Our Health

రచయత ఖజానా

అప్పుతో మనశ్శాంతి కి ముప్పు.2. క్రెడిట్ కార్డులు కారణమా ?

In ప్ర.జ.లు., మానసికం, Our Health, Our minds on ఫిబ్రవరి 3, 2013 at 11:04 ఉద.

అప్పుతో మనశ్శాంతి కి ముప్పు.2. క్రెడిట్ కార్డులు కారణమా ?

 
సాధారణం గా మనమందరమూ , అప్పు చేయడానికి  సందేహిస్తూ ఉంటాము. మన ఆదాయం మించి ఖర్చులు అవుతున్నప్పుడు కంగారు పడతాము. ఎవరి దగ్గర అప్పు చేయ వలసి వస్తుందో అని, అప్పు చేయడానికి కూడా సంకోచిస్తూ ఉంటాము. వీలైతే  అప్పు లేని జీవితం గడుపుదామని అనుకుంటాము.కానీ వాస్తవ పరిస్థితులు ఎప్పుడూ , ఆదర్శాలకూ , ఆశయాలకూ భిన్నం గా ఉంటాయి కదా ! మనం, మన పరిస్థితులకు , క్రెడిట్ కార్డులు ఎంతవరకు కారణమో చూద్దాం !
అప్పు చేసే వారికి క్రెడిట్ కార్డ్ లు ” దేవుడిచ్చిన ” వరం !  ఈ ప్రపంచం లో   అనేక కోట్ల మందిని ఒక్క సారిగా ఋణ గ్రస్తులను చేయడానికి ఉపయోగ పడే అతి చిన్న సాధనం ! అనేక పరిశీలనల వలన మనం కరెన్సీ అంటే డబ్బు నోట్ల రూపం లో మన చేతుల్లో ఉన్నప్పుడు , ఖర్చు చేయడానికి వెనుకాడు తాము , కానీ క్రెడిట్  కార్డు ఉన్నప్పుడు , ఆ జంకు  పోయి ” హుందాగా ”  క్రెడిట్ కార్డ్ ఫ్లాష్ చేస్తూ ఉంటాము.మన చేతిలో ఉన్న డబ్బు తో కాకుండా క్రెడిట్ కార్డు ఇచ్చి కొన్న వస్తువులను , ఆనందం గా కొంటాము !  ఆ సమయం లో మనం అనుభవించే ఆనందం, డబ్బు పెట్టి ,కొనే సమయం లో వచ్చే ” విచారాన్ని ” కను మరుగు చేస్తుంది ! మన మానసిక స్థితిని క్రెడిట్ కార్డ్ ఆ విధం గా ట్యూన్ చేస్తుంది. చాలా పరిశీలనల వల్ల , మన చేతిలో డబ్బు నోట్ల రూపం లో ఉన్నప్పుడు , మనం జాగ్రత్త గా ఆచి తూచి ఖర్చు చేస్తూ ఉంటాం అని తెలిసింది.
చాలా మంది  చేయని ఇంకో పని ఉంది ! అది డబ్బు విలువ తెలుసుకోవడం ! అంటే  డబ్బు గురించి మనకు ఉన్న అవగాహన ఏమిటి ? మన జీవితాలలో డబ్బుకు  ఏ  స్థానం ఇస్తున్నాము, ఇవ్వదలుచుకున్నాం , ఇవ్వ బోతున్నామనే విషయాలను , వివరం గా తెలుసుకోవాలి. కేవలం మనకు ఉన్న డబ్బు బట్టే , మన ఆస్తిత్వమూ , ఉనికీ ఆధార పడి ఉందా?  ఆ విధమైన ఆలోచన ఇంకేవరిదోనా , లేక మన నమ్మకమా ? డబ్బు లేక పొతే మనం లేమా ? !  ఈ  ప్రశ్నలకు సహేతుకమైన సమాధానాలు రాబట్టు కావడానికి  ప్రతి ఒక్కరూ ప్రయత్నించాలి , తమంత తామే ! 
క్రెడిట్ కార్డు తో ”  ఋణాను బంధం ” ఎట్లా పెరుగుతుంది?:
ఒక ఉదాహరణ : లక్ష రూపాయలకు ఒక ఆకర్షణీయమైన టెలివిజన్, కనుక మీ క్రెడిట్ కార్డ్ ద్వారా కొన్నట్టయితే , దానికి  మీరు మినిమమ్ పేమెంట్ కేవలం నెలకు వెయ్యి రూపాయలు  అనుకుంటే ,కనీసం  నూట యాభై నెలలు కడుతూ ఉండాలి , వడ్డీ తో కలిపి !  మీరు ఆ సమయం  అంటే కనీసం పన్నెండు సంవత్సరాలకు పైగా , నెలకు వెయ్యి రూపాయలు కడుతూ ఉంటే , కనీసం లక్షన్నర రూపాయలకు పైగా మీరు మీ శ్రమ ఫలితాన్ని క్రెడిట్ కార్డు ద్వారా తీసుకున్న అప్పు తీర్చడానికి ధార పోయాల్సిందే కదా !  అదే మినిమమ్ పేమెంట్ లో ఉన్న కిటుకు ! మానవులను దీర్ఘ కాలికం గా ” ఋణ గ్రస్తులను ” చేయడమే !  అదే మీరు ( మీ కోరికలను నియంత్రించుకుని ) ఆ టెలివిజన్ కొనకుండా, మీ డబ్బును  నెలకు వెయ్యి రూపాయల చొప్పున బ్యాంకు లో వేసుకుంటే ( వచ్చే వడ్డీ తో సహా  ) మీకు ఎంత  డబ్బు జమా అవుతుందో ఊహించుకోండి ! 
 
వచ్చే టపాలో ఇంకొన్ని సంగతులు ! 

అప్పు తో మనశ్శాంతి కి ముప్పు.1.

In ప్ర.జ.లు., మానసికం, Our Health, Our minds on ఫిబ్రవరి 1, 2013 at 9:21 ఉద.

అప్పు తో మనశ్శాంతి కి ముప్పు.1. 

 
అప్పు చేసే వారి రకాలు :  గ్యారెట్ సటన్  అనే రచయిత  అప్పు తీసుకునే వారిని ముఖ్యంగా నాలుగు రకాలు చేశాడు ! ( ఇది ముఖ్యం గా అమెరికనుల ను దృష్టి లో ఉంచుకునే అయినా , ప్రపంచీకరణ పర్యవసానం గా ఇతర దేశాల వారికి కూడా వర్తిస్తుంది ! ) 
1.Wishers ( అభిలాషులు ) :  ఈ రకానికి చెందిన వారు , ఎప్పుడూ తాము తీసుకున్న అప్పును సకాలం లో తీర్చి వేయగలమనే , ఆశాభావం తోనూ , ధీమా తోనూ ఉంటారు.వారికి , వారు మొత్తం మీద వారు చేసే ఖర్చులమీద వారికి ఏమాత్రం అవగాహన , దూర దృష్టీ ఉండదు ! పర్యవసానం గా , ఎక్కువ వడ్డీలూ , అవి ఇంతింతై , కొండంత అయి , వారు తీర్చలేక పోలేమనే ఆలోచనా  వారికి  ఏమాత్రం ఉండదు. వారికి కేవలం ” తాత్కాలికం గా అంటే ప్రస్తుతం , విషమ పరిస్థితిని దాట  దానికి ఎంతో  కొంత నెలకు కడితే , సరిపోతుంది కదా , మనమీద వత్తిడి లేకుండా ” అనే  ( అప ) నమ్మకం తో ఉంటారు ఎప్పుడూ !  వీరు సామాన్యం గా పెద్ద పెద్ద మతపరమైన పండగలకు విపరీతం గా ఖర్చు పెడుతూ ఉంటారు ! ఇంకా వారు , వారికి మంచి ఉద్యోగం వచ్చి వారి అప్పులన్నీ తీర్చివేయగలమనే , ఫాల్స్ కాన్ఫిడెన్స్ లేదా అప విశ్వాసం తో ఉంటారు !  వీరంటే అప్పు ఇచ్చే వారికి అమితమైన ప్రేమ ! 
2.Wasters ( వ్యసన పరులు ) : ఈ రకానికి చెందిన వారిలో ఆత్మ విశ్వాసం చాలా కొరవడుతుంది, ఇంకో రకం గా చెప్పాలంటే, ఆత్మ న్యూనతా భావం అధికం గా ఉంటుంది. దానితో, ఏ సమయం లోనైనా వారికి విసుగు గా కానీ , డిప్రెషన్ గా గానీ అనిపించినప్పుడు , వెంటనే ,  ” తమ ” ” స్నేహితులతోనో , బంధువులతోనో ” ” బజారున ” పడతారు , తమ ఇష్టం వచ్చిన వస్తువులను కొంటారు , ఎంత ధర ఉన్నా , వారికి వస్తువు ధర, విలువ ల మీద ఏమాత్రం అవగాహన ఉండదు. అంతేకాక వారు , చూసిన ప్రతి వ్యాపార ప్రకటన నూ  పదే  పదే  మననం చేసుకుంటూ , మార్కెట్ లోకి వచ్చిన లేటెస్ట్ పరికరాలనూ ,  వస్త్రాలనూ , కోనేస్తూ ఉంటారు. ముఖ్యం గా వీరికి , డజన్ల కొద్దీ క్రెడిట్ కార్డ్ లు ఉంటాయి. అప్పు తీర్చ లేక పోతున్నా , క్రెడిట్ కార్డు లు మార్చి మార్చి , తమ కు ” కావాలను కున్నవి , అవసరం ఎక్కువ లేకపోయినా కొంటూ ఉంటారు. చేసిన అప్పులు తీర్చ లేక తంటాలు పడుతూ ఉంటారు !  వీరూ అప్పు ఇచ్చే వారికి చాలా ఇష్టం.
3.Wanters ( తక్షణ వాంఛ కులు ) : వీరు  యమ స్పీడు. వారికి కావలసినవి , వస్తువులు కానీయండి , వాహనాలు కానీయండి , ఎంత ఖర్చు అయినా , ఎట్టి  పరిణామాలు వారు ఎదుర్కోవలసి వచ్చినా , కొనేస్తారు వెంటనే , ఇక్కడ గమనించ వలసినది , వారికి చాలా సమయాలలో వారి డబ్బు ఉండదు అంటే సొంత డబ్బు ఉండదు. అందువల్ల అప్పు చేసి అయినా సరే, వారు అనుకున్న వస్తువులు కొంటారు , వెంటనే ! వారి మానసిక పరిస్థితి ని  ఇన్స్ స్టెంట్  గ్రాటి ఫికేషన్  ( instant gratification ) అని అంటారు. ఈ లక్షణం లో , మానవులకు ఓపిక ఏమాత్రం ఉండదు. అంటే పేషన్స్ ! వారు వేచి యుండడం సహించ లేరు !  ఇంకా స్పష్టం గా చెప్పాలంటే , సెల్ఫ్ డిసిప్లిన్ అంటే స్వీయ క్రమ శిక్షణ వారికి ( అలవాటు ) ఉండదు !  వీరు కూడా అప్పు ఇచ్చే వారి  గుడ్ బుక్స్ లో ఉంటారు ! ఈ పరిస్థితిని శాస్త్రీయం గా ఒక యాభై ఏళ్ల  క్రితం, శాస్త్రజ్ఞులు ఒక చిన్న  ప్రయోగం తో నిరూపించారు.
ఈ ప్రయోగాన్ని మార్ష్ మెలో  ప్రయోగం అని అంటారు !  ఈ ప్రయోగం అమెరికా లో జరిగింది స్టాన్ ఫర్డ్ అనే నగరం లో నాలుగు సంవత్సరాల వయసు ఉన్న బాల బాలికల మీద ! వారందరికీ ” మీరు తినడానికి మార్ష్ మెలో  ఇస్తాము ( మార్ష్ మెలో  అంటే ఒక రకమైన పీచు మిఠాయి  ) మీరు వెంటనే తెనేట్టైతే ఒకటి , లేదా పదిహేను నిమిషాల తరువాత తినేట్టైతే , రెండు ఇవ్వడం జరుగుతుంది ” అనే షరతు పెట్టారు !  అప్పుడు రెండు రకాల ప్రవర్తనను వారు గ్రహించారు ! ఆ గ్రూపు లో సగం మంది ఆ మార్ష్ మెలో  తీసికొని వెంటనే ( అంటే ఒకటే ! )  తినేశారు !  కానీ ఇంకో సగం మంది , పదిహేను నిమిషాలూ ఆగి రెండు తీసుకుని తిన్నారు !   అంత వరకూ సరే  ! కానీ శాస్త్రజ్ఞులు ఆ రెండు గ్రూపులనూ కనీసం మూడు దశాబ్దాల పాటు అంటే ముప్పై ఏళ్ల  వయసు వరకూ పరిశీలించారు !
వారికి ఒక ఆశ్చర్య కరమైన విషయం తెలిసింది.  ఒక మిఠా యే , వెంటనే తీసుకు తిన్న వారు ,  ఆత్మ న్యూనతా భావం తో పెరిగి పెద్ద వారై , ఏవో అంతంత మాత్రం చదివి , చాలీ చాలని ఉద్యోగాలతో ,  ఆందోళన మయ వివాహ సంబంధాలతో , ఒడు దుడుకుల జీవితాలు గడుపుతున్నారుట ! కానీ , పదిహేను నిమిషాలు ఆగి రెండు మిఠాయి లూ తిన్న వారు బాగా చదువుకుని , ఎక్కువ జీతాలతో , స్థిరమైన వివాహ బంధాలతో , ప్రశాంతమైన జీవితాలు గడుపుతున్నారుట ! ఒక పరిశీలన ప్రకారం , ఇట్లా సెల్ఫ్ డిసిప్లిన్ లేని వారు , అమెరికా లో లక్షలలో ఉండి , అనేక కష్టాలకు లోనవుతున్నారని ! ( మిగతా దేశాలలో వీరి సంఖ్య ఏమాత్రం తక్కువ గా ఉండదు ! ) 
4.Winners ( విజయులు )  : ఇక ఈ రకానికి చెందిన వారు బహు జాగ్రత్త పరులు: వీరికి  అప్పు ఊబి లో కూరుకు పొతే బయటకు రావడం ఎంత కష్టమో స్పష్టమైన అవగాహన ఉంటుంది. వీరు అనవసరమైన ఆర్భాటాలకు పోరు. ప్రతి వస్తువునూ  ఆచి తూచి కొంటారు !  ఒక ఇల్లు ఉంటే , ఆ ఇంటికి చేసిన అప్పు వారే తీరుస్తూ ఉండక ,ఒక గది అద్దెకు ఇచ్చి , ఆ వచ్చే అద్దె ను కూడా అప్పు తీర్చడానికి వాడతారు !, పది టెరీ కాట్ చొక్కాలకు బదులు , నాలుగు నూలు చొక్కాలు , ఉంటాయి వీరికి, హాయి గా !   చాలా వరకు, వీరు తమ వాంఛ లను నియంత్రించు కొనగలిగే శక్తి సామర్ధ్యాలు కలిగి ఉంటారు. వీరు దీర్ఘ కాలికం గా, జీవితం లో బాగా స్థిర పడతారు. మనశ్శాంతి కూడా వీరికి ఏర్పడుతుంది, కనీసం ఆర్ధికం గా !  వీరిని అప్పు ఇచ్చే వారు అదోలా చూస్తారు ! ” వీడు ఎక్కడనుండి  దాపురించాడు రా ” అనుకుంటారు ! 
 
వచ్చే టపాలో ఇంకొన్ని సంగతులు ! 

అప్పు తో మనశ్శాంతి కి ముప్పు !

In ప్ర.జ.లు., మానసికం, Our Health, Our minds on జనవరి 31, 2013 at 11:57 ఉద.

అప్పు  తో మనశ్శాంతి కి ముప్పు ! 

 
 
అప్పు గొని సేయు విభవము …….. దెప్పరమై మీద గీడు   దెచ్చుర సుమతీ ! అన్నాడు సుమతీ శతక కారుడు ! 
ఈ భూమి మీద ఉన్న ప్రతి మానవుడికీ అప్పు గురించి తెలియదు అంటే  నమ్మ లేము ! ఎప్పటికప్పుడు అవకాశం చిక్కినప్పుడల్లా , అప్పు చేసి , కనీస అవసరాలు తీర్చు కునే వారు కొందరైతే ,  అత్యాశకు పోయి , ఆడంబరాలకు , వ్యసనాలకూ  కూడా అప్పులు చేసి బేజారు చెందే వారు కొందరు. తీర్చలేక బజారు న పడే వారు కొందరు ! ఈ అప్పుకు , లింగ భేదం , వయసు , కులం , జాతి , మతం తో సంబంధం లేదు ! ఎవరినైనా ఇట్టే  పట్టేస్తుంది , జలగ లాగా ! కొందరు తీసుకున్న అప్పును మర్చిపోతారు ! మరి కొందరు , తీర్చ వలసిన అప్పు గురించి ఆలోచిస్తూ , ఆందోళన పడుతుంటారు ! ఇంకా అమాయకులు , తమ సంతానాన్ని వెట్టి చాకిరికి గురి చేస్తారు ! ఈ అప్పు తీర్చడం కోసం ! , అనేక గ్రామాలలో , ఇంకా ఇట్లా జరుగుతూ ఉండనే విషయం సత్య దూరం కాదు ! అప్పు కూ , ఆమాట కొస్తే , మానవ జీవన శైలికీ , అతడి ఆర్ధిక స్థితి కీ విడదీయ రాని  సంబంధం ఉంది.
కొన్ని దశాబ్దాల క్రితం అమెరికా  చంద్రుడి మీదకు ” అపోలో ” ను పంపినపుడు , ఒక తెలుగు కార్టూనిస్టు, అమెరికనులు ” అపోలో ” అపోలో ” అంటూ ఉంటే , మన ( భారతీయులు  ) అప్పులో , అప్పులో అంటూ ఉన్నట్టు  గీశాడు ! ప్రస్తుతం , భారత దేశ ఆర్ధిక స్థితి కొంత మెరుగైనా కూడా , చాలా మంది ప్రజలు ఇంకా దారిద్ర్య రేఖకు దిగువనే ఉన్నారని అనేక తాజా పరిశీలనలు తెలుపుతూ ఉన్న్నాయి కూడా ! 
ఈ అప్పు మానవులకు చేసే కీడు  అంతా ,ఇంతా కాదు.!  మనం రోజూ చూస్తూ ఉంటాము వివిధ వార్తా పత్రికలలో , అప్పు తీర్చలేక ( ఒక్కో సమయం లో కుటుంబం తో సహా ) ఆత్మహత్య లు చేసుకుంటున్న  వారిని.  వేలకొద్దీ మరణిస్తున్న రైతులు , పంట చేతికి రాక , చేసిన అప్పులు తీర్చ లేక  చేసుకునేవి  ఆత్మ హత్యలే ! అంత  తీవ్రం గా కాక పోయినా , లక్షలాది ప్రజలకు మనశ్శాంతి దూరం చేస్తుంది , ఈ అప్పు !  
మరి ఈ అప్పు గాడి సంగతి మనం శాస్త్రీయ కోణం లో చూడ చూడడానికి ప్రయత్నిద్దాం !  వాడికి దూరం గా ఉండే మార్గాలున్నాయేమో  కూడా తెలుసుకుందాం, వచ్చే టపా నుంచి ! 
   

సోషల్ ఫోబియా కు చికిత్స .5.

In ప్ర.జ.లు., మానసికం, Our Health, Our minds on జనవరి 30, 2013 at 10:28 ఉద.

సోషల్ ఫోబియా కు చికిత్స .5.

సోషల్ స్కిల్స్ ట్రైనింగ్ :  ఈ ట్రైనింగ్ లో కొత్త ప్రదేశాలకు వెళ్లి నపుడు, కొత్త వారితో పరిచయాలు ఎట్లా మొదలు బెట్టాలి ?, సంభాషణ ఎట్లా మొదలు బెట్టాలి ? అనే విషయాలు  తెలియ చేయడం జరుగుతుంది. అంతే  కాక , మీరు ఇట్లా మాట్లాడడం మొదలు పెట్టే సమయం లో మీ ప్రవర్తన ఎట్లా ఉంటుంది , మీ చుట్టూ ఉన్న వారు మీరు చెప్పే విషయాలను ఏవిధం  గా అంచనా వేస్తున్నారు , అంటే వారు మీ మీద ఏవిదమైన అభిప్రాయాలు ఏర్పరుచుకుంటూ ఉన్నారో కూడా వీడియో ద్వారా  మీరు చూసుకుని , మీ ప్రవర్తనను పాజిటివ్ గా మార్చుకునే అవకాశం ఉంటుంది ఈ ట్రైనింగ్ కోర్సు లలో ! 
గ్రే డెడ్  సెల్ఫ్ ఎక్స్ పోజర్ : ఈ పధ్ధతి లో  మీకు ఆందోళన , యాంగ్జైటీ కలిగించే పరిస్థితులను ఒక క్రమ పధ్ధతి లో నోటు చేసుకోవాలి. అంటే అతి తక్కువ ఆందోళన, భయం , యాంగ్జైటీ ల నుంచి ఎక్కువ గా ఆందోళన , ఫోబియా కలిగించే  పరిస్థితులు. తరువాత మీరు ఒక్కో పరిస్థితినీ మీరే , ఎదుర్కోవాలి , మీ తెరపిస్ట్  సలహా , సహాయం తో ,  అంటే మీ అంతట మీరే ఈ పరిస్థితులను ఒక క్రమ పధ్ధతి లో అంటే తక్కువ ఆందోళన కలిగించే పరిస్థితి నుంచి , ఎక్కువ ఆందోళన కలిగించే పరిస్థితి కూడా , విజయ వంతం గా  మ్యానేజ్ చేసుకో గలరు. మీరు ఈ పని ఒక్క సారి గా చెయ్యట్లేదు కాబట్టి , మీ భయాలు కూడా ఎక్కువ అవక , క్రమేణా  తగ్గుతూ ఉంటాయి.
CBT : దీనినే కాగ్నిటివ్ బిహేవియరల్ థెరపీ అంటారు : ఈ పధ్ధతి లో ముఖ్యం గా  సోషల్ ఫోబియా , మీ  గురించీ , మీ చుట్టూ ఉన్న ప్రపంచం గురించీ , ఇంకా మీ చుట్టూ ఉన్న మనుషుల గురించి , మీకు ఏర్పడిన నిరుపయోగ కరమైన అభిప్రాయాలను , చాలెంజ్ చేసి అంటే వాటిని నిలదీసి , హేతు వాదన తో ఆ ఆలోచనలను మీకు ఉపయోగం కలిగే పాజిటివ్ ఆలోచనలు , అభిప్రాయాలు గా మార్చడం జరుగుతుంది. ఒక ఉదాహరణ : మీరు ఒక కొత్త వ్యక్తి  తో సంభాషణ మొదలు పెట్టారనుకోండి. ఒక పదిహేను నిమిషాల తరువాత , ఆ సంభాషణ ఆగి పోతుంది. మీకు సోషల్ ఫోబియా కనుక ఉన్నట్టయితే , మీరు ఆ సమయం లో ” నాకు ఇంకా మాట్లాడడానికి ఏ విషయాలూ తట్టడం లేదు , ఇక ఏమి మాట్టాడాలో తెలియట్లేదు , నేను ఎప్పుడూ ఇంతే ” అనుకుంటూ , ఆందోళన , యాంగ్జైటీ చెందడం మొదలు పెడతారు. కానీ మీ  తెరపిస్ట్ మాత్రం ఆ సమయం లో ” మీ తో మాట్లాడుతున్న ఎదుటి వ్యక్తీ  మీ లానే , మాట్లాడడానికి విషయాలు ఏవీ లేక , మాట్లాడ లేక పోతూ ఉండ వచ్చు , కేవలం మిమ్మల్ని విమర్శించు కొనవసరం లేదు కదా ” అని మీకు పాజిటివ్ దృక్పధం నేర్పుతాడు.  
సోషల్ ఫోబియా కు మందుల తో చికిత్స ఉందా ?:  
పైన చెప్పిన  పద్ధతులు సోషల్ ఫోబియా పోడానికి సరి యైన మార్గాలు.  వాటన్నిటినీ  ఆచరించి , అయినా తగ్గని పరిస్థితులలోనే , మందుల సహాయం తీసుకోవాలి.ఇంకా కొన్ని ప్రత్యెక పరిస్థితులలో , అంటే సోషల్ ఫోబియా తో పాటుగా డిప్రెషన్ కూడా ఉంటే  , మందుల అవసరం ఉంటుంది. అప్పుడు ప్రత్యెక నిపుణుడి సహాయం అంటే సైకి యా ట్రిస్ట్  సలహా తీసుకోవాలి.
వచ్చే టపాలో ఇంకొన్ని సంగతులు ! 

సోషల్ ఫోబియా కు చికిత్స. 5.

In ప్ర.జ.లు., మానసికం, Our Health, Our minds on జనవరి 29, 2013 at 10:13 ఉద.

సోషల్ ఫోబియా కు చికిత్స. 5.

 
ఈ సోషల్ ఫోబియా ఉన్న వ్యక్తులు నలుగురి లో ఉన్నప్పుడు ,  కొన్ని ప్రవర్తనా లక్షణాలను చూపిస్తారు.
1.కళ్ళలోకి చూసి మాట్లాడక పోవడం. అంటే  తదేకం గా ఎదుటి వారి కళ్ళలోకి చూడడం దాట వేయడం. ఈ పరిస్థితి ఎదుటి వారికి మీ మీద నమ్మకాన్ని కలిగించదు. లేదా సందేహాలనూ , అపోహలనూ కలిగించు తుంది.
2. తమ వ్యక్తి గత విషయాలను ఏమాత్రం బయటకు రానీయరు. దీనికి కారణాలు ఏమైనా అవవచ్చు కూడా. కొందరు ఆత్మ న్యూనతా భావం తో అట్లా చేస్తే , ఇంకొందరు ,  కొంత వ్యక్తి గత కారణాల వల్ల  కూడా చేయవచ్చు.
3. ఎదుటి వ్యక్తి  గురించి ఆరా తీయడం , వారి గురించిన విషయాలనే ఎక్కువ గా అడగడం కూడా చేస్తూ ఉంటారు. పై విధమైన ప్రవర్తన ద్వారా వీరు , కొత్త వాతావరణం లో పరిస్థితులను , తమ నియంత్రణ లో ఉంచుకుంటూ ఉన్నట్టు భావిస్తారు. 
చికిత్స : 
ఇక ముఖ్య విషయమైన చికిత్స ఏమిటి ఈ లక్షణాలకు ?  దీనికి సమాధానం  మిగతా మానసిక రుగ్మతలూ , వ్యాధుల లాగానే , చికిత్స , కేవలం మందులతో నే కాదు.మానసిక శాస్త్రం లో చికిత్స అంటే , మందుల తో పాటుగా , మన లో మార్పు , అంటే మన  మస్తిష్కం లో మార్పులు , అంటే మన ఆలోచనా ధోరణి లో మార్పులు.మనం ఉండే వాతావరణం లో మార్పులు.  ఈ మూడూ , లక్షణాల తీవ్రత ను బట్టి , ఒకటి గానీ , రెండు కానీ లేదా మూడూ కానీ ఆచరించాలి.
A .స్వయం సహాయం :  సెల్ఫ్ హెల్ప్ : 
మీరు , ఎంత తెలివి గలవారైతే , అంత  స్వీయ సహాయం చేసుకోగలరు, లాభ పడగలరు. ఇక్కడ గుర్తు ఉంచుకోవలసినది ముఖ్యం గా తెలివి తేటలు డిగ్రీలతో నో ,పరీక్షా ఫలితాలతోనో , పోల్చి చెప్పిన విషయం గాదు.  మీలో మీ లక్షణాలనూ , పరిస్థితులనూ , విశ్లేషణ చేసుకునే స్వభావం , శక్తి సామర్ధ్యాల ను గురించే !అన్ని చికిత్సా పద్ధతులలోకీ ఇది చాలా, చాలా ముఖ్యమైనది.  
మీరు చేయవలసినవి :
1. ఆత్మ విశ్వాసం పెంపొందించుకునే చర్యలు చేపట్టడం. అంటే  సెల్ఫ్ కాన్ఫిడెన్స్ ను వృద్ధి పరుచుకునే టేపు లు, సీడీ లో వినడం , చూడడం. అట్లాగే ఆందోళన లేదా యాంగ్జైటీ ను తగ్గించే , రిలాక్సేషన్ ప్రాక్టీస్ చేయడం , లేదా  ఆ టేపులు వినడం. 
2. ఇతరుల మధ్య ఉన్నప్పుడు , మీలో మీరు మీ ఆలోచనా సముద్రం లో కొట్టుకు పోకుండా , ఇతరులు చెప్పేది శ్రద్ధ గా వినడం అలవాటు చేసుకోవాలి.
3.ఒక నోటు బుక్ తీసుకుని, మిమ్మల్ని ఆందోళనకు గురి చేస్తూ , కలత చెందిస్తున్న నిరాశావాద అంటే నెగెటివ్ ఆలోచనలు అన్నింటినీ రాసుకోండి.అప్పుడు వాటిని సవ్యం గా చేసుకోవడానికి అవకాశం ఎక్కువ గా ఉంటుంది. అంటే మీ ఆలోచనా ధోరణి లోనూ తద్వారా మీ ప్రవర్తనా ధోరణి లోనూ మంచి పురోగమన అంటే ప్రోగ్రెస్సివ్ మార్పులు వస్తాయి.
4. సోషల్ ఫోబియా మీకు వచ్చే సమయం లో జరిగే మార్పులను , ఒకటొకటి గా మీరు విభజించు కుంటే , వాటిని మొగ్గలోనే తుంచి వేయడానికి అవకాశం ఉంటుంది. అప్పుడు ఆ ఫోబియా కలుపు మొక్క మీ ఆనంద మయ జీవిత ఉద్యాన వనం లో పెరగ లేదు ! 
 
వచ్చే టపాలో ఇంకొన్ని చికిత్సా పద్ధతులు ! 

 

సోషల్ ఫోబియా కు చికిత్స.4.

In ప్ర.జ.లు., మానసికం, Our Health, Our minds on జనవరి 28, 2013 at 12:46 సా.

సోషల్ ఫోబియా కు చికిత్స.4.

సోషల్ ఫోబియా ఎంత సామాన్యం ?:  ప్రతి వంద మంది లోకీ అయిదుగురు ఈ సోషల్ ఫోబియా తో బాధ పడుతూ ఉంటారు.

ఈ సోషల్ ఫోబియా దీర్ఘ కాలం గా ఉంటే  దాని పరిణామాలు ఏమిటి ?:
క్రితం టపాలో చెప్పుకున్నట్టు, సోషల్ ఫోబియా ఉన్న వారు, నలుగురి లోకీ చొరవగా వెళ్ళ  లేక , తమ శక్తి సామర్ధ్యాలను వంద శాతం బయట పెట్టలేక , తీవ్రమైన మానసిక వత్తిడికీ , సంక్షోభానికీ లోనవుతుంటారు. అప్పుడు వారికి డిప్రెషన్ వచ్చే అవకాశాలు ఎక్కువ గా ఉంటాయి. క్రమేణా  వారు బయటకు వెళ్ళడమూ , పది మంది లో కలవడమూ , పదిమంది లో జంకు లేకుండా మాట్లాడడమూ , లేదా తమ తమ పనులు చేసుకోవడమూ కూడా చేయలేక పోతారు. ఈ లక్షణాలు ఇంకా ఇంకా ఉంటే , వారు క్రమేణా  బయటకు వెళ్ళాలంటే నే ఉత్సాహం చూపరు.  బయటకు వెళ్ళాలంటే భయం ఏర్పడుతుంది.  క్రమేణా  వారు వెళ్ళే ప్రదేశం లో జన సంచారం ఏమాత్రం లేకపోయినా , వారు లేని పోని  భయాలు ఏర్పరుచుకుని , విపరీతమైన భయానికి లోనవుతారు. ఈ పరిస్థితిని శాస్త్రీయం గా అగారో ఫోబియా ( agorophobia  ) అని అంటారు. ఇంకా వీరు ఇంట్లో కూర్చొని ఆందోళన చెందుతూ , చెడు అలవాట్లకు బానిసలయ్యే ప్రమాదం కూడా ఉంది. అంటే ధూమ పానం , మద్య పానం  లాంటివి. ఇంకా కొందరు మాదక ద్రవ్యాలు తీసుకోవడానికి కూడా అలవాటు పడతారు. 
సోషల్ ఫోబియాకు కారణాలు ఏమిటి ?: 
ఈ సోషల్ ఫోబియా కు ఇతమిద్ధం గా కారణాలు అంటూ ఏవీ లేవు.  వ్యక్తిగతం గా తమ ప్రతి ప్రవర్తనకూ ఉన్నత ప్రమాణాలు ఉండాలని భావిస్తూ , ఖచ్చితమైన నిబంధనలు పాటించే వారిలో  , ఈ రకమైన ఫోబియా  రావడానికి అవకాశాలు మెండు గా ఉంటాయి. అంతే  కాకుండా, ఇట్లాంటి ఉన్నత ప్రమాణాలను, వారు చేసే ప్రతి పనిలో చిన్న తనం నుంచీ , వారి మీద రుద్దే వారు ( అంటే పెద్ద వారూ , తలి దండ్రులూ , టీచర్లూ ) ఉన్నప్పుడు కూడా , ఈ లక్షణాలు అలవడ వచ్చు.ఇంకా బాల్యం లో తత్తర పడుతూ , నత్తి ( అంటే స్టామరింగ్  ) ఉన్న వారు కూడా , పెరిగి పెద్దయాక , ఈ సోషల్ ఫోబియా తెచ్చుకోవడానికి అవకాశాలు ఉంటాయి.  
ఒక సారి ఈ సోషల్ ఫోబియా వచ్చాక , అది ఎట్లా  కొనసాగుతుంది ?: 
స్వంత అపోహలూ ఆలోచనలూ !
1. ” నేను వెళ్ళే ప్రతి చోటా , కలిసే  వారితోనూ , చాలా తెలివిగా ప్రర్తించాలి ! అంతే  కాక , నేను ఉన్న చోట ( అంటే పదుగురిలో ఉన్నప్పుడు కూడా ) పరిస్థితులన్నీ ,నా నియంత్రణ లోనే ఉండాలి ” అనే భావనలు .
2. ” నేను చాలా బోరింగ్ , నాలో ఏవీ ఉత్సాహ కరమైన లక్షణాలు లేవు ” అనే ఆత్మ  న్యూ నతాభావనలు.
3. ” నేను ఎక్కడ ఉన్నా , ఇతరులు నన్ను విమర్శించే ఉద్దేశం తో , నాలో లోపాలు వెదుకుతూ ఉంటారు” అనే భావన. 
4. ప్రవర్తన పంచనామా : అంటే ప్రతి సారీ , నలుగురి లో కలిసే  ముందూ , కలిసిన తరువాతా కూడా , తమ ప్రవర్తనను విశ్లేషించు కుంటూ , అన్నీ నెగెటివ్ అంటే నిరాశా వాద , భావనలే నెమరువేసుకుంటూ ఉండడం వల్ల.పైన చెప్పిన నెగెటివ్ భావనలు మనసు లో ఎప్పుడూ మెదులుతూ ఉంటే , ఈ ఫోబియా మొక్క కూడా  ఆ ” ఆలోచనల నీరు ” తాగుతూ, వృద్ధి చెందుతూ ఉంటుంది. 
 
వచ్చే టపాలో ఇంకొన్ని సంగతులు ! 

 

నలుగురిలోఉంటే , బిడియం ( సోషల్ ఫోబియా ) ఎట్లా ఉంటుంది?.3.

In ప్ర.జ.లు., మానసికం, Our Health, Our minds on జనవరి 27, 2013 at 12:06 సా.

నలుగురిలోఉంటే , బిడియం ( సోషల్ ఫోబియా )  ఎట్లా ఉంటుంది?.3.

 
సామాన్యం గా మానవులకు , కొత్త వారితో నలుగురినో , పది మంది నో కలిసినప్పుడు , కొంత బిడియం  ఉండడం సహజం. ఇది సామాన్యం గా వారితో కొంత సేపు ఉన్న తరువాత , లేదా మాట్లాడుతుంటే , తగ్గి పోతుంది. ఆ కొత్త వారితో కలిసి ఆ యా సందర్భాలను, ఆనందం గా గడపడం కూడా జరుగుతుంది. అట్లాగే ,మనకు అనేక మైన భయాలు ఉండవచ్చు , కొందరికి హైట్స్  అంటే ఎత్తైన భవనాల లోకి వెళ్ళాలంటే, లేదా సాలి పురుగును చూసో , కొంత భయం కలుగుతూ ఉంటుంది.
మరి భయం ఫోబియా అయ్యేది ఎప్పుడు ? : మరి ఈ రకమైన భయాలు చాలా మందికి ఉంటున్నా కూడా , వాటిని పట్టించుకోక , మనం చేయవలసిన పనులన్నీ  మామూలు గానే చేసుకుంటూ ఉంటాము ! కానీ ఈ రకమైన భయాలు , ఎప్ప్పుడైతే , మన నిత్య జీవితం లో మనం చేసుకునే మామూలు పనులకు కూడా అంతరాయం కలిగించి , మనలను ఆశక్తులను చేస్తాయో , అప్పుడు ఆ భయాలు ఫోబియా లు అనబడతాయి.సోషల్ ఫోబియా లో ముఖ్యం గా రెండు రకాలు గా ఆలోచించడం జరుగుతుంది.
A .మనం కలుసుకునే మనుషులు, మనల్ని ఏదో రకం గా విమర్శిస్తారనే భావన.
B . లేదా మనం నలుగురిలో ఏదో ఇబ్బంది కరం గా ప్రవర్తిస్తామేమో అనే భావన.
ఈ సోషల్ ఫోబియా కూడా రెండు రకాలు గా ఉంటుంది.
1. సాధారణ సోషల్ ఫోబియా :
a . ఈ రకం లో వీరు  కలుసుకోబోయే మనుషులందరూ వీరిని  చూస్తున్నారనీ, వీరు చేయబోయే ప్రతి పనినీ గమనిస్తున్నారానీ , అనుకుంటూ ఉంటారు !
b .వీరికి  ఇతరులతో పరిచయం చేసుకోవడం, లేదా ఇంకెవరితో నైనా చేయించుకోవడానికి  కూడా సుముఖం గా ఉండరు !
c .వీరు   బయటకు వెళ్లి , ఏ  షాపు కో , షాపింగ్ కాంప్లెక్స్ కో , లేదా ఏ  హోటల్ కో వెళ్ళడానికి కూడా ఇబ్బంది గా ఉండి , బయటకు వెళ్ళడం మానేస్తారు !
d .నలుగురిలో, ఏ  పానీయం గానీ , ఆహారం కానీ తీసుకోవడానికి జంకుతారు !  
e .బయటకు వెళ్లి  పై బట్టలు తీసి వేసుకోవడానికి ( అంటే ఉదాహరణకు బీచ్ కు వెళ్ళినప్పుడు ) కూడా చాల సిగ్గు పడతారు వీరు ! ( ఇట్లాంటి పరిస్థితి పాశ్చాత్య దేశాలలో సాధారణం గా ఉంటుంది ! ) సోషల్ ఫోబియా పరం గా ఇది స్త్రీ పురుషులిద్దరికీ వర్తిస్తుంది ! 
f .అంతే  కాక ,  వీరు వీరి అవసరాలను తెలుపడానికి , అంటే ఎసర్టివ్  గా ఉండడానికి కూడా జంకుతూ  ఉంటారు , సోషల్  సిచు యే షన్  లలో ఉన్నప్పుడు .
ప్రత్యేకించి , ఏదైనా ఫంక్షన్ జరిగినప్పుడో , లేదా పార్టీ జరిగినప్పుడో ఈ సోషల్ ఫోబియా కనబడుతూ ఉంటుంది. ఈ ఫోబియా ఉన్న వారు ,  ఫంక్షన్ హాలు లోకి గానీ ,పార్టీ హాలులోకి గానీ ప్రవేశించడానికి జంకుతూ  ఉంటారు. అందు వల్ల , వారు ముందే అక్కడకు చేరుకున్నా , లోపలి కి ప్రవేశించక , బయటే తచ్చాడు తూ  ఉంటారు.ఈ సోషల్ ఫోబియా తీవ్రం గా ఉన్న వారు , ఒక సిగరెట్ తాగడమో , లేదా మందు పుచ్చుకోవడమో  కూడా చేస్తూ ఉంటారు , ఇట్లా పార్టీ లకు వెళ్ళే ముందు ! దానివల్ల పరిస్థితి ఇంకా సమస్యా భరితం అవుతుంది.
2.ప్రత్యేకమైన సోషల్ ఫోబియా : 
ఈ రెండో రకమైన సోషల్ ఫోబియా సాధారణం గా , సేల్స్ మెన్ లోనో , టీచర్లూ, సంగీత కారులూ , నటులు , లేదా నటీ మణులు అనుభవిస్తారు. వీరు సాధారణం గా  నలుగురిలో కలిసి సరదాగా ఉండడానికీ , సమయం గడపదానికీ ఏ విధం గానూ ఇబ్బంది పడరు. కానీ నలుగురిలో , ఒక విషయం మీద మాట్లాడ వలసి వచ్చినప్పుడు కానీ , వారికి సమాధానం ఇవ్వ వలసి వచ్చినపుడు కానీ , విపరీతం గా ఫోబియా కు లోనవుతారు !  వారి కి మాట రాక తత్తర పడుతూ ఉంటారు కూడా !  చాలా అనుభవం ఉన్న వారు కూడా ఈ ప్రత్యేకమైన సోషల్ ఫోబియా ఉంటే  ఇట్లా ప్రవర్తిస్తారు ! ఈ పరిస్తితులల్లో , వారు  ఆందోళనకు లోనై , చెమటలు పట్టడం , నోరు పొడిగా అవడం , గుండె వేగం గా కొట్టుకోవడం , మూత్ర విసర్జనకు ఆత్రుత పడడం  కూడా తరచూ జరుగుతూ ఉంటుంది ! ఇంకా తీవ్రం గా ఈ లక్షణాలు ఉంటే , అది ప్యానిక్ గా పరిణమిస్తుంది.  ఈ ప్యానిక్ ఎటాక్ లో , విపరీతమైన ఆందోళన , భయం కలిగి , వారు వారి పరిస్థితి మీద పట్టు కోల్పోతున్నామనే నిర్ణయానికి  వచ్చి , కూలబడి పోతారు ! కొన్ని క్షణాలు వారు శక్తి హీనులూ , నిర్వీర్యులూ అవుతారు ! 
 
వచ్చే టపాలో ఇంకొన్ని సంగతులు ! 

యాంటీ బయాటిక్స్( పని చేయక పొతే ) ప్రళయం !

In మానసికం, Our Health, Our minds on జనవరి 26, 2013 at 10:34 ఉద.

యాంటీ బయాటిక్స్( పని చేయక పొతే ) ప్రళయం ! 

The hospital superbug MRSA

 
ఇది అన్నది ఎవరో  చదువు రాని  వారు కాదు !  ఇంగ్లండు దేశానికి ప్రధాన వైద్య అధికారిణి  డేం సాల్లీ డేవిస్  నిన్న ఇంగ్లండు పార్ల మెంటు సభ్యులను ఉద్దేశించి ప్రసంగిస్తూ అన్న మాటలు ! 
అంతే  కాక , పార్లమెంటు సభ్యులు ,  అత్యవసర ప్రాతిపదికన  తదనుగుణం గా చర్యలు చేపట్టాలి అని కూడా ఆమె  అన్నది ! అంటే , అత్యవసర పరిస్థితి ప్రకటించి ప్రజల ఆరోగ్యాన్ని రక్షించడానికి చర్యలు చేపట్టడం ! ఇట్లా చాలా అరుదు గా అంటే వేల  సంఖ్య  లో అంటువ్యాధుల వల్ల  ప్రజలు మరణించే ప్రమాదం ఉన్నప్పుడు. ఇటీవల , స్వైన్ ఫ్లూ ప్రమాదం సంభవించి నప్పుడు కూడా , అనేక దేశాలలో అత్యవసరం గా అనేక చర్యలు తీసుకోవడం జరిగింది. సాల్లీ డేవిస్  మరి ఇంగ్లండు దేశ ప్రజలకు అత్యవసరం అయ్యే ఈ యాంటీ బయాటిక్స్ ప్రళయం కలిగిస్తాయని ఎందుకు అన్నదో  తెలుసుకుందాం ! 
ఆమె ప్రస్తుతం యాంటీ బయాటిక్స్ పరిణామాల పరిస్థితిని , ఒక పెద్ద విపత్కర వరద పరిస్థితి తోనూ , ఫ్లూ పాన్ డెమిక్  తోనూ , లేదా ఉగ్రవాదులు  ఎక్కువ మంది ప్రజలను పొట్టన పెట్టుకోవడం తోనూ పోల్చింది.(  ఇంగ్లండు లో పైన చెప్పిన పరిస్థితులలో , అత్యవసర పరిస్థితి ప్రకటించి వివిధ చర్యలు చేపట్టడం కూడా జరిగింది ). 
అయినప్పటికీ , ఇంగ్లండు లో యాంటీ బయాటిక్స్ విరివి గా వాడుతూ  ఉండడం వల్ల , వాటి ప్రభావం తగ్గి పోతుందని తెలుస్తుంది. ఇట్లా యాంటీ బయాటిక్స్ పని చేయక పోవడం అనేది కొన్ని వందల పేషెంట్ లలో జరిగి వారి ప్రాణాలు పోవడం జరిగింది.అంతే  కాక ఇట్లా యాంటీ బయాటిక్స్ తీసుకుంటున్న వారి లో అవి పని చేయక పోవడం క్రమేణా  ఎక్కువ అవుతుంది. ఇదే పరిస్థితి కొన  సాగితే , వచ్చే ఇరవై ఏళ్ల  లో , మనుషులు సాధారణ ఆపరేషన్ లు చేయించుకున్నా ,ఇన్ఫెక్షన్ కనుక సోకితే ,ఇచ్చే యాంటీ బయాటిక్స్  పని చేయక , ప్రాణాలు కోల్పోవడం సామాన్యం అవుతుందని ఆమె అన్నది. ఈ యాంటీ బయాటిక్  రెసి స్టెన్స్  అనే విషయం కొత్తదేమీ కాదు.  యాంటీ బయాటిక్స్ కనుక్కున్నప్పటి నుంచీ , ఉన్నది. అంటే అవి వాడగా వాడగా , వాటితో  పోటీకా  అన్నట్టు , వివిధ రోగ కారక బాక్టీరియా లు కూడా , కొత్త కొత్త రకాలు గా వాటి లో నిరోధక శక్తిని  కలిగించుకుంటాయి. అందువల్ల , బ్యాక్టీరియా లు నాశనం అవక ,మన శరీరం లో ఇన్ఫెక్షన్ ను ఎక్కువ చేసి , మానవ మరణాలకు కారణమవుతాయి. MRSA ఎమ్మారెస్సె  అనే యాంటీ బయాటిక్స్ కు లొంగని ఇన్ఫెక్షన్ కూడా , ప్రస్తుతం ఇంగ్లండు లో అనేక ఆసుపత్రులలో పెద్ద తలనొప్పి గా పరిణమించింది ! 
శాస్త్ర విజ్ఞానం అభివృద్ధి చెందుతూ , కొత్త కొత్త మందులు కనుక్కోవడం వల్ల , ఈ బ్యాక్టీరియా లను కూడా నిర్మూలించే అవకాశం ఉండేది ఇప్పటి వరకూ ! కానీ అత్యంత  శక్తివంతమైన కార్బిపెనెమ్  అనే యాంటీ బయాటిక్ కు కూడా, అది పని చేయక , బ్యాక్టీరియా ల లో నిరోధక శక్తి పెరిగినట్టు ఇటీవల తెలిసింది.అంతే కాక క్యాన్సర్ చికిత్స కు అనేక కొత్త మందులు కనుక్కుంటూ ఉండడం తో , అవి కూడా  శరీరం లో రోగ నిరోధక శక్తి ని తగ్గిస్తాయి. ఇది కూడా బ్యాక్తీరియాలు విజ్రుభించ డానికి , ఒక కారణం.
రోగ కారక బ్యాక్టీరియా లు  ఇదివరలో లా కాక ఇప్పుడు యాంటీ బయాటిక్స్ కు అసలే  లొంగడం లేదనడానికి ఇంకో ఉదాహరణ : గనేరియా. గనేరియా ఒక సుఖ వ్యాధి. అంటే ఈ వ్యాధి ఉన్న పురుషుడి తో( ఆరోగ్యం గా ఉన్న )  స్త్రీ కానీ , లేదా ఈ వ్యాధి ఉన్న స్త్రీతో  ( ఆరోగ్యం గా ఉన్న ) పురుషుడు కానీ సంభోగం జరిపితే గానీ వస్తుంది. ఇప్పటి వరకూ , ఈ గనేరియా వ్యాధి , టెట్రా సైక్లిన్ , పెనిసిలిన్ , అనే మనకు పరిచితమైన యాంటీ బయాటిక్స్ కనుక వాడితే చప్పున నయమయేది.కానీ  ప్రస్తుతం , 80 శాతం  కేసులలో ఈ వ్యాధి ఆ యాంటీ  బయాటిక్స్ కు  నిర్మూలనం అవడం లేదు !  అందువల్ల కొత్త యాంటీ బయాటిక్స్ వాడడం జరుగుతుంది. ఇంకో ఆందోళన కర పరిణామం ఏమిటంటే , ఇంత  వరకూ , మల్టీ డ్రగ్  చికిత్స కు చప్పున నయమవుతున్న  టీబీ ( TB ) వ్యాధి కూడా ఆ మందులకు నయ మవ్వక తిరగబడడం మొదలు పెట్టింది. 
భారత దేశం లో ప్రజలూ , వైద్య అధికారులూ ,  ఈ మార్పులను అవగాహన చేసికొని తదనుగుణం గా చర్యలు తీసుకోవాలి ! ముఖ్యం గా ప్రజలు, చాలామంది డాక్టర్ దగ్గరికి వెళ్ళినపుడు , కనీసం జ్వరం వచ్చినా , యాంటీ బయాటిక్స్ డాక్టర్ రాయక పొతే తృప్తి పడరు. ” ఆ డాక్టరు , మళ్ళీ రావాలని , తన చుట్టూ తిప్పించుకుని , డబ్బులు లాగాలని చూస్తున్నాడు ” అని అనుకుంటారు ! వెంటనే చికిత్స కు యాంటీ బయాటిక్స్ ఇవ్వాలని అనుకునే వారు ఎక్కువ శాతం మంది ఉన్నారు.  ఈ ఆలోచనా ధోరణి లో మార్పు రావాలి. ఇంగ్లండు దేశం లో సామాన్యం గా యాంటీ బయాటిక్స్ ఎడా పెడా  ఎవరు బడితే వారు ప్రిస్క్రైబ్ చెయ్యరు.  అంటే యాంటీ బయాటిక్స్ ను వాడమని చెప్పే వారు తప్పని సరిగా డాక్టర్లూ , స్పెషలిస్టు డాక్టర్లు అయి ఉండాలి ( భారత దేశం లో ,విచ్చల విడిగా, ఎవరు పడితే వారు, ఆఖరికి , చాలా సందర్భాలలో మందుల షాపు లో పని చేసే వారు కూడా యాంటీ బయాటిక్స్ వాడమని సలహా ఇస్తారు ! ఇక నర్సింగ్ హోము లలో అయితే సరే సరి !  ఆ ఇచ్చే యాంటీ బయాటిక్స్ ను వీలు చేసుకుని  ఏ  సెలైన్ బాటిల్ ఇచ్చిన తరువాతో , లేదా ఏ  గ్లూకోజు బాటిల్ నరం లోకి ఎక్కించిన తరువాతో , పేషెంట్ ల నరాలలోకి ఎక్కిస్తారు !  )
( తరచూ , చీటికీ , మాటికీ , అనవసరం గా యాంటీ బయాటిక్స్ కనుక తీసుకుంటూ ఉంటే ,  మనలో రోగనిరోధక శక్తి తగ్గి పోయి , ఇన్ఫెక్షన్ కారకమైన బ్యాక్టీరియా లలో నిరోధక శక్తి పెరుగుతుంది. అంటే ఆ బ్యాక్టీరియా లు  మనం తీసుకునే యాంటీ బయాటిక్స్ కు నశించక  పోగా, వృద్ధి చెందుతూ , రోగ తీవ్రత కు కారణ మావుతాయనే యదార్ధాన్ని అందరూ గుర్తు ఉంచుకోవాలి ! )
 
ఈ క్రింద ఉన్న ప్రకటన చూడండి ! ఇది రెండో ప్రపంచ యుద్ధం సమయం లో వచ్చినది. కానీ ఇప్పటికీ వర్తిస్తుంది ! 
      వచ్చే టపాలో ఇంకొన్ని సంగతులు !  

నలుగురిలో బిడియమూ , సిగ్గూ !.2.

In ప్ర.జ.లు., మానసికం, Our minds on జనవరి 25, 2013 at 10:21 ఉద.

నలుగురిలో బిడియమూ , సిగ్గూ !.2. 

 
మిగతా కారణాలు :  సామాన్యం గా ఆందోళన ( ఏదో తెలియని భయం ) కూ బిడియానికీ , సంబంధం ఉందని శాస్త్రజ్ఞులు అభిప్రాయ పడతారు. చిన్న పిల్లలలో , భయం, భయం గా ఉంటున్న పిల్లల కంటే , భయం తక్కువ గా ఉన్న పిల్లలు తక్కువ సిగ్గు, బిడియం గా ఉంటారు. జీవ శాస్త్ర రీత్యా పరిశీలించినట్టయితే , భయం గా ఉన్న వారిలో కార్టిసోల్  అనే హార్మోను ఎక్కువ గా ఉత్పత్తి అవుతుంది. ఇటీవలి పరిశోధనలలో , ఇంకా కొన్ని హార్మోనులు కూడా ఈ బిడియాన్నీ, సిగ్గునూ మానవులలో ప్రభావితం చేస్తాయని తెలిసింది.
పాదరస ప్రభావం : పద్దెనిమిదవ శతాబ్దం లో ఇంగ్లండులో టోపీలు తయారు చేసే వారు , విపరీతమైన ఆందోళనా , భయాలకు లోనై , పిరికి గా ప్రవర్తిన్చేవారు ట.అంటే వారు స్త్రీ పురుషులైనప్పటికీ , ఈ లక్షణాలు తరచూ వారిలో కనిపిస్తుంటే , పరిశీలించి చూడగా , దీనికి కారణం , పాదరస ప్రభావం అని తెలిసింది.ఆ కాలం లో టోపీలు తయారు చేసే సమయం లో పాదరసం వాడే వారు. ఆ పాదరసం వారు పీల్చగా పీల్చగా , పాయిజనింగ్ అయి , వారిలో  ఆ లక్షణాలు కనిపించాయి.
చిన్న తనం లో బిడియం గా ఉండే వారు , పెద్దైనా కూడా అంతేనా ?:
చాలా మందిలో , బాల్యం లో ఉండే బిడియం , సిగ్గు, వారు పెరిగి పెద్దైన తరువాత మటు  మాయం అవుతుంది. వారు సమాజం లో చక్కగా , ఏ సిగ్గూ , బిడియామూ  లేకుండా ఇమిడి పోతారు.  కాక పొతే , బాల్యం లో ఈ బిడియమూ, సిగ్గూ , వారి చదువులో అభివృద్ధి కి అవరోధం గా ఉంటుంది.  క్లాస్ రూం లో  సిగ్గు , బిడియం ఉన్న విద్యార్ధులు , అవి లేని వారితో పోలిస్తే , తక్కువ గా పర్ఫాం చేస్తారు. అంటే వారి శక్తి సామర్ధ్యాలు పూర్తి  గా వినియోగించలేక పోతారు.చాలా సమయాలలో , ఈ సిగ్గూ , బిడియమూ , వివిధ సామాజిక  సమూహాలలో ఇతర ( కొత్త ) వ్యక్తులతో కలిసినప్పుడు  ఏమి మాట్లాడాలో తెలియక పోవడం వల్ల  ఉత్పన్నం అవుతుంది. ఇంకొన్ని సమయాలలో ఏదో తెలియని  అనీజీనెస్స్  అంటే  ఇబ్బంది గా అనిపించి కూడా , సిగ్గు పడ వచ్చు !  ఎక్కువ సమయాలలో ఈ రెండు కారణాలూ కలిసి కూడా బిడియమూ , సిగ్గూ కలిగిస్తాయి. 
తెలివి తేటలకూ, బిడియానికీ  సంబంధం ఉందా ? : 
ఇప్పటి వరకూ అనేక పరిశోధనల వల్ల , ఒకరి తెలివి తేటలకూ వారి బిడియానికీ , సిగ్గుకూ ఏమాత్రం సంబంధం లేదని తెలిసింది. ఏమైనా ఉన్నదంటే అది పాజిటివ్ సంబంధమే ! అంటే  సిగ్గు , బిడియం ఎక్కువ గా ఉన్న వారు , ఇతర ” మామూలు ” మనుషుల కంటే ఎక్కువ ప్రతిభావంతులని కూడా తెలిసింది.అందుకే , మనం చూస్తుంటాము , తరచుగా , మెడికల్ , ఇంజినీరింగ్ ప్రవేశ పరీక్షలలో ప్రధమం గా వచ్చినవారు ( అంటే టాపర్స్ ) కూడా , వినయం గా సిగ్గుగా , బిడియం గా కనిపిస్తూ ఉంటారు టీవీ షో లలో !  ఈ కారణం వల్ల నే , కొందరు మానసిక విశ్లేషకులు , ఈ సిగ్గు , బిడియాలు కాస్త ఎక్కువ గా చూపించే వారు , కేవలం తమకు ఇష్టం లేని , ప్రతి కూల  సామాజిక పరిస్థితులలో, అంటే సోషల్ సిచుఎషన్స్  లో  తమ ఇష్ట ప్రకారం, చేసే ప్రవర్తన కూడా కావచ్చు  అని అంటారు ( అంటే వారు , తమకు తెలిసి ఉండే , ఈ విధం గా ప్రవర్తిస్తారు, అంటే వాలంటరీ బిహావియర్ )
 
అందుకే, బిడియ  పడే వారూ , అతిగా సిగ్గు పడే వారు , కంగారూ , ఆందోళన పడ నవసరం లేదు , వారికి ఏదో తీవ్రమైన మానసిక రుగ్మత ఉందనుకుని !
 
వచ్చే టపాలో ఇంకొన్ని సంగతులు ! 

 

నలుగురి లో బిడియమూ , సిగ్గూ ! ,( shyness and social phobia )

In మానసికం, Our Health, Our minds on జనవరి 24, 2013 at 11:45 ఉద.

నలుగురి లో బిడియమూ , సిగ్గూ ! ,( shyness  and  social  phobia  ) : 

 
మానసిక విశ్లేషకుల అభిప్రాయం ప్రకారం, సిగ్గు, ఇతరులెవరైనా సమీపించి నప్పుడు కానీ , వారు ఇతరులను సమీపిస్తున్నప్పుడు కానీ అనుభవించే  , ఒక రకమైన కంగారూ , ఎబ్బెట్టు లేదా  ముభావం. ప్రత్యేకించి కొత్త వాతావరణం లో కొత్త మనుషుల దగ్గర.  ఈ అనుభవాల తీవ్రతను బట్టి వాటి పేర్లు కూడా మారుతూ ఉంటాయి. అంటే , ఈ సిగ్గు , బిడియం  కాస్తా తీవ్రం అయినప్పుడు , సోషల్ ఫోబియా , లేదా సోషల్ యాంగ్జైటీ అవుతుంది. పురుషుడు  ( లేదా యువకుడు )  సమీపిస్తున్నప్పుడు , లేదా చూస్తున్నప్పుడు ,వయసు లో ఉన్న  అమ్మాయి లో సహజం గా ఉండే బిడియం , సిగ్గు  పైన చెప్పుకున్న వాటి కోవ  కు చెందదు.  ఆ సిగ్గు వారిలో ప్రక్రుతి తో తమ సంగమాన్ని తెలియ చేస్తుంది .  ముగ్ధ మనోహరమైన వారి  సిగ్గులో ఒక విరిసీ విరియని సుగంధ పుష్పం సాక్షాత్కరిస్తుంది . మనం తెలుగు సినిమాలలో చూసే అసంఖ్యాక   తొలి రాత్రి ద్రుశ్యాలను , యువతి లో సిగ్గు లేకుండా ఊహించుకోలేము ! ( ఆంగ్ల సినిమాల సంగతి వేరు కదా ! ) ( కౌమార దశలో కి అడుగు పెడుతున్న బాలురు కూడా తరచూ సిగ్గు పడుతూ ఉంటారు. ఈ సిగ్గు కూడా సహజమైనదే ! అంటే ఇట్లా ఉండే సిగ్గు అసాధారణం అనబడదు. కానీ  వారు,  ఇరవై సంవత్సరాల వయసు వచ్చినప్పుడు కూడా అట్లాగే సిగ్గు పడుతూ ఉంటే , ఆ విషయాన్ని  పరిశీలించాలి ! )ఈ సోషల్ ఫోబియా వల్ల  అనేకమంది ప్రతిభావంతులు అయిన యువతీ యువకులు , చొరవ ఏమీ లేని , కొన్ని సమయాలలో చేత గాని వారి లా ముద్ర వేయ బడతారు. వారికి వచ్చిన లేదా వచ్చే అమూల్య మైన అవకాశాలను కోల్పోతూ ఉంటారు.
మరి ఈ సిగ్గు , నలుగురిలో బిడియం గురించి శాస్త్రీయం గా తెలుసుకుందాం !  
ఈ సిగ్గూ , బిడియాల మూలాలేంటి ?: 
ముఖ్యం గా ఆ వ్యక్తి  కి సంక్రమించిన జన్యువుల ప్రభావం , వారు పెరిగే  వాతావరణం ప్రభావం కూడా ఉంటుంది. ప్రత్యేకించి , వారి వారి చిన్న తనం లో వారిని  శారీరికం గా కానీ మానసికం గా కానీ చాలా అవమానం, హేళన చేసిన సంఘటనలు ఉంటే , వారి మనసులలో అవి చెరగని ముద్ర వేసి , వారి భవిష్యత్తులో కూడా  వారు అభివృద్ధి చెందలేని అగాధాలను శ్రుష్టిస్తాయి.  సిగ్గు, బిడియం , కనీసం కొంత వరకైనా వారి వారికి సంక్రమించిన జన్యువుల ప్రభావం వల్లనని శాస్త్రజ్ఞులు నమ్ముతారు. వారి దృష్టి లో మొదట గా సిగ్గు పడడం  జరిగి , తరువాత , తరువాత , వారు వివిధ సామాజిక వాతావరణాలలో ఉన్నప్పుడు , ఆందోళన చెందడం వల్ల  సోషల్ యాంగ్జైటీ గా పరిణమిస్తుందని అభిప్రాయ పడతారు.  ఇట్లా సోషల్ యాంగ్జైటీ గా లక్షణాలు పరిణామం చెందినప్పుడు,  ఈ లక్షణాల తో పాటు గా , మానసికం గా క్రుంగి పోయే లక్షణం అంటే డిప్రెషన్ కూడా ఉంటుంది. అందువల్ల ఆ యాంగ్జైటీ ఉన్నప్పుడు , చెప్పలేని భయం అంటే ఫియర్ ఇంకా  ప్యానిక్ లక్షణాలను కూడా వారు అనుభవిస్తారు. కొన్ని పరిశీలనల ద్వారా పాశ్చాత్య దేశాలలో  గర్భం దాల్చిన కాలం లో  పగలు కాంతి తక్కువ గా ఉన్నప్పుడు కూడా వారికి పుట్టిన సంతానం లో ఈ సిగ్గు, నలుగురి లో బిడియం ఎక్కువ గా ఉంటున్నాయని కనుక్కున్నారు ( భారత దేశం లో ఈ విషయం చాలా మందికి తెలియదు. ఎందుకంటే , భారత దేశం లో పగలు ఎప్పుడూ పగలే ! అంటే ఒకే రకం గా వెలుతురు  గా ఉంటుంది. కానీ పాశ్చాత్య దేశాలలో  చలి కాలం లో కేవలం మధ్యాహ్నం మూడింటికే చీకటి పడుతుంది ! ) 
 
వచ్చే టపాలో సిగ్గు గురించి ఇంకొన్ని సంగతులు  !