పని సూత్రాలు.3. ఇంకొకరి పని మీరు చేయ వచ్చా ?
వర్క్ ప్లేస్ లో సామాన్యం గా ఇతర కొలీగ్స్ లీవ్ మీద ఉన్నప్పుడు కానీ, వారు ఆకస్మికం గా ఇతర కారణాల వల్ల , డ్యూటీ కి రానప్పుడు , అత్యవసర చర్య గా మీరు ,వారి జాబ్ ను కవర్ చేయడం జరుగుతుంది.ఆఫీసులలో, కొంతమంది చాలా ఉదారం గా ఉంటారు. వారు వారి కొలీగ్స్ ఉద్యోగానికి వచ్చినా , వారి పనులు కొన్ని చేసి వారికి ” ఉపకారం ” చేస్తూ ఉంటారు. ప్రత్యేకించి , ఆఫీసులో యువతులు ఉన్నప్పుడు, పురుషులు చాలా స్నేహ పూర్వకం గా , ఉంటూ , వారి ఉద్యోగం లో సహాయం చేస్తూ ఉంటారు. ఇంకొందరు, ఇంకొంత ముందుకు పోయి , వారు మూడవ తరగతి , నాల్గవ తరగతి కి చెందిన ఉద్యోగాలు చేస్తూ కూడా , ఆ ఆఫీసులో వారికి తెలియనిది ఏదీ లేదన్న ధీమా తో ఉంటారు. ప్రతి ఉద్యోగి విధులలో ” వేలు ” పెడుతూ ఉంటారు. వారి పైన ఉన్న ఉద్యోగులకు కూడా సలహాలు ఇస్తూ ఉంటారు. అవసరం లేక పోయినా ప్రతి వారికీ సహాయం కూడా చేస్తూ ఉంటారు. ఇట్లా అత్యుత్సాహం తో అందరికీ , అన్ని విధాలా సహాయం చేసే వారు, చాలా సమయాలలో ఏ విధమైన గుర్తింపూ లేకుండా , ఎదుగు దల కూడా లేకుండా ఉంటారు. ఒక సారి ఆఫీసు అంతా , వారి పేరు ( అందరికీ సహాయం చేస్తుంటాడని ) తెలిస్తే , వారిని బాగా ‘ ఉపయోగించుకోడానికి ‘ చూస్తూ ఉంటారు. వారి విలువ కూడా కోల్పోతారు ! అందుకనే వీరు, ఇతరుల పని చేసే ముందు ప్రతి సారీ, ఆత్మావలోకనం చేసుకోవాలి.
1. ఆ పనిని తనను ఎందుకు చేయమంటున్నారు?
2. ఆ పని , ఇతరుల కోసం చేయడం లో తన లాభం ఎంత మాత్రం ఉంది ?
3.ఇతరులకు ఆ పనిని తను చేసి పెట్టడం వల్ల , ఆఫీసు హెడ్ దృష్టి లో తన మీద అభిప్రాయం ఎట్లా ఉంటుంది?
4.తాను ఆ పని చేయక పొతే ఏమవుతుంది ?
5. ఆ పని ని తననే చేయమనడం లో ఉద్దేశం, ఆ పనిని డర్టీ జాబ్ అని మిగతా అందరూ ముట్టుకోక పోవడం వలననా ?
6. లేదా ఆ పనిని తనను చేయమంటున్న వారు నిజం గానే పని వత్తిడి ఎక్కువ గా ఉండి, తన సహాయం కోసం అర్ధిస్తూ ఉన్నారా?
ఈ ప్రశ్నలన్నిటినీ వేసుకుని , సమంజసమైన సమయాలలోనే , ఇతరులకు సహాయం చేయడానికి పూనుకోవాలి. ఒక సారి వారికి సహాహాయం చేశాక , వారి ప్రవర్తన తమ తో ఎట్లా ఉంది, వారు మళ్ళీ మళ్ళీ తనను ” వాడుకోవడానికి చూస్తున్నారా ? ” అని కూడా పరిశీలించుకోవాలి ! ఈ రకమైన ఆలోచనా ధోరణి ఏర్పరుచు కోవడం వల్ల , వారు ” అడ్డ మైన గాడిద చాకిరీ ” చేసే పరిస్థితిని మళ్ళీ మళ్ళీ రాకుండా నివారించుకోగలరు !
వచ్చే టపాలో ఇంకొన్ని పని సూత్రాలు !
బాగు www. baagu.net 