Our Health

Archive for the ‘మన ఆరోగ్యం.’ Category

చుంబన రహస్యాలు !

In ప్ర.జ.లు., మన ఆరోగ్యం., మానసికం, Our Health, Our minds on సెప్టెంబర్ 8, 2013 at 10:52 ఉద.

చుంబన రహస్యాలు ! 

 
చుంబనం ! 
ప్రేయసీ ప్రియుల వందనం !
ప్రణయ  జీవితాల్లో  అది  చందనం ! 
రసమయ జీవన పారిజాతం ! 
అధర  సంధి లో పొంగి , పారే ‘వల’పాతం !
 
మానవులకు ప్రకృతి ప్రసాదించిన ఒక అమూల్యమైన వరం, చుంబనం !  స్త్రీ పురుష సంబంధాలకు అతి ముఖ్యమైన వారధి ! ప్రేమ మయ జీవితాలకు పునాది !  మరి మానవులంతా ఈ విషయం తెలిసినా , చుంబనాన్ని సద్వినియోగం చేసుకోలేక పోతున్నారు !  అట్లాగని , సత్సంబంధాల కోసం, కనపడిన వారినల్లా ముద్దు పెట్టుకోమని కాదు ! ఒక పురుషుడు , ఒకే స్త్రీ తో కూడా బంధాల విషయం లో కూడా , ఈ చుంబనం అనే  ‘ ప్రేమ పరికరాన్ని ‘ సవ్యం గా వినియోగించుకోలేక పోతున్నారు , కారణాలు అనేకమైనప్పటికీ !  ఈ విషయం మీద అనేకమైన పరిశోధనలూ , పరిశీలనలూ , జరిగాయి , జరుగుతున్నాయి కూడా !  మరి శతాబ్దాలుగా అంతు చిక్కని రహస్యం గా ఉండి పోయిన ఈ చుంబన రహస్యాలను , వచ్చే టపా నుంచి తెలుసుకోడానికి ప్రయత్నిద్దాం ! 
 
  
 

18. సేఫ్ కార్ డ్రైవింగ్. ప్రమాదం లో కర్తవ్యం ఏమిటి ?

In ప్ర.జ.లు., మన ఆరోగ్యం., మానసికం, Our Health, Our minds on సెప్టెంబర్ 6, 2013 at 10:53 సా.

18. సేఫ్ కార్ డ్రైవింగ్. ప్రమాదం లో కర్తవ్యం ఏమిటి ? 

విదేశాలలో, రోడ్డు ప్రమాదాలకు ఎప్పుడూ ఇతర వాహనాలే కారణం అవననవసరం లేదనడానికి ఓ నిదర్శనం, పై చిత్రం ! 
మనం సామాన్యం గా కారు నడుపుతున్నప్పుడు , అన్ని జాగ్రత్తలూ తీసుకుంటాం కదా !  కానీ , ఈ ‘ అన్ని జాగ్రత్తలూ ‘ అనే పదం ఒక్కొక్కరి కీ ఒక్కో విధం గా ఉంటుంది !  బాగా చదువుకున్న వారు కూడా కారు విషయం లో తీసుకునే జాగ్రత్తలు సంపూర్ణం గా ఉండక పోవచ్చు . అట్లాగే  పెద్ద గా చదువు కోని వారు కూడా కారు నడపడం లో ఎక్కువ శాతం జాగ్రత్తలు తీసుకోవచ్చు !  ముఖ్యమైన విషయం : చదువు తో సంబంధం లేకుండా , కారు కు సంబంధించిన అన్ని విషయాలూ తెలుసుకోవడం , కారు నడిపే ప్రతి వారికీ అతి ముఖ్యం. క్రితం టపాలలో చెప్పుకున్నట్టు , కారు నడపడం అనేక  పరిస్థితు ల మీద ఆధార పడి ఉంటుంది ! వాటిలో కారు కు సంబంధించినవి ముఖ్యమైనవయితే , కారు నడిపే వారికి సంబంధించినవి అతి ముఖ్యమైనవి. కారు నడిపే వారికి కారు మీదా , వారు నడిపే రోడ్డు మీదా వారికి ఉన్న అవగాహన తో పాటుగా , వారి శారీరిక స్థితీ , మానసిక స్థితీ కూడా అతి ముఖ్యమైనవే ! ప్రత్యేకించి , కారు నడిపే సమయం లో వారి శారీరిక , మానసిక స్థితులు , వారి రోజు వారీ కార్యక్రమాలలో జరిగిన సంఘటనల వల్ల ప్రభావితం అయినప్పటికీ ,  ఆ ప్రభావం ఎట్టి పరిస్థితుల లోనూ , కారు నడిపే సమయం లో కనిపించ కూడదు. ఎందుకంటే కారు కేవలం అనేక మీటలూ , అంటే స్విచ్ లూ , గేర్ లూ , చక్రాలూ , మొదలైన పరికరాలు అమర్చి ఉన్న ఒక యంత్రం ! ఆ యంత్రం కేవలం ,ఆ యంత్రం లో వివిధ రకాల స్విచ్ లు ఏ విధమైన చర్యల కోసం అమర్చ బడి ఉన్నాయో , ఆ యా  చర్యలే చేస్తుంది !  ఇంకో రకం గా చెప్పుకోవాలంటే , ఆ యంత్రాన్ని నడిపే మనకు వివిధ రకాల శారీరిక అలసట లు కానీ , మానసిక చీకాకు లు కానీ ఉన్నాయని ‘ తెలుసుకుని ‘ సురక్షితం గా ప్రయాణం సాగించదు ! అట్లాగే కారు నడిపే మనం , నిద్ర పోతూ ఉంటేనో ,లేదా ‘ మందు ‘ సేవించి , కారు నడుపుతూ ఉంటేనో , ‘ కారు యజమాని బాగా అలసి పోయి నిద్ర పోతున్నారు ‘ అనుకుని కానీ , లేదా  కారు యజమాని తీవ్రమైన మానసిక వత్తిడి కలిగి , మద్యం తాగి , కారు నడుపుతున్నారని కానీ , అనుకుని , ‘ వారిని సురక్షితం గా ఇంటికి చేరుద్దాం అని ‘ ఆలోచించదు ‘ ఆ యంత్రం ! అందువల్ల , కారు నడిపే అన్ని వేళలలోనూ , అత్యంత అప్రమత్తత తో నడిపితేనే , ప్రయాణం సురక్షితం అవుతుంది ! మన గమ్యం కూడా సునాయాసం గా చేరుకుంటాం ! 
కానీ అన్ని జాగ్రత్తలూ తీసుకున్నా కూడా ప్రమాదాలు సంభవిస్తూ ఉంటాయి !  మరి అట్లా ప్రమాదం సంభవించినప్పుడు మన  కర్తవ్యం ఏమిటి ?  ప్రమాదం లో మనం చిక్కు కోక పోయినా కూడా , కొన్ని సమయాలలో , మన కళ్ళ ఎదురు గానే ప్రమాదం సంభవించ వచ్చు !  మనం తరచూ టెలి విజన్ లో చూస్తూ ఉంటాం ! ప్రమాదం జరిగినప్పుడు కానీ , లేదా  మనుషులు పొడుచు కుంటున్నప్పుడు కానీ మన దేశం లో ప్రజలు ఎక్కడ లేని వైరాగ్యం ప్రదర్శించి , తమకు ఈ భవ బంధాలు ఏవీ పట్టనట్టు , ఏమాత్రం విచారించ కుండా, తప్పుకుని పోతూ ఉంటారు , కళ్ళ  ఎదురు గానే అనేక అకృత్యాలు జరుగుతున్నా కూడా ! ఇటీవల ఆఫ్ఘనిస్తాన్ యుద్ధం లో పాల్గొని తిరిగి వచ్చిన బ్రిటిష్ సైనికుడు ఒకడిని నడి రోడ్డుమీదే ఇద్దరు హంతకులు హతమార్చారు గొంతు కోసి ! ఆ సందర్భం లో అక్కడే ఉన్న ఇద్దరు స్త్రీలు, ఆ హంతకుల తో మాట్లాడుతూ , వారిని ఎంగేజ్ చేస్తూ , వారిని  ఇతరుల మీద దాడి చేయకుండా , ధైర్యం గా నివారించ గలిగారు ! కేవలం ఇద్దరు స్త్రీలు ! 
ప్రమాద సమయాలలో ఖచ్చితం గా మాట్లాడాలంటే , దేశ ప్రజల బాధ్యత ఏమీ లేక పోయినప్పటికీ , ఆ యా సమయాలలో అక్కడ ఉండడం వల్ల సాటి మనిషి ఆపద లో ఉంటే , సహాయం చేయడం కనీస మానవ ధర్మం కదా !  సామాన్యం గా, ఏ ప్రమాదం జరిగినా కూడా , అందులో గాయ పడిన వారికి , ప్రమాదం జరిగిన తరువాతి గంటలో అందే సహాయం అత్యంత ముఖ్యమైనది ,  వారికి జీవం పోసేదీ అవుతుందని అనేక శాస్త్రీయ పరిశీలనల వల్ల స్పష్టమైనది ! అందువల్ల కారు నడిపే అందరికీ , ప్రధమ చికిత్స లో ట్రైనింగ్ ఇవ్వడమూ , తీసుకోవడమూ కూడా ముఖ్యమే ! ఎందుకంటే , వారు కానీ , ఇతరులు కానీ ప్రమాదం లో తీవ్రం గా కానీ / స్వల్పం గా కానీ గాయ పడితే ,వారు నేర్చుకున్న ప్రధమ చికిత్స ఎంత గానో ఉపయోగకరం గా ఉంటుంది !  ఎమర్జన్సీ సర్విస్ వారు వచ్చే లోగా ! 
1. ప్రమాద స్థలం నుంచి , యాక్సిడెంట్ రిస్కు ఉన్న వారినందరినీ  సురక్షిత ప్రాంతానికి చేర్చాలి. 
2. కారు  నుంచి డేంజర్ సిగ్నల్ ను అందరికీ కనిపించేట్టు ఆన్ చేయాలి . ( హజార్డ్ లైట్ లను ఆన్ చేయాలి ) 
3. అది మిగతా వాహన దారులకు వార్నింగ్ అవుతుంది. 
4. అమ్ బ్యులెన్స్ వారికి ఫోన్ చేసి అన్ని వివరాలు స్పష్టం గా ఇవ్వాలి ! 
ఒక వేళ మీరే కనక ప్రమాదం లో చిక్కుకుంటే , మీ ప్రమాదానికి కారణమైన ఇతర వాహన వివరాలను నోట్ చేసుకోవడం , వీలయితే కనీసం సెల్ ఫోన్ తో నైనా కొన్ని కోణాలలో ప్రమాద దృశ్యాలను ఫోటో తీసుకోవడం చాలా ఉపయోగ కరం , ఉత్తరో త్తరా , ఇన్స్యురెన్స్ క్లెయిమ్ ల కోసం కూడా ! ఎందుకంటే , భారత దేశం లో ( కొన్ని ఇతర దేశాలలో కూడా నేమో నాకు తెలియదు ! )  ప్రతి వాహన దారుడూ , ప్రమాదం సంభవించి నప్పుడు , తప్పని సరిగా , తనది ఏమీ తప్పు లేదనీ , తప్పంతా ఇతర వాహన దారులదే ననీ వాదిస్తాడు , వీలయితే వారి మీద చేయి చేసుకుంటాడు కూడా ( నోటి తో పాటు గా ! ) ! 
వచ్చే టపా లో ఇంకొన్ని సంగతులు ! 

17. సేఫ్ కార్ డ్రైవింగ్. కారు బ్రేక్ డౌన్ లో ఏం చేయాలి ?

In ప్ర.జ.లు., మన ఆరోగ్యం., మానసికం, Our Health, Our minds on సెప్టెంబర్ 5, 2013 at 7:09 సా.

17. సేఫ్ కార్ డ్రైవింగ్.కారు  బ్రేక్ డౌన్ లో ఏం చేయాలి ?

 
మనం కారు లో కూర్చున్నంత సేపూ , సురక్షితం గా ప్రయాణం చేసి , ఇంటికి ఎప్పుడు చేరుతామా అనే ఆలోచిస్తూ ఉంటాము. అంటే , ఏ ప్రమాదాలూ లేకుండా, అది సహజమే కదా ! కానీ కారు అకస్మాత్తు గా రోడ్డు మీద బ్రేక్ డౌన్ అవుతే మన కర్తవ్యం ఏమిటి ? అనే విషయం అంత సీరియస్ గా పట్టించు కోము కదా ! మరి ఆ విషయాలు కూడా ముందే తెలుసుకుంటే , ప్రయాణం సురక్షితం అవడమే కాకుండా , సకాలం లో సహాయం అంది , మన ‘ గూళ్ళ ‘ కు చేరుకోగలం కూడా ! ఉన్నట్టుండి కారు రోడ్డు మీద బ్రేక్ డౌన్ అవుతే , రెండు రకాలు గా ప్రమాదాలు సంభవించ వచ్చు ! ఒకటి మన కారు మోటారు వే మీద కనుక బ్రేక్ డౌన్ అవుతే , ఇతర వాహనాలు అది గమనించ కుండా , నేరు గా, వేగం గా వచ్చి గుద్దు కోవడం వల్ల !  రెండు  ఆ సమయం లో మనకే కాకుండా , ఇతర వాహన దారులు కూడా ప్రమాదాల బారిన పడడం ! 
వెంటనే చేయవలసినదేంటి ?
కారు సడన్ గా బ్రేక్ డౌన్  అవగానే విపరీతం గా ఆందోళన చెంది , ఒక్క సారిగా కారు బ్రేక్ మీద, గట్టిగా కాలు ( పాదం ) పెట్టి , బ్రేక్ వేయ కూడదు. అవును , బ్రేక్ సడన్ గా వేయకూడదు. స్టీరింగ్ ను కంట్రోలు చేస్తూ కారును రోడ్డు మీద ఒక సరళ రేఖ లోనే నడుపుతూ , వేగాన్ని నియంత్రించు కుంటూ , వీలైనంత త్వర గా కారును రోడ్డుకు ఎడమ ప్రక్కకు తీసుకు పోవాలి ( అంటే నడపాలి ). ఇట్లా చేయడం వల్ల , కారు ను మనం మనకు వీలైనంత తక్కువ అవ కాశం కలిగిస్తాము , ఇతర వాహనాలతో గుద్దు కోడానికి !  మోటారు వే మీద కారు బ్రేక్ డౌన్ అయినా కూడా కారును ఇదే విధం గా , రోడ్డుకు వీలైనంత ఎడమ వైపు కు తీసుకు వెళ్ళాలి , ( విదేశాలలో , సామాన్యం గా, ఈ ఎడమ ప్రక్క ప్రదేశాన్ని  హార్డ్ షోల్డర్ అంటారు , మరి భారత దేశం లో రోడ్ల మీద కూడా ఇవి ఉండి తీరాలి, ఎవరూ ఆక్రమించు కోకుండా ఉంటే ! ) 
a హజార్డ్ లైట్ లను ఆన్ చేయాలి 
b . బయట చీకటి గా ఉంటే , కారు సైడ్ లైట్ లను కూడా ఆన్ చేయాలి !
c. కారు లోంచి వీలైనంత త్వరగా బయటకు రావాలి , సైడ్ డోర్ ను ఓపెన్ చేసి. మిగతా వాహనాలు వేగం గా వెళుతున్న సైడ్ నుంచి ఎప్పుడూ బయటకు రాకూడదు !  కారణం వివరించ నవసరం లేదు కదా ! 
d. పెంపుడు జంతువులను కార్ లోనే ఉంచడం శ్రేయస్కరం ! 
e. మన తో పాటు గా మన కారులో ప్రయాణం చేస్తున్న ఇతర ప్రయాణీకులు కూడా హార్డ్ షోల్డర్ కు వీలైనంత దూరం గా అంటే రోడ్డుకు వీలైనంత దూరం లో నిలబడడం క్షేమ దాయకం ! 
వెంటనే ఎమర్జెన్సీ సర్విస్ వారికి ( బ్రేక్ డౌన్ సర్విస్ ) ఫోను చేయాలి. విదేశాలలో ప్రత్యేకించి ఈ అవసరానికే , మోటార్ వే ల మీద అక్కడక్కడా ఫోన్ లు అమర్చి ఉంటాయి ! వీటి వల్ల ఉపయోగం ఏమిటంటే , మనం ఆ ఫోన్ లనుంచి ఫోన్ చేయగానే , ఎమర్జన్సీ సర్విస్ వారికి తెలిసి పోతుంది , ఖచ్చితం గా మనం మోటార్ వే మీద ఎక్కడ ( అంటే ఎన్ని మైళ్ళ దూరం లో ) ఉన్నామో ! భారత దేశం లో ఇట్లాంటి ఎమర్జెన్సీ ఫోన్ లు నాకు తెలిసినంత వరకూ అమర్చ లేదు ! ఒక వేళ  అమర్చినా , ఆ ఫోన్ బాక్స్ లు ఖాళీ అయి పోతాయి అమర్చిన కొద్ది క్షణాల లోనే , ఎవరైనా ఫోన్ చేసినా , ఎమర్జెన్సీ సర్విస్ వారు ,  ఆ ఫోన్ ను అనేక మైళ్ళ దూరం లో , ఉండే ఇళ్ళలో లోకేట్ చేస్తారు ! అందువల్ల మొబైల్ ( సెల్ ) ఫోన్ ను ఎప్పుడూ పని చేసే కండిషన్ లో ( చార్జ్ చేసుకుని ) ఉంచు కోవడం క్షేమ దాయకం , ప్రత్యేకించి , వాహనాలు నడిపే వారు ! 
 
వచ్చే టపాలో ఇంకొన్ని సంగతులు ! 

 

16.సేఫ్ కార్ డ్రైవింగ్. సదా, కారు సురక్షితం గా నడపాలంటే పధకం ఏమిటి ?

In ప్ర.జ.లు., మన ఆరోగ్యం., మానసికం, Our Health, Our minds on సెప్టెంబర్ 2, 2013 at 8:24 సా.

16.సేఫ్ కార్ డ్రైవింగ్.  సదా కారు సురక్షితం గా నడపాలంటే పధకం ఏమిటి ?

 

( పైన ఉన్న చిత్రం హైదరాబాదు లో రోడ్డు మీద ట్రాఫిక్ ! ) ప్రతి వారూ అర్జంట్ గా వెళ్ళాలి ! ఎక్కడికి ?

కారున్న ప్రతి వారూ, ఎప్పడూ, కారు సురక్షితం గానే నడుపుదామనుకుంటారు కదా ! మరి మనకు ఏమైనా పధకం ఉందా ,అట్లా  సురక్షితం గా నడప డానికి ? అని ఆలోచించుకుంటే కొన్ని ముఖ్య విషయాలు గోచరిస్తాయి ! 
1. సరి అయిన గేరు 
2. సరి అయిన వేగం 
3. సరి అయిన స్థానం. 
మనం కారు నడిపే సమయం లో అత్యంత సురక్షితం గా నడపాలంటే ఎప్పుడూ, పైన సూచించిన లక్షణాలు దృష్టి లో పెట్టుకునే డ్రైవ్ చేయాలి ! మనం ఎప్పుడూ , కారును సరైన గేరు లోనే పోనిస్తూ , కారు వేగాన్ని ఎప్పుడూ మన నియంత్రణ లోనే ఉంచుకోవాలి ! అట్లాగే రోడ్డు మీద మన స్థానాన్ని ఎప్పుడూ  సురక్షితమైన స్థానం గానే చూసుకోవాలి ! ఉదా : ఒక లారీ నిండా ఇటుకలు ఉంటే, త్వరగా ఆఫీసు కు వెళ్లాలని , ఆ లారీ ను అతుక్కుని డ్రైవింగ్ చేసినట్టు గా , ఏమాత్రం మధ్య స్పేస్  ఉంచకుండా , ఆ లారీ బ్రేక్ వేస్తే, తగిలేంత దూరం లో కారును నడుపుతుంటే , వేగం గా పోతున్న ఆ లారీ డ్రైవరు , ముందు అడ్డం వచ్చిన సైకిలిస్ట్ ను తప్పించ తప్పించ డానికి , సడన్ గా బ్రేక్ వేశాడనుకోండి ! అప్పుడు జరిగేది ? : మనం నడుపుతున్న కారు మీద ఇటుకల వర్షం ! ( ఎందుకంటే ఇటుకలు న్యూటన్ మొదటి సూత్రం పాటిస్తాయి కనుక ! ) ఆ వెంటనే మన కారు గ్యారేజీ సూత్రం పాటిస్తుంది !  మన అదృష్టం బాగుంటే , మనం హాస్పిటల్ సూత్రం నుంచి తప్పించు కుంటామేమో ! ఇదే పరిస్థితి , మనం నడిపే కారుకూ , ముందు వెళ్ళే లారీ కీ, మూడు నాలుగు కార్ల ఎడం ఉంచి ఊహించుకుంటే , ఎంత సురక్షితం అవుతుందో కదా ! లారీ , కారూ రెండూ సడన్ బ్రేక్ వేసినా కూడా ! పైన చెప్పినవే కాక , ఈ క్రింది లక్షణాలు కూడా , మన డ్రైవింగ్ ను ఎంతో సురక్షితం చేస్తాయి. 
 
1. బాధ్యత : కారు ను రోడ్డు మీద బాధ్యతా యుతం గా నడపాలి ! మనం భారత దేశం లో చూసే అతి సాధారణ దృశ్యం , వాహనం పెద్దదవుతున్న కొద్దీ బాధ్యతా రాహిత్యం ఎక్కువ అవుతూ ఉంటుంది ! లారీలకు వ్యాన్లూ , వ్యాన్లకు , కార్లూ , కార్లకు మోటార్ సైకిలిస్ట్ లూ , వాళ్లకు సైకిలిస్ట్ లూ ! ఇట్లా ప్రతి పెద్ద వాహనానికీ , చిన్న వాహనదారులు తేలిక  భావం ! రోడ్డు మీద పెద్ద వాహనాలు పోతుంటే మిగతా వారు తప్పుకోవాలి , వారిది ఏ తప్పూ లేక పోయినా కూడా !  రోడ్డు ఉపయోగిస్తున్న ప్రతి వారూ రోడ్డు టాక్స్ కడుతున్నప్పటికీ ! ఈ  ప్రవృత్తి చాలా అనర్ధ దాయకం , ప్రమాద కరం కూడా ! ప్రతి వాహన దారుడూ అత్యంత బాధ్యతా యుతం గా కారు నడపాలి ! 
2. జాగ్రత్త : అప్రమత్తతా, జాగ్రత్తా కూడా చాలా ముఖ్యమైన లక్షణాలు , కారు నడిపే ప్రతి వారికీ ఉండవలసినవే ! ( ఆమాటకొస్తే , ప్రతి వాహనదారుకూ ఉండవలసిన లక్షణాలు ! )  
3. మర్యాద లేదా సౌజన్యం : ప్రయాణాలు , దూరాలూ, ఇతర వాహనదారులతో మర్యాదా , సౌజన్యం తో ప్రవర్తిస్తే , తక్కువ టెన్షన్ తో , ఎక్కువ తృప్తి కరం గా సాగుతాయి ! రెక్ లెస్ గా ఇతర వాహన దారులను ఏమాత్రం పట్టించుకో కుండా ! ( హైదరాబాదు లో )  ఆటో డ్రైవర్ ల లా డ్రైవింగ్ చేయ కూడదు ! 
4. దూరం :  ఖచ్చితం గా చెప్పుకోవాలంటే , మనం కారు లో ప్రయాణం చేస్తున్నప్పుడు , అంటే, కారు నడుపుతున్నప్పుడు , ఇతర వాహనాలకూ , మనకూ ఎప్పుడూ  తగినంత దూరం ఉంచుకునే డ్రైవింగ్ చేస్తూ ఉండాలి ! అంటే,  ఏ సమయం లోనైనా  మన ముందు వాహనాలకూ , మన కారుకూ  కనీసం రెండు మూడు కార్లు పట్టే దూరం ఉండాలి ! హైదరాబాదు , ముంబాయి , మద్రాసు , ఢిల్లీ వాసులంతా , నేను తల తిక్క గా మాట్లాడుతున్నానాను కుంటారు కదా ! కానీ ఇట్లా,  రోడ్డు మీద ప్రయాణం చేసే ప్రతి వాహనదారుడూ అనుకుని డ్రైవ్ చేస్తే ఎంత హాయి గా ఉంటుందో ! ఎందుకంటే, ఈ చెప్పిన పట్టణాలలో , కేవలం  రైలు పట్టాలు ఉన్న చోట తప్పించి ఇంకెక్కడా గేట్లు మూసి వేయరు కదా ! మరి ఎందుకు  ముందున్న వాహనం ‘ మీద పడడం ‘ ? ??  రెండు మూడు కార్ల ఎడం ఉంటే ఎంత ఆలస్యం అవుతుంది ప్రయాణం ??? 
పైన ఉన్న చిత్రం, కాలిఫోర్నియా లో రోడ్డు మీద ట్రాఫిక్ ! ఇక్కడా, ప్రతి వారూ అర్జంట్ గా వెళ్ళాలి ? అందుకే,  క్రమ శిక్షణ ! 
వచ్చే టపాలో ఇంకొన్ని సంగతులు ! 

 

 

15. సేఫ్ డ్రైవింగ్. స్కిడ్డింగ్ , ఆక్వా ప్లేనింగ్ ల గురించి ప్రతి కారు డ్రైవరూ ఎందుకు తెలుసుకోవాలి ?

In ప్ర.జ.లు., మన ఆరోగ్యం., మానసికం, Our Health, Our minds on ఆగస్ట్ 31, 2013 at 2:42 సా.

15. సేఫ్ డ్రైవింగ్. స్కిడ్డింగ్ , ఆక్వా ప్లేనింగ్ ల గురించి ప్రతి  కారు డ్రైవరూ ఎందుకు తెలుసుకోవాలి ? 

స్కిడ్డింగ్ అంటే రోడ్డు మీద ప్రయాణం చేస్తున్న కారు పట్టు తప్పి రోడ్డు మీదే జారుతూ ప్రయాణం చేయడం ! కారు డ్రైవింగ్ సమయం లో స్కిడ్డింగ్ జరిగుతున్న సమయం లో కారును సరిగా కంట్రోలు చేయలేక పొతే , కారు సరి అయిన సమయం లో , సరి అయిన చోట ఆగదు ! దానితో ప్రమాదాల రిస్కు ఎక్కువ అవుతుంది ! 
స్కిడ్డింగ్ ఏ పరిస్థితులలో జరుగుతుంది ? 
1. కారు ప్రయాణం చేస్తున్న రోడ్డు మీద వాన కురుస్తూ ఉంటే, 
2. కారు ప్రయాణం చేస్తున్న రోడ్డు మీద మంచు కురవడం కానీ స్నో పడడం కానీ జరిగితే ,
3. కారు ప్రయాణం చేస్తున్న రోడ్డు మీద  ఫ్రాస్టు ఉండడం వల్ల ,
4. కారు ప్రయాణం చేస్తున్న రోడ్డు మీద  ఆయిల్ కానీ డీజెల్ కానీ పడడం వల్ల ! 
5. కారు ప్రయాణం చేస్తున్న రోడ్డు మీద  ఎక్కువ గా గులక రాళ్ళు ఉంటే కూడా ! 
పైన చెప్పుకున్న పరిస్థితులు భారత దేశం లో రోడ్ల మీద చాలా వరకూ కనిపిస్తూ నే ఉంటాయి , కాక పొతే మంచు ఎక్కువ గా ఉత్తర భారత దేశం లో కనిపిస్తుంది !  
4, 5 కారణాలు తప్ప మిగతా పరిస్తితు లన్నిటి లో కూడా కారు చక్రానికీ , అంటే టైరు కూ , రోడ్డు కూ మధ్య ఒక పలుచని నీటి పొర ఏర్పడుతుంది ! దానితో , కారు టైర్లు ప్రయాణం చేసే రోడ్డు మీద పట్టు అంటే గ్రిప్ కోల్పోతాయి !  ఆ పరిస్థితులలో కనుక బ్రేకులు వేసినా కూడా , కారు వెంటనే ఆగదు , అందువల్ల ప్రమాదాలు ఎక్కువ గా జరుగుతూ ఉంటాయి ! ప్రత్యేకించి ఇట్లా రోడ్డు తేమ గా ఉన్నపుడు , కారు వేగం తగ్గించక , మామూలు వేగం తో పోతూ ఉంటే , ఇట్లా ప్రమాదాలు జరగడానికి ఎక్కువ రిస్కు ఉంటుంది ! గమనించ వలసినది , పైన చెప్పిన కారణాలు అన్నీ కూడా స్పష్టం గా కనబడక పోవచ్చు రోడ్డు మీద , భోరున వాన పడుతుంటే తప్ప ! అందుకే ప్రతి డ్రైవరూ , కారు నడిపే సమయం లో అత్యంత అప్రమత్తత తో డ్రైవ్ చేయాలి ! వాన పడుతున్న సమయం లో కూడా కారు చక్రాల కూ రోడ్డు కూ  మధ్య ఎక్కువ నీరు ఉండి , కారు టైరు ను గాలి లో తెల్చేస్తుంది ! కారు అదుపు తప్పేది కూడా , ఆ కారణం చేతనే ! 
మరి స్కిడ్డింగ్ ను ఎట్లా నివారించాలి?
మనం కారు నడుపుతున్నప్పుడు , వాన ఎప్పుడు వస్తుందో , ఎప్పుడు ఎక్కువ అవుతుందో ఖచ్చితం గా చెప్పలేము కదా ! అప్ర మత్తత అతి ముఖ్యమైన లక్షణం. అప్రమత్తత తో మనం కారు నడిపే రోడ్డును నిరంతరం పరిశీలిస్తూ ఉండాలి ! తేమ ఎక్కువ గా ఉన్నా , లేదా రోడ్డు మీద నీరు నిలిచినా కూడా , ఈ క్రింద సూచించిన విధం గా సురక్షితం గా కారును నియంత్రణ చేయాలి :
ఈ క్రింద ఉన్న యూ ట్యూబ్ వీడియో మీద క్లిక్ చేసి వివరాలు తెలుసుకోవచ్చు ! 
1. కారు వేగాన్ని తగ్గించాలి 
2. యాక్సిలరేటర్ మీద కాలు పెట్టి కారును ఎక్కువ వత్తిడి కి గురి చేయడం మంచిది కాదు , ఆ పరిస్థితులలో 
3. యాక్సిలరేషన్ తగ్గిస్తే , కారు చక్రాలు రోడ్డు మీద సరి అయిన వత్తిడి తో తిరగ గలవు !
4. అదే సమయం లో కారు స్టీరింగ్ వీల్ ను జాగ్రత్త గా తిప్పుతూ , ఆ తేమ / నీరు ఉన్న రోడ్డును దాటాలి 
భారత దేశం లో రోడ్ల మీద ప్రత్యేక మైన జాగ్రత్తలు అవసరమా ?
ఈ అనుమానమే అవసరం లేదు ! ఎందు కంటే ,
1. భారత దేశం లో రోడ్ సైన్స్ సరిగా ఉండవు 
2. రోడ్ లు సరిగా ఉండవు ( అంటే గుంటలతోనూ , రోడ్ వర్క్స్ తోనూ ఉంటాయి )
3. వాన బాగా కురిసి నప్పుడు పైకి చూడడానికి అంటా నీటి మయం గా ఉన్నా కూడా , మన కారు ప్రయాణం చేసే దోవ లో గుంటలు కూడా ఉండవచ్చు , అనేకం ! 
4. సురక్షితమైన పధ్ధతి వాన ఆగి , నిలిచిన నీరు తగ్గే వరకూ డ్రైవ్ చేయక పోవడమే ! 
వచ్చే టపా లో ఇంకొన్ని సంగతులు ! 

14. రక్షిత వాహన చోదకము ( సేఫ్ కార్ డ్రైవింగ్ ). ప్రమాదాలను పసి గట్టడం ఎట్లా ?

In ప్ర.జ.లు., మన ఆరోగ్యం., మానసికం, Our Health, Our minds on ఆగస్ట్ 28, 2013 at 9:10 సా.

14. రక్షిత వాహన చోదకము ( సేఫ్ కార్ డ్రైవింగ్ ). ప్రమాదాలను పసి గట్టడం ఎట్లా ?

కారు డ్రైవింగ్ చేస్తున్నప్పుడు, రోడ్డు మీద అనేక అవాంతరాలు ఎదురవుతూ ఉంటాయి ! ఆ అవాంతరాలను ముందే పసి గడితే , వాటిని సమయ స్ఫూర్తి తోనూ , డ్రైవింగ్ నైపుణ్యం తోనూ , నివారించుకోవచ్చు ! మరి అట్లా చేయడానికి  ప్రతి డ్రైవరూ ఏమి చేయాలి ?
1. స్పష్టమైన దృష్టి ఉండాలి : 
కారు నడుపుతున్నపుడు మన ముందు ఉండే రోడ్డు మీద మనకు స్పష్టమైన  దృష్టి ఉండాలి , దానితో  ముందున్న రోడ్డు వ్యూ కూడా స్పష్టం గా కనబడుతుంది ! అంటే కేవలం కనబడితే ప్రయోజనం ఏముంటుంది అని అనుకోవచ్చు ! కానీ కారు ప్రయాణం చేస్తున్నంత సేపూ కేవలం ముందున్న రోడ్డును గమనిస్తూ ఉండాలి ! అట్లా చేస్తూ ఉండడం వల్ల , మన కారుకు అడ్డం వస్తున్న ఇతర వాహనాలు కానీ , మోటారు సైకిళ్ళు కానీ , సైకిళ్ళు కానీ , ఇంకా ముఖ్యం గా చిన్న పిల్లలు కానీ , లేదా ఇతర పాద చారులు కానీ రోడ్డు దాటుతూ ఉండడం , లేదా అకస్మాత్తు గా పడి పోవడమూ జరగ వచ్చు ! అప్రమత్తత తో గమనిస్తున్న మనం , ఆ రకమైన అవాంతరాలను ముందే గమనించి , తదనుగుణం గా మన కారును నిదానం గా నడపడం కానీ , ఇంకా అవసరం అవుతే బ్రేక్ వేసి ఆపడం కానీ చేయ వచ్చు ! 
బ్లైండ్ స్పాట్ అంటే ఏమిటి ?
మనం నడిపే వాహనాన్ని బట్టి , మన దృష్టి కి ఇరువైపులా కూడా కొంత మేర కనబడదు ఆ ప్రదేశాన్ని బ్లైండ్ స్పాట్ అంటారు ! ఈ బ్లైండ్ స్పాట్ ను గుర్తు ఉంచుకోవడం , ప్రత్యేకించి , మనం వాహనం నడుపుతున్నంత సేపూ , అత్యంత ముఖ్యమైన  కర్తవ్యం ! ఎందుకంటే మనం నడుపుతున్న కారుకు ఎడమ వైపు కానీ , కుడి వైపున కానీ ఈ బ్లైండ్ స్పాట్ ను కనుక మనం పట్టించుకో కుండా , కనుక , కారును  ప్రక్కకు ( కుడి ప్రక్కకు కానీ , ఎడమ ప్రక్కకు కానీ ) తిప్పగానే , వెనుక నుంచి వస్తున్న వాహనం తో ఢీ కొట్టి , తీవ్రమైన ప్రమాదం జరగ వచ్చు ! ఆ ప్రమాద తీవ్రత , ఆ పరిస్థితులలో , వెనుకనుంచి వచ్చే వాహనాల వేగం బట్టి మారుతూ ఉంటుంది ! 
ఇట్లా జరగడం ఎందువల్ల ?
బ్లైండ్ స్పాట్ లో వెనుకనుంచి వస్తున్న వాహనాలు కనిపించవు కనుక.
మరి బ్లైండ్ స్పాటు లో వచ్చే వాహనాలను గమనించే మార్గం ఏమిటి ? : మన కారు లో ఉన్న రియర్ వ్యూ మిర్రర్ నూ , సైడ్ మిర్రర్ లనూ వీలైనంత ప్రదేశం చూపించేట్టు అడ్జస్ట్ చేసుకోవాలి ! అంతే కాక , డ్రైవింగ్ చేసే సమయం లో ఒక లిప్త కాలం పాటు, అంటే కేవలం కొన్ని క్షణాల పాటు మనం మన తలను ప్రక్క కు తిప్పి మన కారు ప్రక్క గా  ప్రయాణం చేస్తున్న వాహనాలను గమనించాలి ! ఈ క్రింద ఇచ్చిన యూ ట్యూబ్ వీడియో ను కారు ఉన్న ప్రతి వారూ తప్పని సరిగా చూసి , బ్లైండ్ స్పాట్ గురించి స్పష్టం గా అర్ధం చేసుకోవాలి ! ప్రమాద నివారణ కోసమూ , సురక్షిత డ్రైవింగ్ కోసమూ ! 
వచ్చే టపాలో ఇంకొన్ని సంగతులు ! 

ఉద్యమ కారులూ, మీ ఆరోగ్యం జాగ్రత్త !

In మన ఆరోగ్యం., మానసికం, Our Health, Our minds on ఆగస్ట్ 27, 2013 at 9:09 సా.

ఉద్యమ కారులూ, మీ ఆరోగ్యం జాగ్రత్త ! 

 
అన్యాయాలూ, అవినీతుల  ‘సంతానమే’ ఉద్యమం ! 
ప్రతి ఉద్యమానికీ ‘తాతలే’, స్వార్ధం నిండిన నేతలు ! 
‘తాత’ మాట మీకు బంగారు బాటా ? ! 
‘తాతలు’ కోట్లకు పడ గెత్తి తే ,
మీరు, నిండా మునగడమా ? ! 
మీ మనుగడ ఆగడమా ???
నడుస్తారు మీరు, అనేక  మైళ్ళ దూరం !
వేస్తారు, మానవ హారాలు 
మానుతారు, నిద్రాహారాలు ! 
పట్టించుకోరు, మీ  రోగాలు ! 
మీ మందులు మానేస్తారు  !
మీ బీపీ పెరిగినా ,
మీ షుగరు తగ్గినా,
మీరు మాత్రం హుషారు ! 
గుండె ఆగి, కుప్ప కూలినా 
ఉద్యమం ఆపరు మీరు !
మీ తల్లి, తండ్రి ,
మీ కొడుకూ, కూతురూ !
మీ తోబుట్టువులూ ! 
అందరికీ మీరు కావాలి
వారందరికీ మీరొక్కరే ! 
ప్రతి జీవితం విలువైనది,
మీ జీవితం కూడా  !
తాత లెవరూ చావలేదు !  
తాతల  ‘సంతానం’ చావదు ! 
ఉద్యమం  పొందు లో, తాతలు  సుఖం ! 
లేదు, వారి నిఘంటువులో, 
‘త్యాగం ‘ !  
మరి మీకెందుకు ???
మీ స్వేదం, రక్తం ,
మీ జీవితాలూ , ఉదాత్తం !
చేయకండి, నేతలకు ధారాదత్తం ! 
‘తాతల’ ననుసరించండి !
‘సమిధల’వ్వకండి !
మీ ఆరోగ్యం జాగ్రత్త ! 
 
 
 
 
 

13. రక్షిత కారు చోదకం ( సేఫ్ కార్ డ్రైవింగ్ ). మోటార్ వే లో ఎట్లా డ్రైవ్ చేయాలి ?

In ప్ర.జ.లు., మన ఆరోగ్యం., Our Health, Our minds on ఆగస్ట్ 26, 2013 at 1:12 సా.

13. రక్షిత కారు చోదకం ( సేఫ్ కార్ డ్రైవింగ్ ). మోటార్ వే లో ఎట్లా డ్రైవ్ చేయాలి ?

రక్షిత కారు చోదకం గురించి కొన్ని ముఖ్యమైన విషయాలు క్రితం టపాలలో తెలుసుకున్నాం కదా ! ఇప్పుడు మోటార్ వే లలోనూ , డ్యూ ఎల్ క్యారేజ్ వే లలో ఎట్లా డ్రైవ్ చేయాలో గమనించుదాము !
మోటార్ వే : మోటార్ వే సహజం గా ఒక టౌన్ నుంచి ఇంకో టౌన్ కు కానీ ఒక సిటీ నుంచి ఇంకో సిటీ కి కానీ ఉండే రోడ్డు. మోటార్ వే ల మీద వేగం సామాన్యం గా గంట కు 60 నుంచి 70  మైళ్ళ వేగం తో వాహనాలు ప్రయాణిస్తూ ఉంటాయి !  గమనించ వలసినది , గంటకు అరవై మైళ్ళు అంటే 96 కిలో మీటర్లని , అట్లాగే గంటకు 70 మైళ్ళు అంటే 112 కిలో మీటర్లని. ఇంకో రకం గా చెప్పుకోవాలంటే , గంటకు అత్యధిక వేగం ఎట్టి పరిస్తితులల్లోనూ 112 కిలో మీటర్లు లేక 70 మైళ్ళ కు మించ కూడదు. 
మరి ప్రతి కారులోనూ స్పీడో మీటర్ లో 120 – 130 మైళ్ళు కూడా కనిపిస్తుంటాయి కదా ఆ వేగం తో ప్రయాణించ కూడదా ? 
కారు వేగం పెరుగుతున్న కొద్దీ , కారును నియంత్రించే సమయం , ఇంకా కారు ఆగే దూరం కూడా పెరుగుతుంది. అంటే పది మైళ్ళ వేగం తో ప్రయాణిస్తున్న కారు ను సడన్ గా బ్రేక్ వేస్తే ,ఖచ్చితం గా బ్రేక్ వేసిన చోటే ఆగుతుంది కారు. అదే వేగం ఎక్కువ గా ఉన్నపుడు అంటే నలభై కానీ యాభై మైళ్ళ వేగం లో బ్రేక్ చేస్తే , కారు , బ్రేక్ చేసిన చోటే ఆగదు. కాస్త ముందుకు వెళ్లి ఆగుతుంది. ఇట్లా వేగం పెరుగుతున్న కొద్దీ , బ్రేక్ వేసిన చోట కాకుండా ఇంకా ముందుకు , ఇంకా ముందుకు పోయి కారు ఆగుతుంది ! అంటే కారు అత్యధిక స్పీడు లో వెళుతున్నపుడు , ఏదైనా ప్రమాదాన్ని నివారించాలని బ్రేక్ వేసినా కూడా , కారు ఆగే దూరం ఎక్కువ అవడం వల్ల , ఎదురుగా ఉన్న దానికి ( అది వాహనం కానీయండి, లేదా డివైడర్ కానీయండి ) తప్పకుండా గుద్దు కుంటుంది ! ఇక్కడ డ్రైవింగ్ చేసే వారు అప్ర మత్తత తో ఉన్నా కూడా, కారు అత్యధిక వేగం తో పోతూ ఉండడం వల్ల , వారి కంట్రోలు లో ఉండదు ! అందుకే , కారు ను వేగం పరిమితి దాటి డ్రైవ్ చేయడం ప్రమాదకరం. 
స్లిప్ రోడ్ నుంచి మోటార్ వే లో ఎట్లా కలవాలి ?
స్లిప్ రోడ్ మీద ప్రయాణం చేస్తున్నపుడు , కారు వేగం తక్కువ గా ఉంటుంది. అంటే అత్యధిక వేగం , యాభై నుంచి అరవై మైళ్ళు ఉంటుంది. కానీ మోటార్ వే లో కలిసే సమయం లో వేగాన్ని ఇంకా తగ్గించ వలసి ఉంటుంది కదా ! అదే సమయం లో MSM / PSL సూత్రాన్ని పాటించాలి. ముఖ్యం గా గుర్తు ఉంచుకోవలసినది , మోటార్ వే లో అంతకు ముందే ప్రయాణం చేస్తున్న వాహనాలకు ప్రయారిటీ ఇవ్వాలి అంటే , మన కుడి వైపు న ఉన్న మిర్రర్ లోనుంచి చూస్తే , వెనుక నుంచి మోటార్ వే లో వాహనాలు కనుక వస్తూ ఉంటే , వాటి ముందు స్లిప్ రోడ్ ను వదిలి మోటార్ వే లో కలవడం అత్యంత ప్రమాదకరం ! ఎందుకంటే , అట్లా కలిసే సమయం లో మన కారు వేగం తక్కువ గా ఉండి , వెనుక నుంచి వచ్చే వాహనాల వేగం అధికం గా ఉంటుంది, దానితో ప్రమాదాలకు రిస్కు ఎక్కువ అవుతుంది ! వెనుక వాహనాలు వెళ్ళాకనే , మోటార్ వే  మీదకు ఎక్కాలి ! అంతే కాకుండా ఒక సారి స్లిప్ రోడ్ వదిలాక మోటార్ వే మీద అక్కడ స్పీడ్ తో అంటే 70 మైళ్ళ వేగానికి గేర్ లు మార్చుతూ , యాక్సిలరేట్ చేయాలి కారును . 
మోటార్ వే నుంచి స్లిప్ రోడ్ లోకి ఎట్లా మారాలి ?
మోటార్ వే లో వేగం అధికం గా ఉంటుంది కదా , దానిని వదిలి స్లిప్ రోడ్ లోకి ప్రవేశించే సమయం లో ముందు గానే ఇండికేటర్ తో సూచించాలి స్లిప్ రోడ్ లో ప్రవేశించ బోతున్నట్టు ! అప్పుడు వెనుక ఉన్న వాహనాలు లేన్ మార్చుకోవడమో , లేదా వేగం తగ్గించు కోవడమో చేస్తాయి ! ప్రమాద నివారణ కోసం. 
ఒక సారి స్లిప్ రోడ్ లో ప్రవేశించిన తరువాత , వేగాన్ని తగ్గించు కుంటూ పోవాలి ! 
లేన్ డిసిప్లిన్ అంటే ఏమిటి ? :
మోటార్ వే మీద ఒక డైరెక్షన్ లో మూడు లేన్ లు కనుక ఉంటే , మనం ఎప్పుడూ ఎడమ లేన్ లోనే కారు నడపాలి !  జంక్షన్ లు సమీపిస్తున్నప్పుడు , ఎక్కువ అప్ర మత్తత తో ముందూ , ప్రక్క లా వెళ్ళే వాహనాలను గమనిస్తూ ఉండాలి ! కనీసం రెండు మూడు కార్ల దూరం ముందరి కారు నుంచి మన కారు కు ఉండడం క్షేమ దాయకం ! మోటార్ వే లో మన కారును రివర్స్ చేయడం కానీ , సెంట్రల్ రిజర్వేషన్ ను దాటే ప్రయత్నం కానీ ఎప్పుడూ చేయ కూడదు , మనం వెళ్ళే డైరెక్షన్ సరి అయినది కాక పోయినా కూడా , ( వచ్చే రౌండ్ ఎబౌట్ , అంటే కూడలి దగ్గర దాకా డ్రైవ్ చేసి , మన దిశ మార్చు కోవాలి ). 
వచ్చే టపాలో ఇంకొన్ని సంగతులు !  
 

12. రక్షిత కారు చోదకం ( సేఫ్ కార్ డ్రైవింగ్ ). క్రాసింగ్ లూ , జంక్షన్ లలో కారు ఎట్లా నడపాలి ? :

In ప్ర.జ.లు., మన ఆరోగ్యం., మానసికం, Our Health, Our minds on ఆగస్ట్ 23, 2013 at 11:50 ఉద.

12. రక్షిత కారు చోదకం ( సేఫ్ కార్ డ్రైవింగ్ ). క్రాసింగ్ లూ  , జంక్షన్ లలో కారు ఎట్లా నడపాలి ? : 

జంక్షన్ లు పలు రకాలు గా ఉంటాయి. T జంక్షన్ : T జంక్షన్ దగ్గర ఒక చిన్న రోడ్డు మెయిన్ రోడ్డు లో కలుస్తుంది. Y జంక్షన్: Y జంక్షన్ లో కూడా ఒక చిన్న రోడ్డు మెయిన్ రోడ్డు లో కల్సుస్తుంది కానీ నిటారు గా కాకుండా ఈ చిన్నరోడ్డు ఏ ట వాలు గా మెయిన్ రోడ్డు లో కలుస్తుంది ( T జంక్షన్ అందుకే T అక్షరం తోనూ Y జంక్షన్ ను Y అక్షరం తోనూ పోల్చేది అందుకే ! )క్రాస్ రోడ్డు లు ప్లస్ + ఆకారం లో ఉంటాయి లేదా X ఆకారం లో ఉంటాయి. రౌండ్ ఎబౌట్ లు పేరుకు తగ్గట్టు వృత్తాకారం లో ఉంటాయి ! ఇవి కాక కొన్ని జంక్షన్ లు జిగ్ జాగ్ గా కూడా ఉంటాయి అంటే గజి బిజి గా ! ఇక్కడ మెయిన్ రోడ్డు లో కలిసే చిన్న రోడ్డు లు ఖచ్చితం గా కాక ఒక్కో కోణం లో కలుస్తాయి. 
జంక్షన్ ల దగ్గర పాటించవలసిన నియమం ఏమిటి ?
క్రితం టపాల లో తెలుసుకున్నట్టు , MSM / PSL  సూత్రాన్ని పాటించాలి తప్పనిసరిగా ( సురక్షిత ప్రయాణం కావాలనుకునే వారు )
M అంటే మిర్రర్ లో ప్రక్క నుంచీ , వెనుక నుంచీ వచ్చే వాహనాలను గమనించడం 
S అంటే సిగ్నల్ ఇవ్వడం 
M ఈ రెండో M   అంటే మెనూవర్ చేయడం ఈ మెనూవర్ చేయడానికి PSL ను గుర్తు ఉంచుకోవాలి 
P అంటే పొజిషన్ 
S స్పీడ్ అంటే వేగాన్ని కంట్రోలు చేసుకోవడం 
L అంటే లుకింగ్ అంటే అన్ని వైపులా చూసి సురక్షితం గా ఉంటేనే , ముందుకు పోవాలి !
1. ఎడమ ప్రక్కకు కారును తిప్పడం ఎట్లా ?:
పైన చెప్పిన MSM /PSL సూత్రాన్నే పాటించాలి ఇక్కడ కూడా కానీ కారును ఫుట్ పాత్ కెర్బ్ కు కనీసం మూడడుగులు దూరం లో పొజిషన్ చేసుకోవాలి ! కానీ భారత దేశం లో ఈ మూడడుగుల చోటు ఇవ్వగానే, ఆరు ఆటో లు ఆ సందులో దూరుతాయి కదా ! కానీ ఆటోలకూ , సైకిలిస్ట్ లకూ ఖచ్చితమైన సిగ్నల్ ఇవ్వాలి , వారికి ఏ రకమైన 
కన్ఫ్యూజన్ కలగకుండా ! అదే సమయం లో తిరగ వలసిన సైడ్ రోడ్డు నుంచి మీ ఎదురు గా వస్తున్న వాహనాలను కూడా గమనించాలి !
2. కుడి ప్రక్కకు కారును తిప్పడం ఎట్లా ?:
పైన చెప్పిన MSM /PSL సూత్రాన్నే పాటించాలి ఇక్కడ కూడా కానీ కారు పొజిషన్ ను రోడ్డుకు వీలైనంత సెంటర్ కు తీసుకు వెళ్ళాలి. అదే సమయం లో మీ సందు లోకి తిప్పే వాహనాలకు సరిపడినంత చోటు ఇవ్వాలి మీరు. అంటే రోడ్డంతా ఆక్రమించుకో కూడదు !
మీకు కుడి వైపునుంచి రోడ్డు మీద వస్తున్న ( అంటే మెయిన్ రోడ్డు మీద ) వాహనాలనన్నిటినీ జాగ్రత్తగా గమనించాలి ! అంతే కాకుండా , ఆ యా వాహనాలను ఓవర్ టేక్ చెస్తూ కూడా కొన్ని వాహనాలు కానీ , మోటార్ సైకిలిస్ట్ లు కానీ , పాద చారులు కానీ ప్రయాత్నాలు చేయ వచ్చు ! వారిని కూడా అప్రమత్తత తో గమనించాలి, కుడి ప్రక్క కు కారు మళ్ళించే ముందు ! జంక్షన్ లో ట్రాఫిక్ సిగ్నల్ గ్రీన్ గా మారగానే ఎదురు గా వచ్చే వాహనాలకు ముందుగా రోడ్డు ను ఇవ్వాలి అంటే ఎదురుగా వచ్చే వాహనాలనే పోనివ్వాలి , ఆ తరువాతే మీ కారును ప్రక్కకు తిప్పాలి ! ప్రత్యేకించి కుడి ప్రక్కకు కనుక మీ కారును తిప్పుతున్నట్టయితే ! జీబ్రా క్రాసింగ్ ల దగ్గర తప్పనిసరిగా కారు వేగాన్ని తక్కువ చేసి పోనియ్యడమే కాకుండా , పాద చారులు రోడ్డు దాటు తున్నపుడు తప్పని సరిగా కారును ఆపాలి ! పాద చారులకు ఎప్పుడూ ప్రయారిటీ ఇవ్వాలి ! 
వచ్చే టపాలో ఇంకొన్ని సంగతులు ! 
 
 
 

10. రక్షిత కారు చోదకం ( సేఫ్ కార్ డ్రైవింగ్ ). రోడ్డు మీద మన కారు పొజిషన్ ఎట్లా ఉండాలి ?

In ప్ర.జ.లు., మన ఆరోగ్యం., మానసికం, Our minds on ఆగస్ట్ 21, 2013 at 9:50 సా.

10. రక్షిత కారు చోదకం ( సేఫ్ కార్ డ్రైవింగ్ ). రోడ్డు మీద మన కారు పొజిషన్ ఎట్లా ఉండాలి ?

‘ తప్పించుక తానొవ్వక , తిరుగు వాడు ధన్యుడు సుమతీ ‘ అని సుమతీ శతక కారుడు శతాబ్దాల క్రితమే అన్నాడు ! ఆ సూక్తి కారు డ్రైవింగ్ లోనూ పనికొస్తుంది ! 
ఒక సారి కారు లో కూర్చుని రోడ్డు మీద పడ్డాక , మళ్ళీ కారును ఇంటికి చేర్చే వరకూ , రోడ్డు మీద ప్రయాణం చేస్తూ కూడా , నిరంతరం , మన పొజిషన్ ను , అంచనా వేసుకుంటూ , అప్రమత్తత తో కారు డ్రైవింగ్ చేయాలి ! ఎందుకంటే , సురక్షిత కారు చోదకం , మన కారు ఒక్క దాని మీదే , ఆధార పడి ఉండదు కదా ! అనేక మైన అవాంతరాలు రోడ్డు మీద తారస పడవచ్చు మనకు !  ఈ క్రింది జాగ్రత్తలు సురక్షిత డ్రైవింగ్ కు ఎంతగానో ఉపయోగ పడతాయి :
1. ఫుట్ పాత్ కు దగ్గర గా డ్రైవింగ్ చేయకూడదు. పాద చారుల కదలికలు దృష్టి లో ఉంచుకోవాలి. 
2. పార్క్ చేసి ఉన్న కార్ల మధ్య నుంచి బయటకు త్వర త్వరగా రాకూడదు. 
3. ఎట్టి పరిస్థితులలోనూ , పేవ్ మెంట్, అంటే ఫుట్ పాత్ మీద డ్రైవ్ చేయకూడదు ! 
4. సైకిలిస్ట్ ల రూట్ లో  కారు నడప కూడదు. 
5. అదే విధం గా బస్సులు ఆగే చోటా కారు నడప కూడదు ! 
( విదేశాలలో , సైకిళ్ళూ , బస్సులూ , నడపదానికీ , ఆపడానికీ , ప్రత్యేకమైన లేన్ లు ఉంటాయి ! , భారత దేశం లో ఆ పరిస్థితి కనపడదు ! ) 
6. కానీ కొన్ని బారత పట్టణాలలో , కొన్ని చోట్ల , ప్రత్యేక మైన లేన్ లు గీయబడి ఉంటాయి. ఆ యా చోట్ల , లేన్ డిసిప్లిన్ తప్పని సరిగా పాటించాలి ! అందరి భద్రత కోసమూ ! 
ఎప్పుడు ఓవర్ టేక్ చేయాలి ?
ఈ విషయం కన్నా ఎప్పుడు ఓవర్ టేక్ చేయ కూడదో తప్పని సరిగా గుర్తు ఉంచుకోవాలి 
1. మన కు ఎదురుగా వ్యూ స్పష్టం గా లేనప్పుడు , అంటే స్పష్టం గా కనిపించనప్పుడు , ఓవర్ టేక్ చేయకూడదు ! 
2. ఇతర డ్రైవర్ లకు మనం కానీ మన కారు కానీ కనిపించట్లేదని పించినప్పుడు మనం ఓవర్ టేక్ చేయ కూడదు ! ఇతర డ్రైవర్లు అప్రమత్తం గానే డ్రైవ్ చేస్తారు లే అనే నిర్లక్ష్యా భావం తో డ్రైవ్ చేయడం , ప్రమాదాలను ఆహ్వానించడమే ! 
3. ఓవర్ టేక్ చేద్దామనుకునే ఏరియా కానీ , చోటు కానీ తక్కువ గా ఉన్నప్పుడు , ఓవర్ టేక్ చేయ కూడదు !
4. మన ఎదురుగా ఉన్న రోడ్డు న్యారో గా అవుతున్నపుడు , అంటే మనం ప్రయాణిస్తున్నప్పుడు విశాలం గా ఉండి , క్రమేణా సన్న బడుతున్నప్పుడు  ఓవర్ టేక్ చేయడం సురక్షితం కాదు !
5.ఇంకొద్ది దూరం లో కానీ ( లేదా ఇంకొన్ని క్షణాలలో కానీ ) జంక్షన్ ను కనుక చేరుకో బోతుంటే , ఓవర్ టేక్ చేయడం సురక్షితం కాదు ! ( అంటే జంక్షన్ లేదని ఖచ్చితం గా తెలిసి ఉంటేనే ఆ ప్రయత్నం చేయాలి )
6. మనం పల్లం అంటే దిగువ లో ప్రయాణం చేస్తూ , ఎదురు గా ఎత్తు గా ఉన్నప్పుడు ( దీనిని డెడ్ గ్రౌండ్ అంటారు ) ఓవర్ టేక్ చేయడం అత్యంత ప్రమాదకరం ! ఎందుకంటే ఎదురు గా రోడ్డు ఎత్తు గా ఉండడం వల్ల , మనకు వ్యతిరేక దిశ లో వచ్చే వాహనాల గురించి ఏ రకమైన అవగాహనా ఉండదు కనుక ! 
అంతే కాక , ఓవర్ టేక్ చేసే సమయం లో  ముందు ఉన్న వాహనానికీ , మన కారు కూ మధ్య సరిపడినంత దూరం ఉండాలి ! చాలా దగ్గరగా ఉండి , ఓవర్ టేక్ చేస్తూ ఉంటే , మన కారు ముందు ఉన్న వాహనానికి , మనం ఓవర్ టేక్ చేస్తూ ఉన్నట్టు తెలియదు ! దానితో , ఆ వాహన దారు కూడా అదే సమయం లో ఓవర్ టేక్ చేయడానికి ప్రయత్నిస్తే , ఏం జరుగుతుందో ఊహించుకోవచ్చు ! 
వచ్చే టపాలో ఇంకొన్ని జాగ్రత్తలు !