రమం గా చెల్లించ వలసిన డబ్బు ఎంత ఉంటుంది ? 
ఈ విషయాలన్నీ ఆలోచించుకుని , ఒక నిర్ణయం తీసుకోవాలి ! ముఖ్యం గా కారు కొనమనే ఆకర్షణీయమైన ప్రకటనలు చూసి మోస పోకూడదు ! ఎందుకంటే ప్రతి ప్రకటనలోనూ , కారు కేవలం ఆరు లేదా ఎనిమిది సెకండ్ల కాలం లో సున్నా నుంచి అరవై మైళ్ళ వేగం చేరుకోగలరనే చెబుతూ ఉంటారు ! కానీ బాధ్యతా రహితం గా కారు నడిపితే , కైలాసానికి కూడా అంతే వేగం గా చేరుకోగలమనే వాస్తవాన్ని మాత్రం చెప్పరు ! అంతే కాకుండా , తెప్పలు తెప్పలు గా కార్లను రోడ్ల మీద ప్రవేశ పెట్టడానికి , అనేక మైన ఆకర్షణీయమైన ప్రకటనలూ ,పధకాలూ పెడతారు కానీ , కారు నడిపే రోడ్ల గురించి ఆలోచించరు , కారు కంపెనీలు కానీ , ప్రభుత్వం వారు కానీ ! వారి ఉద్దేశం లో కారు కొనుక్కుంటే , గాలి లో ప్రయాణం చేయాలనేమో ! 
మీరు నివసిస్తున్న చోటినుంచి మీరు చేరుకోవలసిన గమ్యం లో రోడ్ల పరిస్థితి ఎట్లా ఉంది?  ఆ పరిస్థితి బాగు పడే అవకాశం కనీసం వచ్చే పదేళ్ళ లోనైనా ఉందా ? అనే విషయాలు ఆలోచించి , కారు కొనుక్కోవాలి ! ఇంకో ముఖ్య మైన విషయం ! కారు ఒక గ్యాలను కు నలభై మైళ్ళు ప్రయాణించ వచ్చనీ , లేదా యాభై మైళ్ళు ప్రయాణం చేయ వచ్చనీ,  అనేక ప్రలోభాలు పెడుతూ ఉంటారు ! కానీ అవన్నీ స్టాండర్డ్ , అంటే ప్రామాణికమైన పరిస్థితులలోనే , ప్రాక్టికల్ గా అతి రద్దీ గా , అతి అధ్వాన్నం గా ఉండే రోడ్ల మీద కాదు !  అధ్వాన్నం గా ఉన్న రోడ్ల మీద , అతి రద్దీ గా ఉన్న ట్రాఫిక్ లో కారు నడిపితే , చాలా తరచు గా గేర్లు మార్చడం చేత , వాడు చెప్పిన నలభై మైళ్ళూ , కారు నడుపుతే, ఒక గ్యాలన్ కు బదులు రెండు గ్యాలన్ ల ఇంధనం తప్పని సరిగా అయి , ఖర్చు కాస్తా తడిసి మోపెడవుతుంది ! ఇక ప్రత్యామ్నాయ ఇంధనాలకోసం ప్రయత్నాలు చేసి,  ఎల్ పీ జీ గ్యాస్ తో కారు నడిపే,  అతి తెలివి ప్రదర్శిస్తూ ఉంటారు కొందరు !  అట్లా చేయడం ,కారు నాణ్యతను దెబ్బ తీయడమే కాకుండా , పర్యావరణ కాలుష్యం తో పాటుగా ,ప్రమాదాల తీవ్రత ఎక్కువ కావడానికి కూడా అవకాశం చేజేతులా కలిగించుకోవడమే !
వచ్చే టపాలో ఇంకొన్ని సంగతులు ! 
 
 

1. రక్షిత కారు చోదకం ( సేఫ్ గా కారు నడపడం) ఎట్లా ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 10, 2013 at 10:50 ఉద.

1. రక్షిత కారు చోదకం ( సేఫ్ గా కారు నడపడం)  ఎట్లా ? 

కారు సేఫ్ గా నడపడానికి  ప్ర ప్రధమం గా కావలసినది ,( right attitude ) రైట్ యాటి ట్యూ డ్, అంటే సరి అయిన ప్రవృత్తి . మోటు గా , ఓపిక కోల్పోయి , బాధ్యతా రహితం గా కారు నడిపితే , నడిపే వారే కాక , ఆ కారులో ప్రయాణిస్తున్న వారితో పాటుగా , రోడ్డును ఉపయోగిస్తున్న ఇతర ప్రయాణికుల భద్రతా , పాద చారుల భద్రతా కూడా  అపాయం లో పడుతుంది. ఈ రైట్ యాటి ట్యూ డ్,   అనేక శారీరిక , మానసిక పరిస్థితుల మీద ఆధార పడి  ఉంటుంది. ముఖ్యం గా, సరిపడినంత నిద్ర లేకపోవడమూ , విపరీతం గా అలసి పోయి ఉండడమూ , లేదా మద్యం , ఇతర మాదక ద్రవ్యాలు తీసుకుని ఉండడమూ , లేదా తీవ్రమైన మనస్తాపం చెందుతూ ఉండడమూ , అంటే తీవ్రమైన మానసిక వత్తిడి తో ఉండడమూ – లేదా ఆహారం కానీ పానీయాలు కానీ చాలా సమయం వరకూ తీసుకోకుండా , డ్రైవ్ చేయడమూ – ఈ కారణాలన్నీ కూడా రైట్ యాటి ట్యూ డ్ ను తీవ్రం గా ప్రభావితం చేస్తాయి. ఈ పరిస్థితులలో , ఓపిక నశించి డ్రైవింగ్ పొరపాట్లు చేసే రిస్కు ఎక్కువ అవుతుంది ! 
నిద్ర లేక పోవడం , అప్రమత్తత ను తక్కువ చేస్తుంది, అట్లాగే మద్యం సేవించడం వల్ల కాన్ఫిడెన్స్ ఎక్కువ అవుతుంది కానీ ఆ కాన్ఫిడెన్స్ కేవలం ఫాల్స్ కాన్ఫిడెన్స్ మాత్రమే ! అంటే   ( తాగి ) డ్రైవింగ్ చేస్తున్న వారు , తాము వంద మైళ్ళ వేగం తో డ్రైవింగ్ చేస్తున్నా కూడా చాలా సురక్షితం గా డ్రైవ్ చేస్తున్నామనే ఆత్మ విశ్వాసం తో ఉంటారు, యాక్సిడెంట్ అయ్యే కొద్ది క్షణాల ముందు వరకూ కూడా ! అందుకని మద్యం తాగి కారు నడపడం నిషిద్ధం ! వారు టాక్సీ లో బార్ కు కానీ పబ్ కు కానీ వెళ్లి , ఇంటికి కూడా టాక్సీ లో వెళ్ళడమే ఉత్తమం , ఎందుకంటే , కనీసం , రోడ్డు మీద ఉన్న ఇతర ప్రయాణికులు సురక్షితం గా ఉంటారు , అట్లా చేస్తే ! ( ఈ సలహా తో , మద్యం తాగడాన్ని ప్రోత్స హిస్తున్నట్టు కాదు ! ) 
ఈ క్రింద ఉన్న లింక్ మీద క్లిక్ చేస్తే , భారత దేశం లో 2010 లో రోడ్డు ప్రమాదాల వివరాలు గమనించ వచ్చు ! అందులో కనీసం నలభై శాతం రోడ్డు ప్రమాదాలు మద్యం తాగి వాహనాలు నడపడం వల్ల సంభవించినవే ! 
 
 
వచ్చే టపాలో ఇంకొన్ని సంగతులు !