ప్రేమించడం ఎట్లా ? 4.
నిన్ను నీవు క్షమించుకో ! : వయసు పెరుగుతున్న కొద్దీ , మనసు కూడా పెరిగి , చాలామంది , ఆత్మ శోధన చేసుకుంటూ ఉంటారు ( రాజకీయ నాయకులు తప్ప ). ఇట్లా ఆత్మ శోధన చేసుకోవడం లో ఉద్దేశం , తాము చేసిన తప్పులు పొర పాట్లను , బేరీజు వేసుకుని , ముందు ముందు అట్లాంటి పొర పాట్లు కానీ , తప్పులు కానీ చేయకుండా జాగ్రత్త పడడానికి ! అంత వరకూ బాగానే ఉంది కానీ , ఆ చేసిన పొరపాట్లు మానవులను కృంగ దీయ కూడదు ! ఈ అనంత కాల చక్రం లో, మానవ జీవితం, లిప్త కాలమే ! అంటే ఎవరూ శాశ్వతం కాదు ! తప్పులు చేయడం , మనవల్ల తప్పులు జరుగుతూ ఉండడం కూడా సహజమే ! అవి పొరపాట్లు ఏవీ జరగక పోవడమంత సామాన్యం !
తెలిసి , తెలిసి చేసే తప్పులు క్షమించ రానివి ! అట్లాగే , కొన్ని తప్పులు తెలియకుండా కూడా జరుగుతుంటాయి ! ఈ తప్పు ఒప్పులు కూడా సాపేక్ష సూత్రాలను పాటిస్తాయి ! అంటే ఒకరికి ఒక విషయం తప్పు అనిపిస్తే , ఇంకొకరికి అది ఒప్పు అనిపిస్తుంది ! అంటే, కేవలం ఎవరికి వారు ఆ సందర్భం లో , ఆ సంఘటన ను అంచనా వేసుకుని ,తమ తమ అభిప్రాయాలను ఏర్పరుచు కోవడం ! మరి మనల్ని , మనం కేవలం అంతా ఖచ్చితం గా తప్పులు లేకుండా జీవిస్తున్నప్పుడే , ప్రేమించు కుందామా ? అంటే అప్పుడు మనం ఆ విషయం లో తప్పు చేస్తున్నామనే చెప్పుకోవాలి ! ఇందుకు కారణాలు రెండు ! ఒకటి : ఈ భూగోళం లో తప్పులు చేయని మానవులు అంటూ ఎవరూ లేరు ! దేవుడిని నమ్మే వారుకూడా , దేవుడు కూడా చాలా రకాలు గా తప్పులు చేయడం వారి జీవితం లో ఏదో ఒక దశలో అనుభవ పూర్వకం గా తెలుసుకుంటారు ! రెండు : మీరు కనుక ఎదుటి వారెవరూ పర్ఫెక్ట్ కాదు అని ఒక అభిప్రాయం కనుక ఏర్పరుచుకుంటే , మరి ఆ అభిప్రాయానికి మీరు ఎందుకు మినహాయింపు కావాలి ? మీరు కూడా అదే ప్రమాణాన్ని పాటించాలి ! అంటే , ఇతరులలో అస్సలు తప్పే చేయని వారు లేరు అని అనుకుంటున్నప్పుడు , ఆ అభిప్రాయం మీకూ వర్తిస్తుంది ! మనం పొరపాట్లూ , తప్పులూ చేయకుండా , జ్ఞానం సముపార్జించ లేము కదా ! ముందుగా, మనం ఈ విషయాన్ని సరిగా అవగాహన చేసికొని , అంటే పొరపాట్లు, లోపాలూ , మానవ సహజం అనీ , అందుకు ఎవరూ మినహాయింపు కాదనే సత్యాన్ని అంగీకరిస్తే , అప్పుడు మనలో క్షమా గుణం చిగురిస్తుంది ! ఇతరులలో, మనకు గోచరించే తప్పులు , పొర పాట్లూ , కూడా క్షమార్హం అవుతాయి ! అంటే మనం ప్రేమించే వ్యక్తులు కూడా మన ప్రేమకు పాత్రు లవుతారు ! అంటే, మనం ప్రేమించే వారిలో మనం లోపాలు ఎత్తి చూపడం చేయం ! వారిలో మనకు అభినందనీయ గుణాలే గోచరిస్తాయి ! మనం ఇతరులను ప్రేమించ గలగడం లో ఒక ముఖ్య సూత్రం , మనల్ని మనం క్షమించుకోవడం , ఇతరుల లోపాలను క్షమించ గలగడం ! బాల రాజు కధ సినిమా లో , ఈ విషయాన్ని ముళ్ళ పూడి రమణ గారు చక్కగా చెప్పారు ఒక సూత్రం ‘ ఒక్క వేలు చూపి ఒరులను వెక్కిరింప , వెక్కిరించు నిన్ను మూడు వేళ్ళు ‘ అని !
వచ్చే టపాలో ఇంకొన్ని సంగతులు !
బాగు www. baagu.net 
very interesting,good pic
సర్, తప్పొప్పుల వివరణ ఇంతకంటే ఎవరూ చేయలేరు మీరు తప్ప.
ఒకసారి చేస్తే అది పొరపాటు, అదే రిపీట్ చేస్తే తప్పు అవుతుంది నిజమే కదా.,
విలువైన మీ విష్లేషణతో నాకు కొన్ని కవితా వస్తువులు దొరుకుతున్నాయి.(చూశారా కాపీ రైటింగ్… ఎంతైనా టీచర్ ని కదా:-).